གཉིས་པ་སྤང་ཤན་གྱི་ཁྱབ་པ།

གཉིས་པ་སྤང་ཤན་གྱི་ཁྱབ་པ་ནི།

དམན་པའི་གང་ཟག་གི་སྤང་ལྟུང་ཐམས་ཅད་ལ་སྦྱར་གྱི། གང་ཟག་ཁྱད་པར་ཅན་གྱི་སྤང་ལྟུང་ལ་ནི་མི་སྦྱར་ཏེ། དངོས་པོ་དེ་སྤང་མི་དགོས་པའི་ཕྱིར་རོ། །སྤང་ཤན་ནི་སྤང་ལྟུང་དངོས་གཞིའི་ལྟུང་བ་དེ་ཡོད་ན། རིགས་མཐུན་པའམ་རིགས་མི་མཐུན་པའི་ཡོ་བྱད་ཙམ་ཕྱིས་རྙེད་ཅིང་བདག་གིར་བྱས་པ་ལ་སྤང་བར་བྱ་དགོས་པ་ཉིད་དོ། །ཙམ་ཞེས་པ་ནི་ཊཱི་ཀ་ལས། རིགས་མཐུན་པའམ་རིགས་མི་མཐུན་པའི་ཡོ་བྱད་ཙམ། ཞེས་གསུངས་སོ། །གསུམ་པ་ཤན་གྱི་དབྱེ་བ་ནི་ཁ་ཅིག་ན་རེ་ཤན་གྱི་དབྱེ་བ་གསུམ་སྟེ་ཞག་ཤན་དང་སྤང་ཤན་དང་ལྟུང་ཤན་ནོ། །ཐ་མ་ནི་གོས་གཉིས་ཞག་གཅིག་ལ་དུས་མཉམ་དུ་རྙེད་ན་གོས་གཅིག་བྱིན་གྱིས་བརླབས་ཀྱང་གཅིག་མ་བརླབས་པས་ཤན་བརྡེག་པ་དེ་ནི་གོས་མ་བརླབས་པ་ལ་བརྟེན་ནས། ལྟུང་བ་འབྱུང་བའི་ཤན་གོས་བརླབས་པ་ལ་བརྡེག་པ་ན་ལྟུང་ཤན་ཡིན་གྱི། ཞག་ཤན་མ་ཡིན་ཏེ། གོས་དེ་གཉིས་ཀྱི་ཞག་གྲངས་མཉམ་པ་ཡིན་པས་ཞག་མ་ལོན་པ་ལོན་པར་བྱས་པ་མེད་པའི་ཕྱིར་རོ་ཞེས་ཟེར། དེ་ནི་མི་རིགས་ཏེ། རང་སྟོབས་ཀྱིས་ལྟུང་བ་སྐྱེད་པའི་ཞག་མ་ལོན་པ་དེ་ཤན་སྟོབས་ཀྱིས་ལྟུང་བ་སྐྱེད་པའི་ཞག་ལོན་པར་བྱས་པ་ཡོད་པའི་ཕྱིར། དེ་ཡང་དེ་གཉིས་ཞག་འདས་པ་ཙམ་པོའི་ཞག་གྲངས་མཉམ་ཡང་བརྡེག་བྱ་ནི་བརླབས་པ་ཡིན་པས། རང་སྟོབས་ཀྱིས་ལྟུང་བ་སྐྱེད་པའི་ཞག་ལོན་པ་མེད་པ་དེ། རྡེག་བྱེད་མ་བརླབས་པའི་ཤན་སྟོབས་ཀྱིས་ལྟུང་བ་སྐྱེད་པའི་ཞག་ལོན་པར་བྱས་པ་ཤིན་ཏུ་ཡང་ཡོད་པའི་ཕྱིར་རོ། །རང་ལུགས་དབྱེ་བ་གཉིས་ཏེ། ཞག་གི་ཤན་དང་སྤང་བའི་ཤན་ནོ། །དང་པོ་ལ་གཉིས་ཏེ། ཞག་ཤན་ཁྱད་པར་ཅན་མ་ཡིན་པ་དང༌། ཞག་ཤན་ཁྱད་པར་ཅན་ནོ། །དེ་གཉིས་ཀྱི་ཁྱད་པར་ནི་ཆེན་པོ་རྣམས་ན་རེ་བྱིན་གྱིས་མ་བརླབས་པས་བྱིན་གྱིས་བརླབས་པ་ལ་བརྡེག་པ་ནི་ཁྱད་པར་ཅན་ཡིན་ལ་མ་བརླབས་པས་མ་བརླབས་པ་ཉིད་ལ་བརྡེག་པ་ནི་ཁྱད་པར་ཅན་མ་ཡིན་པའོ་ཞེས་ཟེར་རོ། །དེ་ནི་མ་ཡིན་ཏེ། སྨན་ཞག་བདུན་པ་ནི་ཁྱད་པར་ཅན་ཡིན་ལ། དེ་ནི་བྱིན་གྱིས་མ་བརླབས་