གཉིས་པ་གང་དུ་འབྲལ་བའི་གནས།

གཉིས་པ་གང་དུ་འབྲལ་བའི་གནས་ནི།

ཆོས་གོས་ཀྱི་གནས་ཉེ་འཁོར་དང་བཅས་པ་ལས་གཞན་ཡིན་པ་སྟེ།དེའི་གནས་ཉེ་འཁོར་དང་བཅས་པ་ལས་གཞན་ན་ཞེས་སོ། །བདག་པོ་གཅིག་ཉིད་མ་ཡིན་པའི་བར་གྱི་མཚམས་སེག་དང་རེ་ལྡེ་ལ་སོགས་པ་རྣམས་ནི་གནས་ཐ་དད་པ་ཡིན་ཏེ། ཞུ་བ་ལས། བཙུན་པ་དགེ་སློང་གིས་གནས་གཅིག་ལ་སྟེང་གཡོགས་ཀྱང་གཅིག་པར་གནས་པ་དེ་ཉིད་དུ་ཆོས་གོས་ཀྱང་བཞག་ན་ཆོས་གོས་དང་བྲལ་བར་གྱུར་པ་མཆིས་སམ། ཡོད་དེ་གནས་དེར་མུ་སྟེགས་ཅན་སྣ་ཚོགས་དང༌། དགེ་སྦྱོང་དང་བྲམ་ཟེ་དང་སྤྱོད་པ་དང་ཀུན་ཏུ་རྒྱུ་རྣམས་དང་སྤུན་སོ་སོར་བགོས་པ་རྣམས་སུའོ། །ཞེས་གསུངས་སོ། །ནོར་ཐ་དད་ཀྱང་གནས་ཁང་སོ་སོར་མ་བགོས་ན་མི་འབྲལ་ཏེ། ཊཱི་ཀ་ལས། བདག་པོ་མང་པོ་དོན་གཅིག་པ་དག་ཆ་སོ་སོ་མ་ཡིན་པར་ཁྱིམ་གཅིག་པའི་ཚུལ་གྱིས་གནས་པ་དེ་ནི་བར་གྱི་མཚམས་ཐ་དད་པ་ཉིད་མ་ཡིན་ཏེ། སྤུན་ལ་སོགས་པ་ཐམས་ཅད་ལ་ཁྱིམ་རྗེ་དཔོན་ཉིད་ཡིན་པའི་ཕྱིར་རོ། །ཞེས་སོ། །སྐབས་འདིར་ཊཱི་ཀ་ལས། མདོ་འདི་ལ་དགག་པ་བསྡུ་བར་ནི་མི་འགྱུར་ཏེ། དེས་ན་མདོ་འོག་མའི་རྗེས་སུ་ཡང་སྦྱར་རོ་ཞེས་པ་ནི་བདག་པོ་གཅིག་པ་མ་ཡིན་པའི་བར་གྱི་མཚམས་རྣམས་ནི་ཐ་དད་ཅེས་དངོས་སུ་སྨོས་པས། བདག་པོ་གཅིག་པ་ཉིད་ཀྱི་བར་གྱི་མཚམས་རྣམས་ནི་ཐ་དད་པ་ཉིད་མ་ཡིན་ཏེ་ཞེས་ཤུགས་ཀྱིས་བསྟན་ཏེ། ཐ་དད་པ་ཉིད་མ་ཡིན་ནོ་ཞེས་པའི་དགག་པ་དེ་ནི་མདོ་རྩ་བར་དངོས་སུ་བསྡུས་པ་དེ་ནི་མ་ཡིན་ཏེ། དགག་པ་དེ་ནི་མདོ་འོག་མ་ནོར་ལས་ཐ་དད་པ་མ་ཡིན་པའི་ཡང་ཐ་དད་པ་ཉིད་མ་ཡིན་ནོ་ཞེས་སྨོས་པའི་རྗེས་སུ་མཐུན་པ་ཡང་སྦྱར་རོ་ཞེས་པའོ། །ཊཱི་ཀ་ལས།ད་ནི་མདོ་བརྩམས་པའི་འབྲས་བུ་བསྟན་པར་བྱ་སྟེ་ཞེས་པ་ནི་འབྲས་བུ་ཞེས་པ་སྐབས་འདིར་ལུང་རྣམ་འབྱེད་ལས། ཁྱིམ་གཅིག་དང་ནི་ཁྱིམ་གཉིས་དང༌། །ཁྱིམ་གྱི་ཚོགས་དང་ལྡན་པ་དང༌། །རྩིག་པ་རིབ་མ་འོབས་སྐོར་དང༌། །རྣམ་བཞིར་བྱ་བ་གྲོང་དང་ཁྱིམ། །རྟེན་འགྲོ་མུ་སྟེགས་འཚོང་རྡལ་དང༌། །འཚོང་ཁང་དགྲ་ཁང་གཡུལ་ཁང་ནི། །གཡུལ་ཚོམས་གྲུ་དང་ཤིང་རྟ་དང༌། །ལྗོན་ཤིང