བཞི་པ་ཕྱིར་བཅོས་དང་འབྲེལ་བའི་ཐུན་མོང།

བཞི་པ་ཕྱིར་བཅོས་དང་འབྲེལ་བའི་ཐུན་མོང་ལ།

དགོས་པ་དང༌། ཡུལ་གང་ལ་སྤང་བ་དང༌། རྟེན་གང་གིས་སྤང་བ་དང༌། དངོས་པོ་གང་སྤང་བ་དང༌། གནས་གང་དུ་སྤང་བ་དང༌།ཡུན་ཇི་སྲིད་དུ་སྤང་པ་དང་དྲུག དང་པོ་དགོས་པའི་དོན་ནི། སྤང་སྟེ་ཕྱིར་བཅོས་པས་ལྟུང་བ་དག་པར་འགྱུར་བའོ། །གཉིས་པ་ཡུལ་གང་ལ་སྤང་བ་ལ། དགེ་འདུན་ལ་སྤང་བ་དང༌། གང་ཟག་ལ་སྤང་བ་གཉིས་ལས། ལྷུང་བཟེད་ལྷག་པ་བཙལ་བ་ནི་དགེ་འདུན་ལ་སྤང་སྟེ། མདོ་ཉིད་ལས། འདི་ནི་དགེ་འདུན་ལ་སྤང་ངོ༌། །ཞེས་གསུངས་སོ། །དེ་ལས་གཞན་པ་ཐམས་ཅད་ནི་དགེ་སློང་གང་ཟག་ལ་སྤང་སྟེ། མདོ་ཉིད་ལས། དགེ་སློང་ལ་སྤང་བར་བྱའོ། །ཞེས་གསུངས་ཤིང༌། ཊཱི་ཀ་ལས། དགེ་འདུན་ལ་སྤང་མི་སྤང་ལ་བསྙེན་པར་མ་རྫོགས་པ་ལ་ཡང་མི་སྤོང་ངོ༌། །ཞེས་གསུངས་སོ། །འོ་ན་བསྡུས་པ་ལས། གསེར་ལ་སོགས་པ་དང༌། ཞག་བདུན་པ་ནི་བསྙེན་པར་མ་རྫོགས་པ་ལ་སྤང་ངོ་ཞེས་བཤད་པ་དང་འགལ་ལོ་ཞེ་ན། དེ་ནི་གསེར་ལ་སོགས་པ་རིན་པོ་ཆེ་དང་ཞག་བདུན་པ་གསོག་འཇོག་ཏུ་གྱུར་པ་ནི་དགེ་སློང་རྣམས་ལ་མི་རུང་བའི་དངོས་པོ་ཡིན་པས། བསྙེན་པར་མ་རྫོགས་པ་ལ་བཙོང་བའམ་སྦྱིན་པར་དགོངས་པ་ཡིན་གྱི། ཕྱིར་བཅོས་པའི་ཆེད་དུ་སྤང་བ་ནི་མ་ཡིན་ཏེ། ཊཱི་ཀ་ལས། བསྙེན་པར་མ་རྫོགས་པ་ལ་ཡང་མི་སྤང་ངོ་ཞེས་བཤད་ཅིང་གཞན་དུ་ན་བདག་ཉིད་ཀྱི་གནས་ངན་ལེན་བརྗོད་པའི་ཉེས་བྱས་སུ་འགྱུར་བའི་ཕྱིར་རོ། །དགེ་སློང་གང་ཟག་དེ་ཡང་ཆོས་བརྒྱད་ལྡན་ལ་སྤང་སྟེ། དེ་ཡང་ཆོ་ག་རྣམ་གཞག་གི་དགེ་སློང་ཆོས་དྲུག་ལྡན་སྔར་བཤད་པའི་སྟེང་དུ་ལྟུང་བ་མིང་རིགས་མཐུན་པ་མ་བྱུང་བ་སྟེ། འདུལ་བ་ཀུན་ལས་བཏུས་པ་ལས། ལྟུང་བ་མིང་རིགས་མི་མཐུན་པ་གཅིག་ལ་སྤང་སྟེ་བཞག་པར་བྱ་སྟེ། ཞེས་གསུངས་སོ། །སྤངས་པ་དང་མ་སྤངས་པའི་བྱེ་བྲག་ཤེས་པ་སྟེ། མདོ་འདི་ཉིད་ལས། མི་གསལ་བ་ཡང་མི་བྱའོ། །ཞེས་སོ། །དེ་ལ་སྤངས་ནའང་སྤང་བ་ཙམ་དུ་ནི་འགྱུར་རོ། ། གསུམ་པ་ནི་རྟེན་ཆོས་ལྔ་ལྡན་གྱིས་སྤངས་ཏེ། བསྙེན་རྫོགས་ཀྱི་སྡོམ་པ་གསོར་རུང་ཡན་ཆད་དང་ལྡན་པ་དང༌། གནས་ནས་མ་ཕྱུང་བ་དང༌། ཤེས་པ་རང་བཞིན་དུ་གནས་པ་དང༌། ལུས་ཐ་མལ་པར་གནས་པ་དང༌། གང་ཟག་ཁྱད་པར་ཅན་མ་ཡིན་པ་སྟེ་གཞན་ནི་སྔར་བསྟན་ལ། ཐ་མ་ནི་གང་ཟག་ཁྱད་པར་ཅན་ཡིན་ན་སྤང་མི་དགོས་པའི་ཕྱིར་རོ། །བཞི་པ་ནི་སྤང་ལྟུང་བྱུང་བའི་གཞིའི་དངོས་པོའམ་སྤང་ཤན་བརྡེགས་པ་ཡིན་པ་དང༌། ད་ལྟ་སྤང་བར་འོས་པའོ། །གོས་ཁྲུ་གང་ཁོར་ཡུག་ལས་ཆུང་བ་ཉིད་ཀྱི་དུམ་བུ་དེ་ནི་སྤང་དགོས་པ་ཉིད་དུ་མི་འགྱུར་ཏེ། ཊཱིཀ་ལས། སྤང་བར་འོས་པ་མ་ཡིན་པའི་ཕྱིར་རོ། །ཞེས་གསུངས་སོ། །དེ་བཞིན་དུ་ཟས་ཁམ་དུ་མ་ལོངས་པ་དང་སྣོད་སྤྱད་ཕོར་བུ་ལ་སོགས་ཀྱི་བྱ་བ་མི་འགྲུབ་པ་དང༌། རིན་པོ་ཆེ་གོས་ཁྲུ་གང་དུ་རི་བར་མ་ལོངས་པའང་སྤང་དགོས་པ་ཉིད་དུ་མི་འགྱུར་རོ་ཞེས་སྦྱར་རོ། །གལ་ཏེ་སྤང་ལྟུང་བྱུང་བའི་གཞིའི་དངོས་པོ་སྤང་དགོས་ན། སྲ་བརྐྱང་འབྱིན་པའི་སྤང་ལྟུང་གི་ཊཱི་ཀ་ལས། སྲ་བརྐྱང་གི་རྙེད་པ་དེ་ཡང་བགོས་པ་ལ་ནི་སྤང་བར་བྱ་བ་ཉིད་མེད་དེ། རྙེད་པའི་དངོས་པོ་གང་ཟག་གིར་གྱུར་པའི་ཕྱིར་ཏེ་དེའི་ཚེ་ན་ནི་ལྟུང་བྱེད་འབའ་ཞིག་བཤགས་པར་བྱའོ་ཞེས་སྤང་ལྟུང་བྱུང་བའི་གཞིའི་དངོས་པོ་དེ་སྤང་མི་དགོས་པར་བཤད་པ་དང་འགལ་ལོ་ཞེ་ན། དེ་ནི་སོ་སོར་བགོས