གཅིག ལུགས་གཉིས་ཆོས་སྲིད་ཀྱི་མངའ་བདག་བསྟན་བདག་གདན་རབས་རིམ་བྱོན་གྱི་རྟོགས་པ་བརྗོད་པ།

གསུམ་པ་བསྟན་འཛིན་སྐྱེས་བུའི་ཆེ་བ་གདན་རབས་ཆོས་བརྒྱུད་དང་བཅས་པའི་བྱུང་བ་དངོས་བརྗོད་པ་ལ།

ལུགས་གཉིས་ཆོས་སྲིད་ཀྱི་མངའ་བདག་བསྟན་བདག་གདན་རབས་རིམ་བྱོན་གྱི་རྟོགས་པ་བརྗོད་པ་དང་། བཤད་སྒྲུབ་བསྟན་པའི་སྲོག་འཛིན་མཁན་རབས་ནོར་བུའི་ཕྲེང་བ་ཚར་དུ་དངར་བ་དག་གི་རྣམ་ཐར་བཤད་པ། སློབ་བརྒྱུད་དམ་པའི་སྐྱེས་ཆེན་མཁས་བཙུན་གྲུབ་པའི་དབང་ཕྱུག་ཇི་ལྟར་བྱོན་ཚུལ་བསྟན་པ་སྟེ་གསུམ་ལས།

དང་པོ་ནི། གདན་རབས་དང་པོ། བསྟན་པའི་བདག་པོ་གྲུབ་དབང་རྫོགས་ཆེན་པ་སྐུ་ཕྲེང་དང་པོ་པདྨ་རིག་འཛིན་ནི།

དེ་ཡང་འོད་གསལ་གསང་བ་སྙིང་ཐིག་གི་བསྟན་པ་རིན་པོ་ཆེ་མདོ་ཁམས་སྨད་ཀྱི་ལྗོངས་སུ་ཐོག་མར་འདྲེན་པའི་ཤིང་རྟ་ཆེན་པོ་གྲུབ་པའི་དབང་ཕྱུག་རྫོགས་ཆེན་པདྨ་རིག་འཛིན་ཞེས་མཚན་སྙན་གྱི་གྲགས་དཀར་སྲིད་པ་གསུམ་ན་གཡོ་བ་གང་ཉིད་ངེས་པ་དོན་གྱི་དབང་དུ་ན། བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོས་བསྐལ་པ་བཟང་པོ་འདི་ཡི་གོང་རོལ་དུ་བྱང་ཆུབ་མཆོག་ཏུ་ཐུགས་བསྐྱེད་པ་ནས། བྱང་ཆུབ་ཀྱི་སྤྱོད་པ་རླབས་པོ་ཆེ་ལ་གྲངས་མེད་གསུམ་དུ་བསླབ་པའི་དང་པོར་སངས་རྒྱས་བདུན་ཁྲི་ལྔ་སྟོང་བསྙེན་བཀུར་པའི་ཐ་མར་བྱོན་པ། བདེ་གཤེགས་རྒྱལ་བ་རིན་ཆེན་གཙུག་ཏོར་ཅན་ཞེས་སེམས་ཅན་འཆི་ཁ་མའི་རྣ་བར་མཚན་ཙམ་བསྒྲགས་པས་ཀྱང་། གནས་ངན་ལེན་གྱི་སྐྱེ་སྒོ་གཏན་དུ་བཅད་དེ་རྣམ་པར་གྲོལ་བའི་གོ་འཕང་མཆོག་ལ་དབུགས་འབྱིན་པར་མཛད་པའི་ཐུགས་བསྐྱེད་དང་སྨོན་ལམ་གྱི་མཐུ་ཟབ་མོ་སངས་རྒྱས་གཞན་ལས་རྨད་དུ་བྱུང་བ་དེ་ཉིད་དུ་མངོན་པར་རྫོགས་པར་སངས་རྒྱས་སུ་ཟིན་ཀྱང་། ཇི་སྐད་དུ། ཡབ་སྲས་མཇལ་པའི་མདོ་ལས། དཔའ་བོ་ཆེན་པོ་ཐབས་མཁས་ཏེ། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་དུ་ཡང་འདྲེན་པ་ཁྱེད། །སངས་རྒྱས་མང་པོར་བསྟན་པར་མཛད། །ཅེས་དང་། ཕལ་པོ་ཆེ་ལས། ཇི་ལྟར་སེམས་ཅན་བསམ་པ་བཞིན། །ཚད་མེད་པར་ནི་རབ་ཏུ་སྣང་། །ཞེས་གསུངས་པ་ལྟར། མཐའ་ཡས་པའི་འགྲོ་བར་བརྩེ་བའི་སྙིང་རྗེའི་འཇུག་པ་ཚད་མེད་པས་དག་ཆེན་ཡེ་ཤེས་ཀྱི་རོལ་གར་བསམ་མི་ཁྱབ་པ་འབྱམས་སུ་ཀླས་པ་ལས། བསྐལ་བཟང་རྣམ་འདྲེན་བཞི་པའི་བསྟན་པ་རིན་པོ་ཆེ་འདི་ལ་ཟབ་གསང་རྫོགས་པ་ཆེན་པོའི་ཉེ་ལམ་ནས་གདུལ་བྱ་མཆོག་གི་རིགས་ཅན་དག་རྣམ་པར་གྲོལ་བའི་ས་ལ་འགོད་ཕྱིར་འཕགས་བོད་ཀྱི་ཡུལ་གྲུར་མཁས་དང་གྲུབ་པའི་རྣམ་རོལ་དུ་ཇི་ལྟར་བྱོན་པའི་ཚུལ་རྗེ་ཉིད་ཀྱི་ཞལ་གསུང་དང་། ཚད་མར་གྱུར་པའི་གཏེར་ལུང་དག་ལས་ཇི་སྐད་བསྟན་པའི་ཚུལ་ནི། རྒྱ་གར་འཕགས་པའི་ཡུལ་དུ་གྲུབ་བརྒྱའི་སྤྱི་མེས་དཔལ་ས་ར་ཧའམ་མདའ་སྣུན་རྗེ་དང་། གསང་རྒྱུད་རྒྱ་མཚོའི་མངའ་བདག་གྲུབ་ཆེན་ཀུ་ཀུ་རི་པ། འཇའ་ལུས་འཕོ་བ་ཆེན་པོའི་སྐུར་བཞེངས་པཎ་ཆེན་དྲི་མེད་བཤེས་གཉེན། བརྟུལ་ཞུགས་སྤྱོད་པའི་རྣལ་འབྱོར་ལྭ་བ་པ་དང་ཕག་ཚང་པ་སོགས་གྲུབ་པའི་དབང་ཕྱུག་ཆེན་པོ་རྣམས་དང་། གངས་ཅན་བོད་ཀྱི་ཡུལ་དུ་བསྟན་པ་སྔ་དར་གྱི་སྐབས་སུ། ཨོ་རྒྱན་ཆེན་པོའི་ཐུགས་སྲས་མཐུ་སྟོབས་ནུས་པའི་མངའ་བདག་ལང་གྲོ་དཀོན་མཆོག་འབྱུང་གནས། དྲག་པོ་མངོན་སྤྱོད་ཀྱི་ནུས་པས་ལྷ་སྲིན་བྲན་དུ་འཁོལ་བ་གླང་ཆེན་དཔལ་གྱི་སེང་གེ །སྤྲུལ་པའི་ཆོས་རྒྱལ་ཆེན་པོ་མངའ་བདག་ཁྲི་རལ་པ་ཅན་སོགས་དང་། རྒྱལ་བསྟན་ཕྱི་དར་གྱི་དུས་སུ། རྗེ་བཙུན་བཞད་པ་རྡོ་རྗེའི་ཐུགས་སྲས་དམ་པ་རས་ཆུང་རྡོ་རྗེ་གྲགས་པ་དང་། སྙན་བརྒྱུད་གདམས་པའི་སྲོལ་འཛིན་ངན་རྫོང་སྟོན་པ་བྷོ་དྷི་ར་ཛ། སྒྲུབ་བརྒྱུད་བསྟན་པའི་ཤིང་རྟ་ཀརྨ་པ་དུས་གསུམ་མཁྱེན་པ། སྣང་སྲིད་ཆོས་སྐུར་གྲོལ་པ་རྗེ་བཙུན་སྟག་ལུང་ཐང་པ། རྟོགས་པའི་དབང་ཕྱུག་གྲུབ་ཐོབ་གླིང་རྗེ་རས་པ། བརྟུལ་ཞུགས་སྤྱོད་པས་མྱོས་པ་གྲུབ་ཆེན་ཨོ་རྒྱན་པ། འཇམ་དཔལ་དབྱངས་དངོས་ཐམས་ཅད་མཁྱེན་པ་རྗེ་བློ་བཟང་གྲགས་པའི་དཔལ་སོགས་ཁམས་དབང་སྣ་ཚོགས་པའི་གདུལ་བྱའི་སྣང་ངོར་སྤྲུལ་པའི་སྐྱེ་རྒྱུད་ཇི་སྙེད་ཅིག་བྱོན་ཅིང་། དེ་ལྟར་སྒྱུ་འཕྲུལ་གྱི་རོལ་པ་ཚད་མེད་པ་རྟག་ཁྱབ་ལྷུན་གྲུབ་ཏུ་འབྱུང་བ་ནི་རྒྱལ་བ་རྣམས་ཀྱི་ཆོས་ཉིད་ལས་ཚུར་མཐོང་གིས་རིམ་དང་ཅིག་ཅར་གཅིག་དང་ཐ་དད་སོགས་སུ་དཔྱད་པ་ནི་གནས་མ་ཡིན་ཏེ། མདོ་སྡེ་ཕལ་པོ་ཆེ་ལས། ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང་། །ཟླ་བ་གཉིས་སུ་གྱུར་པ་མེད། །སངས་རྒྱས་ལ་ནི་གཉིས་སྣང་མེད། །འདི་ལ་གཅིག་ཀྱང་ཡོད་མ་ཡིན། །སྐུ་ནི་གཉིས་སམ་གསུམ་དུ་མེད། །ཇི་ལྟར་སེམས་ཅན་བསམ་པ་བཞིན། །ཚད་མེད་པར་ནི་རབ་ཏུ་སྣང་། །ཞེས་དང་། རྒྱུད་བླ་མ་ལས། གང་ཕྱིར་གདུལ་བྱ་དག་པ་ཡི། །ཆུ་ཡི་སྣོད་ནི་ཐམས་ཅད་ལ། །བདེ་གཤེགས་ཉི་མའི་གཟུགས་བརྙན་ནི། །དཔག་ཏུ་མེད་པ་གཅིག་ཅར་འཆར། །ཞེས་པ་ལྟར་ལ། དེ་ལས་སྙིགས་མའི་དུས་འདིར། འོད་གསལ་རྫོགས་པ་ཆེན་པོའི་བསྟན་པ་གཞིར་བཞེངས་སུ་བསླང་བར་བསམ་བཞིན་སྐྱེ་སྲིད་དུ་བྱོན་པ་གྲུབ་དབང་རིན་པོ་ཆེ་མཆོག་ནི། གཏེར་ཆེན་བདུད་འདུལ་རྡོ་རྗེའི་གཏེར་ལུང་ལས། རླངས་དཔལ་སྤྲུལ་པ་རི་བོའི་ཕྱོགས་སུ་འབྱུང༔ པདྨའི་མིང་ཅན་བྲང་ལ་སྨེ་བས་བརྒྱན༔ ཞེས་དང་། རིག་འཛིན་ཉི་མ་གྲགས་པའི་གཏེར་བྱང་ལས། ཡོན་ཏན་རིག་འཛིན་བཱི་མ་ལ༔ ཤར་ཕྱོགས་མདོ་ཁམས་སྨད་ནས་འབྱུང༔ པདྨའི་མིང་ཅན་བརྟུལ་ཞུགས་ཅན༔ བརླ་གཡས་སྨེ་བ་སྤྱན་འདྲས་མཚན༔ ཞེས་སོགས་འཁྲུལ་བྲལ་རྡོ་རྗེའི་བཀའ་ལུང་ཚད་མས་ལན་གཅིག་མིན་པར་ཡང་ཡང་བསྔགས་པ་ལྟར། ཡུལ་གངས་ཅན་ཆོལ་གསུམ་ཆོས་ཀྱི་ཞིང་ཁམས་ལས་མདོ་ཁམས་རི་བོ་ཆེའི་ཕྱོགས་སུ། བོད་རབ་བྱུང་བཅུ་པའི་ཤིང་མོ་གླང་གི་ལོ་སྟེ་སྤྱི་ལོ་༡༦༢༥པར་བཟོ་རིག་མཁས་པའི་ཡང་རྩེར་སོན་པ་བལ་པོ་བཀྲ་ཤིས་བྱ་བའི་སྲས་སུ་སྐུ་འཁྲུངས། ཆུང་ངུ་ཉིད་ནས་བཟང་པོའི་བག་ཆགས་ལྷན་སྐྱེས་སུ་མངའ་བས་ངུར་སྨྲིག་གི་རྒྱལ་མཚན་འཛིན་པ་ལ་མཆོག་ཏུ་མོས་པ་དང་། ཡི་གེའི་རིགས་དང་བཟོའི་རིག་པ་སོགས་གཙུག་ལག་གི་གནས་ཀུན་ཚེགས་མེད་པར་མཁྱེན་པའི་རྣམ་དཔྱོད་ཡངས་པ་བཅས་ངོ་མཚར་བའི་མཚན་རྟགས་རང་ཆས་སུ་མངའ་བའི་ཚུལ། རྗེ་ཉིད་ཀྱི་གསུང་མགུར་དྲང་སྲོང་དགྱེས་པའི་གླུ་དབྱངས་ལས་ཀྱང་། སྐྱེས་པ་རི་བོའི་ཕྱོགས་སུ་སྐྱེས། །ཚར་བ་ཆབ་མདོའི་ཕྱོགས་སུ་ཚར། །ལོ་བཅུ་ལོན་ནས་ཡི་གེ་བསླབས། །ཆུང་ནས་རབ་བྱུང་ཆ་ལུགས་བྱས། །མཚན་ལྡན་བླ་མ་དམ་པ་བསྟེན། །བརྩེ་བའི་ཐུགས་ཀྱིས་བུ་བཞིན་བསྐྱངས། །དབང་ལུང་གདམས་པ་དཔག་མེད་ཞུས། །ཞེས་གསུངས་པ་ལྟར་དང་། དེ་ནས་མི་རིང་པར་མཁས་གྲུབ་ཀརྨ་ཆགས་མེད་དང་། གྲུབ་དབང་རིག་འཛིན་ཆོས་ཀྱི་རྒྱ་མཚོ། གོང་ས་རྒྱལ་མཆོག་ལྔ་པ། གཏེར་སྟོན་བདུད་འདུལ་རྡོ་རྗེ། རིག་འཛིན་གཏེར་བདག་གླིང་པ་སོགས་སྔ་ཕྱིར་ཡོངས་འཛིན་མཁས་གྲུབ་ཀྱི་སྐྱེས་ཆེན་སུམ་ཅུ་ལྷག་བསྟེན་ཏེ་མདོ་རྒྱུད་མན་ངག་རྒྱ་མཚོར་གསན་བསམ་མཐར་ཕྱིན་མཛད་པ་དང་། དཔལ་གྱི་བསམ་ཡས། ལྷོ་བྲག་མཁར་ཆུ། ཡེར་པ་ལྷ་རི། ཤང་ཟམ་བུ་ལུང། བྱང་གི་གནམ་མཚོ། དཔལ་གྱི་ཙ་རི་ཏྲ་སོགས་སྒྲུབ་པའི་གནས་ཆེན་རྣམས་སུ་བསྐྱེད་རྫོགས་རིམ་གཉིས་ཀྱི་རྣལ་འབྱོར་སྤྱི་དང་། ཁྱད་པར་འོད་གསལ་རྫོགས་པ་ཆེན་པོ་མན་ངག་སྙིང་ཐིག་གི་ཟབ་གནད་ལ་ཉམས་བཞེས་རྩལ་དུ་བཏོན་ནས་ཀུན་བཟང་ཆོས་སྐུའི་རྒྱལ་ཐབས་ལ་མངའ་དབང་བསྒྱུར་བ་སྟེ། ཐོག་མར་དགུང་ལོ་བཅུ་གསུམ་ཙམ་ནས་སྒྲུབ་བརྒྱུད་བསྟན་པའི་ཉི་མ་ཆགས་མེད་རིན་པོ་ཆེའི་ཞབས་པད་མཉེས་པ་གསུམ་གྱིས་བསྙེན་ཏེ་གསར་རྙིང་གི་གདམས་ཁྲིད་དུ་མ་གསན་བཞེས་དང་། ཕྱག་རྫོགས་ཀྱི་རྣལ་འབྱོར་ལ་ཉམས་ལེན་རྩེ་གཅིག་ཏུ་མཛད་པས་ཞག་ཉེར་གཅིག་ཙམ་ནས་འོད་གསལ་ཉིན་མཚན་ཁོར་ཡུག་ཏུ་འདྲེས་ཤིང་བདེ་གསལ་མི་རྟོག་པའི་ཉམས་སྣང་རྩོལ་མེད་དུ་སྐྱེས། རིམ་པར་བླ་མའི་མདུན་ནས་རཏྣའི་བླ་མ་ཞི་དྲག་དང་། ཕུར་པ། ཉང་གི་རྟ་ནག །ཀརྨ་གླིང་པའི་ཞི་ཁྲོ་སོགས་བཀའ་གཏེར་ཕྲིན་སྒྲུབ་ཀྱི་དབང་ལུང་གསན། དེ་སྐབས་ཆགས་མེད་རིན་པོ་ཆེ་ཉིད་ལའང་ཐུགས་དམ་གྱི་བོགས་ཐོན་བྱུང་ཚུལ། རང་རྣམ་ལས། རྟོགས་ལྡན་པདྨ་རིག་འཛིན་ལ། །ལུང་ནི་མང་ཞིག་བྱས་པའི་ཚེ། །སེམས་ངོ་ལ་ཡང་བོགས་ཐོན་ཞིང་། །ལུང་དང་འདྲེས་ནས་འགྲོ་བ་བྱུང་། །ཞེས་གསུངས། འདི་སྐབས་ཡི་དམ་ཐུགས་རྗེ་ཆེན་པོ་དང་ཨོ་རྒྱན་རྡོ་རྗེ་འཆང་གང་བྱེད་བརྟག་པས། རྗེ་ཉིད་ཀྱི་གཟིམས་ལམ་དུ་སློབ་དཔོན་ཆེན་པོའི་སྐུ་བརྙན་མཇལ་བ་དང་། ཆགས་མེད་རིན་པོ་ཆེའི་ཐུགས་དམ་བརྟག་སྐབས་ཀྱང་ཨོ་རྒྱན་བསྒྲུབས་ན་ལེགས་ཚུལ་བྱུང་བ་ལྟར། ཐུགས་དམ་ཀྱི་མཐིལ་རཏྣའི་ཐུགས་སྒྲུབ་ཞི་བ་རྩལ་དུ་བཏོན་ནས་བསྙེན་པས་ཨོ་རྒྱན་ཆེན་པོས་ཞལ་གཟིགས་དང་སངས་རྒྱས་བྱང་སེམས་དཔའ་བོ་རྣལ་འབྱོར་མའི་ཚོགས་ཀྱིས་བྱིན་གྱིས་བརླབས། གཞན་ཡང་བསྐྱེད་རྫོགས་རྩ་རླུང་གི་གདམས་པའི་ཞུན་ཐར་བཅད་དེ་ཉམས་བཞེས་གནད་སྨིན་མཛད་པས། ཉིན་ཞག་རེ་ལ་རླུང་གི་རྒྱུ་བ་གཉིས་རེས་ཆོག་པ་སོགས་གྲུབ་པའི་རྟགས་མཚན་མཐའ་ཡས་པ་མངོན་དུ་གྱུར། ཆགས་མེད་རིན་པོ་ཆེས་རྡོ་རྗེའི་རྒྱལ་ཚབ་ཏུ་དབང་བསྐུར་ནས་སྨིན་གྲོལ་ཟབ་ཁྲིད་ཀྱི་རྒྱུན་བསྩལ་བར་བཀས་བསྐུལ། དགུང་གྲངས་ཉེར་བཞི་པར་ཀུན་སྤངས་བྱ་བཏང་གི་ཚུལ་གྱིས་སྤོ་བོའི་ཕྱོགས་སུ་ཕེབས་པས་གཏེར་ཆེན་བདུད་འདུལ་རྡོ་རྗེ་མཇལ། གཏེར་ཆེན་མཆོག་གིས་རང་གཏེར་དམ་ཆོས་སྤྲུལ་སྐུ་སྙིང་ཐིག་གི་ཆོས་བདག་ཏུ་ངོས་འཛིན་དང་ལུང་བསྟན་གྱིས་དབུགས་དབྱུང་། དབང་ལུང་གཏད་རྒྱ་བཅས་བསྔགས་བརྗོད་རྒྱ་ཆེ་བས་ཆོས་ཀྱི་བདག་པོར་མངའ་གསོལ། གཞན་ཡང་རིག་འཛིན་འཇའ་ཚོན་སྙིང་པོའི་ཐུགས་སྲས་དགེ་བའི་བཤེས་གཉེན་ཀུན་མཁྱེན་པ་ལས་རྟ་ཕག་སོགས་ཀྱི་དབང་ལུང་ཞུས་པས་འཇའ་ཚོན་མཆོག་གི་ཡེ་ཤེས་ཀྱི་སྐུས་རྗེས་སུ་བཟུང་། ཁྱད་པར་རྫོགས་ཆེན་བསོད་ནམས་དབང་པོའི་དངོས་སློབ་རྦ་ཁ་སྤྲུལ་སྐུ་རིག་འཛིན་ཆོས་ཀྱི་རྒྱ་མཚོ་ཞེས་རྫོགས་ཆེན་སྙིང་ཐིག་གི་བསྟན་པའི་བདག་པོ་གྲུབ་པའི་དབང་ཕྱུག་ཆེན་པོ་གང་དེའི་ཞབས་རྡུལ་སྤྱི་བོར་བླངས་ཏེ་ཐུན་མིན་རིགས་ཀྱི་བདག་པོར་བཀུར། སྒོ་གསུམ་མཉེས་པ་གསུམ་གྱིས་གུས་པས་བཏུད་དེ་ཟབ་ལམ་མཁའ་འགྲོ་སྙིང་ཐིག་གི་དབང་ལུང་སྙན་བརྒྱུད་ཀྱི་གདམས་པ་ཡོངས་སུ་བཞེས། ཡེ་ཤེས་ཀྱི་མཁའ་འགྲོ་མས་མཚོན་བྱེད་བརྡ་ཐབས་ཀྱི་ལྡེ་མིག་གཏད་དེ་གནང་བ་བྱིན་པ་ལྟར་ཁམས་པ་རྫོགས་ཆེན་པ་ཞེས་པའི་མཚན་དང་བཅས་བརྒྱུད་པ་འཛིན་པའི་རྒྱལ་ཚབ་ཏུ་དབང་བསྐུར། རྟོགས་པའི་ལམ་རྟགས་མངོན་དུ་གྱུར་ཏེ་ཆོས་ཉིད་མངོན་སུམ་གྱི་སྣང་བའི་འཆར་སྒོ་ཐིག་ལེ་སྟོང་སྒྲོན་གྱི་མུ་ཁྱུད་དུ་རྡོ་རྗེ་སེམས་དཔའ་དང་། འཕགས་པ་ནམ་མཁའི་རྒྱལ་པོ་བཀྲ་ལམ་མེར་གཟིགས་པ་བཅས་ཀ་དག་ཁྲེགས་ཆོད་ཀྱི་ལྟ་བ་མངོན་དུ་གྱུར། ལྷུན་གྲུབ་ཐོད་རྒལ་གྱི་སྒོམ་པའི་རྩལ་ཆེན་རྫོགས་ནས་ཀུན་བཟང་དགོངས་པའི་རྒྱལ་སྲིད་ལ་དབང་འབྱོར། དགུང་ལོ་སོ་དགུ་བཞེས་པ་རབ་བྱུང་བཅུ་གཅིག་པའི་ཆུ་ཡོས་ལོར་དབུས་འགྱུར་ཆོས་ཀྱི་ཞིང་སར་ཕེབས་ཞལ་ཕྱོགས། ལམ་བར་གྱི་སྒྲུབ་གནས་གཉན་ཁྲོད་རྣམས་སུ་ཐུགས་དམ་བོགས་འདོན་གྱི་ཕྱིར་དུ་གཉན་ས་གཅོད་པའི་ཚུལ་མཛད། འདི་སྐབས་ཐུགས་སྲས་ཐུ་བོ་རིག་འཛིན་ཉི་མ་གྲགས་པ་ཞབས་ཕྱི་འབྱོར་ནས་གཙུག་ཕུད་བཞེས། ནང་ཆེན་རྒྱལ་པོ་སོགས་དད་ལྡན་གྱི་སྐྱེ་བོ་མང་པོར་ཆོས་སྦྱིན་གྱི་ཕྲིན་ལས་བསྩལ་བ་དང་བཅས་ཤིང་འབྲུག་ལོར་ཡུལ་དབུས་ལྷ་ལྡན་དུ་ཞབས་པད་བསྐྱོད། རྟེན་གཙོ་ཇོ་ཤཱཀ་རྣམ་གཉིས་ལ་གསེར་ཆབ་སྙན་ཤལ་སོགས་མཆོད་པའི་སྤྲིན་ཕུང་རྒྱ་ཆེར་སྤྲོས་ཏེ་བསྟན་ལ་སྨན་པའི་ཐུགས་བསྐྱེད་རླབས་པོ་ཆེའི་མཚམས་སྦྱར། ཁྱད་པར་གངས་ལྗོངས་བསྟན་པ་ཡོངས་ཀྱི་བདག་པོ་ཐམས་ཅད་མཁྱེན་གཟིགས་རྒྱལ་དབང་ལྔ་པ་ཆེན་པོའི་གསེར་ཞལ་མཇལ། ཕན་ཚུན་ཐུགས་སྣང་གཤིན་པོས་ཉམས་རྟོགས་ཀྱི་བགྲོ་གླེང་དང་། ཁྱད་པར་གོང་ས་མཆོག་ལ་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་དབང་ཁྲིད་གསན་འབུལ་མཛད་པས། རྒྱལ་དབང་མཆོག་ལ་ཐུགས་དམ་བོགས་ཐོན་གྱི་ངེས་ཤེས་ཁྱད་པར་ཅན་ཐུགས་ལ་འཁྲུངས་ནས། གསུང་ལས། ཁམས་པ་རྫོགས་ཆེན་པ་ཉམས་རྟོགས་ཀྱི་བརྗོད་པ་བཅོས་མ་མ་ཡིན་པར་ཀློང་བརྡོལ་བ་གྲུབ་པའི་དབང་ཕྱུག་རྩེ་གཅིག་བསྐྱངས་པའི་ལག་རྗེས་ཤར་བར་སྣང་། ཞེས་དང་། ཕྱིས་སུ་གྲུབ་དབང་མཆོག་ལ་ཕུལ་བའི་ཆབ་ཤོག་ཀུན་བཟང་ཞལ་ངོམས་སུ། དགའ་རབ་ཤྲཱི་སེང་པད་འབྱུང་བཱི་མ་ལ། །བཻ་རོ་སོ་ཟུར་གནུབས་གཉགས་ལ་སོགས་པའི། །བཀའ་ཡི་གནད་ལ་སྦྱངས་རློམ་རྙིང་རློམ་འགས། །ཕྱག་རྫོགས་མ་ཕྱེད་འདྲེས་མའི་ཆོས་སྐད་མང་། །ཁྱེད་ཀྱིས་སྔོན་ཆད་རྩོལ་བས་ཉམས་བསྟར་ཀུན། །སྙིང་ཐིག་སྙིང་པོའི་དགོངས་དོན་ཇི་ལྟ་བ། །མ་རྟོགས་ལོག་རྟོག་མེད་པ་རྣམ་དག་པར། །ཁོ་ནར་སོང་བའི་ཚུལ་ལ་གཅིག་ཏུ་རངས། །ཅེས་དང་། སྔ་འགྱུར་ནགས་ཀླུང་སྟུག་པོ་འཁྲིགས་པའི་དབུས། །སྔོན་མེད་ཡོངས་འདུས་ལྗོན་པ་ཁྱེད་དུ་ངེས། །ཚད་ཕེབས་རྫོགས་ནས་ཆོས་ཉིད་ཟད་ས་རུ། །འཁྱོལ་ལ་ཧ་ཅང་མི་རིང་ཕ་རོལ་ན། །སྐྱོན་བྲལ་ཡོན་ཏན་ཀུན་རྫོགས་རང་གི་སེམས། །ཁྱབ་བདག་རྡོ་རྗེ་འཆང་དུ་རྟག་པར་ཡོད། །ལོངས་སྐུའི་ཞིང་ཁམས་ཉུལ་བ་ཐོད་རྒལ་གྱི། །དཀར་སེར་ཁྲ་མེན་སྒྲོན་མ་དྲུག་གི་གནད། །ནན་ཏན་བགྱིད་ཁྱེད་རང་རིག་ཀུན་ཏུ་བཟང་། །རང་ཞལ་མཐོང་བའི་བར་དུ་དར་ཡོལ་ཙམ། །ཞེས་སོགས་ཕུལ་དུ་བྱུང་བའི་བསྔགས་བརྗོད་ཀྱི་མེ་ཏོག་འཐོར་བར་མཛད། དེ་མཚམས་སྟོད་ལུང་མཚུར་ཕུ་དང་། འུ་ཤང་རྡོོའི་ལྷ་ཁང་། སྒྲགས་ཀྱི་ཡང་རྫོང་། རྡོ་རྗེ་བྲག སྨིན་གྲོལ་གླིང་སོགས་གནས་ཆེན་ཆོས་སྡེ་ཁག་ཏུ་གནས་གཟིགས་དང་འབྲེལ་མཆོད་འབུལ་གྱི་དངོས་པོ་གྱ་ནོམ་པ་བསྟབས། ཁྱད་པར་དཔལ་བསམ་ཡས་ཀྱི་ཆོས་སྡེ་ཆེན་མོ་མེས་འཇིག་པས་ཉམས་པ་ལ་ཞིག་གསོའི་ཐེབས་རྩར་དངོས་རྫས་ཕོན་ཆེན་གནང་སྦྱིན་བསྩལ་བ་དང་། དེ་མཚུངས་མངའ་བདག་ཆོས་ཀྱི་དབང་པོ། གཏེར་ཆེན་འགྱུར་མེད་རྡོ་རྗེ། སྤྲུལ་སྐུ་པད་མ་གར་དབང་། སྒམ་པོ་སྤྲུལ་སྐུ། གསུང་སྤྲུལ་ཚུལ་ཁྲིམས་རྡོ་རྗེ་སོགས་ལྷོ་དབུས་ཀྱི་སྐྱེས་ཆེན་དུ་མ་དང་དབང་ལུང་ཟབ་ཆོས་ཀྱི་རྒྱུན་འབུལ་རེས་མཛད། རིམ་པར་ལྷོ་བྲག་མཁར་ཆུ། ཚེ་ལམ་དཔལ་རི། ལྷ་མོ་མཁར། དཔལ་གྱི་ཕུག་རིང་། དུར་ཁྲོད་ལ་ཁ་རྣམས་སུ་ཟླ་ངོ་རེར་སྐུ་མཚམས་བཅད་རྒྱ་ལ་བཞུགས་ཤིང་། དུར་ཁྲོད་ལ་ཁར་བཞུགས་པའི་ཐོ་རེངས་ཤིག་ལ་ཤར་ཕྱོགས་ཀྱི་ནམ་མཁའ་ནས་ལྷ་ལྕམ་མན་དཱ་ར་བ་དཀར་མོ་རུས་རྒྱན་གར་སྟབས་དང་བཅས་པས་ནུབ་ཀྱི་མཁའ་ངོས་ལ་བརྡ་ཆོས་སྣ་ཚོགས་སྟོན་བཞིན་བུན་ནེར་གཤེགས་པའི་ཉམས་སྣང་བྱུང་བ་སྐུ་ཚེ་དེར་མཁའ་སྤྱོད་འགྲུབ་པའི་བརྡ་རྟགས་སུ་གོ་ཡང་འགྲོ་ལ་བརྩེ་བའི་ཐུགས་ཀྱིས་དང་དུ་མ་བཞེས། དེ་མཚམས་མཆིམས་ཕུ་ནགས་ཀྱི་དབེན་ཁྲོད་དུ་ལོ་ངོ་གསུམ་ལ་བཅད་རྒྱ་མཛད་པས་ཉམས་རྟོགས་ཀྱི་ཡོན་ཏན་དབྱར་མཚོ་རྒྱས་པ་ལྟར་འཕེལ་ཞིང་དེར་མཁའ་འགྲོ་ཡེ་ཤེས་མཚོ་རྒྱལ་གྱིས་བདེ་གཤེགས་གཙུག་ཏོར་ཅན་དང་། གྲུབ་ཆེན་ཀུ་ཀུ་རི་པ། རྒྱལ་བ་སྟག་ལུང་ཐང་པ་བཅས་ཀྱི་སྤྲུལ་པ་ཡིན་པའི་ལུང་བསྟན་དང་ཞལ་གཟིགས་ཐོབ། དགུང་གྲངས་ཞེ་གསུམ་བཞེས་པ་ས་སྤྲེལ་ལོར་ཡུལ་ཉེར་བཞིའི་ནང་ཚན་བདེ་མཆོག་འཁོར་ལོ་སྡོམ་པའི་གནས་མཆོག་ཙཱ་རི་ཏྲའི་རོང་སྐོར་ལ་ཕེབས་ཤིང་། བདེ་མཆོག་བླ་མཚོ་དང་། སྟག་མ་ལ། དཔལ་གྱི་རི་ཟླུམ་སོགས་སུ་ཕེབས་སྐབས་སྲ་མཁྲེགས་རྡོ་ཡི་ཕ་ཝང་ལ་འདམ་ལྟར་བརྫིས་པའི་ཞབས་རྗེས་གཉིས་བཞག་པ་དང་། དཔོན་སློབ་ཐུན་མོང་གི་སྣང་ངོར་བདེ་མཆོག་ཕག་མོའི་གཟིགས་སྣང་ལན་འགར་བྱུང་བ་སོགས་ཡ་མཚན་གྲུབ་པའི་མངོན་རྟགས་གསལ་བར་བསྟན། ཁྱད་པར་གནས་ཀྱི་གཙུག་ཏོར་དག་པ་ཤེལ་གྱི་གངས་རིའི་འདབས་ཞོལ་ཟབ་ལམ་རྡོ་རྗེའི་དབེན་གནས་སུ། སྐུ་སྐྱེ་རིན་པོ་ཆེས་ཞབས་ཏོག་མཛད་དེ་ལོ་གྲངས་གསུམ་ལ་སྒྲུབ་པའི་རྒྱལ་མཚན་བཙུགས་ཏེ་བཞུགས་པས་བཀའ་བརྒྱད་བདུན་བརྒྱ་ཉེར་ལྔའི་ལྷ་ཚོགས་ཀྱིས་ཞལ་གཟིགས་པ་དང་། ཟབ་ཡངས་ཐུགས་ཀྱི་ཀློང་དུ་རྟོགས་པའི་བོགས་ཆེན་ཐོན་ཏེ་རིག་སྟོང་རྡོ་རྗེའི་ར་བར་སྐུ་བརྙན་ཕྲ་མོ་རྐྱང་སྐུ་དང་། ཉིས་སྦྲེལ། གསུམ་ཚོགས། བཞི་སྒྲིག ལྔ་ཚོམ་སོགས་གྲངས་མེད་ཀྱི་ཞིིང་ཁམས་ཐམས་ཅད་སྐུ་དང་ཡེ་ཤེས་ཀྱི་རོལ་པས་རིག་པ་ཚད་ལ་ཕེབས་པའི་གནད་གསང་གི་ལམ་མཆོག་ཕུལ་དུ་ཕྱིན་པ་བརྙེས། དེ་ལྟར་གསུང་མགུར་ལས་ཀྱང་། འོང་བ་དེ་སྟོད་ཀྱི་ཕྱོགས་སུ་བྱས། །ཐོས་བསམ་གྱི་ཡར་ལྟ་རྒྱ་ཆེར་བྱུང་། །ཐོས་དོན་དེ་ཉམས་ལེན་གནད་ཐོག་ཏུ། །སྒྲུབ་པ་ཡི་ངང་ཚུགས་བླ་མའི་དྲིན། །རྟེན་འབྲེལ་དེ་ལྷོ་བྲག་མཁར་ཆུར་བྱུང། །ཡེ་ཤེས་ཀྱི་མཁའ་འགྲོས་བརྡ་མཚོན་བསྟན། །བསམ་གཏན་གྱི་སྒོམ་ཚུགས་བཟུང་བ་ཡིས། །མཐར་ཐུག་གི་ལམ་སྣ་ཟིན་ངེས་བྱུང་། །སྒྲུབ་གནས་དེ་བསམ་ཡས་མཆིམས་ཕུར་བྱས། །ཀ་དག་ལྷུན་གྲུབ་ཀྱི་རང་ངོ་མཐོང་། །གནས་ལུགས་དང་མཐུན་པའི་ཉམས་ལེན་ཤེས། །ཚིག་དོན་ལ་བསྙེལ་བ་མེད་དམ་སྙམ། །བོགས་འདོན་དེ་ཙ་རི་ཏྲ་རུ་བྱས། །རིག་པ་ཡེ་ཤེས་ཀྱི་སྐུར་མཐོང་ནས། །རྡོ་རྗེ་རྩེ་མོ་ཡི་གནད་ཤེས་པས། །སྣང་སྟོང་ལ་འགལ་བ་མེད་པར་རྟོགས། །ཅེས་དང་། ངས་སྒྲུབ་གནས་དེ་བསམ་ཡས་མཆིམས་ཕུར་བྱས། །སྤྱོད་པ་དེ་ཙྭ་རི་རོང་དུ་བསྐྱངས། །རྟེན་འབྲེལ་དེ་ལྷོ་བྲག་མཁར་ཆུར་བྱུང་། །འགྲོ་དོན་དེ་ཡར་འབྲོག་ཀུན་ལ་བྱས། །ཞེས་གསུངས་པ་དང་། དེ་བཞིན་རྒོད་ཚང་པ་སྣ་ཚོགས་རང་གྲོལ་གྱི་ཞུ་མཆིད་ལས་ཀྱང་། གྲངས་མེད་སྐྱེ་བའི་གོང་རོལ་ན། །ཚོགས་གཉིས་ཀྱི་བྲེ་ཁ་ལེགས་ཁེངས་ཤིང་། །ཐོས་བསམ་དང་སྒོམ་སྒྲུབ་མཐའ་དག་ལ། །དབང་འབྱོར་གྱི་འབྲས་བུས་ཕྱུག་པ་ཁྱེད། །ཞེས་དང་། ཁྱེད་ཟབ་དོན་གྱི་ཉམས་བཞེས་མཐར་ཕྱིན་ནས། །གྲུབ་ཐོབ་ཀྱི་གདན་ས་བསྙེགས་པ་ལ། །འདི་འདྲའི་སྙན་འབུལ་མ་དགོས་ཀྱང་། །ཚད་ཕེབས་དེ་ཟད་སར་འཁྱོལ་མཛད་ནས། །རྩོལ་མེད་ཀྱི་གཞན་དོན་མཁའ་ཁྱབ་ཞུ། །ཞེས་སོགས་བསྔགས་བརྗོད་ཀྱི་མེ་ཏོག་རྒྱ་ཆེར་འཐོར་བར་མཛད་དོ། །དེ་ནས་སྐུ་མཚམས་གྲོལ་བ་དང་བསྟུན་སྐུ་སྐྱེ་རིན་པོ་ཆེས་ཞུས་བསྐུལ་ལྟར་ཧོར་འབྲོག་ནག་ཆུ་ཁར་ཆིབས་སྒྱུར་མཛད་དེ། དེ་གར་ཧོར་པ་ལོ་ཆེན་སོགས་མི་དཔོན་བན་སྔགས་སེར་སྐྱ་མང་པོར་ཟབ་ཆོས་དུ་མའི་བཀའ་དྲིན་བསྩལ་ནས་ཐར་བའི་གྲོང་དུ་བཀྲི་བའི་སྒོ་འཕར་ཕྱེས། མཁར་བ་བསམ་གཏན་ཕུག་སོགས་སྒྲུབ་གནས་འགར་ཡུན་རིང་བཞུགས་ཤིང་ཐུགས་སྲས་ནམ་མཁའ་འོད་གསལ་ཡང་དེ་ཙམ་ཉིད་ན་ཞབས་འཁོར་དུ་ལྷགས། སླར་ཡང་ཤང་ཟམ་བུ་ལུང་དང་བྲག་ཡེར་བ་སོགས་སུ་ཕེབས་ནས་ལོ་མཚམས་དུ་མར་བཞུགས། བར་སྐབས་རྣམས་སུ་གནས་བརྟན་འཇམ་དབྱངས་གྲགས་པ་སོགས་དགའ་ལྡན་ཕོ་བྲང་གི་དྲུང་འཁོར་ཆེ་རིམ་དང་། སེ་འབྲས་སོགས་གདན་ས་ཆེ་ཁག་གི་དགེ་བཤེས་མང་པོ་ལྐོག་ཆོས་ཞུ་བར་བྱུང་ཞིང་དེ་དག་ལ་ཆོས་བཀའ་སྣ་ཚོགས་པ་གསུངས་པར་མཛད། ཐུགས་སྲས་ཞྭ་ལམ་རབ་འབྱམས་པ་བསྟན་པའི་རྒྱལ་མཚན་ཡང་འདི་སྐབས་ཞབས་འབྲང་དུ་བྱུང་། དེ་མཚམས་གྲགས་པའི་མཚོ་སྨན་ཆེ་བཞིའི་ཡ་གྱལ་བྱང་གི་གནམ་མཚོར་ཕེབས་ནས་སྐུ་ལུས་མ་སྤངས་པར་འོད་སྐུར་གྲོལ་བའི་དགོངས་བཞེས་སྐྱོང་ཚེ། རྒྱལ་མཆོག་ལྔ་པ་ཆེན་པོའི་ཡེ་ཤེས་ཀྱི་གཟིགས་ངོར་། ཨོ་རྒྱན་ལུང་ཟིན་པདྨའི་མཚན༔ རྣལ་འབྱོར་དབང་ཕྱུག་ཁྱེད་ཉིད་ཀྱིས༔ མདོ་ཁམས་ཉི་མ་ཤར་ཕྱོགས་སུ༔ རྒྱས་དང་རུ་དམ་ར་བ་དཀར༔ གང་རུང་གདན་ས་གནས་གྱུར་ཚེ༔ བསྟན་འགྲོ་སྤྱི་ཡི་རྒུད་པ་གསོ༔ མཐའ་འཁོབ་སྐྱེ་འགྲོ་ཆོས་ཀྱིས་འདུལ༔ ཞེས་ཡུལ་རྫ་སྟོད་དགེ་རྒྱས་དང་། མདོ་ཁམས་རུ་དམ་ལུང་། མི་ཉག་རྡོ་ར་དཀར་མོ་སྟེ་གདན་ས་རིམ་པ་གསུམ་དུ་རྟེན་འབྲེལ་དུས་བབ་ལྟར་བསྟན་འགྲོའི་འགྲོ་དོན་བསྐྱངས་ན་ཆོས་བརྒྱུད་དར་རྒྱས་སུ་འབྱུང་བར་འགྱུར་ཞེས་སྒྲིབ་བྲལ་རྡོ་རྗེའི་བཀའ་ལུང་གིས་གསལ་བར་བསྐུལ་བ་དང་། དེ་མཚུངས་ཆགས་མེད་རིན་པོ་ཆེས་ཀྱང་། དེ་ནས་ཁམས་སུ་ཅིས་ཀྱང་བྱོན་དགོས་ཏེ། །རང་དོན་མཛད་ནས་གཞན་དོན་མི་མཛད་པ། །ཐེག་དམན་ཉན་ཐོས་ལམ་གྱི་གོལ་ས་ཆེ། །རྫོགས་སངས་རྒྱས་ནས་འགྲོ་དོན་མ་གཏོགས་པ། །མཛད་རྒྱུ་གཞན་ནི་ཡོད་སྐད་མ་ཐོས་སོ། ཅེས་དང་། ཁམས་སུ་བྱོན་པ་ཟང་ཟིང་དོན་གཉེར་མིན། །དབང་ལུང་རྒྱ་མཚོ་འདི་དག་སྤེལ་ཐུབ་ན། །འགྲོ་ལ་ཆོས་སྦྱིན་ཨོ་རྒྱན་བསྟན་ལ་སྨན། །བསྟན་འགྲོའི་དོན་ཡིན་རང་དོན་མཆོག་དེ་ཡིན། །བླུན་སྒོམ་ཟ་ཆོག་བརྒྱ་ལས་དེ་ཉིད་ལྷག །ཅེས་སོགས་ཞབས་བསྐུལ་གྱི་ཆབ་ཤོག་སྔ་ཕྱིར་ནན་གྱིས་བསྩལ་བ་ལྟར་བསྟན་དང་འགྲོ་བའི་དོན་ཆེན་ཐུགས་ལ་བརྣག་སྟེ། གྲུབ་དབང་མཆོག་དགུང་གྲངས་དྲུག་ཅུ་བཞེས་པ་ཤིང་ཕོ་བྱི་བའི་ལོར་ཇོ་བོ་རྗེ་དཱི་པམ་ཀཱ་རཱ་བོད་དུ་བྱོན་པའི་རྣམ་ཐར་དང་ཚུལ་མཚུངས་པར་མདོ་ཁམས་ཉི་མ་ཤར་ཕྱོགས་སུ་ཞབས་བསྐྱོད་གནང་། དགུང་གྲངས་རེ་གཅིག་བཞེས་པ་ཁྲོ་བོ་ཞེས་པ་ཤིང་མོ་གླང་གི་ལོ་སྟེ་སྤྱི་ལོ་༡༦༨༥ལོར། ཨོ་རྒྱན་སངས་རྒྱས་གཉིས་པས་ཞབས་ཀྱིས་བཅགས་ཤིང་བྱིན་གྱིས་བརླབས་པས་དཔའ་བོ་མཁའ་འགྲོ་སྤྲིན་ལྟར་འདུ་བའི་གནས་མཆོག མདོ་ཁམས་ས་ཡི་ལྟེ་བ་རུ་དམ་སྐྱིད་ཁྲམ་ལུང་པ་ཞེས་སའི་དཔྱད་ཕུན་སུམ་ཚོགས་དགུ་མ་ཚང་བ་མེད་པའི་ནོར་འཛིན་གྱི་ཐིག་ལེར་ཞབས་པད་བཀོད། ཐོག་མར་གཡས་ལུང་མགོན་པོ་ཤྭ་ནའི་གནས་ཀྱི་འདབས་རོལ་ཞབས་ཆེན་སྤང་ཐང་དུ་གྲུབ་དབང་དཔོན་སློབ་གསོལ་ཇ་བསྐོལ་ཏེ་བཞུགས་སྐབས། བཀའ་སྲུང་དྲེགས་པའི་ཡང་རྗེ་པེ་ཧར་རྒྱལ་པོ་བྱ་རོག་གི་རྣམ་པར་སྤྲུལ་ནས་སྐྱེམས་ཕུད་ཕུད་ཕོར་དང་བཅས་པ་འཕུར་རྩལ་གྱིས་ནམ་མཁར་བཏེགས་ཏེ་གདན་སའི་རྒྱབ་རིའི་བྲག་སྟེགས་ཤིག་ཏུ་བཞག་པ་དང་། གཏོ་རུ་ཨ་དགེ་ཚང་ཞེས་འབྲོག་དུད་ཞིག་ཡོད་པར་ཁྱིམ་ཕེབས་མཛད་པས་ཐབ་ཟངས་ལས་འོ་མ་འཕྱུར་བ་སོགས་བཀྲ་ཤིས་པའི་མཚན་མ་འབུམ་ཕྲག་དུས་གཅིག་ཏུ་ཤར་བའི་རྟེན་འབྲེལ་ལེགས་ལམ་གྱི་སྒོ་འཕར་ཕྱེས་ནས། སྔ་འགྱུར་བསྟན་པའི་ཆུ་འགོ་རྫོགས་ཆེན་ཨོ་རྒྱན་བསམ་གཏན་ཆོས་འཁོར་གླིང་ཞེས་ཡོངས་སུ་གྲགས་པའི་ཆོས་སྡེ་ཆེན་པོ་འདི་ཉིད་ཐོག་མར་ཕྱག་བཏབ། འོད་གསལ་རྫོགས་པ་ཆེན་པོ་མཁའ་འགྲོ་སྙིང་ཐིག་གི་ཉམས་ལེན་ལ་བརྩོན་པའི་རིག་པ་འཛིན་པའི་རྣལ་འབྱོར་སྟོང་ཕྱེད་ལྔ་བརྒྱར་ལོངས་པས་སྒྲུབ་པའི་རྒྱལ་མཚན་བཙུགས་ཏེ་ངེས་གསང་སྙིང་པོའི་བསྟན་པ་ཉིན་བྱེད་ལྟར་གསལ་བར་མཛད། ཕྱོགས་དེར་འཁོད་པའི་སྡེ་དགེའི་ས་སྐྱོང་ཆེན་པོ་ཁྲི་ཆེན་སངས་རྒྱས་བསྟན་པ་དང་། གླིང་ཚང་མགོན་པོ་ལྷུན་གྲུབ། གད་ཐོག་གཉེར་ཆེན་ལྷ་ལུ་སོགས་མི་རྗེ་སྡེ་འབངས་ཡོངས་ཀྱིས་གྲུབ་དབང་དམ་པའི་ཞབས་རྡུལ་སྤྱི་བོར་བླངས་ཏེ་བསྟན་པའི་སྦྱིན་བདག་གི་མཐུན་འགྱུར་བྱས། ཁྱད་པར་ཆོས་རྒྱལ་ཁྲི་ཆེན་སངས་རྒྱས་བསྟན་པས་བསྐུལ་ཞུས་ལྟར་མངའ་ཁོངས་རྙིང་དགོན་རྣམས་སུ་རྗེ་ཉིད་ཞབས་པད་དངོས་བསྐྱོད་ཀྱིས་ལྟ་སྒོམ་སྤྱོད་པའི་ཉམས་ལེན་ལ་དག་ཐེར་དང་། འོད་གསལ་སྙིང་པོའི་ཆོས་ཀྱི་འཁོར་ལོ་རྒྱ་ཆེར་བསྐོར་ཏེ་བླུན་སྒོམ་རྟོག་བཟོའི་ལྟ་གྲུབ་ཀྱི་རྙོགས་མ་བསལ་ནས་ཀུན་མཁྱེན་རྒྱལ་བའི་རིང་ལུགས་འཁྲུལ་བྲལ་ཕྱོགས་ཀུན་སྤེལ་བར་མཛད། རྗེ་འདིས་སྔ་ཕྱིར་རྗེས་སུ་བསྐྱངས་པའི་ཞལ་སློབ་ཀྱི་གཙོ་བོ། འཁོན་ཀླུ་ཡི་དབང་པོའི་རྣམ་རོལ་གཏེར་སྟོན་ཉི་མ་གྲགས་པ་དང་། བདེ་གཤེགས་མྱ་ངན་མེད་ཀྱི་རྣམ་སྤྲུལ་རབ་འབྱམས་པ་བསྟན་པའི་རྒྱལ་མཚན། གྲུབ་ཆེན་མེ་ལོང་རྡོ་རྗེའི་རྣམ་འཕྲུལ་འདྲེན་མཆོག་ནམ་མཁའ་འོད་གསལ་བཅས་ཐུགས་སྲས་ཐུ་བོ་གསུམ་མམ་སློབ་བུ་ཉི་ཟླ་སྐར་གསུམ་ཞེས་ཡོངས་སུ་གྲགས་པ་དང་། གཞན་ཡང་རྒྱལ་མཆོག་ལྔ་པ་ཆེན་པོ། འཇམ་དབྱངས་ཧོར་གྱི་ལོ་ཆེན། གནས་བརྟན་འཇམ་དབྱངས་གྲགས་པ། རྫོགས་ཆེན་ཀློང་རྫོགས་མཐའ་བྲལ། དགེ་བའི་བཤེས་གཉེན་ཀུན་མཁྱེན་པ། རིག་འཛིན་ཀློང་གསལ་སྙིང་པོ། ཀཿཐོག་རྒྱལ་སྲས་བསོད་ནམས་ལྡེའུ་བཙན། དྲུང་པ་ནམ་མཁའ་རྒྱ་མཚོ་སོགས་སློབ་བརྒྱུད་ཡང་བརྒྱུད་དང་བཅས་པའི་ཕྲིན་ལས་ཆོས་བརྒྱུད་ཀྱིས་ཁམས་དབུས་དྭགས་ཀོང་སོགས་ཡུལ་གྲུ་ཀུན་ཏུ་ཁྱབ་པ་དང་། དེ་བཞིན་ཕྱི་རབས་བསྟན་པའི་བཙས་སུ་བཞག་པའི་གསུང་རྩོམ་ཡང་། རྫོགས་ཆེན་གཞི་ལམ་འབྲས་གསུམ་གྱི་དོན་སྟོན་པ་མན་ངག་ཤེལ་ཕྲེང་གི་གླེགས་བམ་དང་། གསོལ་འདེབས་བླ་མའི་རྣལ་འབྱོར་བསྟོད་ཚོགས་སྨོན་ལམ་གྱི་སྐོར། དགེ་བསྐུལ་ལྕག་འདེབས་ཀྱི་སྐོར། རང་ཉིད་ཀྱི་རྣམ་ཐར་འཕྲོས་དོན་དུ་ཡོད་པའི་ལྟ་སྒོམ་སྤྱོད་པའི་གདེང་ཚད་ཉམས་མྱོང་མགུར་གྱི་སྐོར། ཐར་འདོད་ཀྱི་གང་ཟག་མཆོག་དམན་ཀུན་ལ་ཞལ་གདམས་ངོ་སྤྲོད་ཀྱི་སྐོར། སྒྲུབ་འཕྲིན་ཆོ་གའི་སྐོར་ཏེ་སྐོར་ཚོ་དྲུག་གམ་ཕར་ཕྱིན་དྲུག་གི་གྲངས་ཅན་གྱི་གླེགས་བམ་བཞུགས་ཀྱང་ཕལ་མོ་ཆེ་དུས་ཀྱི་རྒུད་པའི་སྐལ་ངན་གྱི་ཁྲོད་དུ་ཉམས་པར་གྱུར། དེ་ནས་དགུང་གྲངས་བདུན་ཅུ་རྩ་གསུམ་པ་དབང་ཕྱུག་ཞེས་པ་མེ་གླང་ལོའི་ཆོ་འཕྲུལ་ཟླ་བའི་རྫོགས་པ་དང་པོའི་ཚེས་ལ། འཇའ་ཚོན་གྱི་གུར་ཁྱིམ་དང་འབྱུང་བའི་རང་སྒྲ་སོགས་རྒྱུད་སྡེ་དང་མཐུན་པའི་རྣལ་འབྱོར་མཆོག་གི་ལམ་རྟགས་ངོ་མཚར་བ་དུ་མ་དང་བཅས་ཆོས་དབྱིངས་སྐྱེ་བ་མེད་པ་གཞོན་ནུ་བུམ་སྐུའི་ཀློང་དུ་ཞི་བར་གཟིམས་པའི་ཚུལ་བསྟན། སྐུ་གདུང་རིན་པོ་ཆེ་ཞུགས་སུ་ཕུལ་བ་འོད་གསལ་ཐུགས་ཀྱི་ཁང་བཟང་ཙིཏྟའི་གོང་བུ་འབྱུང་བས་མ་འཇིག་པ་སྐལ་བ་ལྡན་པའི་རྗེས་འཇུག་རྣམས་བརྩེ་བས་རྗེས་སུ་འཛིན་པའི་བརྡ་རྟགས་ངོ་མཚར་ཅན་གྱི་མཛད་པ་མཐོང་ཞིང་ཐོས་པའི་སྐྱེ་བོ་དག་གི་རྒྱུད་ལ་ཡང་ཐར་བའི་ས་བོན་ཐེབས་པར་མཛད་དེ་ཞིང་འདིའི་མཛད་པ་རེ་ཞིག་རྫོགས་སོ། །

