མདོས།

མདོས་ཀྱི་ཁུངས་ནི། སྲིད་མདོས་ལས། བཙན་རྗེ་ནི་ཅི་ལ་དགྱེས། ཟ་བ་ནི་ཤ་ལ་རྔམ། འཐུང་བ་ནི་ཁྲག་ལ་ཧབ། ལེན་པ་ནི་སྲོག་དབུགས་ལེན། སྡོངས་པ་ནི་བགེགས་དང་སྡོངས། འགྲོགས་པ་ནི་གཉན་དང་འགྲོགས། མགོན་པ་ནི་བཙན་བོན་མགོན། འཚེ་བ་ནི་གསས་ལ་འཚེ། ཞེས་པ་ལྟར། གདོད་མའི་བཙན་བོན་སོགས་ཀྱིས་དམར་མཆོད་བྱེད་པ་དེ་གཤིན་རབ་མི་བོ་ཆེས་ཐུགས་ལ་མ་བབས་པར། དཀར་མཆོད་དུ་བསྒྱུར་བ་ཡིན་ཏེ། སྲིད་པ་སྤྱི་མདོས་ལས། བདུད་བོན་གྱི་དམར་ཐབས་ལ། །གཤེན་རབ་ནི་ཅི་དགྱེས་ཏེ། །ཁྱབ་པ་ནི་ཆམ་ལ་ཕབ། །འབྲུ་དཀར་ནི་གཏོར་མས་མཆོད། །དམར་ཐབས་ནི་འདྲེས་བྱུང་ན། །གཤེན་རབ་ནི་ཅི་དགྱེས་ཏེ། །གདོན་འདྲེ་ནི་ཆམ་ལ་ཕབ། །འབྲུ་དཀར་གྱི་ཡུ་རིས་མཆོད། །ཤེ་ཚུ་ཡི་འདྲེས་བྱུང་ན། །གཤེན་ལྷ་ལ་ནོངས་པ་མཐོལ། །ཞེས་པ་ལྟར། གཤེན་རབ་མི་བོ་ཆེ་དམར་མཆོད་ལ་ཐུགས་མ་དགྱེས་པས་དཀར་མཆོད་དུ་བསྒྱུར་བར་བཤད་ཡོད་ལ། ཁྱད་པར་དུ། ཞང་བོད་ཏི་སེའི་འོད་ཅེས་པར། དེ་དག་གིས་དམར་མཆོད་བྱེད་སྲོལ་ཡོད་པ་ལ། གཤིན་རབ་མི་བོ་ཆེ་མ་དགྱེས་ནས། བདུད་བོན་དང་གདོན་བོན་རྣམས་ཆམ་ལ་ཕབ། དེ་དག་གི་སྤྱོད་ཚུལ་དུ་སེམས་ཅན་གྱི་རིགས་གང་ཞིག་བསད་ནས་ཤ་རུས་ཀྱི་མཆོད་པ་བྱེད་སྲོལ་ཡོད་པ་དེ་དག་གི་ཚབ་ཏུ། འབྲུ་དཀར་གྱི་གཏོར་མས་འཐུས་པར་བྱས་པ་དང་། ཤེ་ཚུ་སྟེ་ཁྲག་གི་སྐྱེམས་འབུལ་སྲོལ་ཡོད་པ་དེའི་ཚབ་ཏུ་ཡུ་ཏི་སྟེ་འབྲུ་ཆང་གིས་འཐུས་པར་བྱས་པའི་མདོས་ཆོག་གི་སྲོལ་གསར་དུ་བཏོད། ཅེས་གསུངས་པ་ལྟར་རོ། །

བོན་ཤེས་པ་ཅན་མི་བཅུ་གཉིས་ཀྱི་ནང་གསེས་ལྡིང་ཤེས་ཤྭ་བ་བྱ་བ་ཡང་། ཤྭ་བ་རུས་རྒྱས་ཀྱི་མདོས་ཆོག་ལ་མཁས་པ་ཞིག་སྟེ། དེ་ཡང་། ས་ཡི་སྙིང་བོ་ལ་རིན་ཆེན་བདར་ཏེ། ཤྭ་བའི་གཟུགས་བརྙན་བཟོས། གཞོགས་གཡས་སྟོད་དུ་དཀར་བོ། སྨད་དམར་བོ། གཞོགས་གཡོན་སྟོད་དུ་སྔོན་པོ། སྨད་སེར་བོ། མཇུག་མ་ནག་པོ། འཕོངས་དཀར་བོ། སྒབ་སེར་བོའི་ཚོན་གྱིས་བསྒྱུར། རྭ་གཡས་པ་ཕོ་ཤིང་། གཡོན་པ་མོ་ཤིང་། བྱ་ངན་སྣ་ཚོགས་ཀྱིས་སྒྲོ་སྤུ་བཙུགས། སྐུད་པ་ནག་པོའི་རྒྱུད་ཁ་དར་ལ་བཏགས་པའི་རྟེན་ཞིག་བཟོ་དགོས་ལ། བོན་གཤིན་རྣམས་ཀྱིས་སྒྲུབ་རྟགས་ཐོན་ཚེ། ཤྭ་བ་དེ་མདོས་གཞིའི་སྟེང་དུ་ལྡིང་ཐུབ་པའི་ནུས་མཐུ་ཡོད་པས་ལྡིང་ཤེས་ཤྭ་བ་ཟེར་རོ། །

བོད་ཀྱི་ལོ་རྒྱུས་འགར། རྒྱལ་བོ་པུ་དེ་གུང་རྒྱལ་གྱི་དུས་སུ་འབྲས་བུའི་བོན་རིགས་ལྔ་དང་རྒྱུའི་བོན་རིགས་བཞི་དར་བའི་ནང་ནས། འཕྲུལ་གཤེན་བལ་ཚོན་ཅན་གྱིས་མི་ཕྱུགས་ཀྱི་སྲོག་ཚབ་ཏུ་བལ་སྐུད་ལྔ་ལས་སླེས་པའི་ཁང་བཟང་གི་ནང་དུ་བག་ཟན་ལས་བཟོས་པའི་གླུད་ལ་ཆས་གོས་གཡོགས་ཏེ། གདོན་བགེགས་ཀྱི་གནོད་པ་སེལ་ཐབས་སུ་སྲོལ་གཏོད་པར་བཤད་ཀྱང་། དེ་ནི་ཆོ་གའི་རྣམ་པ་ཇེ་རྒྱས་སུ་བཏང་བ་ལས་སྲོལ་ཕྱེས་པར་མི་སེམས་སོ། །ཕྱིས་སུ་རྣམ་པ་སོར་བཞག་གིས་ནང་དོན་གྱི་ཆ་ལ་སོ་སོའི་ཆོས་ལུགས་དང་མཐུན་པར་མདོས་ཆོག་བྱེད་སྲོལ་དར་བ་ཡིན་ནོ། །

