ཡེ་ཤེས་ཀྱི་མེ་སྦར་བ་ཞེས་བྱ་བའི་སྦྱིན་སྲེག་གི་ཆོ་ག།
ཐབ་ཁུང་གི་མཚན་ཉིད་བསྟན་པ།
༄། །རྒྱ་གར་སྐད་དུ། ཛྙཱ་ནཱ་གན་ཛྭཱ་ལ་ཧོ་མ་བི་དྷི་ནཱ་མ། བོད་སྐད་དུ། ཡེ་ཤེས་ཀྱི་མེ་སྦར་བ་ཞེས་བྱ་བའི་སྦྱིན་སྲེག་གི་ཆོ་ག །དཔལ་ནག་པོ་ཆེན་པོ་ལ་ཕྱག་འཚལ་ལོ། །གང་ཞིག་དྲན་པའི་སྐད་ཅིག་གིས། །འགྲོ་རྣམས་འཇིགས་བྱེད་འདོད་ཆགས་སོགས། །བུད་ཤིང་སྲེག་པའི་ནག་པོ་ཆེ། །ཡེ་ཤེས་མ་ཆེན་ལ་ཕྱག་འཚལ། །གསལ་ལ་མ་ཚང་མེད་བསྡུས་པའི། །ཡང་དག་རིམ་བཞིན་བྲི་འདོད་པས། །ཡེ་ཤེས་མེ་སྦྱོར་ཞེས་བརྗོད་པའི། །སྦྱིན་སྲེག་ཆོ་ག་བཤད་པར་བྱ། །དེ་ལ་ཆོ་ག་འདི་ནི་ཉིན་མ་བཟང་པོ་ལ་དཔལ་ནག་པོ་ཆེན་པོའི་རྣལ་འབྱོར་དང་ལྡན་པས་སྔོན་དུ་གཏོར་མ་བྱིན་ལ། ལག་པ་གཡས་པ་ཁ་སྦུབ་སྟེ་བརྐྱང་ནས་རང་གིས་སྔགས་བརྒྱ་རྩ་བརྒྱད་བཟླས་པ་ནི་ཀུན་རྫོབ་ཡང་དག་པར་བྱ་བའི་ཐབས་སོ། །ཡང་ན་སྟོང་པ་ཉིད་ཀྱིས་སོ། །ཡང་ན་ཐབ་ཁུང་ཐམས་ཅད་བཅའ་བའི་དོན་དུ་སྦྱང་བའི་བྱེ་བྲག་དངོས་གྲུབ་རིན་ཆེན་འབྱུང་གནས་སུ་བཤད་པའི་ཆོ་ག་ལྟར་རྒྱས་པར་ས་སྦྱང་བ་ལ་སོགས་པ་བྱས་ལ། ས་བདག་ཀླུའི་ལྟོ་བའི་ཁ་ཕྱོགས་སུ་ཐབ་ཁུང་རྣམས་བཅའ་བར་བྱ་སྟེ། དེ་རྣམས་ལས་ཞི་བ་ལ་ས་གཞི་དཀར་ལ་སྣུམ་པ་རྒྱར་ཁྲུ་གང་ཟླུམ་པོའོ། །དབུས་སུ་རྡོ་རྗེ་རྩེ་ལྔ་པས་མཚན་པ། ཐབ་ཀྱི་སྟེང་དུ་ཁ་ཁྱེར་ལ་འཕང་དང་རྒྱར་སོང་བཞི་པའོ། །ཁ་དོག་དཀར་པོས་བྱུག་མེ་ཏོག་དཀར་པོས་ཆལ་བར་བྱས་ཏེ་བརྒྱན་ནོ། །
༄། །རྒྱས་པ་ལ་ས་གཞི་སེར་ལ་སྣུམ་པ་རྒྱར་ཁྲུ་དོ་ཟུར་བརྒྱད་པ་རིན་པོ་ཆེ་ལྟ་བུ། དབུས་སུ་རྡོ་རྗེས་མཚན་པའི་རིན་པོ་ཆེའོ། །ཐབ་ཀྱི་སྟེང་དུ་ཁ་ཁྱེར་ལ་འཕང་དང་རྒྱར་སོར་བརྒྱད་པ་ཁ་དོག་སེར་པོས་བྱུག །མེ་ཏོག་སེར་པོས་ཆལ་བར་བྱས་ཏེ་བརྒྱན་ནོ། །དབང་ལ་ས་གཞི་དམར་ལ་འཇམ་པར་ཆོས་འབྱུང་ལྟ་བུ་རྡོ་རྗེས་མཚན་པ་ལ་སོགས་པ་ཞི་བ་དང་མཚུངས་པ་ལ་ཁ་དོག་དམར་པོས་བྱུག །མེ་ཏོག་དམར་པོས་ཆལ་པར་དགྲམ་མོ། །མངོན་སྤྱོད་ལ་ས་གཞི་རལ་བ་དང་ཆ་སྒོ་ཅན་དང་རྩུབ་ལ་གནག་པར་རྒྱར་ཁྲུ་གང་གྲུ་བཞི་པའི་དབུས་སུ་པདྨ་གནས་པའི་སྟེང་དུ་ཁྲོ་བོའི་རྡོ་རྗེས་མཚན་པ་དགོད། ཐབ་ཁུང་གི་སྟེང་ཁ་ཀྱེར་ལ་འཕང་དང་རྒྱར་སོར་བཞི་པ་ཕྱིར་ཁ་བལྟས་པ་ལ་ཁྲོ་བོའི་རྡོ་རྗེས་སྦྲས་པའོ། །ས་ནག་པོ་དང་དུར་ཁྲོད་ཀྱི་ཐལ་བ་དང༌། བོང་བུ་དང་རྔ་མོའོ་སྤངས་ལ་སོགས་པ་དང་བདུད་རྩི་ལྔ་དང་ལྡན་པའི་ཆུ་ཡིས་བྱུགས་ལ། དྲི་མེད་པ་དང་དྲི་མི་ཞིམ་པའི་མེ་ཏོག་སྔོན་པོའམ་ནག་པོའམ་སོ་བའམ་ནས་ཀྱིས་བསྐོར་བས་ཆལ་པར་དགྲམ་མོ། །འབར་བའི་ཕྲེང་བས་བསྐོར་བའི་འཇིགས་པར་བྱེད་པ་དང་བཅས་པ་མིའི་ཆིལ་ལ་སོགས་པའི་མར་མེས་བརྒྱན་པའོ། །ཡང་ན་རྡུལ་ཚོན་ཙམ་ལ་བརྟེན་ནོ། །འདི་ནི་ཐབ་ཁུང་གི་མཚན་ཉིད་བསྟན་པའོ།། །།
རྫས་ཀྱི་མཚན་ཉིད་བསྟན་པ།
༄། །ཤིང་པཱ་ལ་ཤའམ་ཨུ་དུམྦཱ་ར་ལ་སོགས་པ་འོ་མ་ཅན་གྱི་སྟེང་གི་ཡལ་ག་གསར་པ་སོར་བཅུ་གཉིས་པ་མཉམ་པར་བཅད་པ་སྦོམ་ཕྲ་མཐེའུ་ཆུང་ཙམ་ལ་སྦྲང་རྩི་དང་འོ་མ་དང་མར་ལ་སྤགས་པའི་ཡམ་ཤིང་འདབ་མ་གཉིས་དང་ལྡན་པ། རྩེ་མོ་གཅིག་པ་མིང་མེད་དང༌། མཐེ་བོང་གིས་བཟུང་ལ་བསྣུན་ནོ། །རུལ་པ་དང་ཡོན་པོ་དང་ཕྲ་བ་ལ་སོགས་པ་སྤང་ངོ༌། །ཀུ་ཤ་ཏིལ་མར་ལ་སྤགས་པ་དང༌། འབྲས་སཱ་ལུའི་ཟན་དང༌། འོ་མ་དང༌། ནས་དང༌། ཏིལ་དང༌། ཞོ་དང༌། པྲི་ཡང་ཀུ་དང༌། ཙནྡན་དང༌། དཱུར་བ་དང༌། ཤིང་དྲི་ཞིམ་པོའི་ཁུ་བ་དང༌། མེ་ཏོག་དང༌། འབྲས་ཡོས་དང་འབྲས་བུ་སྐྱུར་པོ་ཅན་གྱི་ལོ་མ་རྩེ་མོ་གཉིས་ཀ་སྦྲང་དང་འོ་མ་ལ་སྦགས་ལ། ཇི་ལྟ་བ་བཞིན་དུ་ཞི་བའི་སྦྱིན་སྲེག་བྱའོ། །འདིར་ཡང་སྔོན་གྱི་ཤིང་རྐེད་ང་ནས་སྐྱེས་པའི་ཡལ་ག་སྦོམ་ཕྲ་ཆང་བར་ཤོང་པ་ཁྲུ་རེ་བ་ཞོ་དང་འོ་མར་སྤགས་པའི་ཡམ་ཤིང་དང༌། འབྲས་ཞོ་དང་མེ་ཏོག་བརྒྱ་པ་
༄། །ཞེ་དང་སྤགས་པ་དང༌། བོ་ལིའི་འབྲས་བུ་དང༌། འབྲས་སཱ་ལུ་དང༌། པདྨ་གེ་སར་དང༌། ནཱ་ག་ཀེ་སར་དང༌། ཀརྞི་ཀ་དང༌། འབྲུ་སྣ་ཚོགས་རྣམས་ཀྱིས་རྒྱས་པ་ལའོ། །ཞི་བའི་སྐབས་སུ་བཤད་པའི་ཤིང་ཡོན་ཏན་དང་ལྡན་པ་ལོ་མ་ཅན་སོར་ལྔ་པའམ། པྲི་ཡང་ཀུའམ། ཙམ་པ་ཀའི་གེ་སར་ལ་སོགས་པས་ཡམ་ཤིང་ངོ༌། །མེ་ཏོག་དང་འབྲས་བུ་དམར་ལ་སྐྱུར་བ་རྣམས་ཀྱིས་དབང་ལའོ། །ཤིང་རོ་ཚ་བ་དང༌། ཁ་བ་དང༌། ཚེར་མ་དང་ལྡན་པ་རྣམས་སམ། རོ་བསྲེགས་པའི་ཤིང་གསེས་པ་སོར་བཅུ་པ་རྩ་བའི་ཕྱོགས་ནས་བཟུང་སྟེ། དུག་དང་ཁྲག་དང་ཏིལ་གྱིས་སྤགས་པ་རྩེ་མོ་རྣོ་བ་དང་ལྡན་པ་ཡམ་ཤིང་ངོ༌། །ཡུངས་ཀར་དང༌། ཚ་བའི་མར་དང༌། ཁྲག་དང༌། ཚྭཱ་དང༌། སྐེ་ཚེ་དང༌། ནིམ་པའི་ལོ་མ་དང༌། རོ་བསྲེགས་པའི་ཐལ་བ་དང༌། རྐང་རྗེས་ཀྱིས་དང༌། བོང་བུ་དང༌། རྔ་མོ་ལ་སོགས་པའི་སྤངས་དང༌། ཁྱིའི་ཞག་དང༌། བྱ་རོག་ལ་སོགས་པའི་སྒྲོ་དང༌། སྐྲ་དང༌། དྲི་ཆེན་དང༌། དྲི་ཆུ་དང༌། ཚེར་མ་དང༌། རུས་པའི་ཕྱེ་མ་ལ་སོགས་པ་གང་རྙེད་པ་རྣམས་ལ། དུག་དང་ཁྲག་དང༌། ཚྭཱ་རྣམས་སྤགས་པས་སམ། ཡང་ན་ཐལ་བ་དང་སོལ་བ་དང་ཕུ་བ་མ་ལ་སོགས་པ་རྣམས་ལ་བསྒྲུབ་བྱའི་གཟུགས་བརྙན་བྱས་ཏེ་དུག་ལ་སོགས་པས་སྤགས་པས་རྐང་པ་གཡོན་པའི་མཐེའུ་ཆུང་ནས་རིམ་གྱིས་མཚོན་རྣོན་པོས་བཅད་ཅིང་བསྣུན་པ་ནི་གསད་སྤའི་སྦྱིན་སྲེག་གོ །འདི་ནི་རྫས་ཀྱི་མཚན་ཉིད་བསྟན་པའོ། །
བུད་ཤིང་གི་མཚན་ཉིད་བསྟན་པ།
