བདུན་ཚིགས།

---

^{[མ་དཔེ་གཟིགས་ན་འདིར་གནོན།]}

བདུན་ཚིགས་ནི་ཞག་བདུན་བདུན་ཞིང་ཁྲུས་བྱའོ། །སློབ་མས་སློབ་དཔོན་བསྲེག་ཏུ་མི་རུང༌། གལ་ཏེ་གཞན་མེད་ན་དེ་བཞིན་གཤེགས་པ་ཐམས་ཅད་ཀྱིས་བསྲེགས་པར་བསམ་མོ། །རུས་པ་ལ་ཁྲུས་བྱེད་ན། རང་ཉིད་ཡི་དམ་ལྷར་བསྐྱེད་ལ། རང་གི་སྙིང་ག་ནས་འོད་འཕྲོས་པས། ཡེ་ཤེས་པ་བཀུག་ལ་རུས་པ་ལ་གཞུག་ཡང་སྙིང་ག་ནས་འོད་ཟེར་གྱིས་ལྷ་མོའི་ཚོགས་ནམ་མཁའ་ལ་བལྟས་ལ། དེ་རྣམས་ཀྱིས་བུམ་པ་བཟུང་ནས་ཁྲུས་བྱས་པར་བསམ་མོ། །ཇི་ལྟར་བལྟམས་པ་ཞེས་བྱ་བ་ལ་སོགས་པའི་སྔགས་དང་བཅས་པ་བརྗོད་ཅིང་ཁྲུས་བྱའོ། །དབང་བསྐུར་ནས་རོ་ཁྲུས་བྱ། ལྷར་བསྐྱིད་ལ་ཡེ་ཤེས་པ་གཞུག །དེ་ལ་དབང་བསྐུར་དེ་དུས་རང་གིས་ཚིག་བཤད་བརྗོད། དེ་ཡང་དེའི་སློབ་མ་སྙིང་ཉེ་བས་བྱའོ། །རུས་པ་དེ་བུམ་ཆུས་ཞག་བདུན་ལ་ཉི་མ་རེ་རེ་ལ་ཁྲུས་འཁོར་གསུམ་གསུམ་དུ་བདུན་ཕྲག་བདུན་དུ་བྱའོ། །ཡི་གེ་བརྒྱ་པ་བཟླས་ཤིང་བྱ་གསུངས།།