གསུམ་པ་ཤན་དང་འབྲེལ་བའི་ཐུན་མོང་།
གསུམ་པ་ཤན་དང་འབྲེལ་བའི་ཐུན་མོང་ནི།
ཐུན་མོང་གི་མདོ་ཚན་བཅུ་བདུན་གྱི་སྐབས་སུ། རྩ་བར། འདི་ལ་རྗེས་སུ་ཞུགས་པ་ཉིད་ཀྱང་ཉམས་པ་ཡིན་ནོ། །རང་བཞིན་ལས་ཉམས་ན་ཡང་ངོ། །དེ་ཡོད་ན་དངོས་པོ་དེ་ལྟ་བུ་གཞན་ལ་འབྱུང་བ་ཉིད་དོ། །ཞག་བདུན་པ་ལ་རིགས་མཐུན་ལའོ། །ཞེས་པ་ནས་སོ། །འདིའི་དོན་བཤད་པ་ལ་དགོས་པ་དང༌། ཤན་གྱི་ཁྱབ་པ་དང༌།དབྱེ་བ་དང༌། མཚན་ཉིད་དང༌། རྡེག་དུས་དང༌། ངོ་བོ་དང༌། སྒྲ་བཤད་པ་དང་བདུན་ལས། དང་པོ་དགོས་པའི་དོན་ལ། ཞག་ཤན་བཅས་པའི་དགོས་པ་དང༌། སྤང་ཤན་བཅས་པའི་དགོས་པ་དང་གཉིས། དང་པོ་ནི་ལྟུང་བ་མི་འབྱུང་བའི་ཐབས་ལ་བརྩོན་པར་འགྱུར་བ་སྟེ། ཤན་ལྟུང་ལ་འཇིགས་ནས་བྱིན་རླབས་ལ་སོགས་ལ་འཇུག་པའི་ཕྱིར་རོ། །གཉིས་པ་ནི་ལྟུང་བ་དག་པའི་ཐབས་ལ་བརྩོན་པར་འགྱུར་བ་སྟེ། སྤང་ཤན་ལ་འཇིགས་ནས་མྱུར་དུ་ཕྱིར་བཅོས་པར་འགྱུར་བའི་ཕྱིར་རོ། །གཉིས་པ་ལ་ཞག་ཤན་གྱི་ཁྱབ་པ་དང༌། སྤང་ཤན་གྱི་ཁྱབ་པ་དང་གཉིས། དང་པོ་ནི། འཆང་བ་དང༌། ཟླ་འཇོག་དང༌། ལྷུང་བཟེད་འཆང་བ་དང༌། སྨན་ཞག་བདུན་པའི་གསོག་འཇོག་དང༌། ཆོས་གོས་ཟླ་བ་ཕྱེད་ཅིང་བྱིན་གྱིས་མི་རློབ་པ་དང་ལྔ་ལ་སྦྱར་ཏེ། ཞག་ཚོགས་པ་ཐལ་བ་ལས་གྱུར་པ་ཡིན་ཞིང༌། ཡོ་བྱད་བྱིན་གྱིས་བརླབས་པས། བཅས་པ་དེ་ཉིད་ཀྱི་ལྟུང་བ་ཁེགས་པའི་རིགས་ཅན་ཡིན་པའི་ཕྱིར་རོ། ། གལ་ཏེ་སྨན་ཞག་བདུན་པ་ལ་ནི། བྱིན་གྱིས་བརླབས་པས་བཅས་པ་དེ་ཉིད་ཀྱི་ལྟུང་བ་ཁེགས་པའི་རིགས་ཅན་ཡིན་པར་མ་གྲུབ་སྟེ། བྱིན་གྱིས་བརླབས་པ་ལ་བརྟེན་ནས་བཅས་པ་དེ་ཉིད་ཀྱི་ལྟུང་བ་འབྱུང་བའི་ཕྱིར་རོ། །ཞེ་ན། ཁྱབ་པ་མ་གྲུབ་སྟེ་བྱིན་གྱིས་བརླབས་པས་ཞག་བདུན་འདས་པའི་སྔ་རོལ་གྱི་གསོག་འཇོག་གི་ལྟུང་བ་ཁེགས་པའི་ཕྱིར་ཏེ། མདོ་ཉིད་ལས