༣ ཉེ་བརྒྱུད་གཏེར་མའི་བྱུང་ཚུལ་འཕྲོས་དོན་དུ་རགས་ཙམ་གླེང་བ།
གསུམ་པ་ཉེ་བརྒྱུད་གཏེར་མའི་བྱུང་ཚུལ་འཕྲོས་དོན་དུ་གླེང་བ་ནི། ད་ནི་གསང་སྔགས་སྔ་འགྱུར་བའི་ཁྱད་པར་གྱི་ཆོས་སུ་གྲུབ་པ་ཟབ་མོ་གཏེར་གྱི་ལོ་རྒྱུས་མདོ་ཙམ་བརྗོད་ན། དེ་ཡང་བསྐལ་པའི་ཡང་མཐའ་སྙིགས་མ་ལྔ་ཆེས་ཆེར་བདོ་བའི་དུས་འདིར། ཟབ་གསང་སྙིང་པོའི་ཡང་བཅུད་བཀའ་མའི་ཆོས་རྣམས་ཚོང་དུས་ཀྱི་འོ་མ་བཞིན་དབང་དང་གདམས་ངག་གི་བཀའ་འཆལ། བརྒྱུད་པ་གསེར་གྱི་ཉག་ཐག་ལ་དམ་སེལ་དང་འདྲེས་ཁྱེར་གྱི་སླད་ཞུགས་པས་བྱིན་རླབས་ཀྱི་ཚན་ཁ་ཉམས། དུས་ཀྱི་རྒུད་པ་མི་བཟད་པ་སྟོབས་སུ་བདོ་བས་སྐྱེ་འགྲོ་རྣམས་སྡུག་བསྔལ་དྲག་པོའི་འདམ་དུ་བྱིང་བ་སྐྱོབ་པའི་ཆེད་དང་། གསང་སྔགས་ཀྱི་བསྟན་པ་མི་ནུབ་པའི་ཕྱིར་དུ་ཨོ་རྒྱན་སངས་རྒྱས་གཉིས་པས་སྐུ་ཚབ་ལས་ཅན་གྱི་སྐྱེས་བུ་འབྱུང་བ་རྣམས་གནས་དུས་མཚན་རྟགས་ཀྱི་སྒོ་ནས་གསལ་བར་ལུང་བསྟན། གསུང་ཚབ་བླ་གཏེར་ཐུགས་གཏེར་གྱིས་མཚོན་པའི་གཏེར་རིགས་བཅོ་བརྒྱད་གཏེར་དུ་སྦས། ཐུགས་ཀྱི་དགོངས་པ་རྗེ་འབངས་གྲོགས་གསུམ་སོགས་ལས་ཅན་གྱི་སྐྱེས་བུ་ལ་གཏད་དེ་སྨོན་ལམ་གཏད་རྒྱ་མཛད། ཁྱད་པར་གཏེར་དུ་བཞུགས་པའི་ཟབ་ཆོས་ཕལ་མོ་ཆེ་མཁའ་འགྲོའི་བརྡའ་ཡིག་གིས་བཅིངས་པས་སྐལ་མཉམ་གྱི་གང་ཟག་ལས་གཞན་གྱིས་ཁྲོལ་མི་སྲིད་པས་ན་ཕལ་བའི་གང་ཟག་གིས་བར་མ་ཆོད་པར་མཁའ་འགྲོའི་གསང་བའི་བརྡ་བསྒྱུར་བས་གཞུང་ཟབ་ཅིང་བྱིན་རླབས་ཆེ་བ་དང་། གཏེར་སྟོན་ཉིད་ལས་ཕལ་བའི་གང་ཟག་གིས་བློ་གྲོས་ཇི་ལྟར་བསྒྲིམས་ནས་བརྟགས་ཀྱང་ཚིག་དོན་གྱི་ཆ་ཕྱོགས་ཙམ་དཔྱད་མི་བཟོད་པ་གཏེར་འབྱིན་སྐྱེས་བུ་ཚད་མར་ཡིད་ཆེས་ནུས་པ་དང་། གནས་དུས་སྨོན་ལམ་ཟབ་མོའི་རྟེན་འབྲེལ་དུས་སུ་བབ་པ་ན་རིག་འཛིན་སྤྲུལ་བའི་གཏེར་སྟོན་མཆོག་གཉིས། རྒྱལ་པོ་ལྔ། གླིང་པ་བརྒྱད། ནུས་ལྡན་ཉེར་གཅིག