དྲུག་པ་ཁྱིམ་པ་ལ་གོས་སློང་བའི་སྤང་བ་འཆད་པ།

དྲུག་པ་ཁྱིམ་པ་ལ་གོས་སློང་བའི་སྤང་བ་འཆད་པ་ལ།

རྩ་བར། དེ་མིའི་འགྲོ་བར་གཏོགས་པ་ཞེས་པ་ནས། རིན་ཐང་དང་ཁ་དོག་དང་ཁྲུ་ཚད་ལས་རྣམ་པ་གང་བསླངས་པའོ། །གཞན་ལ་ནི་ལྟུང་བ་མེད་དོ། །རས་མ་དང་ཁ་ཚར་དག་སློང་ནའོ། །རྒྱུ་དང་སྤུན་ལ་ནི་ན་སྨད་པ་ཉིད་དོ། །དེའི་རང་བཞིན་ནི་དེ་དང་འདྲའོ། །སློང་བའི་སྤང་བའོ། །ཞེས་སོ། །འདིའི་དོན་ལ་བཞི་ལས། དང་པོ་གླེང་གཞི་ནི་ཡུལ་མཉན་ཡོད་དུ་གང་ཟག་ཉེ་དགས་ཉོན་མོངས་པ་འདོད་ཞེན་གྱིས་ཉེས་པ་ཁྱིམ་པ་ལ་གོས་བླངས་པ་ལས་སྤང་བའི་ལྟུང་བྱེད་དུ་བཅས་སོ། །

