གཉིས་པ། གདན་ས་ཆོས་སྡེའི་ཆེ་བ་བཤད་སྒྲུབ་དགོན་གསུམ་གྱི་ཆོས་སྡེ་ཇི་ལྟར་དར་རྒྱས་སུ་བཞུགས་ཚུལ་མདོ་ཙམ་བཤད་པ།
གཅིག རྩ་བའི་གདན་ས་རུ་དམ་ཨོ་རྒྱན་བསམ་གཏན་ཆོས་གླིང་གི་ཕྱག་བཞེས་སྒྲུབ་འཕྲིན་དུས་མཆོད་དང་བཅས་པའི་ཚུལ་བཤད་པ།
གཉིས་པ་གནས་དེར་བཤད་སྒྲུབ་དགོན་གསུམ་གྱི་ཆོས་སྡེ་ཇི་ལྟར་དར་རྒྱས་སུ་བཞུགས་ཚུལ་བརྗོད་པ་ལས། དང་པོ་རྩ་བའི་གདན་ས་ཆེན་མོ་ཨོ་རྒྱན་བསམ་གཏན་ཆོས་འཁོར་གླིང་ནི། སྔ་རབས་མཁས་པའི་ཞལ་རྒྱུན་དུ། སྟོད་ན་རྡོར་སྨིན་དཔལ་གསུམ་དང་། སྨད་ན་ཀཿདཔལ་རྫོགས་གསུམ་ཞེས་གསང་ཆེན་རྙིང་མའི་གདན་ས་ཆེན་མོ་དྲུག་ཏུ་གྲགས་པའི་ཡ་གྱལ། སྔ་འགྱུར་བཤད་སྒྲུབ་བསྟན་པའི་ཆུ་འགོ་ཆེན་མོ་རྫོགས་ཆེན་རུ་དམ་ཨོ་རྒྱན་བསམ་གཏན་ཆོས་འཁོར་གླིང་ཞེས་ཡོངས་སུ་གྲགས་ལ། དགོན་སྡེ་ཆེན་མོ་འདི་ཉིད་ནི་གོང་དུ་སྨོས་པའི་མདོ་ཁམས་རུ་དམ་སྐྱིད་ཁྲམ་གྱི་ལུང་པར། རྒྱབ་རི་རྒྱལ་པོ་གདན་ལ་བཞུགས་འདྲའི་འདབས་རོལ། མདུན་ཐང་གསེར་གཞོང་མར་ཁུས་བཀང་འདྲའི་ཐད་ངོས། སྟག་འབྲུག་སེང་གེའི་གདན་གྱིས་མཐོ་བའི་སའི་ཆར་འབྲས་དཀར་གྱི་མཎྜལ་སྤུངས་པ་ལྟར་ཆགས་པ་སྟེ། སྤྱི་ལོ༡༦༨༥པ་བོད་རབ་བྱུང་བཅུ་གཅིག་པའི་ཁྲོ་བོ་ཞེས་པ་ཤིང་མོ་གླང་གི་ལོ་གྲུབ་དབང་པདྨ་རིག་འཛིན་དགུང་གྲངས་རེ་གཅིག་བཞེས་པའི་སྐབས་ས་སྐྱོང་སྡེ་དགེའི་རྒྱལ་པོ་ཁྲི་ཆེན་སངས་རྒྱས་བསྟན་པས་སྦྱིན་བདག་མཛད་ནས་ཐོག་མར་ཕྱག་བཏབ་ཅིང་། དུས་དེར་དགེ་འདུན་གྱི་འདུས་པ་སྟོང་དང་ལྔ་བརྒྱས་སྒྲུབ་པའི་རྒྱལ་མཚན་བཙུགས་ཏེ་ངེས་གསང་སྙིང་པོའི་བསྟན་པ་ཉིན་བྱེད་ལྟར་གསལ་བར་མཛད། དེ་ནས་ད་ལྟའི་བར་གྲུབ་དབང་སྐུ་རབས་དྲུག་དང་བསྟན་བདག་གདན་རབས་བཅུ་གཉིས་ཀྱི་རིང་བཤད་སྒྲུབ་ལས་གསུམ་གྱི་ཕྲིན་ལས་འོད་སྟོང་འབར་བས་ཡངས་པའི་ས་ཆེན་པོའི་ཁྱོན་ཀུན་ཡོངས་སུ་ཁྱབ་པ་སྟེ། ཀུན་གཟིགས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པའི་ཞལ་སྔ་ནས་མཛད་པའི་གདན་རབས་པདྨའི་དགའ་ཚལ་དུ། བོད་ཆེན་པོའི་ལྗོངས་ཀྱི་སའི་ཐིག་ལེར་སྟོབས་ཀྱི་འཁོར་ལོས་སྒྱུར་བ་སྡེ་དགེ་ཆོས་ཀྱི་རྒྱལ་པོའི་མངའ་ཁུལ་འདིར་ནི། སྔ་འགྱུར་པའི་བསྟན་པ་ཁོ་ན་དར་རྒྱས་ཆེ་བས་དགོན་གནས་ཆེ་ཕྲའང་མང་དུ་བཞུགས་ཤིང་དེ་ཐམས་ཅད་ཀྱང་རྒྱལ་བ་ཀཿཐོག་པ་དང་། གྲུབ་དབང་རྫོགས་ཆེན་པའི་ཕྲིན་ལས་ལས་བྱུང་བ་ཤ་སྟག་ཡིན་པས་དེའི་ཚུལ་མདོ་ཙམ་བརྗོད་ན། ཅེས་སོགས་གསལ་བར་གསུངས་པ་ལྟར་ས་སྐྱོང་སྡེ་དགེ་རྒྱལ་ཁབ་ཀྱིས་གཙོས་བོད་ཡུལ་མདོ་དབུས་ཁམས་གསུམ་དུ་རྩ་བའི་གདན་ས་ཆེན་མོ་ནས་ཕྱོགས་ཀྱི་བུ་དགོན་སུམ་བརྒྱ་ལ་ཉེ་བ་འཕེལ་བ་དེང་དུས་ཀྱི་སྟོང་ལྡིར་ཙམ་མ་ཡིན་པར་དངོས་སུ་བྱུང་ཞིང་། དགོན་ལག་སོ་སོའི་ལོ་རྒྱུས་གདན་རབས་ཆ་ཚང་ཐེངས་འདིར་ལག་སོན་མ་བྱུང་པ་སོགས་ཀྱིས་རྟེན་འབྲེལ་མཐའ་ཅན་དུ་བྱས་ཤིང་། འབྱུང་ཆར་སོ་སོའི་ལོ་རྒྱུས་གདན་རབས་ཆ་ཚང་པར་རིས་དང་བཅས་པའི་དེབ་ཆེན་ཞིག་མི་འགྱང་ཅིས་ཀྱང་བསྐྲུན་འོས་རང་བསྟན་ལ་ལྷག་བསམ་དང་མཁྱེན་དཔྱོད་ལྡན་པ་རྣམས་ལ་ཐུགས་གསོས་སུ་ཞུ་བ་དང་བཅས། འདིར་སྐབས་སུ་བབ་པ་རུ་དམ་གདན་ས་ཆེན་མོ་འདི་ཉིད་དུ་གནའ་བོའི་དུས་སུ་སྐྱེ་དགུའི་བསོད་ནམས་ཀྱི་ཞིང་ས་རྒྱལ་བའི་སྐུ་གསུང་ཐུགས་ཀྱི་རྟེན་དང་བརྟེན་གཞི་གཙུག་ལག་ཁང་ཆེན་མོ་དག་ཇི་ལྟར་བཞུགས་པའི་ཚུལ་མདོ་ཙམ་བརྗོད་ན། དེ་ཡང་ཆོས་སྡེ་ཆེན་མོའི་དཀྱིལ་དབུས་སུ་ཐུབ་བསྟན་ཡོངས་སུ་འདུས་པའི་དགའ་བའི་ཚལ་གྱི་གན་དྷོ་ལ་འདུས་པ་སུམ་སྟོང་ལྷག་ཤོང་བའི་རྒྱ་ཁྱོན་དང་ལྡན་པ་སུམ་ཐོག་སྒོ་ཁྱམས་གློ་འབུར་དུ་བྱས་པ་ལྷང་ངེར་བརྗིད་ཆགས་པ་དང་། དེའི་ནང་རོལ་འོག་ཁང་ཆེན་མོའི་དཀྱིལ་དབུས་སུ་གསེར་ཟངས་ལས་གྲུབ་པའི་དུས་གསུམ་སངས་རྒྱས་ཀྱི་སྐུ་བརྙན་ཐོག་བརྩེགས་གཉིས་པ་འཁོར་ཉེ་སྲས་བརྒྱད་དང་གནས་བརྟན་བཅུ་དྲུག་གིས་བསྐོར་བ། གཡས་ཕྱོགས་སུ་རྒྱལ་བ་རྡོ་རྗེ་འཆང་ཆེན་པོ་ནས་རྫོགས་ཆེན་སྟོན་པ་བཅུ་གཉིས་དང་བཅས་པའི་སྐུ་བརྙན་དང་། གསང་ཆེན་ངེས་པའི་རྒྱུད་ཀྱི་གླེགས་བམ་སོགས་བཀའ་གཏེར་གྱི་ཆོས་དཔེ་གྲངས་མེད་པ་བཞུགས་སུ་གསོལ་བ། གཡོན་ཕྱོགས་སུ་གྲུབ་དབང་སྐུ་ཕྲེང་རིམ་བྱོན་གྱི་སྐུ་བརྙན་དང་གསུང་འབུམ། གསེར་གདུང་བཅས་སྐུ་གསུང་ཐུགས་རྟེན་ཕྲེང་བསྟར་བསྒྲིགས་པ། ཕྱོགས་ཀྱི་གྱང་ངོས་རྣམས་སུ་སྟོན་པ་སངས་རྒྱས་ཀྱི་སྐྱེས་རབས་དང་། སློབ་དཔོན་པདྨའི་རྣམ་ཐར་བཅས་གསེར་ཞུན་གྱི་ཁུ་བས་ལྡེབས་རིས་སུ་བྲིས་པ་སོགས་བྱིན་རླབས་ཀྱི་གཟི་འོད་འབར་བའི་སྐུ་གསུང་ཐུགས་རྟེན་མཐའ་ཡས་པ་བཞུགས་ཤིང་། དེ་དག་ལ་མཆོད་པའི་ཡོ་བྱད་ཀྱང་རིན་པོ་ཆེ་སྣ་ཚོགས་ལས་གྲུབ་པའི་བཀྲ་ཤིས་རྫས་རྟགས་ཀྱི་དངོས་པོ་དང་། དར་གྱི་རྒྱལ་མཚན། བླ་བྲེ། འཕན་འཕུར། ནོར་བུའི་ཕྲེང་བ་སོགས་དཀྱིལ་འཁོར་གྱི་ཡོ་ཆས་མ་ཚང་བ་མེད་པ་ཀུན་བཟང་མཆོད་པའི་སྤྲིན་ཆེན་བསམ་གྱིས་མི་ཁྱབ་པས་ལེགས་པར་མཆོད་པ། ཡང་ཐོག་བར་ཁང་གི་དཀྱིལ་དབུས་སུ་གསེར་དངུལ་ལས་བྱས་པའི་ཁང་བཟང་དུ་སྟོན་པ་ཐུབ་པའི་དབང་པོའི་སྐུ་བརྙན་ལོངས་སྐུར་ཞལ་བསྒྱུར་བ་ཇོ་བོ་མཐོང་གྲོལ་ཆེན་པོ་སྐུ་རྒྱུ་ཛྙཻཀྵིམ་ལས་གྲུབ་པ་ཐུབ་དབང་དགུང་ལོ་བཅུ་གཉིས་པའི་སྐུ་ཚད་ཅན། གཡས་གཡོན་དུ་མཆོག་ཟུང་གཉིས་མཉམ་པར་བཞེངས་པ། གསེར་གཡུ་མུ་མེན་སོགས་རིན་པོ་ཆེའི་ཕྲ་ཚོམ་གྱིས་བརྒྱན་ཅིང་མཆོད་པའི་བྱེ་བྲག་གྱ་ནོམ་པས་མཆོད་པ། དེའི་གཡས་གཡོན་དུ་རྒྱུད་མར་གསང་སྙིང་ལྷ་ཁང་། སྡོམ་རྒྱུན་ལྷ་ཁང་། བཀའ་བརྒྱུད་ལྷ་ཁང་། ས་སྐྱའི་ལྷ་ཁང་། དགའ་ལྡན་ལྷ་ཁང་། མགོན་ཁང་ཆེན་མོ་བཅས་རིམ་པར་བསྒྲིགས་པ་ལ་སོ་སོའི་ལུགས་ཀྱི་སྐུ་གསུང་ཐུགས་རྟེན་མང་པོས་ཕྱུར་བུར་བཀང་བ་དང་། མཆོད་རྫས་སྣ་ཚོགས་པས་ལེགས་པར་མཆོད་པ། དབུ་རྩེའི་ཡང་ཐོག་ཏུ་གསེར་གྱི་རྒྱ་ཕིབས་དང་གན་ཛི་ར། ཆོས་འཁོར་དང་རྒྱལ་མཚན། རི་དྭགས་ཆོས་ཉན་པ་དང་ཆུ་སྲིན་གྱི་མགོ་བོ་བཅས་ཀྱིས་མཛེས་པར་བརྒྱན་ཅིང་བརྗིད་ཆགས་པ། མདོ་ལྟར་གཙུག་ལག་ཁང་དང་སྔགས་ལྟར་གཞལ་ཡས་ཁང་གི་བཀོད་པ་རྫོགས་པ་སོགས་ངོ་མཚར་བཟོ་སྒྲོས་ཀྱི་རྣམ་པས་ཡོངས་སུ་སྤུད་པ་ཉིད་དུ་གྲུབ་བོ། །དེ་དང་མི་རིང་བའི་ཤར་ཕྱོགས་སུ། རྒྱ་ཁྱོན་དང་བཟོ་དབྱིབས་གོང་དང་ཕལ་ཆེར་མཚུངས་པའི་ལྷ་སར་ལྷ་ཁང་ཆེན་མོ་ཐོག་བརྩེགས་གསུམ་པ་རྟེན་གྱི་གཙོ་བོ་གསེར་ཟངས་ལས་གྲུབ་པའི་མཁན་སློབ་ཆོས་གསུམ་གྱི་སྐུ་བརྙན་ལྷ་ཁང་དང་མཐོ་ཚད་མཉམ་པ། ལོགས་བྲིས་སུ་ཐུབ་པའི་མཛད་པ་བཅུ་གཉིས་དང་གུ་རུ་མཚན་བརྒྱད་སོགས་ནང་གི་བཀོད་པ་གོང་དང་མཚུངས་པ། བར་ཁང་དུ་རྫོགས་ཆེན་མཁའ་འགྲོ་སྙིང་ཐིག་གི་བླ་བརྒྱུད་སྐུ་བརྙན་ལྡེབས་རིས་སུ་བྲིས་པ། ཐོག་ཁང་དུ་མདོ་སྔགས་ཆོས་ཚུལ་རྒྱ་མཚོའི་དཔེ་མཛོད་དང་། གསུང་རབ་བཀའ་འབུམ་སྣ་ཚོགས་ཀྱི་པར་ཁང་བཅས་བཞུགས་པ་དང་། དེ་ལྟར་གཙུག་ལག་ཁང་ཆེན་མོ་གཉིས་ཀྱི་དབུས་སུ་ཕོ་བྲང་ཁམས་གསུམ་ཟིལ་གནོན་ཐོག་བརྩེགས་གསུམ་པ། ཕྱི་ཕོ་བྲང་ལ་ནང་ལྷ་ཁང་དུ་གྲུབ་པ། ཐོག་སོ་དང་པོར་བླ་མ། ཡི་དམ། མཁའ་འགྲོ་བཅས་ཀྱི་ལྷ་ཁང་དང་། རྡོར་སེམས་སྟོང་སྐུ་ཁང་། ཚེ་སྒྲུབ་ལྷ་ཁང་། དབང་ཁང་དངོས་གྲུབ་འདོད་འཇོ། གཡང་ཁང་རྣམ་སྲས་བང་མཛོད། མགོན་ཁང་དབང་དྲག་རོལ་པ། གཟིམས་སྤྱིལ་འཆི་མེད་གྲུབ་པའི་དགའ་ཚལ། ཚོམས་ཆེན་འདོད་རྒུ་ལྷུན་གྲུབ་སོགས་སུ་སྲིད་ན་དཀོན་པའི་སྐུ་རྟེན་དང་། ཞལ་ཐང་། གཡང་རྫས། སྤྱན་གཟིགས་བཅས་མི་དང་མི་མིན་གྱི་ནོར་བུ་འདོད་རྒུ་མ་ཚང་བ་མེད་པས་ཡོངས་སུ་གཏམས་པ། དེ་བཞིན་བར་སོ་དང་འོག་སོ་གཉིས་སུ། མཛོད་ཁང་ཆེ་ཆུང་དྲུག རྒྱན་ཁང་གསུམ། སྤྱི་ཁྱབ་གཞུང་ལས་ཁང་དང་མགྲོན་ཁང་བཅས་ཀྱིས་ཕྱོགས་སུ་ཁེངས་པ། གཞན་ཡང་དགོན་པའི་ཕྱོགས་དང་ཕྱོགས་མཚམས་རྣམས་སུ་ཐུབ་དབང་སྟོང་སྐུ་ལྷ་ཁང་། གུ་རུ་སྟོང་སྐུ་ལྷ་ཁང་། ཀུན་དགའ་ར་བ། ཞི་ཁྲོའི་ལྷ་ཁང་། ཕྱག་རྡོར་ལྷ་ཁང་། བདུད་འདུལ་ལྷ་ཁང་། གེ་སར་ལྷ་ཁང་། གསེར་འཁོར་ལྷ་ཁང་དང་། དངུལ་འཁོར་ལྷ་ཁང་བཅས་གཙུག་ལག་ཁང་ཆེ་ཆུང་མང་པོས་གང་བ་དང་། དེ་མཚུངས་མཐའ་འཁོར་ཀུན་ཏུ་བླ་བྲང་ཁག་བཅུ་གཉིས་དང་གྲྭ་ཤག་ཆེ་ཆུང་གྲངས་མེད་པས་མཛེས་པར་བཀང་བ། མཐའ་སྐོར་གྱི་ཕྱོགས་བཞིར་ཕྱག་ན་རྡོ་རྗེ་འབྱུང་པོ་འདུལ་བྱེད་ཀྱི་ལྷ་ཁང་བཞི་ཞལ་ཕྱིར་ཕྱོགས་པ་དང་། བསྲུང་བཟློག་གི་སྙིང་པོ་ཅན་གྱི་དར་ཆེན་མཐོན་པོ་དག་ཕྱོགས་བཞིར་བསྒྲེངས་པས་བར་ཆད་སྲུང་བ། གཡོན་གཤམ་དུ་བདུད་འདུལ་དང་སྲི་མནན་ལ་སོགས་པའི་མཆོད་རྟེན་ཆེན་མོ་རྣམས་རབ་ཏུ་བརྗིད་པ་བཅས་ཞིབ་ཕྲའི་གནས་ཚུལ་ཡིག་ཚོགས་ཀྱི་ངལ་ནས་འདིར་མ་བཀོད་པས་ལོ་རྒྱུས་རྣམ་ཐར་གཞན་དག་ལ་གཟིགས་ཤིང་མཁྱེན་པར་ཞུ། །