གཏེར་ཆེན་བརྒྱ་རྩ། གཏེར་ཕྲན་སྟོང་རྩ་སོགས་ཀྱིས་མཐོང་གྲོལ་རྟེན་གསུམ་དང་ཐོས་གྲོལ་ཆོས་མཛོད། མྱོང་གྲོལ་དམ་རྫས་ལ་སོགས་པའི་གཏེར་རིགས་ཀྱི་སྒོ་འཕར་ཕྱེས་ཏེ་གྲོལ་བ་བཞི་ལྡན་གྱི་ཕྲིན་ལས་རྨད་དུ་བྱུང་བས་འགྲོ་བ་སྒྲོལ་བ་སོགས་བསམ་གྱིས་མི་ཁྱབ་པའི་རང་བཞིན་ཕལ་བའི་སྤྱོད་ཡུལ་ལས་འདས་པ་སྟེ། འཕགས་པ་བསོད་ནམས་ཐམས་ཅད་སྡུད་པ་ཏིང་ངེ་འཛིན་གྱི་མདོ་ལས། དྲི་མ་མེད་པའི་གཟི་བརྗིད་ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར། རི་དང་། རི་སུལ་དང་། ཤིང་དག་གི་ནང་དུ་བཅུག་པ་དག་ཡོད་དེ་གཟུངས་དང་ཆོས་སྒོ་མཐའ་ཡས་པ་གླེགས་བམ་དུ་བྱས་པ་དག་ཀྱང་ལག་ཏུ་འོང་བར་འགྱུར་རོ། །ཞེས་དང་། ཆུ་ཀླུང་རོལ་པའི་མདོ་ལས། ང་ཡི་བསྟན་པའི་ཆོས་ཀྱི་གཞུང་། །ཐུགས་ནས་ཐུགས་ཀྱི་གཏེར་དུ་སྦས། །ཡང་ན་ས་ཡི་སྙིང་པོར་བྱ། །ཅི་ཕྱིར་མུ་སྟེགས་ཅན་མགོ་རྒོད། །ངེས་དོན་དཀྲུག་པར་འགྱུར་ཏ་རེ། །དེ་ཕྱིར་ཆུ་ཀླུང་རྒྱུན་མི་གཅོད། །ཅེས་དང་། འཇམ་དཔལ་རྩ་རྒྱུད་ལས། སྔོན་དུ་ངས་ནི་གང་བཤད་པའི། །ཐེག་པ་ཆེན་པོའི་མདོ་སྡེ་ཡང་། །དེ་ཡི་ཚེ་ན་བུམ་པ་ལས། །བཀའ་ཐུབ་ཆེན་པོས་འདྲེན་པར་འགྱུར། །ཞེས་དང་། མདོ་སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། །འཆད་དང་རིགས་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཅི་ཕྱིར་ཞེ་ན་རྒྱལ་བས་ཆོས་ཚུལ་གང་བསྟན་པ། །དེ་ལ་མི་མཆོག་སློབ་མར་བཅས་པས་སྔོན་བསླབས་ཤིང་། །མངོན་སུམ་བྱས་ནས་བསླབས་པ་ཇི་བཞིན་སྟོན་བྱེད་པ། །སངས་རྒྱས་མཐུས་བྱེད་རང་གི་སྟོབས་ཀྱི་མཐུས་མ་ཡིན། །ཞེས་པ་སོགས་མདོ་རྒྱུད་ལུང་རིགས་ཚད་མས་རྒོལ་བ་ངན་པའི་ལོག་རྟོགས་འཇོམས་པ་སོགས་ཞིབ་པའི་རྣམ་བཞག་གཏེར་བྱུང་གི་ལོ་རྒྱུས་ཆེན་མོ་དག་ན་གསལ་བས་དེ་དག་ཏུ་གཟིགས་པར་ཞུ། །