༄། །སྦྱིན་སྲེག་གི་ཤིང་སྲོག་ཆགས་མེད་པ་ཐབ་ཁུང་བས་ཅུང་ཟད་དམའ་བའམ། །བས་མཐའི་ལྕི་བ་ཉི་བ་ལའོ། །སྔོན་དུ་གསུངས་པའི་ཤིང་འབྲས་བུ་དང་བཅས་པ་རྒྱས་པ་ལའོ། །ནིམ་པའམ་ཤིང་རོ་སྐྱུར་བའམ། ཤིང་གཞན་མེ་ཏོག་དང་ལྡན་པ་རྣམས་དབང་ལའོ། །ཤིང་རོ་ཚེ་བ་དང༌། ཁ་བ་དང༌། ཚེར་མ་དང་ལྡན་པ་དང༌། དྲི་མི་ཞིམ་པ་དང༌། དྲི་མེད་པ་དང༌། དུར་ཁྲོད་ནས་བྱུང་བ་རྣམས་གང་རུང་ངམ། བོང་བུ་དང་རྔ་མོ་ལ་སོགས་པའི་སྤངས་སྐམ་པོ་རྣམས་མངོན་སྤྱོད་ལའོ། །འདི་ནི་བུད་ཤིང་གི་མཚན་ཉིད་བསྟན་པའོ། །
དགང་གཟར་དང་བླུགས་གཟར་གྱི་མཚན་ཉིད་བསྟན་པ།
༄། །གསེར་རམ་ཟངས་སམ་མཆོད་སྦྱིན་གྱི་ཤིང་ལས་དགར་གཟར་བྱ་སྟེ། དེའི་ཡུ་བ་ནི་སྐྱེས་བུ་ཆ་
༄། །དང་ལྡན་པའི་སོར་ཉི་ཤུ་རྩ་བཞི་པའོ། །རྡོ་རྗེ་ལ་སོགས་པ་དང་སྟབས་ཅིག་ལོངས་སྤྱོད་དུ་མི་བཏུབ་པའོ། །སྟེང་གི་ཆ་པདྨའི་འདབ་མའི་རྣམ་པ་ཅན་སྲིད་དུ་སོར་བརྒྱད་པ་ཤིན་ཏུ་མཛེས་པ་ལ་ཆའི་སྨད་སོར་བཞི་ལྷམ་པ་ཟབས་སུ་སོར་གཉིས་དང་ལྡན་པའོ། །ནང་དུ་རྡོ་རྗེ་རྩེ་གསུམ་པའམ་རྩེ་ལྔ་པས་བརྒྱན་པ། བཅུད་ཁུང་མཐེབ་ཅུང་ལྟོ་གང་བ། དེ་སྟེང་རྡོ་རྗེ་རྩེ་ལྔ་པས་སྤྲས་པ། ཡུ་བའི་འོག་གི་ཆ་རིན་པོ་ཆེ་རྡོ་རྗེས་བརྒྱན་པའོ། །བླུགས་གཟར་གྱི་ཡུ་བའི་འོག་ཆ་ལ་ཡང་དེ་ལྟར་གོ་བར་བྱའོ། །རྒྱ་སྔར་དང་མཚུངས་སོ། །ཡུ་བ་དག་དགང་གཟར་སྲིད་དུ་མཉམ་པ་ལ་ཕྱེད་ཀྱིས་ཕྲ་བ་ཁ་ལ་རྒྱར་སོར་གཉིས་པ་པདྨའི་འདབ་མ་ལྟ་བུའོ། །ཟབས་སུ་སོར་གཅིག་དང་ལྡན་པ་ལ་རྡོ་རྗེ་རྩེ་ལྔ་པ་དགོད་དོ། །དགང་གཟར་དང་བླུགས་གཟར་མེད་ན་ལག་པས་དགང་བླུགས་དབུལ་བར་བྱའོ། །འདི་ནི་དགང་གཟར་དང་བླགས་གཟར་གྱི་མཚན་ཉིད་བསྟན་པའོ། །
སྒྲུབ་པ་པོའི་མཚན་ཉིད་བསྟན་པ།
༄། །དེ་ནས་ཁྲུས་བྱས་ལ་གོས་གཙང་མ་དང་རྒྱན་དཀར་པོ་བཏགས་ནས་དཔལ་ནག་པོ་ཆེན་པོའི་རྣལ་འབྱོར་དང་ལྡན་པས་ངག་བཅད་ལ། བདེ་བའི་སྟན་གྱི་སྟེང་དུ་པདྨའི་སྐྱིལ་མོ་ཀྲུང་བཅས་ཏེ། དཀར་པོའི་ཚེས་གཅིག་གི་ནུབ་མོ་སྲིད་ཀྱི་དུས་སུ་ཁ་ཤར་དུ་བལྟས་ནས་བསྒྲུབ་བྱ་དམིགས་ཏེ་ཞི་བའི་བསམ་པ་དང་ལྡན་པས་ཞི་བའི་ལས་བྱའོ། །དེ་ལྟར་གོས་ལ་སོགས་པ་གོང་ལས་ཁ་དོག་གི་དབྱེ་བས་ཤེས་པར་བྱས་ལ། ཚེས་བཅོ་ལྔའི་སྔ་དྲོའི་དུས་སུ་ལྷོ་རུ་བལྟས་ནས་སྟན་བཟང་པོར་བསྡད་དེ། འཕང་མཐོ་བའི་བསམ་པ་དང་ལྡན་པས་རྒྱས་པའི་ལས་བྱའོ། །དེ་ལྟར་གོས་དམར་པོ་ལ་སོགས་པ་སྔ་མ་ལྟར་བྱས་ལ་ཚེས་བརྒྱད་ཀྱི་ནམ་ཕྱེད་ཀྱི་དུས་སུ་ནུབ་ཏུ་བལྟས་ནས་སྟན་མཐོན་པོའི་སྟེང་དུ་རྡོ་རྗེའི་སྐྱིལ་མོ་ཀྲུང་གིས་བསྡད་དེ། ཆགས་པའི་བསམ་པ་དང་ལྡན་པས་དབང་གི་ལས་བྱའོ། །དེ་ལྟར་གོས་ནག་པོ་ལ་ཁྲག་གིས་སྤྲས་པ་དང༌། རྒྱན་ནག་པོ་གདགས། ནག་པོའི་དུས་གཉིས་གང་རུང་ཅིག་གིས་ཉི་མ་ཕྱེད་དམ་ནམ་ཕྱེད་ཀྱི་དུས་སུ་བྱང་དུ་ཁ་བལྟས་ནས། སྟན་སྤངས་ཏེ་མཁྲང་པའི་སྟེང་དུ་བསྒྲུབ་བྱའི་སྙིང་གར་ཙོག་ཙོག་པོར་གནས་ལ། ཤིན་ཏུ་ཁྲོ་བའི་བསམ་པ་དང་ལྡན་