ཞར་བྱུང་སྡེ་འདིར་བཀའ་གཏེར་གྱི་མཆོད་ཁག་སོགས་ཚོམ་བུ་ཚོགས་ཀྱི་སྒྲུབ་པའི་དུས་མཆོད་ཆེ་ཕྲའི་སྒོ་འཕར་ཇི་ལྟར་ཕྱེ་ཚུལ་ཕྱོགས་ཙམ་གླེང་བ་ལ། ཐོག་མར་ཧོར་ཟླ་དང་པོའི་ཚེས་གསུམ་ནས་བཅུའི་བར་སྟོང་གྲྭ་ཞིབ་འདུས་ཀྱིས་སྤྱི་འདུས་བུམ་སྒྲུབ་ཆེན་མོ་ཚེས་བཅུའི་གར་འཆམ་ཚེ་དབང་དང་བཅས་པ། དེ་དང་དུས་མཚུངས་སུ་བླ་གྲྭ་བཅུ་ཕྲག་གིས་ཉིན་བདུན་ལ་སྣ་སེལ་དུ་རྟ་མགྲིན་དྲེགས་ཟིལ་དང་། རྡོར་སེམས། ཀླུ་དབང་དགོངས་རྒྱན། ནོར་བདག གསང་འདུས་བཅས་གྲུབ་མཚམས། གཉུག་མར་གནས་པའི་དགེ་འདུན་པ་དག་གིས་ཟླ་དེའི་ཚེས་ཉི་ཤུ་ནས་སྙིང་ཐིག་ཕུར་པ་རྒྱུད་ལུགས་ཀྱི་སྒྲུབ་ཆེན་གཏོར་རྒྱག་ཉིན་དགུ་དང་། མཇུག་ཏུ་རྫོགས་ཆེན་ཕུར་ཆེན་ཞེས་གྲགས་པའི་གར་འཆམ་ཉིན་གྲངས་ལྔ་ལ་བསྟུད་མར་གནང་བ་དང་། གྲྭ་མང་ཡོངས་ནས་ཟླ་དེའི་ཚེས་བཅོ་ལྔ་ནས་དབུ་བརྩམས་ཏེ་སློབ་གྲྭ་ཆེན་མོ་ཞེས་ཟླ་བ་ཕྱེད་གསུམ་གྱི་རིང་ལ་འཛིན་གྲྭ་ཁག་བཅོ་ལྔ་རུ་བགོས་ཏེ་དུས་ཐོག་གཅིག་ཏུ་མདོ་སྔགས་གཞུང་ལུགས་དུ་མའི་འཆད་ཉན་མཛད། དེ་འཕྲོས་ཟླ་བ་གཉིས་པའི་ཚེས་གསུམ་ནས་ཉི་གྲགས་ནོར་བདག་གཡང་སྒྲུབ་ཉིན་བདུན་དང་། ཟླ་དེའི་ཚེས་བཅུ་གསུམ་ནས་དགོངས་འདུས་དང་། བཀའ་བརྒྱད་དྲེགས་འདུལ། རཏ་གླིང་ཕུར་བ། པད་གླིང་ཕྱག་རྡོར། ཚེ་སྒྲུབ་བདུད་བཞི་རྣམ་རྒྱལ། སྙིང་ཐིག་དྲག་པོ་རྟ་ཁྱུང་། སྡུག་བསྔལ་རང་གྲོལ། དཔལ་ཆེན་འདུས་པ། ཡང་ཏི་གསེར་གྱི་འབྲུ་གཅིག །ཐུགས་སྒྲུབ་བར་ཆད་ཀུན་སེལ། པད་གླིང་བླ་མ་ནོར་བུ་རྒྱལ་མཚན། གུ་རུ་ཡོན་ཏན་གཏེར་མཛོད། མཆོག་གླིང་གསང་བདག་དྲེགས་འདུལ། རྡོར་གླིང་ཐུགས་སྒྲུབ་ཡིད་བཞིན་ནོར་བུ། ཆོས་དབང་ཡང་དག གཡུ་ཐོག་སྙིང་ཐིག རྒྱ་སྟོན་རིག་འཛིན་བདེ་མཆོག །གུ་རུ་རིན་ཆེན་སེང་གེའི་དམོད་པ་དྲག་སྔགས། བྱང་གཏེར་རིག་འཛིན་གདུང་སྒྲུབ་བཅས་གཏེར་སྒྲུབ་མཆོད་ཁག་ཉི་ཤུ་ཉིན་བདུན་ལ་དུས་ཐོག་གཅིག་ཏུ་རྒྱས་འཚོགས་དང་། དེ་རྗེས་ཟླ་བ་གསུམ་པའི་ཚེས་གསུམ་ནས་རཏ་གླིང་ཚེ་སྒྲུབ་ཉིན་དགུ། དེའི་ཚེས་བཅོ་བརྒྱད་དང་བཅུ་དགུ་གཉིས་ལ་ཐུགས་ཆེན་བདེ་གཤེགས་ཀུན་འདུས་དང་འབྲེལ་བའི་རབ་གནས་ཉིན་གཉིས། ཧོར་ཟླ་བཞི་པའི་ཚེས་ཉེར་བཞི་ནས་སྔ་འགྱུར་བཀའ་གཏེར་གྱི་སྒྲུབ་མཆོད་ཆེན་མོ་མཆོད་ཁག་བཞི་བཅུ་ལྷག་གི་དངོས་གཞིིའི་སྒྲུབ་པ་ཉིན་བདུན་དང་རྩ་དྲུག་གར་གསུམ་གྱི་རྡོ་རྗེའི་གར་འཆམ་ཉིན་གསུམ་བཅས་ལེགས་པར་གྲུབ་འཕྲལ། ཟླ་བ་ལྔ་པའི་ཚེས་བཞི་ནས་ཀར་གླིང་ཞི་ཁྲོའི་གནས་སྟོང་ཉིན་བཞི་ལ་འཚོགས་པ་དང་། ཟླ་བ་དྲུག་པའི་ཚེས་བཅོ་ལྔ་ནས་དབྱར་གནས་ཟླ་བ་ཕྱེད་གཉིས་དང་ལྗོངས་རྒྱུ་ཉིན་གསུམ་གྱིས་ལེགས་པར་གྲོལ། དེ་རྗེས་ཟླ་བ་དགུ་པའི་ཚེས་ཉི་ཤུ་ནས་རཏ་གླིང་ཕུར་པའི་སྒྲུབ་པ་གཏོར་ཟློག་གཙོ་བོར་བྱེད་པ་ཉིན་བདུན་དང་། ཟླ་བ་བཅུ་པའི་ཚེས་གཅིག་ནས་ཞག་གྲངས་བརྒྱ་ལ་རྐང་བརྡས་བསྐུལ་ཏེ་དགེ་འདུན་པ་ཀུན་ཀྱིས་ཉིན་ལྟར་སྔ་ཕྱིའི་ཐུན་བཞི་གཅོད་པ་དང་། ཟླ་བ་བཅུ་བའི་ཚེས་ཉི་ཤུའི་ནང་གནམ་ཆོས་ཁྲོ་བཅུ་དང་ཀིང་ཀང་གཉིས་དུས་མཚུངས་སུ་ཉིན་བདུན་ལ་འཚོགས། དེའི་ཚེས་བཅོ་བརྒྱད་ལ་མི་འགྱུར་ནམ་མཁའི་རྡོ་རྗེའི་འདས་མཆོད་དང་། ཉེར་གཉིས་ལ་གྲུབ་དབང་ལྔ་པའི་འདས་མཆོད་བཅས་རིམ་གཞིན་འཚོགས། ཟླ་བ་བཅུ་གཅིག་པའི་ཚེས་ཉི་ཤུ་ནས་མ་ཏིའི་སེང་དམར་ཉིན་བདུན་དང་། ཚེས་ཉེར་ལྔ་ལ་གྲུབ་དབང་པདྨ་རིག་འཛིན་གྱི་འདས་མཆོད། ཟླ་བ་བཅུ་གཉིས་པའི་ཚེས་བཅོ་བརྒྱད་ལ་ཀུན་མཁྱེན་ཆེན་པོའི་འདས་མཆོད་དང་། ཚེས་ཉི་ཤུའི་ནང་བཀའ་བརྒྱད་ཁྲོ་བོ་རོལ་པའི་སྒྲུབ་ཆེན་ཉིན་བརྒྱད་དང་གར་འཆམ་གཏོར་རྒྱག་སོགས་ཉིན་གསུམ་གྱིས་གྲུབ། འདིའི་སྐབས་སུ་རྟ་མགྲིན་དྲེགས་ཟིལ་དང་། བདེ་མཆོག རཏ་ཕུར་གྱི་སྒོ་ནས་དམ་སྲི་མནན་པ་བཅས་སྒྲུབ་ཁག་སོ་སོ་ཉིན་བདུན་ལ་དུས་ཐོག་གཅིག་ཏུ་འཚོགས། གཞན་ཡང་ཟླ་རེའི་ཚེས་བཅུ་དང་ཉེར་ལྔ་ལ་རིག་འདུས་དང་ཡུམ་ཀའི་ཚོགས་མཆོད། དེ་མཚུངས་ཟླ་བ་ཕྱེད་ཀྱི་ཆ་ལ་མདོ་ལུགས་ཀྱི་གསོ་སྦྱོང་དང་། མར་ངོའི་ཉེར་དགུ་ལ་དགུ་གསོལ་དང་རྒྱུན་པར་གསོལ་ཀ་གྲྭ་ཚང་བླ་གྲྭ་ཆིག་བརྒྱ་ལྷག་གིས་ཉིན་བཞིན་གསོལ་ཀ་རྒྱུན་འཚོགས། གནམ་སྟོང་ལ་ཞི་ཁྲོའི་གནས་བརྒྱ་འཚོགས་པ་སོགས་དུས་ཀྱི་མཆོད་པ་ཆེ་ཕྲ་གང་གི་སྐབས་སུའང་དཀྱིལ་འཁོར་གྱི་གཟུགས་བརྙན་ཙམ་དང་། ཅ་ཅོའི་ངག་འདོན་ཙམ་མིན་པར་རྡོ་རྗེ་ཐེག་པའི་རྒྱུད་སྡེའི་དགོངས་དོན་ལྟར། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་ནས་བསྙེན་སྒྲུབ་ཡན་ལག་བཞིས་སྒྲུབ་པའི་གཞུང་བསྲང་ཐོག རང་ལུགས་དྲི་མ་མེད་པ་མཐོང་བརྒྱུད་ཆོ་གའི་ཕྱག་བཞེས་མ་ནོར་བས་སྒྲུབ་པའི་ཟུར་བརྒྱན་པ་བཅས། ཚད་དང་མཚན་ཉིད་ཀྱི་ཆོས་ཀུན་ཡོངས་སུ་ཚང་བའི་སྒོ་ནས་བསྙེན་སྒྲུབ་ཚུལ་བཞིན་མཛད་པས། ཡི་དམ་ལྷས་ཞལ་གཟིགས་དང་གསུང་འབྱོན་གནང་བ། སྒྲུབ་གཏོར་ལས་བདུད་རྩིའི་རྒྱུན་འབབ་པ། ཟོར་རྩེ་ལས་མེ་དཔུང་འབར་བ། ཧོམ་ཁུང་དུ་ཁྲག་འཁྱིལ་བ་སོགས་ལས་བཞི་གྲུབ་པའི་རྟགས་མཚན་ངོ་མཚར་བ་མངོན་སུམ་མཐོང་ཆོས་སུ་གྲུབ་པ་གྲངས་མེད་བྱུང་བར་གྲགས་སོ། །དེ་ལྟར་ཆོས་སྡེ་ཆེན་པོ་འདིའི་རིང་ལུགས་ཆོས་བརྒྱུད་ཀྱིས་མདོ་དབུས་ཁམས་གསུམ་སྟེ་བོད་ཆེན་པོའི་ལྗོངས་ཀུན་ཡོངས་སུ་ཁྱབ་པར་མ་ཟད། ཤར་ནུབ་ཀྱི་རྒྱ་མཚོ་ཆེན་པོ་བརྒལ་བའི་གླིང་ཆེན་དང་གླིང་ཕྲན་ཀུན་ཏུ་ཕྲིན་ལས་ཀྱི་འོད་སྣང་དཀར་པོ་འཕྲོས་དང་སྤྲོ་བཞིན་པ་ཇི་སྲིད་བསྐལ་པ་རྒྱ་མཚོར་ནུབ་པ་མེད་པར་གོང་ནས་གོང་དུ་འཕེལ་ཞིང་རྒྱས་པའི་སྨོན་འདུན་ཞུ། །
གཉིས། བཤད་པའི་སྡེ་ཤྲཱི་སེང་ཆོས་གྲྭ་ཆེན་མོ་ཡན་ལག་དང་བཅས་པའི་བྱུང་བ་བརྗོད་པ།
གཉིས་པ་བཤད་པའི་ཆོས་སྡེ་ཆེན་མོ་དཔལ་གྱི་ནཱ་ལེནྡྲ་གཉིས་པ་གངས་ལྗོངས་མཁས་པའི་འབྱུང་གནས་ཤྲཱི་སེང་ཆོས་གྲྭ་ཆེན་མོ་ཡན་ལག་དང་བཅས་པའི་བྱུང་བ་བརྗོད་པ་ལ། དེ་ཡང་སྤྱི་ལོ་༡༨༢༨པ་བོད་རབ་བྱུང་བཅུ་བཞི་པའི་ས་བྱི་ལོར་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་དང་། མཁན་ཆེན་སེང་ཕྲུག་པདྨ་བཀྲ་ཤིས། ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་བཅས་ཕྲིན་ལས་དུས་བབ་ཀྱི་སྐྱེས་བུ་ཆེན་པོ་དག་བཀའ་བགྲོས་ཏེ། རྫོགས་ཆེན་དགོན་ལས་རྒྱང་གྲགས་གཅིག་གིས་རིང་བའི་མདུན་ཐང་ཆེན་མོའི་དཀྱིལ་དབུས། མཁས་པའི་ལྗགས་སམ་ཤེས་རབ་རལ་གྲིའི་དབྱིབས་དང་མཚུངས་པའི་ས་ཁད་ཅུང་མཐོ་བའི་སྤང་ལྗོངས་ཉམས་དགའ་བ། རིག་འཛིན་ཤྲཱི་སེང་ཧཱ་རྫུ་འཕྲུལ་གྱིས་བྱོན་ནས་བྲག་ལ་སྐུ་རྗེས་བཞག་སྟེ་བྱིན་གྱིས་བརླབས་ཤིང་། མདོ་མཁྱེན་བརྩེ་སྐྱེས་བུ་ཡེ་ཤེས་རྡོ་རྗེ་སྐུ་དངོས་ཀྱིས་ས་འདུལ་དང་རལ་གྲིས་ས་ཐིག་མཛད་པའི་གནས་དེར་རྫོགས་ཆེན་ཤྲཱི་སེང་ཧ་ཞེས་གྲགས་པའི་ཆོས་སྡེ་ཆེན་མོ་འདི་ཉིད་གསར་དུ་ཕྱག་བཏབ། དུས་དེར་གཉུག་མར་གནས་པའི་དགེ་འདུན་པ་ཞལ་གྲངས་ལྔ་བཅུ་ལྷག་བཞུགས་པའི་གཙུག་ལག་ཁང་གྲྭ་ཤག་དང་བཅས་པ་བསྐྲུན་པ་དང་། མདོ་ཁམས་ཉི་མ་ཤར་ཕྱོགས་ཀྱི་ལྗོངས་འདིར་མཉམ་མེད་ཤཀྱཱ་སེང་གེའི་རིང་ལུགས་འདུལ་བ་གཞི་གསུམ་གྱི་ཕྱག་བཞེས་གཙང་མའི་སྒོ་འཕར་ཐོག་མར་ཕྱེས། དུས་མཚུངས་མདོ་སྔགས་རིག་གནས་བཅས་པ་འཆད་ཉན་ཐོས་བསམ་གྱིས་གཏན་ལ་ཕབ་སྟེ་རྒྱལ་བསྟན་ལུང་རྟོགས་ཀྱི་བསྟན་པ་རིན་པོ་ཆེ་བཤད་དང་སྒྲུབ་པས་སྤེལ་བའི་སྲོལ་གསར་དུ་བཏོད། དེ་ནས་རིམ་པར་མཁན་ཆེན་པདྨ་བཛྲ་དང་དཔལ་སྤྲུལ་འཇིགས་མེད་ཆོས་ཀྱི་དབང་པོ་རྣམ་གཉིས་ཀྱིས་རྒྱུན་བསྐྱངས་པ་དང་། མཁས་མཆོག་གཞན་ཕན་སྣང་བས་མཐའ་རྒྱས་སུ་སྤེལ་ཞིང་། སྐྱབས་རྗེ་པདྨ་སྐལ་བཟང་རིན་པོ་ཆེས་སླར་གསོ་རྒྱ་སྐྱེད་གནང་བ་སྟེ། མཁན་རབས་དང་པོ་མཁས་བཙུན་གྲུབ་པའི་དབང་ཕྱུག་སེང་ཕྲུག་པདྨ་བཀྲ་ཤིས་ནས། རྒྱལ་སྲས་གཞན་ཕན་མཐའ་ཡས། ཉི་གྲགས་རིག་འཛིན་བཟང་པོ། རྒྱལ་རོང་མཁན་པོ་པདྨ་ཤེས་བྱ། དཔལ་སྤྲུལ་འཇིགས་མེད་ཆོས་ཀྱི་དབང་པོ། འབྲུག་ཡུལ་མཁན་པོ་བསོད་ནམས་དགེ་ལེགས། གླིང་སྤྲུལ་ཐུབ་བསྟན་ཉིན་བྱེད་རྒྱལ་མཚན། རྐང་ཚའི་མཁན་ཆེན་པདྨ་བཛྲ། གཏོ་རུ་མཁན་པོ་སྐལ་ལྡན་རྒྱ་མཚོ། རྐང་ཚའི་མཁན་པོ་རྡོ་རྗེ་རབ་བརྟན། ཕུར་ཚའི་མཁན་པོ་ཨ་དཀོན་ནམ་དཀོན་མཆོག་འོད་ཟེར། འཇུ་མི་ཕམ་ཕྱོགས་ལས་རྣམ་རྒྱལ། མཛོ་བའི་མཁན་པོ་དགེ་ལེགས་རྣམ་རྒྱལ། མཁན་པོ་ཚེ་རིང་ནོར་བུ། ཁྲོ་བའི་མཁན་པོ་དཀོན་མཆོག་གྲགས་པ། ཨ་གྲོའི་མཁན་པོ་བསོད་ནམས་ཆོས་འཕེལ། མཁན་སྤྲུལ་ཐུབ་བསྟན་ཚུལ་ཁྲིམས་རྒྱ་མཚོ། རྟ་བའི་མཁན་པོ་དཀོན་མཆོག་བཟང་པོ། རྒྱ་ཀོང་མཁན་པོ་གཞན་ཕན་སྣང་བ། མཁན་ཆེན་པདྨ་ཐེག་མཆོག་བློ་ལྡན། ཨ་བོའི་མཁན་པོ་འཇིགས་མེད་བློ་གྲོས། ཨ་གྲོའི་མཁན་པོ་ཡེ་ཤེས་རྒྱ་མཚོ། མཁན་ཆེན་ཐུབ་བསྟན་སྙན་གྲགས། ཉག་ཤུལ་མཁན་པོ་འགྱུར་མེད་འོད་གསལ་ལམ་འགྱུར་དགའ། མཁས་གྲུབ་ངག་དབང་ནོར་བུ། མཁན་པོ་འཆི་མེད་ཡེ་ཤེས། མཁན་ཆེན་འཇིགས་མེད་ཡོན་ཏན་མགོན་པོ། མཁན་ཆེན་པདྨ་ཚེ་དབང་རྒྱ་མཚོ། ཨ་གྲོའི་མཁན་པོ་འོད་ཟེར་མཐའ་ཡས། ཚོང་དཔོན་མཁན་པོ་ནོར་གཡང་ངམ་དཀོན་མཆོག་ཡེ་ཤེས་འོད་ཟེར། མཁན་པོ་ཆོས་དབྱིངས་རྣམ་རྒྱལ། མཁན་པོ་བསྟན་འཛིན་ཆོས་བཟང་། ཙཱ་རིའི་མཁན་པོ་ཆོས་འབྱོར་བཅས་རྩ་བའི་གདན་སའི་ལས་ཐོག་མཁན་པོ་མཁན་རབས་ནོར་བུའི་ཕྲེང་བ་ལྟ་བུ་སོ་གསུམ་བྱོན་པ་དང་། དེ་དག་གི་སློབ་བརྒྱུད་ཡང་སློབ་ཏུ་གཏོགས་པ་རིས་མེད་བསྟན་པ་འཛིན་པའི་མཁས་གྲུབ་ནམ་མཁའི་སྐར་ཚོགས་ལྟར་བྱོན་པ་ལས་གཙོ་བོའི་མཚན་ཙམ་སྨོས་ན། འཇམ་དབྱངས་མཁྱེན་བརྩེའི་དབང་པོ། འབམ་མདའ་དགེ་ལེགས་རྒྱ་མཚོ། འཇའ་བ་དགེ་བཤེས་མདོ་སྔགས། འབར་ཆུང་བཀྲ་ཤིས་རྒྱ་མཚོ། རས་པ་བསྟན་འཛིན་གྲགས་པ། ཨོ་རྒྱན་བསྟན་འཛིན་ནོར་བུ། མཁན་ཆེན་ཡོན་ཏན་རྒྱ་མཚོ། མི་ཉག་ཀུན་བཟང་བསོད་ནམས། མཁས་གྲུབ་ཀུན་དགའ་དཔལ་ལྡན། ཞེ་ཆེན་མ་ཧཱ་པཎ་ཆེན་འགྱུར་མེད་མཐུ་སྟོབས་རྣམ་རྒྱལ། རྒྱལ་ཚབ་པདྨ་རྣམ་རྒྱལ། མཁན་ཆེན་ཀུན་བཟང་དཔལ་ལྡན། མུ་ར་པདྨ་བདེ་ཆེན་བཟང་པོ། མཁས་གྲུབ་འཇིགས་མེད་སྐལ་བཟང་། སྨྱོ་ཤུལ་ལུང་རྟོགས་བསྟན་པའི་ཉི་མ། དགུ་རོང་ཧོ་ཐོག་ཐུ་ཨོ་རྒྱན་འཇིགས་བྲལ་ཆོས་དབྱིངས་རྡོ་རྗེ། ཨ་མདོ་བ་རིག་འཛིན་བདུད་འཇོམས་རྡོ་རྗེ། འབྲུག་ཆོས་དབྱིངས་རོལ་པའི་རྡོ་རྗེ། མཁས་མཆོག་གླག་བླ་ཆོས་འགྲུབ། མཁན་ཆེན་ངག་དབང་དཔལ་བཟང་ངམ་ངག་ཆུང་། བཱ་ཐུར་མཁན་ཆེན་ཐུབ་བསྟན་ཆོས་འཕེལ། རྨེ་བ་མཁན་ཆེན་ཚེ་དབང་རིག་འཛིན། མཁན་ནོར་བུ་བསྟན་འཛིན། བོད་སྤྲུལ་མདོ་སྔགས་བསྟན་པའི་ཉི་མ། མཁྱེན་བརྩེ་ཆོས་ཀྱི་བློ་གྲོས། སི་ཏུ་པདྨ་དབང་མཆོག་རྒྱལ་པོ། རྒ་བ་འཇམ་དབྱངས་རྒྱལ་མཚན། དིལ་མཁྱེན་རབ་གསལ་ཟླ་བ། ར་ཧོར་ཆོས་ཀྱི་གྲགས་པ། གསེར་ཁ་ཆོས་གྲགས། དབོན་སྟོད་མཁྱེན་རབ། ཟུར་མང་པདྨ་རྣམ་རྒྱལ། འབོ་གངས་དཀར་སྤྲུལ་སྐུ། མཁན་ཆེན་ངག་དབང་ནོར་བུ། མཁན་ཚེ་རིང་ནོར་དགའ། ཉག་རོང་གུ་རུ་སྤྲུལ་སྐུ། ཁུ་ནུ་བསྟན་འཛིན་རྒྱལ་མཚན། འབྲུག་དགེ་བཤེས་བསྟན་པ་རིན་ཆེན། དཀར་མཛེས་བྲག་དཀར་མཆོག་སྤྲུལ། བུ་རྒྱུད་ལྷ་བ་སྤྲུལ་སྐུ། མཁར་ལེགས་མཆོག་སྤྲུལ་པདྨ་ཀུན་བཟང་རང་གྲོལ། ར་སྐོར་མཁན་པོ་ཐུབ་བསྟན་ནོར་བུ། ཨ་སྐྱོང་མཁན་ཆེན་ཐུབ་བསྟན་བརྩོན་འགྲུས། དགེ་རྒྱལ་ཐུབ་བསྟན་རྣམ་རྒྱལ། ར་ཧོར་མཁན་ཆེན་ཟླ་བའི་འོད་ཟེར། གསེར་རྟ་མཁན་ཆེན་ཆོས་དབྱིངས་ཁྱབ་བརྡལ། ཨ་སྐྱོང་བླ་མ་རྟོགས་ལྡན་བློ་གྲོས་རྒྱ་མཚོ། མཁན་ཆེན་པདྨ་ཚེ་དབང་ལྷུན་གྲུབ། བྲག་མཁར་མཁན་པོ་ཚེ་རིང་ཉི་མ། དགེ་མང་མཁན་པོ་དབང་ལོ། མཁས་བཙུན་དབང་སྡིས་རིན་པོ་ཆེ། རྨེ་པ་མཁན་པོ་ཐུབ་བསྟན། མཁན་པོ་ཚེ་དབང་ཕུན་ཚོགས། སྤས་རབ་ཐོར་ཅོག འཛིང་པ་མཁན་པོ་རྡོ་རྗེ་སོགས་སྔོན་གཤེགས་དམ་པ་རྣམས་དང་། ད་ལྟའི་དུས་འདིར་བསྟན་འགྲོའི་དཔལ་མགོན་དུ་འཚོ་ཞིང་བཞེས་པ་སྐྱབས་རྗེ་རྡོ་གྲུབ་རིན་པོ་ཆེ་ཕྲིན་ལས་དཔལ་འབར། མཁན་ཆེན་ཡིད་བཞིན་ནོར་བུ་འཇིགས་མེད་ཕུན་ཚོགས། གཟན་དཀར་མཆོག་སྤྲུལ་ཐུབ་བསྟན་ཉི་མ། མི་ཉག་རྩ་ར་ཆོས་གྲགས། ར་ཧོར་མཁན་པོ་ཐུབ་བསྟན། མཆོག་སྤྲུལ་ཤེས་རབ་རྒྱལ་མཚན་སོགས་སྔོན་ནས་ད་ལྟའི་བར་དུ་གཞུང་བརྒྱ་སྨྲ་བའི་མཁས་དབང་དང་། ཉམས་རྟོགས་ལྡན་པའི་གྲུབ་མཆོག་ཡང་སློབ་དང་བཅས་པས་འཛམ་གླིང་ཕྱོགས་ཀུན་ཁྱབ་པའི་མཁས་གྲུབ་ཀྱི་ཚང་ཆེན་པོ་བརྡོལ་བས་རྫོགས་ཆེན་ཤྲཱི་སེང་ཆོས་གྲྭ་ཞེས་མཚན་སྙན་སྲིད་པའི་རྩེ་མོར་ཡོངས་སུ་གཡོ་བའི་ཆོས་སྡེ་ཆེན་མོ་འདི་བྱུང་ལ། དེ་དག་སློབ་བརྒྱུད་དང་བཅས་པའི་རྣམ་ཐར་འོག་ཏུ་རྒྱས་པར་འབྱུང་ཞིང་། འདིར་སྐབས་སུ་བབ་པ་ཡང་དར་བསྟན་པའི་མེ་རོ་གསར་དུ་གསོས་པའི་ཚུལ་ཅུང་ཟད་གླེང་བ་ནི། ཇི་སྐད་དུ། གཡོན་རུ་གཏེར་ཆེན་པདྨ་རྣམ་གྲོལ་གླིང་པའི་འཛམ་གླིང་སྤྱི་ལུང་ལས། ཆོས་སྡེ་ཤྲཱི་སེང་ཧ་ཡི༔ མི་འཇིགས་སེང་གེའི་ཁྲི་མཆོག་ལ༔ པདྨའི་ཐུགས་སྤྲུལ་པདྨའི་མཚན༔ རྒྱལ་བསྟན་སྤྱི་དང་བྱེ་བྲག་གི༔ དགེ་ལེགས་ཡོན་ཏན་ཉིན་མོར་བྱེད༔ ཅེས་ཚད་མར་གྱུར་པའི་ལུང་ལས་གསལ་བ་ལྟར་སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་ནས་བོད་རབ་བྱུང་བཅུ་བདུན་པའི་རྣམ་བྱུང་ཞེས་པ་ས་ཕོ་འབྲུག་གི་ལོའི་ཧོར་ཟླ་དགུ་པའི་ཚེས་ཉེར་གཉིས་རྒྱལ་བ་ལྷ་ལས་བབ་པའི་དུས་ཚེས་བཟང་པོའི་ཉིན། སྔ་འགྱུར་བཤད་སྒྲུབ་བསྟན་པའི་ཆུ་འགོ་རྫོགས་ཆེན་ཤྲཱི་སེང་ཆོས་གྲྭ་ཆེན་མོ་བསྐྱར་གསོ་དབུ་འཛུགས་ཀྱི་མཛད་སྒོ་སྤེལ་ཏེ་གངས་ལྗོངས་མཁས་པའི་འབྱུང་གནས་རུ་དམ་རྫོགས་ཆེན་ཤྲཱི་སེང་ལྔ་རིག་ཆོས་གྲྭ་ཆེན་མོ་ཞེས་མཚན་བསྒྱུར། དུས་དེར་ཆོལ་གསུམ་བོད་ཀྱི་ཡུལ་ནས་ན་གཞོན་སྡེ་སྣོད་འཛིན་པའི་ཁྱུ་ཚོགས་ཀྱི་ངུར་སྨྲིག་བླ་གོས་གསར་པས་ནམ་མཁའི་ཁ་དོག་བསྒྱུར་པ་དང་། ཐེག་གསུམ་ཆོས་ཀྱི་སྒྲ་དབྱངས་ཀྱིས་ཁོར་ཡུག་གངས་རིའི་ལྗོངས་ཀུན་སླར་ཡང་གཉིད་ལས་སློང་བར་བྱས། དེ་ནས་བཟུང་སྐྱབས་རྗེ་རིན་པོ་ཆེ་ཉིད་ཀྱིས་ཐུགས་ཁུར་དང་སྐུ་ཉིད་བསྟན་འགྲོའི་དོན་དུ་འཕགས་ཡུལ་དུ་ཕེབས་སྐབས་རླངས་འཁོར་གདོང་ཐུག་གིས་བརྡབ་སྐྱོན་བྱུང་བའི་ཟུངས་ཁྲག་དྲོན་མོའི་རིན་གྱིས་རྨང་གཞི་བཏིང་སྟེ། ཆོས་གྲྭའི་གྲྭ་ཤག་གཙུག་ལག་ཁང་དང་བཅས་པ་གཞི་ཁྱོན་ཆེ་བའི་རྒྱ་བསྐྱེད་བཞེངས་སྐྲུན་མཛད་པ་སྟེ། ཆོས་གྲྭ་ཆེན་མོའི་དཀྱིལ་དབུས་སུ་ཐུབ་བསྟན་ཉིན་མོར་བྱེད་པའི་གཙུག་ལག་ཁང་སུམ་ཐོག་ཅན་རྒྱ་ཁྱོན་སྔར་བས་ཉིས་འགྱུར་གྱིས་ཆེ་ཞིང་བཟོ་རྩལ་ཁྱད་དུ་འཕགས་པའི་རྐོས་རིས་ཀྱིས་མཛེས་པ། འོག་ཁང་དུ་འདུས་པ་སྟོང་ཕྲག་ཤོང་བའི་ཚོམས་ཆེན་ཀུན་དགའ་ར་བ་དང་། བར་ཁང་དུ་སྡོམ་རྒྱུན་ལྷ་ཁང་དང་གསང་སྙིང་ལྷ་ཁང་སོགས་ནང་བཞུགས་སྐུ་གསུང་ཐུགས་རྟེན་དང་བཅས་པ། མཐའ་འཁོར་དུ་ཤར་ཐོས་བསམ་ནོར་བུའི་གླིང་དང་། ལྷོ་ལུང་རིགས་བསམ་འཕེལ་གླིང་། ནུབ་ངེས་དོན་ཆོས་འཁོར་གླིང་། བྱང་བཤད་སྒྲུབ་རྣམ་ངེས་གླིང་བཅས་གླིང་ཕྱོགས་ཆེ་བཞིའི་གྲྭ་ཤག་ཉིས་ཐོག་ཅན་ཕྱོགས་རེ་ལ་ཁང་མིག་བརྒྱ་རེ་ཉེ་བས་ལྕགས་རི་ལྟར་ཡོངས་སུ་བསྐོར་བ།
ཤར་ཐོས་བསམ་ནོར་བུའི་གླིང་དུ། མཚོ་སྔོན། སྦྲ་ནག །ཨ་མདོ། མགོ་ལོག རྫ་རྒྱུད། རྨེ་ཡུལ། གསེར་ལྗོངས། གཙང་ཐང་། ར་ཧོར། ཆ་ནང་། མདོ་ཆེན། ཧོར་སོག རྒྱ་ནག་བྱང་ཤར་པ་སོགས་ཀྱི་གྲྭ་རྒྱུན་བཞུགས་ཁོངས་དང་། ལྷོ་ལུང་རིགས་བསམ་འཕེལ་གླིང་དུ། དབུས་གཙང་། མངའ་དྭགས། སྤོ་ཀོང་། ཆབ་བྲག །ནག་སོག འདམ་ཤོད། སྐྱེ་མདོ། ནང་ཆེན། སྡེ་གླིང་། འབྲི་རྒྱུད་བར་སྟོད། རྒྱ་སྡེ་ཁག་གསུམ། བུ་རྒྱུད། ར་ཚང་། འབྲུག་འབྲས་བལ་མོན་སོགས་ཀྱི་གྲྭ་ཁོངས། ནུབ་ངེས་དོན་ཆོས་འཁོར་གླིང་དུ། ཏྲེ་ཤོད། ཉག་རྒྱུད། ས་སྨད། འཇང་རོང་། འབའ་གླིང་། ལི་ཐང་། འབྲི་རྒྱུད་སྨད་པ། ཧྥི་གླིང་པ་སོགས་ཀྱི་གྲྭ་ཁོངས། བྱང་བཤད་སྒྲུབ་རྣམ་ངེས་གླིང་དུ། མི་ཉག་རོང་འབྲོག གཡུ་མཁར། རྒྱལ་རོང་། ཁྲོ་ཆུ། དར་མདོ། གངས་དཀར། ཉག་ཆུ། བརྒྱད་ཟིལ། སྡེ་རོང་། འདབས་པ། རྒྱ་ནག་ལྷོ་ནུབ་པ། ཤང་ཨོའོ། ཐེའེ་ཝན། འཇར་པེན་པ་སོགས་ཀྱི་གྲྭ་ཁོངས་བཅས་གླིང་ཕྱོགས་སོ་སོའི་གྲྭ་ཁོངས་དང་།
ཆོས་གྲྭ་ཆེན་མོའི་སློབ་གཞིའི་ཡིག་ཆ་དང་འཛིན་གྲྭའི་རིམ་པ་ནི། འཛིན་གྲྭ་དང་པོས་བྲིས་གཟུགས། དག་ཡིག སུམ་ཅུ་པ། བསྡུས་གྲྭའི་རིགས་ལམ་ཆུང་བ། དགེ་ཚུལ་གྱི་ཚིག་ལེའུར་བྱས་པ་ལྔ་བཅུ་པ། རྒྱལ་སྲས་ལག་ལེན། བཤེས་སྤྲིང་། ལོ་རྒྱུས་བཅས་དང་། འཛིན་གྲྭ་གཉིས་པས། ལཉ་ཝར་བྲིས་གཟུགས། རྟགས་འཇུག བསྡུས་གྲྭའི་རིགས་ལམ་འབྲིང་བ། སྒྲ་མཚམས་སྦྱོར་ལྔ་པ། མདོ་སྔགས་སྨོན་ལམ་གྱི་འགྲེལ་པ། ཀཱ་རི་ཀ་སུམ་བརྒྱ་བ། སོར་མདོ། རིག་པ་དྲུག་ཅུ། སྙན་ངག་ལེའུ་བར་པ། དབུ་མ་བཞི་བརྒྱ་པ། འབྱེད་རྣམ་གཉིས། མི་ཕམ་མཁས་འཇུག །