་ཀུན་དགའ་ར་བ་ཡིན། །ལམ་དུ་འགྲོ་སྡོད་ཉལ་འདུག་དང༌། །ཐད་ཀར་ཡང་ནི་དེ་བཞིན་ཏེ། །མཚམས་གཞན་ཉལ་བ་ཐ་མ་ཡི། །སྡེ་ཚན་ཡང་དག་བསྡུས་པ་ཡིན། །ཞེས་གསུངས་སོ། །རྣམ་བཞིར་བྱ་བ་གྲོང་ཞེས་པ་ནི་གྲོང་ཉེ་འཁོར་གཅིག་པ་དང་གྲོང་ཉེ་འཁོར་ཐ་དད་པ་དང༌། གྲོང་རབ་ཏུ་མང་པོ་ཉེ་འཁོར་གཅིག་པ་དང་ཉེ་འཁོར་ཐ་དད་པའོ། །རྣམ་བཞིར་བྱ་བ་ཁྱིམ་ཞེས་ཀྱང་དེ་བཞིན་དུ་སྦྱར་རོ། །རྣམ་འབྱེད་འགྲེལ་བ་ལས། རྟེན་འགྲོ་ནི་རོལ་མོ་མཁན་གྱི་བྱེ་བྲག་གོ། །ཚོང་རྡལ་ནི་ཚོང་ཟོང་འཚོང་བར་བྱེད་པའི་གནས་སོ། །ཚོང་ཁང་ནི་ཟོང་གཙོང་བའི་གནས་སོ། །དགྲ་ཁང་ནི་དགྲ་བསྲུང་བའི་གནས་སོ། །ཞེས་གསུངས་སོ། །གསུམ་པ་གང་གིས་འབྲལ་བའི་རྟེན་ནི། སྲ་བརྐྱང་དང་མི་ལྡན་པ་དང༌། སྣམ་སྦྱར་གྱི་ཆ་ནས་མི་འབྲལ་བའི་གནང་བ་མ་ཐོབ་པ་དང༌། འཇིགས་པའི་དབང་གིས་ཆོས་གོས་གཅིག་གྲོང་དུ་བཞག་པའི་ཆ་ནས་དགོན་པ་བའི་ཡི་དམ་དང་མི་ལྡན་པའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་པའོ། །ཀུན་སློང་ནི་ཆོས་གོས་དང་མཚམས་ཐ་དད་དུ་འབྲལ་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་ཆོས་གོས་དང་མཚམས་ཐ་དད་དུ་འབྲལ་བར་བྱེད་པའོ། །བཞི་བ་མཐར་ཐུག་ནི་ཞག་གཅིག་གི་མཚན་མོ་མཐའི་སྐད་ཅིག་མའོ། །མདོ་རྩ་བ་དང་རང་འགྲེལ་ལས་སྐྱ་རེངས་ཤར་ནའོ་ཞེས་གསུངས་པ་དང༌། དེའི་ཊཱི་ཀ་ལས་སྐྱ་རེངས་དང་པོ་འཆར་ཀའི་སྐད་ཅིག་མ་དང་པོ་ལའོ་ཞེས་གསུངས་ཏེ་གཞུང་དེ་དག་སྐད་ཅིག་སྔ་ཕྱི་འགལ་ལོ་སྙམ་ན། མཚན་མོ་མཐའི་སྐད་ཅིག་སྟེ་སྐྱ་རེངས་འཆར་ཀའི་སྐད་ཅིག་ཉིད་ན་དངོས་གཞི་བསྐྱེད་ཅིང༌། སྐྱ་རེངས་ཤར་བ་ན་དངོས་གཞི་སྐྱེས་པ་སྟེ། ལུང་དགེ་སློང་ཕའི་རྣམ་འབྱེད་ལས། ནུབ་གཅིག་གིས་མཐར་སྐྱ་རེངས་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཞེས་དང༌།དགེ་སློང་མའི་རྣམ་འབྱེད་ཀྱི་འབྲལ་བའི་སྤང་བའི་སྐབས་ལས། སྐྱ་རེངས་ཤར་ན་སྤང་བའི་ལྟུང་བྱེད་དོ། །ཞེས་དང༌། འགྲེལ་ཆུང་ལས། སྐྱ་རེངས་བྱུང་བ་ན་ཆོས་གོས་དང་འབྲལ་བའི་སྤང་བའི་ལྟུང་བར་འགྱུར་རོ། །ཞེས་སོ། །