རྣམ་པ་གཞན་དུ་ན། འགའ་ཞིག་རྟོག་གེའི་རིགས་པས་མདོས་ཀྱི་རྣམ་བཞག་ཅི་ཡང་མེད་པར་བརྒྱ་བཞི་དང་། ཁ་འབར་མའི་ཆོ་ག་སོགས་ལ་དཔེ་བླངས་པའི་རང་བཟོའི་ཆོག་བསྒྲིགས་བྱས་པས་སྙིང་བོ་ཅི་ཡང་མེད་པར་འདོད་ལ། ནང་བ་ཁ་ཅིག་མདོས་ཀྱི་མ་ཁུངས་སྟོན་པའི་མདོས་ཆེན་རྣམ་བཞི﹙ཤེར་སྙིང་བདུད་བཟློག བརྒྱ་བཞི། འབར་མ སྒྲོལ་མའི་གཡུལ་བཟློག་བཞིའོ། །﹚ལས་དར་སྤེལ་བྱུང་བར་ཡང་འདོད་ལ།

ཤེར་སྙིང་བདུད་བཟློག་ལྟ་བུར་མཚོན་ནའང་། སྟོན་པ་སངས་རྒྱས་ནས་བརྒྱུད་དེ། རྒྱ་གར་མཁས་གྲུབ་རྣམས་ཀྱི་ཐུགས་བཅུད། དཔལ་ལྡན་ཨ་ཏི་ཤའི་ཡི་དམ། ཁྱད་པར་དུ་གྱི་ལྗང་ལོ་ཙཱ་བའི་ཕྱག་ལེན་མཛད་པ་ཡིན། དེ་ཡང་། ཀུ་ལོར་ཞེས་པས་གཤིན་རྗེ་དམར་ནག་དང་མུན་པ་དམར་ནག་སོགས་ཀྱིས་མངོན་སྤྱོད་གནང་སྟེ་སེམས་ཅན་མང་བོ་མཐུས་སྒྲོལ་བ། ཀྱི་ལྗང་དབུ་དཀར་བས་མ་བཟོད་པར་ཉིན་གཅིག་ཀུ་ལོར་སྐྱེམས་དྲངས། གོས་སྐོན་ཏེ། ཁྱེད་ལ་མཐུ་མྱུར་བོ་ཞིག་བདོག་ཀྱང་། ཕྱི་མར་རྣམ་སྨིན་ལྕི་ཚུལ་སོགས་ཞུས་པས། ཀུ་ལོར་ཁྲོས་ཏེ། ཁྱེད་ཞག་བདུན་ཕན་དུ་མི་བཞག་ཅེས་མནའ་བོར་ཏེ་སོང་། དེ་ནས་དབུ་དཀར་བས་མདོས་འདི་བསྒྲུབས་པས། ཞག་བདུན་ན་ཀུ་ལོར་རང་ཐུ་རང་ལ་ཕོག་སྟེ་གྲོངས་པ་དང་། ཡང་། རྒྱ་ནག་གི་ཕ་འཚོ་བྱ་བ་ཞིག་ལ་རྒྱལ་བོས་གནོད་པས། རྩིས་མཁན་གྱི་ངག་བཀོད་བཞིན་བུ་ཆུང་གི་རོ་ལ་གཏོ་བྱས་ནས་ཇ་སིག་ཅིག་གི་ནང་བཅུག་ནས་དབུས་སུ་སྤྱུགས། ཇ་སིག་དེ་འཕན་ཡུལ་དུ་དགེ་སེར་གྱིས་ཉོས་པ་ལ། རྒྱལ་བོས་དགེ་སེར་ལ་གནོད་ནས་རྟ་བོང་ཐམས་ཅད་མེད་པར་བྱས་པར་མ་ཟད། རྒྱལ་བོ་དངོས་སུ་སྣང་རྒྱུ་ཡོད་པ་ཞིག་ཏུ་གྱུར། དགེ་སེར་གྱིས་ཁྱེད་ཅི་ལ་འཇིགས་ཞེས་དྲིས་པས། ང་ཀྱི་ལྗང་དབུ་དཀར་བར་འཇིགས་ཟེར། དགེ་སེར་གྱིས་དེ་ཡོད་སའི་ལམ་རྒྱུས་སོགས་ང་ལ་ཤོད་དང་དབུ་དཀར་བ་གསད་དེ་ཁྱེད་ལ་འཇིགས་པ་མེད་པ་བྱ་ཞེས་བསླུས་ནས། སྒྲུབ་ཐབས་དང་གདམས་པ་བླངས་ཏེ་བདུད་བཟློག་འདིས་རྒྱལ་བོ་བསྐྲད་ཚུལ་དང་། གནོད་པ་བཟློག་ཚུལ་སོགས་ཡོན་ཏན་རྒྱ་མཚོ་མཐའ་ཡས་སྡེའི་ཤེར་སྙིང་བདུད་བཟློག་སོགས་ན་བཤད་ཡོད་པ་དང་།

བཅས་ཐབས་ལ། གཞི་མ་དཀར་བོའི་དབུས་སུ་ཐུབ་དབང་གི་སྐུ་བྲིས་འབུར་གང་རུང་བཞུགས་སུ་གསོལ། མདུན་དུ་ཉེར་སྤྱོད་བཤམས། གཞི་དེའི་ཤར་དུ་ལྷའི་བདུད་མི་དཀར་རྟ་དཀར་ཅན། གཡས་མེ་ཏོག་དང་གཡོན་ཞགས་པ་བཟུང་བ་བདུན། ཁལ་མ། ཁྱི། ཆངས་བུ། ཤ་ཏིག མཐེབ་ཀྱུ་སོགས་ཀྱང་བདུན་རེ། དེ་བཞིན། ལྷོར་ཉོན་མོངས་པའི་བདུད་མི་སེར་རྟ་སེར་ཅན། གཡས་རལ་གྲི་དང་གཡོན་ཞགས་པ་འཛིན་པ་བདུན། ནུབ་ཏུ་ཕུང་བོའི་བདུད་མི་དམར་རྟ་དམར་ཅན། གཡས་མདུང་དང་གཡོན་ཞགས་པ་འཛིན་པ་བདུན། བྱང་དུ་འཆི་བདག་གི་བདུད་མི་ནག་རྟ་ནག་ཅན། གཡས་ཁྲམ་ཤིང་དང་གཡོན་ཞགས་པ་འཛིན་པ་བདུན་བཀོད་དོ། །གཞན་ཁལ་མ་སོགས་གོང་དང་འདྲ་ལ། དེ་རྣམས་མལ་གཞི་ནག་པོ་བཏང་ལ་དར་བཞག ཡང་སྣོད་སོ་སོར་ཞལ་ཟས་གཅིག གཏོར་མ་མེ་ཏོག་དབྱིབས་ཅན་དམར་བོ་གཅིག དཀར་གཏོར་གཅིག དམར་གཏོར་གཅིག་དང་བཞི་བཤམས། ངར་མི་རྒྱན་ཅན་ཞིག་ཁ་ཕར་ལ་བསྟན། ཐུབ་དབང་གི་སྐུ་སོགས་ཞལ་རང་ལ་སྟོན་དགོས་ལ། །སྒྲུབ་ཐབས་སོགས་ཆོ་ག་ན་གསལ་ལོ། །

