གཉིས་པ་སྤང་ལྟུང་ཐུན་མོང་མ་ཡིན་པ་བསྟན་པ་འདི་ལ་བཅུ་ཚན་གསུམ།

གཉིས་པ་སྤང་ལྟུང་ཐུན་མོང་མ་ཡིན་པ་བསྟན་པ་འདི་ལ་བཅུ་ཚན་གསུམ་ལས།

དང་པོ་ལ་བསྡུས་དོན་དང་སོ་སོར་བཤད་པ་དང་གཉིས་ལས། དང་པོ་ནི། སོར་སྡོམ་ལས། འཆང་བ་འབྲལ་བ་འཇོག་པ་དང༌། །འཁྲུར་འཇུག་པ་དང་ལེན་པ་དང༌། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའོ། །ཞེས་བཅུ་ཚན་དང་པོའོ། །གཉིས་པ་སོ་སོར་བཤད་པ་ལ་སྤང་ལྟུང་བཅུ་ལས། དང་པོ་གོས་འཆང་པའི་སྤང་བ་ནི། རྩ་བར། ཡོད་ནའོ། །རང་གི་ཉིད་དོ། །ཞག་བཅུར་རྗེས་སུ་ཞུགས་པ་ཉིད་དོ། །གཞན་གྱི་ཉི་མའི་དང་པོ་ལའོ། །གོས་ལའོ། །འཁོར་གསུམ་ཁེབས་པའི་མཐའི་ཚད་ལའོ། །བྱིན་གྱིས་བརླབ་པ་དང་མ་འབྲེལ་བའོ། །ཞེས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ལ་གཉིས་ལས་སྔར་བཅས་ནི། ཡུལ་མཉན་ཡོད་དུ་གང་ཟག་དགེ་སློང་རྣམས་ཉོན་མོངས་པ་ཟང་ཟིང་ལ་འདུ་བ། ཉེས་པ་ཐོས་བསམ་སྒོམ་པའི་བྱ་བ་ཤོར་བ་ལ་བརྟེན་ནས་ཆོས་གོས་ལྷག་པ་འཆང་བར་བྱེད་པ་ལ་བརྟེན་ནས་དགེ་སློང་གིས་ཆོས་གོས་གསུམ་ལས་ལྷག་པར་འཆང་ན་སྤང་བའི་ལྟུང་བྱེད་དོ་ཞེས་བསླབ་པའི་གཞི་བཅའ་བར་མཛད་དོ། །རྗེས་བཅས་ནི་རྒྱལ་པོའི་ཁབ་ཏུ་འོད་སྲུངས་ཆེན་པོའི་བྱུང་བ་ལ་བརྟེན་ནས་དགེ་སློང་གིས་གོས་བྱིན་གྱིས་མ་བརླབས་པར་ཞག་བཅུ་ལས་འདས་པར་འཆང་ན་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་འདོད་པ་ཆེ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་རང་དབང་བའི་གོས་བྱིན་གྱིས་མ་བརླབས་པར་རང་ངམ་ཤན་སྟོབས་ཀྱིས་ཞག་བཅུ་འདས་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གཉིས་ཏེ། གང་འཆང་བའི་དངོས་པོ་དང༌། གང་གིས་འཆང་བའི་རྟེན་ནོ། །དང་པོ་ལ་བདུན་ལས། གོས་ཡིན་པ་སྟེ། གོས་ལའོ། །ཞེས་སོ། །རུང་བ་དང་ཁྲུ་གང་དུ་ལོངས་པ་ཡན་ཆད་ཀྱི་ཚད་དང་ལྡན་པ་སྟེ། རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཚད་དང་ལྡན་པ། ཞེས་དང༌། ཆུང་བ་ཁྲུ་གང་ཡན་ཆད་ཀྱང་ཆོག་པ་དང་འདྲའོ། །ཞེས་སོ། །འཁོར་གསུམ་ཁེབས་པའི་མཐའི་ཚད་ལའོ་ཞེས་གསུངས་པ་འདི་དང༌། ཆུང་བ་ཁྲུ་གང་ཡན་ཆད་ཀྱང་ཆོག་པ་དང་འདྲའོ་ཞེས་གསུངས་པ་འགལ་ཞེ་ན། ཆུང་བ་ཁྲུ་གང་ཡན་ཆད་ལས་ཀྱང་འཆང་བའི་སྤང་ལྟུང་དུ་འགྱུར་མོད་ཀྱི། ཁ་བསྐང་བ་ལ་རེ་བ་ཡོད་ཀྱང་ཟླ་འཇོག་ཏུ་མི་འགྱུར་བར་འཆང་ལྟུང་དུ་འགྱུར་བའི་གོས་ཀྱི་མཐའ་ཚད་བསྟན་པའི་ཕྱིར་འཁོར་གསུམ་ཁེབས་པའི་མཐའི་ཚད་ལའོ། །ཞེས་གསུངས་སོ། །སེལ་བ་ནི་མི་རུང་བ་དང་ཚད་དུ་མ་ཆོག་པ་ལས་ན་སྨད་དུ་འགྱུར་ཏེ། སྤྱིར་བསྟན་རྩ་བར།འོག་མ་དག་ལ་ནི་གཞན་ལ་ན་སྨད་པ་ཉིད་དོ། །ཞེས་སོ། །ཁྲུ་གང་མེད་པའི་གོས་ཞག་བཅུ་འཆང་སྤང་དང་ཟླ་འཇོག་གང་གི་དབང་དུ་བྱས་ཀྱང་བྱིན་བརླབས་མི་དགོས་པར་ཐལ། མེ་ཏོག་ཕྲེང་རྒྱུད་ལས། ཁྲུ་ཡི་ཚད་ལས་ཆུང་བ་ལ། །བྱིན་བརླབས་ཡིད་བརྟན་མི་དགོས་སོ། །ཞེས་གསུངས་པའི་ཕྱིར། འདོད་མི་ནུས་ཏེ། མདོ་རྩ་ལས། དེ་བས་དམན་པ་ནི་ཆུང་བ་དང་འདྲ་སྟེ་ཉེས་བྱས་སུ་འགྱུར་བ་ཉིད་དོ། །ཞེས་དང༌། མཚོ་ཊཱིཀ་༤༦༨ལས། དེ་ཡང་གོས་ཁྲུ་གང་བས་ཆུང་བ་དེ་ཁ་བསྐང་བ་ལ་རེ་བ་མེད་པར་འཆང་ན་འཆང་བའི་ཉེས་བྱས་དང༌། རེ་བ་དང་བཅས་པར་འཇོག་ན་ཟླ་འཇོག་གི་ཉེས་བྱས་སུ་འགྱུར་བ་ཉིད་དོ། །ཞེས་གསུངས་པའི་ཕྱིར་ཟེར་ན་དཔྱད་དོ། །གནས་སྐབས་དབང་བྱར་ཡོད་པ་དགོས་ཏེ། མཚོ་ཊཱིཀ་༤༥༢ལས། གཞན་དུ་ན་ལྟུང་བ་མེད་དོ། །རང་ཉིད་དབང་བ་ཡིན་ན་སྟེ། རང་གི་ཉིད་དོ། །ཞེས་དང༌། དེ་༤༥༣ལས། ཡོད་ནའོ་ཞེས་པ་བྱིན་གྱིས་བརླབས་པ་ལ་རང་དབང་དུ་ཡོད་ན་སྟེ། གོས་དེ་གཞན་གྱི་མཛོད་དམ་པོར་ཚུད་པ་ལ་སོགས་པ་ལ་ནི། བྱིན་བརླབས་མེད་པར་ཞག་བཅུ་འདས་ཀྱང་འཆང་ལྟུང་མི་འབྱུང་སྟེ། རང་དབང་དུ་བྱིན་གྱིས་བརླབས་ཏུ་མེད་པའི་ཕྱིར་རོ། །ཞེས་གསུངས་སོ། །དེ་ལ་གོས་དེ་གཞན་གྱི་མཛོད་དུ་དམ་པོར་ཚུད་པ་ལ་འཆང་ལྟུང་འབྱུང་བ་མེད་པར་འདོད་མི་ནུས་ཏེ། མཚོ་ཊཱིཀ་༤༥༣ལས། བདག་ཉིད་ཆོས་གོས་ཀྱིས་ཕོངས་པར་གྱུར་མ་གྱུར་གཉིས་ལས། གཉིས་པ་ལྟར་ན་ནི་གོས་དེ་གཞན་ལ་མ་བསྔོས་པར་ཞག་བཅུ་འདས་ན་འཆང་ལྟུང་དུ་འགྱུར་བ་བདེན་ཡང༌། དང་པོ་ལྟར་ན་༼བྱིན་རླབས་མེད་ཅིང༽གཞན་ལ་མ་བསྔོས་པར་ཞག་བཅུ་འདས་ཀྱང་འཆང་ལྟུང་དུ་མི་འབྱུང་སྟེ། ལོངས་སྤྱོད་ཀྱི་བར་ཆད་ཀྱི་རྐྱེན་དང་ལྡན་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་ཞིབ་ཆ་གོང་འོག་གི་གསུངས་ཚུལ་ལས་ཤེས་ནུས་སོ། །གཞན་འབའ་ཞིག་དབང་བའི་གོས་ཡིན་ན་ལྟུང་བ་མེད་དོ། །བྱིན་གྱིས་བརླབས་པ་དང་མ་འབྲེལ་ལམ། འབྲེལ་ཀྱང་ཤན་རྗེས་སུ་ཞུགས་པ་ཡིན་པའོ། །མཚོ་ཊཱིཀ་༤༥༣ལས། ཟླ་འཇོག་གི་གོས་ཁ་བསྐང་བ་ལ་རེ་བ་དང་བཅས་ཏེ་བཞག་པའི་ཁ་བསོགས་ཀྱི་གོས་མ་ཡིན་པ་སྟེ། ཟླ་འཇོག་གི་སྐབས་ནས། རྩ་བར། གཞན་དུ་ན་དེ་ནི་ཞག་སུམ་ཅུ་འདས་ནའོ། །ཞེས་གསུངས་སོ། །དེ་ལ་ཁ་བསོགས་ཀྱི་གོས་མ་ཡིན་དགོས་པ་མི་འཐད་པར་ཐལ།དགེ་སློང་གིས་ཁ་བསགས་ཀྱི་གོས་རེ་བ་དང་བཅས་པའི་རིགས་མི་མཐུན་པ་ཞག་བཅུ་འདས་ན་ཞག་བཅུ་འཆང་སྤང་གི་ལྟུང་བ་འབྱུང་བ་ཡོད་པའི་ཕྱིར་ཏེ། མཚོ་ཊཱིཀ་༤༦༣ལས། ཁ་དོག་རིགས་མི་མཐུན་པ་དང་ལ་སོགས་པའི་སྒྲས་བསྡུས་པ་རྒྱུ་ལས་རིགས་མི་མཐུན་པ་ནི་ཁ་བསྐང་བའི་གོས་སུ་ཆོག་པ་ཉིད་མ་ཡིན་ནོ། །དེས་ན་རིགས་མི་མཐུན་པ་ལ་རེ་ཞིག་བཞག་ཏུ་མི་གནང་ལ།བཞག་ན་ཡང་ཞག་བཅུ་པ་ཉིད་དུ་འགྱུར་རོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །གཉིས་པ་གང་གིས་འཆང་བའི་རྟེན་ནི། སྲ་བརྐྱང་དང་མི་ལྡན་པ་སྟེ། རྩ་བར། འདི་གསུམ་ནི་སྲ་བརྐྱང་བཏིང་བ་ལ་མི་འབྱུང་ངོ། །ཞེས་སོ། །གཉིས་པ་བསམ་པའི་ཡན་ལག་ལ་གཉིས་ལས།འདུ་ཤེས་ནི་གཞིའི་ཡན་ལག་དེ་དག་ལ་མ་འཁྲུལ་བ་སྟེ། དེ་ཡང་ངེས་པའི་འདུ་ཤེས་སམ། རང་གི་གཞིའི་རྣམ་པ་མ་དོར་བར་འཛིན་པའི་ཡིད་གཉིས་ཀྱང་རུང་སྟེ། ཊཱི་ཀ་ལས། ཡིད་གཉིས་ཟ་བའི་འདུ་ཤེས་ཀྱིས་དཔྱད་ན། ཞེས་སོ། །ཀུན་སློང་ནི་རང་དོན་དུ་གོས་འཆང་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་གོས་དེ་བྱིན་རླབས་མ་བྱས་པར་འཇོག་པ་ཉིད་ཡིན་གྱི། ལུས་ངག་ཏུ་ཐོན་པ་མི་དགོས་ཏེ། བྱ་བ་མི་བྱེད་པའི་སྦྱོར་བ་ཡིན་པའི་ཕྱིར་རོ། །བཞི་བ་མཐར་ཐུག་ནི། རང་ངམ་ཤན་སྟོབས་ཀྱིས་ཞག་བཅུའི་མཚན་མོ་མཐའི་སྐད་ཅིག་མའོ། །གོས་བྱིན་གྱིས་མ་བརླབས་པར་ཞག་བརྒྱ་ལ་སོགས་པ་འདས་ན་ཅིར་འགྱུར་ཞེ་ན། འདི་ལ་སྔ་རབས་ཀྱི་འདུལ་འཛིན་རྣམས་ལ་འདོད་ལུགས་བཞི་བྱུང་སྟེ། འཆང་ལྟུང་ཁ་སྦྱར་བའི་ཚེ་ཡིན་ཟེར་བ་དང༌། དཀར་འབྱམ་དུ་འདོད་པ་དང༌། ནག་འབྱམ་ཆུང་ངུར་འདོད་པ་དང༌། ནག་འབྱམ་ཆེན་པོར་འདོད་པའོ། །ཞག་བཅུ་ནས་ཞག་རེ་རེ་ལ་སྤང་ལྟུང་རེ་རེ་འབྱུང་བ་ཡིན་ཏེ། གྲོང་རྒྱུ་བའི་ཊཱི་ཀ་ལས། ཁྱིམ་རེ་རེར་སོང་བ་ལས་ལྟུང་བྱེད་རེ་རེ་འགྱུར། ཞེས་ནག་འབྱམ་དུ་གསུངས་པ་དང༌། པུ་ནྱ་ཤྲཱིའི་གདམས་ངག་ལས་ཀྱང་ནུབ་ལྷག་པར་ཉལ་བས་མཚན་མོ་གསུམ་པ་ནས་ནུབ་རེ་རེ་ལ་ལྟུང་བྱེད་རེ་རེ་འགྱུར་བར་གསུངས་པའི་རྒྱུ་མཚན་མཚུངས་པའི་ཕྱིར་རོ། །རིགས་པས་ཀྱང་ཞག་རེ་རེ་ལ་