གཉིས་པ་དགག་བྱ་ནི།

གཞན་གྱི་ལོངས་སྤྱོད་ལ་གནོད་པ་དང༌། རང་འདོད་པ་ཆེས་པའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་རང་ལ་ཆོས་གོས་ཚང་བ་ཡོད་བཞིན་དུ་ཁྱིམ་པ་ཉེ་དུ་མ་ཡིན་པ་ལ་གོས་བླངས་ཏེ་ཐོབ་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ། གང་ལ་བསླང་བའི་ཡུལ་དང༌། གང་བསླང་བའི་དངོས་པོ་དང༌། གང་གིས་བསླང་བའི་རྟེན་དང་གསུམ། དང་པོ་ནི་ཁྱིམ་པ་ཆོས་དྲུག་ལྡན་ནོ། །དེ་ཡང་ཁྱིམ་པ་ཡིན་པ་དང༌། ཉེ་དུ་མ་ཡིན་པ་དང༌། རང་ལས་རྫས་ཀྱི་སྒོ་ནས་ཐ་དད་པ་དང༌། མ་བསླངས་ཀྱང་ཅི་བདེར་སྟོབས་པ་མ་ཡིན་པ་སྟེ་བཞི་དང༌། ཐ་སྙད་ལྔ་ལྡན་དང༌། ལུས་ཐ་མལ་པར་གནས་པ་གཉིས་ནི་སྔར་བསྟན་ཟིན་པ་ལྟར་རོ། །སྐབས་འདིར་མཚོ་མཆན་ལས། ཁྱིམ་པ་ཞེས་ནི་རབ་ཏུ་བྱུང་བ་རྣམ་གཉིས་ཀྱི་ཆ་ལུགས་དང་སྡོམ་པ་གང་ཡང་མི་ལྡན་པ་ནི་ཁྱིམ་པ་སྟེ་ཆུང་མ་བླངས་པ་ཁོ་ནས་ཁྱད་པར་དུ་བྱས་པ་ནི་མ་ཡིན་ནོ། །ཞེས་སྤྱིར་བསྟན་གྱི་སྐབས་སུ་བསྟན་ཏོ། །དམིགས་བསལ་ནི་རབ་ཏུ་བྱུང་བ་རྣམ་གཉིས་ཀྱི་རྟགས་སྡོམ་གང་དང་ཡང་མི་ལྡན་ཡང་རབ་ཏུ་བྱུང་ན་བར་མ་ཁོ་ན་དང་ལྡན་ན་ནི་སྒྲེན་མོར་གནས་པ་ཡང་ཁྱིམ་པ་མ་ཡིན་ནོ། །དགེ་སློང་ཕམ་པས་སྡོམ་པ་མ་བཏང་བ་དེ་གོས་དཀར་པོ་གོན་ཞིང་ཆུང་མ་བླངས་ན་ཡང་ཁྱིམ་པ་མཚན་ཉིད་པ་ཡིན་པར་མི་རིགས་ཏེ། དགེ་སློང་གི་སྡོམ་པ་དང་ལྡན་པའི་ཕྱིར་རོ། །ཞེས་གསུངས་པ་ལ་དཔྱད་པར་བྱའོ། །སེལ་བ་ནི། ཕྱི་རོལ་པའི་རབ་ཏུ་བྱུང་བ་དང་མ་ཆགས་པ་དང་ཉམས་པ་དག་ནི་ཕྱེད་ཉིད་ཁྱིམ་པའོ་ཞེས་གསུངས་པས། དེ་རྣམས་ལ་གོས་བསླངས་ན་ནི་ན་སྨད་དུ་འགྱུར་ལ། དགེ་སློང་ཕ་མ་རྣམ་དག་ལ་བསླངས་ན་ཆེས་ན་སྨད་དུ་འགྱུར་ཏེ། དགག་བྱ་ཆེས་མ་རྫོགས་པའི་ཕྱིར་རོ། །གཉིས་པ་གང་བསླང་བའི་དངོས་པོ་ལ་བཞི་ལས། གོས་ཡིན་པ་སྟེ། རྩ་བར། ཆོས་གོས་སོ། །ཞེས་སོ། །སྦྱིན་བདག་དེ་ཉིད་ཀྱི་ཡིན་པ་སྟེ། སྦྱིན་བདག་དེ་ཉིད་དབང་བའི་གོས་དང་གཞན་དབང་བའི་གོས་ནོར་ཏེ་བསླངས་ན་ལྟུང་བ་ན་སྨད་དུ་འགྱུར་བའི་ཕྱིར་རོ། །རུང་བ་ཚད་དང་ལྡན་པའོ། །ཊཱི་ཀ་ལས། མི་ཆུང་བའོ་ཞེས་སྨྲས་ཏེ་ཆོས་གོས་རང་གི་ཚད་དང་ལྡན་པའོ། །ཞེས་གསུངས་ཀྱང༌། རང་ཚད་དང་ལྡན་པ་དེ་ནི་མཚོན་པ་ཙམ་སྟེ། ཁྲུ་གང་གི་ཚད་ལས་མི་ཆུང་བའོ། །འགྲེལ་ཆུང་ལས། ཁྲུ་གང་ཡན་ཆད་ཡིན་པ་དང་ཞེས་བཤད་པ་དེ་ངེས་པར་གཟུང་བར་བྱའོ། །རིན་ཕྲེང་དུ་རང་ཚད་དང་ལྡན་དགོས་པར་གསུངས་ཀྱང་འདུལ་འཛིན་གྱིས་སྤྱི་ཚད་ཁྲུ་གང་དང་ལྡན་དགོས་པར་གསུངས་སོ། །རིན་ཐང་ལས་རྣམ་པ་གང་བསླངས་པ་དེ་ཐོབ་ནའོ་ཞེས་པ་ནི། རིན་ཐང་ཀར་ཤ་པ་ན་ལྔ་རི་བ་བསླངས་ནས་བཅུ་རི་པོ་ཐོབ་ན་དངོས་གཞིར་མི་འགྱུར་གྱི་ལྔ་རི་བ་དེ་ཐོབ་ན་དངོས་གཞི་དང༌། ཀར་ཤ་པ་ན་གསུམ་རི་བ་བསླངས་ནས་གསུམ་རི་བ་དེ་ཐོབ་ན་དངོས་གཞི་དང༌། ཀར་ཤ་པ་ན་བཅུ་རི་བ་བསླངས་ནས་བཅུ་རི་བ་དེ་ཐོབ་ན་དངོས་གཞིའོ། །ཁ་དོག་ལས་རྣམ་པ་གང་བསླངས་པ་དེ་ཐོབ་ནའོ་ཞེས་པ་ནི་ཁ་དོག་སྔོན་པོ་བསླངས་ནས་སེར་པོ་ཐོབ་པ་ནི་དངོས་གཞིར་མི་འགྱུར་གྱི་སྔོན་པོ་དེ་ཐོབ་ན་དངོས་གཞིར་འགྱུར་བ་ལྟ་བུ་ཡིན་ནོ། །ཁྲུ་ཚད་ལས་རྣམ་པ་གང་བསླངས་པ་དེ་ཐོབ་ནའོ་ཞེས་པ་ནི། ཁྲུ་ལྔ་པ་བསླངས་ནས་ཁྲུ་བཅུ་པ་ཐོབ་པ་ནི་དངོས་གཞིར་མི་འགྱུར་གྱི་ཁྲུ་ལྔ་པ་དེ་ཐོབ་ན་དངོས་གཞིའོ། །ཊཱི་ཀ་ལས། ཁ་དོག་ལ་སོགས་པའི་དབྱེ་བ་མ་བྱས་པར་སྤྱིར་བསླངས་པ་ན་གང་ཡང་རུང་བ་ཞིག་ཐོབ་ན་ཡང་སྤང་བའི་ལྟུང་བྱེད་དོ། །ཞེས་སོ། །རྣམ་འབྱེད་འགྲེལ་བ་ལས། ལྷག་པ་ཐོབ་ན་ལྟུང་བ་མེད་དོ་ཞེས་བྱ་བ་ནི། ལྷག་པ་མ་བསླངས་པའི་ཕྱིར། ཞེས་སོ། །གསུམ་པ་གང་གིས་སློང་བའི་རྟེན་ནི། སྲ་བརྐྱང་མ་བཏིང་བ་དང༌།ཆོས་གོས་ཚང་བར་ཡོད་པ་སྟེ། རྩ་བར། སྲ་བརྐྱང་བཏིང་ན་གོས་སློང་བ་ཡང་ཉེས་པ་མེད་ལ། ཞེས་དང༌། གོས་འཕྲོགས་པ་དང་བརླག་པ་དང་ཚིག་པ་དང་རླུང་གིས་ཁྱེར་བ་དང་ཆུས་ཁྱེར་བར་མ་གྱུར་པ་ལའོ། །ཞེས་གསུངས་སོ། །