མདོས་རྫས་བསྐྱལ་ཕྱོགས་ཀྱང་། ནད་པའི་ཆེད་ཡིན་ན་དུར་ཆེན་ནམ་རི་ཐོག མཐུ་བྱེད་ན་དགྲ་ཕྱོགས། སྤར་ཁ་བཅོས་པ་ཡིན་ན་གཞི། གཤེད་དང་བདུན་ཟུར་དགྲ་ཐོག་གམ་གནོད་ཕྱོགས། རིམས་ནད་བཟློག་ན་ལམ་མདོ། རྒྱལ་བོའི་གནོད་པ་ཡིན་ན། ལྷ་ཁང་ངམ་མཆོད་རྟེན་རྩར། འདྲེས་གནོད་ན་གྲོང་མདོ་འམ་ལུང་གསུམ་མདོ། ཆར་འབོད་དམ་ཀླུས་གནོད་ན་ཆུ་མིག་དང་། མདོར་ན་གང་དང་གང་གིས་གནོད་ན་དེ་དང་དེར་བསྐྱལ་དགོས་སོ། །

བརྒྱ་བཞིའི་ཆོ་ག་འདི་ཡང་། སྟོན་པ་སངས་རྒྱས་ནས་བརྒྱུད་པར་བཤད་དེ། འགྱུར་མེད་རྡོ་རྗེའི་བརྒྱ་བཞིའི་ཆོ་ག་འདོད་དོན་ལྷུན་གྲུབ་ལས། སྔོན་ལྷའི་དབང་བོ་བརྒྱ་བྱིན་བསྙུན་གྱིས་ཟིན་པ་ན། སྟོན་པ་བཅོམ་ལྡན་འདས་ལ་གསོལ་བ་བཏབ་པས་བཅོམ་ལྡན་འདས་ཀྱིས་བདུད་བཞིས་ཟིན་པར་མཁྱེན་ནས། བརྒྱ་བཞི་ཆོ་ག་འདི་མཛད་པས། བརྒྱ་བྱིན་བསྙུན་ལས་ཐར་ནས་བདེ་བ་ལ་བཀོད། དེ་ལྟར་ཕན་ཡོན་ཆེན་པོ་དང་ལྡན་པའི་ཆོ་གའི་རྫས་ལས་བརྒྱ་བཞི་མཚན་དུ་གྲགས་པ་དེ་ཉིད། འཕགས་པ་ཀླུ་སྒྲུབ་ཀྱི་ཕྱག་ཏུ་བབས་པས། རྡོ་རྗེ་གདན་གྱི་ཀ་གདན་སྤྲེའུ་འདྲ་བ་ལ་གཏེར་དུ་སྦས་པ་པཎྚིཏ་ལྔ་བརྒྱས་བཏོན་ནས་གནུབས་སངས་རྒྱས་ཡེ་ཤེས་རིན་པོ་ཆེ་ལ་བསྩལ། དེས་བོད་དུ་བསྣམས་ནས་གཞན་ཕན་འཕྲིན་ལས་རྒྱ་ཆེན་པོ་མཛད་པའོ། །ཆོ་ག་དེ་ལའང་། མདོ་ལུགས་དང་སྔགས་ལུགས་ཞེས་ཐ་དད་དུ་ཡོད་པ་ལས། འདི་ཉིད་མདོ་ལྟར་དུ་གྲགས་པའི་ལུགས་སོ། །གཞན་སྔགས་ལུགས་གཤིན་རྗེ་ནག་པོའི་རྒྱུད་ལས་བཏུས་པ། རྡོ་རྗེ་གདན་ནས་བཏོན་ཏེ་ཨོ་རྒྱན་ཆེན་པོ་སོགས་བརྒྱུད་པར་གྲགས་པའི་ཡི་གེ་ཟུར་བའི་བླ་མ་གོང་མ་རྣམས་ཀྱིས་ཕྱག་ལེན་དུ་མཛད་པ་ཞིག་སྣང་བ་ནི། ཡི་གེ་རྙིང་བ་ན་གསལ་བར་འདུག་པ་ལས་ཤེས་སོ། །བརྒྱ་བཞི་ཉམས་སུ་བླངས་པའི་ཐབས་ལ། ས་ཕྱོགས་གཙང་མར་མཎྜལ་པདྨ་འདབ་བརྒྱད་ཀྱི་ལྟེ་བར་མཆོད་སྦྱིན་གྱི་ཕྱག་གཡས་འབྲི། དེ་ཡང་མཆོད་རྟེན་ལྟར་བྱེད་ན། ཕྱོགས་བཞིར་ས་ཙྪ་ཉེར་ལྔ་བང་རིམ་སོགས་ལ་བཀོད། དབུས་སུ་མཉྫུའི་སྟེང་དུ་ཐུབ་དབང་གི་སྐུ། སྦྱིན་བདག་གི་གླུད་ཆེ་བ་མཉྫུའི་འོག་ཏུ་ཆུང་ཙམ་གཅིག་ལ་གོས་རས་གླུད་དང་རྫས་དང་ཁྲམ་ཤིང་གཟུགས། མཆོད་པ་རྣམ་ལྔ་དང་གཏོར་ཚོགས། འབྲིང་རྒྱས། རིན་ཆེན་ཕྱེ་མ་སོགས་བཤམས། ཕུང་བོའི་བདུད་སེལ་བ་ལ་སྐུ་གདུང་གི་མཆོད་རྟེན་བརྒྱ། ཉོན་མོངས་པའི་བདུད་སེལ་བ་ལ་མར་མེ་བརྒྱ། ལྷའི་བུའི་བདུད་སེལ་བ་ལ་ལྷ་བཤོས་བརྒྱ། འཆི་བདག་གི་བདུད་སེལ་བ་ལ་ངར་གླུད་བརྒྱ། མར་མེ་བརྒྱ་ནི། མཐོང་ལམ་རྙེད་པ་ལ་བརྟེན་ནས་བྱམས་པའི་སྦྱིན་པ། ས་ཙྪ་བརྒྱ་ནི། ཚོགས་ལམ་རྙེད་པ་ལ་བརྟེན་ནས་སྐྱབས་སྦྱིན་པ། གཏོར་མ་བརྒྱ་ནི། སྦྱོར་ལམ་རྙེད་པ་ལ་བརྟེན་ནས་ཟང་ཟིང་གི་སྦྱིན་པ། ངར་གླུད་བརྒྱ་ནི། སྒོམ་ལམ་རྙེད་པ་ལ་བརྟེན་ནས་སྲོག་གི་ལན་ཆགས་སྦྱོང་བས་ཆོས་ཀྱི་སྦྱིན་པའོ། །