༄། །པས་སོ། །མིག་བགྲད་ཁྲོ་གཉེར་བཅས་ཏེ། དཀོན་མཆོག་གསུམ་ལ་བྱ་བ་མ་ཡིན་པ་བྱེད་པ་རྣམས་ཐུགས་རྗེ་ཆེན་པོས་གསང་པའི་དོན་དུ་བསྒྲུབ་བྱའི་སྙིང་ག་ན་གནས་པའི་བསྲུང་བ་རྣམས་ཧཱུཾ་ལས་སྤྲོས་པའི་རྡོ་རྗེའི་ལྕགས་ཀྱུས་བཀུག་ནས་རང་གི་ས་བོན་ལ་བསྟིམ། ཁོ་རང་གི་ལྷ་ཐམས་ཅད་ཀྱིས་ཀྱང་དོར་བར་བསམ་མོ། །བསྒྲུབ་བྱའི་སྡིག་པ་དང་ཕྲལ་ཏེ་སངས་རྒྱས་ཀྱི་ཞིང་དུ་བསྒྲལ་བར་འདོད་པས་མངོན་སྤྱོད་ཀྱི་ལས་བྱའོ། །འདི་ནི་སྒྲུབ་པ་པོའི་མཚན་ཉིད་བསྟན་པའོ། །
ཡོན་ཆབ་ལ་སོགས་པའི་མཚན་ཉིད་བསྟན་པ།
༄། །གསེར་དང་དངུལ་དང་རྡོ་དང་ཟངས་དང་ཤིང་དང་ས་རྣམས་ལ་དུང་གི་དབྱིབས་སུ་བྱས་པ་ལའམ། དུང་ངམ་ཤོ་མའི་སྣོད་དུ་ཡོན་ཆབ་ལ་སོགས་པའི་སྣོད་དོ། །ནས་དང༌། འོ་མ་དང༌། མེ་ཏོག་དཀར་པོ་དང༌། ཏིལ་དང༌། ཀུ་ཤ་དང༌། འབྲས་ཡོས་རྣམས་དང༌། དྲི་ཆབ་དང༌། བདུད་རྩི་ལྔ་དང་ལྡན་པ་རྣམས་བླུགས་ནས་རང་འདོད་པའི་ལྷའི་སྔགས་ལ་སྭཱ་ཧཱ་སྦྱར་བ་ལན་བརྒྱ་བཟླས་པས་ཞི་བ་ལའོ། །དེ་ལྟར་ཞོ་དང་མེ་ཏོག་སེར་པོ་དང་དྲི་ཆབ་ཁ་དོག་གིས་ཤེས་པར་བྱ། གཞན་གོང་དང་འདྲ། ཨོཾ་བཏགས་པས་རྒྱས་པ་ལའོ། །མེ་ཏོག་དམར་པོ་དང་དྲི་ཆབ་ལ་སོགས་པ་གོང་དང་འདྲ། ཧོཿབྟགྶ་པས་དབང་ལའོ། །གྱོ་མོ་དང་འདག་པའི་སྣོད་ལ་སོགས་པར་ཁྲག་དང་ལྕི་བ་དང་བ་ལང་གི་གཅིན་དང་མེ་ཏོག་དང་དྲི་ཁ་དོག་ནག་པོ། དྲི་མེད་པ་དྲི་ང་བའི་དྲི་ཆབ་ལ་སོགས་པ་གོང་དང་འདྲ། ཕཊ་བཏགས་པས་མངོན་སྤྱོད་ལའོ། །འདི་ནི་ཡོན་ཆབ་ལ་སོགས་པའི་མཚན་ཉིད་བསྟན་པའོ། །
རྫས་རྣམས་དགྲམ་པའི་མཚན་ཉིད་བསྟན་པ།
༄། །ཞི་བ་དང་རྒྱས་པ་དང་དབང་རྣམས་ཀྱི་དབྱེ་བས་ལས་ཐམས་ཅད་པའི་སྔགས་བཟླས་ལ། ལས་ཐམས་ཅད་པའི་ཆུ་སྣོད་དང་ཡོན་ཆབ་ལ་སོགས་པ་གཡོན་དུའོ། །དེ་རྣམས་ཀྱི་སྔོན་དུ་བཟེད་ཞལ་གསུམ་གཞག་གོ །བསང་གཏོར་གྱིས་བསངས་ལ་སྦྱིན་སྲེག་གི་ཤིང་ལ་སོགས་པའི་རྫས་རྣམས་གཡས་ཕྱོགས་སུ་གཞག་གོ །སྤྲོས་པ་ལ་དགའ་ན་རྣམ་རྒྱལ་གྱི་བུམ་པ་དང༌། ལས་ཐམས་ཅད་པའི་བུམ་པའི་ལྷག་གནས་ནི་དངོས་གྲུབ་རིན་ཆེན་འབྱུང་གནས་ལྟར་ཆོ་ག་བྱ། སྤྲོས་པ་ལ་མི་དགའ་ན་སློབ་དཔོན་ལ་ལ་དག་གིས་བུམ་པ་གཉིས་པ་མི་འདོད་དོ། །མངོན་སྤྱོད་ལ་གཡས་
༄། །སུ་ཡོན་ཆབ་ལ་སོགས་པ་བཞག་ཅིང་གཡོན་དུ་རྫས་རྣམས་གཞག་གོ །འདི་ནི་རྫས་རྣམས་དགྲམ་པའི་མཚན་ཉིད་བསྟན་པའོ། །
མེའི་མཚན་ཉིད་བསྟན་པ།