པས་མི་རྡེག་པའི་ཕྱིར་རོ། །འོ་ན་གང་ཞེ་ན། དེ་ཡང་སྔ་མ་ནི་བརྡེག་བྱ་བྱིན་རླབས་མེད་པ་ལ་བརྡེག་པ་ཡིན་ལ། ཕྱི་མ་ནི་བརྡེག་བྱ་བྱིན་རླབས་དང་ལྡན་པ་ལ་བརྡེག་པའོ། །ཞེས་པ་ནི་མཚོ་ཊཱིཀ་ལྟར་ཡིན་ལ། དེ་ལས་བཤད་ཚུལ་གཞན་ཅུང་ཟད་འོག་ཏུ་བཤད་པར་བྱའོ། །ཞག་ཤན་ཁྱད་པར་ཅན་མ་ཡིན་པ་ལ་གཉིས་ཏེ། གོས་ཀྱི་ཞག་ཤན་ཁྱད་པར་ཅན་མ་ཡིན་པ་དང༌། ལྷུང་བཟེད་ཀྱི་ཞག་ཤན་ཁྱད་པར་ཅན་མ་ཡིན་པའོ། །ཞག་ཤན་ཁྱད་པར་ཅན་ལ་གསུམ་སྟེ། གོས་ཀྱི་ཞག་ཤན་ཁྱད་པར་ཅན་དང༌། ལྷུང་བཟེད་ཀྱི་ཞག་ཤན་ཁྱད་པར་ཅན་དང༌། སྨན་ཞག་བདུན་པའི་ཞག་ཤན་ཁྱད་པར་ཅན་ནོ། ། མཚོ་ཊཱིཀ་ལྟར་ན་སྨན་གཞན་གསུམ་ལ་ནི་ཞག་ཤན་མེད་དེ་རང་སྟོབས་ཀྱི་སྒོ་ནས་གསོག་འཇོག་འབའ་ཞིག་ཏུ་ཟད་དོ། ། དང་པོ་ལ་གཉིས་ཏེ། ཞག་སྔ་ཕྱིར་རྙེད་པ་དང༌། ཞག་གཅིག་ལ་རྙེད་པའོ། །དེ་བཞིན་དུ་ལྷུང་བཟེད་ཀྱི་ཞག་ཤན་ལའང་གཉིས་སུ་དབྱེའོ། །དེ་ལྟར་ན་གོས་དང་ལྷུང་བཟེད་ཀྱི་ཞག་ཤན་རྡེག་བྱེད་ལ་ནི། སྔར་རྙེད་པའམ་དུས་མཉམ་དུ་རྙེད་པ་ཡན་ལག་ཏུ་དགོས་ཏེ། ཕྱིས་ལས་གཞན་པའི་ཚེ་རྙེད་པའོ། །གོས་དང་ལྷུང་བཟེད་ཀྱི་ཞག་ཤན་བརྡེག་བྱ་ལ་ནི་ཕྱིས་རྙེད་པའམ་དུས་མཉམ་དུ་རྙེད་པ་ཡན་ལག་ཏུ་དགོས་ཏེ། སྔར་ལས་གཞན་པའི་ཚེ་རྙེད་པའོ། །སྨན་ཞག་བདུན་པའི་ཞག་ཤན་རྡེག་བྱེད་ལ་ནི། ཞག་གཅིག་ཡན་ཆད་ཀྱི་སྔར་བྱིན་གྱིས་བརླབས་པ་ཡན་ལག་ཏུ་དགོས་ལ། དེའི་བརྡེག་བྱ་ལ་ནི་ཞག་གཅིག་ཡན་ཆད་ཀྱི་ཕྱིས་བྱིན་གྱིས་བརླབས་པ་ཡན་ལག་ཏུ་དགོས་སོ། །རྙེད་དུས་ནི་ཕྱིས་རྙེད་ཀྱང་རུང་སྔར་རྙེད་ཀྱང་རུང་སྟེ་བྱིན་གྱིས་བརླབས་ནས་བརྡེག་ཀྱང་རུང་ངོ༌། །ཁ་ཅིག་ན་རེ། ཤན་རྣམ་པ་གསུམ་སྟེ་ཞག་ཤན་སྤང་ཤན་ལྟུང་ཤན་ནོ། །དེ་ཡང་གོས་གཉིས་ཞག་གཅིག་ལ་དུས་མཉམ་དུ་རྙེད་པ་ལ་ཤན་བརྡེག་པ་དེ་ནི་ལྟུང་ཤན་ཡིན་གྱི། ཞག་ཤན་ཡིན་པ་མི་འཐད་དེ།དེ་གཉིས་ཞག་གྲངས་མཉམ་པ་ཡིན་པས་ཞག་མ་ལོན་པ་ལོན་པར་བྱས་པ་མེད་པའི་ཕྱིར་རོ་ཞེས་ཟེར་རོ། །དེ་ནི་མ་ཡིན་ཏེ། བརྡེག་བྱ་དང་རྡེག་བྱེད་གཉིས་ཞག་འདས་པ་ཙམ་པོའི་ཞག་གྲངས་མཉམ་ཡང༌། བརྡེག་བྱ་ནི་བྱིན་གྱིས་བརླབས་པ་ཡིན་པས། རང་སྟོབས་ཀྱིས་ལྟུང་བ་བསྐྱེད་པའི་ཞག་ལོན་པ་མེད་པས། རྡེག་བྱེད་ནི་བྱིན་གྱིས་མ་བརླབས་པའི་ཤན་སྟོབས་ཀྱིས་ལྟུང་བ་བསྐྱེད་པའི་ཞག་ལོན་པར་བྱས་པ་ཤིན་ཏུའང་ཡོད་པའི་ཕྱིར་ཞེས་མཚོ་ཊཱིཀ་ལས་སོ། །བཞི་པ་མཚན་ཉིད་ནི། རྡེག་བྱེད་དེས་རང་གི་བརྡེག་བྱ་ལ་ཉེས་པ་ཞུགས་པའི་ཆ་ནས་བཞག་པའི་ཤུགས་དེ། སྐབས་འདིའི་ཤན་གྱི་མཚན་ཉིད་ཡིན་ཏེ། འདུལ་བ་ཀུན་ལས་བཏུས་པ་ལས། རྗེས་སུ་ཞུགས་པ་ཉིད་དེ་ཡོད་ན་ཕྱིས་རྙེད་པའི་དངོས་པོ་དེ་ལྟ་བུ་གཞན་ལ་ཡང་འབྱུང་བ་ཉིད་དོ། །ཞེས་གསུངས་པས་སོ། །རྣམ་འགྲེལ་ལས། བརྗོད་བྱའི་ཤན་གྱི་ཁྱད་པར་ལས། །ཞེས་གསུངས་པ་ལྟར་བརྗོད་བྱ་རྗོད་བྱེད་ཀྱི་ཤན་ཡོད་པས་སྤྱིར་ཤན་ལ་ཉེས་པས་མ་ཁྱབ་སྙམ། དབྱེ་བ་སོ་སོའི་མཚན་ཉིད་ནི། གཙོ་བོར་རྫས་སྔ་མའམ་གཞན་སྟོབས་ཀྱིས་གོས་པར་བྱས་པའི་ལྟུང་བའི་གཞིའི་རྫས་དེ། རྫས་ཤན་གྱི་མཚན་ཉིད། དེ་ལ་དབྱེ་ན་གོས་ལྷུང་སྨན་གྱི་ཤན་གསུམ། གོས་དེ་རང་གི་སྔ་མའི་ཤུགས་སམ་གཞན་གྱི་ཤུགས་ཀྱིས་སྤང་ལྟུང་བྱེད་པའི་རྫས་སུ་སོང་བ་དེ། གོས་ཀྱི་ཤན་གྱི་མཚན་ཉིད། ལྷུང་བཟེད་དང་སྨན་གྱི་མཚན་ཉིད་དེ་ལྟར་སྦྱར་བར་བྱ་སྟེ། རྩ་བར། དེ་ཡོད་ན་དངོས་པོ་དེ་ལྟ་བུ་གཞན་ལ་འབྱུང་བ་ཉིད་དོ། །ཞེས་གསུངས་པའི་ཕྱིར་རོ། །གོས་ཀྱི་ཞག་ཤན་ཁྱད་པར་ཅན་མ་ཡིན་པའི་རྡེག་བྱེད་ཀྱི་མཚན་ཉིད་ནི། ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་གཞན་ལ་འདྲེས་པར་བྱེད་པ་པོ་གང་ཞིག བརྡེག་བྱ་གོས་བྱིན་རླབས་མེད་པ་ལ་བརྡེག་པའོ། །རྟགས་དང་པོས་ཞག་ཤན་རྡེག་བྱེད་མ་ཡིན་པ་རྣམས་སེལ། རྟགས་གཉིས་པས་ཟུར་དང་པོ་བརྡེག་བྱ་གོས་ཞེས་པས་ལྷུང་བཟེད་དང་སྨན་ཞག་བདུན་པའི་རྡེག་བྱེད་སེལ། ཟུར་གཉིས་པས་ཁྱད་པར་ཅན་མ་ཡིན་པའི་རྡེག་བྱེད་སེལ་བའོ། ། གོས་ཀྱི་ཞག་ཤན་ཁྱད་པར་ཅན་མ་ཡིན་པའི་བརྡེག་བྱའི་མཚན་ཉིད་ནི། གོས་བྱིན་རླབས་མེད་པ་གང་ཞིག ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་འདྲེས་པར་བྱ་བའོ། །