གདན་རབས་གཉིས་པ། ཐུགས་སྲས་ཐུ་བོ་དཔོན་སློབ་ནམ་མཁའ་འོད་གསལ་ནི།

དེ་ལྟར་གྲུབ་པའི་དབང་ཕྱུག་པདྨ་རིག་འཛིན་མཆོག་ལས་རྩ་བའི་ཆོས་བརྒྱུད་འཛིན་པ་ཐུགས་སྲས་ནམ་མཁའ་འོད་གསལ་ཏེ། དམ་པ་འདི་ནི་རྗེ་བཙུན་བཞད་པ་རྡོ་རྗེའི་ཐུགས་སྲས་རས་ཆུང་ཞི་བ་འོད་དང་། བཱི་མའི་ཐུགས་བཅུད་སྙིང་ཐིག་བསྟན་པའི་བཀའ་བབ་གྲུབ་ཆེན་མེ་ལོང་རྡོ་རྗེ་སོགས་མཁས་དང་གྲུབ་པའི་སྐྱེ་སྤྲུལ་ཇི་སྙེད་བཞེས་པའི་མཐར། བོད་རབ་བྱུང་བཅུ་གཅིག་པའི་དཀྱིལ་སྟོད་ཙམ་དུ་མདོ་ཁམས་ཤོད་ཆེན་བཅོ་བརྒྱད་ཀྱི་ནང་ཚན་ནག་ཤོད་དུ་གྲགས་པའི་གནས་སུ། ཡབ་སེར་ཚ་གྲུབ་ཐོབ་ཅེས་འཇིགས་མེད་བརྟུལ་ཞུགས་ཀྱི་སྤྱོད་པས་སྣང་སྲིད་ཀྱི་དྲེགས་པ་བྲན་དུ་བཀོལ་ཞིང་། དྲག་པོ་གཏོར་བཟློག་གི་ལས་ཚོགས་ལ་དབང་འབྱོར་བས་དུས་ཀྱི་མཐའ་དམག་བཟློག་ཅིང་བསྟན་ལ་འཚེ་བའི་སྡེ་ཚོགས་རྗེས་མེད་དུ་གཏོང་བ་སོགས་མཐུ་སྟོབས་ལ་མངའ་བརྙེས་པའི་གྲུབ་ཆེན་དེའི་གདུང་རིགས་སུ་སྐུ་འཁྲུངས། བྱིས་པའི་དུས་ནས་སྔོན་གོམས་ཀྱི་ལས་འཕྲོ་སད་པས་རྟོགས་པའི་གདེང་ཚད་མཐོན་པོ་ལྡན་ཞིང་། འདྲེ་སྲིན་གདུག་ཅན་གནས་པའི་བྲག་རི་འུར་རྡོས་བསྙིལ་བ་དང་། སྐྱེར་པའི་མདའ་གཞུ་ནམ་མཁར་གཏད་པས་ཀྱང་སེར་བ་བཟློག་པ་སོགས་གྲུབ་པའི་མངོན་རྟགས་མཐའ་ཡས་པ་འབྱམས་སུ་ཀླས། མི་རིང་བར་བཀའ་བརྒྱུད་པའི་གྲུབ་ཆེན་ཞིག་ལས་རོ་སྙོམས་ཆོས་དྲུག་དང་། རས་ཆུང་སྙན་བརྒྱུད་སོགས་གདམས་སྐོར་དུ་མ་གསན་ནས་ཉམས་སུ་བླངས་པས་རྩ་རླུང་སེམས་གསུམ་ལ་དྲོད་ཚད་བརྙེས། དཔལ་གྱི་ཙ་རི་ཏྲ་སོགས་ངེས་མེད་གཉན་ཁྲོད་དུ་མར་ཕེབས་ཏེ་རིག་པ་བརྟུལ་ཞུགས་ཀྱི་སྤྱོད་པས་རྟོགས་པ་བོགས་འདོན་མཛད། རེ་ཞིག་ན་གྲུབ་དབང་མཆོག་མཁར་བར་བསམ་གཏན་བྲག་ཏུ་བཞུགས་པའི་སྙན་པ་གསན་ནས་ཞལ་མཇལ་ཞུས། སྐུའི་དཀྱིལ་འཁོར་མཐོང་བ་ཙམ་གྱིས་སངས་རྒྱས་དངོས་གཟིགས་ཀྱིས་སྐྱབས་གནས་གཅིག་ཆོག་ཏུ་བསྙེན། སྐུ་ཚེ་གང་པོར་འབྲལ་བ་མེད་པར་སྐུ་རྗེས་སུ་འབྲང་སྟེ་ཞབས་ཏོག་རྒྱ་ཆེར་བསྒྲུབས་པས་གྲུབ་དབང་མཆོག་གི་ཐུགས་བརྩེས་དགྱེས་བསྐྱངས་ཀྱིས་སྨིན་གྲོལ་གྱི་གདམས་ཁྲིད་སྤྱི་དང་། བྱེ་བྲག་སྙིང་ཐིག་གོང་འོག་གི་གདམས་ངག་ཟབ་ཁྲིད་ཐམས་ཅད་ཚང་སྤྲུགས་སུ་བསྩལ། ཆོས་ཕྱིར་དཀའ་སྤྱད་དྲག་པོས་དབེན་རིར་སྒྲུབ་པའི་རྒྱལ་མཚན་བཙུགས་ནས་ཡུན་རིང་བཞུགས་པས་རིག་པ་ཚད་ཕེབས་ཀྱི་ས་ལ་ཕྱིན་ཏེ་རྗེ་བླ་མ་དང་མཉམ་པའི་རྟོགས་པ་མངོན་དུ་གྱུར་པས་ནམ་མཁའ་འོད་གསལ་དུ་མཚན་གསོལ། ཏིང་ངེ་འཛིན་ལ་དབང་འབྱོར་པས་གཞན་རྒྱུད་ཀྱི་རྟོགས་པ་མཁྱེན་པ་དང་། ནང་འབྱུང་འོད་ལྔར་དྭངས་པས་སྐུ་ལུས་ལ་གྲིབ་གཟུགས་མེད་པ། ཆགས་ཐོག་བྲལ་པའི་མངོན་ཤེས་ཕྱོགས་མེད་དུ་ཤར་བ་སོགས་ལམ་རྟགས་ཀྱི་ཡོན་ཏན་ངོ་མཚར་བ་དུ་མ་མངའ། ཕྱིས་སུ་གྲུབ་དབང་རིན་པོ་ཆེ་མཆོག་ཞིང་གཞན་དུ་དགོངས་པ་ཕྱོགས་པའི་ཚེ་རྫོགས་ཆེན་མཁའ་འགྲོ་སྙིང་ཐིག་གི་བརྒྱུད་པ་འཛིན་སྐྱོང་སྤེལ་བའི་རྒྱལ་ཚབ་ཆོས་ཁྲི་ལ་མངའ་གསོལ་བར་མཛད། དེ་ནས་གདན་ས་ཆེན་པོའི་གཙུག་ལག་ཟུང་གི་མཛད་ཁྱབ་གོང་འཕེལ་དུ་བསྐྱངས་པ་དང་། ཁྱད་པར་ཆོས་ཀྱི་བཅའ་ཁྲིམས་ལེགས་པར་བསྡམས་ནས་ལོ་ལྟར་རྒྱུན་ཆགས་སུ་རྫོགས་ཆེན་མཁའ་འགྲོ་སྙིང་ཐིག་གི་ཉམས་ཁྲིད་ཐེངས་གཉིས་གསུམ་བསྩལ་ཏེ་དགོན་གྱི་གྲྭ་རིགས་རྣམས་དང་། ཕྱོགས་ཀྱི་ཆོས་ཞུ་བ་ཀུན་སེམས་ངོ་འཕྲོད་ནས་རྟོགས་པ་གོང་འཕེལ་གྱི་བརྟན་པ་མ་ཐོབ་བར་རྗེ་ཉིད་ཀྱི་ལག་ལེན་དམར་ཁྲིད་གནང་ནས་མཚམས་སྒོ་འདག་སྦྱར་གྱིས་སྒོམ་པ་ལ་སྦྱོར་བར་མཛད་ཅིང་། ལྟོ་གོས་ཀྱི་མཐུན་རྐྱེན་ཞན་པ་དག་ལ་མཚམས་རྒྱགས་ཉིད་ཀྱིས་བསྩལ་བ་སོགས་བཀའ་དྲིན་གསུམ་གྱིས་ལེགས་པར་བསྐྱངས་པས་ཐུགས་སྲས་རྟོགས་པ་མཆོག་ལྡན་གྱི་རྣལ་འབྱོར་མང་རབ་བྱོན། ལུགས་གཉིས་ཀྱི་མཁྱེན་སྒོ་ཡངས་པས་རྫ་ཁོག་ཏུ་ལེགས་དགོན་གསང་ཆེན་སྨིན་གྲོལ་ཆོས་གླིང་ཕྱག་འདེབས་དང་། གདན་ས་གོང་མར་རྟེན་བཞེངས་དུས་མཆོད་ཀྱི་རྒྱུན་གསར་དུ་བཙུགས་པ། གྲུབ་དབང་རིན་པོ་ཆེའི་ཡང་སྲིད་གསེར་ཁྲིར་བཀོད་དེ་སྐྱེད་སྲིང་གནང་བ་བཅས་བསྟན་འགྲོའི་འགྲོ་དོན་ཕྱོགས་བརྒྱར་སྤེལ། གསུང་ལས་སྐྱེས་པའི་ཞལ་སློབ་གཙོ་བོ་ནི་རྫོགས་སྤྲུལ་གཉིས་པ་འགྱུར་མེད་ཐེག་མཆོག་བསྟན་འཛིན་དང་། རྗེ་དབོན་པད་མ་ཀུན་གྲོལ་རྣམ་རྒྱལ་རྣམ་གཉིས་ཏེ་ཐུགས་སྲས་ཐུ་བོ་རྣམ་གཉིས་དང་། གཞན་ཡང་ཉི་གྲགས་རྒྱལ་སྲས་ཨོ་རྒྱན་བསྟན་འཛིན། ཉི་སྤྲུལ་གཉིས་པ་པདྨ་ཐེག་མཆོག་བསྟན་པའི་རྒྱལ་མཚན་སོགས་བཀའ་ཆོས་ཀྱིས་འབྲེལ་བའི་སློབ་ཚོགས་མཐའ་ཡས་པས་མདོ་སྨད་ཀྱི་ཁྱོན་ཀུན་ཁྱབ། མཐར་རབ་བྱུང་བཅུ་གཉིས་པའི་མེ་ཕོ་རྟའི་ལོར་སྐུ་ཚེ་དང་འགྲོ་དོན་མཐའ་རུ་ཕྱིན་ནས་དགོངས་པ་ཆོས་དབྱིངས་སུ་ཐིམ་པའི་ཚུལ་བསྟན། གདུང་དང་རིང་བསྲེལ་མང་དུ་འཕེལ་ཞིང་ཐུགས་ལྗགས་སྤྱན་གསུམ་མེས་མ་ཉམས་པར་མཆོད་པའི་རྟེན་སྐལ་དུ་བསྩལ་བ་བཅས་ཐེག་རྩེ་གསང་བའི་ཉེ་ལམ་ནས་ཀ་དག་ཆོས་སྐུའི་རྒྱལ་སར་དངོས་སུ་གཤེགས་པར་མཛད་དོོ། །དེ་ལྟར་དཔོན་སློབ་ནམ་མཁའ་འོད་གསལ་ནས་སྨིན་གྲོལ་བསྟན་པའི་སྲོག་འཛིན་གྲུབ་དབང་མཆོག་གི་སྤྲུལ་སྐུ་འགྱུར་མེད་ཐེག་མཆོག་བསྟན་འཛིན་དང་རྗེ་དབོན་པདྨ་ཀུན་གྲོལ་རྣམ་གཉིས་ཏེ།

གདན་རབས་གསུམ་པ། རྫོགས་ཆེན་སྐུ་ཕྲེང་གཉིས་པ་འགྱུར་མེད་ཐེག་མཆོག་བསྟན་འཛིན་ནི།

རབ་བྱུང་བཅུ་གཉིས་པའི་མྱོས་ལྡན་ཞེས་པ་ས་མོ་ཡོས་ཀྱི་ལོ་སྟེ་སྤྱི་ལོ་༡༦༩༩བར་ཟླ་ཀླུང་དལ་གྱིས་འབབ་པའི་ཉེ་འགྲམ་འབྲས་ལྡན་མེ་ཏོག་བཞད་པའི་སྐྱེད་ཚལ་ཞིག་ཏུ་སོག་པོ་ཨོ་རོད་རྒྱལ་པོའི་སྲས་རྒྱུད་དུ་སྐུ་འཁྲུངས། གོང་མའི་ཐུགས་སྲས་རྣམས་དང་འཇིགས་བྲལ་ཚངས་པ་སྡེ་དགེ་ཆོས་རྒྱལ་ཆེན་མོ་བཅས་ཀྱིས་བོད་ཡུལ་དབུས་ལྗོངས་ཀྱི་ལྷ་བླར་དགོངས་རྟགས་ཕུལ་བས་གྲུབ་དབང་དམ་པའི་སྐྱེ་སྲིད་འཁྲུལ་མེད་དུ་བཀས་བཅད་ཅིང་། སྨིན་གླིང་ནས་འགྱུར་མེད་ཐེག་མཆོག་བསྟན་འཛིན་དང་། རྡོ་བྲག་ནས་པདྨ་ཐེག་མཆོག་བསྟན་འཛིན་རྒྱ་མཚོ་ཞེས་མཚན་གྱི་ཅོད་པཎ་གསོལ། རིང་མིན་གདན་ས་ཆེན་མོར་སྤྱན་དྲངས་ཏེེ་འཇིགས་མེད་གདོང་ལྔས་བཏེགས་པའི་ཁྲི་འཕང་མཐོན་པོར་མངའ་གསོལ་ཞིང་། གོང་མའི་ཐུགས་སྲས་ཐུ་བོ་དཔོན་སློབ་ནམ་མཁའ་འོད་གསལ་དང་རབ་འབྱམས་བསྟན་པའི་རྒྱལ་མཚན་གཉིས་ནས་གཙུག་ཕུད་བཞེས་ཏེ་པདྨ་དབང་ཆེན་དང་པདྨ་དབང་དྲག་ཞེས་མཚན་འབུལ་མཛད། རིམ་པར་སྐྱེས་མཆོག་བླ་མ་རྣམ་གཉིས་ལས་བཀའ་གཏེར་གྱི་སྨིན་གྲོལ་གང་མང་བཞེས་མཚམས། དུགུང་གྲངས་བཅུ་གཅིག་པ་ས་མོ་གླང་གི་ལོར་དབུས་ཕྱོགས་སུ་ཆིབས་ཁ་ཕྱོགས། ཐོག་མར་སྲིན་རྫོང་འོད་གསལ་སྒྲུབ་སྡེར་ཕེབས་པས་གཏེར་ཆེན་ཉི་མ་གྲགས་པ་དང་མཇལ། གཏེར་ཆེན་མཆོག་ནས་དགྱེས་བརྩེས་བསྙེན་བཀུར་ཕུན་སུམ་ཚོགས་པ་དང་བཅས་རང་གཏེར་ཕལ་ཆེར་གྱི་སྨིན་དབང་བསྩལ། གཞན་ཡང་རྒྱལ་སྲས་ཨོ་རྒྱན་བསྟན་འཛིན་དང་འབྲི་གུང་དཀོན་མཆོག་ཕྲིན་ལས་ལས་གཤིན་རྗེ་ཁྲོ་ཆུ་སོགས་བཀའ་ཆོས་འགའ་གསན་ནས་ལྷ་སར་ཕེབས། རྟེན་གསུམ་གཙུག་ལག་ཁང་རྣམས་སུ་མཆོད་པ་རྒྱས་འབུལ་དང་བཅས་རྡོར་སྨིན་དུ་ཞབས་བསྐྱོད། དེར་རིག་འཛིན་གཏེར་བདག་གླིང་པ་ལས་རྗེ་ཉིད་ཀྱི་ཟབ་གཏེར་ཐུགས་ཆེན་བདེ་གཤེགས་ཀུན་འདུས་གཙོས་བཀའ་གཏེར་གྱི་སྨིན་ཁྲིད་མཐའ་ཡས་པ་གསན་བཞེས་མཛད་པས་མཐུ་སྟོབས་དབང་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེ་ཞེས་མཚན་གསོལ་བ་དང་། ཉིད་གཏེར་ལས། ལང་གྲོའི་སྤྲུལ་པ་པདྨ་དྲག་པོའི་མིང༔ རྣལ་འབྱོར་འཛིན་པ་མདོ་ཁམས་སྨད་ནས་འབྱུང༔ ཞེས་ལུང་ཟིན་རྩ་བའི་ཆོས་བདག་ཏུ་ངོས་འཛིན་མངའ་གསོལ་མཛད། གཞན་ཡང་སྔ་ཕྱི་རྣམས་སུ་རྒྱལ་དབང་སྐལ་བཟང་རྒྱ་མཚོ་དང་། ངོར་མཁན་ཆེན་དཔལ་ལྡན་ཆོས་སྐྱོང་། ཞྭ་དམར་ཆོས་ཀྱི་དོན་འགྲུབ། ལོ་ཆེན་དྷརྨ་ཤྲཱི། རྒྱལ་སྲས་འགྱུར་མེད་རྒྱ་མཚོ། གླིང་གཏེར་པདྨ་དབང་ཕྱུག །སྟག་བླ་ཀུན་བཟང་བློ་གྲོས། དཔལ་རི་བ་ཀུན་བཟང་འོད་ཟེར། གྲ་ཐང་མཁན་ཀུན་དགའ་མཁྱེན་བརྩེ། བཤེས་གཉེན་འགྱུར་མེད་སྐལ་བཟང་སོགས་ཡོངས་འཛིན་བཅུ་ཕྲག་བཞི་ལྷག་ལས་མདོ་སྔགས་བསྟན་བཅོས་ཀྱི་འཆད་རྒྱུན། བཀའ་གཏེར་སྨིན་གྲོལ་གྱི་དབང་ཁྲིད། རྒྱལ་བའི་བཀའ་འགྱུར་རིན་པོ་ཆེའི་བཀླག་ལུང་སོགས་ཆོས་ཚུལ་རྒྱ་མཚོ་ལྟ་བུ་གསན་བཞེས་གནང་བས་ཐོས་པའི་ཕ་མཐར་སོན། ཁྱད་པར་དཔོན་སློབ་ནམ་མཁའ་འོད་གསལ་ལས་རྗེ་གོང་མའི་གསུང་སྒྲོས་ཀྱི་ཟབ་གནད་སྙན་ནས་སྙན་དུ་བརྒྱུད་པའི་གདམས་ཟབ་དང་། ཕྱག་བཞེས་ཕྲ་རགས་ཀྱི་ཟབ་གནད་བྱིན་རླབས་ཀྱི་ཚན་ཁ་མ་ཉམས་པ་ཐམས་ཅད་བུམ་པ་གང་བྱོའི་ཚུལ་དུ་གསན་པས་རྗེ་འདི་དང་གཏེར་ཆེན་འགྱུར་མེད་རྡོ་རྗེ་རྣམ་གཉིས་བཀའ་དྲིན་ཁྱད་འཕགས་ཀྱི་རྩ་བའི་བླ་མར་འཛིན། དེ་མཚུངས་ཉམས་ལེན་ཏིང་ངེ་འཛིན་གྱི་རྣལ་འབྱོར་ལ་སྐུ་ཚེ་གང་པོར་ཆད་མེད་ཆུ་བོའི་རྒྱུན་བཞིན་བརྩོན་པར་མཛད་དེ། སྐུ་ན་ཆེས་གཞོན་པའི་དུས་ནས་བསྙེན་མཚམས་ལོ་གཉིས་དང་། ཕྱིས་སྐུ་ཚེའི་གེགས་འཕྲང་སེལ་ཕྱིར་བཅད་རྒྱ་ལོ་གཅིག ཁྱད་པར་རབ་བྱུང་བཅུ་གཉིས་པའི་བློ་ངན་ལྕགས་བྱའི་མཇུག་ནས་ཤིང་ཕག་བར་ལོ་ངོ་བཅོ་ལྔའི་རིང་། སྔ་ཕྱིའི་ཆོས་ཐུན་ཕུད་ཉིན་མཚན་ཀུན་ཏུ་རྒྱུད་སྡེ་བཞི་དྲུག་གི་ལྷག་ལྷ་དུ་མའི་བསྙེན་སྒྲུབ་ཚད་འཁྱོལ་མཛད་པས། འཁོར་འདས་ཀྱི་སྣང་ཆ་ཐམས་ཅད་དག་པ་རབ་འབྱམས་སྒྱུ་འཕྲུལ་ལྷའི་ཕྱག་རྒྱ་དང་དབྱེར་མི་ཕྱེད་པའི་བརྟན་པ་ཐོབ། འོད་གསལ་རྫོགས་པ་ཆེན་པོ་ཀ་དག་ལྷུན་གྲུབ་ཀྱི་གནད་ལ་ཉམས་བཞེས་རྒྱུན་ཆགས་སུ་མཛད་པས་རྟོགས་ཚོགས་ཡེ་ཤེས་ཀྱི་ངོ་བོར་འབྱམས་སུ་ཀླས་ནས་ཀུན་བཟང་ཆོས་སྐུའི་དགོངས་པ་མངོན་དུ་བརྙེས། དེ་ལས་ལྡང་བ་རྗེས་ཐོབ་སྒྱུ་མ་ལྟ་བུའི་རོལ་རྩལ་གྱི་ངང་ནས་བསྟན་འགྲོའི་ལེགས་བྱས་ཕྱོགས་བརྒྱར་སྤེལ་བར་མཛད་ཚུལ་ནི། དགུང་ལོ་ཞེ་གཉིས་པ་ལྕགས་སྤྲེལ་ལ་རྗེ་དབོན་པདྨ་གདན་ཚབ་ཏུ་བསྐོས་ཏེ་དབུས་ཕེབས་ཕྱི་མ་མཛད་ཅིང་། སྐབས་དེར་ས་ངོར། འབྲི་སྟག རྡོར་སྨིན་སོགས་གདན་ས་ཆེ་ཆུང་ཕལ་མོ་ཆེ་ལ་མཆོད་སྤྲིན་རྒྱ་ཆེ་བ་དང་། ཁྱད་པར་ལྷ་ལྡན་དུ་མཉན་ཡོད་མཆོད་པའི་དུས་སྟོན་དང་། རྒྱལ་མཆོག་ལྔ་པའི་འདས་མཆོད་ཀྱི་ཚོགས་ཆེན་ལ་འགྱེད་འབུལ་མང་བསྐོལ་ཕུན་སུམ་ཚོགས་པས་བསྙེན་བཀུར། རྒྱལ་མཆོག་བདུན་པ་སྐལ་བཟང་རྒྱ་མཚོས་ཐུགས་བརྩེའི་གཟིགས་པ་ཚད་མེད་པས་ཕོ་བྲང་ཆེན་མོའི་ནང་རྟེན་ལས་རྟེན་གསུམ་གདམ་ཀ་མཛད་དེ་གནང་སྦྱིན་བསྩལ། སྐབས་དེར་རྗེ་ཉིད་ལ་དམ་ཅན་ནོར་སྒྲུབ་ཀྱིས་རང་གཟུགས་དངོས་སུ་བསྟན་ཏེ་ལུང་བསྟན་པས་ཐུབ་སྐུ་གཡུ་ཐོད་མ་དང་། ཆབ་ལྡེའུ་དཀར་ནག་ཁྲ་གསུམ་སོགས་མི་མིན་འཕྲུལ་གྱི་རྟེན་རྫས་སྣ་ཚོགས་མདོ་སྨད་སྤྱིའི་བསོད་ནམས་ཀྱི་བགོ་སྐལ་དུ་སྤྱན་དྲངས་པ་བཅས་ལེགས་བྱས་འགྲན་ཟླ་བྲལ་བ་གངས་ཅན་སྐྱེ་རྒུའི་རྣ་ལུང་མཛེས་པའི་རྒྱན་དུ་བཏགས་པར་མཛད་དེ་རང་དགོན་དུ་ཞབས་པད་བཀོད། དེ་ནས་ལོ་འགར་རྒྱང་ཕེབས་མ་མཛད་པར་རྒྱལ་བཀའ་རིན་པོ་ཆེ་ལན་གཉིས་དང་རྙིང་རྒྱུད་ཚར་ལྔ་གཙོས། བཀའ་དགོངས། མདོ་དབང་། མཛོད་བདུན་བཅས་ཀྱི་བཀླག་ལུང་འཆད་ཁྲིད་རྒྱ་ཆེར་གནང་ཞིང་། སྐབས་དེ་དག་ཏུ་རྡོ་རྗེའི་ལྗགས་ལ་ལྷག་ལྷས་དངོས་གྲུབ་སྟེར་བ་ལྟར་སྒྲ་དག་མྱུར་མགྱོགས་གཞན་མཚུངས་དང་བྲལ་བས་ཐམས་ཅད་ངོ་མཚར་གྱི་གནས་ལ་བཀོད་པར་བྱས། གཞན་ཡང་སྐྱེ་དགུའི་བསོད་ནམས་ཀྱི་ཞིང་དུ་སངས་རྒྱས་བྱང་སེམས་དང་། ཡི་དམ་ཆོས་སྐྱོང་གི་སྐུ་བརྙན་སྣ་ཚོགས་འབུར་བཟོས་རས་བྲིས་བཅས་དངོས་གཙང་བ་བརྒྱ་ཕྲག་དུ་མ་དང་། གསུང་རྟེན་དུ་བཀའ་བསྟན་གྱི་གླེགས་བམ་སྟོང་ཕྲག་ལྷག་བརྒལ་བ། ཐུགས་རྟེན་དུ་རྗེ་བླ་མ་ནམ་མཁའ་འོད་གསལ་གྱི་གསེར་གདུང་ཁྱད་འཕགས་སོགས་སྐུ་གསུང་ཐུགས་རྟེན་མཆོད་རྫས་ཡོ་བྱད་བསམ་མི་ཁྱབ་པ་གསར་བཞེངས་མཛད། དེས་ཀྱང་མ་ཚད་པར་རྒྱུན་འཛུགས་མར་མེ་སྟོང་མཆོད་དང་། སཙྪ། རྡོ་འབུམ། སྦྱིན་སྲེག །དར་ལྕོག་སོགས་འབྱུང་བ་ཆེན་མོའི་བྱེད་པའང་དགེ་པའི་ཆོས་ལ་བསྒྱུར་ནས་མཐའ་ཡས་པའི་སེམས་ཅན་བྱང་གྲོལ་གྱི་ལམ་ལ་བཀོད། མདོར་ན་རྗེ་འདི་མཁས་བཙུན་བཟང་གསུམ། འཆད་རྩོད་རྩོམ་གསུམ། མཁྱེན་བརྩེ་ནུས་གསུམ་སོགས་ཚུལ་དགུའི་ཡོན་ཏན་ལ་རང་དབང་འབྱོར་བས་རྫོགས་ཆེན་མཁའ་འགྲོ་སྙིང་ཐིག་གི་སྔོན་འགྲོའི་ཁྲིད་ཡིག་ཐར་ལམ་བགྲོད་བྱེད་ཤིང་རྟ་བཟང་པོ་སོགས་འཆོས་སྐྱོབས་གཉིས་ལྡན་གྱི་བསྟན་བཅོས་ཀྱང་པུསྟི་གཉིས་ཙམ་མཛད། གསུང་གིས་བསྐྱངས་པའི་ཞལ་སློབ་འབར་ཆུང་བཀྲ་ཤིས་རྒྱ་མཚོ། རྡོ་བྲག་སྐལ་བཟང་དབང་ཕྱུག །དཔལ་རི་སྤྲུལ་སྐུ། ཟུར་སྤྲུལ་གསུམ་པ་ཕྲིན་ལས་རྒྱ་མཚོ། ཀཿཐོག་དྲི་མེད་ཞིང་སྐྱོང་མགོན་པོ། ཉི་སྤྲུལ་པདྨ་ཐེག་མཆོག དཔོན་སློབ་གཉིས་པ་གསང་སྔགས་བསྟན་འཛིན། རབ་འབྱམས་འགྱུར་མེད་ཀུན་བཟང་རྣམ་རྒྱལ། ཁམས་སྤྲུལ་རིན་པོ་ཆེ་གོང་འོག །ཉི་གྲགས་རྒྱལ་སྲས་ཨོ་རྒྱན་བསྟན་འཛིན། རྗེ་བཙུན་མ་མི་འགྱུར་དཔལ་སྒྲོན་སོགས་མཁས་པའི་གྲགས་སྙན་ཐོབ་པ། སྒྲུབ་པའི་རྒྱལ་མཚན་འཛིན་པ། བསྟན་པ་དར་རྒྱས་སུ་སྤེལ་བའི་སྐྱེས་ཆེན་དུ་མ་བྱོན། དགུང་གྲངས་ང་དགུ་བཞེས་པ་མེ་གླང་ལོར་བསྟན་འགྲོའི་འགྲོ་དོན་ཐོག་གཅིག་རྫོགས་པའི་ཚུལ་གྱིས་སྐུ་མྱ་ངན་ལས་འདའ་བར་ཕྱོགས་ཤིང་། འདུས་ཚོགས་ཡོངས་ལ་སོ་སོའི་སྐལ་བ་དང་འཚམས་པའི་བསླབ་བྱ་ཞལ་ཆེམས་རྒྱ་ཆེར་བསྩལ་བ་དང་། ཁྱད་པར་རྗེ་དབོན་རིན་པོ་ཆེ་པདྨ་ཀུན་གྲོལ་ལ་གདན་སའི་ཁུར་དང་དོན་བརྒྱུད་ཀྱི་བསྟན་པ་གཏད་ནས་ཧོར་ཟླ་བཅུ་པའི་ཚེས་བཅོ་བརྒྱད་ལ་ཆོས་སྐུའི་གཟིགས་སྟངས་དང་བཅས་ཐེག་རྩེ་གསང་བའི་ཉེ་ལམ་ནས་ནང་གསལ་གཞོན་ནུ་བུམ་སྐུར་ཐིམ་པར་གྱུར་ཏོ། །

གདན་རབས་བཞི་པ། རྗེ་དབོན་པདྨ་ཀུན་གྲོལ་རྣམ་རྒྱལ་ནི།

དམ་པ་འདི་ཉིད་ནི་རིག་འཛིན་ཉི་མ་གྲགས་པའི་གཏེར་ལུང་ལས། པདྨ་མཁའ་འགྲོས་བྱིན་གྱིས་བརླབས་པའི་བུ༔ མདོ་ཁམས་ཕྱོགས་སུ་རྒྱལ་གྱི་མིང་ཅན་འབྱུང༔ ཞེས་དང་། ལྷ་སྲས་སྤྲུལ་བས་བསྟན་པ་ཕན་པར་སྐྱོང༔ ཞེས་སླུ་མེད་རྡོ་རྗེའི་ལུང་གིས་ཡང་ཡང་བསྔགས་པ་ལྟར་བོད་རབ་བྱུང་བཅུ་གཉིས་པའི་ནང་ཚན་མེ་ཕོ་ཁྱིའི་ལོ་སྟེ་སྤྱི་ལོ་༡༧༠༦གི་ལོར། ཡུལ་ནག་ཤོད་ཀྱི་སའི་ཆར་གྲུབ་དབང་ནམ་མཁའ་འོད་གསལ་གྱི་དབོན་རྒྱུད་དུ་སྐུ་བལྟམས། དགུང་ལོ་བཞི་ལ་སོན་སྐབས་རིག་འཛིན་ཉི་མ་གྲགས་པ་མཇལ་བས་གཏེར་ཆེན་བདུད་འདུལ་རྡོ་རྗེའི་རྣལ་རོལ་ཏུ་ངོས་འཛིན་གནང་ནས་ཐུགས་རྒྱུད་བྱིན་གྱིས་བརླབས། མནལ་ལམ་ཞིག་ཏུ་སྟོན་མཆོག་ཤཱཀྱའི་རྒྱལ་པོས་འགྲོ་བ་འདི་རྣམས་འདྲེན་པར་གྱིས་ཞེས་དབུགས་དབྱུང་ལུང་བསྟན་ཐོབ། བྱིས་པའི་དུས་སུ་དཔལ་མགོན་སེང་གེའི་གདོང་ཅན་གྱི་བཀའ་སྡོད་དུས་མཚན་ཕོ་མོ་གཉིས་ཀྱིས་མངོན་སུམ་རྩེད་གྲོགས་དང་ཕྱག་མཚན་ཐོ་དབྱུག་ཞིག་ཕུལ་བ་ཕྱིས་སུ་ཡབ་ཚང་དུ་དངོས་སུ་མཇལ་རྒྱུ་ཡོད། གཞན་ཁྱབ་འཇུག་རཱ་ཧུ་ལས་དངོས་ཉམས་རྨི་ལམ་ཀུན་ཏུ་ཞལ་བསྟན་ནས་ཁུ་བོ་བླ་མའི་དྲུང་དུ་མྱུར་བར་སོང་ཤིག་ཅེས་ཡང་ཡང་བསྐུལ་བ་དང་། དེ་བཞིན་མིག་དམར་ཕྱག་བཞི་པ་ཞིག་གིས་སྐབས་དང་སྐབས་སུ་སྐྱོ་གྲོགས་བྱེད་ཅིང་སྤྲོ་བ་བསྲིངས་པ་སོགས་བཀའ་སྲུང་ལས་བྱེད་ཕོ་ཉ་ལུས་དང་གྲིབ་བཞིན་མི་འབྲལ་བར་བུ་བཞིན་བསྐྱངས། དེ་ནས་དགུང་ལོ་བཅུ་དྲུག་པ་ལྕགས་གླང་ལོར་རུ་དམ་ཨོ་རྒྱན་བསམ་གཏན་ཆོས་གླིང་དུ་ཕེབས་ཏེ་ཁྱབ་བདག་ནམ་མཁའ་འོད་གསལ་དང་མཇལ། ངེས་པར་འབྱུང་བའི་བློས་རབ་ཏུ་བྱུང་བའི་དངོས་པོར་བསྒྲུབས་པས་མཚན་པདྨ་ཀུན་གྲོལ་དུ་གསོལ། ཡོངས་འཛིན་སློབ་དཔོན་ཨོ་རྒྱན་ཡོངས་གྲོལ་ལས་བརྡ་སྤྲོད་སྙན་སུམ་སོགས་ཐུན་མོང་གི་རིག་གནས་ཡོངས་ལ་སྦྱངས་པ་མཐར་སོན་མཛད། དེ་སྐབས་དཔལ་རྟ་མགྲིན་ནག་པོ་མེ་དཔུང་གི་ཀློང་ན་བཞུགས་པ་རི་རབ་ཀྱི་གཏོས་དང་མཉམ་པ་ཞིག་གིས་ཞལ་གཟིགས་ཐོག་མར་གནང་ཞིང་ཕྱིས་སུའང་ཡི་དམ་འདིས་ཞལ་གཟིགས་ལན་གྲངས་ལྔ་ཙམ་ཐོབ། རིམ་པར་དཔོན་སློབ་ཀྱི་མདུན་ནས་ཟབ་གསང་དཀོན་མཆོག་སྤྱི་འདུས་དང་རྫོགས་ཆེན་མཁའ་འགྲོ་སྙིང་ཐིག་གི་དབང་ཁྲིད་ཆིག་བརྒྱུད་དུ་གསན་ནས། ལྟ་སྒོམ་གྱི་སྒྲོ་འདོགས་བཅད་དེ་ཉམས་ལེན་ལ་རྡོ་རུས་གཏུགས་པས་རྟོགས་པའི་གདེང་ཚད་བརྙེས། དཔོན་སློབ་རིན་པོ་ཆེ་དགྱེས་ཉམས་ཆེན་པོས་ངའི་དབོན་འདི་ཕོ་རྒོད་ཡང་རབ་ཅིག་ཡོང་བར་འདུག་ཅེས་ཡང་ཡང་བསྔགས་བརྗོད་མཛད། སྐབས་དེར་དུས་ཟིང་གི་དབང་གིས་སྨིན་གླིང་རྒྱལ་སྲས་རིན་པོ་ཆེ་ཁམས་ཕྱོགས་སུ་ཕེབས་པ་ལས་སྙན་རྒྱུད་རྡོ་རྗེ་ཟམ་པ་སོགས་བཀའ་གཏེར་གྱི་ཆོས་ཚུལ་མང་པོ་གསན་ཞིང་མཚན་འགྱུར་མེད་པདྨ་བསྟན་འཛིན་དུ་གསོལ། དགུང་ལོ་ཉེར་གཅིག་པ་མེ་རྟ་ལོར་དབུས་ཕྱོགས་སུ་ཕེབས་ཤིང་རྟེན་གཙོ་ཇོ་ཤཱཀ་རྣམ་གཉིས་གཙོས་ཆོས་སྡེ་གནས་ཆེན་ཡོངས་ལ་མཆོད་སྤྲིན་རྒྱ་ཆེར་སྤྲོས་ཏེ་བསྟན་འགྲོར་སྨན་པའི་ཐུགས་སྨོན་གནང་བ་དང་། རིས་སུ་མ་ཆད་པའི་དགེ་བའི་བཤེས་གཉེན་དུ་མ་ལས་མདོ་སྔགས་ཀྱི་ཆོས་ཚུལ་མཐའ་ཡས་པ་གསན་བསམ་མཐར་ཕྱིན་མཛད། སྐབས་དེར་ལྷ་ལྡན་དུ་བཞུགས་པའི་དུས་ཤིག་ལ་སྦས་ཚུལ་འཛིན་པའི་རྣལ་འབྱོར་མ་ཞིག་གིས་བྱིན་གྱིས་བརླབས་ཏེ་སྙན་བརྒྱུད་ཀྱི་གདམ་པ་གཏད་ནས་ལྟ་སྒོམ་ངོ་སྤྲོད་གནང་བས་ཕྲ་རགས་ཀྱི་རྟོག་པ་ཆོད། སྣང་སེམས་རོ་གཅིག་ཏུ་འདྲེས། ལྟ་བ་ཀློང་དུ་གྱུར་ཏེ་ཐུགས་དམ་ལ་བོགས་ཐོན་ཆེན་པོ་བྱུང་། གཞན་ཡང་སྐབས་འདི་དག་ཏུ་དཔའ་བོ་མཁའ་འགྲོས་ཞལ་གཟིགས་དང་། གྲུབ་པའི་སྤྱོད་པས་འདྲེ་སྲིན་དམ་ལ་བཞག་པ་སོགས་ངོ་མཚར་བའི་མཛད་པ་མཐའ་ཡས་པ་སྣང་། སླར་ཞབས་པད་མདོ་སྨད་དུ་ཕྱིར་ཕྱོགས་པའི་ལམ་ཞོར་དུ་གཏེར་ཆེན་གདན་ས་སྲིན་རྫོང་འོད་གསལ་སྒྲུབ་སྡེར་ཕེབས་ཏེ་རྒྱལ་སྲས་ཨོ་རྒྱན་བསྟན་འཛིན་དང་མཇལ། ཕན་ཚུན་ཐུགས་བརྩེ་ཆེན་པོས་དབང་ལུང་ཟབ་ཁྲིད་ཀྱི་རྒྱུན་འབུལ་རེས་མཛད་པ་བཅས་རིམ་པར་རུ་དམ་རྫོགས་ཆེན་དགོན་དུ་ཕྱག་ཕེབས། དཔོན་སློབ་གཞན་དོན་དུ་གཤེགས་ཀྱང་ཡང་སྲིད་མཆོག་སྤྲུལ་གསང་སྔགས་བསྟན་འཛིན་དང་མཇལ། གདན་སར་ཐོག་གཅིག་བཞུགས་རྗེས་གཏེར་ཆེན་གདན་ས་སྟག་མོ་དགོན་སྐལ་བཟང་ཕུན་ཚོགས་གླིང་དུ་ཕེབས། དེར་རྒྱལ་ཚབ་བློ་གྲོས་ལས་ཉི་གྲགས་གཏེར་ཆོས་སོགས་སྨིན་གྲོལ་ཟབ་ཁྲིད་ཀྱི་རྒྱུན་མཐའ་ཡས་བཞེས་པ་དང་། གཏེར་ཆེན་མཆོག་གི་འབྱུང་འགྱུར་གཟིགས་པའི་ལུང་བསྟན་དང་མཐུན་པར་ཆེ་མཆོག་དཔལ་དགུའི་སྐུ་བརྙན་དངོས་གཙང་བ་བཞེངས། རབ་གནས་མཛད་པའི་ཉིན་དེར་སྐུ་རྟེན་པ་ཞིག་ལ་ཆོས་སྐྱོང་ཐོག་བབ་དང་པོ་བྱུང་བ་བཅས་རྟེན་འབྲེལ་དགེ་བའི་མཚན་མ་མངོན་དུ་གྱུར། དེ་ནས་བྱ་བཏང་བརྟུལ་ཞུགས་ཀྱི་སྤྱོད་པས་འཛིང་དཀར་དང་། རྟ་ཁོག་ཕ་ཝང་བོན་མོ་སོགས་ངེས་མེད་ཀྱི་གཉེན་ཁྲོད་དུ་མར་བཞུགས་ནས་ཐུགས་དམ་བོགས་འདོན་མཛད། དགུང་གྲངས་སོ་ལྔ་པ་ལྕགས་སྤྲེ་ལོར་འགྱུར་མེད་ཐེག་མཆོག་བསྟན་འཛིན་དང་། པདྨ་གསང་སྔགས་བསྟན་འཛིན་ཏེ་རྗེ་དཔོན་རྣམ་གཉིས་ཀྱི་སྤྲུལ་བའི་སྐུ་མཆོག་ཟུང་དབུས་ཕྱོགས་སུ་ཆིབས་སྐྱོད་གནང་བས་གདན་ས་ཆེན་མོར་རྒྱལ་ཚབ་ཏུ་བཞུགས་རྒྱུའི་ཞུ་བསྐུལ་བྱུང་བ་ལྟར། སླར་ཡང་རང་དགོན་དུ་ཕེབས་ཏེ་ལོ་ངོ་གཉིས་ཙམ་ལ་གཙུག་ལག་ཟུང་གི་མཛད་པ་རྒྱ་ཆེར་བསྐྱངས། འདི་སྐབས་ཤིག་ལ་སྔར་གཏེར་ཆེན་ཉི་གྲགས་རིན་པོ་ཆེས་གླང་ཐང་སྒྲོལ་མ་ནས་གཏེར་བཞེས་མཛད་པའི་སྒྲོལ་མའི་སྐུ་བརྙན་བྱིན་ཅན་ཞིག་ཡོད་པ་གཏེར་ཆེན་གྱིས་དཔོན་སློབ་ལ་གནང་ཞིང་། དཔོན་སློབ་ནས་རྗེ་དབོན་ཉིད་ལ་གནང་བ་རྒྱུན་དུ་འབྲལ་སྤངས་མཛད་དེ་ཤིན་ཏུ་ཐུགས་རྩིས་ཆེ་བ་ཞིག་ཡོད་ཀྱང་། ནུབ་གཅིག་རྗེ་ཉིད་བློན་པོ་མགར་གྱི་སྐྱེ་བ་བཞེས་དུས་རྒྱ་བལ་གྱི་ཡུལ་གྲུར་བྱོན་ལུགས་དང་། རིག་པའི་འཕྲུལ་གྱིས་རྒྱ་བལ་བཏུལ་ཏེ་ཇོ་ཤཱཀ་རྣམ་གཉིས་བོད་དུ་སྤྱན་དྲངས་ཚུལ་སོགས་མངོན་སུམ་སྒྲིབ་མེད་དུ་གཟིགས་པ་བྱུང་ཞིང་། སྒྲོལ་མའི་སྐུ་དེ་གླང་ཐང་རང་དུ་བཞུགས་ན་མདོ་སྨད་འདིར་བགྲང་བྱ་བཅུ་ཕྲག་གཉིས་བར་དུས་ཀྱི་སྐལ་ངན་ཐམས་ཅད་ཞི་ཞིང་བདེ་སྐྱིད་ཕུན་ཚོགས་འབྱུང་བའི་ལུང་བསྟན་དང་། རྒྱལ་ཆེན་བཞིས་ཀྱང་ཞབས་བསྐུལ་ཡང་ཡང་བྱུང་བས་བསྟན་འགྲོར་སྨན་པའི་ཐུགས་བསྐྱེད་དག་པས་གནས་དེར་བཞུགས་སུ་གསོལ་ཞིང་། ཉེ་བའི་ཆར་ཡང་དུས་ངན་ཀྱི་བར་ཆད་སྣ་ཚོགས་བྱུང་བ་ཀུན་ལས་རྣམ་པར་རྒྱལ་ཏེ་སླར་ཡང་གདན་ས་དེ་ཉིད་དུ་ད་ལྟའི་བར་མཇལ་དུ་ཡོད་པ་འདི་དང་། དེ་བཞིན་རྒྱལ་དབང་ཀློང་ཆེན་རབ་འབྱམས་ཀྱི་གསུང་རབ་རིན་པོ་ཆེ་མཛོད་བདུན་ཆ་ལག་དང་བཅས་པ་ཤིང་པར་དུ་བརྐོས་ཏེ་ས་སྐྱོང་སྡེ་དགེའི་རྒྱལ་ཁབ་ཏུ་བཞུགས་སུ་གསོལ་བས་ངེས་དོན་སྙིང་པོའི་བསྟན་ལ་སྨན་པའི་ཕྲིན་ལས་ད་ལྟའི་བར་རྒྱུན་མ་ཆད་པ་བྱུང་བ་འདི་ཉིད་ཁོ་ནའི་བཀའ་དྲིན་ཀྱང་གཞལ་བར་དཀའ་བའི་གནས་སུ་སྣང་ངོ་། །དགུང་གྲངས་སོ་བདུན་བཞེས་པ་ཆུ་ཕོ་ཁྱི་ལོར་རྒྱལ་རོང་རྟག་བརྟན་རྣམ་པར་རྒྱལ་བའི་གླིང་གསར་དུ་ཕྱག་བཏབ། དགེ་སློང་སྐལ་བཟང་དོན་ཡོད་སོགས་འདུས་ཚོགས་དུ་མ་ལ་རྫོགས་ཆེན་མཁའ་འགྲོ་སྙིང་ཐིག་གི་ཉམས་ཁྲིད་བསྩལ་ཏེ་ངེས་དོན་སྙིང་པོའི་བསྟན་པ་ཉིན་བྱེད་ལྟར་གསལ་བར་བྱས། དེ་སྐབས་དབྱིངས་སྣང་འཇའ་གུར་གྱི་ཀློང་ནས་ཀུན་མཁྱེན་ཆོས་རྗེས་ཞལ་གཟིགས་ནས་འོད་གསལ་རྡོ་རྗེ་སྙིང་པོའི་དཀའ་གནད་བཀྲལ་བས་ཟབ་མོའི་གནས་ལ་མི་འཇིགས་པའི་སྤོབས་པ་དང་རྟོགས་པའི་ངོ་བོ་གོང་དུ་འཕེལ་ཏེ་ཀུན་བཟང་དགོངས་པའི་རྒྱལ་སྲིད་ལ་དབང་འབྱོར་བར་གྱུར། དེ་ནས་མི་རིང་བར་ནག་པོའི་རྩ་ལག་སྟོབས་སུ་བདོ་བས་གདན་ས་གོང་མ་རུ་དམ་གྱི་ཆོས་སྡེ་མེའི་འཇིགས་པས་ཉམས་པ་དང་། གྲུབ་དབང་མཆོག་གི་ཡང་སྲིད་ཞིང་དུ་གཤེགས་པ་བཅས་བསྟན་པའི་གོད་ཆག་ཆེན་པོ་སྟབས་གཅིག་ཏུ་བྱུང་བས། སླར་ཡང་གདན་ས་གོང་མར་ཕེབས་ཏེ་བསྟན་བདག་གདན་རབས་བཞི་བའི་གསེར་ཁྲིར་བཞུགས་ཤིང་འདུ་ཁང་ཆེན་མོ་རྟེན་དང་བརྟེན་པ་བཅས་གསར་བཞེངས་གནང་། ཡབ་རྗེ་གོང་མ་དག་གི་དགོངས་རྫོགས་སུ་ས་ཟླའི་བུམ་སྒྲུབ་ཆེན་མོའི་ཚོགས་མཆོད་གསར་འཛུགས་དང་། གྲུབ་དབང་མཆོག་གི་ཡང་སྲིད་གསུམ་པ་ངེས་དོན་བསྟན་འཛིན་བཟང་པོ་རྫ་ཁོག་ཏུ་འཁྲུངས་པ་ངོས་འཛིན་དང་ཆིབས་བསུའི་བཀོད་བཤམས་རྒྱ་ཆེན་པོ་བློས་ར་བ་ལས་འགོང་པ་མཛད་དེ་གསེར་ཁྲིར་མངའ་གསོལ། རིག་འཛིན་གོང་མ་ནས་བརྒྱུད་པའི་ཆོས་བཀའ་ཐམས་ཅད་ལྷག་མེད་དུ་བསྩལ་བ་སོགས་ཕྲིན་ལས་དོན་ཡོད་ཞགས་པས་བསྟན་འགྲོའི་དགེ་མཚན་རླབས་པོ་ཆེ་རང་བཞིན་གྱིས་བསྡུ་བར་མཛད། དགུང་གྲངས་རེ་བརྒྱད་བཞེས་པ་རབ་བྱུང་བཅུ་གསུམ་པའི་ཆུ་སྦྲུལ་ལོར་གདུལ་བྱ་གཞན་དོན་དུ་དགོངས་པ་ཕྱོགས་ཚེ། ཡང་སྲིད་རིན་པོ་ཆེ་ལ་གྲུབ་དབང་རྫོགས་ཆེན་པའི་ཕྱག་དཔེ་ངོ་མ་ཕུར་པའི་པོད་སོགས་སྐུ་གསུང་ཐུགས་ཀྱི་རྟེན་འགའ་ཕྱག་ཏུ་ཕུལ་ནས་འཕྲལ་ཡུན་གྱི་བསླབ་བྱ་མང་པོ་ཞལ་ཆེམས་ཀྱི་ཚུལ་དུ་གསུངས་ཤིང་དོན་བརྒྱུད་ཀྱི་བསྟན་པ་གཏད་དེ་རྒྱལ་རོང་དུ་ཕེབས། དེ་མཚུངས་མཆོག་སྤྲུལ་ནམ་མཁའ་ཚེ་དབང་མཆོག་གྲུབ་ལ་ཉིད་ཀྱི་དབུ་ཞྭ་བེར་ཕོད་སོགས་གནང་སྟེ་ངེད་ཀྱི་བགྱི་འོས་ཐམས་ཅད་ཁྱེད་ཀྱིས་གྱིས་ཤིག་ཅེས་གདན་ས་འོག་མའི་རྒྱལ་ཚབ་ཏུ་མངའ་གསོལ། དེ་མཚམས་སྒྲུབ་ཆེན་འགའི་ཚོགས་དབུར་ཕེབས་ཤིང་སྣང་གྲག་ཐམས་ཅད་འཕགས་མཆོག་ཐུགས་རྗེ་ཆེན་པོའི་གསང་གསུམ་དུ་གཟིགས་པའི་གསུང་འཕྲོས་བསྩལ། མི་རིང་བར་སྐུ་བསྙུན་ཚུལ་དང་བཅས་གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུ་བར་མཛད། གདན་ས་གོང་འོག་ནས་དགོངས་རྫོགས་མཆོད་སྤྲིན་ཚད་མེད་སྤྲོས་ཤིང་སྐུ་གདུང་རིན་པོ་ཆེ་ཞུགས་འབུལ་བྱས་པས། ཐུགས་ལྗགས་སྤྱན་གསུམ་མེས་མ་རྨས་པར་རྟེན་སྐལ་དུ་བསྩལ་བ་བཅས་སྐུ་ཚེ་དེའི་འགྲོ་དོན་ཡོངས་སུ་རྫོགས་པའི་ཚུལ་བསྟན་ཏོ། །ད་དུང་དེ་ལས་ཞིབ་པའི་རྣམ་ཐར་རྒྱས་པ་མཁྱེན་པར་བཞེད་ན་མཁས་བཙུན་ནམ་མཁའ་ཚེ་དབང་མཆོག་གྲུབ་ཀྱིས་མཛད་པའི་རྗེ་བླ་མའི་རྣམ་ཐར་མོས་ལྡན་གདུང་བ་སེལ་བའི་དགའ་སྟོན་དང་། མཁས་མཆོག་གུ་རུ་བཀྲ་ཤིས་ཀྱིས་མཛད་པའི་གྲུབ་དབང་རྫོགས་ཆེན་པའི་ཆོས་འབྱུང་ཆེན་མོ་སོགས་སུ་རྒྱས་པར་གསལ་བས་དེ་དག་ཏུ་སྤྱན་རས་གཡོ་བར་ཞུ། རྗེ་དབོན་པདྨ་ཀུན་གྲོལ་རྣམ་རྒྱལ་གྱི་ཐུགས་སྲས་བརྒྱུད་འཛིན་པ་རྫོགས་སྤྲུལ་གསུམ་པ་ངེས་དོན་བསྟན་འཛིན་བཟང་པོ་དང་མཁས་བཙུན་ནམ་མཁའ་ཚེ་དབང་མཆོག་གྲུབ་རྣམ་གཉིས་ཏེ།