སྨྲས་པ།
རྒྱལ་ཀུན་གསང་བ་ཟབ་མོའི་ཡེ་ཤེས་ཁམས། །རྟག་ཁྱབ་འགྱུར་མེད་འཕོ་ཆེན་དྭངས་མའི་སྐུར། །ཡོངས་བཞེངས་མཚན་བརྒྱད་སྤྲུལ་པའི་རོལ་གར་ཅན། །ཨོ་རྒྱན་སངས་རྒྱས་གཉིས་པ་རྒྱལ་གྱུར་ཅིག ། གང་གི་རྨད་བྱུང་ཐུགས་རྗེའི་ཐབས་མཁས་འཕྲུལ། །དུས་སུ་སྨིན་པས་བསིལ་ལྡན་བྷོ་ཊའི་ལྗོངས། །སྣ་ཚོགས་ཆོས་ནོར་གཏེར་ཁས་ཡོངས་གཏམས་པའི། །ཟླ་བྲལ་བཀའ་དྲིན་ལྷུན་པོའི་ཚད་ལས་ལྕི། །ཐུབ་པའི་ཞལ་གསུང་བྱིན་རླབས་རྗེས་གནང་བཀའ། །དཔྱད་པ་གསུམ་ལྡན་རྣམ་དག་ཆོས་ཀྱི་མཛོད། །གྲུབ་བརྙེས་རིག་འཛིན་ཚད་མའི་གཏེར་སྟོན་གྱིས། །ལས་འཕྲོ་སྨོན་ལམ་གཏད་རྒྱའི་ཚུལ་དུ་དྲངས། །གང་དུ་རྒུད་ཅིང་ཤིན་ཏུ་ཉམ་ཐག་པའི། །གནས་དུས་གང་དུ་སྣ་ཚོགས་འཕྲིན་ལས་སྟོང་། །དུས་མཐའི་རླུང་གིས་བདས་པའི་མེ་ཆེན་བཞིན། །འཇུག་པ་བསམ་མི་ཁྱབ་འདི་རྒྱལ་བའི་མཐུ། །དགུ་ལྡན་བརྒྱུད་པའི་རིང་ལུགས་མ་ཉམས་པ། །ཤིན་ཏུ་ཉེ་བརྒྱུད་ཟབ་རྒྱས་གསང་བའི་མཛོད། །གྲོལ་བ་བཞི་ལྡན་སྨིན་གྲོལ་ཆོས་ཀྱི་གཏེར། །དུས་ཀྱི་ཡང་མཐར་སྐྱེ་དགུའི་དཔྱིད་དུ་སྨིན། །མཚོ་སྐྱེས་རྒྱལ་བའི་གསང་གསུམ་ནུས་བྱིན་འོད། །རྨད་བྱུང་འཕྲིན་ལས་གྲགས་པ་སྟོང་འབར་བས། །གངས་ལྗོངས་རྒུད་པའི་མུན་ཚོགས་ཀུན་བསལ་ཏེ། །སྡེ་བཞིའི་མངའ་ཐང་ཕྱོགས་སུ་རྒྱས་གྱུར་ཅིག །
ཅེས་པ་ནི་ཉེ་བརྒྱུད་གཏེར་མའི་བྱུང་བ་འཕྲོས་དོན་གྱི་ཚུལ་དུ་ཉུང་ངུའི་ངག་གིས་མདོ་ཙམ་གླེང་བའི་སྐབས་ཀྱི་ཚིགས་སུ་བཅད་པའི་ཕྲེང་བའོ། །
སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། ཉེ་བརྒྱུད་གཏེར་མའི་བྱུང་ཚུལ་འཕྲོས་དོན་དུ་རགས་ཙམ་གླེང་བའི་སྐབས་ཏེ་སརྒ་དགུ་པ་རྫོགས་སོ།། །།