༄། །འོ་མ་ཅན་གྱི་ཤིང་ལས་བྱུང་བའི་མེ་ཞི་བ་ལའོ། །རྒྱལ་པོ་དང་རྒྱལ་རིགས་ཀྱི་ཁྱིམ་ནས་བྱུང་བའམ། ནགས་ལས་བྱུང་བའམ། རིན་པོ་ཆེ་ལས་བྱུང་བའམ། དགེ་འདུན་གྱི་ཚང་མང་ལས་བྱུང་བའི་མེ་རྒྱས་པ་ལའོ། །རྗེ་རིགས་དང་སྨད་འཚོང་མའི་ཁྱིམ་ནས་བྱུང་བའི་མེས་དབང་ལའོ། །མི་རུས་ལས་བྱུང་བའམ། རྡོ་ཐལ་ལས་བྱུང་བའམ། དུར་ཁྲོད་ལས་བྱུང་བའམ། རིགས་ངན་གྱི་ཁྱིམ་ལས་བྱུང་བའི་མེས་མངོན་སྤྱོད་ལའོ། །འདི་ནི་མེའི་མཚན་ཉིད་བསྟན་པའོ། །
ལྷ་མཉེས་པར་བྱ་བའི་མཚན་ཉིད་བསྟན་པ།
༄། །དེ་ནས་དངོས་གྲུབ་རིན་ཆེན་འབྱུང་གནས་སུ་བཤད་པ་ལྟར་གཏོར་མ་སྦྱིན་ལ། བསྲུང་བ་དང་ལྡན་པས་སྣོད་དུ་མ་བཟུང་སྟེ། ཡི་གེ་གསུམ་གྱི་སྔགས་བཟླས་སོ། །དེ་ནས་ལས་ཐམས་ཅད་པའི་སྔགས་བརྗོད་ཅིང་མར་མེས་མེ་སྔར་བ་དང༌། སྔགས་དེ་ཉིད་བརྗོད་ཅིང་བའི་ཆུས་མངོན་སྤྱོད་དང་གཞན་ལ་གཡོན་དང་གཡས་སུ་ལན་བདུན་བསྐོར་ཞིང་བསང་གཏོར་བྱས་ཏེ། ཐབ་ཁུང་དུ་དུ་བ་དང་བཅས་པའམ། དུ་བ་ཡང་སྤངས་པ་གཞག་སྟེ། ཨོཾ་ཛྭ་ལ་ཛྭ་ལ་ཧཱུཾ་ཞེས་པས་ཡང་དག་པར་སྦར་བ་དང༌། འཁོར་ལའི་གཙོ་བོའི་སྙིང་པོ་བརྗོད་ཅིང༌། བླུགས་གཟར་མར་གྱིས་བཀང་སྟེ་ལན་བདུན་གྱིས་བསྐྱར་བར་བྱའོ། །མངོན་སྤྱོད་ལ་ཚ་བའི་མར་གྱིས་སོ། །དེ་ནས་ཀུ་ཤ་རྣམས་དགྲམ་པ་ནི། ཨོཾ་བཛྲ་སཏྭ་ཨཿཞེས་པ་བརྗོད་ཅིང་དང་པོར་ཀུ་ཤ་གཉིས་སྒྲུབ་པ་པོའི་གཡོན་ཕྱོགས་སུ་ཤར་དུ་བསྟན་ཏེ་གཞག་གོ །རིམ་པ་བཞིན་དུ་ལྷོ་ཕྱོགས་སུ་དང༌། ནུབ་ཕྱོགས་དང་བྱང་ཕྱོགས་རྣམས་སུ་བསྟན་པའོ། །ཐབ་ཁུང་དུ་དབུལ་བ་ནི་ཤར་དུ་བསྟན་པའོ། །གཞན་ཡང་རྒྱས་པ་དང་དབང་དང་མངོན་སྤྱོད་རྣམས་ཀྱི་ཐབ་ལ་རིམ་པ་ཇི་ལྟ་བ་བཞིན་ཤར་དང་ལྷོ་དང་ནུབ་རྣམས་སུ་ཤེས་པར་བྱའོ། །དེ་ནས་ལྷའི་རང་བཞིན་ལ་གནས་པའི་རང་གི་ས་བོན་གྱི་ཐབ་བསྐྱེད་ལ་སྦར་བར་བལྟས་ནས་དེར་བདག་མེད་པར་བསམས་ལ། ཡི་གེ་རཾ་ལས་མེའི་དཀྱིལ་འཁོར་གྲུ་གསུམ་པའོ། །དེའི་སྟེང་དུ་པདྨ་དང་ཉི་མ་ལ་གནས་པ་ས་བོན་ཡི་གེ་རཾ་ལས་བྱུང་བའི་ལྟོ་བ་
༄། །འཕྱང་བ་ཤ་རྒྱས་པ་ཐུང་བ། ཞལ་གསུམ་པ་ཞལ་རེ་རེ་ཞིང་སྤྱན་གསུམ་གསུམ་དང་ལྡན་པ། ཕྱག་དང་པོ་གཉིས་ཀྱིས་ཡུམ་ལ་འཁྱུད་པ། གཡས་ཀྱི་ཕྱག་གཉིས་ཀྱིས་མི་འཇིགས་པ་དང་བགྲང་འཕྲེང་འཛིན་པ། གཡོན་གཉིས་ཀྱིས་དབྱུག་པ་དང་སྤྱི་བླུགས་འཛིན་པ། ལས་ཀྱི་བྱེ་བྲག་གི་ཁ་དོག་དང་ན་བཟའ་དང་རྒྱན་བསམ་པའི་བྱེ་བྲག་དང་འོད་ཟེར་གྱི་འཕྲོ་འདུ་དང་རྒྱས་གདབ་རྣམས་གོ་བར་བྱའོ། །རལ་བ་དང་སྨྲ་ར་ཤིན་ཏུ་རྒྱས་པ། ས་བོན་རཾ་དང་བཅས་པའི་མེའི་དཀྱིལ་འཁོར་གྱིས་ཐུགས་ཀར་སྤྲོས་པའི་མེ་ལྷ་བསམ་ནས། ཐུགས་ཀའི་ས་བོན་ལས་འོད་འཕྲོས་པས། དམ་ཚིག་པ་དང་མཚུངས་པའི་ཡེ་ཤེས་པ་འཁོར་དང་བཅས་པ་མེ་མཚམས་ན་གནས་པར་བལྟས་ལ། སྤྱན་དྲང་བའི་སྔགས་ནི། ཨོཾ་ཨེ་ཧྱེ་ཧི་མྷའ་བྷཱ་ཏ་དེ་བ་རྀ་ཥི་དྭི་ཛ་ས་ཏ་མ། གྲྀ་ཧི་ཏཱ་ཧུ་ཏི་མ་ཧཱ་རཾ་ཨ་སྨིན་སནྣི་ཧི་ཏོ་བྷ་བཱ་ཞེས་པས་དགུག་སྟེ་བསྟིམ་མོ།། དེ་ལ་ཨོཾ་ཨཱཿཧཱུཾ་རཾ་ཨརྒྷཾ་པྲ་ཏཱིཙྪ་ཧཱུཾ་ཞེས་པའམ། ཨོཾ་ཨཱཿཧཱུཾ་པྲ་བ་ར་སཏྐཱ་རཾ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ་ཞེས་པའི་སྔགས་ཀྱིས་ཨརྒྷཾ་དབུལ་ལོ། །ཨརྒྷའི་གནས་སུ་པཱཏྱ་ལ་སོགས་པ་བཅུག་ལ། ཞབས་བསིལ་དང༌། ཞལ་བསིལ་བསང་གཏོར་ཕུལ་ཏེ། ལས་ཀྱི་བྱེ་བྲག་གི་མེ་ཏོག་ལ་སོགས་པས་མཆོད་པར་བྱའོ། །ཕྱི་ནས་ལག་པ་གཡོན་པ་བྱང་ཆུབ་མཆོག་གི་ཕྱག་རྒྱ་སྟེང་དུ་ཁ་ཕྱོགས་པས་མར་གྱིས་གང་བའི་དགང་གཟར་བཟུང་ལ། ཡང་ལག་པ་གཡས་པ་འོག་ཏུ་ཁ་ཕྱོགས་པས་མར་གྱིས་གང་བའི་བླུགས་གཟར་སྟེང་དུ་ཁ་ཕྱོགས་པར་བཟུང་སྟེ། མངོན་སྤྱོད་ལས་གཞན་པར་གོ་བར་བྱའོ། །པུས་མོའི་སྟེང་ནས་འཁྱུད་པ་བཞིན་པས་དགང་བླུགས་གཡས་དང་གཡོན་དུ་བསྐོར་ཞིང་དགང་བླུགས་གསུམ་མམ་བདུན་དབུལ་བ་ནི། མེ་ལྷའི་ལྕེ་ལ་རཾ་བཀོད་ལ། གསུམ་པོ་ཁ་ཅུང་ཟད་ཕྱེ་བར་དབུལ། མངོན་སྤྱོད་ལ་ཁ་ཤིན་ཏུ་གདངས་པར་དབུལ་བ་ནི། ཨོཾ་ཧི་བཛྲ་ཕཊ་རྣམས་ཞི་བ་དང་རྒྱས་པ་དང་དབང་དང་མངོན་སྤྱོད་རྣམས་ཀྱིས་དབྱེ་བས། ཨོཾ་ན་མཿས་མནྟ་བྷཱུ་ཏ་ནཱཾ་ཨགྣ་ཡེ་སྭཱ་ཧཱ་ཞེས་པའི་སྔགས་ལ་རིམ་པས་སྦྱར་རོ། །ཨོཾ་ཨགྣ་ཡེ་སྭཱ་ཧཱ་ཞེས་པས་སྲེག་བླུགས་ཀྱི་སྔགས་སོ། །
༄། །ཕྱི་ནས་མེ་སྤྲ་བརྟག་པ་ནི་ཁ་དོག་གི་དབྱེ་བ་ལ་སོགས་པས་རིམ་པ་དང་རིམ་པ་མ་ཡིན་པས་གོ་བར་བྱས་ལ། བསང་གཏོར་དང༌། བསྲུང་བ་བྱས་པ་དང༌། ལས་ཐམས་ཅད་པའི་སྔགས་ཀྱིས་སྲེག་བླུགས་བདུན་བྱས་ཏེ། ཕྱི་ནས་དགང་བླུགས་གསུམ་ཕུལ་ལ། བླུགས་གཟར་ལ་སོགས་པ་ལན་གཅིག་གམ་གསུམ་མམ་བདུན་དབུལ་བར་བྱའོ། །ཡམ་ཤིང་ལ་སོགས་པ་སྦྱང་བ་ནི། ཨོཾ་ཨཱཿཧཱུཾ་སྭཱ་ཧཱ་ཞེས་པ་ཡམ་ཤིང་སྦྱང་བའི་སྔགས་སོ། །ཨོཾ་ཤྲཱི་སྭཱ་ཧཱ་ཞེས་པ་མར་སྦྱང་བའི་སྔགས་སོ། །ཨོཾ་སྭཱ་ཧཱ་ཞེས་པས་རྫས་རྣམས་བཀྲུ་བའི་སྔགས་སོ། །ཨོཾ་ཛ་སྭཱ་ཧཱ་ཞེས་པ་འབྲུ་རྣམས་སྦྱང་བའི་སྔགས་སོ། །ཨོཾ་ཀུ་རུ་ཀུ་རུ་སྭཱ་ཧཱ་ཞེས་པས་རྫས་གཞན་རྣམས་སྦྱང་བའི་སྔགས་སོ། །འདིར་བསྲེག་པའི་གོ་རིམས་ནི་དང་པོ་མེ་འབར་བཞིན་པ་ལ་ཡམ་ཤིང་བསྲེག་གོ །དེ་ནས་རིམ་གྱིས་མར་དང༌། ཏིལ་དང༌། དཱུར་བ་དང༌། འབྲས་དང། །འབྲས་ཡོས་དང༌། ཀུ་ཤ་ལ་སོགས་པ་རང་རང་གིས་སྔགས་ཀྱིས་བསྲེགས་ཏེ། ཕྱི་ནས་ཞལ་བསིལ་དང་བསང་གཏོར་བྱས་ལ། མེ་ལྷ་དེ་འབར་བའི་རང་བཞིན་དུ་གྱུར་པ་ལ་སོགས་པར་བྱའོ། །དེ་ནས་ཡི་གེ་ཧཱུཾ་ཡིག་གིས་ཡང་བསང་གཏོར་བྱས་ལ་ཞི་བར་འདོད་པས་ཆོ་ག་ཇི་ལྟ་བ་བཞིན་ཞི་བར་བྱ་བ་ནི་འོད་ཟེར་འཕྲོ་བཞིན་པའི་དཔལ་ནག་པོ་ཆེན་པོར་བསྐྱེད་ལ། ཕྱག་ན་ཟླ་བ་ཆུ་ཤེལ་གྱི་བུམ་པ་བདུད་རྩིས་བཀང་བ་ཐོགས་ཏེ་བསྒྲུབ་བྱ་ལ་ལྷ་མོས་དབང་བསྐུར་བས་དེའི་རིམས་ནད་ལ་སོགས་པ་ཞི་བར་བྱ་བ་ནི། རྒྱས་པར་འདོད་པས་རྒྱས་པར་བྱ་བ་ནི་བསྒྲུབ་བྱའི་བང་མཛོད་དུ་སྔ་མ་ལྟར་གསེར་གྱི་བུམ་པ་ནས་རིན་པོ་ཆེའི་རྒྱུན་བབས་པས་དབུལ་པ་ལས་གྲོལ་བར་བྱའོ། །དབང་དུ་བྱ་བར་འདོད་པས་སྔ་མ་ལྟར་ཨུཏྤལ་ཁ་ཟུམ་པ་ལྟ་བུའི་མདེའུ་དང་ལྡན་པའི་མདའ་སྙིང་གར་སྤྲོས་ནས་དབང་དུ་བྱའོ། །གསད་པར་འདོད་པས་ཁྲོ་བ་དང་བཅས་ཏེ་བསྒྲུབ་བྱའི་སྟེང་དུ་རྡོ་རྗེའི་མེའི་ཆར་པ་ཕབ་ནས་དེ་ཐལ་བར་སོང་བར་བསམ་ཞིང་གསད་པར་བྱའོ། །དེ་ནས་མངོན་པར་རྟོགས་པ་ཆོ་ག་ཇི་ལྟ་བ་བཞིན་དུ་དམ་ཚིག་བ་བསྐྱེད་པ་དང་ཡེ་ཤེས་པ་གཞུག་པ་དང༌། དབང་བསྐུར་བ་ཡན་ཆད་བྱས་ལ། མེ་ཏོག་
༄། །དཀར་པོ་དང༌། དྲི་ཞིམ་པོ་ལ་སོགས་པའི་རང་སྔགས་དང༌། ལྷ་སྔགས་རྣམས་ཀྱིས་བྱིན་གྱིས་བརླབས་ལ་མཆོད་པ་ནི་ཞི་པ་ལའོ། །དེ་བཞིན་དུ་མེ་ཏོག་སེར་པོས་རྒྱས་པ་ལ་ཤེས་པར་བྱའོ། །དབང་ལ་དམར་པོ། །དྲག་པོ་ལ་དྲི་མི་ཞིམ་པ་དང༌། དྲི་མེད་པའི་མེ་ཏོག་དང་དྲིའོ། །གུ་གུལ་དཀར་པོས་སྤོས་སོ། །མི་དང་ཉལ་སོགས་པའི་ཞག་ལས་མར་མེའོ། །ཆ་བ་དང་ཁ་བ་ལ་སོགས་པས་ལྷ་བཤོས་སོ། །ཨརྒྷཾ་དང༌། ཞབས་བསིལ་དང༌། ཞལ་བསིལ་དང༌། བསང་གཏོར་རྣམས་ཀྱིས་ཡང་དག་པར་མཆོད་ནས། ལྕེ་ལས་ཀྱི་རྗེས་སུ་འབྲང་བའི་ཁ་དོག་དང་ལྡན་པའི་རྡོ་རྗེ་རང་གི་ས་བོན་གྱིས་མཚན་པར་བསྐྱེད་ལ། རང་གི་སྔགས་ཀྱིས་སྔ་མ་བཞིན། དགང་བླུགས་རེ་རེ་ལ་མར་ལ་སོགས་པའི་རྫས་ཐམས་ཅད་ཀྱི་རེ་རེ་ལ། སྲེག་བླུགས་གསུམ་གསུམ་དབུལ་ལོ། །མར་གྱི་སྲེག་བླུགས་གཞན་པས་མང་བར་བྱའོ། །དེ་ནས་རང་གི་སྔགས་ཀྱི་བར་དུ་ཞི་བ་ལ་ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། རྒྱས་པ་ལ་པུཥྚིཾ་ཀུ་རུ་ཨོཾ། །དབང་ལ་ཝ་ཤཾ་ཀུ་རུ་ཧོཿགྶད་པ་ལ་མཱ་ར་ཡ་ཕཊ་དམ། ཧཱུཾ་ཧཱུཾ་ཞེས་པ་རྣམས་ཀྱང་ལྡན་པའམ། རྐྱང་པར་ཟློས་བཞིན་པས་ཞི་བ་ལ་སོགས་པའི་བསམ་པ་དང་བཅས་པས་སྲེག་བླུགས་བརྒྱའམ། སྟོང་ངམ། ནུས་ཚད་བསྲེག་པའི་སྔགས་ནི། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ་ཞེས་དང༌། ཏིལ་གྱིས་ཞི་བར་བྱ་བའི་ཕྱིར་རོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ་ཞེས་པ་དང༌། དཱུར་བས་ཚེ་བསྲིང་བར་བྱ་བའི་ཕྱིར་རོ། །ཨོཾ་བཛྲ་པུཥྚ་ཡེ་སྭཱ་ཧཱ་ཞེས་པ་དང༌། འབྲས་མ་ཉམས་པས་རྒྱས་པར་བྱ་བའི་ཕྱིར་རོ། །ཨོཾ་སརྦ་སཾ་པ་དེ་སྭཱ་ཧཱ་ཞེས་པ་དང༌། འབྲས་ཡོས་ཀྱིས་ཕུན་སུམ་ཚོགས་པར་བྱ་བའི་ཕྱིར་རོ། །ཨོཾ་ཨ་པྲ་ཏི་ཧ་ཏ་ཏེ་ཧེ་བཛྲཱ་ཡ་སྭཱ་ཧཱ་ཞེས་པ་དང༌། ཏིལ་གྱིས་བརླན་པའི་ཀུ་ཤས་བསྲུང་བའི་དོན་དུའོ། །ཨོཾ་མ་ཧཱ་བཱིཪྻཱ་ཡ་སྭཱ་ཧཱ་ཞེས་པ་ནས་ཀྱིའོ། །ཨོཾ་བཛྲ་གྷ་སྨ་རཱི་སྭཱ་ཧཱ་ཞེས་པ་གྲོའིའོ། །རང་རང་གི་ལྷའི་སྔགས་ཀྱིས་རྫས་གཞན་རྣམས་བསྲེག་གོ །དེ་ལྟར་ཆོ་ག་ཇི་ལྟ་བ་བཞིན་དུ་སྦྱིན་སྲེག་བྱས་ལ། སྙིང་པོའི་སྔགས་ཀྱིས་གསུམ་མམ་བདུན་ནམ་ཉི་མ་ཉི་ཤུ་རྩ་གཅིག་གི་བར་དུ་མར་གྱི་སྲེག་བླུགས་བྱའོ། །ཕྱི་ནས་དགང་
