ལྷུང་བཟེད་ཀྱི་ཞག་ཤན་ཁྱད་པར་ཅན་མ་ཡིན་པའི་རྡེག་བྱེད་ཀྱི་མཚན་ཉིད།

ལྷུང་བཟེད་ཀྱི་ཞག་ཤན་ཁྱད་པར་ཅན་མ་ཡིན་པའི་རྡེག་བྱེད་ཀྱི་མཚན་ཉིད་ནི།

ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་གཞན་ལ་འདྲེས་པར་བྱེད་པ་པོ་གང་ཞིག བརྡེག་བྱ་ལྷུང་བཟེད་བྱིན་རླབས་མེད་པ་ལ་བརྡེག་པའོ། །ལྷུང་བཟེད་ཀྱི་ཞག་ཤན་ཁྱད་པར་ཅན་མ་ཡིན་པའི་བརྡེག་བྱའི་མཚན་ཉིད་ནི། ལྷུང་བཟེད་བྱིན་རླབས་མེད་པ་གང་ཞིག ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་འདྲེས་པར་བྱ་བའོ། །གོས་ཀྱི་ཞག་ཤན་ཁྱད་པར་ཅན་གྱི་རྡེག་བྱེད་ཀྱི་མཚན་ཉིད་ནི། ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་གཞན་ལ་འདྲེས་པར་བྱེད་པ་པོ་གང་ཞིག བརྡེག་བྱ་གོས་བྱིན་རླབས་དང་ལྡན་པ་ལ་བརྡེག་པའོ། །གོས་ཀྱི་ཞག་ཤན་ཁྱད་པར་ཅན་གྱི་བརྡེག་བྱའི་མཚན་ཉིད་ནི། གོས་བྱིན་རླབས་དང་ལྡན་པ་གང་ཞིག ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་འདྲེས་པར་བྱ་བའོ། །ལྷུང་བཟེད་ཀྱི་ཞག་ཤན་ཁྱད་པར་ཅན་གྱི་རྡེག་བྱེད་ཀྱི་མཚན་ཉིད་ནི། ལྟུང་བ་བསྐྱེད་བྱེད་ཀྱི་ཞག་ལོན་པའི་ཆོས་གཞན་ལ་འདྲེས་པར་བྱེད་པ་པོ་གང་ཞིགབརྡེག་བྱ་ལྷུང་བཟེད་བྱིན་རླབས་དང་ལྡན་པ་ལ་བརྡེག་པའོ། །ལྷུང་བཟེད་ཀྱི་ཞག་ཤན་ཁྱད་པར་ཅན་གྱི་བརྡེག་བྱའི་མཚན་ཉིད་ནི། ལྷུང་བཟེད་བྱིན་རླབས་དང་ལྡན་པ་གང་ཞིག ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་འདྲེས་པར་བྱ་བའོ། །སྨན་ཞག་བདུན་པའི་ཞག་ཤན་ཁྱད་པར་ཅན་གྱི་རྡེག་བྱེད་ཀྱི་མཚན་ཉིད་ནི། ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་གཞན་ལ་འདྲེས་པར་བྱེད་པ་པོ་གང་ཞིག བརྡེག་བྱ་སྨན་ཞག་བདུན་པ་བྱིན་རླབས་དང་ལྡན་པ་ལ་བརྡེག་པའོ། ། སྨན་ཞག་བདུན་པའི་ཞག་ཤན་ཁྱད་པར་ཅན་གྱི་བརྡེག་བྱའི་མཚན་ཉིད་ནི། སྨན་ཞག་བདུན་པ་བྱིན་རླབས་དང་ལྡན་པ་གང་ཞིག