། བྱིན་གྱིས་བརླབས་པ་ལ་གསོག་འཇོག་མི་འབྱུང་ངོ། །ཞེས་གསུངས་སོ། །དེའི་རྗེ༷ས་སུ༷་ཞུ༷གས་པ༷འི་ཤན་འབྱུང་བ་ཉི༷ད་ཀྱ༷ང་ཉ༷མས་པ༷་ཡི༷ན་ནོ༷། །ཀྱང་ཞེས་པ་ནི་རང་སྟོབས་ཀྱིས་ཉམས་པར་མ་ཟད་ཅེས་བསྟན་ཏོ། །ཞག་ཚོགས་པའི་བར་སྐབས་སུ་སྨྱོ་བ་ལ་སོགས་པ་ཤེས་པ་ར༷ང་བཞི༷ན་དུ་གནས་པ་ལ༷ས་ཉ༷མས་ན༷་ཡ༷ང་ངོ༷་སྟེ་རྗེས་སུ་ཞུགས་པ་ཉིད་ཀྱང་ཉམས་པ་ཡིན་ནོ་ཞེས་སྔ་མར་སྦྱར་ཏེ། རང་སྟོབས་ཀྱི་ལྟུང་བ་འབྱུང་བ་ཉམས་པར་མ་ཟད་ཀྱི། གཞན་ལ་ཤན་འབྱུང་བ་ཡང་ཉམས་པ་ཡིན་ཞེས་བསྟན་ཏོ། །དེ་ཡང་ཞུ་བ་ལས། དགེ་སློང་གིས་ཆོས་གོས་རྙེད་ནས་དགུང་ལྔ་ལགས་ནས་སེམས་རྣམ་པར་འཁྲུགས་པར་གྱུར་ན་དེའི་དགུང་སྔ་མ་བཅུ་པོ་གང་ཚུན་ཆད་ནས་བགྲང་བར་བགྱི། ཉེ་བར་འཁོར་རང་གི་སེམས་ཕྱིར་རྙེད་པ་ནས་སོ། །ཞེས་གསུངས་པས། ཤན་མི་འབྱུང་བ་ནི་དེའི་གནད་ཀྱིས་སྦྱར་བ་སྟེ། ཊཱི་ཀ་ལས། ཞག་ལྔ་པོ་སྔ་མ་དག་མི་བགྲང་བ་ལས་རྗེས་སུ་ཞུགས་པས་རྒྱུན་འབྲེལ་བ་ཡང་ཉམས་པར་མངོན་ཞེས་བཤད་དོ། །དེ་ཡང་ཡུད་ཙམ་ཞིག་སྨྱོས་པར་གྱུར་ན་ཡང་རང་སྟོབས་དང་ཤན་འབྱུང་བ་ལས་ཉམས་པ་ཡིན་ཏེ། བཅས་པའི་རྟེན་མ་ཡིན་པར་གྱུར་པའི་ཕྱིར་རོ། །དེ་ཡང་སྨྱོས་པ་ལ་སོགས་པ་རང་བཞིན་མི་གནས་པ་གཙོ་བོར་གྱུར་པ་དག་གིས་ཉམས་པ་ཡིན་གྱི། རང་བཞིན་མི་གནས་པ་གཙོ་བོ་མ་ཡིན་པ་གཉིད་ལོག་པ་ལ་སོགས་པ་དག་གིས་ནི་མི་ཉམས་སོ། །གོས་སམ་ལྷུང་བཟེད་སྔར་རྙེད་པ་བྱིན་གྱིས་མ་བརླབས་པ་དེ༷་ཡོ༷ད་ན༷་ཕྱིས་རྙེད་པའི་དངོ༷ས་པོ༷་བཅས་པ་རིགས་མཐུན་དེ༷་ལྟ༷་བུ༷་གཞ༷ན་ལ༷་ཡང་ཤན་གྱི་ལྟུང་བ་ཉིད་འབྱུ༷ང་བ༷་ཉི༷ད་དོ༷། །དེ་ལྟ་བུ་ཞེས་པ་ནི་དེ་དང་འདྲ་བ་སྟེ་བཅས་པ་རིགས་མཐུན་པའོ། །འདིས་ནི་འཆང་བ་དང་ཟླ་འཇོག་ལྟ་བུ་བཅས་པ་རིགས་མི་མཐུན་ལ་ཕན་ཚུན་ཤན་མི་འབྱུང་བར་བསྟན་ཏོ། །