དགག་བྱ་སྔ་མའི་རྒྱུན་གནས་པའི་ཕྱིར་རོ། །འོ་ན་སྤངས་པའི་ནུབ་མོ་ཡང་འཆང་བའི་སྤང་ལྟུང་འབྱུང་བར་འགྱུར་རོ་ཞེ་ན། དེའི་ཚེ་ན་འཆང་ལྟུང་མི་འབྱུང་སྟེ་གནས་སྐབས་དབང་དུ་བྱར་མེད་པའི་ཕྱིར་རོ། །འདི་སོགས་བརྒྱད་ལ་སྦྱོར་ལྟུང་མེད་དེ། འཆང་བྲལ་འཇོག་པ་གསུམ་དང༌། ལྷུང་བཟེད་འཆང་བ། དགོན་པ་བའི་འབྲལ་བ། རས་ཆེན་དང༌། དབྱར་རྙེད་བཞག་འཕྱིས། གསོག་འཇོག་གི་སྤང་བ་དང་བརྒྱད་གནང་ལ་ཚད་བཟུང་ཡིན་པས་སྦྱོར་ལྟུང་མེད་དོ། ། གཉིས་པ་འབྲལ་བའི་སྤང་བ་འཆད་པ་ལ། གདིང་བ་དང་བྲལ་བ་ལ་ཉེས་པ་མེད་པ་སོགས་བཤད་པ་དང༌། འབྲལ་བའི་ལྟུང་བའི་རྣམ་པར་བཞག་པ་དང་གཉིས། དང་པོ་ནི། ལུང་ཕྲན་ཚེགས་ལས། དགེ་སློང་དག་ངས་ཆོས་གོས་གསུམ་དང་འབྲལ་བ་ནི་གསུངས་ཀྱི། གདིང་བ་དག་ནི་མ་ཡིན་ཏེ། ཞེས་གསུངས་པ་འདིར་བསྡུས་ཏེ། རྩ་བར། གདིང་བ་དང་བྲལ་བ་ལ་ནི་ཉེས་པ་མེད་དོ། །ཞེས་སོ། །མ་རྙེད་ན་བླ་གོས་བཞི་བལྟབས་སུ་བྱས་པའི་སྟེང་དུ་ཉལ་བ་གནང་གི གདིང་བ་མེད་པར་དགེ་འདུན་གྱི་གནས་མལ་ལ་ལོངས་སྤྱོད་པ་མ་གནང་བ་ཡིན་ཏེ། གདིང་བ་མི་འཁྱེར་བའི་རྒྱུར་འགྲོ་འགོག་པའོ། །དགེ་སློང་དང་བཅས་པ་ཉིད་དང་ཞེས་པ་ལ་སོགས་པ་ནི་ལུང་གོས་ཀྱི་གཞི་ལས་སྣམ་སྦྱར་བཞག་ཏུ་རུང་བ་ནི་ལྔ་སྟེ། དགེ་སློང་དང་བཅས་པའི་གནས་སྒོ་གླེགས་དང་བཅས་པ་དང༌། ཆར་འབབ་པའམ་ཆར་འབབ་ཏུ་དོགས་པ་དང༌། འབབ་ཆུའི་ཕ་རོལ་ཏུ་འགྲོ་བར་འདོད་པ་དང༌། སྲ་བརྐྱང་གཏིང་བའི་གནས་དང༌། དགེ་འདུན་གྱི་གནང་བ་བྱིན་པར་གྱུར་པའོ་ཞེས་གནང་བ་ལྔ་གསུངས་པའི་ཤུགས་ཀྱིས་དགག་པ་ལྔ་བསྟན་པ་རྣམས་མདོ་འདིར་བསྡུས་པའོ། །སྐབས་འདིར་མུ་བཞི་སྲིད་དེ། སྣམ་སྦྱར་ཆུད་འཛའ་བྱེད་དང་ཆུད་འཛའ་བ་སྲུང་བྱེད་གཉིས་ཀ་ཡོད་པ་དང༌། གཉིས་