གདན་རབས་ལྔ་པ། རྫོགས་ཆེན་སྐུ་ཕྲེང་གསུམ་པ་ངེས་དོན་བསྟན་འཛིན་བཟང་པོ་ནི།

ངེས་དོན་བསྟན་འཛིན་བཟང་པོ་ཨ་ཏི་བསྟན་པའི་རྒྱལ་མཚན་མཆོག་ནི། སྤྱི་ལོ་༡༧༥༩པ་རབ་བྱུང་བཅུ་གསུམ་པའི་མེ་ཡོས་ལོར། བྱང་ཟླ་ཀླུང་སྔོན་མོ་དལ་གྱིས་འབབ་པའི་ཡུལ་གྱི་བྱེ་བྲག་ཧོ་པ་ཞེས་པའི་ཆར་ཡབ་ཚེའི་རིག་བྱེད་ལ་བྱང་ཆུབ་པ་འགའ་ཞིག་བྱོན་པའི་རྒྱུད་ལས་བཀྲ་ཤིས་འབུམ་བྱ་བའི་སྲས་སུ་སྐུ་འཁྲུངས། གསུང་ངག་བྱེ་བ་ཉིད་ནས་རྗེ་གོང་མའི་ཐུགས་ཀྱི་བག་ཆགས་མ་བརྗེད་པར་རྫོགས་ཆེན་མཆོག་སྤྲུལ་ཡིན་ཚུལ་དང་། སྐུ་འཁོར་གྲྭ་པ་པདྨའི་མིང་འཛིན་གསུམ་ཡོད་ཚུལ་སོགས་ཡང་ཡང་གསུངས་ཤིང་། དབུས་གཙང་ལྷ་བླའི་གསུང་རྟགས་དང་དམ་ཅན་སྐྱེས་བུའི་ལུང་བསྟན། རྗེ་དབོན་བླ་མའི་གསུང་ལུང་རྣམས་གཅིིག་མཐུན་བྱུང་བ་ལྟར་ངོས་འཛིན་ཕུལ། སྤྲུལ་བའི་སྐུས་སྔོན་གནས་རྗེས་སུ་དྲན་པའི་རྣམ་ཐར་བཟང་པོས་གོང་མའི་ཕྱག་དཔེ་དང་རྡོར་དྲིལ། ཕྱག་ཕྲེང་། གསོལ་ཞལ་སོགས་ཉེར་སྤྱོད་རྣམས་ངོས་འཛིན་གནང་བ་དང་། སྔོན་གྱི་མཛད་ཚུལ་སོགས་ངེས་ཤེས་འདྲོངས་པའི་གསུང་འཕྲོས་མང་པོ་བསྩལ་བས་ཐམས་ཅད་ཡང་དུ་ཡིད་ཆེས་ཀྱི་ས་ལ་བཀོད་དེ་དད་པའི་སོར་འདབ་དབང་མེད་དུ་ཟུམ་པར་བྱས། དགུང་གྲངས་བཞི་ལ་སོན་པ་སྣ་ཚོགས་ཞེས་པ་ཆུ་རྟ་ལོར་རྗེ་དབོན་རིན་པོ་ཆེ་དང་ས་སྐྱོང་ཆོས་རྒྱལ་ཆེན་མོ་གཙོས་ཡུལ་སྡེ་དགོན་འབངས་ཡོངས་ཀྱིས་ཕུན་སུམ་ཚོགས་པའི་ཆིབས་བསུ་དང་བཅས་གདན་སར་སྤྱན་དྲངས། ཉི་སྤྲུལ་བསྟན་པའི་རྒྱལ་མཚན་གྱིས་གཙུག་ཕུད་བཞེས་པའི་མཚན་ལ་ཀུན་བཟང་ཐེག་མཆོག་བསྟན་པའི་མགོན་པོ་ཞེས་དང་། རྗེ་དབོན་རིན་པོ་ཆེས་གསེར་ཁྲིར་བཀོད་པའི་མཚན་ལ་ངག་དབང་པདྨ་རྣམ་རྒྱལ་དུ་གསོལ། ས་སྐྱོང་གོང་མ་ངག་དབང་ཀུན་དགའ་བློ་གྲོས་ཀྱིས་ཀྱང་ཆབ་ཤོག་གི་ལམ་ནས་ཞབས་བརྟན་དང་བཅས་རིག་འཛིན་ཕྲིན་ལས་དབང་ཕྱུག་ཨ་ཏི་བསྟན་པའི་རྒྱལ་མཚན་ཞེས་མཚན་འབུལ་གནང་། དགུང་ལོ་བདུན་པར་སྐུ་རྒྱབ་སློབ་དཔོན་ཐེག་མཆོག་ལས་ལྗགས་ཀློག་དང་འདོན་ཆོག་མ་ལུས་པ་བྱང་ཆུབ་པར་མཛད་པ་དང་། དེ་ནས་ཡིད་བཞིན་མཛོད་དང་སྡོམ་གསུམ་སོགས་ཐུགས་འཛིན་གནང་ཞིང་རིམ་པར་ཉི་སྤྲུལ་རྡོ་རྗེ་འཆང་ལས་བླ་མ་དགོངས་འདུས་ཉི་གྲགས་གཏེར་ཆོས་སོགས་བཀའ་གཏེར་ཆོས་ཚུལ་དུ་མའི་སྨིན་དབང་གྲོལ་ཁྲིད་སྣ་ཚོགས་གསན། ཁྱད་པར་ཉི་སྤྲུལ་རིན་པོ་ཆེས་མཁན་པོ་དང་རྗེ་དབོན་མཆོག་ནས་ལས་ཀྱི་སློབ་དཔོན་མཛད་དེ་དགེ་འདུན་ལྔ་ཚོགས་ཀྱི་དབུས་སུ་རབ་ཏུ་བྱུང། མཚན་ངེས་དོན་བསྟན་འཛིན་བཟང་པོར་གསོལ། གཞན་ཡང་རྗེ་དབོན་རིན་པོ་ཆེ་ལས་སྙིང་ཐིག་གོང་འོག་གི་ཉམས་ཁྲིད་གནད་ཡིག་སོགས་གོང་མའི་ཞལ་ཤེས་ཐམས་ཅད་བུམ་པ་གང་བྱོའི་ཚུལ་དུ་བསྩལ་བས་ཐུན་མིན་རིགས་བདག་ཏུ་གྱུར། ཀཿཐོག་དྲི་མེད་ཞིང་སྐྱོང་ལས་བདུད་འདུལ་གཏེར་ཆོས་ཆ་ཚང་བ་དང་། འབར་ཆུང་བཀྲ་ཤིས་རྒྱ་མཚོ་ལས་རྒྱལ་བཀའ་རིན་པོ་ཆེའི་བཀླག་ལུང་། ཉི་གྲགས་གདན་ཚབ་སྐལ་བཟང་དོན་ཡོད་ལས་སྙིང་ཐིག་ཉམས་ཁྲིད་ཟབ་རྒྱས་བཞེས། དེ་མཚུངས་དཔའ་བོ་ལས་རབ་རྩལ། གུ་གུ་བླ་མ་བསྟན་འཛིན་སྙིང་པོ། མཁས་བཙུན་ནམ་མཁའ་མཆོག་གྲུབ་སོགས་དགེ་བའི་བཤེས་གཉེན་དུ་མ་ལས་བཀའ་ཆོས་གྲངས་མང་གསན། དགུང་གྲངས་ཉི་ཤུ་པ་ས་ཁྱི་ལོར་སྐུ་རབས་གོང་མའི་མཛད་སྲོལ་ལྟར་དབུས་ཕྱོགས་སུ་ཆིབས་བསྐྱོད་མཛད། ཇོ་ཤཱཀ་གཉིས་གཙོ་བོར་གྱུར་པའི་ལྷོ་བྲག་ཚུན་གྱི་གཙུག་ལག་ཁང་རྣམས་སུ་མཆོད་སྤྲིན་རྒྱས་སྤྲོས་དང་བསྟན་འགྲོར་ཕན་པའི་ཐུགས་སྨོན་འཕྲིན་བཅོལ་གང་ཟབ་གནང། རྒྱལ་དབང་ཐམས་ཅད་མཁྱེན་པ་འཇམ་དཔལ་རྒྱ་མཚོ་དང་ཁྲི་ཆེན་ནོ་མི་ཧན་གཉིས་ལ་དངོས་རྫས་གཏོས་ཆེན་པོའི་འབུལ་ཚན་ཕུལ་ཞིང་། གཞུང་ས་ནས་ཀྱང་རྗེ་གོང་མ་གཉིས་དང་འདྲ་མཚུངས་ཀྱི་ལུང་ཐམ་གནང་། གདན་ས་ཆེན་མོ་གསུམ་དང་སྨོན་ལམ་འདུས་ཚོགས་ལ་མང་ཇ་དངུལ་འགྱེད་གྱ་ནོམ་པ་དང་བཅས་ལྷོ་བྲག་ཕྱོགས་སུ་ཕེབས་ཏེ། ལྷོ་བྲག་ཐུགས་སྲས་ལས་པད་གླིང་ཆོས་སྐོར་དང་། གྲུབ་ཆེན་པདྨ་བཤེས་གཉེན་ལས་བྱང་གཏེར་སོགས་རྙིང་ཆོས་འགའ། སྨིན་གླིང་མཁན་ཆེན་ལས་བསྙེན་པར་རྫོགས་ཤིང་གཏེར་ཆེན་ཡབ་སྲས་ཀྱི་ཆོས་སྐོར་ཡོངས་རྫོགས་གསན་པ་སོགས་ཆོས་སྲིད་ཀྱི་ལེགས་ཚོགས་གོང་འཕེལ་ངང་མདོ་ཁམས་སུ་ཞལ་ཕྱིར་ཕྱོགས། ཀུན་མཁྱེན་འཇིགས་མེད་གླིང་པས་དགོན་གྱི་ལུང་ཕུར་ས་དབྱིབས་སྒོམ་ཆེན་མཉམ་བཞག་འདྲ་བའི་པང་དུ་སྒྲུབ་སྡེ་ཞིག་བཙུགས་ན་ཕུང་པོ་འོད་སྐུར་གྲོལ་བ་གྲངས་གྱིས་མི་ལང་པ་འབྱུང་ཞེས་ལུང་བསྟན་པ་ལྟར་གནས་དེར་སྒྲུབ་སྡེའི་འདུ་ཁང་རྟེན་བརྟེན་པ་གསར་བཞེངས་དང་། འཇུ་བླ་སངས་རྒྱས་འོད་ཟེར་སོགས་སྤོང་བ་པ་བཅུ་གསུམ་སྒྲུབ་རྒྱགས་མཚམས་གཡོག་བཅས་རྒྱུན་འཇགས་མཛད་། དེ་བཞིན་བར་ན་བཀའ་མའི་དཀྱིལ་འཁོར་བཅུ་གསུམ་གྱི་སྒྲུབ་མཆོད་ངོ་མཚར་བ། གར་ཐིག་དབྱངས་རོལ་བཅའ་གཤམ་སོགས་སྒྲིག་ལམ་གྱི་ཕྱག་བཞེས་གསར་དུ་འཛུགས་པར་མཛད་ཅིང་། དེ་ལས་འཕྲོས་ཏེ་རྒྱལ་བ་དཔལ་ཡུལ་པ་དང་རྫ་ཕུག་ཁུང་དགོན་སོགས་མདོ་ཁམས་སྟོད་སྨད་ཀུན་ཏུ་བཀའ་གཏེར་གྱི་བསྟན་པ་ཉིན་བྱེད་གསལ་བ་ལྟར་ཁྱབ་པར་བྱུང་བ་ཡང་སྐྱེས་བུ་དམ་པ་འདིའི་ཕྲིན་ལས་ལས་མ་འདས། སྨད་ན་གཟུངས་སྔགས་ཀྱི་ཆུ་འཁོར་ཆེན་པོ་བཅུ་གསུམ་བཞེངས་ནས་འབྱུང་བ་ཆུ་ཡང་ཆོས་མཛད་ཀྱི་བྲན་དུ་བཀོལ་བས་བགྲངས་ཡས་འགྲོ་བའི་རྒྱུད་ལ་རྣམ་པར་གྲོལ་བའི་ས་བོན་ཐེབས་པར་བྱས། གཞན་ཡང་རྫ་རྒྱུད་དུ་ཕྱག་ཚྭ་དགོན་དང་། སྟག་དགོན་དུ་ཀཿཐོག་དགོན། སྙི་ཁོག་ཏུ་ཡང་ལྷ་ཁང་གསར་བཞེངས་བཅས་ཕྱོགས་སུ་བུ་དགོན་མང་པོ་གསར་འདེབས་དང་དེ་དག་ལ་དངོས་པོའི་མཐུན་རྐྱེན་རྒྱ་ཆེར་བསྩལ་བར་མཛད། རང་དགོན་དུ་སྐྱེས་རབས་ལྷ་ཁང་དང་། ལི་མ་ལྷ་ཁང་། ཞི་ཁྲོའི་ལྷ་ཁང་སོགས་གཙུག་ལག་ཁང་དུ་མ་གསར་བཞེངས་མཛད་ཅིང་། དེ་དག་རྣམས་སུ་སྐུ་རྒྱུ་གཟི་བྱུར་དང་གསེར་ཟངས་ལས་གྲུབ་པའི་སྐུ་བརྙན་ཆེ་ཆུང་མང་པོ་བཞུགས་སུ་གསོལ་བ་དང་། གཞན་གསེར་དངུལ་སོགས་རིན་པོ་ཆེ་སྣ་ཚོགས་ཀྱི་ཁུ་བས་བྲིས་པའི་སྐྱེས་རབས་ལྡེབས་རིས་དང་ཞལ་ཐང་དངོས་གཙང་བ་བརྒྱ་ཕྲག་གི་གྲངས་ལས་བརྒལ་བ་བཅས་སྐུ་རྟེན་དང་། གསུང་རྟེན་དུ་བཀའ་བསྟན་གྱི་ཆོས་དཔེ་སྣ་ཚོགས་པུསྟི་བརྒྱ་ཕྲག་མང་པོ་དང་། ཉིད་ཀྱི་ལྗགས་རྩོམ་ཆོས་སྤྱོད་སོགས་བཀའ་གཏེར་གྱི་དཀྱིལ་འཁོར་མང་པོའི་འདོན་ཆ་དཔར་ཤིང་དུ་བསྐྲུན་པ་ཁོ་ན་ལྡེབ་སྟོང་ཕྲག་དུ་མ་ལས་བརྒལ་བ་སོགས་ཆོས་སྤྱོད་བཅུའི་མཛད་པ་བློ་ཡུལ་ལས་འདས། མཆོག་སྤྲུལ་འདིས་གྲུབ་དབང་གོང་མ་རྣམས་ཀྱི་ཕྱག་བཞེས་བསམ་གཏན་གྱི་སྡེ་སྐྱོང་བ་ཁོ་ནས་མ་ཚད་པར། སྒྲུབ་མཆོད་གར་ཐིག་སོགས་སྤྲོས་བཅས་ཀྱི་མཛད་པ་རྒྱ་ཆེ་བར་བསྐྱངས་པས་གདན་ས་འཕེལ་རྒྱས་སྔར་ལས་ཆེ་བ་བྱུང་། རིག་འཛིན་ཉི་མ་གྲགས་པའི་དག་སྣང་ཐོར་བུའི་ལུང་བྱང་ལས། འགྲོ་དོན་འདི་བྱང་གི་ཕྱོགས་སུ་འབྱུང༔ ཞི་བ་འདི་རྒྱས་པའི་ལས་ལ་འགྲོ༔ དེ་བྱང་ཆུབ་སེམས་ལྡན་རིག་པ་འཛིན༔ པདྨའམ་གྲགས་པོའི་མིང་གིས་སྤེལ༔ ཞེས་དང་། རྗེ་དབོན་རིན་པོ་ཆེའི་བཀའ་ལས། བདག་གི་མཆོག་སྤྲུལ་རིན་པོ་ཆེ་འདི་དུས་གསུམ་ཀུན་མཁྱེན་པདྨ་འབྱུང་གནས་དང་པཎ་ཆེན་བཱི་མ་ཟུང་གི་ཕྲིན་ལས་གཅིག་བསྡུས་ཡིན་པས། བསྟན་འགྲོའི་ཕན་བདེ་སྤེལ་བར་འགྲན་ཟླ་མེད་པ་ཡིད་བཞིན་ནོར་བུ་དང་འདྲ་བ་ཞིག་འབྱུང་ངེས་ཡིན་ཞེས་བཀའ་ལུང་གནང་བ་དོན་སྨིན་དུ་བྱུང་ཞེས་ཀུན་ཀྱིས་བསྔགས་བརྗོད་ཀྱི་མེ་ཏོག་འཐོར་བར་མཛད་པ་སྟེ་ཐུན་མོང་ཕྱི་ཡི་རྣམ་ཐར་སྤྱི་དང་། བྱེ་བྲག་ཐུན་མིན་གྱི་རྣམ་ཐར་ལྷག་པའི་ལྷས་ཞལ་གཟིགས་ལུང་བསྟན་ཐོབ་པ། ཆོས་སྐྱོང་བྲན་དུ་བཀོལ་བ། ས་ལམ་གྱི་མངོན་རྟོགས་རྫོགས་ཚུལ་སོགས་གསང་བའི་རྣམ་ཐར་ཤིན་ཏུ་མང་བ་སྟེ། དགུང་གྲངས་བཞི་པར་གདན་སར་ཐོག་མར་ཞབས་འཁོད་ཉིན་ཕོ་བྲང་དབུ་རྩེའི་སྟེང་ན་དཔལ་མགོན་མ་ནིང་དང་སྔགས་སྲུང་མ་བཞུགས་པ་དངོས་སུ་གཟིགས་ཤིང་། དེ་ནས་སྐབས་དང་སྐབས་སུ་དམ་ཅན་སྐུ་ཆུང་ངུ་ཞིག་གིས་སྲུང་མའི་ཚུལ་གྱིས་ཡང་ཡང་སྐོར་བ་བྱེད། ཡོངས་འཛིན་སློབ་དཔོན་པདྨ་མཆོག་ལས་ལྗགས་ཀློག་སྦྱང་སྐབས། གཟིམས་ལམ་དུ་གཞི་བདག་ཀུ་ར་ཡིན་ཟེར་བའི་གཡག་དཀར་ཞོན་པའི་མི་དཀར་བོན་ཞྭ་གྱོན་པ་ཞིག་ཡང་ཡང་འོང་བ་གཟིགས། རྗེ་དབོན་བླ་མར་ཞུས་པས་དེ་ཡུལ་ལྷ་ཡིན་ཞིང་ཁྱེད་ལ་འཁོར་བར་སྣང་ཡང་མི་ལེགས་པས་ངས་ཐབས་བྱའོ་གསུངས་ཏེ་ཐུགས་དམིགས་གནང་བས་དེ་ཕྱིན་འོང་རྒྱུ་མེད་པར་གྱུར། སྐབས་ཤིག་མི་མང་ཚོགས་པའི་ཁྲོམ་གསེབ་ཞིག་ཏུ་འདུག་པ་ལན་གཅིག་གཟིགས་གསུངས། ཡང་སྐབས་ཤིག་དཔལ་མགོན་མ་ནིང་མངོན་རྟོགས་དང་མཐུན་པ་ཞིག་གིས་ཞལ་གཟིགས་པ་དང་། གྲུབ་དབང་པདྨ་བཤེས་གཉེན་ལ་དབང་གསུང་སྐབས་སྨན་ཐོད་ལས་བདུད་རྩི་དངོས་སུ་ཁོལ་བ་དེར་གནས་ཀུན་ཀྱིས་མངོན་སུམ་དུ་མཐོང་། དགུང་གྲངས་ཉེར་གཉིས་དུས་མཚོ་རྒྱལ་དཀར་མོ་ཕྱག་ན་མདའ་དར་དང་ཚེ་བུམ་ཐོགས་པ་ཞིག་གིས་འབྱུང་འགྱུར་ལུང་བསྟན་དང་། ཆོས་བཀའ་མང་པོ་འབེབས་རྒྱུའི་བརྡ་འགྲོལ་བྱུང་ཡང་བདག་གིར་མ་མཛད། ཁྱད་པར་ཨོ་རྒྱན་ཆེན་པོས་ཞལ་གཟིགས་ཐེངས་མང་གནང་བ་དང་། དེ་མཚུངས་པཎ་ཆེན་བཱི་མ་ཏྲ། རླངས་ཆེན་དཔལ་གྱི་སེང་གེ། རྒོད་ཚང་སྣ་ཚོགས་རྣམས་ཀྱིས་ཀྱང་ཞལ་གཟིགས་ཡང་ཡང་ཐོབ་ཅིང་གསུང་གླེང་མང་པོ་མཛད། ལྷ་ལྡན་དུ་ཇོ་བོ་མཇལ་དུས་ཤཱཀྱ་ཐུབ་པ་དངོས་ཞལ་འཛུམ་པར་གཟིགས་ཤིང་འཁོར་གྱི་ལྷ་རྣམས་ཀྱང་དེ་དང་དེར་མངོན་སུམ་དུ་གཟིགས། ཁྲ་འབྲུག་ཏུ་སྒྲོལ་མ་ཞལ་ཟས་མ་ཞལ་འཛུམ་པར་མཛད་པ་དང་། ཁྲོ་བོ་མི་གཡོ་བའི་རལ་གྲི་ལས་མེ་འབར་བ་སོགས་གཟིགས་སྣང་ཁྱད་པར་ཅན་སྣ་ཚོགས་བྱུང་། དེ་བཞིན་གདན་སར་སྒྲུབ་ཆེན་གྱི་ཚོགས་དབུར་བཞུགས་དུས་རྒྱུད་མགོན་ལེགས་ལྡན་དང་ཚེ་རིང་མཆེད་ལྔས་རང་གཟུགས་དངོས་སུ་བསྟན་པ་དང་། རྒྱུན་དུ་མ་གཟའ་དམ་གསུམ། བཙན་རྒོད་ཆེན་པོ་སོགས་སྐུ་མདུན་དུ་མི་དང་མི་བཞིན་འོང་སྟེ་ཅི་བཅོལ་གྱི་ཕྲིན་ལས་སྒྲུབ་པ་སོགས་ངོ་མཚར་བའི་རྣམ་ཐར་མཐའ་ཡས། དེ་ལྟར་ཕྱི་ནང་གསང་བའི་མཛད་པས་བསྟན་འགྲོའི་གཞན་དོན་རྒྱ་ཆེར་བསྒྲུབས་ནས། དགུང་ལོ་སུམ་ཅུ་ལ་སོན་སྐབས་མཁའ་འགྲོས་བསུ་བའི་ལྟས་མང་པོ་རིམ་པར་བྱུང་ཞིང་། རྗེ་ནམ་མཁའ་ཚེ་དབང་མཆོག་གྲུབ་ནས་བསུན་བཟློག་མཛད་པས་མཚམས་རེར་བཟློག་པ་ལྟར་སྣང་ཡང་། སླར་ཡང་སྔར་ལྟར་བྱུང་བར་གསུངས་ཤིང་རེ་ཞིག་གདུལ་བྱ་དེ་ཙམ་དུ་དགོངས་ནས་དགུང་ལོ་སོ་བཞི་པ་ཆུ་ཕོ་བྱི་བའི་ལོར་དགོངས་པ་ཆོས་དབྱིངས་སུ་བསྡུ་བའི་ཚུལ་བསྟན། གསུང་ལས་སྐྱེས་པའི་ཞལ་སློབ་ཀྱི་གཙོ་བོ་རྡོ་གྲུབ་འཇིགས་མེད་ཕྲིན་ལས་འོད་ཟེར། འབར་ཆུང་འཇིགས་མེད་གོ་ཆ། དགེ་རྩེ་བླ་མ་འཇིགས་མེད་ངོ་མཚར་རྒྱ་མཚོ། སེང་ཕྲུག་པདྨ་བཀྲ་ཤིས། འཇུ་བླ་སངས་རྒྱས་འོད་ཟེར་སོགས་སྒྲུབ་གྲྭའི་འཇའ་ལུས་པ་བཅུ་གསུམ། ཉི་གྲགས་སྤྲུལ་སྐུ་ཨོ་རྒྱན་བསྟན་འཛིན། རབ་འབྱམས་གཉིས་པ་ཀུན་བཟང་རྣམ་རྒྱལ། རྒྱལ་ཚབ་མཆོག་སྤྲུལ། དབོན་སྤྲུལ་བསྟན་པའི་ཉི་མ། གུ་གུ་བླ་མ་བསྟན་འཛིན་སྙིང་པོ། གནས་མདོའི་ཆགས་མེད་སྤྲུལ་སྐུ། རྡོ་བྲག་མཆོག་སྤྲུལ། ཡོལ་མོ་སྤྲུལ་སྐུ། ལྕགས་ལའི་རྒྱལ་སྲས། གྲུབ་ཆེན་པདྨ་བཤེས་གཉེན་སོགས་ས་ཐོབ་ཀྱི་སེམས་དཔའ་མིའི་བརྫུ་ལ་བྱོན་པ་གྲངས་མེད་པས་རྒྱལ་བསྟན་བཤད་སྒྲུབ་ཀྱི་འཁོར་ལོ་མཁས་ཚུལ་གསུམ་གྱི་མཛད་པས་ཇི་སྲིད་བསྐལ་བ་རྒྱ་མཚོར་མི་ཉམས་སྲིད་པའི་བླ་ན་མངོན་པར་མཐོ་བར་མཛད་དོ། །

གདན་རབས་དྲུག་པ། མཁས་བཙུན་ནམ་མཁའ་ཚེ་དབང་མཆོག་གྲུབ་ནི།

དེ་ཡང་རྒྱལ་བ་རྣམས་ནི་གདོད་མ་ནས་བྱང་ཆུབ་མཆོག་གི་གོ་འཕང་བརྙེས་སུ་ཟིན་ཀྱང་། ཚད་མེད་པའི་སྙིང་རྗེ་ཆེན་པོ་དང་སྨོན་ལམ་གྱི་སྟོབས་ཟབ་མོས་སྲིད་པའི་གཅོང་རོང་ཡ་ང་བ་དག་ཏུ་སྤྲུལ་པའི་རྣམ་རོལ་སྣ་ཚོགས་པ་འགྲོ་བའི་མགོན་དང་སྐྱབས་སུ་བྱོན་པ་ནི་ཆོས་ཉིད་ཡིན་པ་ལྟར། དམ་པ་འདི་ཡང་སྐྱེ་བའི་ཕྲེང་བ་བསམ་མི་ཁྱབ་པ་ཇི་སྙེད་པའི་རོལ་པར་བྱོན་བྱོན་པའི་མཐར། གཡུ་སྒྲའི་རྣམ་འཕྲུལ་ཏྲེ་ཧོར་བླ་མ་སྐལ་བཟང་འཕེལ་རྒྱས་ཞེས་ཨོ་རྒྱན་གཏེར་བདག་གླིང་པའི་དངོས་སློབ་ཏུ་གྱུར་པ། རྫོགས་ཆེན་མཆོག་སྤྲུལ་དང་། རབ་འབྱམས་སྤྲུལ་སྐུ། རྗེ་དབོན་པདྨ་ཀུན་གྲོལ་སོགས་བསྟན་འཛིན་གྱི་སྐྱེས་བུ་མང་པོས་གཙུག་ཏུ་བཀུར་ཞིང་གྲུབ་པ་བརྙེས་པའི་སྐྱེས་བུ་དེ་ཉིད་སླར་ཡང་ལྷག་མའི་གདུལ་བྱ་སྐྱོང་བར་དགེ་བའི་བཤེས་གཉེན་གྱི་རྣམ་རོལ་དུ་བྱོན་པ་སྟེ། སྤྱི་ལོ་༡༧༤༤པ་བོད་རབ་བྱུང་བཅུ་གཉིས་པའི་མིག་དམར་ཞེས་པ་ཤིང་ཕོ་བྱི་བའི་ལོར། ཡུལ་མདོ་ཁམས་གླིང་དཀར་གྱི་སའི་ཆ་དགེ་བཅུའི་འབྱོར་བ་རྒྱས་ཤིང་ལྟ་ན་སྡུག་པའི་མཛེས་ལྗོངས་ཡིད་ལྷུང་ཞེས་གྲགས་པའི་གནས་དེར། ཡབ་ཚོང་དཔོན་ཚེ་རྒྱལ་དང་ཡུམ་ཚེ་རིང་སྒྲོལ་མའི་སྲས་སུ་ངོ་མཚར་བའི་མཚན་ལྟས་བརྒྱ་ཕྲག་དང་བཅས་སྐུ་བལྟམས། གསུང་ངག་ཐོག་མར་བྱེ་བ་ཉིད་ནས་བཛྲ་གུ་རུ་ཞལ་འདོན་གནང་བ་དང་། མགོན་པོ་དོན་འགྲུབ་ཞེས་མིང་དུ་བཏགས་པར་མི་དགྱེས་པའི་ཚུལ་གྱིས་བདག་བླ་མ་སྐལ་བཟང་ཡིན་རྫོགས་ཆེན་ལ་འགྲོ་དགོས་ཞེས་ཡང་ཡང་གསུངས། དེ་བཞིན་སྦྱང་པ་ལ་མ་ལྟོས་པར་དཀོན་མཆོག་སྤྱི་འདུས་ཐུགས་ཐོག་ནས་ཤར་གསུང་ཐུབ་པ་སོགས་སྐྱེས་ཐོབ་ཀྱི་ཤེས་རབ་ཀློང་དུ་བརྡོལ་བས། ཇི་སྐད་དུ། དུ་བ་ལས་ནི་མེ་ཤེས་དང་། །ཆུ་སྐྱར་ལས་ནི་ཆུ་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་གསུངས་པ་ལྟར་སྐྱེས་བུ་དམ་པ་ཞིག་གི་སྐྱེ་སྲིད་ཡིན་པ་ཀུན་ལ་མངོན་དུ་གྱུར་ཅིང་ཕྱོགས་དེར་རླུང་ལྟར་གྲགས། དེ་ཙམ་ཉིད་ན་སྔོན་སྨོན་དང་རྟེན་འབྲེལ་དུས་སུ་སྨིན་པའི་སྟོབས་ལས་གོང་མའི་ཞལ་སློབ་ས་སྐྱའི་བླ་མ་ཀུན་དགའ་ལྷུན་གྲུབ་ཕྱོགས་དེར་བྱོན་ཞིང་ཞལ་མཇལ་བ་ཙམ་གྱིས་སྔར་འདྲིས་ཀྱི་གྲོགས་པོ་ལྟར་ཕན་ཚུན་ངོ་ཤེས། བླ་མས་ཡབ་ཡུམ་གཉིས་ལ་གོང་མའི་རྣམ་ཐར་བསྙད་པ་དང་བཅས་བྱིས་པ་འདི་རྫོགས་ཆེན་གདན་ས་གོང་འོག་ཞིག་ཏུ་ཆོས་ལ་བཙུད་ན་ལེགས་ཚུལ་གྱི་ཞལ་བསྒོས་གནང་། ཡབ་ཡུམ་གྱིས་ཀྱང་དེ་བཞིན་བློ་ཐག་ཆིག་ཆོད་ཀྱིས་རྒྱ་རོང་དུ་རྗེ་དབོན་བླ་མའི་དྲུང་དུ་ཕུལ། རྗེ་དབོན་དམ་པས་བདག་གི་བླ་མའི་སྐུ་སྐྱེ་ཞེས་མཉེས་པ་ཆེན་པོའི་ཐུགས་བརྩེས་བསྐྱངས་ཤིང་གཙུག་ཕུད་བཞེས་པའི་མཚན་ལ་ནམ་མཁའ་མཆོག་གྲུབ་ཞེས་གསོལ། དེ་མཚམས་ཡོངས་འཛིན་བཤེས་གཉེན་བསྟན་འཛིན་ལས་ཡི་གེའི་སྦྱོར་ཀློག་ནས་རྩིས་དཀར་ནག་སྒྲ་སྙན་སོགས་ཐུན་མོང་གི་རིག་པའི་གནས་ལ་སྦྱང་པ་བྱས་པས་ཚེགས་མེད་པར་མཁྱེན། དགུང་གྲངས་བཅུ་གསུམ་བཞེས་པ་མེ་བྱི་ལོར་ཡུལ་དབུས་ལྷ་ལྡན་ཕྱོགས་སུ་ཕེབས་ཞལ་ཕྱོགས་ཤིང་། དབུས་ཀྱི་བླ་མ་ལྷ་རྟེན་ཆོས་སྡེ་ཡོངས་ལ་མཇལ་ཕྱག་མཆོད་འབུལ་མང་འགྱེད་སོགས་ཐུགས་བཞེད་བཞིན་གྲུབ་ནས་ཕྱིར་ཕེབས། སྐབས་དེར་ཉི་སྤྲུལ་ཀུན་བཟང་ཐེག་མཆོག་རྒྱ་མཚོ་རྫོགས་དགོན་དུ་ཞབས་པད་བཀོད་ནས་མདོ་སྒྱུ་སེམས་གསུམ་གཙོ་བོར་གྱུར་པའི་སྔ་འགྱུར་བཀའ་གཏེར་གྱི་སྨིན་གྲོལ་གནང་བ་ཡོངས་རྫོགས་གསན་བཞེས་མཛད། དེ་མཚུངས་དཔའ་བོ་ལས་རབ་རྩལ་གྱི་ཟབ་མོ་གཏེར་ཆོས་ཀྱི་བདག་པོར་ལུང་གིས་ཟིན་པ་ལྟར་རྗེ་དེ་ལས་ཉིད་ཀྱི་དག་སྣང་ཆོས་སྡེ་མཐའ་དག་གསན་བཞེས་དང་ཆོས་ཀྱི་བདག་པོར་མངའ་གསོལ་བ་བཅས་མདོ་སྔགས་ཆོས་ཚུལ་རྒྱ་མཚོ་ལ་གསན་བསམ་མཐའ་རུ་ཕྱིན། ཁྱད་པར་རིགས་བདག་མཚུངས་མེད་རྗེ་དབོན་རིན་པོ་ཆེ་ལས་ཐེག་རྩེ་གསང་བའི་མན་ངག་སྙིང་ཐིག་རྣམ་གཉིས་ཀྱི་ཉམས་ཁྲིད་གཙོས་ཁྲིད་རིགས་མི་གཅིག་པ་སྣ་མང་དང་། ཀུན་མཁྱེན་མཛོད་བདུན། བཀའ་བརྒྱད་བདེ་འདུས། ཞིག་གླིང། བདུད་འདུལ། འཇའ་ཚོན་སོགས་གཏེར་ཆོས་མང་པོའི་དབང་ལུང་གི་རྒྱུན་བཞེས་པ་མཛད། དེ་དག་ཀྱང་གསན་ནས་འཇོག་པ་ཙམ་མ་ཡིན་པར་དུས་དང་རྣམ་པ་ཀུན་ཏུ་བསྐྱེད་རྫོགས་ཀྱི་ཉམས་ལེན་ལ་རྩེ་གཅིག་ཏུ་བརྩོན་ཞིང། ཐ་ན་བྱེས་བྱོན་གྱི་སྐབས་སུའང་བསྙེལ་འབོལ་འཇོག་པ་དང་སྐུ་ཆིངས་ལྷོད་པ་ཙམ་ཡང་མི་མཛད་པར་ཉིན་མཚན་ཀུན་ཏུ་ཆུ་བོའི་རྒྱུན་གྱི་རྣལ་འབྱོར་ལ་གཞོལ་བས་རྟོགས་པ་ཀློང་དུ་གྱུར་ནས་གྲུབ་པའི་ས་མཐོར་གཤེགས་པ་སྟེ། ཀུན་མཁྱེན་འཇིགས་མེད་གླིང་པའི་ཞལ་ནས། རྒྱལ་རོང་བན་རྒན་དེ་ངེད་དང་མ་མཇལ་ཡང་རྟོགས་པ་ངེད་དང་མཉམ་པ་ཡིན་པས་ཀུན་ཀྱིས་ཉམས་ལེན་གྱི་དོགས་གཅོད་ཁོང་ལ་ཕུལ་དང་ཆོག་པ་ཡིན། ཞེས་དང་། རྗེ་དབོན་རིན་པོ་ཆེའི་མནལ་ལམ་ཞིག་ཏུ། རུ་དམ་དགོན་ཕུར་རྣལ་འབྱོར་ཆས་ཅན་གཉིས་དང་། དེ་ནས་རྗེ་དབོན་ཉིད་དང་། དེ་རྗེས་གཅིག་འདུག་པ་རྫོགས་ཆེན་གྱི་ལྟ་གྲུབ་གཙང་མ་འཛིན་པ་དེ་ཙམ་ཞིག་འོང་བའི་བརྡར་གཟིགས་ཤིང་ཕྱི་མ་དེ་རྗེ་འདི་ཉིད་ཡིན་པར་གསུངས་པ་སོགས་ཚད་མའི་སྐྱེས་བུས་ཡང་ཡང་བསྔགས། སྔ་ཕྱིར་གདན་ས་གོང་འོག་ཏུ་སྙིང་ཐིག་གི་ཉམས་ཁྲིད་ལོ་རེར་ཐེངས་འགའ་ཆད་མེད་བསྩལ་ཏེ་འོད་གསལ་སྙིང་པོའི་བསྟན་པའི་རྒྱལ་མཚན་སྲིད་པའི་རྩེ་མོར་བསྒྲེངས་བར་མཛད། གཞན་ཡང་འཇིག་རྟེན་མི་ཆོས་ཀྱི་ལུགས་ལ་མཁྱེན་སྒོ་ཡངས་པས་བྱ་བ་ལས་ཀྱི་འཁོར་ལོས་བསྟན་འགྲོའི་འགྲོ་དོན་ཕྱོགས་བརྒྱར་སྤེལ་བར་མཛད་དེ། རྗེ་དབོན་རིན་པོ་ཆེ་ཞིང་དུ་གཤེགས་རྗེས་རྒྱ་རོང་གདན་སའི་བསྟན་འགན་བཞེས་ནས་བླ་བྲང་གཙུག་ལག་ཁང་རྟེན་བརྟེན་པ་བཅས་གསར་བཞེངས་དང་། རྗེ་དབོན་སྔ་མའི་ཡང་སྲིད་ཁྲི་འདོན་མཛད། དེ་བཞིན་གདན་ས་གོང་མ་རུ་དམ་ཨོ་རྒྱན་བསམ་གཏན་ཆོས་གླིང་དུ་མཆོག་སྤྲུལ་རིན་པོ་ཆེ་ངེས་དོན་བསྟན་འཛིན་བཟང་པོ་སྐུ་ཚེ་མཐར་མ་ཕྱིན་པར་གཤེགས་རྗེས་བསྟན་བདག་གདན་རབས་དྲུག་པའི་ཐུགས་འགན་བཞེས་ནས་བཤད་སྒྲུབ་ལས་གསུམ་གྱི་མཛད་པ་སྤྱི་དང་། དགོན་གྱི་བཅའ་ཁྲིམས་སོགས་གང་ཅིར་ཉམས་རྒུད་ཅུང་ཟད་བྱུང་བ་སྐུ་ཉིད་དངོས་ཀྱིས་དག་ཐེར་སོར་ཆུད་སྔར་སྲོལ་ལྟར་སྦྱོར་འཇགས་ཐོག་ཚེས་བཅུའི་གར་འཆམ་གསར་འཛུགས་དང་། དེ་དག་ལ་དགོས་པའི་མཆོད་རྫས། ཞལ་འབག འཆམ་ཆས། རུས་རྒྱན། ཟངས་འབག རྟེན་ཐང་སོགས་ནས་ཐ་ན་ཉེར་སྤྱོད་གདན་འབོར་ཁྲིའུ་བཅས་གསར་སྐྲུན་ཞིབ་ཚགས་མཛད་པ་དང་། ཁྱད་པར་རྫོགས་སྤྲུལ་བཞི་པ་མི་འགྱུར་ནམ་མཁའི་རྡོ་རྗེ་འདན་ཁོག་ཏུ་འཁྲུངས་པ་ངོས་འཛིན་ཁྲི་བཀོད་ཟབ་རྒྱས་གནང་སྟེ་ཡབ་རྗེ་གོང་མ་དག་ལས་བརྒྱུད་པའི་ཆོས་བཀའ་ཐམས་ཅད་བུམ་པ་གང་བྱོའི་ཚུལ་དུ་བསྩལ་ནས་དོན་བརྒྱུད་ཀྱི་བསྟན་པ་གཏད། སྔ་ཕྱིར་གསུང་ལས་སྐྱེས་པའི་ཐུགས་སྲས་མང་རབ་བྱུང་པ་གཙོ་བོའི་མཚན་ཙམ་སྨོས་ན། རབ་འབྱམས་གསུམ་པ་དང་། ཉི་གྲགས་གསུམ་པ། རྗེ་དབོན་བླ་མའི་ཡང་སྲིད། ཉི་གྲགས་དབོན་སྤྲུལ་ཨོ་རྒྱན་ཉི་མ། རྡོ་གྲུབ་འཇིགས་མེད་ཕྲིན་ལས་འོད་ཟེར། མཁས་མཆོག་གུ་རུ་བཀྲ་ཤིས། དབོན་སྤྲུལ་མཐུ་སྟོབས་རྣམ་རྒྱལ། རྒྱལ་ཚབ་པདྨ་གསང་སྔགས་བསྟན་འཛིན། མཁས་དབང་ཐུགས་རྗེ་བཀྲ་ཤིས་སོགས་ཕུལ་དུ་བྱུང་བའི་བསྟན་འཛིན་ཆེ་རྒུ་དུ་མ་བྱོན་པ་བཅས་འགྲོ་དོན་མཐའ་རུ་ཕྱིན་ཏེ་དགོངས་པ་གཞན་དོན་དུ་གཤེགས་པའི་ཚུལ་བསྟན་ཏོ། །