༄། །བླུགས་ཕུལ་ཏེ། ཨརྒྷཾ་དབུལ་པ་དང༌། བསང་གཏོར་བྱ་བ་དང༌། ཞབས་བསིལ་དང༌། ན་བཟའ་བསམ་པ་དང༌། མཆོད་པ་དང༌། བསྟོད་པ་དང༌། ཕྱག་རྒྱ་རྣམས་ཕུལ་ལ། མེ་ཏོག་དང་བཅས་པའི་ཐལ་མོ་སྙིང་གར་སྦྱར་ཏེ། ཆོག་མཚང་བ་ལ་སོགས་པའི་སྐྱོན་ཞི་བར་བྱེད་བའི་དོན་དུ། བདག་ནི་རྨོངས་པའི་བློ་ཡིས་དབང་དག་གིས། །གང་དག་ཅུང་ཟད་ངན་པར་བགྱིས་པ་རྣམས། །མགོན་པོ་ཁྱོད་ལ་བཟོད་གསོལ་དེ་བགྱིས་པས། །སེམས་ཅན་རྣམས་ཀྱི་བསྐྱབ་པ་པོར་གྱུར་ཅིང༌། །མ་ཐོབ་པར་བྱས་པ་དང་མི་ཤེས་པས། །མ་གུས་པ་ཡིས་གང་བྱས་གྱིས་ཞིང་བསྟོད་པ་དང་བཅས་པས་སོ། །ཡང་ཞལ་བསིལ་དེ་བསངས་ལ་ཡང་དག་པར་མཆོད་ལ་འདོད་པའི་དོན་ལ་གསོལ་བ་གདབ། བཟོད་གསོལ་བྱས་ཏེ། ཨོཾ་བཛྲ་སཏྭ་ཨཿཞེས་ཅུང་ཞིག་བརྗོད་ནས་ཡི་གེ་བརྒྱ་པ་དང༌། ཨོཾ་ཏྲཾ་ཏོ་ཝ་ཞེས་པ་ལ་སོགས་པ་བརྗོད་ནས་ཡི་གེ་གསུམ་གྱི་བར་དུ་རང་གི་སྙིང་པོ་མུཿདང་བཅས་པ་བཅུག་ལ་བཟླས་ཤིང་ཡེ་ཤེས་པ་གཤེགས་སུ་གསོལ་ལོ། །ཕྱི་ནས་མེ་ལྷ་ཐབ་ཁུང་དུ་སྤྱན་དྲངས་ལ་བསང་གཏོར་གྱིས་བསངས་ལ་མཆོད་པ་དབུལ། ཞལ་བསེལ་ནས་རས་གསར་བ་ཕུལ་བ་དང༌། རྫས་ལྷག་རྣམས་བསྲེག་པ་ནི་
དྲིལ་བུ 
་དཀྲོལ་ཞིང་བསྟོད་པ་དང་བཅས་པས་སོ། །ཡང་ཞལ་བསིལ་དེ་བསངས་ལ་ཡང་དག་པར་མཆོད་ལ་འདོད་པའི་དོན་ལ་གསོལ་བ་གདབ། བཟོད་གསོལ་བྱས་ཏེ། ཨོཾ་བཛྲ་སཏྭ་ཨཱཿཞེས་པ་བརྗོད་ལ་སྔ་མ་ལྟར་བྱས་ནས་ཨོཾ་མུཿཞེས་པས་གཤེགས་སུ་གསོལ་ལོ། །དེ་ལྟར་ཉི་མ་རེ་རེ་ཞིང་གོང་དུ་བཤད་པ་ལྟར་ཡན་གསུམ་མམ་བཞིར་བྱའོ། །དེ་ནས་མེ་བསྡུ་བ་ནི་ཞི་བ་ལའོ་མས་སོ། །རྒྱས་པ་ལ་ཆུ་སེར་པོས་སོ། །དབང་ལ་ཡང་འོ་མས་སོ། །གསད་པ་ལ་ཁྲག་གིས་སོ། །དེ་ནས་ཐབ་ཁུང་གི་ཐལ་བ་དང་སོལ་བ་ལས་ཐམས་ཅད་པའི་བུམ་པར་བླུགས་ཏེ་ཆུ་བོ་ལ་སོགས་པར་དོར་རོ། །འདིར་ནི་ལྷ་མ་ཉེས་པར་བྱ་བའི་མཚན་ཉིད་བསྟན་པའོ།། །།སྤྱིན་སྲེག་ཆོ་ག་བྱས་པ་འདི་ཡིས། །དགེ་བ་དྲི་མེད་ཐོབ་པ་གང་ཡིན། །དེས་ནི་མྱུར་བར་སེམས་ཅན་ཐམས་ཅད། །བདེ་ཆེན་རྡོ་རྗེ་སེམས་དཔར་གྱུར་ཅིག །ཡེ་ཤེས་ཀྱི་མེ་སྦར་བ་ཞེས་བྱ་བའི་སྦྱིན་
༄། །སྲེག་གི་ཆོག་རྫོགས་སོ།། །།པཎྜི་ཏ་ཆེན་པོ་ས་མནྟ་ཤྲཱིས་མཛད་པའོ། །པཎྜི་ཏ་དེ་ཉིད་དང་ལོ་ཙཱ་བ་དགེ་སློང་ཆོས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།