དེ་ལྟ་བུའི་ཆོ་ག་འདི་ཡར་གྱི་ལྷ་རྒན་མཆོད་ཅིང། མར་གྱི་འདྲེ་སྲི་བཀར་བ། བར་གྱི་ཁྱིམ་ཐབ་འདོན་པ་གནད་དུ་བཟུང་བ་ལས་གཞན། དགེ་འདུན་གྱི་མདོ་སྒྲུབ་པ། འཕྲིན་ལས་རྣམ་བཞི་སྒྲུབ་པ། སྐྱེ་བོའི་ཡམ་ག་དར་བ་དང་། རྦོད་གཏོང་གནོད་པ། མི་ཁ་བྱ་བ། བན་བོན་གྱི་ཕུར་ཁ་ཟུག་པ་དང་། གཏད་ཆུད་པ་དང་། དགྲ་རྐུན་མང་བ་དང་། སྐྱེ་བོའི་ཡ་ག་ངན་པ་དང་། མིའི་ཤི་ཁ་བྱེད་པ་དང་། ཕྱུགས་ནད་གོད་ཁ་བྱུང་བ། ཡུལ་དུ་ནད་རིགས་དར་བ་དང་། ཁྱད་པར་རྒྱལ་འགོང་དང་ཡི་དྭགས་ཞུགས་པ་དང་། གཟའ་སྐར་ངན་པ་ལ་ཤི་བ་དང་། ལུས་སྲོག་དབང་ཐང་རྒུད་པ་དང་། རླུང་རྟ་ལ་དགྲ་དར་བ་དང་། ཀེག་ཆགས་ཆེ་བ། སྲིའུ་དང་ནད་པ་ཅིས་ཀྱང་མ་གསོས་པ་སོགས། མདོར་ན་མི་མཐུན་པའི་འགལ་རྐྱེན་སེལ་བ་སོགས་ཕན་ཡོན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །ཞེས་གསུངས་ལ།

གང་ལྟར་བན་བོན་གཉིས་འདྲེས་ཀྱི་མདོས་ཆོག་འདིའི་རིགས་ཆུ་ལ་ཆུ་བཞག་གི་ཚུལ་དུ་སིམ་ཡོད་ལ། རྙིང་མ་བར་མཚོན་ནའང་། སློབ་དཔོན་གྱིས་ཆོས་རྒྱལ་ཁྲི་སྲོང་ལྡེ་བཙན་ལ་གནང་སྟེ་འབུམ་ཐང་དུ་གཏེར་དུ་སྦས་པ་གཏེར་སྟོན་རྒྱལ་མཚན་པས་བཏོན་པའི་མདོས་ཆོག་འཕྲུལ་མིག་གསུམ་པ་སོགས་མདོ་ཁམས་ཕྱོགས་སུ་དར་རྒྱས་ཆེ་ཞིང། མདོས་མང་བོ་ཞིག་གཏེར་ཆོས་སུ་སོང་གཤིས་དཀྲུགས་སྡེབ་ཏུ་གྱུར་བ་དང་། གྲོང་སྔགས་བླུན་པོ་འགའ་ཞིག་གིས་རང་བཟོ་བསྡེབས་པ་དང་། ཡིག་རྒྱུན་མ་དག་པ། ཆད་ལྷག་དང་སླད་སྐྱོན་བྱུང་བ་སོགས་ཀྱང་མང་དུ་སྣང་ངོ་། །

ཁ་འབར་མ་ཡང་། སྤྱིར་ན་ཁ་འབར་མ་འདི། དཔལ་ལྡན་ལྷ་མོའི་རྒྱུད་རྣམས་ལས། ནག་མོ་ཆེན་མོ་ཁ་འབར་མ། །ཞེས་ངོ་བོ་དཔལ་ལྡན་ལྷ་མོ་དང་དབྱེར་མེད་པར་བཤད་ཀྱང་། རྣམ་པ་ཡི་དྭགས་ཀྱི་ཚུལ་བཟུང་ནས་བགེགས་རིགས་ཐམས་ཅད་ལ་དབང་བསྒྱུར་བའི་རྒྱལ་མོ་རྡོ་རྗེ་གདན་གྱི་ཆོས་སྐྱོང་དྲག་རྩལ་ཅན་ཡིན་པས། སྟོན་པའི་ཞལ་ནས། ང་ལ་སྟོན་པར་ཁས་ལེན་ན། འཕྲོག་མ་བུ་ལ་ཆངས་བུ་བྱིན། ཞེས་གསུངས་པ་ལྟར། ཁ་འབར་མར་གཏོར་མ་བཏང་ནས་ཚོགས་བསགས་པ་དང་། འཆི་བ་ཟློག་པ། བྱད་དང་དགྲ་ཟློག་པ། ལན་ཆགས་སྦྱོང་བ་སོགས་ཡོད་ལ། བཅའ་ཐབས་ཡང་། ལྕགས་གཟེར་མེད་པའི་གཞོང་བའི་ནང་དུ། ཁྲོ་ཞལ་ཁ་གདངས་པ། ཁ་སྣ་གཉིས་ལས་དུ་བ་འཐུལ་བ། ནུ་མ་རྐྱལ་བ་འདྲ་བ། ལྟོ་བ་ཆེ་ཞིང་གཉེར་མའི་གང་བ། རྐང་ལག་ཕྲ་ཞིང་མོ་མཚན་རྒྱས་པ། སོ་གཅིག་པ། ལག་གཡས་ཀྱིས་ཆངས་བུ་ལེན་པ། གཡོན་དུ་མར་མེ་ཐོགས་པ། རྐང་བ་ཕྱེད་སྐྱིལ་དང་། དེའི་མདུན་དུ་ཡོན་བདག་གི་གཟུགས་གླུད་དང་བཅས་པ། ཕྲག་གཡས་སུ་ཡོན་བདག་གི་ལོ་གྲངས་རི་མོ་བྲིས་ལ་གཟུགས། དྲི་གླུད་ཀྱིས་བསྐོར་བ། རྒྱབ་ཏུ་ས་གཞོང་གཙང་མ་ལ་ཆངས་བུ་དང་འབྲས་ཆན་ཆུ་དཀར་གྱིས་གང་བ་བཤམས་པ་སོགས་ཁ་འབར་མའི་གཏོར་མ་གཏོང་ཚུལ་རྒྱས་པར། ཀརྨ་ཆགས་མེད་ཀྱི་ཁ་འབར་མའི་ཟིན་བྲིས་སོགས་ལས་ཤེས་པར་བྱའོ། །དེ་ལས་གཞན། ཁ་འབར་མའི་གཏོར་མ་གཏོང་ཚུལ་དང་བཅའ་ཐབས་སོགས་མང་དུ་ཡོད་དེ། སྔོན་དབུས་གཙང་དུ་ཁ་འབར་མའི་དཔེ་རིགས་མི་འདྲ་བ་བསྡུ་སྒྲིག་བྱས་པ་སྒྲོམ་གང་ཡོད་པའི་ལོ་རྒྱུས་ཡང་འདུག་གོ །