བོད་ཀྱི་ཆོས་འབྱུང་ལོ་རྒྱུས་ཀྱི་དུམ་བུ་དང་པོ་བཅས་དང་། འཛིན་གྲྭ་གསུམ་པས། སུམ་རྟགས་གཉིས་ཀྱི་དཀའ་འགྲེལ། སྙན་ངག་ལེའུ་ཐོག་མཐའ། བསྡུས་གྲྭའི་རིགས་ལམ་ཆེ་བ། སྒྲ་ཀ་ལཱ་པ། ལོ་རྒྱུས་ཆོས་འབྱུང་གི་དུམ་བུ་བར་པ། འདུལ་བ་མདོ་རྩ་བ། དབུ་མ་རིགས་ཚོགས། ཡིད་བཞིན་མཛོད་ཀྱི་གྲུབ་བསྡུས། མདོ་སྡེ་རྒྱན། མངོན་པ་ཀུན་བཏུས་བཅས་དང་། འཛིན་གྲྭ་བཞི་པས། སྒྲ་ཙནྡྲ་པ། བློ་རིགས་དང་རྟགས་རིགས། འདུལ་བ་མེ་ཏོག་ཕྲེང་རྒྱུད། མངོན་པ་མཛོད། དབུ་མ་འཇུག་པ། དབུ་མ་རྒྱན། རྒྱུད་བླ་མ། གསང་སྙིང་མཆན་འགྲེལ་བཅས་དང་། འཛིན་གྲྭ་ལྔ་པས། མངོན་རྟོགས་རྒྱན་གྱི་མཆན་འགྲེལ། ཚད་མ་རིགས་གཏེར། ཡོན་ཏན་མཛོད། མངོན་པ་མཆིམས་ཆེན། འཛིན་གྲྭ་དྲུག་པས། ཚད་མ་རྣམ་འགྲེལ། སྡོམ་གསུམ་དཔག་སྙེ། འཇུག་འགྲེལ་ཆེན་མོ་ཁག ཤེར་ཕྱིན་ཡུམ་དོན་རབ་གསལ། གྲུབ་མཐའ་མཛོད། ཡིད་བཞིན་མཛོད་བཅས་དང་། འཛིན་གྲྭ་བདུན་པས། རོང་ཟོམ་ཐེག་ཆེན་ཚུལ་འཇུག་དང་སྣང་བ་ལྷ་སྒྲུབ། སྙིང་འགྲེལ་གསང་བདག་དགོངས་རྒྱན། མན་ངག་མཛོད། ཚིག་དོན་མཛོད་བཅས་དང་། འཛིན་གྲྭ་བརྒྱད་པས། རོང་ཟོམ་དཀོན་མཆོག་འགྲེལ། གསང་བདག་ཞལ་ལུང་། གནས་ལུགས་མཛོད། ཐེག་མཆོག་མཛོད། ཆོས་དབྱིངས་མཛོད་དང་། འཛིན་གྲྭ་དགུ་པ་ཡན་གྱི་ལོ་རིམ་བཞི་ཚན་གསུམ་པས། ངལ་གསོ་སྐོར་གསུམ། རྒྱུད་བཅུ་བདུན། སྙིང་ཐིག་ཡ་བཞིའི་ཁྲིད་སྦྱང་རྒྱས་པ་སྨིན་དབང་དང་བཅས་ནོད་རྒྱུ་བཅས། མདོར་ན་ལོ་ངོ་བཞི་ཚན་གསུམ་གྱི་རིང་མདོ་སྔགས་རིག་གནས་དང་བཅས་པའི་དགོངས་འགྲེལ་གཞུང་ལུགས་ཚད་མ་རྒྱ་གར་འཕགས་པའི་ཡུལ་གྱི་འཛམ་གླིང་མཛེས་པར་བྱེད་པའི་རྒྱན་དྲུག་མཆོག་གཉིས་ཀྱི་ལེགས་བཤད་ཀྱིས་སྲོག་བཟུང་ཞིང་། གངས་ལྗོངས་འཇམ་པའི་དབྱངས་དངོས་རྣམ་གསུམ་སོགས་རིས་མེད་མཁས་པའི་གཞུང་ལུགས་ཆེན་མོ་དག་ལ་ཞོར་གཟིགས་ཀྱིས་བཤད་པའི་ཟུར་བརྒྱན་པ་དང་། རང་ལུགས་སྔ་འགྱུར་རྙིང་མའི་ཀུན་མཁྱེན་རོང་ཀློང་རྣམ་གཉིས་དང་། སྨིན་གླིང་ཡབ་སྲས། མངའ་རིས་པཎ་ཆེན། རིག་འཛིན་འཇིགས་མེད་གླིང་པ་སོགས་མཁས་གྲུབ་རྣམས་ཀྱི་གསུང་འབུམ་དང་། ཁྱད་པར་ཆོས་སྡེ་འདི་ནས་བྱོན་པའི་མཁས་དབང་ཆེན་པོ་རྒྱལ་སྲས་གཞན་ཕན་མཐའ་ཡས། དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། མཁན་ཆེན་པདྨ་བཛྲ། མཁས་མཆོག་གཞན་ཕན་སྣང་བ། འཇམ་མགོན་མི་ཕམ་ཕྱོགས་ལས་རྣམ་རྒྱལ། བོད་སྤྲུལ་མདོ་སྔགས་བསྟན་པའི་ཉི་མ་བཅས་ཀྱིས་མཛད་པའི་ཡིག་ཆ་ཁག་གིས་རང་ལུགས་ཐུན་མིན་གྱི་གྲུབ་མཐའི་གཞུང་འཛུགས་པར་བྱེད་དོ། །དེ་ལྟར་མདོ་སྔགས་རིག་གནས་དང་བཅས་པར་འཆད་ཉན་མཐར་ཕྱིན་པའི་མཚན་རྟགས་ཐོབ་ཐང་འཛིན་གྲྭའི་ལོ་རིམ་འཕར་ཆགས་དང་སྦྱངས་འབྲས་ཀྱི་ཡོན་ཏན་དངོས་ལ་བསྟུན་ཏེ་ཇི་ལྟར་འབུལ་ཚུལ་ནི། ཆོས་རྗེ་པདྨ་སྐལ་བཟང་རིན་པོ་ཆེའི་ཞལ་སྔ་ནས་མཛད་པའི་ཤྲཱི་སེང་ཆོས་གྲྭའི་བཅའ་ཡིག་དྲང་སྲོང་དགྱེས་པའི་བཀའ་ལུང་དུ་ཞིབ་པར་གཏན་ལ་ཕབ་པར་མཛད་པ་སྟེ། དེ་ཡང་སྐྱོར་དཔོན་ནི། གཞུང་ཕྱོགས་རེའི་ཚིག་དོན་འགྲོལ་ནུས་ཤིང་འཆད་རྩོད་ལ་གཞན་དྲིང་མི་འཇོག་པ། གཞུང་སོ་སོའི་རབ་འབྱམས་པ་ནི། གཞུང་རེ་རེའི་དཀའ་གནད། མཐའ་དཔྱད། དོགས་གཅོད་དང་བཅས་པར་དགག་བཞག་སྤོང་གསུམ་ལ་འགྲན་ཟླ་དང་བྲལ་བ། མཁན་ཆུང་ནི། སྔར་གྱི་སྟེང་འདུལ་བའི་ལས་ཆོག་ལ་ལྷག་པར་མཁས་ཤིང་སྤང་བླང་འདོམས་པ་ལ་མི་དམན་ཞིང་ཆོས་སྡེ་ཁག་གི་མཁན་ཚབ་ཕེར་བ། མཁན་ཆུང་ཁྲི་བ་ནི། གཞུང་བཀའ་པོད་ལྔ་ལ་ཐོས་བསམ་རྒྱ་ཆེ་ཞིང་ཉམས་ལེན་གོ་ཡུལ་དུ་མ་ལུས་པ། མཁས་བཙུན་གཉིས་ལྡན་ལུགས་གཉིས་ཀྱི་གཟིགས་པ་ཡངས་པ། ཕྱོགས་ཀྱི་ཡན་ལག་གི་ཆོས་སྡེ་སོ་སོའམ་བཤད་གྲྭ་སོ་སོའི་མཁན་པོར་འོས་པ། གཞུང་ཆེན་རབ་འབྱམས་པ་ནི། གཞུང་ཆེན་པོ་བཅུ་གསུམ་ཆ་ལག་འགྲེལ་ཊཱིཀ་དང་བཅས་པར་ཐོས་བསམ་གྱིས་རྩ་བདར་ཆོད་པ། འཛིན་གྲྭ་བཞིའི་དམ་བཅའི་མཚན་རྟགས་བཞེས་ཤིང་བསྟན་བཅོས་རྩོམ་པའི་རྒྱུ་ཚོགས་ཚང་བ། བརྟན་མཁས་ཀྱི་ཡོན་ཏན་དང་ལྡན་ཞིང་འཆད་རྩོད་རྩོམ་གསུམ་ལ་སྤོབས་པའི་གཟེངས་མཐོ་བ། སྔགས་རབ་འབྱམས་པ་ནི། གསང་སྔགས་ཀྱི་རྒྱུད་སྡེ་ཕྱི་ནང་ཀུན་བསྣོལ་མཚམས་མ་ལོག་པར་འཆད་ཁྲིད་ནུས་ཤིང་རང་རྒྱུད་ལ་བོགས་ཐོན་པ། མདོ་སྔགས་རབ་འབྱམས་པ་ནི། མདོ་དང་སྔགས་ཀྱི་ཐོས་བསམ་སྔ་མའི་རྨང་གཞིའི་སྟེང་གཞུང་ལྔའི་རྩ་བ་དང་སྒྱུ་འཕྲུལ་གསང་བ་སྙིང་པོ་སྤྱི་དོན་དང་བཅས་པ་ཐུགས་ཐོག་ནས་རྒྱས་བཤད་ཞིབ་འགྲེལ་ནུས་པ། མཁན་ཆེན་ནི། བཅུ་ཕྲག་རིག་པའི་གནས་ལ་མཁྱེན་པ་རྒྱས་ཤིང་ལྟ་སྒོམ་སྤྱོད་པའི་ཉམས་བཞེས་ཁྱད་དུ་འཕགས་པ། རྒྱལ་བའི་བསྟན་པ་འཛིན་སྐྱོང་སྤེལ་བའི་ཐུགས་སྟོབས་ཆེ་བ། ཆོས་གྲྭ་ཆེན་པོ་རང་གི་མཁན་ཚབ་ཀྱི་བཞུགས་ཁྲིར་དབང་པ། མཁན་ཆེན་ཁྲི་པ་ནི། མདོ་སྔགས་རིག་གནས་དང་བཅས་པར་རང་བྱན་ཆུད་ཅིང་དམ་པའི་ཚུལ་དགུའི་ཡོན་ཏན་དང་ལྡན་པ། བསྙེན་སྒྲུབ་ལས་གསུམ་ལ་དབང་འབྱོར་བ། སྔར་བྱོན་མཁན་རབས་ནོར་བུའི་ཕྲེང་ཚར་གྱི་ཆོས་ཁྲིར་བཞུགས་པར་དབང་བ། ཁྲི་ཆེན་ནི། མཁན་ཆེན་ཁྲི་འཛིན་གྱི་ལས་ཐོག་ལོ་དུས་བཞི་ཚན་གཉིས་ཚང་ཞིང་འོད་གསལ་རྫོགས་པ་ཆེན་པོའི་ཟབ་རྒྱས་ཆོས་ཀྱི་བདུད་རྩིས་བུ་སློབ་ཁྲི་ཕྲག་བསྐྱངས་པ། རིམ་པ་དང་པོའི་བསྟན་འཛིན་སྐྱེས་ཆེན་དག་གི་སྐུའི་ཡོངས་འཛིན་དུ་འོས་པ། ཁྱབ་བདག་པ་ནི། ཤེས་བྱའི་ཆོས་ལ་མཁྱེན་པའི་བློ་གྲོས་རྒྱས་ཤིང་། གྲུབ་པའི་ས་མཐོར་གཤེགས་པའི་ལམ་རྟགས་ཀྱི་ཡོན་ཏན་བརྙེས་པ། ཟབ་གསང་ཆོས་ཀྱི་གཏེར་མཛོད། སྨིན་གྲོལ་དབང་གི་བུམ་པ། རིགས་དང་དཀྱིལ་འཁོར་ཀུན་ཀྱི་གཙོ་བོར་བཞེངས་པ། རིས་སུ་མ་ཆད་པའི་བསྟན་འཛིན་ཆེ་དགུ་དག་གིས་ཞབས་ཀྱི་པད་མོ་སྤྱི་བོར་ལེན་འོས་པ་བཅས་སོ། །དེ་ལྟར་ཆོས་སྡེ་ཆེན་མོ་འདི་ཉིད་ཀྱི་ཕྱི་ནང་གསང་གསུམ་གྱི་བཅའ་སྒྲིག་སོགས་ཞིབ་པའི་ལོ་རྒྱུས་སྐྱབས་རྗེ་མཆོག་གི་ཞལ་སྔ་ནས་མཛད་པའི་གསུང་རྩོམ་ཁག་ཏུ་གསལ་བས་འདིར་ཡང་དུ་བཀོད་པར་མ་བྱས་སོ། །
ད་ནི་འཕགས་བོད་འབྲས་འབྲུག་སོགས་ཡངས་པའི་རྒྱལ་ཁམས་ཀུན་ཏུ་ས་བཀའ་རྙིང་གསུམ་གཙོ་བོར་གྱུར་པའི་བཤད་སྒྲུབ་ཀྱི་ཆོས་སྡེ་ཆེན་མོ་ཡན་ལག་དང་ཉིང་ལག་གི་ཚུལ་དུ་ཇི་ལྟར་དར་རྒྱས་སུ་བྱུང་བའི་ཚུལ་མདོ་ཙམ་བརྗོད་པ་ལ། དེ་ཡང་གངས་རིའི་ལྗོངས་སུ་འགྲན་ཟླ་བྲལ་བའི་བཤད་པའི་བཀའ་བབ་དཔལ་ས་སྐྱ་པའི་བསྟན་པ་དུས་ཀྱི་དབང་གིས་ཅུང་ཉམས་པར་ཕྱོགས་པ་ན། འཇམ་མགོན་ས་སྐྱ་པཎ་ཆེན་བསམ་བཞིན་དགེ་བའི་བཤེས་གཉེན་དུ་སྣང་བ་ཕྲིན་ལས་དུས་བབ་ཀྱི་སྐྱེས་བུ་ཆེན་པོ་མཁས་མཆོག་གཞན་ཕན་སྣང་བས་གཞིར་བཞེངས་སུ་བསླངས་པ་ནས། དེང་གི་དུས་སུ་འཆད་རྩོད་རྩོམ་གསུམ་གྱི་ཕྲིན་ལས་ཉིན་བྱེད་ཀྱི་སྣང་བ་ལྟར་སླར་ཡང་ཕྱོགས་ཀྱི་ཐ་གྲུ་ཀུན་ཏུ་དར་ཞིང་རྒྱས་པ་བྱུང་བ་སྟེ།
དཔལ་ས་སྐྱའི་ཕྱོགས་ཀྱི་ཆོས་སྡེ་ཆེན་མོ་རྫོང་སར་ཁམས་བྱེའི་བཤད་གྲྭ་ནི།
མཁས་མཆོག་གཞན་ཕན་སྣང་བ་མཆོག་རྩ་བའི་གདན་ས་རྫོགས་ཆེན་ཤྲཱི་སེང་ཆོས་གྲྭ་རུ་ལོ་བཞིའི་ལས་ཐོག་མཁན་པོ་མཛད་རྗེས། རིས་མེད་བསྟན་པའི་གཙུག་རྒྱན་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱིས་ཐུན་མིན་རིགས་བདག་ཏུ་བསྙེན་ཅིང་བཀས་བསྐུལ་བ་ལྟར། སྤྱི་ལོ་༡༩༡༩པ་རབ་བྱུང་བཅོ་ལྔ་པའི་ས་རྟ་ལོར་ཁམས་ཀྱི་བྱེ་མ་ཐང་དུ་རྫོང་སར་བཤད་གྲྭ་གསར་དུ་བཙུགས། མཁན་ཆེན་གཞན་དགའ་རིན་པོ་ཆེ་ཉིད་མཁན་རབས་དང་པོའི་གསེར་ཁྲིར་ལོ་བཞིར་བཞུགས་ཏེ་འཆད་ཁྲིད་མཛད་པས་འགྲན་ཟླ་བྲལ་བའི་ཐུགས་སྲས་ཞལ་སློབ། དབོན་སྟོད་མཁྱེན་རབ་དང་། མཁན་ཆེན་འཇམ་དབྱངས་ཐབས་མཁས། བླ་མ་འཇམ་དབྱངས་རྒྱལ་མཚན། ཁང་དམར་རིན་ཆེན་རྡོ་རྗེ། བྲག་ཡབ་བློ་གྲོས། མདོ་སྲིབ་ཐུབ་བསྟན། མི་ཉག་དམ་ཆོས། སྡེ་གཞུང་ཆོས་འཕེལ། བྲག་ཡབ་མཁྱེན་རབ་སེང་གེ་སོགས་མཁས་པའི་ཁྱུ་མཆོག་མང་དུ་བྱོན་པས་རྫོང་སར་ཁམས་བྱེའི་བཤད་གྲྭ་ཞེས་ཡོངས་སུ་གྲགས་པར་གྱུར། དེ་ལས་ཉིང་ལག་གི་ཚུལ་དུ་འཕྲོས་པའི་ཆོས་སྡེ་ནི། མཁན་ཆེན་འཇམ་དཔལ་བཟང་པོས་སྟོད་ས་སྐྱའི་བཤད་གྲྭ་བཙུགས་ཤིང་དེ་ལས་འཕྲོས་པ་གཙང་ངོར་དགོན་གྱི་བཤད་གྲྭ་ལའང་བཤད་རྒྱུན་སྤེལ། དེ་བཞིན་དབོན་སྟོད་མཁྱེན་རབ་ཀྱིས་དབོན་སྟོད་ལྷུན་པོ་རྩེའི་བཤད་གྲྭ་དང་། སྡེ་དགེའི་དགོན་ཆེན་བཤད་གྲྭ་བཙུགས། བླ་མ་འཇམ་རྒྱལ་གྱིས་སྐུ་ཚེ་གསེར་ལྗོངས་ཀྱི་བཤད་གྲྭ་བཙུགས། དུང་མདོ་བློ་གྲོས་སེང་གེས་སྒ་ཁྲི་འདུ་སྐལ་བཟང་དགོན་གྱི་བཤད་གྲྭ་བཙུགས། མདོ་སྲིབ་ཐུབ་བསྟན་གྱིས་རབ་བརྟན་དགོན་གྱི་བཤད་གྲྭ་དང་། མདོ་སྲིབ་བཤད་གྲྭ་གཉིས་བཙུགས། བྲག་ཡབ་བློ་གྲོས་ཀྱིས་གོ་འཇོ་དགོན་གྱི་བཤད་གྲྭ་དང་། གོ་འཇོ་ཐང་སྐྱ་དགོན་གྱི་བཤད་གྲྭ་བཙུགས། ཁང་དམར་རིན་ཆེན་གྱིས་རི་བོ་ཆེ་གནས་བརྟན་དགོན་གྱི་བཤད་གྲྭ་བཙུགས། མི་ཉག་དམ་ཆོས་ཀྱིས་དཔལ་ལྷ་སྒང་གི་བཤད་གྲྭ་བཙུགས་པ་དང་། དེ་བཞིན་ཁྲོམ་རྡོ་ཁོ་དགོན་གྱི་བཤད་གྲྭ། ཡིད་ལྷུང་ལྷ་བྱ་དགོན་གྱི་བཤད་གྲྭ། གཙང་རྟ་ནག་གི་སློབ་གྲྭ། ངོར་དགོན་གྱི་སློབ་གྲྭ་སོགས་བཤད་པའི་སྡེ་མཐའ་ཡས་པ་གསར་བཙུགས་དང་བསྐྱར་གསོ་གནང་སྟེ་ཕྲིན་ལས་མཐར་རྒྱས་བྱུང་། གཞན་ཡང་དེང་གི་དུས་སུའང་གསེར་ལྗོངས་ཨ་པད་དང་། ཁྲི་ཚོ་རིན་ཆེན། མདོ་སྲིབ་ཀུན་དགའ་དབང་ཕྱུག དཀར་མཛེས་གདོང་སྤྲུལ་རིན་པོ་ཆེ་སོགས་ཡང་སློབ་དག་གིས་འཕགས་པའི་ཡུལ་དུ་ས་སྐྱའི་མཐོ་རིམ་སློབ་གྲྭ་དང་། འབྲས་ལྗོངས་རྫོང་སར་བཤད་གྲྭ་སོགས་ཕྱོགས་ཀྱི་ཐ་གྲུ་ཀུན་ཏུ་འཆད་ཁྲིད་ཀྱི་ཕྲིན་ལས་དར་ཞིང་རྒྱས་པར་མཛད་བཞིན་པའོ། །
རྒ་སྐྱེ་དགུ་མདོའི་བཤད་གྲྭ་ནི།
དེ་ཡང་གསང་བདག་དངོས་བྱོན་འཇམ་མགོན་བློ་གཏེར་དབང་པོའི་ཐུགས་བསྐྱེད་དང་། གཞན་དགའ་རིན་པོ་ཆེའི་བཀའ་དྲིན་གྱིས་སྒ་སྐྱེ་དགུ་དགོན་དུ་དཔལ་ས་སྐྱའི་བཤད་གྲྭ་གསར་དུ་བཙུགས་ཤིང་། མཁན་རབས་དང་པོ་གཞན་དགའ་རིན་པོ་ཆེ་ཉིད་ཀྱིས་མཛད་དེ་ཆོས་ཀྱི་འཁོར་ལོ་རྒྱ་ཆེར་བསྐོར་བ་དང་། དེང་གི་དུས་སུའང་སྡེ་འདིར་བཤད་ཁྲིད་མ་ཉམས་པར་གནས་སོ། །
དྭགས་རྒྱུད་བསྟན་པའི་ཉི་མ་ཤར་དཔལ་སྤུངས་ཐུབ་བསྟན་ཆོས་འཁོར་གླིང་གི་བཤད་གྲྭ་ནི།
དེ་ཡང་ཏཱའི་སི་ཏུ་པདྨ་དབང་མཆོག་རྒྱལ་པོས་མཁན་ཆེན་གཞན་དགའ་རིན་པོ་ཆེ་ཐུན་མིན་རིགས་ཀྱི་བདག་པོར་བསྟེན་ཏེ་རྫོགས་ཆེན་མྱོང་ཁྲིད་ཆེན་མོའི་གདམས་ངག་དང་། ཡུམ་ཀ་བདེ་ཆེན་རྒྱལ་མོའི་ཟབ་དབང་བཅས་གསན་པས་ཐུན་མིན་ཐེག་རྩེའི་རྟོགས་པ་ཐུགས་ལ་འཁྲུངས། དམ་པ་གང་དང་ཐུགས་བསྐྱེད་ཟུང་འབྲེལ་གྱིས་གདན་ས་དེར་བཤད་གྲྭ་གསར་དུ་བཙུགས་ཏེ་ཐོག་མའི་ཆོས་ཀྱི་ཁྲི་འཕང་མཐོན་པོར་གཞན་དགའ་རིན་པོ་ཆེ་ཉིད་བཞུགས་ཏེ་མདོ་སྔགས་གཞུང་ཆེན་གྱི་འཆད་ཁྲིད་བསྐྱངས་པས་ཞལ་སློབ་ཀྱི་ཐུ་བོ་ཟུར་མང་པདྨ་རྣམ་རྒྱལ་དང་། འབོ་གངས་དཀར་སྤྲུལ་སྐུ། ལུག་རུ་མཁན་ཆེན། ར་ཅབ་མཁན་ཆེན། ཛི་སྒར་ཀོང་སྤྲུལ་སོགས་མཁས་གྲུབ་ཀྱི་སྐྱེས་བུ་མང་དུ་བྱོན། དེ་ལས་ཟུར་མང་པདྨ་རྣམ་རྒྱལ་གྱིས་ཟུར་མང་རྣམ་རྒྱལ་རྩེའི་བཤད་གྲྭ་གསར་འཛུགས་ཀྱིས་ཆོས་འཁོར་བསྐོར་བས་གཞུང་ལུགས་སྨྲ་བའི་སློབ་བརྒྱུད་མཐར་ཁྱབ་བྱུང་བ་དང་། དེ་མཚུངས་འབོ་གངས་དཀར་སྤྲུལ་སྐུ་རིན་པོ་ཆེ་མཆོག་རྒྱལ་དབང་ཀརྨ་པའི་ཡོངས་འཛིན་དུ་དུས་ཡུན་གང་འཚམས་བཞུགས་རྗེས་རང་ཡུལ་འབོ་ཁོག་ཏུ་ཕེབས་ནས་གངས་དཀར་དགོན་གྱི་བཤད་གྲྭར་གཞུང་ཆེན་བཅུ་གསུམ་གྱི་འཆད་ཁྲིད་སྤེལ། སྐུ་ཚེའི་སྨད་དུ་མ་ཧཱ་ཙི་ནའི་རྒྱལ་ཁམས་ཤང་ཀང་དང་། ཐེ་ཝན་སོགས་སུ་ཞབས་པད་བཀོད་དེ་ཆོས་སྦྱིན་གནང་བའི་སློབ་རྒྱུན་དེང་གི་དུས་སུ་མ་ཉམས་པར་བཞུགས། དེ་བཞིན་ཛི་སྒར་ཀོང་སྤྲུལ་རིན་པོ་ཆེ་ཁམས་རི་བོ་ཆེའི་ཕྱོགས་སུ་ཕེབས་ཏེ་བཤད་གྲྭ་གསར་འཛུགས་མཛད་པ་བཅས་མདོར་ན་དྭགས་རྒྱུད་བསྟན་པའི་རིང་ལུགས་ལའང་གཞན་དགའ་རིན་པོ་ཆེ་མཆོག་རྒྱལ་དབང་ཆོས་གྲགས་གཉིས་པ་ལྟར་བཀའ་དྲིན་ཟླ་མེད་པར་གྲགས་སོ། །
བྱང་འབྲི་གུང་ཉི་མ་ལྕང་རའི་བཤད་གྲྭ་ནི།
གཞན་དགའི་དངོས་སློབ་ཉག་རོང་གུ་རུ་སྤྲུལ་སྐུ་མཆོག་འབྲི་གུང་སྐྱབས་མགོན་རིན་པོ་ཆེས་གདན་ཞུས་བཞིན། བྱང་འབྲི་གུང་ཕྱོགས་སུ་ཆིབས་ཁ་བསྒྱུར་ཏེ་ཉི་མ་ལྕང་རའི་བཤད་གྲྭ་གསར་འཛུགས་དང་། མཁན་རབས་དང་པོའི་ཁྲི་ལ་ཡུན་རིང་བཞུགས་ནས་གཞུང་ཆེན་བཅུ་གསུམ་གཙོ་བོར་གྱུར་པའི་མདོ་སྔགས་ཀྱི་བཤད་པ་མཛད། སློབ་ཚོགས་ཀྱང་གདན་ས་དེའི་མཁན་རབས་གཉིས་པ་ནོར་བུ་རྒྱལ་མཚན་དང་། མཁན་རབས་གསུམ་པ་མཁན་པོ་ནམ་ལངས། བཞི་པ་མཚན་ལྡན་བཟང་པོ་སོགས་མཁས་བཙུན་ལྡན་པ་མང་དུ་བྱོན། དེ་དག་གི་སློབ་བརྒྱུད་མཁན་པོ་ངེས་དོན་སོགས་ཀྱི་ཕྲིན་ལས་ལས་དེང་དུས་བལ་ཡུལ་སྟག་མོ་ལུས་སྦྱིན་སོགས་སུ་འཆད་ཉན་བཤད་པའི་རྒྱུན་འཕེལ་བཞིན་པ་ཐོས་སོ། །
འབྲུག་ཐར་པ་གླིང་གི་བཤད་གྲྭ་ནི།
གཞན་ཕན་ཆོས་ཀྱི་སྣང་བའི་ཞལ་སློབ་འབྲུག་དགེ་བཤེས་བསྟན་པ་རིན་ཆེན་མཆོག་ནས། ཀུན་མཁྱེན་ཆེན་པོའི་གདན་ས་ཐར་པ་གླིང་དུ་དགོན་སྡེ་དང་བཤད་གྲྭ་གསར་འདེབས་མཛད་དེ་མདོ་སྔགས་རིག་གཞུང་གི་འཆད་ཉན་རྒྱ་ཆེར་སྤེལ། ཞལ་སློབ་གཙོ་བོ་དགེ་བཤེས་པདྨ་ཕྲིན་ལས་དང་། ཀཿཐོག་བླ་མ་ངག་དབང་ཕྲིན་ལས། མཁན་ཆེན་ཡེ་ཤེས་སེང་གེ། སློབ་དཔོན་ནོར་དབང་སོགས་བསྟན་པ་འཛིན་པའི་སྐྱེས་ཆེན་མང་པོ་བྱོན། དེ་དག་གི་ཏ་ལའི་གྲྭ་ཚང་གསར་འཛུགས་གནང་བ་སོགས་འབྲུག་ཡུལ་དུ་ཕྲིན་ལས་རྒྱ་ཆེར་རྒྱས། དེ་བཞིན་གཞན་དགའི་དངོས་སློབ་དགེ་བཤེས་རིན་ཆེན་རྡོ་རྗེ་དང་། དགེ་བཤེས་ཚུལ་ཁྲིམས་དཔལ་བཟང་། དགེ་བཤེས་པདྨ་ཚེ་རིང་སོགས་ཀྱིས་ཆོས་བྲག་དགོན་དང་། ཐར་གླིང་དགོན། ཤར་ཕྱོགས་ཡོངས་ལའི་དགོན། འབྲུག་བུམ་ཐང་སོགས་སུ་སྨིན་གྲོལ་གཞུང་བཤད་ཀྱི་ཆོས་འཁོར་བསྐོར་བས་འབྲུག་ཡུལ་ཆོས་ཀྱི་རྒྱལ་ཁབ་ཀུན་ཏུ་ངེས་གསང་བསྟན་པའི་རིང་ལུགས་ཉི་མ་ཤར་བ་ལྟར་བྱུང་བར་གྲགས་སོ། །
གསང་ཆེན་བསྟན་པའི་ཆུ་འགོ་རྒྱལ་བ་ཀཿཐོག་པའི་རྒྱུད་སྡེའི་བཤད་གྲྭ་ནོར་བུ་ལྷུན་པོ་ནི།
དེ་ཡང་དཔལ་སྤྲུལ་རིན་པོ་ཆེ་དང་། འཇམ་མགོན་མི་ཕམ། དབོན་པོ་བསྟན་འཛིན་ནོར་བུ་བཅས་ཀྱི་ཐུན་མིན་ཞལ་སློབ་དགེ་གོང་མཁན་ཆེན་ཀུན་བཟང་དཔལ་ལྡན་མཆོག འཇམ་མགོན་མི་ཕམ་རིན་པོ་ཆེ་དང་ཀཿཐོག་སི་ཏུ་གསུམ་པ་ཆོས་ཀྱི་རྒྱ་མཚོ་རྣམ་གཉིས་ཀྱི་ཐུགས་བཞེད་གདན་ཞུས་ལྟར་སྔ་འགྱུར་བསྟན་པའི་ཆུ་འགོ་ཤར་རྒྱལ་བ་ཀཿཐོག་རྡོ་རྗེ་གདན་དུ་ཞབས་སོར་བཀོད་ནས། སྤྱི་ལོ་༡༩༠༧པ་རབ་བྱུང་བཅོ་ལྔ་པའི་མེ་རྟ་ལོར་བཤད་གྲྭ་ནོར་བུ་ལྷུན་པོའམ་རྒྱུད་སྡེའི་བཤད་གྲྭ་ཆེན་མོ་གསར་འཛུགས་མཛད་དེ་མཁན་རབས་དང་པོའི་གསེར་ཁྲི་ལ་ལོ་ངོ་གསུམ་ལྷག་བཞུགས། སི་ཏུ་རིན་པོ་ཆེའི་དགོངས་པ་བཞིན་ཀཿཐོག་གཞུང་བརྒྱ་མ་ཞེས་ལོ་ལྔ་རེའི་ཁོངས་སུ་ཐོས་པས་བག་ཆགས་འཇོག་པའི་གཞུང་བརྒྱ། བསམ་པས་སྒྲོ་འདོགས་བཅད་པའི་གཞུང་ལྔ། སྒོམ་པས་ཉམས་སུ་ལེན་པའི་གཞུང་ལྔ་བཅས་ཀྱི་བཤད་པ་ཡོངས་སུ་གྲུབ་པར་མཛད་པའི་ཕྱག་སྲོལ་གྱི་དབུ་བཙུགས་ནས་བསྟན་པ་བསྐྱངས། དེ་མཚུངས་རྫོགས་ཆེན་ཤྲཱི་སེང་ཆོས་གྲྭའི་སློབ་བརྒྱུད་བཱི་མའི་རྣམ་སྤྲུལ་མཁན་ཆེན་ངག་དབང་དཔལ་བཟང་དང་། གླག་བླ་ཆོས་འགྲུབ་སོགས་རིམ་པར་བྱོན་ནས་འཆད་རྩོད་རྩོམ་གསུམ་གྱི་མཛད་བཟང་ཕྱོགས་བརྒྱར་སྤེལ་བས་ཕྲིན་ལས་ནམ་མཁའ་དང་མཉམ་པར་གྱུར་ཏོ། །
དེ་ལས་འཕྲོས་པ་དགེ་རྩེ་གྲྭ་ལག་དགོན་གྱི་བཤད་གྲྭ་ནི།
སྤྱི་ལོ་༡༩༣༢པ་རབ་བྱུང་བཅུ་དྲུག་པའི་ཆུ་སྤྲེལ་ལོར་ཕྱག་ཚ་སྐུ་རབས་བཞི་པ་ཀུན་བཟང་པདྨ་ཕྲིན་ལས་རྒྱ་མཚོས་གདན་ཞུས་ལྟར་བཱི་མ་དངོས་བྱོན་མཁན་ཆེན་ངག་ཆུང་ངམ་ངག་དབང་དཔལ་བཟང་མཆོག་ཆོས་སྡེ་དེར་ཕེབས་ནས། མཁན་ཆེན་གཞན་དགའ་རིན་པོ་ཆེ་སོགས་རྫོགས་ཆེན་ཤྲཱི་སེང་ཆོས་གྲྭའི་མཁན་རབས་རྣམས་ལས་གསན་པའི་གཞུང་ཆེན་གྱི་བཤད་ཁྲིད་ཐོག་མར་སྤེལ་བ་ནས་ད་ལྟའི་བར་བཤད་སྒྲུབ་ཀྱི་བསྟན་པ་དར་ཞིང་རྒྱས་བཞིན་པའོ། །
སྔ་འགྱུར་གདན་ས་ཆེན་མོ་རྒྱལ་བ་དཔལ་ཡུལ་པའི་བཤད་གྲྭ་ཐོས་བསམ་ནོར་བུའི་ལྷུན་པོ་ནི།
ཇི་སྐད་དུ། ཨོ་རྒྱན་གསང་སྔགས་གླིང་པའི་ལུང་བྱང་ལསཿ དཔལ་ཡུལ་སྒྲུབ་པའི་གྲྭ་ལ་བཤད་གྲྭ་རྒྱསཿ སྔར་མེད་མདོ་ཆོས་མང་པོ་དར་ནས་འོངཿ ཞེས་གསུངས་པ་ལྟར། སྤྱི་ལོ་༡༩༢༢པ་རབ་བྱུང་བཅོ་ལྔ་པའི་ཆུ་ཁྱི་ལོར་གྲུབ་དབང་པདྨ་ནོར་བུའི་ཡང་སྲིད་གྲུབ་དབང་དཔལ་ཆེན་འདུས་པའམ་པདྨ་གསང་སྔགས་ཀུན་བཟང་བསྟན་འཛིན་ནོར་བུའི་ཐུགས་བསྐྱེད་བདག་རྐྱེན་གྱིས་ཉེ་བར་དྲངས་ཏེ། གྲུབ་དབང་རྫོགས་ཆེན་པའི་སློབ་བརྒྱུད་བཱི་མའི་རྣམ་རོལ་མཁན་ཆེན་ངག་དབང་དཔལ་བཟང་མཆོག་ཆོས་སྡེ་ཆེན་མོ་གང་དུ་ཞབས་སོར་བཀོད་ནས་ཐོས་བསམ་འཆད་ཉན་གྱི་སྲོལ་ཐོག་མར་བཙུགས་པའི་མཁན་རབས་དང་པོ་མཛད། དུས་དེར་གྲུབ་དབང་མཆོག་སྤྲུལ་རིན་པོ་ཆེ་དེ་ཉིད་ཀྱིས་སྐྱོར་དཔོན་མཛད་པ་དང་རྗེས་སུ་མཁན་རབས་གཉིས་པའི་ཁུར་བཞེས་ཏེ་མདོ་སྔགས་གཞུང་ཆེན་གྱི་བཤད་ཁྲིད་གནང་བ་སོགས་མཁས་ཚུལ་གསུམ་གྱི་མཛད་པས་བསྟན་པ་མཐར་རྒྱས་སུ་བསྐྱངས་སོ། །
དཔལ་ཡུལ་སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་ནི།