གདན་རབས་བདུན་པ། རྫོགས་ཆེན་སྐུ་ཕྲེང་བཞི་པ་མི་འགྱུར་ནམ་མཁའི་རྡོ་རྗེ་ནི།

འོད་གསལ་བསྟན་པའི་ཤིང་རྟ་ཆེན་པོ་མི་འགྱུར་ནམ་མཁའི་རྡོ་རྗེ་ཚེ་དབང་གྲུབ་པ་རྩལ་ནི། ཐེག་རྩེ་མན་ངག་སྙིང་ཐིག་གི་བརྒྱུད་པའི་བཀའ་སྲོལ་ཐམས་ཅད་ཡོངས་སུ་རྫོགས་པ་འཛིན་པའི་གསང་མཛོད་ཆེན་པོ་སྟེ། གོང་དུ་ཞིབ་པར་གསལ་བ་ལྟར་ཨོ་རྒྱན་སངས་རྒྱས་གཉིས་པས་གཞོ་སྟོད་ཏི་སྒྲོ་མཁའ་འགྲོའི་ཚོགས་ཁང་ཆེན་མོར་ཞི་ཁྲོ་དོན་གྱི་དཀྱིལ་འཁོར་གྱི་རང་ཞལ་ཕྱེས་ནས། མཁའ་འགྲོ་ཡེ་ཤེས་མཚོ་རྒྱལ་སོགས་ཡེ་ཤེས་ཀྱི་མཁའ་འགྲོ་མ་འབུམ་ཕྲག་གཅིག་ལ་རིམ་དགུ་ཐེག་པའི་རྩེ་རྒྱལ་གསང་བ་སྙིང་ཐིག་གི་སྨིན་ཁྲིད་མནོག་ཆོས་སུ་བསྩལ་བ། ཨོ་རྒྱན་ཡབ་ཡུམ་གྱིས་ཕྱི་རབས་ཀྱི་གདུལ་བྱའི་དོན་དུ་དགོངས་ཏེ་ཡི་གེར་ཕབ་ཅིང། ལྷ་ལྕམ་པདྨ་གསལ་ལ་སྨོན་ལམ་གཏད་རྒྱ་དང་བཅས་དྭགས་ལུང་ཁྲ་མོའི་བྲག་ལ་གཏེར་དུ་སྦས་པ། ཕྱིས་སུ་སྨོན་ལམ་ལུང་བསྟན་དུས་སུ་སྨིན་པ་ལྷ་ལྕམ་སྤྲུལ་པ་པདྨ་ལས་འབྲེལ་རྩལ་གྱིས་གཏེར་གནས་ནས་སྤྱན་དྲངས་ཏེ་རྒྱལ་སྲས་ལེགས་ལྡན་རྡོ་རྗེ་ལ་བསྩལ་བ་དང་། དེ་ལས་ཀུན་མཁྱེན་ཆོས་ཀྱི་རྒྱལ་པོ་དང་རྒྱལ་བ་ཡེ་ཤེས་རབ་འབྱམས་སོགས་བླ་རབས་བརྒྱད་ནས་གྲུབ་དབང་པདྨ་རིག་འཛིན་ལ་བཀའ་བབ། དེ་ལས་དཔོན་སློབ་ནམ་མཁའ་འོད་གསལ། རྗེ་དབོན་པདྨ་ཀུན་གྲོལ། ནམ་མཁའ་ཚེ་དབང་མཆོག་གྲུབ་ནས། མི་འགྱུར་ནམ་མཁའི་རྡོ་རྗེ་ལ་བསྩལ་བའི་རྫོགས་ཆེན་མཁའ་འགྲོ་སྙིང་ཐིག་ཐུན་མིན་རང་རྐང་གི་བརྒྱུད་པ་གཅིག་དང་། གཞན་ཡང་ཀུན་མཁྱེན་ཆེན་པོ་ནས་མཁན་ཆེན་ཁྱབ་གདལ་ལྷུན་གྲུབ་སོགས་ལ་རིམ་པར་བརྒྱུད་དེ། ཕྱིས་སུ་སྨིན་གླིང་གཏེར་ཆེན་ནས་ངེས་དོན་བསྟན་འཛིན་བཟང་པོ་སོགས་སུ་བརྒྱུད་པའི་ཐུན་མོང་རིང་བརྒྱུད། ཁྱད་པར་ཀུན་མཁྱེན་ཆེན་པོས་རིག་འཛིན་འཇིགས་མེད་གླིང་པ་ཡེ་ཤེས་སྒྱུ་མའི་སྐུས་ལན་གསུམ་རྗེས་སུ་བཟུང་སྟེ་བསྩལ་བའི་ཉེ་བརྒྱུད་རྡོ་གྲུབ་འཇིགས་མེད་འཕྲིན་འོད་ཟེར་ལས་ཆིག་བརྒྱུད་དུ་གསན་པ་དང་། དེ་བཞིན་མི་འགྱུར་ནམ་མཁའི་རྡོ་རྗེ་ཉིད་མགོན་ཁང་དབང་དྲག་རོལ་བར་དགོངས་པ་འོད་གསལ་གྱི་ཏིང་ངེ་འཛིན་ལ་བཞུགས་སྐབས་ཀུན་མཁྱེན་ཆོས་ཀྱི་རྒྱལ་པོས་ཞལ་དངོས་སུ་བསྟན་ནས་ཡེ་ཤེས་ཀྱི་སྐུས་བྱིན་གྱིས་བརླབས་ཏེ། ཡང་ཏིག་ཡིད་བཞིན་ནོར་བུའི་དབང་ཁྲིད་གདམས་ངག་དང་བཅས་པ་གནང་བའི་ཟབ་པ་ཤིན་ཏུ་ཉེ་བརྒྱུད་དེ་བརྒྱུད་པའི་ཆུ་བོ་ཆེན་པོ་བཞི་འདུས་ཀྱི་བཀའ་བབ་པ་ཡིན་ལ། གྲུབ་པའི་དབང་ཕྱུག་མཆོག་ཉིད་ཚུར་མཐོང་གདུལ་བྱའི་མོས་ངོར་ཞིང་འདིར་ཇི་ལྟར་བྱོན་པའི་ཚུལ་ནི། སྤྱིར་ལོངས་སྤྱོད་རྫོགས་པའི་སྐུ་རྣམས་ཡེ་ཤེས་རང་སྣང་གི་སྐུ་དང་ཞིང་ཁམས་ལས་ནམ་ཡང་གཡོ་བ་མེད་བཞིན་སྤྲུལ་བའི་རྣམ་རོལ་ཚད་མེད་པ་རྟག་ཁྱབ་ལྷུན་གྲུབ་ཏུ་འབྱུང་བ་བཞིན། བདག་ཉིད་ཆེན་པོ་འདི་ཡང་རྒྱལ་བའི་དཀྱིལ་འཁོར་མ་ལུས་པའི་དབང་ཕྱུག་ཁྱབ་བདག་གདོད་མའི་མགོན་པོ་དང་ཐ་མི་དད་པའི་ངོ་བོར་སངས་རྒྱས་སུ་ཟིན་ཀྱང་། སྣ་ཚོགས་འཁྲུལ་བས་བསླུས་པའི་འགྲོ་བ་ལ་ཐུགས་ལྷག་པར་བརྩེ་བ་དང་། ཁྱད་པར་གསང་ཆེན་བླ་ན་མེད་པ་འོད་གསལ་རྫོགས་པ་ཆེན་པོའི་རིང་ལུགས་ཕྱོགས་བརྒྱར་སྤེལ་ཕྱིར་སུམ་ལྡན་རྡོ་རྗེ་འཛིན་པའི་ཚུལ་དུ་བསམ་བཞིན་སྲིད་པ་བཟུང་བ་སྟེ། ཇི་སྐད་དུ། ཀུན་མཁྱེན་འཇིགས་མེད་གླིང་པའི་རྡོ་རྗེའི་ལུང་བྱང་ལས། གནས་དང་འབྲེལ་བ་གངས་ཀྱི་མཚམས༔ ཤུལ་གསུམ་བགྲོད་ལ་བལྟ་རྟོག་གྱིས༔ ཨེ་ཀ་ཛ་ཊཱིའི་སྐོང་སྟོང་འབུངས༔ ཞེས་དང་། ལྐོག་གྱུར་འདི་དོན་ལྐོག་ཏུ་མ་གྱུར་ཏེ༔ རྡོ་རྗེ་གསུམ་སྤྲུལ་གཉིས་ནི་དབུས་མཐར་གབ༔ འགྲོ་དོན་དུས་བབ་དག་ཆེན་ཐུགས་ཀྱི་སྤྲུལ༔ གནས་དེའི་ནུབ་ཕྱོགས་གནས་དང་ཉེ་བའི་ཆར༔ གངས་རི་ཡིས་མཚན་གསེར་ལྡན་ཀླུང་ཆེན་འགྲམ༔ ཆེ་བཙན་རིགས་བཙུན་གསུམ་ཤུལ་གཙང་མའི་རྒྱུད༔ བསོད་ནམས་ཕ་ལ་ནོར་འཛིན་མ་ཐོགས་པར༔ ཡོད་ཅེས་སྣང་ཤེས་འདྲེས་པའི་ངང་ནས་གོ༔ ཞེས་ཤིན་ཏུ་གསལ་བར་གསུངས་པ་དང་། དེ་མཚུངས་སྐུ་གོང་མ་ངེས་དོན་བསྟན་འཛིན་བཟང་པོའི་ཞལ་ནས། ཁོ་བོ་ཡུན་རིང་འཚོ་དཀའ་ཡང་སྤྲུལ་པ་གསུམ་འབྱུང་བའི་གཉིས་མངའ་རིས་དང་དབུས་ཕྱོགས། གཅིག་ཕྱོགས་འདི་དང་མི་རིང་བའི་སར་ཤིང་སྡོང་ཆེན་པོ་ཡོད་པ་ཞིག་གི་རྩར་འཁྲུངས་ལ། དེ་ཉིད་ཀྱིས་བསྟན་པ་ལ་ཕན་པ་འོང་ཞེས་ཞབས་གྲས་ནང་མ་རྣམས་ལ་གསུང་འཕྲོས་སུ་བསྩལ་བ་ལྟར། གདན་ས་ཆེན་པོ་རུ་དམ་ཨོ་རྒྱན་བསམ་གཏན་གླིང་གི་ནུབ་ཕྱོགས་ཉིན་ཞག་གསུམ་གྱིས་ཆོད་པའི་སའི་ཆ། སྔོན་ཡིག་མཁན་ལྡན་མ་རྩེ་མང་དང། པཎ་ཆེན་སྨྲི་ཏི་ཛྙ་ན། འབྲོམ་སྟོན་པ་རྒྱལ་བའི་འབྱུང་གནས་སོགས་འཕགས་བོད་ཀྱི་སྐྱེས་བུ་དུ་མས་ཞབས་ཀྱིས་བཅགས་པའི་གནས། དགེ་བཅུ་སའི་དཔྱད་ཡོངས་སུ་རྫོགས་པའི་ལྗོངས་ཆེན་མོ་འདན་ཡུལ་ཞེས་གྲགས་པའི་ནོར་འཛིན་གྱི་ཐིག་ལེ། གཞིའི་བདག་པོ་གངས་རི་མཆེད་བརྒྱད་ཀྱིས་སྐྱོང་བས་གངས་རི་ཞེས་པའི་སའི་མཚམས། གནས་ཆེན་སེང་གེ་གནམ་རྫོང་དང་མཐའ་འདུལ་གྱི་གཙུག་ལག་ཁང་གླང་ཐང་སྒྲོལ་མ་ལྷ་ཁང་ཞེས་གྲགས་པའི་ཉེ་འདབས་གསེར་ལྡན་འབྲི་ཆུའི་ཀླུང་ཆེན་དལ་གྱིས་འབབ་པའི་གཡས་ཟུར། འདན་ར་ཁོ་དཔོན་ཚང་ཞེས་ཆེ་བ་བཙན་གྱི་རིགས་རྒྱུད་མ་ཉམས་ཤིང་དམ་པའི་སྐྱེས་བུ་བརྒྱུད་མར་བྱོན་པའི་ལྷ་ཁྱིམ་ཁང་རྒྱབ་ཏུ་ལྕང་མའི་སྡོང་པོ་ཆེན་པོ་གདུགས་ལྟར་མཛེས་པ་རུ། ཡབ་བསོད་ནམས་རབ་བརྟན་དང་། ཡུམ་ནམ་མཁའ་ནོར་འཛིན་དབང་མོ་གཉིས་ཀྱི་སྲས་སུ་རབ་བྱུང་བཅུ་གསུམ་པའི་ནང་ཚན་ཆུ་མོ་གླང་གི་ལོ་སྟེ། སྤྱི་ལོ་༡༧༩༣པར་ངོ་མཚར་བའི་མཚན་ལྟས་དུ་མ་དང་བཅས་སྐུ་བལྟམས། འཁྲུངས་ནས་རིང་པོར་མ་ལོན་པར་རྫོགས་ཆེན་རྫོགས་ཆེན་ཞེས་ཡང་ཡང་གསུངས་པ་དང་། རྔ་བོ་ཆེ་ཞིག་ཡོད་པ་རྡུང་བཞིན་བཛྲ་གུ་རུའི་འཛབ་དབྱངས་སྒྲོག་པ་དང་། དེ་བཞིན་དབང་སྐུར་ཆོས་བཤད་ཀྱི་ཚུལ་མཛད་པ་སོགས་དམ་པའི་བག་ཆགས་གསལ་བར་སད། དགུང་ལོ་ལྔ་ལ་སོན་སྐབས་ཆེ་ཡོས་རིག་འཛིན་ཆེན་མོའམ་དཔའ་བོ་ལས་རབ་རྩལ་ལྡན་ཁོག་ལོ་ཆུང་ནང་དུ་སྡེ་དགེའི་གཉེར་ཆེན་གཤེན་རབ་སྟག་རྒྱལ་གྱིས་གདན་དྲངས་པ་ལྟར་ཕེབས་ནས་ཚེ་སྒྲུབ་བདུད་བཞི་རྣམ་རྒྱལ་གྱི་སྒྲུབ་ཆེན་མཛད། དེ་སྐབས་རིག་འཛིན་ཆེན་པོས། ད་རེས་ར་ཁོ་དཔོན་ཚང་གི་བུ་ཆུང་བ་དེ་འདིར་མ་འབྱོར་ཐབས་མེད་ཡིན་ཞེས་ནན་གསུང་གནང་། བཀའ་ལྟར་སྐུ་མདུན་དུ་ཁྲིད་པས་སྒྲུབ་དབང་རྒྱས་པ་སྐུ་རྐྱང་ལ་བསྩལ་བ་དང་། ཚེ་སྒྲུབ་ཀྱི་ཕྱག་དཔེ་ཞིག་ཀྱང་གནང་ནས་ལྗགས་ཀློག་མཁྱེན་པ་དང་ཐུགས་འཛིན་ཞལ་འདོན་ཆད་མེད་གནང་དགོས་ཚུལ་སོགས་ཐུགས་ཤིན་ཏུ་དགྱེས་པས་དོན་གྱི་ངོས་འཛིན་མཛད། དགུང་ལོ་བདུན་བཞེས་པ་ས་མོ་ལུག་གི་ལོར་རྫོགས་ཆེན་གདན་ཚབ་སྤྲུལ་སྐུ་ནམ་མཁའ་ཚེ་དབང་མཆོག་གྲུབ་དང་། སྡེ་དགེ་ཆོས་རྒྱལ་ཆེན་པོ་སོགས་མཆོད་ཡོན་རྣམས་ཀྱི་ཐུགས་དགོངས་ལྟར། རྒྱལ་རོང་སྤྲུལ་སྐུ་བསྟན་པའི་ཉི་མ། དབོན་ཨོ་རྒྱན་བསམ་འགྲུབ། བླ་མ་རིག་འཛིན་བཟང་པོ་སོགས་དབུ་ཆེ་དྲགས་རིམ་དཔོན་སློབ་སུམ་ཅུ་སྐོར་ཡབ་གཞིས་སུ་བྱོན་པ་ན། སྤྲུལ་པའི་སྐུས་སྔོན་གནས་རྗེས་དྲན་དང་དགྱེས་པའི་རྣམ་འགྱུར་དུ་མ་མཛད་པས་བླ་གྲྭ་ཀུན་ཡིད་ཆེས་ཀྱི་ངེས་ཤེས་འཁྲུངས་ཤིང་དད་པའི་མཆི་མ་དབང་མེད་དུ་འཐོར་བ་དང་བཅས་གྲུབ་དབང་རྫོགས་ཆེན་པའི་ཡང་སྲིད་བཞི་པར་ཐུགས་ཐག་ཆོད། དེ་ནས་ཡབ་ཡུམ་སྐུ་འཁོར་དང་ས་དབང་སྡེ་དགེའི་ཆིབས་ཁ་བ་སོགས་དཔོན་འཁོར་སུམ་ཅུའི་ཚོགས་དང་བཅས་པ་དལ་འབབ་གསེར་ལྡན་གྱི་ཆུ་བོ་བརྒལ་ཏེ་རུ་དམ་སྐྱིད་ཁྲམ་ལུང་དུ་ཆིབས་ཀྱི་ཁ་ལོ་བསྒྱུར། རིམ་པར་ཆུ་སྟོད་ཟླ་བའི་ཚེས་བཅུའི་སྔ་ཆ་ཉི་ཤར་གྱི་དུས་སུ། ཞེ་ཆེན། རྒྱལ་རོང་། སྟག་མོ་སྒང་སོགས་རྩ་བའི་དགོན་ལག་ཁག་དང་། སྡེ་གླིང་གི་མི་ཆེན་དཔོན་མགོ་སྐྱ་སེར་བཅས་སྐྱེ་བོའི་འདུ་ཚོགས་ས་གཞི་མི་མངོན་པ་ཙམ་གྱིས། ཆིབས་བསུ་རིང་ཐུང་དང་སེར་ཕྲེང་བཀོད་བཤམས་སོགས་ལྷ་མིའི་དཔལ་གྱི་འབྱོར་བ་བློའི་ར་བ་ལས་འདས་པའི་མཆོད་སྤྲིན་དང་བཅས། གོང་མའི་གདན་ས་རུ་དམ་ཨོ་རྒྱན་བསམ་གཏན་ཆོས་གླིང་གི་གཙུག་ལག་ཁང་ཐུབ་བསྟན་ཡོངས་སུ་འདུས་པའི་དགའ་བའི་ཚལ་ཆེན་པོར་ཞབས་སེན་ནོར་བུའི་ཕྲེང་བ་མི་འཇིགས་སྡེར་ལྔས་བཏེག་པའི་ཁྲི་ལ་མངའ་གསོལ། གཙང་ཁང་ཐུབ་ཆེན་གྱི་སྤྱན་སྔར་མཁས་གྲུབ་ཆེན་པོ་ནམ་མཁའ་ཚེ་དབང་མཆོག་གྲུབ་གྱིས་གཙུག་ཕུད་བཞེས་ཏེ་མཚན་འཇིགས་མེད་མཁྱེན་བརྩེའི་དབང་ཕྱུག་རྣམ་རྒྱལ་རྡོ་རྗེ་ཞེས་གསོལ། སླར་གསེར་ཁྲིར་ཞབས་པད་བཀོད་པ་དང་ཆབས་ཅིག་ཚེ་སྒྲུབ་འཆི་མེད་ཡང་སྙིང་གི་བརྟན་བཞུགས་དང་འབྲེལ་རྫོགས་ཆེན་གཞུང་གིས་ཁྲི་འབུལ་དང་། དེ་རྗེས་སྡེ་དགེ་ཆོས་རྒྱལ་ཆེན་པོས་སྐུ་ཚབ་གཉེར་ཆེན་ཆེད་མངགས་ཀྱིས་ཁྲི་འབུལ་ཕུལ། རིམ་པར་རྒྱལ་རོང་། གཡག་ཟེ། ཨོ་གུར་སོགས་ཡུལ་དགོན་ཐམས་ཅད་ནས་ཁྲི་འབུལ་དང་སྦྲགས། རྒྱལ་རོང་དབོན་བསམ་འགྲུབ་ནས་གསུང་བཤད་ཁྲོམ་ཐོག་ཆོད་པ་མཛད། ཕྱི་ཉིན་ཞེ་ཆེན་རིག་འཛིན་དཔལ་འབྱོར་རྒྱ་མཚོ་དབུ་བཞུགས་ཀྱིས་ཚེ་ཆོག་དང་འབྲེལ་ཞབས་བརྟན་ལེགས་འབུལ་རྒྱ་ཆེར་སྤྲོས་པ་དང་ཆབས་ཅིག་དབོན་སྤྲུལ་མཐུ་སྟོབས་རྣམ་རྒྱལ་དགུང་ལོ་བཅུ་གསུམ་དུ་སོན་པས་ཕུན་སུམ་ཚོགས་པ་ལྔ་ལྡན་གྱི་ལྗགས་བཤད་རྒྱ་ཆེར་སྤྲོས། རྒྱལ་ཚབ་པདྨ་གསང་སྔགས་བསྟན་འཛིན་གྱིས་སྔ་འགྱུར་བསྟན་པའི་བབ་ལུགས་ཀྱིས་དབུ་དྲངས་ཏེ་སྐབས་སུ་བབས་པའི་འབེལ་གཏམ་འབྱམས་ཀླས་པ་གནང་། དེ་འབྲེལ་སྟག་དགོན་གདན་ས་ནས་དབོན་སྤྲུལ་ཨོ་རྒྱན་ཉི་མ་དང་ཁང་དམར་སྤྲུལ་སྐུ་སོགས་དང་རྫོགས་ཆེན་ཕྱོགས་ཀྱི་ཡུལ་སྡེ། གཞན་ཡང་གྲུབ་མཐའ་རིས་མེད་ཀྱི་དགོན་སྡེ་འབྲེལ་ཅན། གླིང་ཚང་རྒྱལ་པོ་སོགས་ལྷ་སྡེ་མི་སྡེ་ཀུན་ཀྱིས་ཁྲི་སྟོན་དཔང་བསྟོད་དེ་ཕུལ། ཉིན་གསུམ་པར་སུ་ར་ཏོ་བཅུ་དྲུག་གི་མཆོད་གར་སོགས་དགའ་སྟོན་མཐའ་རྒྱས་ཀྱིས་མཇུག་བསྡུ་བར་མཛད། ཡབ་ཚང་ལ་དངུལ་སྲང་ཉིས་བརྒྱས་གཙོས་རྣམ་གྲངས་སུམ་བརྒྱ་ལྷག་གི་བླུ་ཡོན་གནང་སྐྱེས་དང་། དེ་བཞིན་ཕྱོགས་འབྱོར་ལྷ་མིའི་སྡེ་ཚོགས་ཀུན་ལ་སྟོན་ཆེན་གསོལ་མགྲོན་འབུལ་འགྱེད་སོགས་ཕུན་སུམ་ཚོགས་པའི་མཛད་སྒོ་སྤེལ། དེ་ནས་བཟུང་ཉེ་བར་གནས་པའི་སློབ་དཔོན་དབོན་པོ་ཆོས་གྲགས་བཟང་པོས་མཛད་དེ་བགྲང་བྱ་བཞིའི་བར་དུ་ཡི་གེའི་ཕྱི་མོ་ནས་ཐུན་མོང་རིག་གནས་ལ་བསླབ་སྦྱང་ནན་ཏན་མཛད་པས་མཁས་པར་མཁྱེན། བར་སྐབས་རྣམས་སུ་དབང་ལུང་གསན་བཞེས་དང་བསྙེན་སྒྲུབ་སོགས་ཅི་རིགས་མཛད། དགུང་ལོ་བཅུ་གཅིག་པར་ཡོངས་འཛིན་ཞི་བར་གཤེགས་པའི་ཚབ་ཏུ་མཁས་དབང་ཐུགས་རྗེ་བཀྲ་ཤིས་བཞུགས། འདི་ལོར་རྒྱལ་རོང་དུ་ཆིབས་བསྐྱོད་ནས་ཉི་སྤྲུལ་གསུམ་པ་མི་འགྱུར་ཕན་བདེ་རྒྱ་མཚོ་ལས། ལྷ་བཙུན་རིག་འཛིན་སྲོག་སྒྲུབ། ལྔ་པའི་རྒྱ་ཅན་ཉེར་ལྔ། ཉི་གྲགས་ཆོས་སྐོར་ཡོངས་རྫོགས། འཇིགས་གླིང་པོད་དགུ། ཐུགས་མཆོག་རྡོ་རྗེའི་ཎཱ་ག་རཀྵ་སོགས་ཀྱི་དབང་ལུང་ཁྲིད་གསུམ་མ་ལུས་པ་གསན། དགུང་ལོ་བཅུ་གཉིས་པ་ལོ་གསར་ཆོ་འཕྲུལ་ཟླ་བར་ལོ་དར་གྱི་བུམ་སྒྲུབ་ཚེས་བཅུའི་ཚོགས་དབུར་ཕེབས་ཏེ་ཕྱི་ནང་གི་ཞལ་བཀོད་སྟོང་ཐུན་ཤར་མར་ཐུགས་ཐོག་ནས་གནང་བས་མཁན་སྤྲུལ་འདུས་སྡེ་ཡོངས་ཀྱིས་བསྔགས་བརྗོད་ཀྱི་མེ་ཏོག་འཐོར། དགུང་གྲངས་བཅོ་ལྔ་པར་མཁས་གྲུབ་མཚུངས་མེད་དཔོན་གུར་བླ་མ་ངག་དབང་བློ་གྲོས་གདན་དྲངས་ནས་བཀའ་བརྒྱད་གསང་རྫོགས། ཚེ་བདག་ལྕགས་འདྲ་ལྕགས་སྡིག རྫོགས་ཆེན་སྙན་བརྒྱུད། པད་གླིང་བླ་མ་ནོར་རྒྱམ། དྲི་མེད་ལྷུན་པོའི་དོན་ཏིག་སོགས་དབང་ལུང་གི་རྒྱུན་དཀོན་རིགས་མང་པོ་གསན་བཞེས་གནང་། ལོ་དེར་ཞེ་ཆེན་རབ་འབྱམས་གསུམ་པ་རིག་འཛིན་དཔལ་འབྱོར་རྒྱ་མཚོ་ལས་དགེ་ཚུལ་གྱི་སྡོམ་པ་བཞེས་པས་རིག་འཛིན་འགྱུར་མེད་ཀུན་བཟང་ཐེག་མཆོག་བསྟན་འཛིན་དཔལ་བཟང་པོར་མཚན་འབུལ་དང་སྦྲགས་སྟོན་མཆོག་ཤཱཀྱ་སེངྒེའི་རྒྱལ་ཚབ་ཏུ་མངའ་གསོལ། དེ་ནས་བཟུང་སྐུ་ཚེ་གང་པོར་ཕམ་ལྟུང་གི་སྡེ་ཚན་རགས་པས་ལྟ་ཅི་ཐ་ན་ཕྱི་དྲོའི་ཁ་ཟས་སོགས་ཉེས་ལྟུང་གི་ཆ་ཕྲ་མོས་ཀྱང་མ་གོས་པར་གནས་བརྟན་འདུལ་འཛིན་ཆེན་པོའི་ངོ་བོར་བཞུགས། གདོད་མའི་མགོན་པོ་ནམ་མཁའ་ཚེ་དབང་མཆོག་གྲུབ་ཐུན་མིན་རིགས་བདག་ཏུ་བསྟེན་ཏེ་མཁའ་འགྲོ་སྙིང་ཐིག་དང་། གསང་བ་སྙིང་ཐིག རྡོར་སེམས་སྙིང་ཐིག་རྣམས་ཀྱི་ཉམས་ཁྲིད་གསན་ནས་སྔོན་འགྲོའི་ཐུགས་སྦྱོང་མཛད་པས་དད་དང་ངེས་འབྱུང་བྱང་སེམས་རྣམས་བཅོས་མིན་ཐུགས་ལ་འཁྲུངས། ཁྱད་པར་གྱི་སྔོན་འགྲོ་འཁོར་འདས་རུ་ཤན་སྐབས་སྒོ་གསུམ་སྦྱོང་བ་དང་སེམས་རིག་ཤན་འབྱེད་ལ་རྡོ་རུས་ཐུག་པ་མཛད་པས། དངོས་གཞིའི་ཉམས་ཁྲིད་ལ་མ་ལྟོས་པར་རིག་སྟོང་རྗེན་པར་ངོ་འཕྲོད་དེ་ཀུན་བཟང་གདོད་མའི་རྒྱལ་སར་དབང་བསྒྱུར་བས་མདོ་ཁམས་རྫོགས་ཆེན་པ་ཞེས་གྲགས་པ་དོན་ལྡན་དུ་མཛད། དེ་མཚུངས་དགུང་ལོ་ཉི་ཤུ་བཞེས་པ་ཆུ་བྱ་ལོར་ཡར་ལུང་པདྨ་བཀོད་དུ་ཆེད་ཕེབས་ཀྱིས། ལྷ་སྲས་མཆོག་གྲུབ་རྒྱལ་པོའི་རྣམ་སྤྲུལ་གྲུབ་དབང་འཇིགས་མེད་ཕྲིན་ལས་འོད་ཟེར་ལས་ཀུན་མཁྱེན་ཡབ་སྲས་ཀྱི་བཀའ་གཏེར་དག་སྣང་བསྟན་བཅོས་སྐོར་དང་། སྙན་བརྒྱུད་རྡོ་རྗེ་ཟམ་པ་སོགས་ཀྱི་དབང་ལུང་ཁྲིད་གསུམ་ཡོངས་རྫོགས་གསན། རྗེ་འདི་ཐོག་མར་ཞལ་མཇལ་སྐབས་གཟིམས་ཁང་ཕྱིའི་ཉི་རའི་ནང་དུ་སྐུ་ན་ཤིན་ཏུ་བགྲེས་པའི་བླ་མ་ཞིག་བཞེངས་འདུག་པའི་ཞལ་ནས་ངས་ཁྱོད་ད་བར་བསྒུགས་པ་ཡིན་ཞེས་དགྱེས་ཚོར་ཆེན་པོ་གནང་སྟེ་མི་སྣང་བར་གྱུར། རིམ་པར་གཟིམས་ཁང་དུ་ཕེབས་པ་ན་ད་ཅིའི་བླ་མ་དེ་ཁྲི་མཐོན་པོ་ཞིག་གི་སྟེང་ན་ཆང་ཐོད་པ་གང་གསོལ་བཞིན་ཡོད་པ་མཇལ། ཕྱག་འབུལ་བྱས་ཏེ་སྐུ་དྲུང་དུ་བཅར་བས། དེ་མ་ཐག་ཆང་ཐོད་པ་གང་གནང་ནས་རོལ་ཅིག་གསུངས། ཡོངས་འཛིན་གྱིས་སྤྲུལ་སྐུ་རྟེན་དགེ་ཚུལ་ཡིན་ལགས་ཞུས་པར། དགེ་ཚུལ་ཡིན་ནའང་གསོལ་ཅིག་གསུངས་པས། བཀའ་གསུང་ལྟར་གསོལ་བས་སྐད་ཅིག་དེ་ཉིད་དུ་ཐ་མལ་གྱི་སྣང་ཤེས་ཐམས་ཅད་རང་བཞིན་གྱིས་འགགས་ཏེ། གང་སྣང་བདེ་སྟོང་གི་རོལ་པར་འབྱམས་སུ་ཀླས་ཤིང་བླ་སློབ་དགོངས་པ་གཅིག་ཏུ་འདྲེས་ནས་བྱིན་བརྒྱུད་ཀྱི་རྟོགས་པ་ཅར་ཕོག་ཏུ་འཕོས་པས་མཐོང་ལམ་དོན་དམ་གྱི་བདེན་པ་མངོན་དུ་གྱུར། རྗེ་འདི་གཉིས་བཀའ་དྲིན་འགྲན་མེད་ཀྱི་རྩ་བའི་བླ་མ་ཡིན་ཞེས་རྒྱུན་དུ་དད་གུས་ཚད་མེད་མཛད། གོང་གསལ་སྙིང་ཐིག་རྣམ་གཉིས་ཀྱི་དབང་ལུང་དང་། ཉང་གཏེར་རྟ་ནག མགོན་པོ་ཕྱག་བཞི་སོགས་ཉང་གཏེར་དང་། རྫོགས་ཆེན་ལྟ་བ་ཀློང་ཡངས་སོགས་རྡོར་གླིང་ཆོས་སྐོར། སངས་རྒྱས་གླིང་པའི་དགོངས་འདུས། ཀར་གླིང་ཞི་ཁྲོ། རཏྣའི་ཕུར་པ། དཔའ་བོ་ལས་རབ་རྩལ་གྱི་ཟབ་གཏེར་ཕལ་ཆེར་སོགས་དབང་ཁྲིད་ཀྱི་རྒྱུན་དཀོན་རིགས་རྣམས་གསན་བཞེས་དང་། གཏེར་ཆེན་ཀློང་ཆེན་རོལ་པ་རྩལ་གྱིས་རང་གཏེར་པདྨ་རྒྱལ་པོའི་ཆོས་སྐོར་ཤིན་ཏུ་ཟབ་པ་གཙོ་བོ་གྱུར་པའི་སྨིན་གྲོལ་གྱི་གདམས་པ་བསྩལ་ཅིང་། ལྷག་པར་རྫོགས་ཆེན་སྙིང་ཐིག་གི་ཐུན་མིན་ཁྱད་ཆོས་ཐོད་རྒལ་ཉམས་ཁྲིད་བསྩལ་བ་ཐུགས་ཉམས་སུ་བཞེས་པས་རིག་པ་ཚད་ཕེབས་ཀྱི་རྟགས་སྣང་མངོན་དུ་གྱུར། མཁན་རིག་འཛིན་བཟང་པོའི་མདུན་ནས་ཉང་གཏེར་བཀའ་བརྒྱད། དགེ་རྩེ་བླ་མ་འཇིགས་མེད་ངོ་མཚར་རྒྱ་མཚོ་ལས་འདུས་པ་མདོ་དབང་ཆེན་མོ་དང་སྙིང་ཐིག་སྐོར། རྒྱལ་བའི་སྲས་པོ་གཞན་ཕན་མཐའ་ཡས་ལས་བཀའ་བསྟན་གྱི་ལུང་རྒྱུན་གང་ཡོད་དང་། ཁྱད་པར་སྔ་འགྱུར་རྙིང་མའི་རྒྱུད་གཞུང་རྒྱ་འགྲེལ་གྱི་བཤད་རྒྱུན་འཕགས་བོད་པཎ་གྲུབ་ཀྱི་ཞལ་ཤེས་འཁྲུལ་མེད་རྣམས་གསན། དེ་མཚུངས་ཕྱག་ན་པད་མོ་འཇིགས་མེད་རྒྱལ་བའི་མྱུ་གུ་དང་། འབར་ཆུང་བཀྲ་ཤིས་རྒྱ་མཚོ། ཉི་སྤྲུལ་ཕན་བདེ་རྒྱ་མཚོ། རྒྱལ་དབང་དགུ་པ་ལུང་རྟོགས་རྒྱ་མཚོ། རྒྱལ་ཚབ་དེ་མོ། གྲུབ་མཆོག་འཇིགས་མེད་གོ་ཆ། མཁས་གྲུབ་ཕྲིན་ལས་དར་རྒྱས། ཞིང་སྐྱོང་འཇིགས་མེད་མགོན་པོ། རྨོག་སྟོན་ཆོས་དབྱིངས་རྡོ་རྗེ། ངོར་ཐར་རྩེ་མཁན་ཆེན་སོགས་མདོར་ན་གངས་རིའི་ལྗོངས་འདིར་སྐབས་དེར་འཚོ་གཞེས་ཀྱི་བསྟན་འཛིན་མཁས་གྲུབ་ཡོད་དོ་ཅོག་གི་ཞབས་ལ་གཏུགས་ནས་སྒྲུབ་བརྒྱུད་ཤིང་རྟ་བརྒྱད་ཀྱི་མན་ངག་ཆོས་ཚུལ་ཐམས་ཅད་མ་གསན་པ་མེད་པས་གསན་ཡིག་རྐྱང་པ་པོད་ཆེན་གསུམ་ལྷག་བཞུགས། དེ་ལྟར་གསན་བཞེས་གནང་བ་ཐམས་ཅད་རྣམ་གཡེང་དང་ཕྱི་བཤོལ་གྱི་དབང་དུ་མ་སོང་བར་སྐུ་ཚེ་གང་པོར་བསྐྱེད་རྫོགས་ལྟ་སྒོམ་གྱི་ཉམས་ལེན་དང་། བསྙེན་སྒྲུབ་ཏིང་འཛིན་གྱི་རྣལ་འབྱོར་ལས་མི་འདའ་བས་ལྟ་བའི་ཕུ་ཐག་ཆོད་དེ་ཆོས་ཉིད་ཟད་སར་འཁྱོལ། སྒོམ་པ་ཀློང་དུ་གྱུར་པས་འོད་གསལ་ལ་གཡོ་འགུལ་བྲལ། སྤྱོད་པ་ཚད་དུ་ཕྱིན་པས་ཚོགས་དྲུག་རང་སར་གྲོལ། རྟོགས་པས་རང་རྒྱུད་གྲོལ་བས་ཆོས་བརྒྱད་འདོར་ལེན་དང་བྲལ། ཐུགས་རྗེས་གཞན་རྒྱུད་གྲོལ་བས་འབྲེལ་ཚད་དོན་ལྡན་དུ་བྱོན་པ་སྟེ། ཆོས་རྗེ་དཔལ་སྤྲུལ་རིན་པོ་ཆེས། སྙིགས་དུས་འདིར་རྫོགས་པ་ཆེན་པོའི་སྣང་བཞི་མཐའ་རུ་ཕྱིན་ནས་ཆོས་ཉིད་ཟད་ས་ལ་སྒྲ་ཇི་བཞིན་སྤྱོད་པ་སྐྱེས་མཆོག་འདི་ཉིད་ཁོ་ན་ཡིན་ཞེས། ཉིན་ལྟར་གཤིན་རྗེ་སྒྲུབ་ཕུག་ནས་རྫོགས་དགོན་ལ་ཞབས་ཐང་གིས་ཕེབས་ཏེ་སྐུ་མདུན་རང་དུ་ཕྱག་འབུམ་ཕྲག་གཅིག་འཚལ་བར་མཛད། གཞན་ཡང་རྡུལ་བྲལ་སྟོབས་བཅུ་མངའ་བའི་ཡེ་ཤེས་ཀྱི་གཟིགས་པས་མཐའ་དག་ཤེས་བྱ་རབ་འབྱམས་ཀྱི་ཆོས་ཚུལ་ཐམས་ཅད་མ་འདྲེས་ཅིག་ཅར་ཉིད་དུ་མཁྱེན་ཅིང་ཆུབ་པས། སྐབས་དེའི་མདོ་ཁམས་ཕྱོགས་ཀྱི་ཡང་སྲིད་ངོས་འཛིན་ཐམས་ཅད་རྗེ་འདི་ཁོ་ནས་མཛད་ཅིང། ཐ་ན་དགོན་འདབས་ཀྱི་ཕྱུགས་རྫི་བྱིས་པ་ཚོས་ཀྱང་དགུང་ཁ་གྲུབ་དབང་མཆོག་ལ་དགོངས་བརྟག་ཞུས་ཏེ་ཕྱུགས་འདེད་ལ་འགྲོ་བ་དང་། སྐབས་ཤིག་ཨ་མདོ་བཀྲ་ཤིས་འཁྱིལ་གྱི་སློབ་གཉེར་གྲྭ་གཞོན་གསུམ་དབུས་ཕྱོགས་ལ་མཇལ་སྐོར་དུ་སོང་ནས་ཕྱིར་ལོག་པའི་ལམ་ཞོར་རྫོགས་ཆེན་ལ་སླེབས་ཤིང་། དེ་ལས་གཅིག་གིས་རྫོགས་ཆེན་རིན་པོ་ཆེ་ལ་མངོན་ཤེས་ཆགས་ཐོགས་མེད་ཅེས་ཀུན་ལ་རླུང་ལྟར་གྲགས་འདུག་པས། འུ་ཅག་གི་སྦུད་རྐྱལ་བུག་རལ་འདི་གནས་རོགས་ནད་པ་ཞིག་ཡིན་ཁུལ་གྱིས་ཁོང་ལ་དགོངས་བརྟག་མཛད་རོགས་ཞེས་ཉམས་སད་ཅིག་ཨེ་བྱེད་ཟེར་བར། གཅིག་ཤོས་གཉིས་ཀྱང་མཐུན་ཏེ་ཕྱི་ཉིན་གྲུབ་དབང་རིན་པོ་ཆེའི་སྐུ་མདུན་བཅར་ནས། ངེད་ཚོ་མི་བཞི་ལྷ་སར་སོང་བ་ལས་བཀྲ་ཤིས་ཚེ་རིང་ཟེར་བའི་གནས་གྲོགས་དེ་ཕྱིར་འོང་བའི་ལམ་ཁ་ནས་ནད་ཀྱིས་མནར་ཞིང་། ད་ལྟ་དབུགས་འབྱིན་རྔུབ་ཡང་དཀའ་བ་འདུག་ན་སྨན་དཔྱད་ཇི་དགོས་དང་སྲོག་སྐྱོན་ཡོད་མེད་སོགས་ལ་ཐུགས་བརྟག་ཞིག་གནང་རོགས་ཞེས་ཞུས་པར། ཆོས་ཀུན་ཆུབ་པའི་ཡེ་ཤེས་ལ་མཉམ་རྗེས་རེས་འཇོག་གི་རྩོལ་སྒྲུབ་དང་བྲལ་ཡང་དལ་གཅིག་དགོངས་པ་གཏད་པའི་ཚུལ་དང་བཅས་ཞལ་ནས། བུ་སྦུད་པ་ཚེ་རིང་ནད་ཀྱིས་ཐེབས་པར། སྨན་ལྷ་རྗེ་མི་དགོས་ཁབ་སྐུད་ཚོལ། ཅེས་གསལ་བར་གསུངས་པས་ཁོང་ཚོ་ཡིད་འགྱོད་སྐྲག་སྔངས་དང་བཅས་ཕྱིར་ལོག །གཞན་ཡང་དུས་དེར་ཉག་སྐེད་མགོན་པོ་རྣམ་རྒྱལ་ཞེས་མི་སྲུན་རླང་པོར་སྤྱོད་པ་དད་དང་སྙིང་རྗེའི་རྩ་བ་ཆད་པས་དགོན་སྡེ་དང་དཀོན་མཆོག་གི་རྟེན་གྱ་ཚོམ་དུ་མེར་སྲེག་ཅིང་། ཀུ་རེ་ཙམ་གྱི་ཆེད་དུའང་ཡུལ་མི་གསོད་བཅོམ་བྱེད་པ་སོགས་སྡིག་པའི་ལས་ལ་འཛེམ་མེད་དུ་སྤྱོད་པ་དེ་རྫོགས་ཆེན་དགོན་དུ་འོང་བ་ཐོས་པས་ཐམས་ཅད་འཇིགས་སྐྲག་གིས་མནར་ཞིང། གཉེར་ཆེན་སོགས་ཆེ་རིམ་པ་འགའ་གྲུབ་དབང་མཆོག་གི་སྐུ་དྲུང་དུ་སྔོན་བཅར་བྱས་ཏེ། ད་རེས་དུས་རྒྱུན་ལྟར་གང་བྱུང་འཁྲུལ་ཞིག་གི་བཀའ་གསུང་མི་ཕེབས་པར་མཐུན་འཇུག་མི་ཆོས་ཤིག་མ་མཛད་ཕྱིན་བསྟན་དགོན་ལ་བར་ཆད་ཆེ་ཚུལ་བཅས་བསླབ་ཞུས་ཞིབ་ཕྲ་བྱས། ཕྱི་ཉིན་ཉག་སྐེད་དཔོན་འཁོར་རྣམས་དགོན་ཐོག་ཏུ་འབྱོར་མ་ཐག་མགྲོན་གཉེར་སོགས་ཀྱིས་དར་བཏང་གུས་འདུད་ཀྱིས་སྣ་ལེན་བྱས་པར་གཏམ་ལེན་ཙམ་ཡང་མི་བྱེད་པར་ཤར་རྒྱག་གཟིམས་ཁང་དུ་ཤོར། གྲུབ་དབང་མཆོག་གི་མདུན་དུ་བསྡད་དེ་ང་ཤི་རྗེས་གང་དུ་སྐྱེ་ས་འདུག་ཅེས་དྲིས་པར། ཁྱོད་ཤི་མ་ཐག་དམྱལ་བ་རྡོ་རྗེ་གདན་ལས་འགྲོ་ས་མི་འདུག་ཅེས་བཀའ་ལན་གནང་། འོ་ན་ངའི་དཔུང་གིས་གཞུང་ས་དགའ་ལྡན་ཕོ་བྲང་གི་སྲིད་དབང་འཕྲོག་ཐུབ་ས་ཨེ་འདུག་ཞུས་པར། ལྷ་ལྡན་ཕར་ཞོག་ཆབ་མདོ་ལའང་སླེབ་ཐུབ་ས་མ་རེད་ཅེས་གསུངས་པས། ཁོ་ཡི་རང་དང་བཅས་བླ་མ་ཟེར་བ་ཆོས་བརྒྱད་མཐུན་འཇུག་དང་བྲལ་བ་ཁྱེད་འདྲ་བ་དགོས། ད་སྔོན་འཕྲད་པའི་བླ་མ་ཐམས་ཅད་ངོ་དགའ་ཁ་ཡག་ཅན་འབའ་ཞིག་ལས་དངོས་དོན་གསུང་མཁན་སུ་ཡང་མ་བྱུང་ཞེས་ཞབས་སྤྱི་བོར་བླངས། ཕྱིན་ཆད་ཁོ་པ་དམྱལ་པར་མི་གཏོང་རྒྱུའི་ཞལ་བཞེས་མ་གནང་ཐབས་མེད་ཡིན་ཞེས་བཙན་གྱིས་ཞུས་པར། འོ་ན་སྐྱེ་རེས་གསུམ་དུ་ངན་འགྲོར་མི་གཏོང་། ཞེས་ཞལ་བཞེས་གནང་བ་སོགས་ངོ་མཚར་བའི་རྣམ་ཐར་བརྗོད་ཀྱིས་མི་ལང་པ་དང་། དེ་ལས་གཞན་བྱ་བ་ལས་ཀྱི་འཁོར་ལོས་བསྟན་འགྲོའི་མཛད་བཟང་ཕྱོགས་བརྒྱར་སྤེལ་བའི་ཚུལ་ནི། སྐུ་ན་ཕྲ་མོའི་དུས་མཁན་སློབ་ཆོས་གསུམ་གྱི་སྐུ་བརྙན་གསེར་ཟངས་ལས་གྲུབ་པ་ཐོག་ཚད་བཞེངས་པ་ནས་བཟུང་རྒྱུན་དུ་སྐུ་གསུང་ཐུགས་རྟེན་དང་། དུས་མཆོད་སྒྲུབ་ཁག་གི་མཆོད་རྫས་ཡོ་བྱད་སོགས་ཚད་མེད་པ་གསར་བཞེངས་མཛད། དགུང་གྲངས་ཉེར་གཉིས་པ་ཤིང་ཁྱི་ལོར་དབུས་ཕྱོགས་སུ་ཆིབས་བསྐྱོད་མཛད་དེ་རྩེ་ཤོད་ཆོས་འཁོར་གསུམ་དང་རྡོར་སྨིན་གཉིས་སོགས་སུ་མཆོད་སྤྲིན་རྒྱས་སྤྲོས་དང་། ཁྱད་པར་ལྷ་ལྡན་སྨོན་ལམ་ཆེན་མོའི་ཚོགས་དབུར་རྒྱལ་མཆོག་དགུ་པ་སྟོན་འཁོར་སྤྱན་དྲངས་ཏེ་མཆོད་པའི་སྤྲིན་ཕུང་སྤྲོས་པ་དང་འབྲེལ་མཎྜལ་ཚོགས་བཤད་རྗེ་ཉིད་ཀྱིས་མཛད་པས་གདན་ས་གསུམ་གྱི་དགེ་བཤེས་འདུས་ཚོགས་ཐམས་ཅད་ཐུགས་ཡིད་འཕྲོག་སྟེ་གྲགས་པའི་རྔ་ཆེན་ཕྱོགས་ཀུན་ལྡིར་བར་བྱས། རྒྱལ་དབང་ལུང་རྟོགས་རྒྱ་མཚོ་འདན་ཡུལ་དུ་འཁྲུངས་ཤིང་ར་ཁོ་ཚང་དང་སྐུ་རིགས་གཅིག་པའི་དབོན་དུ་སོང་བས་ནང་བརྩེའི་གཟིགས་པ་ཚད་མེད་པས་ཧོ་ཐོག་ཐུའི་འཇའ་ས་ཕུལ་བ་དང་བཅས་སྔ་འགྱུར་བསྟན་པའི་བདག་པོར་མངའ་གསོལ། དགུང་གྲངས་ལྔ་བཅུར་ཕེབས་པ་ཆུ་སྟག་དབྱུག་ཟླའི་ཚེས་དྲུག་གི་སྔ་ཆར་བསྟན་པའི་གེགས་ཆག་སྟོབས་སུ་བདོ་བས་ཧོར་ཁོག་ནས་བརྩམས་ཏེ་ས་གཡོས་ཀྱི་འཇིག་པ་ཆེན་པོ་བྱུང་བས་དགོན་གནས་རྨང་མེད་དུ་གྱུར། སྐབས་དེར་རྗེ་ཉིད་སྡེ་དགེའི་རྒྱལ་ཁབ་ཏུ་བཞུགས་ཀྱང་སྒྲིབ་བྲལ་ཡེ་ཤེས་ཀྱི་གཟིགས་པས་ཇི་བཞིན་མཁྱེན་པས་ཐུགས་དབྱུང་སྟེ་བྱ་བཏང་སྤོང་བ་པའི་བརྟུལ་ཞུགས་ལ་ཐུགས་གཏད་པ་ན། ཆོས་རྒྱལ་དམ་ཚིག་རྡོ་རྗེས་ཐུགས་གསོའི་ཞུ་བསྐུལ་དང་དགོན་གཞིས་ཉམས་གསོ་སོར་ཆུད་བྱེད་རྒྱུའི་ཁས་ལེན་ནན་ཞུ་ཡང་ཡང་ཕུལ་བས། སླར་གདན་སར་ཞབས་པད་བཀོད་དེ་གཙུག་ལག་ཁང་བླ་བྲང་བཅས་པ་སྔར་ལས་ལྷག་པའི་བཞེངས་བཀོད་གྲུབ། དེ་མཚུངས་ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་དང་སེང་ཕྲུག་པདྨ་བཀྲ་ཤིས་ཟུང་ལ་བཀའ་བགྲོས་ཏེ། དགོན་ལས་རྒྱང་གྲགས་གཅིག་གིས་ཆོད་པའི་མཁས་པའི་ལྗགས་སམ་ཤེས་རབ་ཀྱི་རལ་གྲིའི་དབྱིབས་དང་མཚུངས་པའི་རི་ཕྲན་གྱི་སྟེང་དུ། གངས་ལྗོངས་མཁས་པའི་འབྱུང་གནས་ཤྲཱི་སེང་ཆོས་གྲྭ་ཆེན་མོ་གཙུག་ལག་ཁང་གྲྭ་ཤག་དང་བཅས་པ་གསར་དུ་བསྐྲུན། ཡུལ་མདོ་སྨད་ཀྱི་ལྗོངས་སུ་བསྟན་རྩ་ཆོས་འདུལ་རིན་པོ་ཆེ་གཞི་གསུམ་གྱི་ཕྱག་བཞེས་གཙང་མའི་སྒོ་འཕར་གསར་དུ་ཕྱེས། གཞུང་ཆེན་བཀའ་པོད་ལྔ་དང་རྒྱུད་རྒྱལ་གསང་བ་སྙིང་པོའི་གཙོས་སྔ་འགྱུར་ཆེ་བ་དྲུག་ལྡན་གྱི་མདོ་སྔགས་དགོངས་འགྲེལ་དང་བཅས་པའི་བཤད་པའི་བཀའ་སྲོལ་ཐོག་མར་ཕྱེས་པས་ད་ལྟའི་བར་དུ་ཆོས་བརྒྱུད་སློབ་ཚོགས་དང་བཅས་པས་ཕྱོགས་ཀུན་ཡོངས་སུ་ཁྱབ་པས་རྒྱལ་བསྟན་སྤྱི་དང་བྱེ་བྲག་ལ་བཀའ་དྲིན་དང་ཕྲིན་ལས་རྨད་དུ་བྱུང་བ་ཉིད་དོ། །འཕྲོས་དོན་གསུང་གི་བདུད་རྩི་བཞེས་པའི་བསྟན་འཛིན་གྱི་སྐྱེས་བུ་ནམ་མཁའི་སྐར་ཚོགས་ལྟར་བྱོན་པ་ལས་གཙོ་བོའི་མཚན་ཙམ་སྨོས་ན། དཔོན་སློབ་སྐུ་ཕྲེང་གསུམ་པ་ནམ་མཁའ་ཆོས་ཀྱི་རྒྱ་མཚོ། བཞི་པ་འཇིགས་མེད་ཆོས་དབྱིངས་འོད་གསལ། ཀུན་མཁྱེན་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་ཏེ་སྐྱེས་མཆོག་བསྟན་འཛིན་ཆེན་པོ་གསུམ། ཉི་གྲགས་བཞི་པ་དཀོན་མཆོག་འཇིགས་མེད་རྒྱལ་མཚན། རབ་འབྱམས་བཞི་པ་མི་མཇེད་ཞིང་མགོན། རྒྱལ་ཚབ་མི་བསྐྱོད་མཁས་གྲུབ། རྗེ་དབོན་གསུམ་པ་གར་དབང་ཐུགས་མཆོག་རྡོ་རྗེ། ནམ་སྤྲུལ་གཉིས་པ་ཀུན་བཟང་ཐུགས་མཆོག་རྡོ་རྗེ་སྟེ་བརྒྱུད་འཛིན་གདམས་པའི་གཏེར་མཛོད་འཛིན་པ་ལྔ། རིག་འཛིན་འཇིགས་མེད་གླིང་པའི་ཐུགས་སྤྲུལ་མཁྱེན་བརྩེ་ཡེ་ཤེས་རྡོ་རྗེ། གླིང་ཚང་གཏེར་སྟོན་པདྨ་འགྲོ་འདུལ། མཆོག་གྱུར་བདེ་ཆེན་གླིང་པ་སྟེ་སྤྲུལ་པའི་གཏེར་ཆེན་རྣམ་གསུམ། སྤྱན་རས་གཟིགས་དབང་རྒྱལ་བའི་མྱུ་གུ། རྡོ་གྲུབ་གཉིས་པ་བསྟན་པའི་རྒྱལ་མཚན། ཨོ་རྒྱན་འཇིགས་མེད་ཕྲིན་ལས་འགྲོ་འདུལ། མཆོག་སྤྲུལ་པདྨ་བདེ་ཆེན་བཟང་པོ་སྟེ་མཁྱེན་བརྩེ་ནུས་ལྡན་གྱི་བརྒྱུད་འཛིན་གསུམ། མཁས་གྲུབ་འཇིགས་མེད་སྐལ་བཟང། དཔལ་སྤྲུལ་འཇིགས་མེད་ཆོས་ཀྱི་དབང་པོ་སྟེ་ཀུན་སྤང་རྟོགས་པའི་དབང་ཕྱུག་ཆེན་པོ་གཉིས། མཁན་ཆེན་སེང་ཕྲུག་པདྨ་བཀྲ་ཤིས། མཁན་ཆེན་པདྨ་བཛྲ་སོགས་རང་དགོན་གྱི་མཁན་རབས་པདྨའི་མཚན་འཆང་ཆེན་པོ་བཅུ། དེ་ལས་པདྨ་འོད་ཟེར་དང་། གླིང་སྤྲུལ་ཐུབ་བསྟན་པདྨ་རྒྱལ་མཚན་ཏེ་ནང་གི་ཐུགས་སྲས་ཐུ་བོ་གཉིས། དགེ་མང་དབོན་པོ་བསྟན་འཛིན་ནོར་བུ་དང་། བཀའ་བབ་བདུན་ལྡན་མཁྱེན་བརྩེའི་དབང་པོ་སྟེ་དགོངས་བརྒྱུད་བྱིན་རླབས་འཕོས་པའི་ཐུགས་སྲས་ཉི་ཟླ་ཟུང་། ཉག་བླ་པདྨ་བདུད་འདུལ། འཇུ་བླ་སངས་རྒྱས་འོད་ཟེར་སོགས་འོད་ལུས་གྲུབ་པ་བཅུ་གསུམ། ཀཿཐོག་ཞིང་སྐྱོང་གོང་འོག་དང་རྨོག་སྟོན་གོང་འོག་སྟེ་བཀའ་གཏེར་གྱི་བསྟན་འཛིན་ཆེན་པོ་བཞི། ཞེ་ཆེན་མ་ཧཱ་པཎ་ཆེན་དབོན་སྤྲུལ་མཐུ་སྟོབས་རྣམ་རྒྱལ། མཁས་མཆོག་གུ་རུ་བཀྲ་ཤིས་སོགས་བཤེས་གཉེན་ཆེན་པོ་བཅུ། ཨ་འཛོམས་འབྲུག་པ་འགྲོ་འདུལ་དཔའ་བོ་རྡོ་རྗེ། རྫོགས་ཆེན་འབྲུག་པ་ཆོས་དབྱིངས་རོལ་བའི་རྡོ་རྗེ་སོགས་རྟོགས་གྲོལ་ལུང་ཟིན་གྱི་སྐྱེས་བུ་གསུམ། ལི་ཐང་དགེ་བཤེས་བྱམས་པ་ཕུན་ཚོགས། ལྷ་རམ་དགེ་བཤེས་ཀུན་བཟང་བསྟན་དར། མི་ཉག་ཀུན་བཟང་བསོད་ནམས་སོགས་མདོ་སྔགས་འཆད་པའི་བཀའ་བབ་ཆེན་པོ་ཉེར་བདུན། མཛོད་ལྔའི་ཤིང་རྟ་ཀོང་སྤྲུལ་ཡོན་ཏན་རྒྱ་མཚོ། ནཱ་ལེནྡྲའི་གཟིམས་འོག་ཐམས་ཅད་མཁྱེན་པ་ངག་དབང་བསྟན་འཛིན་སྙན་གྲགས། མཁས་གྲུབ་ཆེན་པོ་ཀྱི་ལིང་ཐུགས་མཆོག་རྡོ་རྗེ་སོགས་ཕྱོགས་ཀྱི་བསྟན་འཛིན་ཆེན་པོ་བཅུ། རིགས་དབོན་འཇིགས་མེད་སོགས་ཕྱག་བཞེས་འཕྲིན་སྒྲུབ་ཀྱི་རྒྱལ་ཚབ་རྩེ་མོ་དགུ། ཁམས་སྤྲུལ་སྒྲུབ་བརྒྱུད་ཉི་མ་གོང་འོག་སྟེ་སྒྲུབ་བརྒྱུད་བསྟན་འཛིན་མཆོག་ཟུང་། མང་བཟའ་བླ་མ་དཔལ་གྱི་སེང་གེ། རོག་བཟའ་དཔལ་དགེ་སོགས་སྒྲུབ་པའི་རྒྱལ་མཚན་འཛིན་པའི་སྤོང་བ་པ་ཆེན་པོ་ཉེར་བདུན། མ་ཅིག་མཁའ་འགྲོས་བྱིན་རླབས་ཐོབ་པ་གཡག་ཟེ་བ་དགོངས་གཅོད་བསོད་ནམས་ནོར་བུ་སོགས་གཅོད་ཡུལ་བཀའ་བབ་ཀྱི་ལུང་ཟིན་སྐྱེས་བུ་བཞི། དགེ་རྒྱས་གཅོད་པ་སོགས་བརྟུལ་ཞུགས་སྤྱོད་པའི་རྣལ་འབྱོར་ཆེན་པོ་བརྒྱད། རས་སྤྲུལ་འཁྲུལ་སྣང་སྣ་ཚོགས་རང་གྲོལ། ཁྱུང་ལུང་རས་པ་དམ་ཚིགས་རྡོ་རྗེ་སོགས་ཕྱོགས་མེད་འགྲོ་དོན་མཛད་པའི་རྣལ་འབྱོར་པ་དགུ། ཉི་གྲགས་དབོན་སྤྲུལ། དཔལ་སྤུངས་དབོན་སྤྲུལ། དཔལ་ཡུལ་དབོན་སྤྲུལ། ཛར་ཀ་དབོན་པོ། གསེར་ཏོག་དབོན་པོ། སྟོང་དཔོན་རྡོར་ལྷུན། ཆོས་སྐོར་ཀློང་གསལ། གཞི་ཆེན་སྤྲུལ་སྐུ་སོགས་ས་ཐོབ་སེམས་དཔའ་ཆེན་པོ་བཅུ། ཁྲོ་ཟུར་གཏེར་སྟོན་སྐྱེ་ཆེན་རང་གྲོལ། གཏེར་སྟོན་ཚེ་དབང་ནོར་བུ་སོགས་ཟབ་གཏེར་བཀའ་བབ་ལྔ། གྲུབ་བརྙེས་རིག་འཛིན་ཆོས་དབྱིངས་སྟོབས་ལྡན་གོང་འོག །ཨ་ལགས་ནམ་མཁའ་རྒྱ་མཚོ་སྟེ་རྡོ་རྗེ་འཛིན་པ་དྲག་སྔགས་བཀའ་བབ་ཆེན་པོ་གསུམ། ཡང་སློབ་ཕུར་ཐོག་སྟོང་དང་དགུ་བརྒྱ། རབ་འབྱམས་ལྔ་པ། སྐུ་ཞབས་གཉིས་པ། གྲུབ་ཆེན་གསུམ་པ། ཀུན་བཟང་སྤྲུལ་སྐུ། འབྲུག་སྤྲུལ་གོང་འོག ནོར་གླིང་སྤྲུལ་སྐུ། གཡག་ཟེ་མཆོག་སྤྲུལ་རྣམ་གཉིས། ལེ་དགོན་སྤྲུལ་སྐུ། འཇུ་སྤྲུལ་པདྨ་བསྟནའཛིན། ཨ་གྲོ་བླ་མ། སྡེ་དགེ་རྒྱལ་སྲས་བླ་མ་སོགས་སྨིན་གྲོལ་ཕྱོགས་བརྒྱར་སྤེལ་བའི་བླ་སྤྲུལ་ལྔ་བཅུ་བཅས་མདོར་ན་དུས་དེར་བོད་ཆེན་པོའི་ལྗོངས་སུ་སྔ་འགྱུར་རྙིང་མ་གཙོ་བོ་གྱུར་པའི་སྒྲུབ་བརྒྱུད་ཤིང་རྟ་བརྒྱད་ཀྱི་རིང་ལུགས་འཛིན་པའི་བསྟན་འཛིན་སྐྱེས་ཆེན་ཕལ་མོ་ཆེ་རྗེ་འདིའི་ཞལ་མཇལ་ཆོས་འབྲེལ་མ་ནོས་པ་འགའ་ཡང་མེད་པ་ལྟ་བུར་གྱུར་པས་གྲོལ་བ་བཞི་ལྡན་གྱི་ཕྲིན་ལས་ཡངས་པའི་རྒྱལ་ཁམས་ཀུན་ལ་མ་ཁྱབ་པ་མེད་པ་དང་། དེ་བཞིན་བསྟན་པ་སྟོབས་ཀྱིས་འདེགས་པའི་སྦྱིན་བདག་ཀྱང་། སྡེ་དགེ་ཆོས་རྒྱལ་ཡབ་སྲས། ལྕགས་ལ་མི་ཆེན་རྒྱལ་པོ། ཡིད་ལྷུང་ལྷ་རིགས་ཆོས་རྒྱལ། གླིང་ཚང་རྒྱལ་པོ་བཅས་གཙོ་གྱུར་ཐུ་མི་ཁག་ཉི་ཤུ། དེམ་ཕྱི་ཉེར་ལྔར་གྲགས་པ་ཕལ་ཆེར་དང་། གཞུང་ས་དགའ་ལྡན་ཕོ་བྲང་གི་བཀའི་བློན་པོ་འགའ་དང་ཞབས་པད་ས་དབང་ཕུ་ལུང་པ་སོགས་མི་ཆེན་ཐམས་ཅད་ཀྱིས་གུས་པས་སྤྱི་བོས་བཏུད་ཅིང་མི་ཕྱེད་དད་པས་བཀུར་ཞིང་མཆོད་པ་སོགས། མདོར་ན་ལུགས་གཉིས་ཀྱི་སྒོ་ནས་ཕྱི་མའི་དུས་འདིར་རྗེ་འདི་ཁོ་ན་ཕྲིན་ལས་འགྲན་ཟླ་དང་བྲལ་ཞིང་། དགུང་གྲངས་བདུན་ཅུ་རྩ་བརྒྱད་བཞེས་པ་རབ་བྱུང་བཅོ་ལྔ་པའི་ལྕགས་ཕོ་རྟའི་ལོའི་སྨིན་དྲུག་ཟླ་བའི་དམར་ཕྱོགས་ཀྱི་རྒྱལ་བ་དང་པོའི་ཚེས་ལ་གཟུགས་སྐུའི་བཀོད་པ་གདོད་མའི་གཞི་དབྱིངས་ནང་གསལ་ཆེན་པོར་བསྡུ་བའི་ཚུལ་བསྟན་ཏོ། །དེ་ལྟར་ཐུན་མོང་མཐུན་སྣང་གི་མཛད་རྣམ་རགས་བསྡུས་འདི་ནི་འཇམ་དབྱངས་མཁྱེན་བརྩེའི་དབང་པོས་མཛད་པའི་གདན་རབས་མཚན་ཐོ་ཕྱོགས་བསྒྲིགས་ལ་གཞི་བྱས་ཐོག་གནའ་བོའི་ངག་རྒྱུན་ཚད་མས་ཟུར་བརྒྱན་ཏེ་བྲིས་པ་དང་། ད་དུང་རྗེ་ཉིད་ཀྱིས་མཛད་པའི་ཐུན་མིན་གསང་བའི་རྣམ་ཐར་དང་། ཞེ་ཆེན་མ་ཧཱ་པཎྜི་ཏ་འགྱུར་མེད་མཐུ་སྟོབས་རྣམ་རྒྱལ་གྱིས་མཛད་པའི་རྗེ་བླ་མའི་རྣམ་ཐར་སྒྲ་དབྱངས་རྒྱ་མཚོ་ཞུ་བ་སོགས་ཡོད་པར་ཐོས་པས་དེ་དག་ཏུ་གཟིགས་ཁྱབ་གནང་བར་ཞུ། །