སྒྲོལ་མའི་གཡུལ་བཟློག་ཡང་། རྒྱལ་བས་ལུང་བསྟན་ཅིང་སྒྲོལ་མའི་རྒྱུད་ལ་བརྟེན་ནས་གྲུབ་པ་འཐོབ་པ་ཀླུ་སྒྲུབ་ཀྱིས་མཛད་ནས། སྐལ་ལྡན་རྣམས་ལ་གནང་བ་བརྒྱུད་དེ་ཨ་ཏི་ཤས་བོད་དུ་བསྣམས་ནས་ཕེབས། ཇོ་བོ་མྱ་ངན་ལས་འདའ་ཁར་ན་བཟའི་གསེབ་ལས་བཏོན་ཏེ་འབྲོམ་སྟོན་ལ་གནང་ནས་དར་སྤེལ་བྱུང་བ་ཡིན།

དེ་ཡང་། སྔོན་རྒྱ་གར་ཤར་ཕྱོགས་ཀྱི་རྒྱལ་བོ་ཞིག་གིས། མུ་སྟེགས་སྐད་ཆེན་གྱི་བུ་བསད་པས། མུ་སྟེགས་པས་རྒྱལ་བོ་འཁོར་བཅས་ཀླུ་ལ་གཏད། སང་ནུབ་ཕོ་བྲང་དུ་ཀླུ་སྦྲུལ་ཆེན་པོ་ཧ་ཧ་ཟེར་བ་བྱུང་བས། རྒྱལ་འབངས་འཁོར་བཅས་བརྒྱལ་ཞིང་འཆི་ལ་ཐུག་པའི་ཚེ། པཎྚིཏ་ཞིག་གིས་མདོས་ཆོག་འདི་བསྒྲུབས་པས། མུ་སྟེགས་པའི་སྤྱི་བོ་མཆུས་གཞིབ་སྟེ་ཤི་བ་དང་། ཡང་། ཟ་ཧོར་གྱི་རྒྱལ་བོ་ཞིག་གིས་སྡེ་བརྒྱད་དྲག་ཤུལ་ཅན་ཐམས་ཅད་ཁྱད་དུ་གསད། མི་དགེ་བའི་སྤྱོད་པ་སྣ་ཚོགས་བྱས་པས། ལྷ་འདྲེ་ཐམས་ཅད་ཁྲོས་ཏེ། ཐབས་གང་གིས་ཀྱང་མ་ཕན་པས། མདོས་ཆོག་འདི་བྱས་པས་མི་ནོར་སོགས་རྒྱས་པའི་ལོ་རྒྱུས་ཀྱང་ཡོད།

བཅས་ཐབས་ཀྱང་། གནས་ཁང་གི་གོང་དུ་པད་འདབ་ཀྱི་སྟེང་སྒྲོལ་མའི་སྐུ་བྱིན་ཅན་བཞུགས་སུ་གསོལ། ཉེར་སྤྱོད་འདོད་ཡོན་དང་བཅས་པའི་མཆོད་པ་གང་བཟང་དང་གཏོར་མ་གསུམ་བཤམས། སྒྲོལ་མའི་དབུ་ལ་དར་དཀར་གྱི་གུར་ཕིབ། རིན་ཆེན་བརྡར་བའི་འཇིམ་པ་ལ་སྤེའུ་ལྕགས་རི་དང་བཅས་པ་ཇི་ལྟར་འཚམ་པའི་ནང་། ངར་མི་མཐོ་གང་བ་གསེར་གཡུས་བརྒྱན་པ་རྟ་ལ་བསྐྱོན། གཡོན་དུ་ནམ་མཁའ་དང་རྒྱངས་བུ་གསུམ་གསུམ། ཕོ་གདོང་མོ་གདོང་། མདའ་ཁྲ་འཕང་ཁྲ་དང་བཅས་པའང་གསུམ་གསུམ་ལས་མི་ཉུང་བ་གཟུགས། རིན་ཆེན་བརྡར་བའི་ཟན་ལ་ངར་མི་སུམ་ཅུ། མཛོ་རྟ་གཡག་ལུག་རི་དྭགས་སོགས། ས་ལ་འཛུལ་དགུ། གནམ་ལ་འཕུར་དགུ བར་ལ་འགྲིམ་དགུའོ། །ས་ལ་འཛུལ་དགུ་ནི། ༡ ཤེས་བྱ་ཀུན་མཁས་སྐྱེ་འགྲོ་མི། ༢ ཤུགས་ཆེན་བཀྲ་ཤིས་རྫས་གྱུར་དུང་དཀར། ༣ དུས་འཁོར་ཆགས་ཚུལ་ལྡན་པའི་རུས་སྦལ། ༤ རྐང་ལག་ནང་སྦས་འགྲོ་ཤེས་སྦྲུལ་ནག ༥ དགུན་དུ་ཉལ་ཆོག་སྒོམ་ལྡན་འཕྱི་བ། ༦ མི་གཙང་གྲིབ་སེལ་ཚངས་ལྡན་གྲིམ་པ། ༧ རིག་རྣོ་གཞན་སེལ་ཤེས་པའི་སྲེ་མོང་། ༨ ཀུན་ཤེས་ཚོད་ལ་མཁས་པའི་ཅོ་ག ༩ ལུས་རྐེད་ཕྲ་ཡང་རྩལ་ཆེན་གྲོག་མའོ། །གནམ་ལ་འཕུར་དགུ ༡ ཀུན་ཟིལ་ནོན་པའི་བྱ་རྒྱལ་ཁྱུང་ཆེན། ༢ དབྱར་དགུན་མཚམས་འབྱེད་སྒྲ་བརྒྱའི་གཡུ་འབྲུག ༣ འཕུར་རྩལ་ནམ་འཕང་གཅོད་པའི་རྒོད་པོ། ༤ སྐད་སྙན་དུས་ཀྱི་ཚོད་འཛིན་ཁུ་བྱུག ༥ དུག་འཇོམས་སྒྲོ་མཛེས་རྨ་བྱ། ༦ དྲན་གསལ་མི་སྐད་སྨྲ་བའི་ནེ་ཙོ། ༧ ཉིན་ཞག་དུས་ཤེས་ཁྱིམ་བྱ། ༨ ལྷ་མིའི་འཕྲིན་སྐྱེལ་ལྕེ་བདེ་ཕ་ཝང་། ༩ ཐོགས་མེད་འཕུར་ཤེས་རྫི་བྱའོ། །དེ་ལས་གཞན། གཟུགས་དང་། འབྲུ་སྣ། ཟས་སྣ། རིན་པོ་ཆེ། ཇ་གོས་སོགས་ལྕགས་རིའི་ནང་བཀང་བར་བྱས། ལ་དགུ་ལུང་དགུའི་ས་སྣ་ཆུ་སྣ། ངར་མིའི་སྟེང་དུའང་དར་དཀར་གྱི་གུར་དང་། མདའ་དར་གཟུགས་སོ། །

ད་ལྟའི་མདོས་ཀྱི་རྣམ་པ་མང་ཆེ་ཤོས་ནི། དར་སྐུད་ཚོས་གཞི་སྣ་ཚོགས་ཀྱིས་ལྷས་བཏགས་བྱས་པའི་ཁང་བཟང་གི་ནང་དུ། རྒྱལ་གཟུགས་དང་མི་ཕྱུགས་ནད་པ་སོགས་ཀྱི་གཟུགས་བརྙན་དང་། མཐའ་བསྐོར་དུ་ཤིང་བྱང་སྣ་ཚོགས་ཀྱི་ངོས་སུ། གནམ་ལ་འཕུར་དགུ། ས་ལ་འཛུལ་དགུ། རི་དྭགས་འཕྱོ་དགུ གཅན་གཟན་སྡེར་དགུ་བཅས་ཀྱི་གཟུགས་བརྙན་བྲིས་པ་བཙུགས། དེ་ཡང་། དགུ་རྫས་འདི་མདོས་ཆོག་ཏུ་མང་དུ་འབྱུང་སྟེ། དཔེར་ན། ཀརྨ་ཆགས་མེད་ཀྱི་འདྲེ་མོ་རྫ་མདོས་ལས། རྫ་མ་ཁ་དགུ་ལུང་དགུ་བཞེས། །འབྲུ་སྣ་དགུ་ལ་གཤེད་དེ་གཤེགས། །ནམ་མཁའ་དགུ་ལ་གཟིགས་ཏེ་གཤེགས། །རྒྱངས་བུ་དགུ་ལ་བལྟས་ཏེ་གཤེགས། །མདའ་བཀྲ་དགུ་ལ་གསོར་ཏེ་གཤེགས། །འཕང་བཀྲ་དགུ་ལ་གཤེད་དེ་གཤེགས། །སྲེ་ལོང་དགུ་ལ་ཞོན་ཏེ་གཤེགས། །ལྟག་རུས་དགུ་ལ་བསྐོར་ཏེ་གཤེགས། །ཐོད་རུས་དགུ་ལ་བསྣམས་ཏེ་གཤེགས། །འགལ་བ་དགུ་ལ་བབ་སྟེ་གཤེགས། །འབྲང་རྒྱས་དགུ་ལ་གསོལ་ཏེ་གཤེགས། །མར་མེ་དགུ་ལ་བཤུས་ཏེ་གཤེགས། །ར་དགུ་ཁྱི་དགུ་ཕག་དགུ་དང་། །བ་དགུ་མཛོ་དགུ་རྟོལ་བུ་དགུ། །སྦྲུལ་དང་སྦལ་བ་ལྕོང་མོ་དང་། །དགུ་དགུ་འདུས་པའི་ཡས་སྟགས་རྣམས། །ཞེས་པ་ལྟ་བུ་དང་། དེའི་མཐའ་བསྐོར་དུ་ཟས་སྣ། གོས་སྣ། དར་སྣ། འབྲུ་སྣ། རིན་ཆེན་སྣ་ལྔ། བཤོས་བུ། ཏིང་ལོ། ཆིངས་བུ། མཐེབ་ཀྱུ། ཤ་མར་ཇ་ཆང་སོགས་བཟའ་བཏུང་གི་རིགས། གོས་དར། རས་སྣམ། པགས་རིགས། ལ་དགུ་ལུང་དགུའི་ས་སྣ་ཆུ་སྣ། མདའ་ཁྲ། འཕང་ཁྲ། ཕོ་གདོང་མོ་གདོང་སོགས་ལྷ་འདྲེ་མགུ་བའི་རྫས་རྫོང་སྣ་མང་ཡོད་པ་ཞིག་ཡིན། ཆེ་ཆུང་གི་ཚད་འབྱོར་འཁོས་དང་བསྟུན་ཏེ་འཐུས་ཚང་མི་ཚང་སྣ་ཚོགས་ཡོད་ལ། ཧ་ཅང་སྟབས་བདེ་བོའི་སྒོ་ནས་འཕེན་པའི་མདོས་ཀྱང་ཡོད་དོ། །

མདོས་ཆོག་གི་རྫས་ལ། ཡ་སྟགས་ཞེས་ཀྱང་བརྗོད་ལ། ཨ་ཀྱཱ་ཡོངས་འཛིན་གྱི་བརྡ་བཀྲོལ་དུ་དེ་ནི་བོན་ཆོག་ལ་དགོས་པའི་རྫས་ཀྱི་མིང་དུ་འགྲེལ་ཡོད། དེ་ཡང་། ཞིབ་ཆ་བཀར་ན། སྟེང་མ་ལྷ་སོགས་ཀྱི་མཆོད་རྫས་ལ་ཡས་སྟགས་དང་། འོག་མ་གདོན་བགེགས་འགོང་བོ་སོགས་ལ་སྦྱིན་པ་ལ་མས་སྟགས་ཟེར་རོ། །ཡས་སྟགས་ཀྱི་རྫས་ཡང་གང་བྱུང་དུ་མི་ཆོག་སྟེ། རིག་སྔགས་འཆང་བ་རྣམས་ཀྱིས་སྔགས་དང་། བསམ་པའི་ཁྱད་པར་གྱིས་གདོན་བགེགས་སོགས་ཚིམ་པའི་ཕྱིར་བྱིན་གྱིས་བརླབས་པའམ་ནུས་མཐུས་བསྒྱུར་པ། དེ་ཡང་མང་དུ་སྤེལ་བ་ནི། ལྷ་འདྲེ་དེ་དང་དེའི་མཐུན་རྫས་ཡིན་ནོ། །