སྙིགས་དུས་བསྟན་འགྲོའི་དཔལ་མགོན་གྲུབ་དབང་པདྨ་ནོར་བུ་སྐུ་ཕྲེང་གསུམ་པ་ལེགས་བཤད་ཆོས་ཀྱི་སྒྲ་དབྱངས་མཆོག་གིས་བླ་ན་མེད་པའི་ཐུགས་བསྐྱེད་དང་སྐུ་ཚེགས་ཆེན་པོའི་སྒོ་ནས། སྤྱི་ལོ་༡༨༧༨པར་འཕགས་ཡུལ་ལྷོ་ཕྱོགས་མན་སོར་ཞེས་པའི་ས་ཆར་སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་ཞེས་བཤད་གྲྭ་ཆེན་མོ་ཕྱག་བཏབ་ཅིང་། དམ་པ་གང་གིས་གདན་ཞུས་ལྟར་མཁས་པའི་དབང་ཕྱུག་རྫོགས་ཆེན་མཁན་རིན་པོ་ཆེ་ཐུབ་བསྟན་བརྩོན་འགྲུས་མཁན་རབས་དང་པོའི་གསེར་ཁྲིར་བཞུགས་ནས། རྫོགས་ཆེན་ཤྲཱི་སེང་ཆོས་གྲྭའི་བཀའ་སྲོལ་ལྟར་གཞུང་ཆེན་བཅུ་གསུམ་གཙོ་བོར་གྱུར་པའི་མདོ་སྔགས་རིག་གནས་དང་བཅས་པའི་བཤད་ཁྲིད་རྒྱ་ཆེར་མཛད་པས་ཞལ་སློབ་མཁས་པའི་རྩེར་སོན་མཁན་ཆེན་པདྨ་ཤེས་རབ་དང་། མཁན་ཆེན་རྣམ་གྲོལ། མཁན་པོ་རིག་འཛིན། མཁན་པོ་ཚེ་དབང་རྒྱ་མཚོ། མཁན་པོ་ཨོ་རྒྱན་ཚེ་བརྟན་སོགས་དམ་པའི་སྐྱེས་བུ་དོན་གྱི་བསྟན་འཛིན་དུ་མ་བྱོན་ནས་འཆད་རྩོད་རྩོམ་གསུམ་གྱི་ཕྲིན་ལས་འཕགས་ཡུལ་སྔ་འགྱུར་པའི་ཆོས་སྡེ་ཆེ་ཕྲ་ཀུན་ལ་ཁྱབ་ཅིང་འཕེལ་བཞིན་པ་ཐོས་སོ། །
མཁས་བཙུན་གྲུབ་པའི་གདན་ས་དཔལ་ཞེ་ཆེན་བསྟན་གཉིས་དར་རྒྱས་གླིང་གི་བཤད་གྲྭ་ལེགས་བཤད་ཉི་ཟླའི་གླིང་ནི།
ཞེ་ཆེན་ཀོང་སྤྲུལ་རིན་པོ་ཆེ་པདྨ་དྲི་མེད་ལེགས་པའི་བློ་གྲོས་ཀྱིས་རབ་བྱུང་བཅུ་དྲུག་པའི་དཀྱིལ་ཙམ་ལ། གདན་ས་ཆེན་མོའི་གཡོན་ཕྱོགས་ཀྱི་མདུན་ཐང་དེར་བཤད་གྲྭ་ལེགས་བཤད་ཉི་ཟླའི་གླིང་གཙུག་ལག་ཁང་གྲྭ་ཤག་དང་བཅས་པ་གསར་བཞེངས་མཛད། དམ་པ་དེ་ཉིད་ཀྱིས་གདན་ཞུས་ལྟར་གྲུབ་དབང་རྫོགས་ཆེན་པའི་ཐུགས་སྲས་ཞལ་སློབ་ཀུན་གཟིགས་བོད་སྤྲུལ་མདོ་སྔགས་བསྟན་པའི་ཉི་མ་གདན་ས་དེ་ཉིད་དུ་ཞབས་སོར་བཀོད་ནས་ལོ་ངོ་གཅིག་ལྷག་ལ་འཆད་ཁྲིད་ཟབ་རྒྱས་གནང་། གཞན་ཡང་ཀོང་སྤྲུལ་རིན་པོ་ཆེ་ཉིད་དང་། ཁྲོ་ཤུལ་མཁན་པོ་འཇམ་དབྱངས་རྡོ་རྗེ། མཁན་པོ་གང་ཤར་སོགས་ཀྱིས་མདོ་སྔགས་གཞུང་ལུགས་ཆེན་མོ་སྤྱི་དང་འཇམ་མགོན་མི་ཕམ་རིན་པོ་ཆེའི་ཡིག་ཆ་ལ་རྩལ་འདོན་གྱི་བཤད་ཁྲིད་རྒྱ་ཆེར་མཛད་པས་ཞལ་སློབ་མཁས་པའི་དབང་པོ་དུ་མ་བྱུང་ངོ་། །
བཤད་གྲུབ་བསྟན་པའི་འབྱུང་གནས་རྫ་རྒྱུད་དགེ་མང་བཤད་གྲྭ་ནི།
རྫོགས་སྤྲུལ་བཞི་པ་མི་འགྱུར་ནམ་མཁའི་རྡོ་རྗེ་དང་། རྒྱལ་སྲས་གཞན་ཕན་མཐའ་ཡས། དཔལ་སྤྲུལ་རིན་པོ་ཆེ། མཁན་ཆེན་པདྨ་བཛྲ་སྟེ་རིགས་བདག་ཆེན་པོ་བཞིའི་ཐུན་མོང་ཐུགས་སྲས་ཨོ་རྒྱན་བསྟན་འཛིན་ནོར་བུ་མཆོག་ནས། དགེ་མང་དགོན་ལས་རྒྱང་གྲགས་ཙམ་གྱིས་ཆོད་པའི་ལུང་ཕུ་རུ་དགེ་མང་རི་ཁྲོད་ཕྱག་བཏབ་སྟེ། རྗེ་ཉིད་ཀྱིས་སྤྱོད་འཇུག་ཁོ་ན་ཚར་ཉིས་བརྒྱ་ལྷག་འཆད་པས་མཚོན་མདོ་སྔགས་ཀྱི་ཆོས་འཁོར་རྒྱ་ཆེར་བསྐོར། སྐབས་དེར་ཞལ་སློབ་མཁས་པའི་ཁྱུ་མཆོག་རྒྱ་ཀོང་གཞན་དགའ་དང་། དགེ་མང་ཡོན་དགའ། མི་ཉག་ཀུན་བསོད། དགེ་གོང་ཀུན་དཔལ་བཅས་ཀྱིས་སྐྱོར་སྦྱོང་དུས་གཅིག་ལ་མཛད་པར་གྲགས་པ་སོགས་འཆད་རྩོད་རྩོམ་པའི་ཕྲིན་ལས་ཧ་ཅང་དར། དེ་ནས་རིམ་པར་མཁན་ཆེན་གཞན་དགའ་དང་། ཡོན་ཏན་རྒྱ་མཚོ། དབང་རྡིས། དབང་ལོ། པདྨ་དབང་རྒྱལ་སོགས་མཁས་བཙུན་བཟང་པོའི་རྣམ་ཐར་གྱིས་ཕྱུག་པའི་མཁན་རབས་བར་མ་ཆད་པ་བྱོན་ཞིང་། རྒྱུད་རྒྱལ་གསང་བ་སྙིང་པོའི་འགྲེལ་ཆེན་ཕྱོགས་བཅུའི་མུན་སེལ་བློ་ཐོག་ནས་འཆད་ཁྲིད་མཛད་པའི་ཕྱག་སྲོལ་ད་ལྟའི་བར་མ་ཉམས་ཕྱོགས་བརྒྱར་སྤེལ་བཞིན་པའོ། །
རྫ་རྒྱུད་དགེ་གོང་བཤད་གྲྭ་ནི།
མཁས་པའི་གཙུག་རྒྱན་མཁན་ཆེན་ཀུན་བཟང་དཔལ་ལྡན་གྱིས་ཐོག་མར་ཕྱག་བཏབ་ཅིང་དམ་པ་གང་གི་ཐུན་མིན་ཞལ་སློབ་བོད་སྤྲུལ་མདོ་སྔགས་བསྟན་པའི་ཉི་མས་རྒྱུན་བསྐྱངས་པ་སྟེ། དེ་ཡང་བོད་སྤྲུལ་རིན་པོ་ཆེ་མཆོག་ནི་ཡུལ་ཤར་ཕྱོགས་དྭགས་པོའི་རྒྱུད་དུ་སྐུ་འཁྲུངས། སྔོན་གནས་རྗེས་དྲན་གྱི་རིགས་སད་དེ་མདོ་ཁམས་རྫོགས་ཆེན་ཤྲཱི་སེང་ཆོས་གྲྭར་ཕེབས་ཏེ་ལོ་ངོ་བརྒྱད་ལྷག་རིང་བཞུགས། རྫོགས་ཆེན་རིན་པོ་ཆེ་ཐུབ་བསྟན་ཆོས་ཀྱི་རྡོ་རྗེ་དང་། མཁན་ཆེན་པདྨ་ཐེག་མཆོག་བློ་ལྡན། མཁན་པོ་དགེ་རྣམ། མཁན་ཆེན་ཐུབ་བསྟན་སྙན་གྲགས་སོགས་ལས་མདོ་སྔགས་ཆོས་ཚུལ་མཐའ་དག་གསན་ཏེ་མཁས་པའི་དབང་ཕྱུག་ཏུ་གྱུར། དེ་མཚམས་རྫོགས་སྤྲུལ་ལྔ་བའི་བཀའ་ལུང་ལྟར། དགེ་གོང་དགོན་དུ་ཕེབས་ནས་ཀུན་དཔལ་རིན་པོ་ཆེའི་ཞབས་པད་མཉེས་པ་གསུམ་གྱིས་བསྙེན། རིམ་པར་གདན་སའི་བརྒྱུད་འཛིན་པ་མཛད་དེ་མདོ་སྔགས་རིག་གནས་དང་བཅས་པའི་འཆད་ཁྲིད་རྒྱ་ཆེར་བསྐྱངས། ཐུགས་སྲས་མཁས་པའི་དབང་པོ་མཁན་ཆེན་ཆོས་དབྱིངས་ཁྱབ་བརྡལ། མཁན་ཆེན་ཟླ་བའི་འོད་ཟེར། མཁས་མཆོག་པདྨ་ཚེ་དབང་། རྨེ་བ་མཁན་པོ་ཐུབ་བསྟན་སོགས་སྔ་འགྱུར་བསྟན་པའི་སྲོག་ཤིང་ཕུལ་དུ་བྱུང་བའི་སྐྱེས་བུ་མང་རབ་བྱོན་ནས་བཤད་སྒྲུབ་ཀྱི་བསྟན་པ་མཐར་རྒྱས་སུ་བྱུང་དང་འབྱུང་བཞིན་པའོ། །
རྫ་སྟོད་ལྕང་མ་སྒར་བསམ་གཏན་དར་རྒྱས་གླིང་ནི།
མཁས་མཆོག་ཨོ་རྒྱན་བསྟན་འཛིན་ནོར་བུ་དང་། གཞན་དགའ་རིན་པོ་ཆེ། མཁན་པོ་བསོད་ཆོས་སོགས་ཀྱི་ཞལ་སློབ་མཆོག་གྱུར་ཡོངས་ཀྱི་དགེ་བའི་བཤེས་གཉེན་ཆེན་པོ་ཐུབ་བསྟན་ཆོས་འཕེལ་མཆོག་དགུང་གྲངས་ཞེ་བདུན་པ་རབ་བྱུང་བཅུ་དྲུག་པའི་ཆུ་ཕོ་སྤྲེལ་ལོའི་སྨིན་དྲུག་ཟླ་བའི་ཚེས་༡༦ཉིན། ཆོས་རྗེ་དཔལ་སྤྲུལ་རིན་པོ་ཆེ་ཡུན་རིང་སྒྲུབ་པ་ལ་བཞུགས་བའི་དབེན་གནས་ལྕང་མ་རི་ཁྲོད་དུ་བསམ་གཏན་དར་རྒྱས་གླིང་ཞེས་པའི་ཆོས་གྲྭ་གསར་དུ་ཕྱག་བཏབ། རིས་སུ་མ་ཆད་པའི་གཞུང་ལུགས་སྤྱི་དང་བྱེ་བྲག་མདོ་སྔགས་གཞུང་བརྒྱའི་སྲོག་ཤིང་ལྟ་བུ་བྱང་ཆུབ་ལམ་གྱི་རིམ་པ་སྤྱོད་འཇུག་དང་། རྒྱུད་ཀྱི་རྒྱལ་པོ་སྒྱུ་འཕྲུལ་གསང་བ་སྙིང་པོ་ལ་ཁྱད་ཆོས་རྩལ་འདོན་གྱི་འཆད་ཁྲིད་རྒྱ་ཆེར་བསྐྱངས་པས་ཞལ་སློབ་མཁས་པའི་རྩེར་སོན། བུ་རྒྱུད་ལྷ་བ་སྤྲུལ་སྐུ། རྫ་རྒྱལ་ཐུབ་བེ། ཁྲོམ་ཐ་ཕྲིན་ལས་རྒྱ་མཚོ། འཇིགས་མེད་ལུང་རྟོགས་རྒྱ་མཚོ། དིལ་མཁྱེན་རབ་གསལ་ཟླ་བ། མཁན་ཆེན་འཇིགས་མེད་ཕུན་ཚོགས། མཁས་མཆོག་པདྨ་ཚེ་དབང་སོགས་རིས་མེད་བསྟན་པའི་སྤྱི་གཟུགས་མང་དུ་བྱོན་ནས་ཕྲིན་ལས་ཀྱི་སྣང་བ་དམ་པས་སའི་ཁྱོན་ཀུན་ཁྱབ་དང་ཁྱབ་བཞིན་པའོ། །
དེ་ལས་འཕྲོས་པ་གསེར་ཐང་ལྔ་རིག་ནང་བསྟན་སློབ་གླིང་ཆེན་མོ་ནི།
སྤྲུལ་བའི་གཏེར་ཆེན་ལས་རབ་གླིང་པའི་རྣམ་རོལ་མཁན་ཆེན་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་མཆོག་དགུང་ལོ་བཅོ་བརྒྱད་བཞེས་སྐབས་རྫ་སྟོད་ལྕང་མའི་ཆོས་སྒར་དུ་བྱོན། ཐུན་མིན་རིགས་ཀྱི་བདག་པོ་མཁན་ཐུབ་དགའ་རིན་པོ་ཆེ་སྒོ་གསུམ་མཉེས་པ་གསུམ་གྱིས་ཚུལ་བཞིན་བསྙེན་ཞིང་། མདོ་སྔགས་ཆོས་ཚུལ་རྒྱ་མཚོ་ལ་གསན་བསམ་མཐར་ཕྱིན་མཛད་པས་མཁས་གྲུབ་ཀྱི་གོ་འཕང་མཐོན་པོར་གཤེགས། སྤྱི་ལོ་༡༩༨༠པ་བོད་རབ་བྱུང་བཅུ་དྲུག་ལྕགས་སྤྲེལ་ཟླ་བ་དྲུག་པའི་ཚེས་བཅུ་ཉིན་ཁྲག་འཐུང་བདུད་འཇོམས་རྡོ་རྗེའི་གདན་ས་བླ་མ་རུང་དུ་གསེར་ཐང་ལྔ་རིག་ནང་བསྟན་སློབ་གླིང་དངོས་སུ་དབུ་བཙུགས། དེ་ནས་རིམ་པར་འཆད་རྩོད་རྩོམ་གསུམ་གྱི་རྒྱུན་བསྐྱངས་པས་དགེ་འདུན་གྱི་སྡེ་སྟོང་ཕྲག་དུ་མ་ཞལ་འཛོམས་བྱུང་ནས་ཆོས་ཀྱི་སྡེ་ཆེན་པོར་གྱུར། ཞལ་སློབ་མཁས་པའི་དབང་པོ་ཚུལ་ཁྲིམས་བློ་གྲོས། མི་ཉག་གུ་རུ། མཆོག་སྤྲུལ་བསྟན་འཛིན་རྒྱ་མཚོ། རྨེ་བ་འཆི་མེད་རིག་འཛིན། སྡེ་དགེའི་ཤེས་རབ་བཟང་པོ། གཙང་རོང་ཡེ་ཤེས་ཕུན་ཚོགས། མགོ་ལོག་ཀུན་དགའ་སོགས་དམ་པའི་ཚུལ་དགུའི་ཡོན་ཏན་གྱིས་འབྱོར་བ་མང་དུ་བྱོན་ཏེ་བླ་ན་མེད་པའི་ཕྲིན་ལས་ཀྱི་འོད་སྟོང་ཕྱོགས་མཐར་ཁྱབ་བཞིན་པའོ། །
གླག་བྲག་རྫོང་བཤད་གྲྭ་ཐུབ་བསྟན་བཤད་སྒྲུབ་འཕེལ་རྒྱས་གླིང་ནི།
མཁས་པའི་དབང་ཕྱུག་བསོད་ནམས་ཆོས་འགྲུབ་མཆོག་དགུང་ལོ་ཉེར་གཉིས་པ་ཤིང་མོ་ཕག་གི་ལོར་རྫོགས་ཆེན་ཤྲཱི་སེང་ཆོས་གྲྭར་ཕེབས་ནས་ལོ་ངོ་བརྒྱད་ལྷག་བཞུགས། མཁས་མཆོག་གཞན་ཕན་སྣང་བ་དང་། འཇམ་མགོན་མི་ཕམ་རིན་པོ་ཆེ། མཁན་པོ་བསོད་ཆོས། གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེ་སོགས་ལས་སྨིན་གྲོལ་གྱི་ཟབ་ཁྲིད་དང་། མདོ་སྔགས་ཀྱི་བཤད་རྒྱུན་མཐའ་ཡས་པ་གསན་པས་མཁས་གྲུབ་ཀྱི་སྐྱེས་བུ་ཆེན་པོར་གྱུར། དེ་ནས་རང་ཡུལ་དུ་ཕྱིར་ཕེབས་ནས་བྲག་ལྷ་རྫོང་ཐུབ་བསྟན་བཤད་སྒྲུབ་འཕེལ་རྒྱས་གླིང་ཞེས་གྲགས་པའི་བཤད་གྲྭ་བཙུགས་ནས་ཟབ་རྒྱས་ཆོས་ཀྱི་དགའ་སྟོན་ཕྱོགས་མེད་དུ་བསྩལ་བ་དང་། ངོ་མཚར་ལྡན་པའི་གསུང་འབུམ་ཆོས་ཚན་བརྒྱ་དང་གསུམ་གྱི་བདག་ཉིད་ཅན་སྐོར་ཚོ་ཆེན་མོ་དྲུག་ལྗགས་རྩོམ་གནང་བ་སོགས་བསྟན་འགྲོའི་ལེགས་མཛད་མཐའ་ཡས་པ་བསྐྱངས་སོ། །
ཁྲི་དར་རྒྱས་བྱམས་ཆེན་ཆོས་འཁོར་གླིང་གི་བཤད་གྲྭ་མཁས་མང་ཀུན་འདུས་གླིང་ནི།
རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེ་དང་། མཁན་ཆེན་གཞན་དགའ་རིན་པོ་ཆེ། མཁན་དཀོན་མཆོག་བློ་གསལ་བཅས་ཀྱི་ཐུན་མོང་ཞལ་སློབ། མཁྱེན་རྟོགས་གྲུབ་པའི་དབང་ཕྱུག་མདོ་རིན་པོ་ཆེ་ཟིལ་གནོན་དགྱེས་པ་རྡོ་རྗེས། སྤྱི་ལོ་༡༩༤༢པ་བོད་རབ་བྱུང་བཅུ་དྲུག་པའི་ཆུ་རྟ་མཆུ་ཟླའི་ཡར་ཚེས་ཉིན་མཁྱེན་བརྩེ་ཀུན་འདུས་མཁས་མང་གླིང་ཞེས་གྲགས་པའི་བཤད་གྲྭ་ཆེན་མོ་གསར་དུ་དབུ་བཙུགས། དེ་ནས་རིམ་པར་འདུས་པའི་སྡེ་ཉིས་བརྒྱ་ལྷག་ལ་དམ་པ་གང་ཉིད་དང་མཁན་ཆེན་ཚེ་དབང་རིག་འཛིན། མཁན་ཆེན་ནོར་བུ་བསྟན་འཛིན། མཁན་འཇིགས་མེད་དབང་ཕྱུག མཁན་བསོད་ནམས་མགོན་པོ། གནུབས་དགེ་བཤེས་ཆོས་དར། ཧོར་མོའི་མཁན་ཆེན་འཇམ་དཔལ། མཆོག་སྤྲུལ་རིན་པོ་ཆེ་ཤེས་རབ་རྒྱལ་མཚན་སོགས་གྲུབ་དབང་རྫོགས་ཆེན་པའི་སློབ་བརྒྱུད་མཁས་བཙུན་གྲུབ་པའི་དབང་ཕྱུག་བརྒྱུད་མར་བྱོན་པས་རྒྱལ་བསྟན་འཆད་རྩོད་རྩོམ་པའི་འོད་སྣང་གིས་ཡོངས་སུ་གསལ་བར་མཛད་པ་དང་། ཁྱད་པར་མཁན་ཆེན་ཚེ་དབང་རིག་འཛིན་ཞབས་ཀྱིས་མདོ་སྨད་ས་ཡི་ཐིག་ལེར་རེབ་ཀོང་བཀོད་ཆེན་སེང་ཁྲི་དགོན་པ་གསར་དུ་བཏབ་ནས་བཤད་སྒྲུབ་ཀྱི་ཕྲིན་ལས་ཕྱོགས་བརྒྱར་འཕེལ་བ་བྱུང་ངོ་། །
མདོ་ཁམས་གཙང་ཐང་ར་ཧོར་དགོན་གྱི་བཤད་གྲྭ་ནི།
ཀུན་མཁྱེན་གཞན་ཕན་སྣང་བའི་ཐུགས་སྲས་ཐུ་བོ་ཆོས་གྲགས་རྣམ་གཉིས་ཞེས་གྲགས་པའི་ཡ་གྱལ། སྔགས་ལ་མཁས་པ་ར་ཧོར་ཆོས་ཀྱི་གྲགས་པ་མཆོག་དགུང་ལོ་ཉི་ཤུ་པར་རྫོགས་ཆེན་ཤྲཱི་སེང་ཆོས་གྲྭར་ཕེབས་ཏེ། གཞན་དགའ་རིན་པོ་ཆེ་སོགས་མཁས་གྲུབ་དམ་པ་རྣམས་ལས། མདོ་སྔགས་རིག་གནས་དང་བཅས་པ་གུས་རྟག་བརྩོན་པ་ཆེན་པོས་ལོ་གྲངས་བཅུ་དྲུག་གི་རིང་ལ་སྦྱངས་པ་མཐར་སོན་མཛད་པས་མཁས་པའི་ཡང་རྩེར་སོན། དེ་ནས་རང་ཡུལ་ར་ཧོར་དགོན་དུ་ཕྱིར་ཕེབས་ནས་བཤད་པའི་ཆོས་སྡེ་ཆེན་མོ་གསར་དུ་བཙུགས། ལོ་ངོ་གསུམ་ལྷག་ལ་ཟབ་རྒྱས་ཀྱི་ཆོས་འཁོར་དཔག་ཡས་བསྐོར་བས་སློབ་ཚོགས་མཁས་གྲུབ་གྲངས་མང་བྱུང་། བར་མཚམས་བླ་མའི་བཀའ་དགོངས་ལྟར་དབུས་ཕྱོགས་སུ་ཕེབས་ནས་འབྲི་གུང་ཆོས་ལུང་རི་ཁྲོད་དུ་སྒྲུབ་པའི་རྒྱལ་མཚན་བཙུགས། དེ་སྐབས་འབྲུག་པའི་ཞལ་སློབ་སྦྱིན་བདག་ཚོར་བཀའ་གནང་སྟེ་ཟུར་མཁར་རྡོའི་མཆོད་རྟེན་རྣམ་ལྔའི་དྲུང་དུ་བཤད་གྲྭ་ཞིག་ཕྱག་བཏབ། དུས་དེར་ཐུགས་སྲས་བླ་མ་བསྟན་འཛིན་འོད་ཟེར་དང་། མཁན་བསོད་ནམ་དོན་འགྲུབ་ཟུང་ནས་ཀུན་མཁྱེན་གདན་ས་ཐར་པ་གླིང་དུ་བཤད་སྒྲུབ་ཀྱི་སྲོལ་ཉམས་གསོ་དང་གསར་འཛུགས་མཛད། ཐུགས་སྲས་པདྨ་རྣམ་རྒྱལ་མཆོག་འབྲུག་སེམས་རྟོགས་ཁའི་བཤད་གྲྭའི་དབུ་འཛིན་དུ་བྱོན་ཏེ། གཞུང་ཆེན་བཅུ་གསུམ་གྱི་འཆད་ཁྲིད་དང་། ཨོ་རྒྱན་བཤད་སྒྲུབ་གླིང་ཕྱག་བཏབ་ནས་བཤད་སྒྲུབ་ཀྱི་རྒྱུན་ཉམས་མེད་བསྐྱངས་པ་བཅས་ཕྲིན་ལས་ཕྱོགས་མཐར་རྒྱས་སོ། །
འབྲུག་ཡུལ་ཉི་མ་ལུང་གི་བཤད་གྲྭ་ཐུབ་བསྟན་བཤད་སྒྲུབ་དར་རྒྱས་གླིང་ནི།
གཞན་ཕན་ཆོས་ཀྱི་སྣང་བ་དང་ཉག་རོང་གུ་རུ་སྤྲུལ་སྐུ་རྣམ་གཉིས་ཀྱི་ཞལ་སློབ། རྡོ་རིང་མཆོག་སྤྲུལ་འཇམ་དབྱངས་ཀུན་བཟང་ལུང་རིགས་ཆོས་ཀྱི་ཉི་མ་མཆོག་འབྲུག་ཡུལ་བུམ་ཐང་དུ་ཕེབས་པར། ཆུ་སྨད་དྲུང་པ་མགོན་པོ་རྡོ་རྗེས་གདན་ཞུས་ལྟར་ཉི་མ་ལུང་དུ་ཐུབ་བསྟན་བཤད་སྒྲུབ་དར་རྒྱས་གླིང་ཞེས་པའི་ཆོས་སྡེ་གསར་དུ་བཏབ། མདོ་སྔགས་རིག་གནས་དང་བཅས་པའི་འཆད་ཁྲིད་ཡུན་དུ་བསྐྱངས་པས་སློབ་དཔོན་པདྨ་ཚེ་དབང་སོགས་མཁས་པ་མང་དུ་བྱུང་ནས་ཕྲིན་ལས་ཕྱོགས་བརྒྱར་འབར་བཞིན་པའོ། །
གསུམ། སྒྲུབ་པའི་གྲྭ་སྟོད་སྨད་བར་གསུམ་གྱི་ཆོས་སྡེ་བཅུ་གསུམ་དུ་གྲགས་པའི་ལོ་རྒྱུས།
གསུམ་པ་ཉམས་ལེན་སྒྲུབ་པའི་ཆོས་སྡེ་སྒོམ་གྲྭ་ཆེ་ཆུང་ཁག་ཇི་ལྟར་བཞུགས་ཚུལ་བཤད་པ་ལས། རྩ་བའི་སྒྲུབ་སྡེ་འོག་མིན་མཁའ་སྤྱོད་བདེ་ཆེན་གླིང་ངམ་གསང་ཆེན་ངེས་དོན་གླིང་ནི། སྤྱིར་གྲུབ་དབང་སྐུ་རབས་གསུམ་པ་ངེས་དོན་བསྟན་འཛིན་བཟང་པོའི་སྐུ་དུས་སུ་སྟོད་ན་སྒྲུབ་སྡེ་བཅུ་གསུམ་ཞེས་གྲགས་པ་བྱུང་ཞིང་། དེ་དག་ལས་རྩ་བའི་སྒྲུབ་སྡེ་གསང་ཆེན་ངེས་དོན་གླིང་ནི། གྲུབ་དབང་ཉིད་དགུང་གྲངས་ཉེར་གཅིག་བཞེས་པ་སྤྱི་ལོ་༡༧༧༩པ་སྟེ་རབ་བྱུང་བཅུ་གསུམ་པའི་ས་ཕག་ལོར་རིག་འཛིན་འཇིགས་མེད་གླིང་པས་ལུང་བསྟན་པ་ལྟར་དགོན་ལས་རྒྱང་གྲགས་གཉིས་ཀྱིས་ཆོད་པའི་དགོན་ཕུའི་གཡས་ཕྱོགས་ཀྱི་རི་ངོགས་སྒོམ་ཆེན་མཉམ་བཞག་གིས་བཞུགས་པའི་པང་དང་མཚུངས་པའི་ས་དབྱིབས་སུ་ཕྱག་བཏབ་པ་སྟེ། གནས་འདིའི་ཁོ་ར་ཁོར་ཡུག་གི་ཕྱོགས་རྣམས་ཐམས་ཅད་ནགས་ཚལ་གྱི་ཕྲེང་བས་ཡོངས་སུ་བསྐོར་ཅིང་ལོ་མ་དང་འབྲས་བུས་དུད་པའི་ལྗོན་ཤིང་སྣ་ཚོགས་པའི་ཚང་ཚིང་འཁྲིག་པ། གཡས་ཕྱོགས་ནས་བདུད་རྩིའི་ཆུ་ཕྲན་དལ་གྱིས་འབབ་པའི་སྒྲ་ལྷུང་ལྷུང་རྣ་བའི་བཅུད་དུ་སྙན་པར་འབབ་ཅིང་། འདབ་བརྒྱའི་མེ་ཏོག་གི་རྩི་བཅུད་ལ་རོལ་བའི་ཕྱེ་བ་མ་ལེབ་དང་བུང་བ་སོགས་ཀྱིས་གཤོག་པའི་སྒྱུ་རྩལ་ལ་བརྟེན་ནས་དགའ་བའི་བྲོ་གར་རྩེ་ཞིང་གླུ་དབྱངས་ལེན་པ། ཁུ་བྱུག་དང་། འཇོལ་མོ། རི་སྐེགས། མཐིང་རིལ་སོགས་རིགས་མི་གཅིག་པའི་འདབ་ཆགས་མང་པོས་འཕུར་ལྡིང་གི་གར་སྟབས་ངོམས་བཞིན་དབྱངས་བདུན་རྫོགས་པའི་མགྲིན་གླུ་གྱེར་བ། སྤུ་སྡུག་སྣ་ཚོགས་པའི་རི་སྐྱེས་སྲོག་ཆགས་ཤྭ་བ་དང་། དགོ་བ། གླ་བ། གཉན། ཤ་རྒྱ་སོགས་ཀྱང་བག་ཡངས་རྩེ་གར་གྱིས་དལ་བུར་རྒྱུ་བའི་རྣམ་འགྱུར་ངོམས་པ་བཅས། མདོར་ན་གནས་འདིར་སླེབ་པ་ཙམ་གྱིས་ཐ་མལ་བའི་སྐྱེ་བོ་དག་ཀྱང་རང་བཞིན་བབ་ཀྱི་བསམ་གཏན་ལ་ངང་གིས་གནས་པ་སོགས་སྒྲུབ་པའི་གནས་ཀྱི་ཡོན་ཏན་ཐམས་ཅད་མ་ཚང་བ་མེད་པ་དེ་ཉིད་དུ། གསང་ཆེན་ངེས་དོན་གླིང་གི་གཙུག་ལག་ཁང་ཉིས་ཐོག་ཅན་ཏོག་དང་ཐུག་ནག་གིས་མངོན་པར་མཛེས་ཤིང་། རྟེན་གྱི་གཙོ་བོ་གུ་རུ་སྣང་སྲིད་ཟིལ་གནོན་གྱི་སྐུ་བརྙན་གསུང་འབྱོན་མ་དང་། འཇུ་བླ་སངས་རྒྱས་འོད་ཟེར་སོགས་འཇའ་ལུས་པ་བཅུ་གསུམ་གྱི་སྐྲ་སེན་སྙིང་པོར་བྱས་པའི་ཤིང་གི་མཆོད་རྟེན་ཁྲུ་གང་བ་བཅུ་གསུམ། གཞན་ཡང་རྒྱ་གར་གྲུབ་ཆེན་བརྒྱད་ཅུ་དང་བོད་ཀྱི་རྗེ་འབངས་ཉེར་ལྔ་སོགས་བྲིས་འབུར་ལུགས་བླུགས་བྱས་པའི་སྐུ་གསུང་ཐུགས་རྟེན་མང་པོས་གང་བ། མཐའ་སྐོར་དུ་སྤྱོད་ལམ་བཞི་ཤོང་གི་ཚད་ཅན་གྱི་སྒྲུབ་གྲྭའི་དགེ་འདུན་པའི་བཞུགས་ཤག་དང་སྒོམ་ཁང་གིས་ར་བ་གྲུ་བཞིར་ཡོངས་སུ་འཁོར་བ། ནང་བཞུགས་བསམ་གཏན་པ་དག་གིས་རཏྣའི་ཕུར་པ་གཙོ་བོར་མཛད་པའི་ཡི་དམ་སོ་སོའི་བསྙེན་སྒྲུབ་དང་། རྫོགས་ཆེན་ཁྲེགས་ཆོད་ཐོད་རྒལ་གྱི་ཉམས་བཞེས་ལ་རྩེ་གཅིག་ཏུ་བརྩོན་པའི་ཐུན་བཞིའི་རྣལ་འབྱོར་ལས་ནམ་ཡང་མི་འདའ་བའི་ཁར། དབྱར་གནས་སོགས་གཞི་གསུམ་གྱི་ཕྱག་ལེན་དང་། ཉེར་ལྔ་ཚེས་བཅུའི་ཚོགས་མཆོད། རྒྱུན་གྱི་ཆོས་ཁྲིད་རྣམས་གཙུག་ལག་ཁང་དུ་ཐམས་ཅད་ལྷན་དུ་འཚོགས་པར་མཛད་ཅིང་། འགའ་ཞིག་ཚེ་དང་སྒྲུབ་པ་མཉམ་པའི་བུག་སྒོ་འདག་སྦྱར་གྱིས་སྙིང་པོའི་ཉམས་བཞེས་ལ་གནད་དུ་སྣུན་པར་མཛད་དོ། །གྲུབ་དབང་སྐུ་རབས་གསུམ་པ་དང་བཞི་པའི་དུས་སུ་འཇའ་ལུས་པ་འཇུ་བླ་སངས་རྒྱས་འོད་ཟེར་དང་། རྫོགས་ཆེན་བླ་མ་འཇིགས་མེད་སེང་གེ། རྡོ་གྲུབ་འཇིགས་མེད་ཕྲིན་ལས་འོད་ཟེར། ཀཿཐོག་བླ་མ་ཆོས་ལྡན། རྟོགས་པའི་དབང་ཕྱུག་ཤ་བཞི་དགེ་སློང་། ཨ་འཛི་དབོན་པོ་བློ་ལྡན། རྫ་མཚམས་པ་འཇིགས་མེད་རྒྱལ་བའི་མྱུ་གུ། འབར་ཆུང་བླ་མ་འཇིགས་མེད་གོ་ཆ་སོགས་ཉམས་རྟོགས་ཚད་དུ་འཁྱོལ་བ་མང་པོས་སྒྲུབ་གྲྭའི་མཁན་པོའམ་ཁྲིད་དཔོན་མཛད་ནས་ཀློང་ཆེན་མཛོད་བདུན་གྱི་བཤད་ཁྲིད་དང་། སྙིང་ཐིག་ཡ་བཞི། ཁྱད་པར་མཁའ་འགྲོ་སྙིང་ཐིག་ལ་རྩལ་འདོན་གྱི་ཁྲིད་སྦྱང་མཛད་པས་འཇའ་ལུས་སུ་དེངས་པ་བགྲངས་ཀྱིས་མི་ལང་པ་བྱོན། གྲུབ་དབང་སྐུ་རབས་ལྔ་པ་ནས་རྒྱུན་བཞུགས་མཚམས་པ་བཅུ་ཕྲག་གསུམ་དུ་སྤེལ་ཏེ་སྒྲུབ་ཁང་གསོལ་ཕོགས་སོགས་སྔར་ལས་གོང་འཕེལ་མཛད། དུས་དེར་མུ་ར་པདྨ་བདེ་ཆེན་བཟང་པོ་དང་། མཁན་དཀོན་མཆོག་ཡར་འཕེལ། མཁན་པོ་བློ་གྲོས་བཟང་པོ། མཁན་ཐུབ་བསྟན་དབང་གྲགས། མཁན་པོ་སྐུ་ཚ་རིག་འཛིན། མཁན་པོ་ཚེ་དབང་ཕུན་ཚོགས་སོགས་སྒྲུབ་སྡེའི་མཁན་པོ་མཁས་བཙུན་རྟོགས་པའི་དབང་ཕྱུག་དུ་མ་བྱོན་ཅིང་། དེ་དག་གི་ཐུགས་སྲས་ཞལ་སློབ་སྙིགས་མའི་སྐུ་གདུང་ཅུང་ཟད་ཀྱང་མ་ལུས་པར་འཇའ་ལུས་སུ་དེངས་པ་བླ་མ་ཀ་ཏའི་དང་། རྒྱ་ནག་བླ་མ། བླ་མ་ཨ་བཟང་། གཅོད་པ་པཎ་ཚེ། ཨ་སྒྲིས་ནོར་བུ་ཚེ་རིང་། སྐྱ་མོ་སྨན་ལྷ་ཡབ་སྲས། ཨ་བོའི་མགོན་རྒན་མ། དབོན་པོ་དབང་གྲགས། ཨ་གྲོའི་ཡེ་ཤེས་རྒྱ་མཚོ་སོགས་ཆོས་སྐུའི་རྒྱལ་སར་མངོན་སུམ་དུ་གཤེགས་པ་མང་དུ་བྱོན་ཅིང་། གཞན་ཡང་སྐུ་གདུང་ཁྲུ་གང་ཙམ་དུ་ཆུང་ངུར་གྱུར་པ་དང་། འཆི་བ་ལ་རང་དབང་ཡོད་པ། འཇའ་འོད་འཁྲིགས་ཤིང་རིང་བསྲེལ་གྱིས་ཆར་བབ་པ་སོགས་ཕྱི་ནང་གི་གྲོལ་རྟགས་མཐོང་ཆོས་སུ་བྱུང་བ་གྲངས་ཀྱིས་མི་ལང