གདན་རབས་བརྒྱད་པ། ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་ནི།

དེ་ཡང་སྔ་འགྱུར་བསྟན་པ་རྒྱ་མཚོའི་མངའ་བདག་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་ཞེས་ཡོངས་སུ་གྲགས་པའི་བདག་ཉིད་ཆེན་པོ་འདི་ནི། ཇི་སྐད་དུ། རྗེ་ཉིད་ཀྱིས་མཛད་པའི་སྐྱེ་ཕྲེང་གསོལ་འདེབས་ཐར་པའི་འཁྲི་ཤིང་ལས། ཁྱད་པར་རིགས་གསུམ་སེམས་དཔའི་སྒྱུ་འཕྲུལ་གར། །ཅིར་ཡང་བསྒྱུར་བའི་བྱེ་བྲག་འཕགས་ཡུལ་གྱི། །གསང་ཆེན་བཀའ་བབ་རྒྱལ་པོ་ཛ་ཞེས་པ། །ཨིནྡྲ་བྷུ་ཏི་ཆེན་པོར་གསོལ་བ་འདེབས། །མགོན་ཁྱོད་སྐུ་གསུམ་སྟོན་པའི་གསུང་རབ་ཀུན། །སྡུད་མཛད་སོ་སོའི་རྣམ་པར་སྣང་བ་ལས། །ཞིང་འདིའི་ཐུབ་དབང་དྲུང་དུ་ཀུན་དགའ་བོར། །བསྟན་ཀྱང་ཐ་མི་དད་པར་གསོལ་བ་འདེབས། །གང་ལས་མཁའ་ཟླ་ཆུ་མཚོར་ཤར་བ་བཞིན། །འགྲོ་ངོར་སྣང་བ་འཇམ་དཔལ་བཤེས་གཉེན་དང་། །མདོ་ལུང་འགྲེལ་མཛད་དུར་ཁྲོད་བདེ་བ་གསལ། །ཀུ་ཀཱུ་རཱ་ཛ་རྣམས་ལ་གསོལ་བ་འདེབས། །དེ་བཞིན་སློབ་དཔོན་དཔའ་བོ་བི་ན་ས། །ཐུ་མི་སམྦྷོ་ཊ་དང་རྣམ་སྣང་མཛད། །དྷརྨ་བྷ་དྲ་ཟུར་ཆེན་ཤཀྱཱ་འབྱུང་། །གླང་ལུང་པར་གྲགས་རྣམས་ལ་གསོལ་བ་འདེབས། །གཞན་ཡང་དབུ་ཕྱག་སྲོལ་འཛིན་ཇི་སྙེད་དང་། །རྡོ་རྗེ་གླིང་སོགས་ཟབ་གཏེར་སྒོ་འབྱེད་པ། །དུ་མའི་གྲངས་མཐར་གཏེར་བདག་གླིང་པ་ཞེས། །ཡོངས་གྲགས་མཆོག་གཟིགས་རྣམས་ལ་གསོལ་བ་འདེབས། །ཞེས་ཉིད་ཀྱི་རྡོ་རྗེའི་གསུང་གིས་ཞལ་བཞེས་མཛད་པ་དང་། དེ་བཞིན་རྗེ་ཉིད་ཀྱི་ཐུགས་སྲས་ཐུ་བོ་མཁས་གྲུབ་པདྨ་བཛྲ་གྱི་ཞལ་སྔ་ནས་མཛད་པའི་རྣམ་ཐར་དུའང་ཇི་སྐད་དུ། རྗེ་འདི་ཉིད་ངེས་པའི་དོན་དུ་བསྐལ་པ་དཔག་ཏུ་མེད་པའི་སྔ་རོལ་ནས་བཅོམ་ལྡན་འདས་དཔལ་རྣམ་པར་སྣང་མཛད་ཆེན་པོར་མངོན་པར་སངས་རྒྱས་ནས། སླར་ཡང་གདུལ་བྱའི་ཞིང་ཁམས་འཇིག་རྟེན་འབུམ་ཕྲག་བཅུའི་རྡུལ་གྱི་གྲངས་དང་མཉམ་པར་སངས་རྒྱས་དང་བྱང་ཆུབ་སེམས་དཔའི་རྣམ་པར་རོལ་པ་ཚད་མེད་པ་བཀོད་པ་དང་། གཞན་ཡང་བརྒྱ་བྱིན་དང་། འཁོར་ལོས་བསྒྱུར་བ་སོགས་སྤྲུལ་པའི་རྣམ་རོལ་སྒྱུ་མ་ལྟར་རིས་སུ་མ་ཆད་པར་སྣང་བ་ལས། བྱེ་བྲག་ཏུ་མི་མཇེད་འཇིག་རྟེན་གྱི་ཁམས་འདིར་ཐབས་ལ་མཁས་པའི་ཡེ་ཤེས་ཀྱི་རོལ་བ་ཚད་མེད་པས་སྟོན་འཁོར་ཐ་དད་པ་ལྟར་བསྟན་ཀྱང་དོན་ལ་དགོངས་པ་དབྱེར་མི་ཕྱེད་པའི། རྒྱལ་སྲས་རིགས་གསུམ་སེམས་དཔའ་དང་། མཉམ་མེད་ཐུབ་པའི་དབང་པོའི་ཉེ་གནས་མང་དུ་ཐོས་པའི་མཆོག་ཏུ་གྱུར་པ་འཕགས་པ་ཀུན་དགའ་བོ། །གསང་ཆེན་རྒྱུད་སྡེ་ཀུན་གྱི་བདག་པོར་དབང་བསྐུར་བ་ཆོས་རྒྱལ་ལུང་བསྟན་རྡོ་རྗེ། དཔལ་ལྡན་སྒྱུ་འཕྲུལ་དྲྭ་བའི་བཀའ་བབས་སློབ་དཔོན་ཀུ་ཀུ་རཱ་ཛ། སེམས་ཕྱོགས་མན་ངག་གི་བདག་པོ་འཇམ་དཔལ་བཤེས་གཉེན། མདོ་ལུང་རྒྱུད་འགྲེལ་གྱི་ཤིང་རྟ་བདེ་བ་གསལ་མཛད་སོགས་དང་། གཞན་ཡང་གངས་ཅན་གྱི་མིག་གཅིག་ལོ་ཙཱ་བ་ཆེན་པོ་ཐོན་ནི་སམ་བྷོ་ཊ། པཎ་ཆེན་བཻ་རོ་ཙ་ན། ཟུར་པོ་ཆེ་ཤཱཀྱ་འབྱུང་གནས། རོང་ཟོམ་ཆོས་ཀྱི་བཟང་པོ། རས་ཆུང་རྡོ་རྗེ་གྲགས་པ། གླང་ལུང་པ་རྒྱལ་བ་དོན་འགྲུབ། འཇམ་དབྱངས་ཀུན་དགའ་རྒྱལ་མཚན། ཆོས་རྒྱལ་རྡོ་རྗེ་གླིང་བ། ཨོ་རྒྱན་ཀུན་སྐྱོང་གླིང་བ། གྲུབ་ཐོབ་མེ་ལོང་རྡོ་རྗེ། གཏེར་ཆེན་ཤེས་རབ་འོད་ཟེར། རིག་འཛིན་འགྱུར་མེད་རྡོ་རྗེ་སོགས་དུས་རིམ་དང་ཅིག་ཆར་སྣ་ཚོགས་སུ་གཅིག་ལས་དུ་མར་འཆར་བ་ཆུ་ཟླའི་རོལ་བ་ལྟ་བུའི་དག་ཆེན་སྐྱེ་བའི་ཕྲེང་བ་དུ་མར་འབྱམས་ཀླས་པའི་མཐར། དེང་གི་དུས་རྒྱལ་བའི་བསྟན་པ་རིན་པོ་ཆེ་ཉམས་དམའ་བར་གྱུར་པའི་སྐབས་འདིར། སྔོན་རབ་དུ་མའི་ཐུགས་བསྐྱེད་དང་སྨོན་ལམ་སྟོབས་སུ་གྱུར་པས། སླར་ཡང་སྔ་འགྱུར་རྡོ་རྗེ་ཐེག་པའི་རིང་ལུགས་དྲི་མ་མེད་པའི་གྲུབ་མཐའ་གཞི་བཞེངས་སུ་སློང་བའི་ཤིང་རྟ་ཆེན་པོར་བྱོན་པ་འདི་ཉིད་དོ། དེ་ལྟར་ཡང་རིག་འཛིན་འགྱུར་མེད་རྡོ་རྗེའི་གཏེར་ལུང་གབ་རྒྱ་ཅན་ལས། བཻ་རོ་ཁྱོད་ནི་སྐྱེ་མཐའི་བྱང་སེམས་ཏེཿ ཁྱོད་ཀྱི་འདི་གོང་སྐྱེ་བ་འདས་པ་ནིཿ སྨྲ་བསམ་བརྗོད་འདས་ཡེ་ཤེས་སྙིང་པོའི་དོནཿ སེམས་ཅན་སངས་རྒྱས་མཉམ་ཉིད་ཁྱབ་བརྡལ་ཡངཿ ཁམས་གསུམ་འགྲོ་བའི་འདྲེན་པར་རྡོ་རྗེ་ཆོསཿ ཤཱཀ་ཐུབ་ཉེ་གནས་ཨཱ་ན་ནྟ་ཞེས་དངཿ རྒྱལ་པོ་ཛ་དང་ཤིནྟཾ་གརྦྷ་དངཿ བོད་དུ་སམ་བྷོ་ཊ་སོགས་དག་པ་ཡིཿ སྐྱེ་བ་དེ་ཙམ་སྣང་གི་མ་དག་པའིཿ སྐྱེ་ཚུལ་བརྗོད་དུ་ལོང་བའི་གནས་མ་ཡིནཿ དེ་ལྟར་དག་པའི་སྐྱེ་བ་དེ་དག་གིསཿ འགྲོ་ལ་སྙིང་རྗེ་ཆེན་པོའི་ཐུགས་བསྐྱེད་པའངཿ བཻ་རོ་ཁྱོད་དུ་སྐྱེ་བ་བླངས་པ་ཡིནཿ ཁྱོད་ཀྱང་ཤྲཱི་སེངྷ་ཡེ་ཤེས་མདོཿ པདྨ་྄བདག་སོགས་གཙུག་གི་བླ་མར་བསྟེནཿ གདམས་པའི་གནད་རྣམས་ཕུ་ཐག་བཅད་བྱས་ནསཿ ཆོས་སྐུའི་རང་ཞལ་མངོན་སུམ་རྟོགས་གྱུར་པསཿ ལས་འཕྲོ་མ་དག་སྐྱེ་བ་ལེན་མི་སྲིདཿ འོན་ཀྱང་སེམས་བསྐྱེད་སྨོན་ལམ་བཟང་པོ་ཡིསཿ མཚམས་སྦྱོར་མཐའ་ཡས་འགྲོ་བའི་དཔལ་ཉིད་དུཿ དབང་ཕྱུག་འབར་དང་ར་ཤག་རྡོ་རྗེ་གླིངཿ ཀུན་སྐྱོང་གླིང་དང་མདོ་སྔགས་གླིང་པ་སོགསཿ པདྨ་བདག་གི་ཟབ་གཏེར་བདག་པོ་དངཿ གཞན་ཡང་ཐེག་པ་ཆེ་ཆུང་སྣ་ཚོགས་ལཿ དེ་དང་མཐུན་པའི་ངོ་མཚར་སྐྱེ་བའི་གྲངསཿ བཅུ་ཕྲག་གཅིག་དང་གསུམ་ཙམ་འདས་པའི་མཐརཿ ཞེས་རིམ་པར་ལུང་བསྟན་པ་ལས་ཁྱད་པར་ཆོས་རྒྱལ་གཏེར་བདག་གླིང་པའི་དུས་སུ། བཀའ་གཏེར་སྤྱི་དང་། ཁྱད་པར་སྔ་འགྱུར་མདོ་སྒྱུ་སེམས་གསུམ་གྱི་སྐོར་རྣམས་ལ། རྒྱ་ཆེན་པོ་སྡུད་པ་དང་། ཟབ་མོ་རྣམ་པར་འབྱེད་པ་དང་། འཁྲུགས་པ་གོ་རིམས་སུ་སྡེབས་པ་དང་། སྒྲུབ་པ་ཕྱག་བཞེས་སུ་འདེབས་པ་སོགས་འཛིན་སྐྱོངས་སྤེལ་བའི་ཕྲིན་ལས་རྒྱ་ཆེན་པོ་མཛད་བཞིན་པའི་ངང་ནས། སྐུ་མྱ་ངན་ལས་འདས་ཁར་ཤར་ཕྱོགས་སུ་འགྲོ་དགོས་པར་ཡོད་གསུངས་ཏེ་བཞེངས་ནས་གོམ་པ་བདུན་བོར་བར་མཛད་པའང་། དེ་དུས་ཀྱི་མཛད་པའི་འཕྲོ་རྣམས་ད་ལྟའི་དུས་སུ་ཁམས་ཀྱི་ཕྱོགས་འདིར་རྗེ་འདི་ཉིད་ཀྱིས་སྐྱོངས་པ་ལ་དགོངས་པར་གདོན་མི་ཟ་ཞིང་། དེར་མ་ཟད་ལྐོག་གྱུར་གྱི་ཆོས་རྣམས་ལ་སྒྲིབ་མེད་ཀྱི་ཡེ་ཤེས་མངོན་དུ་གྱུར་པ་རིག་འཛིན་བྱང་ཆུབ་རྡོ་རྗེ་དང་། གཞོན་ནུ་དྲི་མེད་ཟླ་ཤར་སོགས་ཀྱིས་ཀྱང་གཏེར་བདག་གླིང་པའི་སྤྲུལ་པ་འཁྲུལ་མེད་དུ་ལུང་བསྟན། གཞན་ཡང་དམ་པ་འདི་ཉིད། རྩོད་བྲལ་གྱི་གཏེར་སྟོན་པདྨ་འགྲོ་འདུལ་རྩལ་གྱི་གདན་ས་རྒྱབ་སྟོད་བྲག་དཀར་དུ་ཕེབས་པའི་ཚེ། དེའི་ཐོ་རང་ཁར་རྗེ་དེ་ཉིད་ཀྱི་གཟིགས་སྣང་ལ། ཞིང་སྐྱེས་ཀྱི་ཌཱཀྐི་མ་གསལ་འདེབས་ཀྱི་ཚུལ་དུ་སྨྲས་ནས་དེར་འཕྲོ་འཇོག་པ་ཞིག་གསན་པས། གཏེར་ཆེན་གྱི་སྤྲུལ་བར་ཐུགས་ཐག་ཆོད་དེ་སྨིན་གྲོལ་གྱི་གདམས་པའང་མང་དུ་གསན། དེ་དང་མཚུངས་པར་རྫོགས་ཆེན་མཆོག་གི་སྤྲུལ་པའི་སྐུ་རིན་པོ་ཆེ་མི་འགྱུར་ནམ་མཁའི་རྡོ་རྗེའི་གནས་ཡུལ་གྱི་ལུང་བྱང་ལས་ཀྱང་། གནས་འདིའི་ཉེ་ཕྱོགས་སྤྱིལ་ཆུང་བཀོད་མཛེས་ནང་། །བཻ་རོའི་རྣམ་འཕྲུལ་དྲང་སྲོང་བརྟུལ་ཞུགས་ལ། །ཞུགས་དེས་འབྲེལ་ཚད་བདེ་ཆེན་ཞིང་དུ་འདྲེན། །ཞེས་དང་། བླ་མ་དགོངས་པ་འདུས་པའི་ལུང་བསྟན་བཀའ་རྒྱ་མ་ལས་ཀྱང་། དམ་པ་འདི་ཉིད་གང་དུ་ཕེབས་པའི་ཆོས་བརྒྱུད་དང་བཅས་པའང་གསལ་བར་གསུངས་ཏེ། དེ་ལ་ཐོག་མར་སློབ་དཔོན་པདྨ་སམ་བྷ་ཝ་དང་ཀུན་མཁྱེན་དྲི་མེད་འོད་ཟེར་སོགས་ཀྱི་ཡེ་ཤེས་ཀྱི་སྐུས་རྗེས་སུ་བཟུང་བས་དོན་བརྒྱུད་ཀྱི་བཀའ་བབས་ཤིང་ཀློང་ཆེན་དགོངས་པའི་གསང་མཛོད་བརྡོལ་བ་གར་གྱི་དབང་ཕྱུག་རིག་འཛིན་འཇིགས་མེད་གླིང་པའམ། རང་བྱུང་རྡོ་རྗེ་མཁྱེན་བརྩེའི་འོད་ཟེར་ཞེས་མཚན་ཡོངས་སུ་གྲགས་པ་དེ་ཉིད་བླ་མ་དགོངས་པ་འདུས་པའི་ཆོས་ཀྱི་བདག་པོར་ལུང་བསྟན་པ་ནི། ཇི་སྐད་དུ། ལྷོ་ཕྱོགས་འོད་ཟེར་མིང་ཅན་སྤྲུལ་པའི་སྐུཿ ཟབ་དོན་སྙིང་ཐིག་ཆོས་ཀྱིས་འགྲོ་བ་འདྲེནཿ འབྲེལ་ཚད་རིག་འཛིན་ཞིང་དུ་འཕེན་པ་འབྱུངཿ ཞེས་དང་། རྗེ་དེ་ཉིད་ཀྱི་ཐུགས་སྲས་དམ་པ་མདོ་ཁམས་ཀྱི་ཕྱོགས་སུ་བསྟན་པའི་རྒྱལ་མཚན་འཛིན་པ་གྲུབ་པའི་དབང་ཕྱུག་འཇིགས་མེད་ཕྲིན་ལས་འོད་ཟེར་ཡང་། དེ་ལས། ཤར་ཕྱོགས་འོད་ཟེར་མིང་ཅན་གདུང་ཤུགས་ཅནཿ ཕྲིན་ལས་རྨད་བྱུང་བློ་སྟོབས་ཤེས་རབ་ལྡནཿ ཐུགས་ཀྱི་གསང་མཛོད་རྡོལ་བའི་གདམས་པ་འཛིནཿ བསྟན་པ་སྤེལ་གྲོགས་བྱེད་པའི་སྐལ་ལྡན་འབྱུངཿ ཞེས་ཀློང་ཆེན་བརྡའ་བསྒྱུར་ནམ་མཁའ་མཛོད་ཀྱི་ཆོས་སྡེ་ཀློང་ཆེན་སྙིང་གི་ཐིག་ལེའི་ཆོས་ཀྱི་བདག་པོ་དང་བསྟན་པ་སྤེལ་བའི་བྱེད་པོར་བསྔགས་པའི་སྐྱེས་བུ་དམ་པ་དེ་ཉིད་ལ་ཆོས་བརྒྱུད་འཛིན་པའི་སློབ་བུ་ཇི་ལྟར་འབྱུང་བའང་། རྩ་བའི་འཁོར་སློབ་གདུང་ཤུགས་ལྡན་པ་ནིཿ བུདྡྷ་མཆེད་དྲུག་རྡོ་རྗེའི་གདུང་བཞི་སྟེཿ ཤར་གྱི་ཕྱོགས་ནས་དུང་དཀར་འཁྱིལ་འདྲ་འབྱུངཿ སྙན་གྲགས་སྒྲོགས་དང་བསྟན་པ་སྤེལ་བར་བྱེདཿ ལྷོ་ཡི་ཕྱོགས་ནས་སློབ་མ་འབྱུང་འགྱུར་ཏེཿ འབྲས་ཀྱི་ཕུང་པོ་སྤུང་པ་ལྟ་བུ་ཡིསཿ འདོད་ཡོན་ཟས་ནོར་ལོངས་སྤྱོད་སྤེལ་བར་བྱེདཿ ནུབ་ནས་པདྨ་དམར་སེར་འཁྲིགས་འདྲ་བའིཿ སྒྲིབ་མེད་སྒྲུབ་ཚུག་འཛིན་པའི་སློབ་མ་འབྱུངཿ བྱང་གི་ཕྱོགས་ནས་ལྕགས་ཕུར་ལྟ་བུ་ཡིཿ མཐུ་རྩལ་ལྡན་པའི་སློབ་མ་འགའ་ཞིག་ནིཿ བསྟན་པ་འཕེལ་བྱེད་ཕྲིན་ལས་སྒྲུབ་པ་འབྱུངཿ ཞེས་སོགས་མང་དུ་གསུངས་པ་ལས། ཁྱད་པར་དུ་གྱུར་པ་རྡོ་རྗེའི་གདུང་ཆེན་བཞིའི་ནང་ཚན། ནུབ་ཕྱོགས་ནས་འབྱུང་བར་ལུང་བསྟན་པ་ནི་རྗེ་འདི་ཉིད་ཡིན་ཏེ། གང་གི་ཚེ་གསང་ཆེན་བླ་ན་མེད་པའི་དཀྱིལ་འཁོར་ཆེན་པོར་དབང་བསྐུར་བའི་གསང་མཚན་དུ། རིག་པའི་རྡོ་རྗེ་བཻ་རོ་ཙ་ན་རྩལ་ཞེས་འབོད་པས། མཚན་ཟུར་དང་། མཚུངས་དཔེ། འཁྲུངས་ཡུལ་སོགས་གང་གི་སྒོ་ནས་ཀྱང་འཁྲུལ་པའི་གནས་རྡུལ་ཙམ་ཡང་ཡོད་པ་མ་ཡིན་ནོ། །དེ་ལྟར་ཚད་མར་གྱུར་པའི་ལུང་གིས་གྲུབ་ཅིང་། གྲུབ་མཐའ་རིས་མེད་ཀྱི་དགེ་བའི་བཤེས་གཉེན་ཆེན་པོ་ཆོས་ཀྱི་སྤྱན་ཅན་དཔྱད་གསུམ་རྣམ་པར་དག་པའི་བློ་གྲོས་དང་ལྡན་པ་རྣམས་ཀྱིས་ཀྱང་། བསྔགས་བརྗོད་ཀྱི་མེ་ཏོག་སིལ་མ་ཕྱོགས་ཀུན་ཏུ་འགྲེམ་ཞིང་། དད་གསུམ་གྱི་རྣམ་འགྱུར་ཅིར་ཡང་ངོམས་པས་གུས་འདུད་ལྷུར་ལེན་པའི་སྐྱེས་བུ་དམ་པ་འདི་ཉིད་ནི། ཞེས་གསུངས་པ་ལྟར་རྗེས་སུ་ཆགས་པའི་སྙིང་རྗེ་ཆེན་པོས་སེམས་ཅན་གྱི་ཁམས་དང་ཞིང་ཁམས་སྣ་ཚོགས་པར་སངས་རྒྱས་དང་བྱང་སེམས་ཀྱི་རྣལ་རོལ་བསམ་མི་ཁྱབ་པས་མཐའ་ཡས་པའི་འགྲོ་ཚོགས་སྨིན་པ་དང་གྲོལ་བའི་ས་ལ་བཀོད་ཅིང་། སླར་ཡང་ཡུལ་མདོ་ཁམས་ཀྱི་ལྗོངས་འདིར་གསང་ཆེན་སྙིང་པོའི་བསྟན་པ་སྤེལ་བར་བསམ་བཞིན་དགེ་བའི་བཤེས་གཉེན་གྱི་ཚུལ་དུ་ཇི་ལྟར་བྱོན་པའི་སྐུའི་འཁྲུངས་ཡུལ་ནི། མདོ་སྨད་གླིང་དཀར་གྱི་སའི་ཐིག་ལེ་རྫ་ཆབ་སྔོན་མོ་དལ་གྱིས་འབབ་པའི་ཉེ་འགྲམ། ཡུལ་སྐྱོང་རྡོ་རྗེ་འཕན་ཕྱུག་གིས་བདག་ཏུ་བཟུང་བའི་གནས་མཆོག །མེ་ཏོག་དང་རྩི་སྨན་གྱིས་བརྒྱན་པའི་སྤང་ཐང་ཉམས་དགའ་བ་དགེ་མང་སྐམ་ཆུང་དུ་གྲགས་པའི་ནོར་འཛིན་གྱི་ལྟེ་བ་རུ། ཡབ་སྨུག་པོ་ལྡོང་གི་རིགས་ལ་བཙན་ཁ་བཞི་ཞེས་གྱེས་པའི་བྱེ་བྲག་དགེ་རྩེའི་ཨ་དོན་ཚེ་དབང་ནོར་བུ་དང་། ཡུམ་མཁའ་འགྲོའི་མཚན་རྟགས་དང་ལྡན་པ་ཀརྨ་ཆོས་སྒྲོན་གཉིས་ཀྱི་སྲས་སུ། སྤྱི་ལོ་༡༨༠༠པ་བོད་རབ་བྱུང་བཅུ་གསུམ་པའི་དྲག་པོ་ཞེས་པ་ལྕགས་སྤྲེལ་ལོར་སྐུ་བལྟམས། གཞོན་ནུ་ཉིད་ནས་དད་བརྩོན་སྙིང་རྗེ་ཤེས་རབ་སོགས་འཕགས་པའི་ཆོས་ཀུན་ལྷན་སྐྱེས་སུ་མངའ་བ་དང་། ལྐོག་གྱུར་གྱི་ཆོས་ཀུན་སྒྲིབ་མེད་དུ་གཟིགས་ཤིང་རྡོ་རྗེའི་ཆོས་སྲུང་ལུས་དང་གྲིབ་བཞིན་འགྲོགས་པ་སོགས་སོ་སོའི་སྐྱེ་བོ་ལས་རིང་དུ་འདས་པའི་མངོན་རྟགས་མཐོང་ཆོས་སུ་མངའ། དགུང་གྲངས་གསུམ་ཙམ་ན་དམ་པའི་སྐྱེས་བུ་དུ་མས་སྐྱེ་སྲིད་དུ་ལུང་གིས་བསྔགས་ཤིང་དགོན་པ་འགས་ཐོབ་ཤ་བྱས་ཀྱང་མ་བྱིན། རྗེ་ཉིད་དང་གདུང་རུས་གཅིག་པའི་མཁས་པ་ཆེན་པོ་བླ་མ་སྨོན་ལམ་དར་རྒྱས་པའི་དྲུང་ནས་ཡི་གེ་འབྲི་ཀློག་དང་བོད་ཀྱི་བརྡའ་དག་ཐམས་ཅད་ཀྱི་ཕྱི་མོར་གྱུར་པ་སུམ་ཅུ་པ་དང་རྟགས་ཀྱི་འཇུག་པ་རྩ་འགྲེལ། གཞན་ཡང་སྙན་ངག་མེ་ལོང་དང་དཀར་རྩིས་སོགས་ཐུན་མོང་གི་རིག་གནས་ལ་སྦྱང་པས་སྐྱེས་ཐོབ་ཀྱི་མཁྱེན་རབ་ཁྱད་པར་ཅན་མངའ་བས་ཚེགས་ཆུང་ངུས་མཁྱེན། སྐུ་ན་ཅུང་ཟད་སོན་ཙམ་པའི་སྐབས་ཤིག་ན་ཁྱིམ་གྱི་རྟ་འགའ་ཨར་ཇག་གིས་བརྐུས་པའི་ར་འདའ་ལ་ཕ་ཡབ་རྒྱུག་པ་ལྔ་ལམ་དུ་བཏང་བ་དང་། རྗེ་ཉིད་ཐོག་མ་ནས་འཁོར་བའི་གནས་ལས་ངེས་པར་འབྱུང་བའི་བློ་བཅོས་མིན་མངའ་བ་བཅས་ཀྱིས་རྐྱེན་བྱས་ཏེ་ཕྱོགས་མེད་དབེན་པར་གཤེགས་འདོད་ཁོ་ན་ཐུགས་ལ་འཁྲུངས་པའི་སྐབས་ཙམ་ན། རིག་འཛིན་འཇིགས་མེད་གླིང་པའི་དངོས་སློབ་འཇིགས་མེད་རྒྱལ་བའི་མྱུ་གུས་རྫ་སྟོད་དུ་ཆོས་ཀྱི་འཁོར་ལོ་ཐོག་མར་བསྐོར་བ་དང་རྟེན་འབྲེལ་གྱི་སྒོ་འགྲིགས་ནས་ཐུན་མོང་དང་ཐུན་མོང་མ་ཡིན་པའི་ལམ་གྱི་རིམ་པ་སྤྱི་དང་། ཁྱད་པར་སྐྱེས་བུ་ཆེན་པོའི་བློ་སྦྱོང་གི་སྐོར་རྣམས་ཞལ་ཁྲིད་དུ་གསན་པའི་རྐྱེན་གྱིས ་བསྐལ་བ་དུ་མར་བྱང་ཆུབ་ཀྱི་སེམས་ལ་གོམས་པའི་རིགས་ཡོངས་སུ་སད་ཅིང་། འཇིག་རྟེན་སྲིད་པའི་ཕུན་ཚོགས་རྣམས་ལ་ཐུགས་ཞེན་གཏིང་ནས་ལོག་པ་འཁོར་བ་ལས་ངེས་པར་འབྱུང་བའི་བློ་དང་། སེམས་ཅན་ལ་བརྩེ་བ་ཤུགས་དྲག་པོ་ཐུགས་རྒྱུད་ལ་འཁྲུངས་ཏེ་འདིར་སྣང་མཐུན་འཇུག་གི་བྱ་བ་ཐམས་ཅད་རྒྱབ་ཏུ་དོར་ཏེ། ཚེ་འདིར་སྒྲུབ་པའི་རྒྱལ་མཚན་ཞིག་བཙུགས་ནས་རང་གཞན་གྱི་དོན་གཉིས་ལྷན་གཅིག་ཏུ་འགྲུབ་པ་གྲུབ་ཐོབ་རྣལ་འབྱོར་གྱི་དབང་ཕྱུག་གོང་མ་རྣམས་ཀྱི་རྗེས་སུ་སྙོགས་པ་ཞིག་ཅི་ནས་ཀྱང་བྱེད་དགོས་དགོངས་པའི་ཐུགས་དམ་ཡང་དུ་འཁྲུངས། གླིང་གྲུབ་ཆེན་བསོད་ནམས་སྦྱིན་པའི་དྲུང་ནས་བསྟན་པ་ལ་འཇུག་པའི་སྒོ་ཡོངས་རྫོགས་དགེ་བསྙེན་གྱི་ཁྲིམས་གསན་ཞིང་ཕྱིས་སུ་སྨིན་གྲོལ་གྱི་གདམས་པ་མང་དུ་ནོས། དུས་དེ་ཙམ་ན་འཇམ་དབྱངས་ཆོས་ཀྱི་བློ་གྲོས་སམ་རྡོ་བླ་འཇིགས་མེད་སྐལ་བཟང་ཡུལ་དེར་ཕེབས་པས་ཐུགས་བརྩེ་ཆེན་པོས་རྗེ་གཏེར་བདག་གླིང་པའི་རྣམ་སྤྲུལ་བཀའ་འགྱུར་པ་ཆེན་པོ་མཁས་གྲུབ་བཀྲ་ཤིས་རྒྱ་མཚོའི་ཡང་སྲིད་དུ་ངོས་བཟུང་ནས་ཁྲི་འདོན་དང་མངའ་གསོལ་མཛད་ནས་ཁྱེད་ཀྱི་བདག་པོ་ཁོ་བོ་ལས་མེད་ཅིང་། མི་རིང་བར་གྲུབ་དབང་འཇིགས་མེད་ཕྲིན་ལས་འོད་ཟེར་གྱི་ཞལ་མཇལ་དགོས་པ་དང་རྫོགས་ཆེན་དགོན་དུ་ཕེབས་དགོས་པའི་བཀའ་ལུང་བསྩལ། གཞན་ཡང་མཁས་གྲུབ་འཇིགས་མེད་ངོ་མཚར་ལས་རྙིང་མ་རྒྱུད་འབུམ་དང་། དགེ་མང་རབ་འབྱམས་པ་དགེ་ལེགས་ཡར་འཕེལ་ལས་བྱང་ཆུབ་ལམ་རིམ་ཆེན་མོ་སོགས་གསན། དགུང་གྲངས་བཅུ་དགུ་པ་ས་སྟག་ལོར་དོན་མཐུན་གྱི་གྲོགས་འགའ་ཞིག་དང་བཅས་བྲག་ཆེན་ཡར་ལུང་པདྨ་བཀོད་ཀྱི་སྒྲུབ་སྡེ་རྩ་གསུམ་མཁའ་འགྲོ་འདུ་བའི་གླིང་ཆེན་པོར་ཚེ་རབས་དུ་མའི་རིགས་ཀྱི་བདག་པོ་གྲུབ་དབང་འཇིགས་མེད་ཕྲིན་ལས་འོད་ཟེར་མཇལ་དུ་ཕེབས། སྐུ་དངོས་མ་མཇལ་བའི་ལམ་བར་ནས་ཀྱང་འབྲལ་བ་མེད་པའི་ཐུགས་རྗེའི་བྱིན་རླབས་ཀྱི་མཐུས་ཞལ་གཟིགས་ལུང་བསྟན་གནང་བས་དགོངས་བརྒྱུད་ཀྱི་རྟོགས་པ་བརྙེས། གྲུབ་དབང་བླ་མའི་མདུན་དུ་ལོ་ངོ་གསུམ་ལ་བཞུགས་རིང་ཐུགས་ཤིན་ཏུ་བརྩེ་བས་མདོ་སྔགས་ཀྱི་ཆོས་ཚུལ་སྤྱི་དང་ཟབ་གསང་སྙིང་ཐིག་གོང་འོག་གི་གདམས་ཁྲིད་བུམ་པ་གང་བྱོའི་ཚུལ་དུ་བསྩལ་ཞིང་། བདག་ལ་གཞན་ཕན་བྱང་ཆུབ་སེམས་ཀྱི་བརྒྱུད་པ་ཞིག་ཡོད་པ་འདི་ཁྱོད་ཀྱིས་འཛིན་པར་རེའོ། །ཞེས་གསུངས་ནས་དོན་གྱིས་རྒྱལ་བའི་གདུང་འཚོབ་ཏུ་མངའ་གསོལ་ཞིང་མཚན་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་དུ་བཏགས་པ་སྟེ། གྲུབ་རྗེའི་གསུང་ལས། བསྐྱེད་རྫོགས་དང་སྒོམ་བཟླས་གང་བྱསཿ ཕ་རོལ་དུ་ཕྱིན་པ་དྲུག་དངཿ འབྲལ་མེད་དུ་ཉམས་སུ་ལོངས་དངཿ ཁྱོད་རང་ལ་གཞན་ཕན་མཐའ་ཡསཿ ཞེས་བྱ་ཡི་མིང་དོན་མཚུངས་བཞིནཿ ཕན་བདེ་ཡི་རྩ་ལག་ཉིད་འགྱུརཿ ཞེས་འབྱུང་འགྱུར་གྱི་ལུང་བསྟན་དང་བཅས་གསལ་བར་གསུངས། དེ་དག་གི་སྐབས་སུ་བླ་མ་སངས་རྒྱས་དངོས་མཐོང་གི་མོས་གུས་ཟབ་མོས་བསྙེན་ཞིང་སྤང་དག་ལན་ལྔ་མཛད་དེ་དངོས་འབྱོར་གྱི་མཆོད་པས་མཉེས་པར་བྱས། དུས་མཚུངས་རྡོ་བླ་འཇིགས་མེད་སྐལ་པ་བཟང་པོ་ལས། དཔལ་གསང་བའི་སྙིང་པོའི་བཤད་པ་དང་། སྒྱུ་འཕྲུལ་ཞི་ཁྲོའི་དབང་དང་གདམས་ཁྲིད་ཀྱི་སྐོར་སོགས་མང་དུ་གསན། གཞན་ཡང་ཐུགས་སྲས་ཀྱི་བུ་ཆེན་རྣམས་ལས། གཏུམ་མོ་རྩ་རླུང་གི་སྐོར་འགའ་ཞིག་དང་། ན་རོ་ཆོས་དྲུག །གཅོད་ཡུལ་སོགས་ཟབ་རྒྱས་ཀྱི་གདམས་ངག་མཐའ་ཡས་པ་གསན། ལྕགས་སྦྲུལ་ལོར་གྲུབ་དབང་བླ་མ་ཞིང་དུ་གཤེགས་པས་བྱ་བཏང་རྣལ་འབྱོར་ཆེན་པོའི་སྤྱོད་པ་བསྐྱངས་ཤིང་ངེས་མེད་ཀྱི་རི་ཁྲོད་འགྲིམ་སྟེ་སྙིང་པོའི་སྒྲུབ་པ་ལ་རྩེ་གཅིག་ཏུ་གཞོལ་བར་མཛད་པ་སྟེ། རྒྱ་རོང་བཻ་རོའི་སྒྲུབ་གནས་དང་། ཁམས་ཀྱི་རྩ་རི་ཏྲའམ་རིགས་ལྔའི་རྫོངས་སུ་གྲགས་པའི་མགུར་ཆུ་ཉི་ཟླ་ཕུག །ག་གོང་སེང་གེ་ཡང་དགོན། ཀ་ཏི་ཤེལ་གྱི་ཕུག་པ། རི་བོ་དན་ཏིག་དང་ཡང་ཏིག་ཏུ་གྲགས་པ་རྣམས་སུ་བཅུད་ལེན་དང་གཏུམ་མོའི་རྣལ་འབྱོར་གྲོགས་སུ་བརྟེན་ནས་ཟབ་གསང་བླ་ན་མེད་པའི་བསྐྱེད་རྫོགས་རིམ་པ་གཉིས་ཀྱི་ཉམས་བཞེས་སྤྱི་དང་། འོད་གསལ་རྫོགས་པ་ཆེན་པོའི་གནད་ལ་རྩེ་གཅིག་ཏུ་གཞོལ་བས་ཐུན་མོང་དང་ཐུན་མོང་མ་ཡིན་པའི་ལམ་གྱི་དྲོད་རྟགས་བརྙེས་ཤིང་། ཁྱད་པར་གཉུག་མའི་དེ་ཉིད་མངོན་དུ་གྱུར་པས་སྐབས་འདི་དག་ཏུ་ཉམས་དབྱངས་རྡོ་རྗེའི་མགུར་མ་ཐོལ་བྱུང་དུ་བཞེས། གཞན་ཡང་སོག་པོའི་ཡུལ་གྲུ་མཚོ་སྔོན་གྱི་ཕྱོགས་ཚུན་ཆད་དང་། རྒྱ་ནག་གླང་ཆེན་འགྱིང་རི་ཡན་ཆད་ཀྱི་གནས་རི་དང་སྒྲུབ་གནས་ཐམས་ཅད་དུ་ཕེབས་ཤིང་སྒྲུབ་པ་ཁོ་ན་མཛད་ཅིང་བཞུགས་པའི་བར་སྐབས་རྣམས་སུ་ལས་དང་སྐལ་བར་ལྡན་པའི་བུ་སློབ་འགའ་ལ་སྨིན་གྲོལ་གྱི་གདམས་པ་ཕོག་ཅིང་། དད་འདུས་ཀྱི་ཚོགས་པ་སྤྱི་ལའང་ལས་འབྲས་ཀྱི་ཆོས་མང་དུ་གསུངས་པས་གདུལ་བྱ་རྣམས་ལ་ཕན་འདོགས་པར་མཛད་ཅིང་ཁྱད་པར་རྒྱལ་མོ་རོང་གི་ཕྱོགས་ཚ་ཁོ་དང་མདོ་ཆེན་སོགས་སུ་རྗེ་འདི་ཉིད་ཀྱིས་ཕྱག་འདེབས་མཛད། སྐབས་དེ་ཙམ་ན་སྔར་གྲུབ་དབང་ཆེན་པོའི་འབྱུང་འགྱུར་གྱི་ལུང་བྱང་ལས། དེ་ཕྱིར་ན་རུ་དམ་དབེན་པར། །འདུ་འཛི་ཡི་སྤྲོས་པ་བཅད་བཞིན། །བསྐྱེད་རྫོགས་ལ་བརྩོན་པ་བསྐྱེད་ན། །གཟུགས་ཅན་དང་གཟུགས་མེད་འགྲོ་བ། །ཕལ་མོ་ཆེ་གདུལ་བྱར་འགྱུར་ཞིང་། །རང་གཞན་གྱི་དོན་གཉིས་ལྷན་གཅིག །འགྲུབ་ངེས་པ་པདྨའི་བཀར་མཚུངས། །ཞེས་སོགས་གསུངས་པ་ལ་བརྟེན་ནས། རུ་དམ་གྱི་དབེན་གནས་རྣམས་སུ་སྒྲུབ་པ་རྩེ་གཅིག་མཛད་པར་བཞེད་དེ་ཕྱོགས་འདིར་ཕེབས། རྫོགས་པ་ཆེན་པོ་ཆོས་ཉིད་མངོན་སུམ་གྱི་དོན་ལ་དབང་འབྱོར་པ་གྲུབ་པའི་དབང་ཕྱུག་མི་འགྱུར་ནམ་མཁའི་རྡོ་རྗེ་དང་མཇལ་ཞིང་འདུས་པ་མདོ་དབང་ཆེན་མོ་དང་། ཟབ་གསང་མཁའ་འགྲོ་སྙིང་ཐིག་གི་དབང་ལུང་ཁྲིད་དང་བཅས་པ་ཞིབ་རྒྱས་སུ་གསན། མཁན་ཆེན་སེང་ཕྲུག་པདྨ་བཀྲ་ཤིས་ཀྱི་ཞལ་སྔ་ནས་བསྟན་པའི་གཞི་མ་འདུལ་བ་སོ་ཐར་གྱི་རབ་བྱུང་གཞི་ཆོག་ལ་བརྟེན་ནས་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས་པས་ཐུབ་བསྟན་པདྨ་རྒྱས་པའི་ཉིན་བྱེད་དཔལ་བཟང་པོ་ཞེས་མཚན་གྱི་ཅོད་པན་གསོལ། མཁན་ཆེན་བླ་མ་འདི་ཉིད་ལས་དབུ་མ་ལུགས་ཀྱི་ཐེག་པ་ཆེན་པོའི་སེམས་བསྐྱེད་ཀྱི་ཆོ་ག་ལ་བརྟེན་ནས་བྱང་ཆུབ་སེམས་དཔའི་སྡོམ་པ་བཞེས་པ་དང་། གཞན་ཡང་སྒྱུ་འཕྲུལ་ཞི་ཁྲོ། ཡང་དག །གཤིན་རྗེ་གཤེད་དམར་ནག །ཕུར་པ་རོང་ཟོམ་པའི་ལུགས། དཀའ་འགྲེལ་འབུམ་ནག་ཏུ་གྲགས་པ་རྣམས་དང་། སྔ་ཕྱི་ཅི་རིགས་སུ། འདུས་པ་མདོ་དང་། སེམས་ཀློང་མན་ངག་གི་སྡེ་གསུམ། བཀའ་བརྒྱད་བདེ་གཤེགས་འདུས་པ། བླ་མ་དགོངས་འདུས། འདོད་འཇོ་བུམ་བཟང་སོགས་སྔ་འགྱུར་བཀའ་གཏེར་གྱི་གཞུང་རྒྱ་མཚོ་ལྟ་བུའི་རྒྱུན་ཕལ་ཆེ་བ་གསན། གཤིན་རྗེ་ཕུག་དང་ཚེ་རིང་ཕུག་སོགས་སུ་སྒྲུབ་པ་མཛད་དེ་བཞུགས་པའི་བར་སྐབས་ཤིག་ན་གྲུབ་དབང་བཞི་བ་མི་འགྱུར་ནམ་མཁའི་རྡོ་རྗེའི་ཞལ་སྔ་ནས་རྗེ་ཉིད་ལ་གདན་ས་འདིར་བཤད་སྒྲུབ་ཀྱི་སྲོལ་ཀ་རེ་བཏོད་རྒྱུ་བྱུང་ན་ལེགས་ཚུལ་གྱི་གསུང་ནན་ཡང་ཡང་ཕེབས་པར་བརྟེན། དགུང་གྲངས་ཉེར་དགུ་བཞེས་པ་རབ་བྱུང་བཅུ་བཞི་པའི་ས་བྱི་སྟེ་སྤྱི་ལོ་༡༨༢༨པར་ལུང་རྟོགས་བསྟན་པའི་རྩ་ལག་བཤད་པའི་ཆོས་སྡེ་ཞིག་ཕྱག་འདེབས་པར་དགོངས་ཏེ་དགོན་ལས་རྒྱང་གྲགས་གཅིག་གིས་རིང་བའི་མདུན་ཐང་ཆེན་མོའི་དཀྱིལ་དབུས་མཁས་པའི་ལྗགས་སམ་ཤེས་རབ་ར་གྲའི་དབྱིབས་དང་མཚུངས་པའི་གནས་སུ་ཕེབས་ཏེ་ས་བཙལ་བ་ན་རིག་འཛིན་ཤྲཱི་སེང་ཧཱ་དང་མཇལ། སློབ་དཔོན་ཤྲཱི་སེང་ཧཱ་རྡོ་ཕ་ཝང་ཞིག་ཡོད་པའི་སྟེང་དུ་བཞུགས་ཏེ་བྱིན་རླབས་རྗེས་བཟུང་མཛད་ཅིང་མཐར་སྐུ་ལུས་མི་སྣང་བ་རྡོ་ཕ་ཝང་དུ་ཐིམ་པའི་ཤུལ་ན་སྐུ་རྗེས་མངོན་པ་དེང་སང་ཡང་མཇལ་དུ་ཡོད། གནས་འདིར་སློབ་དཔོན་གྱི་མཚན་ལས་ཤྲཱི་སེང་ཧཱའི་ཆོས་གྲྭ་ཞེས་ཐོག་མར་ཕྱག་བཏབ་ཅིང་འདུལ་བ་གཞི་གསུམ་གྱི་ཕྱག་བཞེས་བཙུགས་པ་ནས་གྲུབ་དབང་རྫོགས་ཆེན་པའི་རིང་ལུགས་འཛིན་པའི་ཆོས་སྡེ་ཡོངས་ཀྱིས་གཙོས་མདོ་ཁམས་ཕྱོགས་ཀྱི་སྔ་འགྱུར་བའི་བསྟན་པ་དྭངས་གཙང་པདྨའི་སྦུབས་ལྟར་བྱི་དོར་བྱུང་བ་ནས། དེང་གི་དུས་འདིར་སྔ་འགྱུར་པའི་རིང་ལུགས་འཛིན་པ་ཞེས་མཁན་ཆེན་ཞི་འཚོ་ནས་རྒྱུད་པའི་སྨད་འདུལ་སྡོམ་རྒྱུན་འཛིན་པའི་རབ་བྱུང་གི་སྡེ་ཆེན་པོས་སའི་ཁྱོན་ཡོངས་སུ་ཁེངས་པ་བདག་ཉིད་ཆེན་པོ་འདིའི་བཀའ་དྲིན་ཁོ་ན་ལས་བྱུང་བ་མངོན། རྗེ་ཉིད་ཤྲཱི་སེང་ཆོས་གྲྭའི་མཁན་རབས་གཉིས་པའི་གསེར་ཁྲིར་བཞུགས་ཏེ་གཞི་བྱེས་ཀྱི་བླ་སྤྲུལ་གྲྭ་ཚང་བཅས་བརྒྱ་སྐོར་ཙམ་ལ་མདོ་སྔགས་སྨོན་ལམ། ཡོན་ཏན་མཛོད། སྡོམ་གསུམ་རྣམ་ངེས་སོགས་མདོ་སྔགས་གཞུང་འགྲེལ་གྱི་འཆད་ཁྲིད་སྤྱི་དང་། ཁྱད་པར་རྒྱུད་རྒྱལ་གསང་བ་སྙིང་པོའི་བཤད་པ་གདུལ་བྱའི་བློ་དང་མཚམས་པར་ལུང་རིགས་ཀྱི་ལམ་ནས་ངེས་པ་འདྲོང་བའི་བཤད་པ་མཛད་པས་སློབ་དང་ཡང་སློབ་ཕྱོགས་བརྒྱར་འཕེལ་ཏེ་ས་བཀའ་རྙིང་གསུམ་གཙོ་བོར་གྱུར་པའི་གངས་ལྗོངས་མཐའ་དབུས་ཀྱི་བསྟན་པའི་མེ་རྩ་ཆེན་མོར་གྱུར་པ་སྟེ། འཇམ་དབྱངས་མཁྱེན་བརྩེའི་དབང་པོས་མཛད་པའི་རྣམ་ཐར་གསོལ་འདེབས་བྱིན་རླབས་སྣང་གཏེར་ལས། རྒྱལ་སྲས་འཇམ་དཔལ་གཞོན་ནུའི་ཡེ་ཤེས་སྐུ། །ཐེག་མཆོག་དགེ་བའི་བཤེས་ཀྱི་ཚུལ་བཟུང་བ། །གཞན་ཕན་ཕ་མཐའ་ཡས་པའི་ཕྲིན་ལས་ཅན། །ཀུན་མཁྱེན་བླ་མའི་ཞབས་ལ་གསོལ་བ་འདེབས། །ཅེས་དང་། སོ་སོར་ཐར་བ་གཞི་གསུམ་ཕྱག་བཞེས་དང་། །རྒྱུད་རྒྱལ་གསང་བ་སྙིང་པོའི་བཤད་སྲོལ་སོགས། །མདོ་སྔགས་ཤིང་རྟའི་ལམ་ཆེན་རབ་དབྱེ་བས། །རྒྱལ་བསྟན་ཉིན་མོར་མཛད་ལ་གསོལ་བ་འདེབས། །དགེ་འདུན་འདུས་སྡེ་ཉམས་གསོ་གསར་སྤེལ་དང་། །གསང་གསུམ་རྟེན་བཞེངས་མཆོད་སྤྲིན་སྤྲོ་བས་མཚོན། །རླབས་ཆེན་བྱ་བ་ལས་ཀྱི་འཁོར་ལོ་ཡིས། །ཕན་བདེའི་དགའ་སྟོན་སྦྱིན་ལ་གསོལ་བ་འདེབས། །ཞེས་སོགས་བསྔགས་བརྗོད་རྒྱ་ཆེར་མཛད། སྤྱིར་རྗེ་འདི་ཉིད་ཟབ་གཏེར་གྱི་སྐལ་བ་ལྡན་པའི་སྐྱེས་བུ་ཡིན་པར་གསུངས་ཏེ། དགུང་ལོ་བརྒྱད་ལ་སོན་སྐབས་དཔལ་གྱི་བསམ་ཡས་ཆོས་སྡེ་ལ་མེའི་འཇིག་པ་ཟློག་ཐབས་ཀྱི་ཟབ་གཏེར་ཁ་བྱང་ཕྱག་ཏུ་འབྱོར་ཡང་ས་ཐག་རིང་བས་ཕེབས་མ་ཐུབ་ཅིང་། ཕྱིས་བསམ་ཡས་གཙུག་ལག་ཁང་ལ་མེ་འཇིག་པ་བྱུང་བ་གསན་པས་ཐུགས་འགྱོད་ཆེན་པོ་གནང་། དེ་བཞིན་ལྷ་སར་ཆུའི་འཇིག་པ་བཟློག་པའི་ལུང་བྱང་ཡོད་པ་གཞན་ལ་སྦས་ཚུལ་གྱིས་ལྷ་ལྡན་དུ་བྱོན་ཏེ་ཕྱག་རྡོར་དྲེགས་འདུལ་གྱི་སྐུ་མཚམས་ལ་བཞུགས་པས་ཆུ་ལོག་ཆེན་པོ་བྱུང་ཡང་གནོད་པ་ཆེན་པོ་མ་ནུས་པ་སོགས་ཀྱི་རྣམ་ཐར་དང་། ཕྱིས་སུ་དཔལ་སྤྲུལ་རིན་པོ་ཆེས་ཀྱང་ཆབ་ཤོག་གི་ལམ་ནས། སོར་མོས་མ་ཡིན་སྨྱུག་གུས་ལྟ་ཅི། །དགོངས་བརྒྱུད་ཁྲོལ་དཀའ་འཁོར་ལྔའི་མདུད་རྒྱ། །གང་གིས་གཞིག་ནུས་བཅོམ་ལྡན་ལྡན་པ། །གྲུབ་བརྒྱས་བསྟེན་པའི་བཞེས་འཕྲོ་མིན་ནམ། །སྟག་ཤམ་ཐིག་ལེའི་འཛུམ་ཆེན་དགོངས་དང་། །ཟླུམ་པོའི་མཐང་གོས་པུས་མོའི་འཆིང་ཐག །བསླབ་པའི་བཙོན་བུས་སྡོམ་པའི་གྲོགས་ལ། །རོ་མཉམ་རིག་སྔགས་ད་ནི་འདེབས་རན། །རྒྱན་དྲུག་རི་མོའི་འཕྱང་འཕྲུལ་དགོངས་དང་། །ཟླུམ་ཚལ་སྣམ་ཕྲན་རེ་དོགས་འཆིང་ཐག །བླང་འདས་བརྩི་བའི་གུ་དོག་བཙོན་ཁང་། །སྤང་བླང་མེ་སྒྱོག་ད་ནི་བརྡེག་རན། །ཐོར་ཚུགས་འཁོར་ལོའི་མཛེས་པ་དགོངས་དང་། །མགོ་རེག་བརྟུལ་ཞུགས་དཀྱིལ་འཁོར་བརྙས་བཅོས། །གསོ་སྦྱོང་སྒྲིག་བཅད་འཛིན་པའི་བཙོན་སྲུང་། །གཏད་སོའི་སྲོག་དང་ད་ནི་བྲལ་རན། །ཕ་གཅིག་པདྨའི་ཚོམ་བུའི་ཚོགས་སུ། །སྨོན་ལམ་མཐུན་པའི་སྤྱོད་པའི་བོགས་འབྱིན། །རྒྱུད་པ་ཀུན་ལ་བགོ་སྐལ་ལགས་ན། །སྟོན་མོ་རང་སྐལ་ད་ནི་བཞེས་རན། །ཞེས་སོགས་སྔགས་སྤྱོད་མཛད་ན་སྐུ་ཚེ་མཐར་ཕྱིན་པ་དང་ཟབ་གཏེར་གྱི་ཕྲིན་ལས་རྒྱ་ཆེན་འབྱུང་བར་གསུངས་ཀྱང་།ཕྱི་དུས་འདིར་སྔ་འགྱུར་ཆོས་སྡེ་ཆེན་མོར་གྲགས་པ་ཀུན་ལ་འདུལ་བསྟན་རི་མོའི་མར་མེ་ལྟར་གྱུར་ཅིང་། བསྟན་རྩ་ཆོས་འདུལ་རིན་པོ་ཆེ་རྒྱལ་བསྟན་ཡུན་དུ་གནས་པའི་གཞི་མར་དགོངས་ནས་རྗེ་ཉིད་སྐུ་ཚེ་གང་པོར་ཉེས་ལྟུང་ཕྲ་མོས་ཀྱང་མ་གོས་པ་ཉེ་བ་འཁོར་སླར་བྱོན་པ་ལྟ་བུའི་རྣམ་ཐར་བསྐྱངས། བར་ལམ་སྦས་པའི་རྣལ་འབྱོར་འཁོས་ཆུང་གི་རྣམ་ཐར་བསྐྱངས་ཏེ་སྟོད་གངས་རི་ཏི་སེ་ནས་སྨད་རྒྱ་ནག་རི་བོ་རྩེ་ལྔ་ཡན་གྱི་དགོན་གནས་ཆོས་སྡེ་ཁག་དང་དབེན་ཁྲོད་སྒྲུབ་གནས་རྣམས་སུ་མཇལ་སྐོར་དང་གནས་འབྲེལ་ཕེབས། ཁྱད་པར་དབུས་ཕྱོགས་སུ་ལན་གཉིས་ཙམ་ཕེབས་ཤིང་བསམ་ཡས་མཆིམས་ཕུ། སྒྲགས་ཀྱི་ཡངས་རྫོང་། གངས་ཏི་སེ། དཔལ་གྱི་རྩྭ་རི་ཏྲ་སོགས་སུ་སྒྲུབ་པ་ཡུན་རིང་མཛད་ཅིང་དེ་དག་ཏུ་གསར་རྙིང་རིས་མེད་ཀྱི་སྐྱེས་ཆེན་དུ་མ་མཇལ་བ་ལས་གསན་བསམ་མཐའ་ཡས་མཛད་པ་སྟེ། རྒྱུད་སྟོད་མཁན་པོ་དགེ་འདུན་དར་རྒྱས་ལས་བྱམས་ཆོས་སྡེ་ལྔ་དང་། དབུ་མ་རིག་པའི་ཚོགས་དྲུག་སོགས་འཕགས་ཡུལ་མཁས་པའི་གཞུང་ལུགས་ཀྱི་རྒྱུན་ཡོད་དོ་ཅོག་ཐམས་ཅད་དང་། ཨོ་རྒྱན་སྨིན་གྲོལ་གླིང་གི་རྡོར་འཛིན་མཁན་པོ་འགྱུར་མེད་མི་ཕམ་དཔལ་བཟང་པོ་ལས་རྒྱལ་བའི་བཀའ་འགྱུར་ཆེན་མོ་ཡོངས་རྫོགས། ལྷ་ལུང་པད་རི་སྤྲུལ་སྐུ་ལས་གཤིན་རྗེ་གདོང་དྲུག་དང་། མི་ཏྲ་བརྒྱ་རྩ་སོགས་ཀྱི་སྐོར། སྨིན་གླིང་ཁྲི་ཆེན་ལས་གཏེར་ཆེན་བཀའ་འབུམ་ཡོངས་རྫོགས། ན་ལེནྟྲའི་གཟིམས་འོག་སྤྲུལ་པའི་སྐུ་ལས་བ་རི་བརྒྱ་རྩ་དང་། སྒྲུབ་ཐབས་རྒྱ་མཚོ། ཡོངས་འཛིན་དམ་བྱམས་པ་འཕྲིན་ལས་ཡོན་ཏན་ལས། ཀྱཻ་རྡོར་རྒྱུད་དབང་དང་། ལམ་འབྲས་ཀྱི་སྐོར་སོགས་གསན་བསམ་ཕྱོགས་མེད་དུ་མཛད་ནས་ཕྱིས་སུ་རུ་དམ་གདན་ས་ནས་རྒྱལ་བའི་བཀའ་འགྱུར་གྱི་ལུང་དང་བསྟན་བཅོས་ཁག་གི་བཤད་པས་མཚོན་མདོ་སྔགས་བཀའ་གཏེར་གྱི་རྒྱུན་ཉག་ཕྲ་བ་རྣམས་ལ་འཆད་སྤེལ་བསྐྱངས་པའི་རྒྱུན་ད་ལྟའི་བར་དཀར་ནག་རྒྱ་ཡི་ཡུལ་གྲུ་ཚུན་ཡོངས་སུ་ཁྱབ་པ་བྱུང་། དུས་དེར་དཔལ་རི་སྤྲུལ་སྐུ་པདྨ་དབང་རྒྱལ་དང་སྨིན་གླིང་ཁྲི་ཆེན་སངས་རྒྱས་ཀུན་དགའ་སོགས་ཀྱི་བཀས་བསྐུལ་བ་ལྟར་སྔ་འགྱུར་གྱི་ཕྲིན་ཆོག་བཞུགས་སོ་འཚལ་ཀུན་ཕྱོགས་སྒྲིག་གནང་བ་སྔ་འགྱུར་བཀའ་མའི་གླེགས་བམ་ཕྱོགས་སྒྲིག་ཐེངས་དང་པོ་ཐེག་དགུའི་གྲངས་ལྡན་པར་དུ་བརྐོས་ཏེ་དབང་ལུང་གི་རྒྱུན་སྤེལ་ཚུལ་མཁན་ཆེན་པདྨ་བཛྲ་གྱི་ཞལ་སྔ་ནས་མཛད་པའི་དཀར་ཆག་ཡིད་བཞིན་དབང་གི་རྒྱལ་པོའི་ཕྲེང་བ་ལས། སྔར་གྲུབ་དབང་བླ་མའི་གདན་སར་བཞུགས་ཡོད་པའི་སྐབས་ཤིག་ཏུ། མནལ་ལམ་ན་གཞན་ཞིག་གིས་འདི་སློབ་དཔོན་པདྨའི་གསུང་དངོས་ཡིན་ཟེར་ནས་པུ་སྟི་ཞིག་གཏད་བྱུང་བས། ཕྱི་ཉིན་མཆེད་གྲོགས་ཀུན་ལ། དེང་སང་སློབ་དཔོན་ཆེན་པོའི་གསུང་དངོས་བཀའ་མར་གྱུར་པའི་ཡིག་ཆ་ཁུང་ལྡན་འདྲ་འདིར་ཡོད་མིན་སོགས་གླེང་མོལ་མཛད་པས། ཁོང་རྣམས་ནས་མན་ངག་ལྟ་བའི་ཕྲེང་བ་རྩ་འགྲེལ་བཅས་སྔར་ཡོད་ཀྱང་། དེའི་དཔེ་སྟོར་ནས་ཡུན་རིང་སོང་ཡང་རྩད་མ་ཆོད། གཞན་དེ་འདྲ་ཅང་མེད་ཟེར་བ་ལ། རྗེའི་ཞལ་ནས། ཁོ་བོ་ལ་རྨིས་ལྟས་འདི་འདྲ་ཞིག་བྱུང་བས་ད་ལན་དཔེ་མཛོད་དུ་བཙལ་ན་རྙེད་པ་སྲིད་དམ་གསུངས་ནས། ཐམས་ཅད་ཀྱིས་བཙལ་ཀྱང་ཕྱག་དཔེའི་ཁྲོད་ནས་རྙེད་རྒྱུ་མ་བྱུང་ཞིང་། སྔར་ཆོས་ཁྲིའི་འོག་གི་ས་རྡུལ་རྣམས་ལ་གད་བརྒྱབ་པའི་ཁྲོད་ནས་ལྟ་ཕྲེང་གི་དཔེ་ཆ་ཐོན་བྱུང་བ་གཟིགས་པས་ཚིག་དོན་ཕུན་སུམ་ཚོགས་པར་འདུག་པ་ལ་ངེས་ཤེས་ཐུན་མོང་མ་ཡིན་པ་འཁྲུངས་པའི་རྐྱེན་གྱིས། རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར། ཨོཾ་སྭ་སྟི། ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །

སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི། །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི། །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི། །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲྭ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ་རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་བར་བརྟེན། ལྷ་གཉེན་ཆེན་པོ་རྡོ་རྗེ་གཡུང་དྲུང་གི་རི་ཞོལ་འོག་མིན་ཨོ་རྒྱན་བསམ་གཏན་ཆོས་གླིང་གི་གནྡྷོ་ལའི་ཉེ་གམ། དཔལ་སེང་གེ་རིའི་གདན་ས་འདིར། སྐལ་བཟང་རྣམ་འདྲེན་བཞི་པ་མཉམ་མེད་ཐུབ་པའི་དབང་པོ་ཉིད་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་ཐོག་མར་བསྐོར་ནས་ད་ལྟའི་བར་གྱི་འདས་ལོའི་ཚུལ་ལ་བཞེད་པ་མང་དུ་སྣང་ཡང་། རང་ལུགས་ལོ་ཆེན་དྷརྨ་ཤྲིའི་རྩིས་གཞུང་ཉིན་བྱེད་སྣང་བ་ལྟར་ན། བགྲང་བྱའི་འཁོར་ལོ་ཉིས་སྟོང་དང་བདུན་བརྒྱ་དྲུག་ཅུ་རྩ་དྲུག་འདས་ཤིང་། རྗེ་ཉིད་ཀྱིས་དགུང་ལོ་བཞི་བཅུ་རྩ་གཅིག་བཞེས་པ་ཀུན་ལྡན་ཞེས་པ་ལྕགས་ཕོ་བྱི་བའི་ལོའི་ཧོར་ཟླ་གསུམ་པ་ཆུ་ཤེལ་དབང་པོའི་དཀྱིལ་འཁོར་དཔལ་ལྡན་ལྷ་མོ་ནག་པས་ཉ་བའི་དམར་ཕྱོགས་ཀྱི་རྫོགས་པ་དང་པོ། གཟའ་ལྷག་པ། སྐར་མ་སྣུབས་འཕྲོད་སྦྱོར་རྒྱལ་མཚན་སོགས་ཕུན་སུམ་ཚོགས་པའི་དུས་ཚེས་དགེ་བ་ལ་བྱ་བ་ལས་ཀྱི་འཁོར་ལོ་ཆེན་པོ་འདིར་དབུ་འཛུག་པར་མཛད་པ་ཡིན་ནོ། ཞེས་གསལ་བ་ལྟར་དང་། གཞན་ཡང་དཔལ་གསང་བ་སྙིང་པོའི་རྒྱུད་འགྲེལ་ཆེན་མོ་རྣམས་དང་ཀུན་མཁྱེན་རོང་ཟོམ་པའི་གསུང་འབུམ་སོགས་ཆེས་ཉམས་པར་ཕངས་པའི་གསུང་རབ་དུ་མ་དབུས་གཙང་གི་ཕྱོགས་ནས་སྐུ་ངལ་ཆེན་པོས་འཚོལ་སྡུད་མཛད་ཅིང་པར་དུ་བརྐོས་ནས་བཤད་ལུང་གི་རྒྱུན་སྤེལ་བ་སོགས་གསང་ཆེན་སྔ་འགྱུར་གྱི་བསྟན་པ་ལ་སྨན་པའི་མཛད་པ་མཐའ་ཡས་པ་བསྐྱངས་ཚུལ། མཁྱེན་བརྩེའི་དབང་པོས་མཛད་པའི་རྣམ་ཐར་གསོལ་འདེབས་ལས། ཐུབ་བསྟན་སྤྱི་དང་ཁྱད་པར་རྡོ་རྗེ་ཐེག །སྔགས་གཞུང་སྤྱི་དང་ཁྱད་པར་སྔ་འགྱུར་ཏེ། དེ་ཉིད་སྤྱི་དང་ཁྱད་པར་བཀའ་མའི་གཞུང་། དྲི་མེད་ཕྱོགས་བརྒྱར་སྤེལ་ལ་གསོལ་བ་འདེབས། ཞེས་ཚད་མར་གྱུར་པའི་གསུང་གིས་བསྔགས་བརྗོད་ཡང་ཡང་མཛད་པ་ལྟར་དང་། ཞལ་སློབ་མཁས་གྲུབ་གཉིས་ལྡན་གྱི་བརྒྱུད་འཛིན་པ་དཔལ་སྤྲུལ་འཇིགས་མེད་ཆོས་ཀྱི་དབང་པོ། བཀའ་བབ་བདུན་ལྡན་འཇམ་དབྱངས་མཁྱེན་བརྩེའི་དབང་པོ། མཁན་ཆེན་པདྨ་བཛྲ། ཞེ་ཆེན་མ་ཧཱ་པནྚི་ཏ་མཐུ་སྟོབས་རྣམ་རྒྱལ། གླིང་སྤྲུལ་ཐུབ་བསྟན་ཉིན་བྱེད་རྒྱལ་མཚན། སྨིན་གླིང་ཁྲི་ཆེན་སངས་རྒྱས་ཀུན་དགའ། ལྷ་ལུང་པད་རི་སྤྲུལ་སྐུ། རྒྱལ་རོང་དབོན་སྤྲུལ། པད་གླིང་བརྒྱད་པ་ཀུན་བཟང་བདེ་ཆེན་རྡོ་རྗེ། རྡོ་བྲག་རིག་འཛིན་ཆེན་པོ་སོགས་བགྲངས་ཀྱིས་མི་ལངས་པ་བྱུང་བ་དང་། ཕྱི་རབས་བསྟན་པའི་བཙས་སུ་གསང་བ་སྙིང་པོའི་སྤྱི་དོན་དང་། ཞི་ཁྲོའི་དཀའ་འགྲེལ། སུམ་རྟགས་ཀྱི་འབྲུ་འགྲེལ་སོགས་ཐུན་མོང་དང་ཐུན་མོང་མ་ཡིན་པའི་གཙུག་ལག་གི་གནས་གསལ་བར་བྱེད་པའི་ལེགས་བཤད་ལྗགས་རྩོམ་མཛད་པ་ཐམས་ཅད་ཐོག་མར་བཀའ་བསྡུ་མ་གྲུབ་པ་དང་དུས་དབང་གིས་འཐོར་བ་སོགས་ཀྱིས་ཚང་བར་མི་བཞུགས་ཤིང་། གང་བཞུགས་པ་རྣམས་ཕྱོགས་གཅིག་ཏུ་བསྡུས་པ་བསྟན་པ་སླར་གསོའི་སྐབས་འདིར་ཤྲཱི་སེང་ཆོས་གྲྭར་ཤིང་པར་དུ་འཁོད་ཅིང་། དེ་ཉིད་གཞིར་བཞག་ཐོག་གསར་དུ་འབྱོར་བ་ཁག་གིས་ཁ་བསྣོན་དང་བཅས་ཏེ་རྗེ་ཉིད་ཀྱི་གསུང་གི་ཕྲིན་ལས་མི་ནུབ་སྲི་ཞུའི་ལྷག་པའི་བསམ་པས་རང་ཉིད་ཀྱིས་ལན་གྲངས་དུ་མ་ཞུས་དག་དང་སྐོར་ཚོ་བདུན་དུ་ཕྱེས་ཤིང་ཆོས་ཚན་གྱི་གོ་རིམ་འཆོལ་བ་ལེགས་པར་སྒྲིག་ཏེ་ཚར་གྲངས་སྟོང་ཕྲག་འགའ་དཔེ་དེབ་ཏུ་བསྐྲུན་པའི་སྐལ་བ་བྱུང་། དེ་ལྟར་རང་དོན་དུ་ཐོས་བསམ་སྒོམ་གསུམ། གཞན་དོན་དུ་འཆད་རྩོད་རྩོམ་གསུམ། གཉིས་དོན་དུ་མཁས་བཙུན་བཟང་གསུམ་སྟེ་ཚུལ་དགུ་ཡོན་ཏན་གྱི་གཏེར་མཛོད། གསང་ཆེན་སྔ་འགྱུར་བསྟན་པ་རྒྱ་མཚོའི་མངའ་བདག་ཁྱབ་བདག་བཀའ་འགྱུར་པ་ཆེན་པོ་ཞེས་བསྟན་པའི་སྒྲོན་མེ་འགྲོ་བའི་དེད་དཔོན་ཉག་གཅིག་ཏུ་བྱོན་ཡང་སྙིགས་དུས་འགྲོ་བའི་བསོད་ནམས་ཀྱི་མཐུ་ཞན་པས་སྐུ་ཚེ་དང་མཛད་པ་མཐར་མ་ཕྱིན་པར་དགུང་གྲངས་ལྔ་བཅུ་རྩ་དྲུག་བཞེས་པ་རབ་བྱུང་བཅུ་བཞི་པའི་ཤིང་ཡོས་ལོར་སྐུ་གཤེགས་སོ། རྗེ་འདི་ཉིད་སྔ་འགྱུར་པའི་བསྟན་པ་སྤྱི་དང་ཁྱད་པར་གྲུབ་དབང་རྫོགས་ཆེན་པའི་བསྟན་པ་ལ་ཐུགས་བསྐྱེད་མཛད་འཕྲིན་འགྲན་ཟླ་དང་བྲལ་ཞིང་། རྒྱལ་སྲས་གཞན་ཕན་མཐའ་ཡས་ཉིད་ཞལ་བཞུགས་སྐབས་གདན་ས་ཆེན་མོའི་མཆོག་གི་རྡོ་རྗེ་སློབ་དཔོན་གྱི་གསེར་ཁྲིར་མངའ་དབང་བསྒྱུར་བར་མཛད་པ་དང་། ཕྱིས་ཀྱི་སྐུ་ཞབས་རིམ་བྱོན་ལ་བསྟན་བདག་མཆོག་སྤྲུལ་རྣམ་གསུམ་ཞེས་གྲགས་པའི་ཡ་གྱལ་གསེར་ཁྲི་གསུམ་པར་འདྲེན་པ་སོགས་རྒྱུ་མཚན་དུ་མས་སྐབས་འདིར་དོན་ཐོབ་ལྟར་གདན་རབས་སུ་བཀོད་པ་ཡིན་ལ། གཞན་ཡང་གྲུབ་དབང་བཞི་པ་ཞིང་དུ་གཤེགས་རྗེས་དཔོན་སློབ་བཞི་པ་འཇིགས་མེད་ཆོས་དབྱིངས་འོད་གསལ་ནས་བསྟན་སྲིད་ཀྱི་ཐུགས་འགན་བཞེས་པར་གྲགས་ཀྱང་ཕྲིན་ལས་དེ་ཙམ་མ་རྒྱས་ཤིང་། དཔལ་སྤྲུལ་རིན་པོ་ཆེ་དང་མཁན་ཆེན་པདྨ་བཛྲ་རྣམ་གཉིས་ནས་བཤད་སྒྲུབ་ཀྱི་བསྟན་པའི་ཐུགས་འགན་བཞེས་ཏེ་གྲུབ་དབང་ལྔ་པ་སོགས་ལ་མན་ངག་གི་བརྒྱུད་པ་སྤེལ་བའི་འཕྲིན་ལས་ནམ་མཁའི་མཐའ་དང་མཉམ་པ་བྱུང་ན་ཡང་། སྐུ་ཚེ་ཧྲིལ་པོར་བྱ་བཏང་དུ་བཞུགས་ཏེ་བསྟན་སྲིད་ལ་གཟིགས་གཏོགས་མ་མཛད་པས་གདན་རབས་སུ་མ་བཀོད་པའི་ཚུལ་ཡང་མཁྱེན་པར་འཚལ་ལོ། །

གདན་རབས་དགུ་པ། རྫོགས་ཆེན་སྐུ་ཕྲེང་ལྔ་པ་ཐུབ་བསྟན་ཆོས་ཀྱི་རྡོ་རྗེ་ནི།

གྲུབ་དབང་སྐུ་རབས་ལྔ་པ་ཐུབ་བསྟན་ཆོས་ཀྱི་རྡོ་རྗེ་བསྟན་འཛིན་འཇིགས་མེད་དབང་པོ་མཆོག་ནི། རྩོད་བྲལ་སྤྲུལ་བའི་གཏེར་ཆེན་མཆོག་གྱུར་བདེ་ཆེན་གླིང་པས་སྤྱན་དྲངས་པའི་ཨོ་རྒྱན་ཆེན་པོའི་གསང་བའི་བརྡ་ལུང་གིས་བསྟན་པ་ཉིད། བཀའ་བབ་བདུན་ལྡན་མཁྱེན་བརྩེའི་དབང་པོའི་ཞལ་སྔ་ནས་གསལ་བར་བྱས་པ་ལས། བཱི་མ་མི་ཏྲ་ཁམས་ཀྱི་ལྷོ་ཕྱོགས་སུ༔ སྤྲེལ་ལོ་དྷརྨ་བཛྲའི་མིང་ཅན་འབྱུང༔ བར་ཆད་བདུད་ཀྱི་གཡུལ་ལས་རྒྱལ་གྱུར་ན༔ སྙིང་པོའི་བསྟན་ལ་བྱ་བ་མཆོག་ཏུ་བྱེད༔ ཅེས་དང་། ལྐོག་ཡིག་སྙིང་བྱང་ཐུགས་ཀྱི་ཆ་ལག་ལས། སྤྲེལ་ལོར་དྷརྨ་བཛྲ་ཞེས་བྱ་འབྱུང༔ རུ་དམ་ལུང་ལ་བསྟན་པའི་སྲོག་ཤིང་བཙུགས༔ བཤད་དང་སྒྲུབ་པའི་བསྟན་པ་རྒྱ་ཆེར་སྤེལཿ ཞེས་སོགས་སྒྲིབ་བྲལ་ཡེ་ཤེས་ཀྱི་གཟིགས་པ་མངའ་བའི་ལྷ་བླའི་བརྟག་ལུང་ཐམས་ཅད་གཅིག་ཏུ་མཐུན་པར། སྤྱི་ལོ་༡༨༧༢པ་སྟེ་རབ་བྱུང་བཅོ་ལྔ་པའི་ལྕགས་སྤྲེལ་ལོར། སྐུ་ཕྲེང་དང་པོའི་འཁྲུངས་ཡུལ་དང་གཅིག་པར་ཁམས་ཀྱི་རི་བོ་ཆེའི་ཕྱོགས་སུ་ཡབ་མགོན་པོ་རྒྱལ་དང་། ཡུམ་བསོད་ནམས་གཡང་མཚོ་གཉིས་ཀྱི་སྲས་སུ་བཀྲ་ཤིས་ངོ་མཚར་གྱི་མཚན་མ་བརྒྱ་ཕྲག་དང་བཅས་མཚན་དཔེའི་འདབ་སྟོང་གསར་དུ་གྲོལ། ཐོག་མ་ཉིད་ནས་བྱང་ཆུབ་ཀྱི་སེམས་དང་སྐྱེས་ནས་ཐོབ་པའི་ཤེས་རབ་སོགས་རྒྱལ་བའི་སྲས་ཀྱི་མངོན་རྟགས་མཐའ་ཡས་པ་མེ་ཏོག་དང་དྲི་བསུང་བཞིན་ལྷན་སྐྱེས་སུ་མངའ། དགུང་གྲངས་བཞི་ལ་སོན་པ་འཛིན་བྱེད་ན་ཚོད་ལྡན་ཞེས་པ་ཤིང་མོ་ཕག་གི་ལོའི། སྟོན་པ་ཐུབ་པའི་དབང་པོས་རྫུ་འཕྲུལ་གྱི་ཆོ་འཕྲུལ་ཆེན་པོས་མུ་སྟེགས་ཀྱི་སྡེ་ཚོགས་ཕམ་པར་མཛད་པའི་བཀྲ་ཤིས་ཀྱི་ཟླ་བ། ཨོ་རྒྱན་ཆེན་པོས་དཔལ་གྱི་བསམ་ཡས་མཆིམས་ཕུར་ལྷ་སྲིན་དབང་དུ་བསྡུས་ནས་ཟབ་མོ་གཏེར་གྱི་གཉེར་བྱང་གཏད་ཅིང་བོད་ཡུལ་གཏེར་གྱིས་བཀང་བའི་དུས་ཆེན་ཡར་ངོའི་ཚེས་བཅུའི་སྔ་ཆར། ཀུན་ཕན་ཉིན་བྱེད་ཀྱི་དཀྱིལ་འཁོར་ཤར་རིའི་རྩེ་མོར་མངོན་པར་འཕགས་པ་དང་མཉམ་དུ་ཞབས་ཟུང་རྩིབས་སྟོང་གི་འཁོར་ལོ་རུ་དམ་གདན་ས་ཆེན་མོར་ཐོག་མར་བཀོད་ཅིང་། དེ་ན་གནས་པའི་སྐྱེ་བོའི་རུ་ཚོགས་ཕྲེང་བསྒྲིགས་ཤིང་གདུགས་དང་། རྒྱལ་མཚན། འཕན་འཕུར་བཅས་སྣ་ཚོགས་པའི་དར་དང་། རྒྱལ་སྲིད་རིན་པོ་ཆེ་སྣ་བདུན། བཀྲ་ཤིས་པའི་རྫས་རྟགས་བརྒྱད་སོགས་མཆོད་པའི་ཡོ་བྱད་མཐའ་ཡས་པ་མ་ཚང་བ་མེད་པ་ཐོགས་ཏེ་གཙུག་ལག་ཁང་ཆེན་མོ་ཐུབ་བསྟན་ཡོངས་སུ་འདུས་པའི་དགའ་ཚལ་དུ་སྤྱན་དྲངས། དཔོན་སློབ་སྐུ་རབས་བཞི་པ་འཇིགས་མེད་ཆོས་དབྱིངས་འོད་གསལ་དང་། མཁན་ཆེན་པདྨ་བཛྲ། ཞེ་ཆེན་པདྨ་འགྱུར་མེད་རྒྱ་མཚོ། རྒྱལ་རོང་མཆོག་སྤྲུལ་ཀུན་བཟང་ཐེག་མཆོག་རྡོ་རྗེ་སོགས་བསྟན་པ་འཛིན་པའི་སྐྱེས་ཆེན་རྣམས་དང་། སྡེ་དགེ་ཆོས་རྒྱལ་ཆེན་མོའི་གཉེར་ཆེན་དཔོན་འཁོར། ཆབ་མདོ་རྒྱལ་བ་མཆོག་གི་ཞལ་སྔ་ནས་དྲུང་འཁོར་ལྷན་རྒྱས་གཙོས་ལྷ་མིའི་སྡེ་ཚོགས་ཀུན་ཀྱིས་འཇིགས་མེད་གསེར་གྱི་ཁྲི་འཕང་མཐོན་པོར་མངའ་གསོལ། ལྔ་རིག་མཁས་པའི་དབང་ཕྱུག་སྡེ་སྣོད་འཛིན་པ་མང་པོས་ཕུན་སུམ་ཚོགས་པ་ལྔ་དང་འབྲེལ་བའི་མནྜལ་གྱི་རྣམ་བཤད་དང་། མདོ་རྒྱུད་གཞུང་ལུགས་ཀྱི་ཚོགས་གཏམ་སྣ་ཚོགས་སྤེལ་ཏེ་མཁས་པའི་བསླབ་གྲལ་མཛེས་པར་བྱས་པ་དང་། དེ་མཚུངས་མང་འགྱེད་དངོས་འབུལ་སོགས་ཕུན་སུམ་ཚོགས་པའི་གཏོང་བའི་སྒོ་འཕར་ཡངས་པོར་ཕྱེས་ཏེ། སྡེ་འབངས་དགྱེས་པའི་སྟོན་ཆེན་ཉིན་འགར་བཤམས་ནས་ཐམས་ཅད་སྤྲོ་དགའི་དཔལ་ལ་བཀོད། དེ་ནས་རིམ་པར་ཡོངས་འཛིན་དགེ་བའི་བཤེས་གཉེན་ཆེན་པོ་དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། མཁན་ཆེན་པདྨ་བཛྲ། གར་དབང་བློ་གྲོས་མཐའ་ཡས་སོགས་ལས་ཐུན་མོང་གི་གཙུག་ལག་སྒྲ་ཚད་བཟོ་གསོ་ནས། ཐུན་མིན་སྡེ་སྣོད་གསུམ་དང་རྒྱུད་སྡེ་བཞི་དྲུག་གི་འགྲེལ་ཊཱིཀ་སྟོང་ཐུན་དང་བཅས་པ་གསན་བཞེས་མཛད། རྗེ་གོང་མའི་ཐུགས་རིག་གསལ་བས་བརྩོན་པ་ཆེན་པོའི་སྦྱང་པ་ལ་མ་ལྟོས་པར་རྟོགས་པའི་ཀློང་བརྡོལ་བས་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ཆེན་མོར་མངའ་དབང་མཛད། ཁྱད་པར་འཇམ་དབྱངས་མཁྱེན་བརྩེའི་དབང་པོ་གཙུག་གི་རྒྱན་གཅིག་ཏུ་བསྟེན་ནས་སྨིན་གྲོལ་ཉམས་ཁྲིད་ཀྱི་ཟབ་ཆོས་སྤྱི་དང་། བྱེ་བྲག་འོད་གསལ་རྫོགས་པ་ཆེན་པོ་སྙིང་ཐིག་གོང་འོག་གི་གདམས་གནད་ཐམས་ཅད་ཆིག་རྫོགས་སུ་བསྩལ་བས། ཡིད་དཔྱོད་རྩོལ་ཞེན་གྱི་འཕྲང་ལ་མ་ལྟོས་པར་ས་ལམ་གདན་ཐོག་གཅིག་ཏུ་གཅོད་པའི་གྲུབ་བརྙེས་ཡིད་བཞིན་གྱི་རྒྱལ་སར་ཕེབས་ཏེ། ནམ་མཁར་བྱ་བཞིན་འཕུར་བ་དང་། སྒྲུབ་གཏོར་འོད་དུ་ཞུ་ནས་བདུད་རྩིར་གྱུར་པ། ཐོད་སྣོད་ལས་སྨན་རཀ་ཁོལ་བ། ཉི་མ་རྟོད་ལ་མནན་པ། བུམ་པ་བར་སྣང་དུ་བཞག་པ། བུམ་ཆུ་ཟད་མེད་དུ་བསྒྱུར་བ། ཞབས་རྗེས་རྡོ་ལ་མངོན་པ། སྐུ་གཟན་ཉི་ཟེར་ལ་འགེལ་བ། མྱ་ངམ་གྱི་ཐང་ལས་ཆུ་གཏེར་བཏོན་པ། ཤང་ཁྲག་རས་དཀར་དུ་བྱུགས་ནས་དྲིལ་ཏེ་གནང་བ་ཕྱིས་ཞལ་ཕྱེས་ཚེ་ཨོ་རྒྱན་ཆེན་པོའི་ཐང་སྐུར་གྱུར་ཅིང་རིང་བསྲེལ་གྱིས་གང་བ་སོགས། ངོ་མཚར་གྲུབ་རྟགས་ཀྱི་མཛད་པ་ཕལ་པའི་བློའི་ཡུལ་ལས་རྣམ་པར་འགོང་པ་སྣ་ཚོགས་པ་མཐུན་སྣང་མཐོང་ཆོས་སུ་བསྟན་པ་དང་། དངོས་ཉམས་འོད་གསལ་གྱི་སྣང་ཆར་དཔལ་རི་པདྨ་འོད་གླིང་དུ་རིག་འཛིན་འདུས་པའི་ཚོགས་གྲལ་དུ་ལན་གཉིས་སུ་ཕེབས་པ་སོགས་དག་པའི་སྣང་ཆ་འབའ་ཞིག་འབྱམས་སུ་ཀླས། ལྐོག་གྱུར་གྱི་ཆོས་ཀུན་སྒྲིབ་མེད་དུ་གཟིགས་པས་སྐབས་དེའི་མདོ་ཁམས་སྟོད་སྨད་ཀྱི་བསྟན་འཛིན་གྱི་སྐྱེས་བུ་ཕལ་མོ་ཆེ་རྡོ་རྗེའི་ལུང་གིས་གཟེངས་སུ་བསྟོད་པ་དང་། རང་དགོན་དུ་བདེ་ཀོང་མཁྱེན་གསུམ་གྱི་ཡང་སྲིད་ངོས་འཛིན་གནང་སྟེ་སྐུ་དྲུང་དུ་སྐུ་བདག་མཛད། དེ་བཞིན་འབྱུང་འགྱུར་གྱི་ཆོས་སྣ་ཚོགས་པ་ཆགས་ཐོག་མེད་པར་མཁྱེན་པའི་སྔོན་ལུང་གནང་བའི་རྣམ་ཐར་བགྲངས་ལས་འདས་པ་དང་། གཞན་འཕྲིན་ལས་དོན་ཡོད་ཞགས་པས་བསྟན་འགྲོའི་དགེ་མཚན་རླབས་པོ་ཆེ་ཇི་ལྟར་བསྡུས་པའི་ཚུལ་ནི། དབུས་འགྱུར་ཆོས་ཀྱི་ཞིང་སར་སྔ་ཕྱིར་ལན་གཉིས་ཕེབས་ཤིང་། དེ་དག་གི་སྐབས་སུ་རིས་མེད་ཆོས་སྡེ་ཀུན་ལ་མཆོད་འབུལ་མང་འགྱེད་སོགས་ཟང་ཟིང་གི་དངོས་པོའི་མཆོད་སྦྱིན་རྒྱ་ཆེར་སྤེལ་ཞིང་། དཔལ་གྱི་བསམ་ཡས་སུ་ཕེབས་སྐབས་ཆོས་རྒྱལ་ཆེན་པོའི་སྐུ་རྟེན་པ་ལ་ཆོས་སྐྱོང་ཐོག་བབ་ཀྱིས་ཅི་བཅོལ་ཕྲིན་ལས་སྒྲུབ་པའི་གཡར་དམ་བཅས་ཤིང་རོལ་ཆེན་པེ་ཧར་དགྱེས་གླུ་རྟེན་སྐལ་དུ་ཕུལ། གོང་ས་ལྷ་མིའི་རྣམ་འདྲེན་རྒྱལ་དབང་ཐམས་ཅད་མཁྱེན་པས་བཀའི་ཆབ་ཤོག་དང་གསེར་ཐམ་སོགས་ཆེན་པོར་འོས་པའི་ཡོ་བྱད་སྣ་ཚོགས་པའི་གནང་སྐྱེས་དང་བཅས་དབུགས་དབྱུང་གཟེངས་བསྟོད་རྨད་དུ་བྱུང་བ་མཛད། དེ་བཞིན་བཤད་སྒྲུབ་ལས་གསུམ་གྱི་ཕྲིན་ལས་ཀྱི་སྣང་བས་ཕྱོགས་ཀྱི་ཐ་གྲུ་ཀུན་ཏུ་ཁྱབ་ཅིང། ཁྱད་པར་གདན་ས་ཆེན་མོ་གང་དུ་སྔར་ཡོད་ཀྱི་སྒྲུབ་སྡེ་པ་བཅུ་གསུམ་དེ་བཅུ་ཕྲག་གསུམ་གྱི་གྲངས་སུ་སྤེལ། དཔྱལ་གྱི་བྲག་དཀར་ལ་ཚེ་སྒྲུབ་རྒྱུན་མཚམས་པ་བཅུ་གསུམ་ཡོད་པའི་སྒྲུབ་སྡེ་གསར་དུ་བཏབ། ཤྲཱི་སེང་གི་ཆོས་གྲྭར་རྒྱུན་བཞུགས་ཀྱི་བཤད་གྲྭ་བ་སྔར་ཡོད་ཀྱི་སྟེང་བཅུ་ཕྲག་ལྔ་རུ་སྤེལ་བ་དང་། གང་གི་ཐུགས་བསྐྱེད་ཀྱི་མཐུས་བསྐུལ་ཏེ་མཁན་ཆེན་གཞན་དགའ་རིན་པོ་ཆེས་གཞུང་ཆེན་བཅུ་གསུམ་རྒྱ་མཆན་གྱིས་འགྲེལ་པ་དང་། འཇམ་མགོན་མི་ཕམ་རིན་པོ་ཆེས་རང་ལུགས་དྲི་མ་མེད་པ་གཙོར་འདོན་གྱིས་དགོངས་འགྲེལ་བསྟན་བཅོས་སྣ་ཚོགས་པ་ལྗགས་རྩོམ་མཛད་ཅིང་དེ་དག་པར་དུ་བསྐྲུན་པ་དགོན་ཡར་མར་གཉིས་སུ་པར་ལྡེབ་ཁྲི་ཕྲག་བཅུ་ལས་མི་ཉུང་བ་གསར་བཞེངས་མཛད། བཤད་སྒྲུབ་ལུང་རྟོགས་ཀྱི་བསྟན་པ་དར་བར་མཛད་པའི་མཐུ་ལས་ཕྱོགས་ཀྱི་བུ་དགོན་ཉིས་བརྒྱ་ལྷག་ཏུ་འཕེལ་ཞིང་། གཉུག་མར་གནས་པའི་འདུས་སྡེ་ཞལ་གྲངས་སྟོང་ཕྲག་ལས་བརྒལ་བར་གྱུར། གཞན་ཡང་སྟོང་མཆོད་ཀུན་བཟང་མཆོད་སྤྲིན་དང་། མགོན་ཁང་དབང་དྲག་རོལ་པ། ལྷ་གསར་ཐོག་བརྩེགས་ལྔ་པ་སོགས་རྟེན་བརྟེན་པ་དང་བཅས་པ་གསར་དུ་བཞེངས། དེ་མཚུངས་ལོ་དར་གྱི་དུས་མཆོད་བཀའ་གཏེར་ཆུ་བོ་ཟུང་འབྲེལ་གྱི་མཆོད་ཁག་བརྒྱད་ཅུ་ཐམ་པ་དང་། ཚེ་སྒྲུབ་བདུད་བཞི་རྣམ་རྒྱལ་ཚེ་གཡང་ཁ་སྤྲོད་དུ་སྒྲུབ་པ་ལས་ཀྱི་ཁ་ཚར་དང་བཅས་པ། ཕུར་ཆེན་དགྲ་བགེགས་ཀུན་སྒྲོལ་སྨད་ལས་གར་འཆམ་དང་བཅས་པ། མཐའ་དམག་འདུལ་བའི་གཉེན་པོ་འཛམ་གླིང་གེ་སར་རྒྱལ་པོ་དཔའ་ཐུལ་ཕུ་ནུའི་འཁོར་ཚོགས་དགྲ་བླ་རླུང་རྟའི་ལྷ་ཚོགས་དང་བཅས་པའི་གར་འཆམ་གསར་འཛུགས། གསོལ་ཁ་གྲ་ཚང་བརྒྱད་ཅུས་སྔ་དགོང་རྒྱུན་ཆགས་སུ་སྐོང་གསོལ་ཆད་མེད་དང་། མར་མེ་ཚེ་འབར་གྲངས་མེད་རྒྱུན་འཛུགས་གནང་བ་སོགས་རྣམ་དཀར་དགེ་བའི་སྒོ་འཕར་རྒྱ་ཆེ་བ་མང་པོ་གསར་དུ་ཕྱེས། དམ་པ་གང་གི་གསུང་གི་བདུད་རྩིས་དབུགས་དབྱུང་ཐོབ་པའི་ཞལ་སློབ་གྲུབ་པའི་ས་མཐོར་གཤེགས་ཤིང་མཁས་པའི་ཡང་རྩེར་སོན་པ་གྲངས་ལས་འདས་པ་བྱོན་ཞིང་གཙོ་བོའི་མཚན་ཙམ་སྨོས་ན། མདོ་རིན་པོ་ཆེ་ཟིལ་གནོན་དགྱེས་པ་རྡོ་རྗེ། རྫོང་སར་མཁྱེན་སྤྲུལ་ཆོས་ཀྱི་བློ་གྲོས། རབ་འབྱམས་དྲུག་པ་སྣང་མཛད་གྲུབ་པའི་རྡོ་རྗེ། རྡོ་གྲུབ་བཞི་པ་ཐུབ་བསྟན་ཕྲིན་ལས་དཔལ་བཟང་། ཀཿཐོག་སི་ཏུ་རིན་པོ་ཆེ། གླག་བླ་བསོད་ནམས་ཆོས་འགྲུབ། གཡག་ཟེའི་འཇའ་ལུས་བསོད་ནམས་རྣམ་རྒྱལ། དིལ་མགོ་མཁྱེན་སྤྲུལ་རབ་གསལ་ཟླ་བ། མི་ཕམ་སྤྲུལ་སྐུ་དགུ་རོང་རྒྱལ་སྲས། ཉི་གྲགས་མཆོག་སྤྲུལ་རིན་པོ་ཆེ། ཀཿཐོག་མཁན་པོ་ངག་ཆུང་། བྱ་བྲལ་སངས་རྒྱས་རྡོ་རྗེ། དཔལ་ཡུལ་གྲུབ་དབང་སྤྲུལ་སྐུ། ཀཿཐོག་རྨོག་ཚ། བ་ཐུར་མཁན་ཆེན་ཐུབ་དགའ། བོད་སྤྲུལ་མདོ་སྔགས་བསྟན་པའི་ཉི་མ། རྨེ་བ་མཁན་ཆེན་ཚེ་དབང་རིག་འཛིན་དང་ནོར་བུ་བསྟན་འཛིན། རང་དགོན་གྱི་མཁན་སྤྲུལ་བརྒྱད་ཅུ་ལྷག་བཅས་བསྟན་པ་འཛིན་པའི་སྐྱེས་ཆེན། རྟོགས་པ་བརྙེས་པའི་གྲུབ་མཆོག གཞུང་ལུགས་འཆད་པའི་མཁན་པོ་སོགས་གྲངས་ལས་འདས་པ་བྱོན་ཞིང་དེ་དག་རེ་རེས་ཀྱང་བུ་སློབ་ནམ་མཁའི་སྐར་ཚོགས་ལྟར་བསྐྱངས་པས་མི་རིགས་སྐད་རིགས་མི་གཅིག་པའི་འཛམ་གླིང་ཆོས་ལྡན་གྱི་ཡུལ་གྲུ་མང་པོར་གང་གི་ཕྲིན་ལས་ཀྱི་གདུགས་དཀར་ཡངས་པོས་ཁྱབ་པར་གྱུར། མཐར་དགུང་གྲངས་དྲུག་ཅུ་རེ་གཅིག་བཞེས་པ་རབ་བྱུང་བཅུ་དྲུག་པའི་ཤིང་ཕག་ལོར་རྟག་འཛིན་ཅན་གྱི་སྐྱེ་བོ་དག་མཐའ་བཞིའི་བསྡུས་པའི་ཆོས་ལ་ངེས་པ་འབྱུང་ཕྱིར་སྐུ་ཚེ་དེའི་འགྲོ་དོན་མཐའ་རུ་ཕྱིན་ཏེ་རེ་ཞིག་ཞི་བར་གཤེགས་པའི་ཚུལ་བསྟན་ཏོ། །

