གཉིས་པ་འབྲལ་བའི་ལྟུང་བའི་རྣམ་པར་བཞག་པ།

གཉིས་པ་འབྲལ་བའི་ལྟུང་བའི་རྣམ་པར་བཞག་པ་ནི།

རྩ་བར། བྱིན་གྱིས་བརླབས་པ་དང༌། གནང་བ་མ་ཐོབ་པ་ནི་བྱེད་པ་པོ་ཉིད་དོ། །དེའི་གནས་ཉེ་འཁོར་དང་བཅས་པ་ནས་གཞན་ན་གནས་པ་ལ་སྐྱ་རེངས་ཤར་ནའོ། །མཚམས་བྱས་པ་ལ་ནི་མཚམས་གནས་ཀྱི་མཐའ་འོ། །ཞེས་སོགས་སོ། །འདིའི་དོན་ལ་བཞི་ལས། དང་པོ་གླེང་གཞི་ནི། ཡུལ་མཉན་ཡོད་དུ་གང་ཟག་དགེ་སློང་རབ་ཏུ་མང་པོས་ཉོན་མོངས་པ་ཆོས་གོས་མེད་པར་སྟོད་གཡོགས་ཙམ་གྱིས་ལྗོངས་རྒྱུ་བ། ཉེས་པ་ཆོས་གོས་དང་བྲལ་བར་བྱས་པ་ལས་སྤང་བའི་ལྟུང་བྱེད་བཅས་པའོ། །གཉིས་པ་དགག་བྱ་ནི་བསྙེན་རྫོགས་ཀྱི་རྟགས་ཐུན་མོང་མ་ཡིན་པ་ཉམས་པ་དང༌། ཆོས་གོས་གསུམ་ཆུད་འཛའ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་རང་གི་འཚོ་བའི་ཡོ་བྱད་དུ་བྱིན་གྱིས་བརླབས་པའི་ཆོས་གོས་གང་ཡང་རུང་བ་དང་མཚམས་ཐ་དད་དུ་འབྲལ་བར་བྱེད་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གསུམ་སྟེ། གང་དང་འབྲལ་བའི་དངོས་པོ་དང༌། གང་དུ་འབྲལ་བའི་གནས་དང༌། གང་གིས་འབྲལ་བའི་རྟེན་ནོ། །དང་པོ་ལ་ལྔ་ལས། ཆོས་གོས་གསུམ་ལས་གང་ཡང་རུང་བ་ཡིན་པ་སྟེ། ལུང་རྣམ་འབྱེད་ལས། ཆོས་གོས་གསུམ་ལས་གང་ཡང་རུང་བ་དང་ཞེས་བྱ་བ་ནི་སྣམ་སྦྱར་དང་བླ་གོས་དང་མཐང་གོས་ལས་གང་ཡང་རུང་བ་དང་ངོ། །ཞེས་གསུངས་སོ། །དེ་གསུམ་ལས་གཞན་གདིང་བ་ལ་སོགས་པ་དང་བྲལ་ཡང་ཉེས་པ་མེད་དོ། །རང་གི་འཚོ་བའི་ཡོ་བྱད་ཀྱི་བྱིན་རླབས་ཡོངས་རྫོགས་དང་ལྡན་པ་སྟེ། རྩ་བར། བྱིན་གྱིས་བརླབས་པ་དང་གནང་བ་མ་ཐོབ་པ་ནི་བྱེད་པ་པོ་ཉིད་དོ། །ཞེས་པས་སོ། །མཁོ་བ་དང་ལྷག་པའི་ཡོ་བྱད་དུ་བྱིན་གྱིས་བརླབས་པ་དང་བྱིན་རླབས་མེད་པའི་ཆོས་གོས་དང་བྲལ་བ་ལ་ནི་ཉེས་པ་མེད་དོ། ། རུང་བ་དང༌། ཆོས་གོས་རང་རང་གི་ཚད་དང་ལྡན་པ་སྟེ་སྤྱིར་བསྟན་པ་ལས་སོ། །ཞེས་མཚོ་ཊཱིཀ་ལས་གསུངས་སོ། །དེ་ལ་རང་རང་གི་ཚད་དགོས་ན། མཚོ་ཊཱིཀ་༤༦༡ལས། དམ་དུམ་དུ་གྱུར་ཏེ་འཁོར་གསུམ་ཁེབས་པ་ཡན་ཆད་དུ་ལོངས་ན་གཅིག་ཉིད་ལ་བྱིན་བརླབས་ཡོད་ཅིང་དེ་ལས་གཞན་ལ་བྱིན་བརླབས་མེད་དེ། ཞེས་དང༌། ཆོས་གོས་ཕྱེད་ཚལ་དུ་གྱུར་ཏེ་དེ་གཉིས་བཟང་ངན་མ་ཕྱེད་ན་དོན་ལ་ནི་ཚལ་པ་གཅིག་ལ་ནི་བྱིན་བརླབས་ཡོད་ཀྱང་འབྲལ་བ་ནི་གཉིས་ཀ་ལ་སྲུང་བར་བྱ་སྟེ། ཞེས་གསུངས་པ་དང་མི་འགལ་ཚུལ་གང་ཡིན་དཔྱད་དགོས་སོ། ། དགོན་པ་བས་འཇིགས་པའི་དབང་གིས་ཆོས་གོས་གཅིག་གྲོང་དུ་བཞག་པ་མ་ཡིན་པ་སྟེ། རྩ་བར། དགོན་པ་བའི་ཆོས་གོས་གཅིག་ལ་ནི་འཇིགས་པ་དང་བཅས་པ་ཉིད་ཡིན་ན་གྲོང་ཡང་རང་གི་གནས་དང་འདྲའོ། །ཞེས་པས་སོ། །