་པས་ཚད་དང་མི་ལྡན་པར་གྱུར་པ་ལ་དགོངས་སོ་ཞེས་རིགས་སོ། །སྤང་ཤན་བརྡེགས་ན་ནི་འདི་ཉིད་ལས་ཡོ་བྱད་ཙམ་བདག་གིར་བྱས་པ་ལ་སྤང་བ་ཉིད་དོ་ཞེས་གསུངས་ལ་ད་ལྟར་སྤང་བར་འོས་པ་ནི། སྤང་ཤན་བརྡེག་བྱའི་སྐབས་སུ་སྔར་བཤད་པ་བཞིན་ནོ། །ལྔ་པ་ནི་གནས་ཁང་ཐ་དད་དུ་སྤང་སྟེ། རྣམ་འབྱེད་འགྲེལ་བ་ལས། བྲལ་བར་མ་བྱས་པ་ནི་གནས་གཞན་དུ་ཞག་ལོན་པར་མ་བྱས་པའོ། །ཞེས་གསུངས་པས་ཤེས་སོ། །བླ་གབ་ཐ་དད་པ་ཙམ་དུ་སྤངས་པས་ནི་སྤངས་ཤིང་བྲལ་བ་མ་ཡིན་ཏེ། མདོ་རྩ་བ་ཉིད་ལས། མཛོད་ནི་ཁོངས་སུ་གཏོགས་པ་ཉིད་དོ། །ཞེས་བླ་གབ་ཐ་དད་ཀྱང་གནས་གཅིག་ཏུ་གསུངས་ལ། གནས་གཅིག་ཏུ་ནི་སྤངས་ཀྱང་བྲལ་བའི་ཐ་སྙད་མེད་པའི་ཕྱིར་རོ། །དྲུག་པ་ནི་གཏན་དུ་སྤང་བ་དང༌། རེ་ཞིག་པའི་སྤང་བ་གཉིས་ལས། ལྷུང་བཟེད་འཚོལ་བའི་ཕྱོགས་གཅིག་དང་བྱིན་འཕྲོག་ནི་གཏན་དུ་སྤང་བ་སྟེ། མདོ་འདི་ཉིད་ལས་བཤད་དོ། །དེ་གཉིས་ལས་གཞན་ནི་རེ་ཞིག་པའི་སྤང་བ་སྟེ། རེ་ཞིག་སྤངས་ཤིང་ཞག་གཅིག་བྲལ་བར་བྱས་པའོ། །དེ་ཡང་ཊཱི་ཀ་ལས། ཕྱིར་བཅོས་པའི་ཕྱིར་བཞག་པ་ཡིན་གྱི་སྦྱིན་པའི་ཕྱིར་བཞག་པ་མ་ཡིན་པའི་ཕྱིར་རོ། །ཞེས་གསུངས་ཤིང༌། ཊཱི་ཀ་ལས། སྤངས་པ་དེ་དང་ཞག་གཅིག་བྲལ་བར་བྱ། ཞེས་གསུངས་སོ། ། ལྔ་བ་དང་པོ་གསུམ་གྱི་ཡན་ལག་ཐུན་མོང་བ་ནི། རྩ་བར། འདི་གསུམ་ནི་སྲ་བརྐྱང་བཏིང་བ་ལ་མི་འབྱུང་ངོ༌། །ཞེས་བྱུང༌། འཆང་གཉིས་འབྲལ་བའི་ལྟུང་བ་ལས། གསུམ་པོ་འདི་སྲ་བརྐྱང་བཏིང་བཞིན་པའི་དགེ་སློང་ལ་མི་འབྱུང་སྟེ། སྲ་བརྐྱང་གི་བག་ཡངས་སུ་གནས་པར་གནང་བའི་གང་ཟག་ཡིན་པའི་ཕྱིར་རོ། །སྤང་ལྟུང་ཐུན་མོང་བའི་རྣམ་པར་བཤད་པ་རྫོགས་སོ།། །།