གདན་རབས་བཅུ་པ། མཁན་ཆེན་པདྨ་བཛྲ་གྱི་ཡང་སྲིད་མཁན་སྤྲུལ་བདེ་མཆོག་རྡོ་རྗེ་ནི།

སྤྱི་ལོ་༡༨༩༨པ་རབ་བྱུང་བཅོ་ལྔ་པའི་ས་ཁྱི་ལོར་བོད་དབུས་གཙང་བྱང་ཁུལ་ནག་ཆུ་ལྷ་རུ་སྒང་དུ། གླིང་དཔའ་ལ་མི་སྤྱང་དཀར་པོའི་རིགས་རྒྱུད་དུ་གྲགས་པ་ལྷ་བླའི་གདུང་རིགས་བར་མ་ཆད་པ་བྱོན་པའི་སྔགས་བཙུན་ཞིག་གི་སྲས་སུ་སྐུ་བལྟམས། རྫོགས་ཆེན་ལྔ་པ་ཐུབ་བསྟན་ཆོས་ཀྱི་རྡོ་རྗེ་མཆོག་ཡུལ་དབུས་ལྷ་ལྡན་དུ་ཆིབས་བསྐྱོད་གནང་བཞིན་པའི་ལམ་བར་ནས་སྒྲིབ་བྲལ་ཡེ་ཤེས་ཀྱི་གཟིགས་པས་གློ་བུར་དུ་མཁྱེན་པའི་ཚུལ་གྱིས། བདག་གི་བླ་མའི་ཡང་སྲིད་གནས་འདིར་འཁྲུངས་འདུག་ཅེས་རྗེ་ཉིད་ཀྱིས་ལམ་ཁྲིད་མཛད་དེ་འབྲོག་ཁྱིམ་ཞིག་ཏུ་ཕེབས། ཁྱིམ་དེར་བཙས་ནས་རིང་པོར་མ་ལོན་པའི་བྱིས་པ་ལ་མགུལ་དར་བསྒྲོན་ཏེ་མཁན་ཆེན་པདྨ་བཛྲ་གྱི་ཡང་སྲིད་སྐུ་ཕྲེང་གཉིས་པར་ངོས་འཛིན་སྐུ་བདག་མཛད། གྲུབ་དབང་ཉིད་རིམ་པར་དབུས་ཕྱོགས་སུ་ཆིབས་ཞལ་བསྒྱུར་ཅིང་སྤྲུལ་བའི་སྐུ་ཡབ་ཡུམ་དང་ཞབས་འབྲང་པ་འགའ་ཞིག་བཅས་མྱུར་བར་རྫོགས་ཆེན་གདན་སར་ཕེབས་དགོས་པའི་གསུང་བཀོད་དང་བཅས་ཕྱིར་བརྫངས། རིང་མིན་རྗེ་ཉིད་དབུས་ཕྱོགས་ནས་གདན་སར་ཞབས་སོར་འཁོད་པ་དང་རིགས་བདག་བླ་མ་རྣམ་གཉིས་ཀྱི་རྣམ་རོལ་ཏེ། ཡང་སྲིད་འདི་ཉིད་དང་། འཇམ་དབྱངས་མཁྱེན་བརྩེའི་ཐུགས་སྤྲུལ་གུར་དགའ་ཟུང་གསེར་ཁྲིར་མངའ་གསོལ་ནས་རྫོགས་ཆེན་བླ་བྲང་རང་དུ་རྒྱུད་འཛིན་པར་སྐུ་བདག་མཛད། དབུ་སྐྲ་གཙུག་ཕུད་བཞེས་པའི་མཚན་ལ་བདེ་མཆོག་རྡོ་རྗེ་ཞེས་གསོལ། སྡོམ་བརྩོན་དཀོན་མཆོག་གྲགས་པ་ལས་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས་ནས་སོ་ཐར་འདུལ་བའི་སྡོམ་རྒྱུན་ཕྱོགས་དང་ཕྱོགས་སུ་སྤེལ་ཞིང་བཙུན་པའི་ཚད་དུ་གྲགས། སྐྱབས་རྗེ་གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེ་མཆོག་གི་ཞལ་སྔ་ནས་སྔ་འགྱུར་བཀའ་གཏེར་གྱི་དབང་ཁྲིད་མན་ངག་གི་རྒྱུན་གང་བཞུགས་ཐམས་ཅད་མ་ཚང་བ་མེད་པ་གསན་ནས་ཐུགས་ཉམས་སུ་བཞེས། ཕུར་ཚའི་མཁན་པོ་ཨ་དཀོན་དང་། འཇམ་མགོན་མི་ཕམ། མཁན་ཆེན་གཞན་དགའ་སོགས་ཡོངས་འཛིན་དུ་མའི་ཞབས་པད་བསྟེན་ཏེ་མདོ་སྔགས་རིག་གནས་དང་བཅས་པར་གསན་བསམ་མཐར་ཕྱིན་མཛད་པས་མཁན་སྤྲུལ་བདེ་མཆོག་རྡོ་རྗེ་ཞེས་མཚན་དུ་གྲགས་པ་བྱུང་ཞིང་། ཕྱིས་སུ་གཞུང་ལུགས་ཆེན་མོ་ཁག་ལ་འཆད་ཁྲིད་དང་ཚིག་དོན་རྨད་དུ་བྱུང་བའི་ལྗགས་རྩོམ་ཡང་གང་མང་གནང་། གྲུབ་དབང་ལྔ་པ་ཆེན་པོ་དང་བདེ་ཀོང་རྣམ་གཉིས་བཅས་རྣམ་པ་གསུམ་པོ་བླ་བྲང་གཅིག་ཏུ་མཉམ་བཞུགས་མཉམ་བྱོན་གྱིས་སྤྱི་དང་བྱེ་བྲག་གི་བསྟན་པ་མཐའ་རྒྱས་སུ་སྤེལ་བས། མཁན་སློབ་ཆོས་གསུམ་ཞལ་འཛོམས་ལྟ་བུའོ་ཞེས་ཕྱོགས་ཀུན་ཡོངས་སུ་གྲགས། རྗེ་འདི་དགུང་གྲངས་སོ་བརྒྱད་ནས། གྲུབ་དབང་ལྔ་པ་ཞིང་དུ་གཤེགས་པས་བསྟན་སྲིད་ཀྱི་ཐུགས་འགན་ལོ་གྲངས་བདུན་ལྷག་ལ་བཞེས་ཤིང་། དུས་དེར་ཚོགས་ཆེན་ལྷ་ཁང་སོགས་ལ་མེ་འཇིག་ཆེན་པོ་བྱུང་བ་ཐམས་ཅད་བསྐྱར་གསོ་སོར་ཆུད་མཛད་པ་དང་། ཁྲི་དར་རྒྱས་བྱམས་ཆེན་ཆོས་གླིང་སོགས་ཕྱོགས་ཀྱི་བུ་དགོན་ཁག་ལ་ཞབས་ཀྱིས་བཅགས་ཏེ་དབང་ཁྲིད་མན་ངག་གི་རྒྱུན་སྤེལ། དེ་ལྟར་བསྟན་འགྲོའི་ལེགས་མཛད་དར་རྒྱས་སུ་སྐྱོང་བཞིན་པའི་སྐབས། ནག་པོའི་རྩ་ལག་སྟོབས་སུ་བདོ་བའི་ཕྲག་དོག་ངན་སྦྱོར་གྱི་བར་ཆད་ཀྱིས་སྐུ་ཚེ་མཐར་མ་ཕྱིན་པར་རབ་བྱུང་བཅོ་ལྔ་པའི་ལྕགས་འབྲུག་ལོར་ཞིང་དུ་གཤེགས་སོ། །རྗེ་འདི་དགོངས་པ་རྫོགས་ནས་སྐུ་རབས་དྲུག་པ་འཇིགས་བྲལ་བྱང་ཆུབ་རྡོ་རྗེ་གསེར་ཁྲིར་མ་འཁོད་ཀྱི་བར་གྱི་དུས་མཚམས་འདིར་ཕྱག་མཛོད་བཟོད་པ་མཆོག་ནས་བསྟན་སྲིད་ལ་ཞབས་འདེགས་ཟླ་མེད་མཛད་པ་ཙམ་ལས་གདན་ཚབ་སྐྱེས་ཆེན་གཞན་སུའང་མ་བྱུང་བར་མངོན་ནོ། །

གདན་རབས་བཅུ་གཅིག་པ། གྲུབ་དབང་སྐུ་རབས་དྲུག་པ་ཨོ་རྒྱན་འཇིགས་བྲལ་བྱང་ཆུབ་རྡོ་རྗེ་ནི།

རྫོགས་ཆེན་སྐུ་རབས་དྲུག་པ་ཨོ་རྒྱན་འཇིགས་བྲལ་བྱང་ཆུབ་རྡོ་རྗེ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་ཉིད་ནི། ལྷོ་ཕྱོགས་དཔལ་གྱི་ཙཱ་རི་ཏྲ་དཔའ་བོ་དང་མཁའ་འགྲོ་རང་བཞིན་གྱིས་འདུ་བའི་གནས་མཆོག་ཏུ། རྗེ་གོང་མའི་ལུང་བསྟན་ལས། ཁྱད་པར་གནས་མཆོག་དཔལ་གྱི་བསམ་ཡས་ཀྱི། །བྱང་ནས་བྱང་དུ་བསྙེགས་པའི་གྲོང་ཁྱེར་དུ། །ཐབས་ཤེས་ཨི་ཨུར་ཞུགས་པའི་མིང་ཡིག་དང་། །པུནྱ་དྷེ་ཝ་ཞེས་གྲགས་གཙང་མའི་རིགས། །ཞུགས་དང་བལྟམས་པའི་མཚན་ལྟས་གསར་དུ་ངོམས། །སྐྱེ་ཀུན་འབྲེལ་བའི་ལྷ་མཆོག་དྲེགས་པའི་རྗེ། །མཐུ་ཆེན་སྲུང་མའི་དབང་པོ་སྡེ་བཞི་ཡི། །མི་འདའ་རྡོ་རྗེ་ཐ་ཚིག་གཉན་པོ་ཡིས། །མི་རིང་གདན་ས་འཛིན་པའི་དཔལ་དུ་ཤར། །ཞེས་དང་། རྫོགས་ཆེན་སྤྲུལ་སྐུ་དྲི་མེད་སོགས་དམ་པ་དུ་མའི་བསླུ་མེད་རྡོ་རྗེའི་ལུང་བྱང་མང་པོ་ནས་དགོངས་པ་གཅིག་དང་དབྱངས་གཅིག་གིས་བསྔགས་པ་ལྟར། ཡབ་གྲུབ་དབང་གོང་མའི་ཐུགས་སྲས་མཁས་ཤིང་གྲུབ་པ་བརྙེས་པའི་རིག་སྔགས་འཆང་ཆེན་པོ་ཨ་གྲོ་ངག་དབང་ནོར་བུ་དང་། ཡུམ་མཁའ་འགྲོའི་མཚན་ལྡན་དཔལ་གྱི་ཙཱ་རི་ཏྲ་པ་ཚེ་རིང་ཆོས་སྒྲོན་གྱི་རིགས་སྲས་སུ་ངོ་མཚར་བའི་ལྟས་བཟང་དུ་མ་དང་བཅས་སྐུ་འཁྲུངས། མི་འཇིགས་གདོང་ལྔས་བཏེགས་པའི་གསེར་ཁྲི་ལ་མངའ་གསོལ། སྐུ་བྱིས་པའི་དུས་ནས་མཁྱེན་རབ་དང་རྣམ་དཔྱོད་འགྲན་ཟླ་བྲལ་བས་འབྲི་ཀློག་སོགས་བརྡ་དང་རྟགས་ཙམ་གྱིས་མཁྱེན་ཞིང་། ཡོངས་འཛིན་མཁན་ཆེན་པདྨ་ཚེ་དབང་ཆེད་དུ་བསྐོས་པ་ལས་བཅུ་ཕྲག་རིག་པའི་གནས་ཡན་ལག་དང་བཅས་པ་དུས་ཡུན་རིང་པོའི་ངལ་བ་ལ་མ་ལྟོས་པར་དགོངས་དབྱིངས་སུ་ཆུབ་པ་བྱུང་། སྐུ་ནར་ཅུང་ཟད་སོན་སྐབས་ངེས་པ་དོན་གྱི་རྡོ་རྗེ་འཆང་ཆེན་པོ་འཇིགས་མེད་རྟ་མགྲིན་མགོན་པོ་དུས་ཀུན་འབྲལ་བ་མེད་པར་ཡོངས་འཛིན་དུ་བཞུགས་པའི་ཞལ་སྔ་ནས་སྔོན་འགྲོ་ཀུན་བཟང་བླ་མའི་ཞལ་ལུང་དང་། ཀློང་ཆེན་མཛོད་བདུན། སྙིང་ཐིག་ཡ་བཞི་སོགས་མན་ངག་ཟབ་ཁྲིད་ཀྱི་སྐོར་གསན་བཞེས་མཛད་དེ་ཉམས་རྟོགས་ཚད་དུ་འཁྱོལ། དགུང་ལོ་བརྒྱད་པར་དམ་ཆོས་འདུལ་བ་ལས་རབ་ཏུ་བྱུང་ནས་ཐོག་མར་དགེ་འདུན་འདུས་པ་སྟོང་ཕྲག་མང་པོ་འཚོགས་པའི་བུམ་སྒྲུབ་ཆེན་མོའི་དབུ་བཞུགས་མཛད་དེ་གནས་དུས་སྟོན་འཁོར་ཕུན་སུམ་ཚོགས་ཤིང་། དགུན་གྲང་བའི་སྒང་ཡིན་ཡང་དབྱར་གྱི་རྔའི་སྒྲ་ལྡིར་ཞིང་ཨུག་ཆོས་མེ་ཏོག་བཞད་པ་སོགས་ལྷར་བཅས་ཆེ་དགུའི་གཙུག་གིས་བཏུད་པའི་ངོ་མཚར་བའི་ལྟས་དུ་མ་དང་བཅས་མཆོག་གི་རྡོ་རྗེ་སློབ་དཔོན་དུ་ཁྲིར་ཕེབས། རྡོ་རྗེ་ཐེག་པ་རང་གཞུང་ནས་ཇི་ལྟར་འབྱུང་བ་བཞིན་དེ་ཉིད་བཅུ་དང་རང་བཞིན་བརྒྱད་སོགས་ཡོན་ཏན་དང་མཚན་ཉིད་ཐམས་ཅད་མ་ཚང་བ་མེད་པས་སྐལ་ལྡན་ལས་ཅན་འདུས་པ་དང་པོའི་འཁོར་གྱི་གདུལ་བྱ་རྣམས་སྨིན་གྲོལ་གྱི་ལམ་ལ་བཀོད། དགུང་ལོ་བཅུ་ནས་འཇམ་མགོན་ཆོས་ཀྱི་བློ་གྲོས་རིགས་ཀྱི་བདག་པོར་བཀུར་ཞིང་རྫོང་སར་དུ་སྔ་རྗེས་ཐེངས་བཞིར་ཕེབས་ནས་རྒྱུད་སྡེ་ཕྱི་ནང་དང་སྔ་འགྱུར་བཀའ་གཏེར་གྱི་སྨིན་དབང་མ་ཚང་པ་མེད་པ་གསན། ཉི་སྤྲུལ་དྲུག་པ་ཐུབ་བསྟན་འོད་གསལ་བསྟན་པའི་ཉི་མ་ལས་ཉི་གྲགས་གཏེར་ཆོས་ཆ་ཚང་བ། རྫོགས་ཆེན་གླིང་རྒན་རིན་པོ་ཆེ་ཐུབ་བསྟན་བཤད་སྒྲུབ་ཕྲིན་ལས་རྒྱ་མཚོ་ལས་གྲུབ་དབང་གོང་མ་ཐུབ་བསྟན་ཆོས་ཀྱི་རྡོ་རྗེ་ལས་བརྒྱུད་པའི་རིན་ཆེན་གཏེར་མཛོད་ཆེན་མོའི་སྨིན་དབང་། གཞན་ཡང་མཁན་ཆེན་པདྨ་ཐེག་མཆོག་བློ་ལྡན། འཁྲུལ་ཞིག་ཀུན་དགའ་དཔལ་ལྡན། རྒྱ་རོང་ནམ་སྤྲུལ། མཁན་ཟུར་ཐུབ་བསྟན་སྙན་གྲགས། མཁན་ཟུར་པདྨ་ཚེ་དབང་། རྫ་ལྕང་མའི་མཁན་པོ་ཐུབ་དགའ། མུ་ར་པདྨ་ནོར་བུ། དགེ་བའི་བཤེས་གཉེན་ཚུལ་ཁྲིམས་བློ་གྲོས། ཡབ་རྗེ་ངག་དབང་ནོར་བུ། འབྲི་གུང་གཏེར་ཆེན་སོགས་དམ་པ་དུ་མའི་ཞབས་པད་མཉེས་པ་གསུམ་གྱིས་བསྙེན་ནས་གསར་རྙིང་རིས་སུ་མ་ཆད་པའི་ཆོས་བཀའ་རྒྱ་མཚོའི་སྨིན་གྲོལ་རྒྱབ་བརྟེན་དང་བཅས་པ་བུམ་པ་གང་བྱོའི་ཚུལ་དུ་ཐུགས་ཉམས་སུ་བཞེས། ཡི་དམ་སོ་སོའི་བསྙེན་སྒྲུབ་མཐར་ཆགས་སུ་མཛད་པས་སྒྲུབ་རྟགས་མངོན་དུ་གྱུར། སྒོམ་དོན་གྱི་ཡེ་ཤེས་མངོན་དུ་གྱུར་པས་གདུལ་བྱ་ཐུན་མོང་གི་སྣང་ངོར་རྡོ་ལ་ཞབས་རྗེས་བཞག་པ་དང་། ན་བཟའི་དུམ་བུ་ཙམ་གྱིས་ཀྱང་ནད་མཚོན་གྱི་འཇིག་པ་འགོག་པ། གཞན་སྣང་དབང་དུ་བསྡུ་བའི་ཏིང་འཛིན་གྱིས་སྡེ་བརྒྱད་ལས་ལ་འདུ་བས་ཅི་བཅོལ་གྱི་ཕྲིན་ལས་སྒྲུབ་པ་སོགས་ཐུན་མོང་དང་ཐུན་མོང་མ་ཡིན་པའི་མཛད་པ་ངོ་མཚར་བ་བསམ་གྱིས་མི་ཁྱབ། དགུང་ལོ་བཅུ་བདུན་ནས་བསྟན་སྲིད་ཀྱི་ཐུགས་འགན་བཞེས་ཏེ་རླབས་ཆེན་རྟེན་བཞེངས་ཀྱི་མཛད་པའི་དབུ་བརྩམས། ཆོས་ཁྲིམས་དར་གྱི་མདུད་པ་སྡོམ་གསུམ་གནང་བཀག་གི་བཅའ་ཁྲིམས་ལ་གཞི་བཟུང་བ་སོགས་མཛད་ཕྲིན་ནམ་མཁའི་ཕྱོགས་མཐར་བརྡལ་བས་གྲུབ་དབང་རྫོགས་ཆེན་པའི་ཆོས་བརྒྱུད་འཛིན་པའི་བུ་དགོན་སུམ་བརྒྱར་ཉེ་བ་སྤེལ། དགུང་ལོ་ཉི་ཤུ་པར་དབུས་སུ་ཕེབས་ནས་ཇོ་ཤཱཀ་རྣམ་གཉིས་ཀྱིས་གཙོས་པའི་སྐུ་གསུང་ཐུགས་རྟེན་དང་། ལྷ་ཁང་། དགོན་སྡེ། སྒྲུབ་གནས། མཐའ་འདུལ་ཡང་འདུལ་རུ་གནོན་གྱི་གཙུག་ལག་ཁང་ལ་སོགས་པར་མཆོད་འབུལ་བརྟན་བཞུགས་དང་འབྲེལ་ཐུབ་བསྟན་དར་ཞིང་རྒྱལ་ཁམས་བདེ་བའི་ཐུགས་སྨོན་མཛད། གོང་ས་ཐམས་ཅད་མཁྱེན་པ་རྒྱལ་མཆོག་བཅུ་བཞི་པ་མཆོག་ནས་མ་ཧཱ་པཎྜི་ཏ་ཨེར་ཏི་ནི་ཧོ་ཐོག་ཐུ་ཞེས་པའི་མཚན་གནས་ཀྱི་ཅོད་པཎ་གསོལ་ཏེ་ཆེན་པོར་འོས་པའི་ཡོ་བྱད་སྣ་ཚོགས་པས་ཆོས་སྲིད་ཀྱི་ཁྲི་འཕང་མཐོན་པོར་གཟེངས་སུ་བསྟོད་པ་བདག་གིར་བཞེས། འདིའི་དུས་ཆོལ་གསུམ་བོད་ཁམས་ཀྱི་དགོན་ཡུལ་བསྟན་འཛིན་ཕལ་མོ་ཆེ་ཞལ་ཕྱི་གླིང་དུ་ཕྱོགས་པའི་སྒང་ཡིན་ཡང་རྒྱལ་དང་སེམས་དཔའི་མཛད་སྤྱོད་དགོས་པ་ཁྱད་པར་ཅན་གཞན་ལ་གཟིགས་ནས་སླར་གདན་ས་རང་དུ་ཆིབས་ཀྱི་ཁ་ལོ་བསྒྱུར། ཕེབས་ལམ་གྱི་གཙང་དབུས་ཁམས་གསུམ་གྱི་དགོན་ཁག་དང་ཆོས་སྡེ་ཚང་མར་སྐུ་འགྱེད་དང་། གསོལ་འདྲེན། རྟེན་བཞག་སོགས་གྱ་ནོམ་པའི་ལེགས་འབུལ་བསྟབས་པ་ལས་གཞན་སྨོན་ལམ་དང་ཐུགས་དམིགས་རྣམ་པར་དག་པས་ཕྱི་ཕྱག་མཛད། གདན་སར་ཞབས་སོར་བཀོད་ནས་སྔར་ཉམས་རྒུད་དུ་ཕྱིན་པའི་རྟེན་གསུམ་དང་དུས་མཆོད་བསྐྱར་གསོ་གནང་། དགུང་ལོ་ཉེར་གཅིག་པར་ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་ཞལ་སྔ་ནས་བསྙེན་པར་རྫོགས་ཏེ་ཕྱི་སོ་སོར་ཐར་པ་འདུལ་བ་རང་གཞུང་ལྟར་ཉེས་ལྟུང་གནང་བཀག་གི་གནས་ཕྲ་མོས་ཀྱང་མ་གོས་ཤིང་། ནང་བྱང་སེམས་རྒྱལ་སྲས་ཀྱི་སྤྱོད་པས་འགྲོ་བ་ཡོངས་ལ་མ་གཅིག་པུའི་བུ་ལྟར་ཐུགས་རྗེའི་འཇུག་པ་མི་འདོར་ཁར། གསང་བ་དམ་ཚིག་རྣམ་པར་དག་པས་རིམ་གཉིས་རྣལ་འབྱོར་གྱི་དབང་ཕྱུག་སྡེ་གསུམ་ཀློང་དགུའི་ཤིང་རྟ་ཆེན་པོར་གྲུབ་པའི་རྒྱལ་སར་གཤེགས། མདོར་ན་མཁས་བཙུན་བཟང་པོའི་ཡོན་ཏན་གྱིས་ལེགས་པར་ཕྱུག་ཅིང་བཤད་སྒྲུབ་ལས་གསུམ་གྱི་ཕྲིན་ལས་ནམ་མཁའི་མཐའ་དང་མཉམ་པས། དཀར་ནག་རྒྱ་ཡི་ཡུལ་གྲུ་བརྒལ་བའི་འཛམ་གླིང་ཤར་མཐའི་ས་ཆ་ཚུན་ལ་མཚན་སྙན་གྱི་གྲགས་པས་ཁྱབ་པར་གྱུར་ཏོ། །དེ་ལྟ་ན་ཡང་འབྱོར་བའི་མཐའ་མ་རྒུད་པ་དང་། འདུས་པའི་མཐའ་མ་འབྲལ་བ་སོགས་གཅིག་ཏུ་བརྟན་པ་མིན་པའི་འདུས་བྱས་ཀྱི་ཆོས་ལ་གདུལ་བྱ་མཐའ་དག་སྐྱོ་བ་བསྐུལ་བའི་དགོངས་བཞེས་སྙིང་པོར་བཟུང་སྟེ། དགུང་ལོ་ཉེར་བཞི་པར་གོང་དུ་སྨོས་པའི་བསྟན་པ་སྤྱི་དང་བྱེ་བྲག་གི་སྔ་ཕྱིའི་དོན་ཆེན་ལ་དགོངས་པའི་བསྟན་དགོན་ཉམས་པ་སླར་གསོ་སོགས་ཀྱི་ཕྱག་ལས་གང་འཚམས་གྲུབ་འཕྲོས་ཀྱི་བླ་བྲང་དཀོར་མཛོད་ཀྱི་ནོར་རྣམས་ཆ་བཞིར་བགོས་ཏེ། ཆ་གཅིག་རིས་མེད་རྒྱལ་བའི་བསྟན་པ་རིན་པོ་ཆེ་བཤད་སྒྲུབ་མདོ་སྔགས་ཀྱིས་འཛིན་སྲུང་སྤེལ་བར་བྱེད་པའི་བསྟི་གནས་གང་དུ་འཁོད་པའི་དགེ་འདུན་པ་རྣམས་ལ་བླ་ན་མེད་པའི་བཀུར་སྟིས་བསྙེན་བསྲིང་བའི་ཆ་རྐྱེན་དང་། རྒྱལ་བཀའ་རིན་པོ་ཆེ་དང་གཟུངས་སྔགས་ཁྱད་པར་ཅན་དག་ཉིན་ཞག་མང་པོར་ཐུན་སྦྲེལ་གྱིས་ཞལ་འདོན་དུ་བསྒྲགས་པའི་སྐུ་ཡོན་དུ་ཕུལ། ཆ་གཅིག་མར་མེ་འབུམ་ཕྲག་མང་པོ་གཙོ་བོར་བྱས་པའི་མཆོད་སྤྲིན་རབ་འབྱམས་སྤྲོས་པས་དཀོན་མཆོག་མཆོད་པ་དང་། གསོལ་འདེབས་བསམ་པ་ལྷུན་གྲུབ་དང་འབྲེལ་བའི་ཚོགས་ཀྱི་འཁོར་ལོ་འབུམ་ཕྲག་མང་པོས་ཉམས་ཆགས་བསྐང་ཞིང་སྡིག་སྒྲིབ་སྦྱོང་བའི་ཆོ་གའི་རིམ་པ་སོགས་རྒྱལ་ཁམས་བདེ་བའི་བསྟན་པ་སྤྱིའི་ཞབས་རིམ་སྒྲུབ་པའི་ཆེད་དུ་བཏང་། ཆ་གཅིག་ཆོས་སྡེ་ཆེན་པོ་དེ་ཉིད་ཀྱི་དགེ་འདུན་པར་སྐུ་འགྱེད་དང་། དབུལ་ཕོངས་དང་ནད་པ་མགོན་མེད་རྣམས་ལ་རྒུད་སྐྱོབ་ཏུ་བསྩལ་བས་གཏོང་བ་ཆེན་པོའི་མཆོད་སྦྱིན་གྱི་སྒོ་འཕར་རྒྱ་ཆེན་པོ་དབྱེ་བར་མཛད། ཆ་གཅིག་བཤད་སྒྲུབ་ཀྱི་གྲྭ་ཚང་ཁག་དང་། སྒྲུབ་པའི་མཆོད་ཁག་གི་གསོལ་ཕོགས་དང་མཆོད་རྫས་འཕར་མའི་རྟེན་རྩར་ཞལ་འདེབས་སུ་ཕུལ་ཞིང་། སླར་ཡང་སྐུ་རབས་དྲུག་རིང་གི་འཚོགས་འཛུགས་ཀྱི་རྟེན་རྩའི་ཟང་ཟིང་འབོར་ཆེན་དེ་དག་དགེ་འདུན་པ་ཡོངས་ལ་འོས་བསྟུན་གྱིས་ཕྱིར་བགོ་བཤའ་མཛད། སྔར་མཇལ་བར་དཀའ་བའི་རྟེན་གསུམ་དམ་བསྒྲགས་མ་ཀུན་ཀྱང་འདི་དུས་ཞལ་ཕྱེས་ཏེ་ཁྲོམ་དབང་དུ་བསྐུར། ཆོས་སྲིད་ཀྱི་བཀའ་འབངས་སུ་མཆིས་པའི་སེར་སྐྱ་མཆོག་དམན་ཕོ་མོ་རྒན་གཞོན་ཀུན་བསྡུས་ནས་ཚེ་འདི་དང་ཕྱི་མར་ཕན་པའི་ལུགས་གཉིས་ཀྱི་བསླབ་བྱ་དམ་ཆོས་ཀྱི་སྙིང་པོ་ཅན་དག་རྣ་བའི་བདུད་རྩིར་བསྩལ། གཞོན་པར་ཚེ་འགུག་དང་། རྒན་པར་འཕོ་བའི་གདམས་པ་ཕོག་སྟེ། ཐམས་ཅད་དཀྱིལ་འཁོར་གཅིག་ཏུ་ཚོགས་པའི་རྟེན་འབྱུང་གིས་ཕྱི་མར་ཚོམ་བུ་གཅིག་ཏུ་མཇལ་བའི་ཐུགས་སྨོན་མཛད། ལོ་དེའི་སྟོན་ཀར་ཆབ་སྲིད་སློབ་སྦྱོང་དུ་བསྙད་དེ་གྲུབ་དབང་མཆོག་གི་དབུས་བླ་སྤྲུལ་ཆེ་གྲས་དཔོན་འཁོར་རྣམས་སྡེ་དགེའི་རྫོང་མཁར་དུ་ཕེབས་ཞུས་ལྟར་ཟླ་བ་བཞི་ལྷག་ལ་བཞུགས། དེ་ནས་ཕྱིར་རྫོགས་ཆེན་དུ་སྐྱོན་འདོན་ངོས་ལེན་གྱི་ཆེད་དུ་ཕེབས་དགོས་པའི་བཀའ་བཀོད་བྱུང་། སྡེ་དགེ་ནས་ཞབས་བཏེགས་པའི་ནང་མོ་བླ་བྲང་གི་གཉེར་གཞོན་ཉེ་གནས་པ་བསོད་རྒྱལ་ལ་ཁྱོད་ཀྱིས་ཕྱིན་ཆད་སྤྲུལ་སྐུ་སྐལ་བཟང་འདི་བདག་སྐྱོང་ལེགས་པོ་བྱོས་དང་འུ་ཅག་མྱུར་དུ་འཕྲད་ཡོང་ཞེས་ཞལ་བགོས་ནན་མོ་མཛད། དེ་ལྟར་སྔོན་དང་ཕྱི་མའི་མཐའ་ལ་གཟིགས་པ་རྣམ་པར་དག་ཅིང་མ་འདྲེས་པའི་རྣམ་ཐར་རྒྱལ་བའི་སྲས་ཀྱི་དགོངས་སྤྱོད་རྨད་དུ་བྱུང་བ་དག་ལ་སྔར་ནས་གོམས་པའི་མཛད་པ་ཉི་མའི་ཟེར་བཞིན་འགག་མེད་རང་ཆས་སུ་གསལ་བཞིན། དགུང་ལོ་ཉེར་ལྔ་པ་རབ་རྒྱལ་ས་ཕག་ཧོར་ཟླ་དང་པོའི་ཚེས་གཅིག་གི་སྲོད་ལ་ཕྱི་རོལ་འགལ་རྐྱེན་གྱི་རྣམ་པར་བརྟེན་པའི་ཚུལ་གྱིས་སྐུ་དངོས་ཀྱིས་གདུལ་བར་བྱ་བའི་མཛད་པ་རེ་ཞིག་རྫོགས་ཏེ་གཟུགས་སྐུའི་བཀོད་པ་ཞི་བའི་དབྱིངས་སུ་བསྡུས། ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་དབུས་ཤུལ་ལུས་པ་སྐྱ་སེར་རྣམས་ཀྱིས་རྫ་ཉིན་ཁྲོམ་བཟའི་ས་ཆ་སྒོའི་བྲག་ལུང་མདོར་སྐུ་གདུང་རིན་པོ་ཆེ་ཞུགས་ལ་ཕུལ། དུས་དེར་ནམ་མཁའ་མཐིང་ཞུན་ལྟར་གཡའ་དག་པའི་ངོས་ཀུན་ཏུ་སྤྲིན་དཀར་གྱི་འཇའ་རིས་སྲབ་མོའི་སྐུ་གཟུགས་དང་ཕྱག་མཚན་བཀྲ་ལམ་མེ་མངོན་པ་དང་། ཨ་ཡིག་རང་བྱོན་དོད་པའི་དབུ་ཐོད་དང་ཐུགས་ལྗགས་སྤྱན་གསུམ་མེས་མ་རྨས་པར་བསོད་ནམས་ཀྱི་རྟེན་དུ་བསྩལ་ཅིང་། ཡུང་འབྲུ་ལྟ་བུའི་རིང་བསྲེལ་ཀྱང་མང་དུ་བྱོན་པ་བཅས་ཐ་མའི་མཛད་པ་མཐོང་ཞིང་ཐོས་པ་དག་ཀྱང་རྣམ་གྲོལ་ཞི་བའི་གོ་འཕང་ལ་དབུགས་འབྱིན་པའི་ས་བོན་ཐེབ་པར་མཛད། ཟླ་དེའི་ཚེས་བརྒྱད་ཉིན་གྱི་ནུབ་མོ་ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་འོད་གསལ་ཡེ་ཤེས་ཀྱི་སྣང་ཆར། རྗེ་སངས་རྒྱས་ཀུན་དངོས་རྡོ་རྗེ་འཆང༔ དྲིན་འཁོར་མེད་མཚོ་སྐྱེས་རྡོ་རྗེ་ལ༔ སྙིང་རུས་པའི་གཏིང་ནས་གསོལ་བ་འདེབས༔ བློ་བསམ་དོན་ཆོས་བཞིན་འགྲུབ་པར་ཤོག༔ ཤར་ཆུ་འཛིན་དཀར་པོའི་འོག་ཤེད་ན༔ སྙིང་དམར་པོའི་དྭངས་བཅུད་ཐིགས་པ་ཞིག༔ མིང་དྷྭ་ཛ་ཏཱ་རེའི་སྐྱེད་ཁྱིམ་དུ༔ ཡ་མཚན་གྱི་ཐིག་ལེར་སྨིན་པའི་ཚུལ༔ སེམས་དགའ་སྐྱོ་འདྲེས་པའི་སྣང་ཉམས་སུ༔ འལ་འོལ་གྱི་ཀུན་རྟོག་ཐོལ་ཐོལ་སྐྱེས༔ སྙིང་དམར་པོའི་བཅུད་དུ་རྒྱས་བཏབ་སྟེ༔ དུས་རེ་ཞིག་སྤིར་གྱི་ཁ་བཞིན་སྡོམས༔ ཞེས་པའི་ཡང་སྲིད་རིན་པོ་ཆེ་ངོས་འཛིན་གྱི་བརྡ་བྱང་ཕྱག་བྲིས་མཛད་དེ་རྗེ་ཉིད་ཀྱི་སྐུ་ཚ་བསོད་ནམས་སྟོབས་ལྡན་གྱི་ལག་ཏུ་གཏད་པར་མཛད་དོ། །