མདོས་འབུལ་ཡུལ་ཡང། ཨ་པང་གཏེར་ཆེན་གྱི་ཤེར་སྙིང་བདུད་བཟློག་ལས། འདོད་པའི་ཡོན་ཏན་རྒྱ་ཆེ་རྒྱུན་རིང་བ། །འཛད་མེད་ནམ་མཁའ་མཛོད་ཀྱི་གཏེར་ཆེན་པོ། །སྣང་ཞིང་སྲིད་པའི་ལྷ་འདྲེ་ཡོངས་ལ་འབུལ། །ཁྱད་པར་བདུད་ཀྱི་རྒྱལ་བོ་མདོས་ལ་གཤེགས། །ལྷ་ཀླུ་གཟའ་བཙན་མ་མོ་མདོས་ལ་གཤེགས། །ཡུལ་ལྷ་གཞི་བདག་གཉན་པོ་མདོས་ལ་གཤེགས། །སྣང་སྲིད་ལྷ་འདྲེ་མ་ལུས་མདོས་ལ་གཤེགས། །ཞེ་སྡང་ལས་གྱུར་རྒྱལ་བོ་མདོས་ལ་གཤེགས། །འདོད་ཆགས་ལས་བྱུང་བསེན་མོ་མདོས་ལ་གཤེགས། །གཏི་མུག་ལས་བྱུང་ས་བདག་མདོས་ལ་གཤེགས། །སྔོན་གྱི་ལན་ཆགས་བདག་པོ་མདོས་ལ་གཤེགས། །འཕྲལ་གྱི་བུ་ལོན་བདག་པོ་མདོས་ལ་གཤེགས། །མ་འོངས་ཤ་འཁོན་བདག་པོ་མདོས་ལ་གཤེགས། །ཕྱི་ཡི་དགྲ་འདྲེ་རྐྱེན་གསུམ་མདོས་ལ་གཤེགས། །ནང་གི་ནད་གདོན་བར་ཆད་མདོས་ལ་གཤེགས། །གསང་བ་དུག་ལྔའི་ལྷ་འདྲེ་མདོས་ལ་གཤེགས། །མདོས་རྫས་དཀོར་ཆས་རྣམས་ཀྱིས་ཐུགས་དམ་བསྐང་། །ཞེས་དང་། ཀརྨ་ཆགས་མེད་ཀྱི་སྡོང་བོ་རྒྱན་མདོས་ལས་ཤ་གླུད་ས་ལ་གནས་པའི་ལྷ་འདྲེ་དང་། ཁྲག་གླུད་ཆུའི་ལྷ་འདྲེ་དང་། དྲོད་གླུད་མེ་ལ་གནས་པའི་ལྷ་འདྲེ་དང་། དབུགས་གླུད་རླུང་ལ་གནས་པའི་ལྷ་འདྲེ་དང་། རུས་གླུད་བྲག་ལ་གནས་པའི་ལྷ་འདྲེ་དང་། རྩ་རྒྱུས་གླུད་ཤིང་ལ་གནས་པའི་ལྷ་འདྲེ་དང་། པགས་གླུད་ཐང་ལ་གནས་པའི་ལྷ་འདྲེ་དང་། སེམས་ཉིད་ཀྱི་གླུད་མཁའ་ལ་གནས་པའི་ལྷ་འདྲེ་ལ་འབུལ་བར་བཤད་དོ། །

མདོས་ཀྱི་དབྱེ་བ་ལ། པདྨ་གར་དབང་བློ་གྲོས་མཐའ་ཡས་ཀྱི་གཏེར་གཞུང་ལས། དབྱེ་བ་ཞི་རྒྱས་དབང་དྲག་ལས། །ནད་དང་གནོད་པ་ཞི་བའི་མདོས། །ཚེ་དང་བསོད་ནམས་རྒྱས་པའི་མདོས། །སྣོད་བཅུད་དབང་དུ་བསྡུས་པའི་མདོས། །ཕྱི་ནང་བར་ཆད་བསྲུང་བའི་མདོས། །ཆག་ཆེ་ཉམ་ང་བཟློག་པའི་མདོས། །ཞིང་བཅུའི་དགྲ་བགེགས་བསད་པའི་མདོས། །བསྐང་བའི་མདོས་དང་བཤགས་པའི་མདོས། །སྤྱི་ཡི་མདོས་དང་སྒོས་ཀྱི་མདོས། །ཕོ་མོ་དང་ནི་མ་ནིང་མདོས། །དེ་ལ་བྱེ་བྲག་བསམ་མི་ཁྱབ། །ཅེས་སོ། །

ཡང་། ཐུའུ་བཀྭན་ཆོས་ཉིས་མདོས་གླུད་ནི། འཇིག་རྟེན་པ་ཁོ་ནས་མཆོད་པ་ཡིན་ཀྱང་། དེ་ལག་ལེན་དུ་བགྱིས་པ་སོགས་བྱས་ན་སྐྱབས་འགྲོའི་བསླབ་བྱ་དང་འགལ་བའི་ཉེན་ཡོད་མོད་ཀྱང་། འཇིག་རྟེན་པ་དེ་དག་ལ་དགའ་བའི་རྫས་སོགས་བྱིན་ནས་གནས་སྐབས་ཀྱི་གྲོགས་བཅོལ་བ་ཙམ་ཡིན་པས་བསླབ་བྱ་དང་མི་འགལ་བར་གསུངས་སོ། །

