གཉིས་པ་གང་བསླང་བའི་དངོས་པོ་ལ་ལྔ།

གཉིས་པ་གང་བསླང་བའི་དངོས་པོ་ལ་ལྔ་ལས།

གོས་ཡིན་པ་སྟེ། གོས་སོ། །ཞེས་སོ། །དགེ་སློང་མ་དེ་ཉིད་ཀྱི་ཡིན་པ་སྟེ། ལུང་རྣམ་འབྱེད་ལས། དགེ་སློང་མ་ལ་གོས་ལེན་ན། ཞེས་དང༌། གཞན་དབང་བ་ཡིན་ན་དེ་དགེ་སློང་མ་དེ་ལ་ལེན་པ་འབྱུང་རིང་བས་དགག་བྱ་གནས་སྐབས་ཀྱི་སྒོ་ནས་མི་རྫོགས་པའི་ཕྱིར་རོ། །དགེ་སློང་མ་དེ་དང་འབྲེལ་བར་གནས་པ་སྟེ། རྩ་བར། ཉེ་བར་མ་གྱུར་པ་ནོད་པ་ནི་སྦྱོར་ན་ཉིད་དོ། །ཞེས་དང༌། གཞན་དུ་དགག་བྱ་མི་རྫོགས་པའི་ཕྱིར་རོ། །རུང་བ་དང་ཚད་དང་ལྡན་པ་ནི་སྤྱིར་བསྟན་པ་ལས་སོ། །གསུམ་པ་གང་གིས་ལེན་པའི་རྟེན་ལ་བཞི་སྟེ། དགེ་འདུན་ལ་གོས་འབུལ་བའི་ཁོངས་སུ་གཏོགས་པ་མ་ཡིན་པ་དང༌། ཆོས་ལེགས་པར་སྨྲ་བ་པོ་མ་ཡིན་པ་དང༌། བསྙེན་པར་རྫོགས་པར་བྱེད་པ་པོ་མ་ཡིན་པ་དང༌། ཆོས་གོས་ཚང་བར་ཡོད་པའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་བཟང་ངན་བརྗེ་བ་ལས་གཞན་པས་རང་དོན་དུ་གོས་ལེན་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི། ངག་གི་རིག་བྱེད་ཀྱིས་གོས་ལེན་པར་ཞུགས་པ་སྟེ། རྩ་བར། རྣམ་པར་རིག་བྱེད་ཀྱིས་སོ། །ཞེས་སོ། །བཞི་བ་མཐར་ཐུག་ནི། ཐོབ་བློ་སྐྱེས་པ་སྟེ། རྩ་བར། ལག་ཏུ་འོངས་པ་ཉིད་ན་ཐོབ་པ་ཉིད་དོ། །ཞེས་དང༌། ཊཱི་ཀ་ལས། དོན་ལ་གྲུབ་པའི་བློ་སྐྱེ་བས། ཞེས་སོ། །