ལྟུང་བ་སྐྱེད་བྱེད་ཀྱི་ཞག་ལོན་པའི་ཆོས་འདྲེས་པར་བྱ་བའོ། །ཞེས་པ་ལྟར་ཞག་བདུན་པའི་ཤན་ལ་ཁྱད་པར་ཅན་ལས་མེད་པ་དང༌། དུས་རུང་དང་ཐུན་ཚོད་སོགས་ལ་ཤན་མེད་པར་བཤད་པ་ནི་མཚོ་ཊཱིཀ་ལྟར་ཡིན་ནོ། ། འོན་ཀྱང་རྡེག་བྱེད་ལ་བྱིན་བརླབས་ཅན་མེད་པར་ཐལ། མེ་ཏོག་ཕྲེང་རྒྱུད་ཀྱི་འགྲེལ་བ་ལས། གོས་ཀྱི་སྐབས་སུ་བརླབས་པས་བརླབས་པ་ལ་བརྡེག་པ་དང༌། བརླབས་པས་མ་རླབས་ལ་བརྡེག་པ་ཞེས་བྱ་ནི་མེད་དེ་བྱིན་རླབས་ནི་ཉེས་པ་མི་འབྱུང་བའི་རྟེན་ཡིན་པའི་ཕྱིར་ཞེས་གསུངས་པའི་ཕྱིར་ཟེར་ན་དཔྱད་དོ། །སྤྱིར་ཞག་བདུན་པའི་ཤན་ལ་ཁྱད་པར་ཅན་ཡིན་མིན་གཉིས་དང༌། དུས་རུང་དང་ཐུན་ཚོད་སོགས་ལ་ཤན་ཡོད་པར་སྣང་སྟེ། རྣམ་འབྱེད་ལས། དགེ་སློང་གིས་ཚེས་གཅིག་ལ་མར་རྙེད་ལ། ཚེས་གཉིས་ལ་གཞན་ཞིག་ཀྱང་རྙེད་པར་གྱུར་ན། དེས་སྔ་མ་ཤོས་བཟའ་བར་བྱ་ཞིང༌། ཕྱི་མ་ཤོས་བཏང་བར་བྱ་བའམ་རུང་བར་བྱ་བའམ། གཞན་ལ་སྦྱིན་པར་བྱའོ། །གཏོང་བར་མི་བྱེད་དམ་རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཞག་བརྒྱད་པའི་སྐྱ་རེངས་ཤར་ན་སྤང་པའི་ལྟུང་བྱེད་དོ། །ཞེས་དང༌། རང་གི་རྣམ་བཤད་ལས། དུས་སུ་རུང་བ་དང༌། ཐུན་ཚོད་དུ་རུང་བ་དང༌། འཚོའི་བར་དུ་བཅང་བ་རྣམས་ལ་སྐྱོན་གྱིས་རུང་བ་མ་ཡིན་པ་ཉིད་དུ་གྱུར་བ་ལ་ཞག་བདུན་པ་ལས་བྱེ་བྲག་འགའ་ཡང་མེད་དོ། །འདིར་ཞག་བདུན་པ་སྨོས་པ་ནི་དཔེ་ཙམ་དུ་རིག་པར་བྱའོ། །ཞེས་དང༌། ཊཱི་ཀ་ལས། དུས་སུ་རུང་བ་དང༌། ཐུན་ཚོད་དུ་རུང་བ་དང༌། ཞག་བདུན་པ་དང༌། འཚོ་བའི་བར་བཅང་པ་ལ་སོགས་པ་གསོག་འཇོག་བྱས་པ་དེ་དག་ཐམས་ཅད་ནི་ཇི་ལྟར་ཟོས་ན་ལྟུང་བྱེད་དུ་འགྱུར་བ་དེ་བཞིན་དུ་འཆང་ན་སྤང་བའི་ལྟུང་བྱེད་དུ་འགྱུར་ཏེ། ཞེས་གསུངས་པས་སོ། །འོན་ཀྱང་དཔྱད་པར་བྱའོ། །ཞར་བྱུང་ནི་དགེ་སློང་གིས་གོས་གསར་དུ་རྙེད་པ་བྱིན་གྱིས་མ་བརླབས་པར་རང་གི་སྔ་ནས་ཡོད་པའི་ཆོས་གོས་ཀྱི་བྱིན་རླབས་ཕྱུང་ན། དེ་ལ་ཤན་འབྱུང་ངམ་མི་འབྱུང་ཞེ་ན། ཁ་ཅིག་ན་རེ་ཤན་འབྱུང་སྟེ། གཞན་ལས་བྱུང་བའི་གོས་དང་རྒྱུ་མཚན་མཚུངས་པའི་ཕྱིར་རོ་ཞེས་ཟེར་རོ། །དེ་ནི་གཞུང་དང་མི་མཐུན་ཏེ། ཊཱི་ཀ་ལས། འདིར་གཞན་ལས་བྱུང་བའི་གོས་ཕྱིས་རྙེད་པ་བྱིན་གྱིས་བརླབས་པ་དང་འབྲེལ་བ་དེ་ལ་སྔ་མ་ཤོས་ཀྱི་ཤན་གྱིས་ལྟུང་བ་འདི་རྣམ་པར་བཞག་གི་ཕྱི་མ་ཤོས་དེ་བདག་ཉིད་ལས་བྱུང་བ་ཡིན་ན་དེ་ལ་ལྟུང་བ་འདི་མེད་དོ་ཞེས་གསུངས་པ་དང་འགལ་ལོ། །གཞན་ཡང་དེ་ལྟར་ན་སྔ་ནས་ཡོད་པའི་ཆོས་གོས་ལ་གསར་དུ་རྙེད་པས་ཤན་བརྡེག་པའི་ཕྱིར། སྔར་རྙེད་ལ་ཕྱིས་རྙེད་ཀྱི་ཤན་བརྡེག་པར་ཐལ་བ་ལས། འདོད་ན། ཊཱི་ཀ་ལས། སྔ་མའི་ཤན་གྱི་དབང་གིས་ནི་ཕྱི་མ་ཤན་འདྲེས་པར་འགྱུར་གྱི། ཕྱི་མའི་ཤན་གྱི་དབང་གིས་ནི་སྔ་མ་ལ་ཤན་འདྲེས་པར་མི་འགྱུར་བར་ཤེས་པར་བྱའོ་ཞེས་གསུངས་པ་དང་འགལ་ལོ། །རྒྱུ་མཚན་མཚུངས་པའི་ཕྱིར་ཞེས་པའང་མ་གྲུབ་སྟེ། གཞན་ལས་གསར་དུ་བྱུང་བ་དེ་དང་རང་གི་སྔ་ནས་ཡོད་པ་སྟེ་གོས་དེ་གཉིས་ཕྱིས་རྙེད་ཡིན་མིན་གྱི་ཁྱད་པར་ཡོད་པའི་ཕྱིར་རོ། །དེས་ན་དེ་ལ་ཤན་མི་འབྱུང་བར་ཊཱི་ཀ་ལས་གསལ་ལོ། །མཚོ་ཊཱིཀ་མཆན་༤༤༤ལས། སྔར་རྙེད་ལ་ཕྱིས་རྙེད་ཀྱི་ཤན་མི་བརྡེག་པ་ཤན་གྱི་སྤྱི་གཞུང་ཡིན་པའི་ཕྱིར། ཞེས་གསུངས་པ་ལྟར་ན་བརྡེག་བྱ་ཕྱིས་རྙེད་དགོས་ཀྱང་མཚོ་ཊཱིཀ་མཆན་༤༤༢ལས། རྙེད་དུས་ཕྱིས་རྙེད་ཀྱང་རུང་སྔར་རྙེད་ཀྱང་རུང་སྟེ་ཕྱིས་བྱིན་གྱིས་བརླབས་ནས་བརྡེག་ཀྱང་རུང་ངོ༌། །ཞེས་པའི་གསུངས་ལུགས་ལ་བརྡེག་བྱ་ལ་ཕྱིས་རྙེད་མི་དགོས་སམ་དཔྱད་པར་བྱའོ། །སྤང་ཤན་གྱི་མཚན་ཉིད་ལ་གཉིས་ཏེ། རྡག་བྱེད་ཀྱི་མཚན་ཉིད་དང༌། བརྡེག་བྱའི་མཚན་ཉིད་དོ། །དང་པོ་ནི་གང་ཞིག སྤང་བའི་ལྟུང་བྱེད་དངོས་གཞི་ཡིན་སྤང་ལྟུང་ཕྱིར་བཅོས་འཆགས་རུང་གི་གང་ཟག་ཁྱད་པར་ཅན་མ་ཡིན་པ་བདག་གི་རྒྱུད་དང་འབྲེལ་བར་ཡོད་ངོ་བོ་ཤེས་ཤིང་དྲན་པར་ནུས་པའོ། །འོ་ན་སྤང་ལྟུང་མ་ཡིན་པ་ལ་སྤང་ལྟུང་དུ་འཁྲུལ་བའི་ཚེ་ན། སྤང་མི་དགོས་པར་ཐལ། སྤང་ཤན་རྡག་བྱེད་ཀྱི་མཚན་ཉིད་མ་ཚང་བའི་ཕྱིར། འདོད་ན། མདོ་ཉིད་ལས། ལྟུང་བ་བྱུང་བ་ལ་ནི་འདུ་ཤེས་ཇི་ལྟ་བ་བཞིན་དུ་བསྒྲུབ་པར་བྱའོ་ཞེས་བཤད་པ་དང་འགལ་ཞེ་ན། སྤྱིར་ན་སྤང་དགོས་པ་རྣམ་པ་གསུམ་ཡོད་དེ། སྤང་ལྟུང་བྱུང་བ་རང་སྟོབས་ཀྱིས་སྤང་བ་དང༌། སྤང་ཤན་བརྡེག་པའི་ཤན་སྟོབས་ཀྱིས་སྤང་བ་དང༌། སྤང་ལྟུང་དུ་འདུ་ཤེས་འཁྲུལ་སྟོབས་ཀྱིས་སྤང་བའོ། །སྤང་བ་དང་པོ་གཉིས་ནི་འདིར་མི་དགོས་པར་འདོད་ཅིང༌། སྤང་བ་གསུམ་པའི་སྐབས་སུ་ཁྱབ་པ་མ་གྲུབ་པའོ། །