པ་མེད་པ་དང༌། ཆུད་འཛའ་བྱེད་ཡོད་ལ་དེ་སྲུང་བྱེད་མེད་པ་དང༌། ཆུད་འཛའ་བྱེད་མེད་ལ་ཆུད་འཛའ་བ་སྲུང་བྱེད་ཡོད་པའོ། །མུ་དང་པོ་ལ་སྣམ་སྦྱར་ཁྱེར་ན་ཉེས་བྱས་དང༌། མུ་གཉིས་པ་དང་གསུམ་པ་ལ། སྣམ་སྦྱར་མ་ཁྱེར་ན་ཉེས་བྱས་སུ་འགྱུར་བ་ནི་གང་ཟག་ཐམས་ཅད་ལའོ། །མུ་བཞི་པ་ལ། སྣམ་སྦྱར་མ་ཁྱེར་ན་ཉེས་བྱས་སུ་འགྱུར་བ་ནི་གང་ཟག་གི་བྱེ་བྲག་ལ་སྟེ། གནང་བ་མ་བྱིན་པ་དང་སྲ་བརྐྱང་མ་གཏིང་བའི་དགེ་སློང་ལ་ཉེས་བྱས་འདི་བསྐྱེད་ཀྱི་གནང་བ་བྱིན་པ་དང་སྲ་བརྐྱང་བཏིང་བ་ལ་ནི་ཉེས་པ་མེད་དོ། །ཆོས་གོས་ཀྱི་ཕྱུང་སྟེ་ཞེས་པ་ནི་ལུང་ཕྲན་ཚེགས་ལས་སྔ་མ་རང་གི་སེམས་ཀྱིས་ཕྱུང་སྟེ་བྱིན་གྱིས་བརླབ་པར་བྱའོ་ཞེས་གསུངས་ལ། འགྲེལ་ཆུང་ལས། ཆོས་གོས་དེ་ལག་ན་འདུག་པ་ཙམ་དུ་བསམས་ཏེ་གྲོགས་པོ་གཅིག་གི་གནས་སུ་དབྱུང་བའི་སྔགས་བྱས་ལ། ཞེས་སོ། ། ཕྱི་མ་ནི་དགེ་སློང་གཞན་ཡོད་པའི་དབང་དུ་བྱས་པ་དང༌། སྔ་མ་ནི་དགེ་སློང་གཞན་མེད་པའི་དབང་དུ་བྱས་པ་ཡིན་ཏཻ། ཆོས་གོས་དབྱུང་བ་དང་བྱིན་གྱིས་བརླབས་པ་ནི་ཉེ་བར་མི་གནས་ན་ཡིད་ཀྱི་རྣམ་པར་བརྟགས་པས་འཆགས་སོ་ཞེས་འབྱུང་བས་སོ། །སྣམ་སྦྱར་ལྕི་བ་ཉིད་ཡིན་ན་ཞེས་སྣམ་སྦྱར་དང་མི་འབྲལ་བའི་གནང་བ་བྱིན་པ་འདིའི་དོན་ལ་དྲུག་ལས། དང་པོ་དགོས་པའི་དོན་ནི། སྣམ་སྦྱར་དང་བྲལ་ཡང་ལྟུང་བ་མི་འབྱུང་བ་དང༌། ལས་ཀྱི་ཆོ་གས་བྱིན་པས་བཅས་པ་འདིའི་མཚམས་ཟིན་པའོ། །གཉིས་པ་ཡུལ་གང་ལ་གནང་བ་སྦྱིན་པ་ནི་ཆོས་བཅུ་ལྡན་ཏེ། ཐུན་མོང་བ་བརྒྱད་ནི་ལས་ཀྱི་གཞིར་འཆད་ཅིང༌། རྒན་པའམ་ནད་པ་ཡིན་པ་དང༌། སྔར་གནང་བ་བྱིན་པ་དང་མ་འབྲེལ་བ་སྟེ། རྒན་པོ་དང་ནད་པ་དག་ལའོ། །ཞེས་དང༌། སྔར་གནང་བ་མ་ཐོབ་པ་ལའོ་ཞེས་པའི་གནད་ཀྱིས་སྦྱར་བའོ། །