་པ་སྒྲུབ་སྡེ་འདི་ནས་བྱོན་པར་གྲགས་སོ། །དེ་ལས་ཐད་དུ་ཕྱིན་པའི་ཡར་འདབས་སུ་ངོས་བཞིར། ཐང་ཤིང་དང་། ནེའུ་གསིང་དང་། ཁྲུས་ཀྱི་རྫིང་བུ་རང་བཞིན་གྱིས་དྲོད་དང་ལྡན་པས་རྣམ་པར་མཛེས་ཤིང་། དལ་གྱིས་རྒྱུ་བའི་ཆུ་ཀླུང་གིས་ཕྱོགས་སོ་སོ་ནས་བསྐོར་བའི་པདྨ་རྒྱས་པའི་དགའ་ཚལ་ཞེས་གྲགས་པའི་མདུན་ཐང་ཆེན་མོ་རུ། དཔལ་ཨོ་ཊི་ཡ་ནའི་སློབ་དཔོན་ཆེན་པོ་པདྨ་འབྱུང་གནས་ཀྱིས་བདུད་རྩི་སྨན་གྱི་སྒྲུབ་པ་མཛད་ཅིང་། གྲུབ་པའི་དབང་ཕྱུག་མཁན་ཆེན་པདྨ་བཛྲ་གྱིས་བཀའ་བབ་བདུན་ལྡན་འཇམ་དབྱངས་མཁྱེན་བརྩེའི་དབང་པོ་དང་། མཁྱེན་བརྩེ་ཡེ་ཤེས་རྡོ་རྗེ། འཇམ་མགོན་མི་ཕམ་ཕྱོགས་ལས་རྣམ་རྒྱལ། རྡོ་གྲུབ་བསྟན་པའི་ཉི་མ། གཏེར་ཆེན་ལས་རབ་གླིང་པ། ཨ་འཛོམས་འབྲུག་སྤྲུལ་འགྲོ་འདུལ་དཔའ་བོ་རྡོ་རྗེ་སོགས་རྗེས་སུ་བཟུང་ནས་དབང་ཁྲིད་རྒྱུད་བཤད་བསྩལ་བའི་གདན་ས་སྒྲུབ་སྡེ་པདྨ་ཡང་རྫོང་འོད་གསལ་ཐེག་མཆོག་གླིང་ཞེས་ཡབ་རྗེ་གོང་མ་དག་གི་རྣམ་ཐར་དུ་གསལ་བ་དང་།རྒྱལ་ཡང་དར་གྱི་དུས་འདིར་བདག་ཅག་གི་སྐྱབས་རྗེ་བླ་མ་མཆོག་ནས་སླར་གསོ་རྒྱ་བསྐྱེད་སྐབས་གོང་ས་ཐམས་ཅད་མཁྱེན་པའི་ཞལ་སྔ་ནས་ལུང་རྟོགས་པདྨའི་དགའ་ཚལ་ཞེས་མཚན་དུ་བསྩལ་བའི་སྒྲུབ་སྡེ་དང་། དེ་ལས་གྱེན་དུ་ནགས་ཀྱི་འཕྲེད་ལམ་བརྒྱུད་དེ་ཅུང་ཟད་ཕྱིན་པའི་གཡས་ཕྱོགས་སུ་སྨན་བཙུན་ཚེ་རིང་མཆེད་ལྔས་སྲུང་ཞིང་སྨན་གྱི་འབྲས་བུ་བདུད་རྩིའི་བཅུད་དང་ལྡན་པས་གང་བའི་རང་བྱུང་གི་སྐྱེད་མོས་ཚལ། རྟོགས་པའི་དབང་ཕྱུག་བྱ་བྲལ་ཀུན་དགའ་དཔལ་ལྡན་དང་། མཁས་མཆོག་པདྨ་ཚེ་དབང་། མཁན་ཆེན་འཆི་མེད་ཡེ་ཤེས་སོགས་མཁས་གྲུབ་སྐྱེས་ཆེན་དུ་མས་རྒྱལ་བསྟན་བཤད་དང་སྒྲུབ་པས་སྤེལ་བའི་གདན་ས་ཚེ་རིང་ལྗོངས་ཞེས་གྲགས་པའི་དབེན་ཁྲོད་ཉམས་དགའ་བ་དང་། དེ་ལས་གཡས་ཕྱོགས་སུ་གྱེན་དུ་འཛེགས་པའི་རི་ངོས་ཐང་ཤིང་གི་ཚལ་རབ་ཏུ་སྟུག་པའི་ནགས་ཁྲོད་ན་ཚེ་རིང་སྒྲུབ་ཕུག་ཅེས་གྲགས་པའི་རང་བྱུང་རྡོ་ཡི་ཕུག་པ་ཉམས་དགའ་བ། རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་ལ་བཀྲ་ཤིས་ཚེ་རིང་མཆེད་ལྔས་ཞལ་གཟིགས་ཏེ་བ་མིན་གྱི་འོ་ཞོ་ཟོམ་གང་ཕུལ་བ་དང་། གྲུབ་བརྙེས་རིག་འཛིན་ཆེན་པོ་ཁྲག་འཐུང་བདུད་འཇོམས་རོལ་པ་རྩལ་དང་། འཕོ་ཆེན་རྡོ་རྗེའི་སྐུར་བཞེངས་མཁན་ཆེན་ཚེ་དབང་རིག་འཛིན། བདག་གི་རིགས་བདག་བླ་མ་རྟོགས་ལྡན་བློ་གྲོས་རྒྱ་མཚོ་སོགས་ཡུན་རིང་སྒྲུབ་པ་ལ་བཞུགས་ནས་གྲུབ་པའི་རྒྱལ་སར་གཤེགས་པའི་གདན་ས་དེ་ཉིད་དང་། དེ་ལས་ཀྱང་གྱེན་དུ་འཛེགས་པ་ན་ལྷུན་ཆགས་རྫ་བྲག་གི་བ་གམ་ཤིན་ཏུ་མཐོ་བའི་འདབས་མཚམས་སུ། སྟག་པ་དང་ལྕང་མ་སོགས་ལོ་འདབ་ཅན་གྱི་ལྗོན་ཤིང་གི་ལྕུགས་ཕྲན་གྱིས་རྣམ་པར་མཛེས་ཤིང་། ཤར་ཕྱོགས་ཉི་ཟླའི་འཆར་ལམ་ཡངས་ཤིང་དྭངས་པའི་རང་བྱུང་གི་བྲག་ཕུག་ངོ་མཚར་བ། དཔལ་སྤྲུལ་སེམས་དཔའ་ཆེན་པོ་འཇིགས་མེད་ཆོས་ཀྱི་དབང་པོས་འོད་གསལ་ཐོད་རྒལ་གྱི་རྣལ་འབྱོར་ལ་གནད་དུ་བསྣུན་པའི་སྒྲུབ་གནས་དཔལ་སྤྲུལ་ཕུག་པར་གྲགས་པ་བཅས་བཞུགས་པ་དང་། ཡང་ཚེ་རིང་ལྗོངས་ནས་གཡོན་ཕྱོགས་སུ་གྱེན་དུ་བགྲོད་པའི་རྫ་ཁྲོད་དུ་འཇིགས་བྱེད་དུས་དགྲའི་དབང་པོའི་ཕོ་བྲང་ངམ་རུ་དམ་གཤིན་རྗེ་སྒྲུབ་ཕུག་ཏུ་གྲགས་པ། རྡོ་གྲུབ་འཇིགས་མེད་ཕྲིན་ལས་འོད་ཟེར་ལ་འཇམ་དཔལ་གཤིན་རྗེ་གཤེད་ཀྱིས་ཞལ་གཟིགས་ཤིང་དྲག་སྔགས་ཀྱི་ཡིག་འབྲུ་བྲག་ངོས་སུ་གསལ་ལེར་རང་བྱོན་དུ་དོད་པ། དཔལ་སྤྲུལ་སེམས་དཔའ་ཆེན་པོ་དང་། མཁན་ཆེན་པདྨ་ཐེག་མཆོག་བློ་ལྡན་ནམ་ཨ་བུ་ལྷ་སྒང་རིན་པོ་ཆེ་རྣམ་གཉིས་ཡུན་རིང་སྒྲུབ་ལ་བཞུགས་པའི་ཕུག་པ་གོང་འོག །དེའི་ཡང་གོང་གི་གངས་ཁྲོད་ཤིན་ཏུ་མཐོ་བ་ན་གཡུ་འབྲུག་ནམ་མཁའ་རྫོང་ཞེས་འབྲུག་ཆོས་དབྱིངས་རོལ་པའི་རྡོ་རྗེའི་སྒྲུབ་ཕུག་ངོ་མཚར་ཅན་བཞུགས་པ་དང་། གཞན་ཡང་ཤྲཱི་སེང་ཆོས་གྲྭའི་ནུབ་ཕྱོགས་ཀྱི་རི་ངོགས་སུ་མི་ཕམ་སྒྲུབ་ཕུག་དང་། གླིང་བླའི་ཕུག་པ་སོགས་རང་བྱུང་གི་བྲག་སྐྱིབས་དུ་མས་གང་བ་དང་། ད་དུང་དེ་ལས་ཡར་ཕྱིན་པའི་ནགས་ཀྱི་མཐོང་ཉམས་དགའ་བར་འཇམ་མགོན་མི་ཕམ་རིན་པོ་ཆེ་ཡུན་རིང་བཞུགས་ཏེ་འཆད་རྩོམ་རྒྱ་ཆེར་གནང་བའི་དབེན་གནས་རུ་དམ་ནགས་ཆུང་རི་ཁྲོད་དུ་གྲགས་པའི་སྒྲུབ་ཕུག་དང་། དེའི་གཡས་ཕྱོགས་སུ་ཡར་ཕྱིན་པ་ན་དམ་ཅན་སྒང་གི་སྒྲུབ་ཕུག་གོང་འོག དེ་ལས་གྱེན་དུ་རིང་ཙམ་འཛེགས་པ་ན་སྒྲུབ་མཚོ་གོང་འོག་བར་གསུམ་དུ་གུ་རུའི་སྒྲུབ་ཕུག་དང་། དཔལ་སྤྲུལ་སྒྲུབ་ཕུག སྨྱོ་ཤུལ་ལུང་རྟོགས་ཀྱི་སྒྲུབ་ཕུག་སོགས་བྱིན་རླབས་ཅན་གྱི་སྒྲུབ་ཕུག་དུ་མ་དང་གཏེར་གནས་དང་རང་བྱོན་སྣ་ཚོགས་པས་གང་བ། དེ་མིན་མཁན་ཆེན་ཐུབ་བསྟན་སྙན་གྲགས་ཀྱི་གདན་ས་དཔྱལ་གྱི་བྲག་དཀར་གྱི་སྒྲུབ་སྡེ་དང་། མཁན་ཆེན་གཞན་དགའ་རིན་པོ་ཆེའི་གདན་ས་རྒྱལ་ཕུ་དང་གནས་ཕུ་སོགས་སྒྲུབ་གནས་ཆེ་ཕྲ་ཤིན་ཏུ་མང་ཞིང་། དེ་དག་ཏུ་སྒྲུབ་པའི་རྒྱལ་མཚན་བཙུགས་ནས་ཚེ་དང་སྒྲུབ་པ་སྙོམས་པ་དེ་བས་ཀྱང་མང་ལ། དགེ་བའི་བཤེས་གཉེན་དེ་རྣམས་ཀྱིས་མདོ་སྔགས་ཀྱི་འཆད་སྤེལ་དང་མན་ངག་ཟབ་ཁྲིད་བསྩལ་བའི་སློབ་ཚོགས་ཀྱི་འདུ་བ་གནའ་བོའི་དུས་སུ་བསམ་གྱིས་མི་ཁྱབ་སྟེ། རུ་དམ་ལུང་དུ་དུས་བཞི་ཆགས་མེད་དུ་ཉིན་བཞིན་ཆོས་དུང་བཅུ་ཕྲག་ཁ་ཤས་ཐོས་པ་རྒྱུན་མི་ཆད་ཅིང་གཉུག་མར་གནས་པའི་དགེ་འདུན་གྱི་ཞལ་གྲངས་ལས་ཀྱང་ཕྱོགས་འདུས་སློབ་ཚོགས་ཀྱིས་མང་བར་གྲགས་སོ། །
སྨྲས་པ།
ཨེ་མ་སྣོད་ཀྱི་བཀོད་པ་མཐའ་ཡས་པ། །མ་ཚང་མེད་པས་བརྒྱན་པའི་གནས་འདི་རུ། །གསང་ཆེན་ཆོས་ཀྱི་གན་མཛོད་ཨོ་ཊའི་ཡུལ། །ས་ལ་འཕོས་འདྲའི་བསམ་གཏན་ཆོས་གླིང་བརྗིད། །དེ་ལས་རྒྱང་གྲགས་བརྒལ་བའི་ས་ཕྱོགས་སུ། །སྨྲ་བའི་ལྗགས་སམ་ཤེས་རབ་རལ་གྲི་ཡི། །གཟུགས་སུ་དོད་པ་དཔལ་གྱི་སེང་གེའི་རིར། །གངས་ལྗོངས་མཁས་པ་འབྱུང་བའི་ཆོས་གྲྭ་མཛེས། །ད་དུང་གྱེན་དུ་བགྲོད་པའི་རི་ཡི་ངོགས། །ཡིད་འོང་ནགས་ཀྱི་མཐོངས་ཀ་ཉམས་དགའ་བ། །སྒོམ་ཆེན་མཉམ་པར་བཞག་འདྲའི་པང་མདུན་དུ། །འོག་མིན་མཐའ་སྤྱོད་དོན་གྱི་སྒྲུབ་སྡེ་ཆགས། །གཞན་ཡང་འདབ་བརྒྱད་ས་ཡི་དཀྱིལ་འཁོར་ནི། །ངོ་མཚར་པད་མ་རྒྱས་འདྲའི་ལྟེ་བ་རུ། །འོད་གསལ་ཐེག་པ་མཆོག་གི་ཆོས་ཀྱི་གླིང་། །ཟབ་གསང་རྫོགས་ཆེན་སྒོམ་པའི་སྡེ་གྲྭ་རྒྱས། །བསྟན་པའི་འབྱུང་གནས་ཆོས་ཀྱི་སྡེ་འདི་ལས། །འོངས་པའི་བཤད་དང་སྒྲུབ་པའི་བདུད་རྩིའི་རྒྱུན། །འཛད་པ་མེད་པར་ཕྱོགས་སུ་བབ་པ་ཡིས། །ཐུབ་བསྟན་པད་ཚལ་བསྐྱངས་པའི་མཐའ་མ་རིགས། །སྣ་ཚོགས་ཤེས་བྱའི་གེ་སར་ཟིལ་དངར་ལ། །ཆགས་པའི་བློ་གསལ་སྐལ་བཟང་རྐང་དྲུག་ཁྱུ། །ཕྲ་ཞིབ་རིགས་པའི་སྦྲང་རྩིས་རབ་མྱོས་ཏེ། །ལྔ་རིག་དགའ་བའི་ཚལ་འདིར་ཅིར་ཡང་ལྡིང་། །ཐུབ་ཚུལ་དྲི་མ་མེད་པའི་རིང་ལུགས་ཀྱི། །བསྟན་པའི་སྙིང་པོ་རྣམ་དག་བསླབ་པའི་ཁྲིམས། །ཕྲ་རགས་ཉེས་ལྟུང་དྲི་མས་མ་གོས་པའི། །འདུལ་འཛིན་གསེར་རིའི་ཕྲེང་བ་ཚར་དུ་དངར། །དྲན་དང་ཤེས་བཞིན་བག་ཡོད་མཆོག་བརྙེས་པས། །སྒོ་གསུམ་ཞི་ཞིང་དུལ་བའི་སྤྱོད་པ་ཅན། །མཐོང་ན་མི་མཐུན་མེད་པ་ཚངས་སྤྱོད་གཟུགས། །བསླབ་གསུམ་རྒྱན་དུ་འཆང་བའི་འདུས་ཚོགས་རྒྱས། །རྒྱལ་བསྟན་ལུང་རྟོགས་བསྟན་པའི་བ་དན་དཀར། །ལུང་རིགས་དཔུང་པ་དར་མས་སྲིད་པའི་རྩེར། །བསྒྲེངས་པར་འཇིགས་བྲལ་སྙིང་སྟོབས་རྡོ་རྗེའི་སྲོག །གཅིག་ཏུ་བརྟན་པའི་བློ་གསལ་ན་གཞོན་མང་། །ཤིན་ཏུ་ཐེག་རྩེ་ཨ་ཏིའི་མན་ངག་གིས། །གསོས་པའི་གྲུབ་རིག་ཁྱུང་ཕྲུག་དར་མའི་ཁྱུ། །ཉམས་རྟོགས་གཤོག་རྩལ་རྒྱས་པའི་རོལ་རྩེད་ཀྱིས། །ཆོས་སྐུ་མཁའ་དབྱིངས་གཤེགས་པ་བགྲང་ལས་འདས། །སྟོང་གསལ་འགྱུར་བ་མེད་པ་སེམས་ཀྱི་གཤིས། །མཐའ་བྲལ་ཀློང་ཡངས་ལྟ་བའི་གདེང་ཆེན་གྱིས། །མ་བཅོས་ཅོག་བཞག་དགོངས་པའི་རྩལ་རྫོགས་པའི། །བྱར་མེད་རྒྱ་གྲོལ་ནམ་མཁའི་རྣལ་འབྱོར་མང་། །རྨད་བྱུང་གསང་ཆེན་སྙིང་པོའི་རིང་ལུགས་ཀྱི། །བསྟན་པའི་ཆུ་འགོ་གྲུབ་དབང་རྫོགས་ཆེན་པའི། །ཆོས་སྲིད་མངའ་ཐང་རྒྱས་པའི་གྲགས་པ་དཀར། །གླིང་བཞིའི་ཁྱོན་ན་གཡོ་བ་ད་ཙམ་མིན། །
ཞེས་བྱ་བ་ནི་བཤད་སྒྲུབ་དགོན་གསུམ་གྱི་ཆོས་སྡེ་ཆེན་མོ་དག་ཇི་ལྟར་དར་རྒྱས་སུ་བཞུགས་པའི་ཚུལ་མདོ་ཙམ་བཤད་པའི་སྐབས་ཀྱི་ངལ་གསོ་བའི་ཚིགས་སུ་བཅད་པའི་ཕྲེང་བའོ། །
སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། གདན་ས་ཆོས་སྡེའི་ཆེ་བ་བཤད་སྒྲུབ་དགོན་གསུམ་གྱི་ཆོས་སྡེ་ཇི་ལྟར་དར་རྒྱས་སུ་བཞུགས་ཚུལ་མདོ་ཙམ་བཤད་པ་སྟེ་སརྒ་བཅུ་གཅིག་པ་རྫོགས་སོ།། །།