གདན་རབས་བཅུ་གཉིས་པ། སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་ནི།

དེ་ཡང་ཨོ་རྒྱན་སངས་རྒྱས་གཉིས་པ་མཚོར་འཁྲུངས་པདྨ་ཀ་ར་ངུར་སྨྲིག་འཛིན་པ་དགེ་སྦྱོང་གི་རྣམ་རོལ་ཏུ་བྱོན་པར་ཚད་མའི་ལུང་གིས་བསྔགས་ཤིང་། དུས་འདིར་གྲུབ་དབང་རྫོགས་ཆེན་པའི་བསྟན་པ་གཞིར་བཞེངས་སུ་སློང་བ་ལ་ཐུགས་བསྐྱེད་དམ་བཅའི་མཐུ་གྲུབ་པའི་ཕྲིན་ལས་དུས་བབ་ཀྱི་སྐྱེས་བུ་ཆེན་པོ། བདག་ཅག་གི་སྐྱབས་གཅིག་མཚུངས་མེད་སྨིན་གྲོལ་འཁོར་ལོའི་མགོན་པོ་དོན་གྱི་སླད་དུ་མཚན་ནས་སྨོས་ན་ཐུབ་བསྟན་ལུང་རྟོགས་བསྟན་པའི་རྒྱལ་མཚན་དཔལ་བཟང་པོའམ་ཆོས་རྗེ་པདྨ་སྐལ་བཟང་རིན་པོ་ཆེ་མཆོག་ནི། བསིལ་ལྡན་གངས་རིའི་ཕྲེང་བས་ཡོངས་སུ་བསྐོར་བའི་བོད་ཆེན་པོའི་ལྗོངས་ཀྱི་བྱེ་བྲག་མདོ་ཁམས་སྒང་དྲུག་ལས། འབྲི་རྫ་ཟལ་མོ་སྒང་གི་ཆར་གཏོགས་པ་ལྷ་གཉན་ཆེན་པོ་རྫ་རྒྱལ་རྡོ་རྗེ་འཕན་ཕྱུག་རྩལ་གྱིས་བདག་ཏུ་བཟུང་ཞིང་རྫ་ཆབ་གཡུ་འབྲུག་སྔོན་མོ་ཤར་ཕྱོགས་སུ་དལ་གྱིས་འབབ་པའི་སྟོད་རྒྱུད། སེམས་དཔའ་ཆེན་པོ་དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། མཁས་པའི་ཁྱུ་མཆོག་འཇམ་མགོན་མི་ཕམ་རྣམ་རྒྱལ་སོགས་མཁས་དང་གྲུབ་པའི་སྐྱེས་མཆོག་བརྒྱུད་མར་བྱོན་ནས་བྱིན་གྱིས་བརླབས་པའི་གནས་བྱང་སྡེ་རྫ་ཆུ་ཁའི་ཡུལ་གྲུ་ལས་དགེ་རྩེ་འགབ་མར་གྲགས་པའི་སའི་ཆ། འབྲོག་ཐང་མེ་ཏོག་གི་དོ་ར་ཉམས་དགའ་བ་ཉི་མའི་གདན་ཐོག་ཏུ་འབོད་པའི་ནོར་འཛིན་གྱི་ཐིག་ལེ་ཡངས་པ་རུ། ཡབ་དཔའ་བོའི་རིགས་རྒྱུད་མ་ཆད་ཅིང་ཕོ་རྩལ་སྣ་དགུ་ལ་བྱང་ཆུབ་པ་ཧོར་ཤུལ་འཇིགས་མེད་དོན་གྲུབ་དང་། ཡུམ་གྲུབ་པའི་རིག་འཛིན་རྫོགས་ཆེན་ཨ་གྲོ་བསོད་ཆོས་ཀྱི་སྲས་མོ་ནོར་གཡང་ཞེས་པ་ལྗགས་ལ་ཨ་ཡིག་རང་བྱོན་ཡོད་པའི་མཁའ་འགྲོའི་མཚན་ལྡན་དེ་ཉིད་ཀྱི་རིགས་སྲས་སུ། བོད་རབ་བྱུང་བཅུ་དྲུག་པའི་ཉི་མ་ཞེས་པ་ཆུ་ལུགས་ཏེ་སྤྱི་ལོ་༡༩༤༣ལོའི་ཟླ་བ་༦པའི་ཚེས་༦ཉིན་ཆབ་ཟངས་འོ་མར་འགྱུར་པ་དང་། བདུད་རྩིའི་སྦྲང་ཆར་སིབ་སིབ་ཏུ་བབ་ཅིང་འཇའ་འོད་ཀྱི་གུར་ཁང་ཕུབ་པ་དང་བཅས་སྐུ་བལྟམས། ཐོག་མར་ལྷུམས་སུ་ཞུགས་པའི་ཚེ་ནའང་སྲུ་མོའི་རྨི་ལམ་དུ་ཤེལ་དཀར་གྱི་མཆོད་རྟེན་འོད་ཟེར་འཕྲོ་བ་ཞིག་སྦྲ་ཐོག་ཏུ་བབ་པ་དང་། ཁོར་ཡུག་ཀུན་ཏུ་སྔར་དུས་མཐོང་མྱོང་མེད་པའི་མེ་ཏོག་གི་ཚོམ་བུ་བཞད་པ་སོགས་དགེ་བའི་མཚན་མ་སྣ་ཚོགས་མངོན་པར་ཤར་ཞེས་ཡུལ་དེར་ཡོངས་སུ་གྲགས། སྐུ་ཞང་མུ་ར་སྤྲུལ་སྐུ་པདྨ་ནོར་བུ་མཆོག་ནས་པདྨ་སྐལ་བཟང་ཞེས་མཚན་གསོལ། དགུང་གྲངས་ལྔ་ལ་སོན་སྐབས་སྐུ་གོང་མ་བདེ་མཆོག་རྡོ་རྗེ་དང་བླ་བྲང་གཅིག་ཏུ་བཞུགས་ཤིང་ཐུགས་ནང་ཤིན་ཏུ་མཐུན་པའི་རྫོགས་ཆེན་ཀོང་སྤྲུལ་རིན་པོ་ཆེ་རྫ་ཆུ་ཁར་ཆིབས་བསྐྱོད་གནང་བ་ཧོར་ཤུལ་དཔོན་ཚང་དུ་ཁྱིམ་ཕེབས་མཛད། དེ་དུས་ཆུང་སྲིད་རིན་པོ་ཆེ་ནས་ཀོང་སྤྲུལ་རིན་པོ་ཆེའི་ཞལ་རས་མཇལ་མ་ཐག་སྔར་འདྲིས་ཀྱི་གྲོགས་པོ་ལྟར་སྤྲོ་འཛུམ་དང་བཅས་སྐུ་པང་དུ་བཞུགས་པ་དང་། ཁྱད་པར་གོང་མའི་ཕྱག་ཤན་ཀོང་སྤྲུལ་རིན་པོ་ཆེའི་སྐུ་སྐེད་དུ་དཔྱངས་པ་ངའི་རེད་ཅེས་ངོས་འཛིན་མཛད་པས་དེར་ཡོད་དཔོན་སློབ་ཀུན་ཡ་མཚན་པའི་ངང་ཡང་སྲིད་འཁྲུལ་མེད་དུ་ངེས་ཤེས་རྙེད། དེ་ནས་རིང་པོ་མ་ལོན་པར་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་དང་། རྫོགས་ཆེན་ཡིད་བཞིན་ནོར་བུ་འཇིགས་བྲལ་བྱང་ཆུབ་རྡོ་རྗེ། སྤྲུལ་སྐུ་དྲི་མེད་སོགས་ཡེ་ཤེས་ཀྱི་གཟིགས་པ་མངའ་བའི་ཚད་མའི་སྐྱེས་ཆེན་རྣམས་ཀྱི་རྡོ་རྗེའི་བརྟག་ལུང་ལས་བསྟན་པའི་ཡབ་ཡུམ་དང་འཁྲུངས་ཡུལ་གྱི་མཚན་སྒྲ་སོགས་གཅིག་མཐུན་བྱུང་བ་བཞིན་གསང་ཆེན་རྒྱུད་སྡེའི་མངའ་བདག་མཁན་ཆེན་པདྨ་བཛྲ་རྩལ་གྱི་ཡང་སྲིད་གསུམ་པར་ངོས་འཛིན་གནང་བ་དང་། རྫོགས་ཆེན་བོད་པ་སྤྲུལ་སྐུ་རྫ་ཆུ་ཁར་ཆེད་ཕེབས་མཛད་ནས་ངུར་སྨྲིག་གི་ན་བཟའ་ཐོག་མར་གསོལ་ཏེ་སྐུ་བདག་མཛད། དགུང་ལོ་བདུན་ནས་རྫ་སྟོད་ལྕང་མའི་ཆོས་སྒར་དུ་རྫོགས་ཆེན་མཁན་པོ་ཆོས་འབྱོར་ཀློག་གི་སློབ་དཔོན་དུ་བསྟེན་ནས་ཡིག་རྩིས་ལ་བསླབ་སྦྱང་མཛད་ཚེ་སྐྱེས་ཐོབ་ཀྱི་ཤེས་རབ་ཟླ་དང་བྲལ་བས་ཚེགས་ལ་མ་ལྟོས་པར་མཁྱེན་ཅིང་ཆུབ་པ་བྱུང་། དགུང་གྲངས་བཅུ་ལ་སོན་སྐབས་སྐུ་ཞང་རྫ་མུ་ར་སྤྲུལ་སྐུ་པདྨ་ནོར་བུས་དབུས་ཡབ་ཡུམ་དཔོན་འཁོར་ཉི་ཤུ་ལྷག་དང་བཅས། གསང་ཆེན་སྔ་འགྱུར་རྙིང་མའི་གདན་ས་ཆེན་མོ་དྲུག་གི་ཡ་གྱལ་རྫོགས་ཆེན་ཨོ་རྒྱན་བསམ་གཏན་ཆོས་གླིང་དུ་ཆིབས་ཞལ་ཕྱོགས་ཤིང་། དུས་དེར་གདན་ས་ཆེན་མོ་ནས་རྟ་ལམ་ཉི་མ་ལྔའི་རིང་ཕེབས་བསུ་རིང་ཐུང་གསུམ་གྱི་བླ་གྲྭ་སེར་སྐྱ་སྟོང་ཕྲག་འགའ་ཡིས་བསུ་མ་དང་། དར་གདུག་རྒྱལ་མཚན་ཐོགས་པའི་སེར་ཕྲེང་གཟབ་རྒྱས་ཀྱིས་མདུན་བསུས་ཏེ་ཕོ་བྲང་ཁམས་གསུམ་ཟིལ་གནོན་གྱི་ཡང་ཐོག་གཟིམ་སྤྱིལ་འཆི་མེད་གྲུབ་པའི་དགའ་ཚལ་གྱི་ཚོམས་ཆེན་དུ་སྤྱན་དྲངས། བདེ་གཤེགས་རིན་ཆེན་གཙུག་ཏོར་ཅན་གྱི་རྣམ་རོལ་འཇིགས་བྲལ་བྱང་ཆུབ་རྡོ་རྗེ་དང་། ལྕེ་བཙུན་སེངྒེ་དབང་ཕྱུག་དང་ཀུན་མཁྱེན་འཇིགས་མེད་གླིང་པ་ཟུང་དུ་འཇུག་པའི་རྣམ་རོལ་མཁན་ཆེན་འཇིགས་མེད་ཡོན་ཏན་མགོན་པོ་རྣམ་གཉིས་ཀྱིས་དབུས་མཁན་སྤྲུལ་འདུས་པ་ཡོངས་ཀྱིས་མི་འཇིགས་གསེར་གྱི་ཁྲི་འཕང་མཐོན་པོར་མངའ་གསོལ། འཇིགས་བྲལ་བྱང་ཆུབ་རྡོ་རྗེ་དང་ཀོང་སྤྲུལ་རིན་པོ་ཆེ་རྣམ་གཉིས་ཀྱིས་གཙུག་ཕུད་བཞེས་ནས་རྫོགས་ཆེན་བླ་བྲང་དུ་སྐུ་བདག་མཛད། ཉིན་དེར་ཉི་ཟླ་སྐར་གསུམ་དུས་གཅིག་ལ་ཤར་བ་དེར་འདུས་ལྷ་མིའི་ཁྲོམ་ཚོགས་ཀུན་ཀྱིས་གསལ་བར་མཐོང་བས་དགེ་ལེགས་བཀྲ་ཤིས་ཀྱི་མཚན་མ་བཟང་པོས་ཟླ་མེད་མཛད་ཕྲིན་གྱི་སྒོ་མོ་ཡངས་པར་ཕྱེས་སོ་ཞེས་ཕྱོགས་ཀུན་ཏུ་ཐམས་ཅད་གླེང་། གདན་སར་ཕེབས་པའི་ཉིན་འགའི་རྗེས་སྐུ་ཞང་མུ་ར་རིན་པོ་ཆེ་ནས་ཆོས་རྗེ་དཔལ་སྤྲུལ་རིན་པོ་ཆེའི་དོན་གྱི་རྒྱལ་ཚབ་མཁན་པོ་ལྷ་སྒང་ངམ་པདྨ་ཐེག་མཆོག་བློ་ལྡན་ཞེས་སྐུ་ཚེ་གང་པོར་རུ་དམ་གཤིན་རྗེ་སྒྲུབ་ཕུག་ཏུ་རྫོགས་པ་ཆེན་པོ་ཉམས་བཞེས་མཛད་དེ་ཆོས་ཉིད་ཟད་པའི་སར་ཕྱིན་པ་གང་དེའི་མདུན་དྲུང་དུ་ཁྲིད། རྗེ་འདིས་ཐུགས་ཤིན་ཏུ་དགྱེས་ཉམས་ཆེན་པོས་བདག་གི་བླ་མའི་ཐུགས་བསྐྱེད་འགྲོ་དོན་བར་ཆད་ཀྱིས་མཐར་ཕྱིན་པ་མ་བྱུང་ཡང་། ད་རེས་ཡང་སྲིད་འདི་གྲུབ་དབང་རྫོགས་ཆེན་པའི་བསྟན་པར་ཕན་ཐོགས་ཅན་ཞིག་འོང་བར་ངེས་ཞེས་ཕྱི་མཐར་གཟིགས་པའི་གསུང་འཕྲོས་དང་། རྗེ་ཉིད་སྐུ་ན་ཆེས་སྨིན་པས་སྤྱན་གྱིས་མི་གཟིགས་སྟབས་དཔལ་སྤྲུལ་རིན་པོ་ཆེའི་ཞལ་གསུང་མ་བསྐལ་མང་གོང་ནས་གཡོ་སྒྱུ་སྤངས་བའི་ཐུགས་ཅེས་སོགས་ཀྱི་ཚིགས་སུ་བཅད་པ་ཐུགས་ཐོག་ནས་གསུངས་ཏེ་རྗེས་སུ་འོང་དུས་བློ་རྒྱུགས་འབུལ་དགོས་ཞེས་ཞལ་རྩེད་དང་། ཚིག་གསུམ་གནད་རྡེག་རྩ་བའི་སྟེང་ནས་རྒྱས་ཁྲིད་མཛད་དེ་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་སྙིང་དོན་འདིར་མ་འདུས་པ་མེད་ཅེས་ཆིག་བརྒྱུད་དུ་བསྩལ། ཕྱིས་སྐུ་འདའ་ཁར་ཡང་རྗེ་ཉིད་ཀྱི་མཛོད་བདུན་ཕྱག་དཔེ་ཆ་ཚང་བ་པད་རྡོའི་སྤྲུལ་སྐུ་ལ་ཕུལ་ཞེས་ཉེ་གནས་ལ་ཞལ་ཆེམས་གནང་པ་སོགས་ཐུགས་བརྒྱུད་དགོངས་གཏད་མཛད། དེ་ནས་རྫོགས་ཆེན་ཡིད་བཞིན་ནོར་བུ་འཇིགས་བྲལ་བྱང་ཆུབ་རྡོ་རྗེ་དང་གཟིམས་ཁང་གཅིག་ཏུ་ལོ་གྲངས་དུ་མར་མཉམ་དུ་བཞུགས་ནས་ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོ་ཐུན་མིན་རིགས་བདག་ཏུ་བསྟེན་ཏེ་གསན་སྦྱང་རྒྱ་ཆེར་གནང་བ་སྟེ། གདོད་མའི་མགོན་པོ་མིའི་རྣམ་རོལ་ཏུ་བྱོན་པ་འདི་ཉིད་ཀྱི་ཞལ་སྔ་ནས་སྙིང་ཐིག་ཡ་བཞིའི་དབང་ཁྲིད་དང་། ཆོས་དབྱིངས་མཛོད། གནས་ལུགས་མཛོད། ཡིད་བཞིན་མཛོད། མན་ངག་མཛོད། ཚིག་དོན་མཛོད། སྔོན་འགྲོ་ཀུན་བཟང་ཞལ་ལུང་། ཁྲིད་ཡིག་ཡེ་ཤེས་བླ་མ་རྒྱབ་ཆོས་དང་བཅས་པ། ལྕེ་བཙུན་སྙིང་ཐིག་གི་དབང་ཁྲིད། འཛིན་པ་རང་གྲོལ་གྱི་དབང་ལུང་ཁྲིད་གསུམ། ཟབ་མོ་ལྟ་ལུགས་ཀྱི་སེམས་བསྐྱེད་འབོག་ཆོག ཚིག་གསུམ་གནད་རྡེག རྗེ་ཉིད་ཀྱི་གསུང་སྐོར་བཅས་ཟབ་ཆོས་ཕལ་མོ་ཆེ་རྫོགས་ཆེན་དྲུག་པ་དང་རྣམ་གཉིས་ཁོ་ན་ལ་མནོག་ཆོས་སུ་བསྩལ་ཏེ་བཀའ་ལུང་གཏད་རྒྱ་མཛད། རྫོགས་སྤྲུལ་དྲུག་པ་འཇིགས་བྲལ་བྱང་ཆུབ་རྡོ་རྗེ་ལས་སྙིང་ཐིག་དུམ་གཉིས་དང་། འདོད་འཇོའི་བུམ་བཟང་། འདུས་པ་མདོ་དབང་། སྒྱུ་འཕྲུལ་ཞི་ཁྲོ་བཅས་ཀྱི་སྨིན་དབང་བཞེས། དགུང་ལོ་བཅུ་གསུམ་བཞེས་པ་ཤིང་ལུག་ལོར་སྡོམ་བརྩོན་འདུལ་བ་འཛིན་པ་ཆེན་པོ་འཇིགས་མེད་ཡོན་ཏན་མགོན་པོས་མཁན་པོ་དང་། མཁས་མཆོག་པདྨ་ཚེ་དབང་གིས་ལས་ཀྱི་སློབ་དཔོན་། དུས་གོ་བ་མཁན་ཆེན་ནོར་གཡང་། གཞན་མཁན་ཆེན་ཐུབ་བསྟན་སྙན་གྲགས་དང་མཁན་པདྨ་ཆོས་དཔལ་བཅས་བཞུགས་པའི་ཞལ་སྔ་ནས་ཚངས་པར་སྤྱོད་པ་དགེ་ཚུལ་གྱི་སྡོམ་པ་བཞེས་པ་དང་། ཕྱིས་སུ་སྙིགས་མའི་དུས་ཀྱི་འདུལ་འཛིན་ཉེ་བ་འཁོར་གཉིས་པར་གྲགས་པ་བཤེས་གཉེན་དམ་པ་མཁན་ཆེན་དབང་རྡིས་རིན་པོ་ཆེའི་དབུས་དགེ་འདུན་གྲངས་ཚང་བའི་ཞལ་སྔ་ནས་སྨད་འདུལ་སྔ་འགྱུར་གྱི་སྡོམ་བརྒྱུད་ལས་བསྙེན་པར་རྫོགས་ཤིང་ཐུབ་བསྟན་ལུང་རྟོགས་བསྟན་པའི་རྒྱལ་མཚན་དཔལ་བཟང་པོ་ཞེས་མཚན་གསོལ། གཞན་ཡང་མཁན་ཆེན་ཐུབ་བསྟན་སྙན་གྲགས་ལས་ཐེག་མཆོག་མཛོད་ཀྱི་བཤད་ཁྲིད་དང་། སྐུ་ཞང་མུ་ར་པདྨ་ནོར་བུ་ལས་གྲུབ་ཐོབ་པདྨ་རིག་འཛིན་གྱི་རྫོགས་ཆེན་ཉམས་ལེན་སྤར་བཅང་མ། བར་དོ་དྲུག་ཁྲིད། མཁའ་འགྲོ་སྙིང་ཐིག་གི་སྔོན་འགྲོའི་ཁྲིད་ཡིག་ཐར་ལམ་བགྲོད་བྱེད་ཤིང་རྟ་བཟང་པོ་བཅས་དང་། བཤེས་གཉེན་ཆེན་པོ་ཡབ་རྗེ་ངག་དབང་ནོར་བུ་ལས་ཡོན་ཏན་མཛོད་ཀྱི་བཤད་ཁྲིད་དང་། རྙིང་མ་རྒྱུད་འབུམ་གྱི་ལྗགས་ལུང་། བོད་སྤྲུལ་མདོ་སྔགས་བསྟན་པའི་ཉི་མ་ལས་འཇམ་དཔལ་རྒྱུད་ལུགས་ཀྱི་དབང་། མཁས་དབང་པདྨ་འོད་གསལ་ལས་འཇིགས་གླིང་པོད་དགུའི་ལུང་བཅས་གསན་པ་དང་། རྫོང་སར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་ཀྱི་ཞལ་སྔར་རྫོགས་སྤྲུལ་དྲུག་པས་དབུས་སྐུ་འཁོར་ལྷན་རྒྱས་ཟླ་བ་གཉིས་གསུམ་ཅན་གྱི་ལན་གྲངས་གསུམ་ལ་ཆེད་ཕེབས་ཀྱིས་སྔ་འགྱུར་བཀའ་མ་དང་། རིན་ཆེན་གཏེར་མཛོད་ཆེན་མོ། རྒྱལ་དབང་ལྔ་པའི་དག་སྣང་རྒྱ་ཅན་ཉེར་ལྔ། དཔལ་དུས་ཀྱི་འཁོར་ལོ་སོགས་བཀའ་གཏེར་རྒྱུད་སྡེ་གསར་རྙིང་གི་སྨིན་དབང་ཕལ་མོ་ཆེ་མ་ཚང་བ་མེད་པ་གསན་བཞེས་མཛད་དེ་ཐུགས་རྒྱུད་ཀྱི་བུམ་པ་ཡོངས་སུ་ཁེངས། དགུང་ལོ་བཅུ་གསུམ་གྱི་དུས་སུ་རྫོགས་ཆེན་ཡིད་བཞིན་ནོར་བུའི་དབུས་ལྷན་རྒྱས་དབུས་ཕེབས་མཛད་དེ་རྒྱལ་དབང་ཐམས་ཅད་མཁྱེན་པ་སོགས་དབུས་གཙང་གི་ལྷ་བླ་རྟེན་གནས་གང་མང་གནས་གཟིགས་མཇལ་བསྐོར་གྲུབ་སྟེ་ཕྱིར་གདན་སར་ཞབས་སོར་བཀོད། དགུང་གྲངས་བཅུ་བཞི་ནས་བཅུ་དྲུག་བར་རུ་དམ་ཡང་དབེན་ཚེ་རིང་ལྗོངས་སུ་མཁན་ཆེན་པདྨ་ཚེ་དབང་གཞུང་ཆེན་བཤད་ཁྲིད་ཀྱི་ཡོངས་འཛིན་མཁན་པོར་ཆེད་བསྐོས་གནང་བའི་སྐུ་དྲུང་དུ་གཏན་བཞུགས་མཛད་ནས། རྫོགས་ཆེན་ཤྲཱི་སེང་ཆོས་གྲྭའི་ཡིག་ཆ་རྒྱ་གཞུང་ཆེན་མོ་བཅུ་གསུམ་ཆ་ལག་དང་བཅས་པ། གསང་འགྲེལ་ཕྱོགས་བཅུའི་མུན་སེལ་བཅས་མདོ་སྔགས་ཀྱི་གཞུང་བཤད་ཆ་ཚང་བ་ཆེད་གཏད་ཀྱིས་གསུང་པ་མ་ཚང་པ་མེད་པ་གསན་ཞིང་། དུས་དེར་ཉིན་རེའི་ཆོས་ཁྲིད་ཀྱི་རྩ་བའི་བློ་རྒྱུགས་དང་འགྲེལ་བའི་བཤད་རྒྱུགས་ནང་མ་རེ་བཞིན་ཚོགས་གྲལ་ནས་ཆགས་ཐོགས་མེད་པར་ཕུལ་བས་མཚུངས་ཟླ་བྲལ་བའི་སྐྱེས་ཐོབ་ཀྱི་རྣམ་དཔྱོད་མངའ་བ་འདི་འདྲ་བ་ཞེས་ཐམས་ཅད་ཡ་མཚན་པ་བྱུང་། དགུང་གྲངས་བཅུ་བདུན་བཞེས་པ་ས་ཁྱི་ལོའི་སྟོན་ཀར་རྫོགས་ཆེན་དྲུག་པ་འཇིགས་བྲལ་བྱང་ཆུབ་རྡོ་རྗེ་མཆོག་ནས་མཁན་ཆེན་ཐུབ་བསྟན་སྙན་གྲགས་སྒྲུབ་གནས་དཔྱལ་གྱི་བྲག་དཀར་དུ་བཞུགས་པའི་ཞལ་སྔར་ཆེད་གཏད་ཀྱིས་ཁྲིད་པར་མཛད་དེ། ད་ནས་མི་རིང་བར་རྒྱལ་བསྟན་སྤྱི་དང་བྱེ་བྲག་ལ་གོད་ཆག་བར་ཆད་འབྱུང་བའི་གསུང་འཕྲོས་དང་ད་ཐེངས་ང་ལ་ཐུགས་མི་གཏོད་པར་འདི་ལ་ཐུགས་གཏད་ཀྱིས་ཚེ་དབང་ལོ་གྲངས་ཤིག་གནང་དགོས་ཞེས་སྤྱན་ཆབ་བསིལ་བཞིན་ཞུ་བསྐུལ་མཛད་པ་དེར་ཡོད་འཁོར་སློབ་ཀུན་ཀྱིས་ཐོས། མཁན་རིན་པོ་ཆེ་མཆོག་ནས་དགུང་གྲངས་ལྟར་ཚེ་སྒྲུབ་བདུད་རྩིའི་བུམ་བཅུད་གྱི་སྨིན་དབང་ཚར་བཅུ་བདུན་བསྩལ་ཏེ་ཐུགས་སྨོན་ཟབ་རྒྱས་གནང་། ལོ་དེའི་ཕྱི་ལོའི་དགུན་ཁར་རྫོགས་ཆེན་རིན་པོ་ཆེ་དང་མཁན་ཆེན་ཡོན་ཏན་མགོན་པོའི་དབུས་ལྷན་རྒྱས་སྐུ་འཁོར་དང་བཅས་པ་ཆབ་སྲིད་སློབ་སྦྱོང་གི་ཆེད་དུ་སྡེ་དགེར་ཡུན་རིང་བཞུགས་དགོས་བྱུང་། བར་སྐབས་རྫོགས་ཆེན་རིན་པོ་ཆེ་དང་ཡོངས་འཛིན་མཁན་ཆེན་རྣམ་གཉིས་སྐྱོན་འདོན་ངོས་ལེན་གྱི་ཕྱིར་དུ་བཙན་གྱིས་རྫོགས་ཆེན་ལ་ཕེབས་བཀོད་ཞུས། དཔོན་སློབ་ཞལ་གྱེས་སྐབས་གྲུབ་དབང་རིན་པོ་ཆེ་མཆོག་ནས་རྫོགས་ཆེན་བླ་བྲང་གི་ཉེ་གནས་གཉེར་གཞོན་བསོད་ནམས་རྒྱལ་མཚན་ལ་ཁྱོད་ཀྱིས་ཕྱིས་སུ་མཆོག་སྤྲུལ་རིན་པོ་ཆེ་འདི་བདག་སྐྱོང་ལེགས་པོ་གྱིས་ཞེས་ཞལ་བསྒོས་ནན་མོ་མཛད། དེ་དུས་ཁོང་གིས་ཡིད་བཞིན་ནོར་བུ་ཚུར་ཕེབས་རིང་གི་ཉིན་གྲངས་ཁ་ཤས་ལ་གསུངས་པ་རེད་སྙམ་པ་ལས་ཕྱི་མཐའ་གཟིགས་པའི་ལུང་བསྟན་ཡིན་པ་ཡིད་ངོར་གཏན་ནས་མ་ཤར་ཞེས་ཟེར། ཕྱིས་སུ་སྐྱབས་རྗེ་རིན་པོ་ཆེ་མཆོག་བཙོན་གྲོལ་བྱུང་ནས་ཚུར་རྫོགས་ཆེན་དུ་བཏང་སྐབས་བླ་བྲང་བན་རྒན་བསོད་རྒྱལ་གྱིས་གྲུབ་དབང་མཆོག་གི་བཀའ་ལུང་ལྟར་བདག་སྐྱོང་བྱས་ཤིང་རྣམ་གཉིས་ཁྱིམ་ཚང་གཅིག་པའི་ཚུལ་དུ་ལྷན་བཞུགས་མཛད། སྐབས་དེར་རིག་གསར་སོགས་དུས་ངན་གྱི་རྒུད་པ་སྟོབས་སུ་བདོ་བའི་ལོ་ངོ་བཅུ་ཕྲག་གཉིས་ཙམ་རིང་ཕྱི་ནང་གསང་གསུམ་ནས་གཙེས་པའི་སྐུ་ཚེགས་འོ་བརྒྱལ་དང་རྐྱེན་ངན་སྣ་ཚོགས་ཆར་ལྟར་འཁྲུགས་ཀྱང་། དམ་པའི་རང་གཤིས་བཙོ་མའི་གསེར་ལྟར་གཅིག་ཏུ་འགྱུར་བ་མེད་པས་སོ་བྱང་སྔགས་གསུམ་གྱི་དམ་སྡོམ་གྱི་ཆ་ཕྲ་མོ་ཙམ་ཡང་ཉམས་པ་མེད་པར་ཡོན་ཏན་མཐའ་དག་གི་གཞི་རྟེན་དུ་བརྟན་ཞིང་། སྤྱི་དང་བྱེ་བྲག་གི་རྒྱལ་བསྟན་རིན་པོ་ཆེ་སླར་གསོ་ཡོང་བར་ཉིན་མཚན་དུས་དྲུག་ཏུ་ཐུགས་སྨོན་མཛད་ཅིང་སྐུ་གསུང་ཐུགས་རྟེན་གྱི་རིགས་ཆག་དུམ་ཙམ་ཞིག་ཕྱག་ཏུ་འབྱོར་བ་ཚུན་ཆད་སྐུ་སྲོག་དང་བསྡོས་ཏེ་སྦས་ཉར་མཛད། སྐུ་ཚེགས་ཆེ་བའི་ཨར་ལས་ཀྱི་ངལ་གསོའི་དུས་ཚོད་ཀྱང་ཆུད་ཟོས་སུ་མི་གཏང་བར་ཡི་དམ་ལྷའི་བསྙེན་སྒྲུབ་དང་། བསྐྱེད་རྫོགས་རྫོགས་ཆེན་གྱི་རྣལ་འབྱོར་ལ་ཉམས་བཞེས་གནང་སྟེ་རྐྱེན་ངན་ལམ་དུ་ཁྱེར་ཞིང་ཐུགས་རྒྱུད་རྟོགས་པའི་བོགས་འདོན་མཛད། དགུང་ལོ་སུམ་ཅུ་ནས་ཡང་དར་རྒྱལ་བསྟན་གྱི་ཉི་མ་བསིལ་ལྡན་བྷོ་ཊའི་ལྗོངས་སུ་སླར་ཡང་འཆར་བར་ཕྱོགས་ཚེ་སྔ་འགྱུར་བསྟན་པའི་ཆུ་འགོ་གདན་ས་ཆེན་མོ་འདི་ཉིད་དུ་བསྟན་རྩ་དགེ་འདུན་འདུ་བའི་སྒོ་གསར་དུ་ཕྱེ་བའི་དབུ་བཙུགས། དགུང་ལོ་སོ་དྲུག་པ་ས་རྟ་ལོར་དབུས་གཙང་གི་རྟེན་གནས་ཕལ་མོ་ཆེ་ལ་ཞབས་ཐང་གིས་ཕེབས་ཏེ་ཤིན་ཏུ་རྩ་ཆེའི་སྐུ་གསུང་ཐུགས་རྟེན་མང་པོ་སྤྱན་དྲངས། སྤྱི་ལོ་༡༩༨༡ལོར་མཆོག་སྤྲུལ་གཟན་དཀར་རིན་པོ་ཆེ་ཐུབ་བསྟན་ཉི་མ་སོགས་ཀྱིས་སི་ཁྲོན་ཞིང་ཆེན་བོད་ཡིག་སློབ་གྲྭ་ཆེན་མོ་རྫོགས་ཆེན་ཤྲཱི་སེང་དུ་ཐོག་མར་དབུ་འཛུགས་པའི་སྣེ་ཁྲིད་དང་ཕྱག་རོགས་བདག་རྐྱེན་མཛད་ནས། གྲུབ་དབང་རྫོགས་ཆེན་པའི་སློབ་བརྒྱུད་གཙོ་བོར་གྱུར་པའི་རིས་མེད་མཁས་དབང་ཆེན་མོ་སྐུ་ན་ཤིན་ཏུ་བགྲེས་པ་དག་གནས་འདིར་སྤྱན་དྲངས་ནས་འཆི་ཁའི་མར་མེ་ལྟར་གྱུར་པའི་བོད་ཀྱི་བཅུ་ཕྲག་རིག་གནས་ལ་ཚེ་སྲོག་གི་སྣུམ་ཐིགས་གསར་དུ་བསྣན། དུས་མཚུངས་ཕོ་བྲང་ཁམས་གསུམ་ཟིལ་གནོན་སླར་གསོ་མཛད་པའི་དབུ་བཙུགས་ཏེ་ཐོག་བརྩེགས་འོག་མ་ལོ་དེ་རང་དུ་ལེགས་པར་གྲུབ་པར་མཛད། དགུང་ལོ་སོ་དགུ་བཞེས་པ་སྤྱི་ལོ་༡༩༨༢ལོར་རྫོགས་ཆེན་བསྟན་པ་སྤྱི་དོན་དུ་རྒྱ་གར་ལ་ཕེབས་པའི་ལམ་བར་ནས་རླངས་འཁོར་གདོང་ཐུག་གིས་སྐུ་སྲོག་མ་ཤོར་ཙམ་གྱི་བརྡབ་རྨས་དྲག་པོ་བྱུང་བས་སྨན་ཁང་དུ་ལོ་ངོ་གཅིག་ཙམ་ལ་བཞུགས་དགོས་བྱུང་། རྗེ་ཉིད་ཀྱི་ཞལ་ནས། ང་རང་འཆི་ལ་ཐུག་པའི་བར་ཆད་བྱུང་བ་ཐམས་ཅད་ལས་ཐར་ཏེ་རྫོགས་ཆེན་བླ་བྲང་སྟོན་འཁོར་ཐམས་ཅད་ཀྱི་ནང་ནས་ཤུལ་ལུས་མི་སྣ་གཅིག་པུར་གྱུར་པ་དང་། གྲུབ་དབང་རྫོགས་ཆེན་པའི་བསྟན་སྲིད་ཆེས་ཉག་ཕྲ་བའི་དུས་ཀྱི་ཡང་མཐའ་འདིར་བཤད་སྒྲུབ་ལས་གསུམ་གྱི་སྲོག་རྩ་མཐུད་པའི་ཞབས་ཞུ་མི་དམན་ཙམ་བྱུང་བ་ནི་རྫོགས་ཆེན་ཡིད་བཞིན་ནོར་བུ་འཇིགས་བྲལ་བྱང་ཆུབ་རྡོ་རྗེའི་ཐུགས་བསྐྱེད་སྨོན་ལམ་གྱི་བདེན་མཐུ་དུས་སུ་སྨིན་པ་དང་། མཁན་རིན་པོ་ཆེ་ཐུབ་བསྟན་སྙན་གྲགས་མཆོག་ནས་ཐུགས་གཏད་ཟབ་མོས་ཚེ་དབང་ལོ་གྲངས་བསྩལ་བའི་བྱིན་རླབས་ཀྱི་མཐུས་ཡིན་པར་ངེས་ཞེས་གསུང་འཕྲོས་ཡང་ཡང་གནང་། དེ་ནས་སླར་ཡང་ཉམས་པ་མེད་པའི་ཐུགས་སྟོབས་བསྐྱེད་དེ་ཕྱག་འཁར་གཉིས་ལ་བརྟེན་བཞིན་རྒྱ་གར་དུ་ཕེབས་ཤིང་འབྲེལ་ཡོད་བསྟན་དོན་གྱི་ཕྱག་ལས་གནང་བཞིན་འཕགས་བལ་གྱི་གནས་ཆེན་ཁག་ལ་གཟིགས་བསྐོར་དང་འབྲེལ། གོང་ས་ཡིད་བཞིན་ནོར་བུ་མཆོག་དང་ཐུགས་ནང་བརྩེ་བའི་ཞལ་མཇལ་ཐུགས་བཞེད་བཞིན་གྲུབ་སྟེ་ཕྱིར་གདན་སར་ཞབས་པད་བཀོད། དེ་ནས་རྩ་ཆེའི་རྟེན་གསུམ་བསྡུ་རུབ་ཕྱག་ལས་ཀྱི་དབུ་བཙུགས་ཏེ་རྗེ་ཉིད་ཀྱིས་སྐུ་ངལ་སྣ་ཚོགས་བརྒྱུད་དེ་ཉར་སྡུད་གནང་བའི་དབུ་ཞྭ་པདྨ་མཐོང་གྲོལ་དང་། སྣམ་སྦྱར་རྡོ་རྗེའི་གསང་ལམ་ཞེས་གྲགས་པའི་གུ་རུའི་ན་བཟའ་གཏེར་མ། ཐུབ་སྐུ་གཡུ་ཐོད་མ་ཆུང་བ། ཕག་མོ་རྒྱབ་ལུང་མ། དུས་འཁོར་ཧེ་བཛྲ། ཀློང་ཆེན་ང་འདྲ་མ། རོལ་མོ་པེ་ཧར་དགྱེས་གླུ། སྦུབ་ཆེན་གཟི་སྨུག སིལ་སྙན་ཀུན་བཟང་མཆོད་དབྱངས་སོགས་ནང་རྟེན་གལ་ཆེན་བཅུ་ཕྲག་འགའ་དང་། མཆོད་རྫས་འགང་ཆེན་རིགས་རྫོགས་ཆེན་བླ་བྲང་གི་རྟེན་སྒམ་དུ་ཕུལ་བ་དང་། གཞན་ཡང་ཉང་གཏེར་མགོན་པོ་ཕྱག་བཞི། མཆོག་གླིང་གཏེར་བྱོན་སྐུ་ཚབ་སྲིན་ཐོད་མ་སོགས་འཚོལ་སྡུད་ཀྱི་བདག་རྐྱེན་མཛད། དེ་བཞིན་ལྷ་སར་ལྷ་ཁང་ཆེན་མོ་དང་། ཕོ་བྲང་ཁམས་གསུམ་ཟིལ་གནོན་གསར་བཞེངས་ཀྱི་ཐུགས་བཀོད་གཙོ་འགན་བཞེས་ཏེ་སྐུ་དངོས་ཨར་ལས་ཀྱི་ལས་དཔོན་དུ་ཉིན་ལྟར་ཕེབས་པའི་སྐུ་ཚེགས་རྒྱ་ཆེར་གནང་བ་དང་། མི་ལོ་ཉེར་ལྔའི་རིང་སྐུ་སྲོག་དང་བསྡོས་ཏེ་སྦས་ཉར་མཛད་པའི་གྲུབ་དབང་འཇིགས་བྲལ་བྱང་ཆུབ་རྡོ་རྗེའི་སྐུ་གདུང་རིན་པོ་ཆེ་སྙིང་པོར་བྱས་ཏེ། གསེར་གཡུ་གཟི་བྱུར་སོགས་རིན་པོ་ཆེའི་ཕྲ་རྒྱན་སྣ་ཚོགས་ཀྱིས་མཛེས་པར་སྤྲས་པའི་གསེར་སྡོང་མཐོང་གྲོལ་ཆེན་མོ་མར་མེ་རྒྱུན་འཛུགས་དང་བཅས་པ་བཞེངས་ནས་ཕྱག་རྫས་སྤང་དག་ལན་གཅིག་མཛད། འདི་སྐོར་ལོ་ལྟར་དགུན་དུས་རྣམས་སུ་ཐུགས་དམ་བཅད་རྒྱ་ཁོ་ན་ལ་བཞུགས། སྤྱི་ལོ་༡༩༨༥པ་ཤིང་གླང་ལོར་ཁམས་མི་ཉག་ཕྱོགས་ཀྱི་དགོན་ལག་ཁག་ལ་ཕེབས་ནས་དབང་ཆོས་ཀྱི་འགྲོ་དོན་རྒྱ་ཆེར་སྤེལ། གྲུབ་དབང་རྫོགས་ཆེན་པའི་གདན་ས་གསུམ་པར་གྲགས་པ་མི་ཉག་རྡོ་ར་དཀར་མོར་སྒྲོལ་དཀར་ཡིད་བཞིན་འཁོར་ལོའི་བསྙེན་སྒྲུབ་ལ་ཟླ་བ་གསུམ་ལྷག་བཞུགས་ཤིང་། སྟག་ལོའི་གནམ་ལོ་གསར་ཚེས་ཀྱི་ཚེས་གསུམ་ཉིན་སྐུ་མཚམས་གྲོལ་བ་དང་དེ་གའི་སློབ་ཆུང་གསར་འཛུགས་ཀྱི་བྱིས་པ་བརྒྱ་ཕྲག་ལྷག་ལ་འཇམ་དབྱངས་བསྟོད་པའི་བཀླག་ལུང་གནང་ཞིང་། གཙུག་ཕུད་བྲེག་ནས་མགུལ་དར་སྒྲོན་སྐབས་དབྱར་རྔའི་སྒྲ་དབྱངས་ཐོག་མར་ལྡིར་བའི་ལེགས་ལམ་བཀྲ་ཤིས་ངོ་མཚར་གྱི་མཚན་མ་བཟང་པོ་མངོན་དུ་གྱུར་ཏེ་འབྱུང་འགྱུར་རྟེན་འབྲེལ་གྱི་སྒོ་མོ་གསར་དུ་ཕྱེས། དེ་ནས་སྤྱི་ལོ་༡༩༨༨པ་བོད་རབ་བྱུང་བཅུ་བདུན་པའི་ས་འབྲུག་ལོར། ཇི་སྐད་དུ། གཡོན་རུ་གཏེར་ཆེན་པདྨ་རྣམ་གྲོལ་གླིང་པའི་ལུང་བྱང་ལས། ཆོས་སྡེ་ཤྲཱི་སེང་ཧ་ཡི༔ མི་འཇིགས་སེང་གེའི་ཁྲི་མཆོག་སྟེང༔ པདྨའི་ཐུགས་སྤྲུལ་པདྨའི་མཚན༔ པད་གཞོན་མང་པོ་འདབ་སྟོང་འཛུམ༔ རྒྱལ་བསྟན་སྤྱི་དང་བྱེ་བྲག་གི༔ དགེ་ལེགས་ཡོན་ཏན་ཉིན་མོར་བྱེད༔ ཅེས་སླུ་མེད་རྡོ་རྗེའི་ལུང་བྱང་གི་བསྟན་དོན་དུས་སུ་སྨིན་ཏེ། གསང་ཆེན་སྔ་འགྱུར་རྙིང་མའི་བཤད་སྒྲུབ་བསྟན་པའི་ཆུ་འགོ་ཤྲཱི་སེང་ཆོས་གྲྭ་ཆེན་མོ་སླར་གསོ་རྒྱ་བསྐྱེད་ཀྱི་དབུ་བཙུགས་ཤིང་གངས་ལྗོངས་མཁས་པའི་འབྱུང་གནས་རུ་དམ་རྫོགས་ཆེན་དཔལ་སེང་གེ་རིའི་ལྔ་རིག་ཆོས་གྲྭ་ཆེན་མོ་ཞེས་པར་མཚན་བསྒྱུར། སྔར་སྐུ་ལུས་བརྡབ་རྨས་བྱུང་བའི་ཁྲག་སྟོང་གུན་བསབ་ཏུ་ཕུལ་བའི་ཕྱག་དངུལ་ཉུང་ངུས་ཐོག་མའི་ས་བོན་བྱས་ཏེ་ཐུགས་སྟོབས་དཀའ་སྤྱད་དྲག་པོས་ཡུན་རིང་འབད་འབུངས་གནང་བ་བརྒྱུད། གནའ་དུས་དགེ་འདུན་ཞལ་གྲངས་ལྔ་བཅུ་བཞུགས་སའི་གླིང་ཁང་རྒྱ་བསྐྱེད་བཏང་ནས་དགེ་སློབ་ལྔ་བརྒྱ་ལྷག་བཞུགས་ཆོག་པའི་གླིང་དབྱིབས་གྲུ་བཞི་ཉིས་ཐོག་ཅན། དཀྱིལ་དབུས་སུ་གཙུག་ལག་ཁང་ཆེན་མོ་དགེ་འདུན་སྟོང་ཕྲག་ཤོང་པ་གསར་བཞེངས་མཛད་ཅིང་སྐབས་དེའི་ཨར་ལས་ལ་རྗེ་ཉིད་སྐུ་དངོས་ཞུགས་ནས་ཕྱག་ལས་གནང་བ་དང་། དུས་མཚུངས་སྔར་བྱོན་དམ་པ་གོང་མ་རྣམས་ཀྱི་སློབ་རྒྱུད་མཁས་པའི་དབང་པོ་འཚོ་ཞིང་གཞེས་པ་ཐམས་ཅད་སྐུ་ངལ་སྣ་ཚོགས་ཁྱད་དུ་བསད་དེ་སྤྱན་དྲངས་ནས། ཐུབ་བསྟན་སྙིང་པོའི་རིང་ལུགས་འདུལ་བ་གཞི་གསུམ་གྱི་ཕྱག་བཞེས་དང་སྡོམ་རྒྱུན་གསར་སྤེལ་གནང་བ་སོགས་བསྟན་རྩ་འདུལ་བའི་བསྟན་པ་རྨང་ནས་གསོས། མདོ་སྔགས་རིག་གནས་དང་བཅས་པར་ཐོས་བསམ་འཆད་ཉན་གྱི་མེ་ཆེན་སླར་ཡང་སྦར་བས་མི་ལོ་སུམ་ཅུའི་རིང་མུན་ནག་ལུང་སྟོང་དུ་ལུས་པའི་དཔལ་གྱི་སེང་གེ་རིའི་ཁོར་ཡུག་བཤད་དང་སྒྲུབ་པའི་ཆོས་ཀྱི་འོད་སྣང་གིས་ཡོངས་སུ་ཁྱབ། དེ་ནས་ད་ལྟའི་བར་ཆོལ་གསུམ་བོད་ཀྱི་ཡུལ་ནས་ཕེབས་པའི་སྡེ་སྣོད་འཛིན་པ་ཉིས་སྟོང་ལྷག་སྐྱེད་བསྲིང་བྱུང་བས་གྲུབ་དབང་རྫོགས་ཆེན་པའི་བུ་དགོན་རྣམས་ཀྱིས་གཙོས་འཛམ་གླིང་ཡངས་པའི་ས་ཕྱོགས་མང་པོར་བོད་ཀྱི་ཆོས་དང་རིག་གཞུང་དར་སྤེལ་གྱི་ས་བོན་བསྐྲུན། མ་འོངས་བསྟན་རྒྱུན་འཛིན་པའི་སྐྱེས་བུར་དགོངས་ཏེ་རྫོགས་ཆེན་ཤྲཱི་སེང་ཆོས་གྲྭའི་མཆོག་སྤྲུལ་རྒྱལ་ཚབ་རྣམ་གསུམ་སྟེ། མཁན་ཆེན་འཇིགས་མེད་བློ་གྲོས་ཀྱི་ཡང་སྲིད་བསྟན་པ་ཡང་དར་གྱི་མཁན་ཆེན་ཁྲི་པ་ཐོག་མ་རྒྱལ་ཚབ་མཆོག་སྤྲུལ་ཨོ་རྒྱན་རིག་འཛིན་རིན་པོ་ཆེ་དང་། མཁན་ཆེན་པདྨ་ཚེ་དབང་མཆོག་གི་ཡང་སྲིད་མཁན་སྤྲུལ་རྡོ་རྗེ་བཀྲ་ཤིས་རིན་པོ་ཆེ་རྣམ་གཉིས་དང་། བྱ་བྲལ་ཀུན་དགའ་དཔལ་ལྡན་གྱི་ཡང་སྲིད་མཆོག་སྤྲུལ་དཀོན་མཆོག་རིན་པོ་ཆེ་བཅས་རྒྱལ་ཚབ་རྣམ་གསུམ་དང་། བསྟན་འཛིན་ཉི་ཟླ་སྐར་གསུམ་སྟེ་མཁས་མཆོག་གཞན་ཕན་སྣང་བའི་ཡང་སྲིད་མཁན་སྤྲུལ་ཐོས་ལྡན་རིན་པོ་ཆེ་དང་། དཔལ་སྤྲུལ་འཇིགས་མེད་ཆོས་ཀྱི་དབང་པོའི་ཡང་སྲིད་མཁན་སྤྲུལ་སྒྲིབ་བྲལ་བསམ་གཏན་རིན་པོ་ཆེ། ད་དུང་ལེགས་ལམ་གྱི་རྟེན་འབྲེལ་དུས་ལས་མ་ཡོལ་ཚེ་མཁས་བཙུན་མཆོག་ལྡན་གྱི་སྐྱེས་ཆེན་གཞན་གཅིག་བྱོན་རྒྱུ་ཡོད་པའི་ཞལ་གསུངས་གནང་བ་བཅས་བསྟན་འཛིན་མཆོག་སྤྲུལ་རྣམ་གསུམ། གཞན་ཡང་རྫོགས་ཆེན་དགོན་ཨོ་རྒྱན་བསམ་གཏན་ཆོས་གླིང་དུ་འབྲུག་ཆེན་རིན་པོ་ཆེའི་ཡང་སྲིད་མཆོག་སྤྲུལ་པདྨ་མཐུ་སྟོབས་འཇིགས་མེད་རྣམ་པར་རྒྱལ་བའི་སྡེ་དང་། གླིང་བླ་རིན་པོ་ཆེའི་ཡང་སྲིད་པདྨ་ཉིན་བྱེད་ལུང་རྟོགས་གྲུབ་པའི་རྡོ་རྗེ། མཁྱེན་བརྩེ་རིན་པོ་ཆེའི་ཡང་སྲིད་གསུམ་པ་ཨོ་རྒྱན་བསྟན་འཛིན། གཏེར་ཆེན་མཆོག་གྱུར་བདེ་ཆེན་གླིང་པའི་ཡང་སྲིད་མཆོག་སྤྲུལ་པདྨ་འཇིགས་བྲལ་གྲུབ་པའི་རྡོ་རྗེ། མཁན་ཆེན་སེང་ཕྲུག་པདྨ་བཀྲ་ཤིས་ཀྱི་ཡང་སྲིད་མཁན་སྤྲུལ་ཟླ་བ་བཀྲ་ཤིས་རིན་པོ་ཆེ་བཅས་དང་། མཁན་པོ་ནོར་གཡང་རིན་པོ་ཆེའི་ཡང་སྲིད་ནད་མེད་ཚེ་རིང་སོགས་མངོན་རྟོགས་བསླབ་པ་རིན་པོ་ཆེ་རྣམ་པ་གསུམ་དང་། ལུང་སྡེ་སྣོད་རིན་པོ་ཆེ་གསུམ་གྱིས་མངོན་པར་ཕྱུག་པའི་དོན་གྱི་བསྟན་འཛིན་འགྲན་ཟླ་དང་བྲལ་བ་དུ་མ་དམ་པའི་སྐྱེ་སྲིད་དུ་ངོས་འཛིན་མངའ་གསོལ་མཛད། དེ་བཞིན་ཨ་མདོའི་དགུ་རོང་རིན་པོ་ཆེ་དང་། དིང་ཀྱཱ། ཟུར་ཚང་ཧཱུྃ་ནག་མེ་འབར། དགེ་རྒྱལ་རྒྱལ་བླ། ལེགས་དགོན་ཁྱུང་པོ། ལི་ཐང་ཨ་དཀར། གླིང་དཀར་བླ་མ་ཚེ་རིང་མཐར་ཕྱིན་སོགས་དགོན་ལག་ཁག་གི་བླ་སྤྲུལ་སྐྱེས་ཆེན་མང་པོའི་ཡང་སྲིད་ངོས་འཛིན་གནང་ཞིང་། སྤྱིར་འོས་སྤྲུལ་གསར་པ་དག་དགུང་ལོ་ཉེར་ལྔ་མ་སོན་བར་བརྟགས་ཤིང་དཔྱད་དེ་ཉེར་ལྔ་སོན་རྗེས་དམ་པའི་མངོན་རྟགས་མཁས་བཙུན་བཟང་གསུམ་གྱི་ཡོན་ཏན་ལྡན་ན་གཞི་ནས་ཁྲི་འདོན་བྱ་རྒྱུའི་བཀའ་རྒྱས་བཏབ། རྗེ་ཉིད་དགུན་ཀའི་དུས་ཚོད་ཕལ་མོ་ཆེར་ཤྲཱི་སེང་ཆོས་གྲྭའི་གཟིམས་སྤྱིལ་དུ་བཅད་རྒྱ་དམ་མཚམས་ལ་བཞུགས་ཤིང་། དུས་རྒྱུན་སྔ་དྲོའི་རིང་གསུང་ཐུན་བསྡམས་ཏེ་བསྐྱེད་རྫོགས་བསྙེན་སྒྲུབ་མཐར་ཆགས་སུ་གནང་བ་དང་། སྐབས་དང་སྐབས་སུ་ཕྱོགས་ནས་ཕེབས་པའི་བསྟན་འཛིན་སྐྱེས་བུ་བླ་སྤྲུལ་དགེ་འདུན་པ་ཞལ་གྲངས་ཤིན་ཏུ་མང་པོ་ལ་འདུས་པ་མདོ་དབང་དང་། སྒྲུབ་ཐབས་འདོད་འཇོའི་བུམ་བཟང་། སྒྱུ་འཕྲུལ་ཞི་ཁྲོ། སྙིང་ཐིག་ཡ་བཞི། སྙིང་ཐིག་དུམ་གཉིས་སོགས་ཀྱི་སྨིན་ཁྲིད་ཚར་གྲངས་དུ་མ་གསུངས། གཞན་ཡང་སོ་སོའི་ངོ་སྐལ་ལྟར་དགོས་རིགས་ཀྱི་དབང་ཁྲིད་གདམས་ངག་ཕྲན་ཚེགས་ཐུགས་ཁོམ་ནམ་ཡོད་ལ་བསྩལ། གྲུབ་དབང་རྫོགས་ཆེན་པའི་དགོན་ལག་ལྷ་སྡེ་ཡོད་པའི་ས་ཕྱོགས་མཚོ་སྔོན་པོའི་གཡས་གཡོན། མགོ་ལོག་སྟོད་སྨད། དགེ་རྒྱལ། འདམ་བླ་ཚང་། རྫ་ཆུ་ཁ་སྟོད་སྨད། རྫ་ཁོག གཡུ་མཁར། མདོ་ཆེན། མི་ཉག་སྟོད་སྨད། ལི་ཐང་། འབའ་ཐང་སོགས་མདོ་དབུས་ཁམས་ཀྱི་དགོན་ལག་ཉིས་བརྒྱ་ལྷག་དང་། དབུས་ཀྱི་སྔ་འགྱུར་རྙིང་མའི་གདན་ས་ཆེན་མོ་རྡོར་སྨིན་དཔལ་གསུམ་དང་། ཚེ་རིང་ལྗོངས། དཔལ་གྱི་བསམ་ཡས། འབྲི་གུང་། གཙང་དང་བྱང་གི་དགོན་སྡེ་སོགས་ཆོལ་གསུམ་བོད་ཀྱི་ཆོས་སྡེ་ཡུལ་གྲུ་མང་པོར་ཞབས་ཀྱིས་བཅགས་ནས་སྔ་འགྱུར་བཀའ་གཏེར་གྱི་སྨིན་དབང་ཚར་གྲངས་མང་པོ་བསྩལ་བ་དང་། བཤད་སྒྲུབ་ཀྱི་སྡེ་གསར་དུ་འཛུགས་པའི་མཁན་པོ་དང་དངོས་འབྱོར་གྱི་བདག་རྐྱེན་གནང་ཞིང་བསྟན་རྩ་འདུལ་བ་གཞི་གསུམ་གྱི་ཕྱག་བཞེས་དང་སྡོམ་རྒྱུན་སྤེལ། ད་སྔོན་རྗེ་ཉིད་ཀྱི་ཞལ་སྔ་ནས་རབ་ཏུ་བྱུང་བ་དང་བསྙེན་པར་རྫོགས་པ་སྡོམ་ཆིག་སྟོང་ལ་ཉེ་བ་བྱུང་བ་བཅས་བསྟན་པ་ཡང་དར་གྱི་དུས་འདིར་རང་ལུགས་དྲི་མ་མེད་པའི་བསྟན་པ་རིན་པོ་ཆེ་ཕྱོགས་མཐར་སྤེལ་བ་ལ་བཀའ་དྲིན་དང་ཕྲིན་ལས་འགྲན་ཟླ་བྲལ། དགུང་གྲངས་ང་དྲུག་བཞེས་པ་སྤྱི་ལོ་༡༩༩༨ལོ་ནས་རྫོགས་ཆེན་མཁན་སྤྲུལ་གྲྭ་ཚང་བཅས་པས་རེ་མོས་ཤུག་དྲག་དང་། སྐྱ་སེར་ལྷག་བསམ་ཅན་འདས་བཞུགས་མང་པོའི་ཐུགས་རེ་དང་། འཇིགས་བྲལ་བྱང་ཆུབ་རྡོ་རྗེའི་ཞལ་ཆེམས་ལ་དགོངས་ཏེ་ལོ་བཞིའི་རིང་བསྟན་སྲིད་སྤྱི་ཁྱབ་བཀོད་འདོམས་པའི་ཐུགས་འགན་ཡང་དུ་བཞེས་རྒྱུའི་ཞལ་བཞེས་གནང་ནས། རུ་དམ་གདན་ས་ཨ་མར་བསྟན་འཛིན་གཙོ་བོ་ཆེ་ལྔ་གསར་དུ་བསྐོས་ཏེ་གཙུག་ལག་ཁང་ཆེན་མོས་གཙོས་ལྷ་ཁང་ཆེན་མོ་ལྔ་ནང་བཞུགས་རྟེན་རྫས་གྲྭ་ཚང་དང་བཅས་པ་གཞི་རྒྱ་ཆེ་བའི་བཞེངས་བསྐྲུན་དང་། སྔར་ཡོད་བཀའ་གཏེར་གསར་རྙིང་གི་སྒྲུབ་འཕྲིན་གར་འཆམ་དབྱངས་རོལ་ཐམས་ཅད་རང་ལུགས་འཁྲུལ་མེད་དུ་སོར་ཆུད་དགོས་པའི་ཐུགས་བཀོད་གནང་ཞིང་། སྐྱབས་རྗེ་མཆོག་སྐུ་སྒེར་གྱིས་མཁན་ཆེན་པདྨ་བཛྲའི་གདན་ས་རྫོགས་ཆེན་ཡང་དབེན་པདྨའི་ཐང་དུ་ལུང་རྟོགས་པདྨའི་དགའ་ཚལ་དུ་གྲགས་པའི་ཆོས་སྡེ་ཆེན་མོ་གསར་དུ་ཕྱག་བཏབ་མཛད་ནས། ངོ་མཚར་གངས་རྒྱན་གསེར་གྱི་པདྨའི་ལྷ་ཁང་རྟེན་དང་བརྟེན་པ་རིན་ཆེན་དང་པོའི་རྒྱ་ཕིབས་གྱིས་མངོན་པར་མཛེས་པ་བཅས་ལེགས་པར་གྲུབ་ཟིན་ཏེ། རབ་བྱུང་བཅུ་བདུན་པའི་ཆུ་མོ་ལུག་གི་ལོ་འདི་ནས་བཟུང་འོད་གསལ་རྫོགས་པ་ཆེན་པོ་མན་ངག་གསང་བ་སྙིང་ཐིག་གི་སྨིན་ཁྲིད་རྒྱུད་བཤད་ཆོས་ཀྱི་འཁོར་ལོས་སྐལ་ལྡན་གདུལ་བྱ་མང་པོ་རྗེས་སུ་བཟུང་བ་བཅས། མདོར་ན་བདག་ཉིད་ཆེན་པོ་འདིའི་ལྗགས་དབུགས་ཀྱི་རྒྱུ་བ་ཚུན་རིས་སུ་མ་ཆད་པའི་རྒྱལ་བའི་བསྟན་པ་རིན་པོ་ཆེ་སྤྱི་དང་། ཁྱད་པར་སྔ་འགྱུར་རྒྱལ་བ་རྫོགས་ཆེན་པའི་བཤད་སྒྲུབ་ལས་གསུམ་གྱི་བསྟན་པ་ལ་སྨན་པའི་ཐུགས་བསྐྱེད་ཟབ་མོ་གནང་བཞིན་འཚོ་ཞིང་གཞེས་པ་ནས། ཇི་སྲིད་བསྐལ་པ་རྒྱ་མཚོར་ཞབས་པད་རྡོ་རྗེའི་ཆོས་བདུན་གྱི་ངོ་བོར་བརྟན་ཅིང་བསྟན་འགྲོའི་བཞེད་དོན་མཐའ་དག་གེགས་མེད་ཡིད་བཞིན་དུ་འགྲུབ་པའི་སྨོན་འདུན་ཡང་ཡང་ཞུ་བ་ལགས་སོ། །

སྨྲས་པ།

བགྲང་མེད་བསྐལ་མང་འདས་པའི་སྔོན་རོལ་ནས། །བདེ་གཤེགས་རིན་ཆེན་གཙུག་ཏུ་སངས་རྒྱས་ཀྱང་། །བརྩེ་ཆེན་ཐུགས་རྗེའི་ཉམ་ཐག་གདུལ་བྱའི་ངོར། །སྐྱེས་རབས་ངོ་མཚར་ཕྲེང་བ་བློ་ལས་འགོང་། །རྨད་བྱུང་མཁས་བཙུན་གྲུ༵བ་པའི་ཡོན་ཏན་འབུམ། །མ་ལུས་བདག་གིར་ཐོ༵བ་པའི་སྙེམས་པ་ཡིས། །བསྟན་འཛིན་རྐང་འཐུངས་ཚལ་ན་པ༵དྨ༵་ལྟར། །མངོན་པར་འཕགས་པའི་རི༵ག་འཛི༵ན་མཆོག་གཅིག་རྒྱལ། །ཀུན་ཁྱབ་འགྱུ༵ར་མེ༵ད་འོད་གསལ་སེམས་ཀྱི་གཤིས། །མངོན་སུམ་ངོ་སྤྲོད་ཐེ༵ག་མཆོ༵ག་རྫོགས་པ་ཆེའི། །བསྟ༵ན་པའི་སྲོག་འཛི༵ན་ཆོས་ཀྱི་རྒྱལ་པོ་ཡི། །སྤྲུལ་བའི་རྣལ་རོལ་ངོ་མཚར་རྨད་དུ་བྱུང་། །ཐེག་པའི་ཡང་རྩེ་ངེ༵ས་དོ༵ན་སྙིང་པོའི་ཆོས། །གསང་རྒྱུད་བསྟ༵ན་པ་བཀའ་གཏེར་དག་སྣང་གི། །རིང་ལུགས་མི་ཉམས་འཛི༵ན་སྲུང་སྤེལ་བ་ལ། །གཞན་དྲིང་མི་འཇོག་བཟ༵ང་པོ༵འི་མཛད་པ་མང་། །མི༵་འགྱུ༵ར་དག་པ་སྟོང་ཆེན་ཆོས་ཀྱི་དབྱིངས། །སྤྲོས་མཚན་ཀུན་བྲལ་ན༵མ་མཁ༵འི་རྣལ་འབྱོར་ལ། །དགོངས་པ་འུབ་ཆུད་རྡོ༵་རྗེ༵འི་ཐུགས་ལྡན་པ། །འོད་གསལ་བསྟན་པའི་ཤིང་རྟ་མཆོག་ཏུ་གྲུབ། །ཐུ༵བ་བསྟ༵ན་སྙིང་པོ་གསང་ཆེན་སྔ་འགྱུར་པ། །ཆེ་བ་དྲུག་ལྡན་ཆོ༵ས་ཀྱི༵་རྒྱལ་ཐབས་ཀྱི། །བསྟན་པའི་གཙུག་རྒྱན་རྡོ༵་རྗེ༵་སློབ་དཔོན་གྱི། །ཆོས་སྲིད་མཛད་རྗེས་དཔོག་པའི་མཐའ་མ་རིག །འཇི༵གས་བྲ༵ལ་ཐུགས་བསྐྱེད་སྨོན་པ་རྒྱ་མཚོའི་སྟོབས། །དུས་སུ་སྨིན་པའི་རླུང་གིས་ཉེར་བསྐུལ་བས། །མ་ལུས་འགྲོ་ཀུན་བྱ༵ང་ཆུ༵བ་ཆེན་པོའི་སར། །མངོན་པར་སྦྱོར་བ་རྡོ༵་རྗེ༵འི་བླ་མར་ཤར། །འཕགས་ཆེན་དམ་པའི་སྤྲུལ་རབས་མུ་ཏིག་གི། །ཕྲེང་བ་བསྟར་ལ་བརྒྱུས་འདྲའི་དོ་ཤལ་འདི། །མཁས་བཙུན་བཟང་པོའི་ལང་ཚོ་མ་ཉམས་བཞིན། །རྒྱལ་བསྟན་མཆོད་སྡོང་མཛེས་པའི་རྒྱན་དུ་ངོམས། །རྨད་བྱུང་ཕན་བདེའི་འདབ་མ་ལྷུན་རྫོགས་པའི། །ཐུབ་བསྟན་ཀུན་ད་སྐྱོང་ལ་ཟླ་བྲལ་བ། །མཁྱེན་བརྩེའི་དཀྱིལ་འཁོར་ཡོངས་རྫོགས་ཉ་གང་ཟླ། །བསྟན་འཛིན་རྒྱུ་སྐར་ཚོགས་པའི་དབུས་ན་མཛེས། །ལེགས་བྱས་བསོད་ནམས་བརྒྱ་བའི་ཤིང་རྟ་ཡིས། །མངོན་པར་དྲངས་པའི་གསང་གསུམ་སྒྱུ་འཕྲུལ་གར། །དུ་མའི་སྐྱེས་རབས་ཡིད་བཞིན་དབང་གི་རྒྱལ། །སྔ་འགྱུར་བསྟན་པ་རྒྱ་མཚོའི་གཙུག་ན་མཐོ། །ཟླ་མེད་ཕྲིན་ལས་དོན་ཡོད་ཞགས་པ་ཡིས། །བསྟན་འགྲོའི་དགེ་མཚན་ཕྱོགས་སུ་སྡུད་མཛད་པའི། །ཆོས་ཀྱི་རྒྱལ་པོ་གདན་རབས་རིམ་བྱོན་གྱི། །ལེགས་མཛད་འོད་སྣང་ས་འདིར་ཕྱོགས་མེད་ཤར། །

ཞེས་བྱ་བ་ནི་ལུགས་གཉིས་ཆོས་སྲིད་ཀྱི་མངའ་བདག་བསྟན་བདག་གདན་རབས་རིམ་བྱོན་གྱི་རྟོགས་པ་བརྗོད་པའི་སྐབས་ཀྱི་ངལ་གསོ་བའི་ཚིགས་སུ་བཅད་པའི་ཕྲེང་བའོ། །

སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། ལུགས་གཉིས་ཆོས་སྲིད་ཀྱི་མངའ་བདག་བསྟན་བདག་གདན་རབས་རིམ་བྱོན་གྱི་རྟོགས་པ་བརྗོད་པའི་སྐབས་སྟེ་སརྒ་བཅུ་གཉིས་པ་རྫོགས་སོ།། །།