ལྔ་བ་དགེ་སློང་མ་ལ་གོས་ལེན་པའི་སྤང་པ་འཆད་པ།

ལྔ་བ་དགེ་སློང་མ་ལ་གོས་ལེན་པའི་སྤང་པ་འཆད་པ་ལ།

བསླབ་པར་བྱ་བ་དང་ལྟུང་བ་རྣམ་གཞག་དང་གཉིས། དང་པོ་ནི། རྩ་བར། དགེ་སློང་མས་གོས་རིན་ཆེན་པོ་བརྗེ་བའི་ཕྱིར་བླང་བར་བྱའོ། །ཞེས་སོགས་སོ། །དགེ་སློང་མས་གོས་རིན་ཆེན་པོ་ཀར་ཤ་པ་ན་ཉི་ཤུ་ཡན་ཆད་རི་བ་ཡང་གཞན་དང་བཟང་ངན་བརྗེ་བའི་ཕྱིར་བླང་བར་བྱའོ། །འདི་ནི་གོས་ལྕི་བ་རྟེན་པའི་སྦྱོར་བའི་ཉེས་པར་འགྱུར་རམ་སྙམ་དུ་དོགས་པ་བཅད་པའོ། །དགེ་སློང་གིས་དགེ་སློང་མ་དང་ལྷན་ཅིག་གོས་བཟང་ངན་བརྗེ་བར་བྱའོ། །འདི་ནི་རྒྱལ་མཚན་བརྗེ་བའི་ཉེས་པར་འགྱུར་རམ་སྙམ་པ་དང་གོས་ལེན་པའི་ཉེས་པར་འགྱུར་རམ་སྙམ་དུ་དོགས་པ་བཅད་པའོ། །གཉིས་པ་ལྟུང་བ་རྣམ་གཞག་ནི། རྩ་བར། ལེན་ནའོ། །རྣམ་པར་རིག་བྱེད་ཀྱིས་སོ། །གོས་སོ། །ཞེས་སོ། །འདིའི་དོན་ལ་བཞི་ལས། དང་པོ་གླེང་གཞི་ནི་ཡུལ་མཉན་ཡོད་དུ་གང་ཟག་ཉེ་དགས་ཉོན་མོངས་པ་འདོད་ཞེན་གྱིས་ཉེས་པ་ཨུད་པ་ལའི་མདོག་ལ་གོས་བསླངས་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི། ཆགས་པས་རྒྱུ་བྱས་ཏེ་རང་རིགས་ཀྱི་བསླབ་པ་ལ་གནོད་པའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་གོས་བླངས་ཏེ་ཐོབ་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གསུམ་སྟེ་གང་ལ་བསླང་བའི་ཡུལ་དང༌། གང་བསླང་བའི་དངོས་པོ་དང༌། གང་གིས་ལེན་པའི་རྟེན་ནོ། །དང་པོ་ནི་དགེ་སློང་མ་ཆོས་བརྒྱད་ལྡན་ཏེ། འཁྲུར་འཇུག་གི་སྐབས་སུ་སྔར་བཤད་པའི་ཐུན་མོང་བ་བདུན་གྱི་སྟེང་དུ་དད་པ་དང་སེམས་ཡངས་ཆེ་བ་མ་ཡིན་པའོ། །