རྣམ་གྲངས་ལ། རྒྱལ་མདོས། ཀླུ་མདོས། བཙན་མདོས། སྤར་ཁའི་སྤྱི་མདོས། སྡོང་བོ་རྒྱན་མདོས། སྡེ་བརྒྱད་ཁང་མདོས། ཤེར་སྙིང་བཟློག་མདོས། ཁ་འབར་མའི་མདོས། ས་བདག་མདོས། གཤེད་མདོས། ས་སྒོ་དང་ནམ་སྒོ་གཅོད་པའི་མདོས། རི་སྒོ་དང་རླུང་སྒོ་གཅོད་པའི་མདོས། གླིང་བཞི་སྤྱི་མདོས། དྲི་ཟ་བཟློག་མདོས། གཤིན་རྗེ་གདོན་མདོས། མ་མོའི་ཁྲག་མདོས། དམ་སྲི་གླུད་མདོས། སྡེ་བརྒྱད་ཁེངས་མདོས། ཐེའུ་རང་དཀར་མདོས། འགོང་བོ་དཀར་མདོས། ཕྱུགས་གླུད་དཀར་མདོས། ཆོམ་རྐུན་བཟློག་མདོས། མི་ཁ་དགྲ་མདོས། མྱ་ངན་དགུ་མདོས། ཐན་ལྟས་བཟློག་མདོས། དུར་སྒོ་བཟློག་མདོས། ཤི་འདྲེ་གླུད་མདོས། བྱིས་པའི་ཆུང་སྲི་མདོས། རྨི་ལམ་འཁྲུགས་མདོས། རྟ་ནད་གཅོད་མདོས། ལུག་ནད་གཅོད་མདོས། གྲིབ་མདོས། ཁ་ཚེ་བཟློག་མདོས། མཚོ་སྨན་དགུ་མདོས། བདུད་བཞི་གཡུལ་མདོས། ཚེ་བདུད་བཟློག་མདོས། མདོས་གཞུང་བཀྲ་ཤིས་འཁྱིལ་བ། དམ་སྲིའི་གླུད་མདོས་སོགས་མང་དུ་ཡོད་དོ། །ཡང་གཟི་བརྗིད་སྣང་གཤེན་ཐེག་པའི་མདོ་ལས། མདོས་ལ་རྣམ་པ་གསུམ་ཡིན་ཏེ། །ཕྱི་མདོས་ནང་མདོས་གསང་མདོས་གསུམ། །ཕྱི་མདོས་སོག་ཁྲིག་ལག་ལེན་རྫས། །ནང་མདོས་གླུད་ཡས་གྱེར་དང་སྨང་། །གསང་མདོས་ཏིང་འཛིན་དགོངས་པའི་རྫས། །གསུམ་ཀ་ཟུང་འབྲེལ་འགྲོ་བ་སྐྱོབ། །དང་བོ་ཕྱི་མདོས་སོག་ཁྲིག་ལག་ལེན་ལ། །རྒྱས་འབྲིང་བསྡུས་གསུམ་སྐབས་དང་སྦྱར། །རྒྱས་པ་དག་ལ་ཁྲི་འགྱུར་འབུམ། །འབྲིང་བོ་དག་ལ་སྟོང་འགྱུར་བཅུ། །ཐ་མ་དག་ལ་བརྒྱ་འགྱུར་འབུམ། །ཡང་ཐ་དག་ལ་བཅུ་འགྱུར་བཅུ། །ཞེས་ཀྱང་བཤད་དོ། །

བྱེ་བྲག་ལྷ་འདྲེ་སོ་སོའི་མདོས་བསྐྱལ་ཕྱོགས་དང་ཕན་ཡོན་ནི། ཀརྨ་ཆགས་མེད་ཀྱིས་སྡེ་བརྒྱད་ཁེངས་མདོས་ལས། གཟའ་མདོས་དེ་ཕུལ་བ། ཕུག་པ་བྱང་གྱུ་འམ། དུར་ཁྲོད་དམ། རི་མཐོན་པོའི་རྩེ་ལ་བཞག དེས་གཟའ་ནད་མི་འབྱུང་། ཐོག་སེར་མི་འོང་བསམ་པ་འགྲུབ་བོ། །ཐེའུ་རང་མདོས་ནི། ས་ཕུག་སྟོང་བའམ་གད་པ་སྟོང་བར་བསྐྱལ་ལོ། །དེ་ལྟར་བྱས་པས་ཕོ་ནད་ཞི། ར་ལུག་འཕེལ་ལོ། །ལྷའི་མདོས་དེ་ས་མཐོ་སར་བཞག་གོ ། དེ་ལྟར་བྱས་པས་ནོར་གོད་ཆད། གནག་ཕྱུགས་འཕེལ་ལོ། །གཤིན་རྗེ་མདོས་དེ། ནགས་ཚལ་ལམ། ཤིང་གཅིག་སོགས་སུ་བཞག་གོ ། དེ་ལྟར་བྱས་པས་དུས་མིན་འཆི་བ་བཟློག་ཅིང་ཚེ་རིང་ངོ་། །མ་མོའི་མདོས་དེ། བྲག་གི་སྐར་ཁུང་ངམ། དེའི་ཐད་དུ་འབུལ། བྲག་གམ་རིའི་གནམ་སྒྲོན་གཤིན་རྗེའི་མཆེ་ཟུར་མཐོང་ས། དེ་མ་རྙེད་ན་རི་གཉིས་གཤིབ་པའི་བར་དུ་བཞག་གོ། དེས་རིམས་ནད་དང་ཡམས་ནད་ཆད་ཅིང་མི་འབྱུང་ངོ་། །ཐན་པ་དང་ལོ་ཉེས་མི་འབྱུང་ངོ་། །བདུད་ཀྱི་མདོས་དེ། བྲག་ནག་གམ། རི་ནག་ཕ་བོང་ནག་པོའམ། གད་པ་ནག་པོའི་རྩར་བཞག་གོ། དེས་མི་ལ་ཤི་ཆད་ཉུང་། དགྲ་མི་འབྱུང་ངོ་། །བཙན་མདོས་ནི། བྲག་དམར་བོ་ཡི་རྩ་བའམ། རིའམ་དེའུ་དམར་བོ། རྒྱ་ལམ་དམར་བོའམ། ལ་བཙས་སོགས་ཀྱི་དྲུང་དུ་བཞག་པར་བྱའོ། །དེས་རྟ་ནད་དང་རྟ་གོད་ཆད། འཐབ་རྩོད་དང་གྲི་འཁྲུག་ཞིའོ། །རྒྱལ་བོའི་མདོས་དེ། ཚྭ་ཁང་ངམ། མཆོད་རྟེན་ནམ། གྱང་རལ་ལམ། མ་ཎི་བརྒྱ་མཁར་སོགས་སུ་བཞག་གོ ། དེས་སངས་རྒྱས་ཀྱི་བསྟན་པ་དར། དགོན་གནས་ཡུལ་གྲོང་བརྟན། སྨྱོ་འབོག་ཞིའོ། །གནོད་སྦྱིན་མདོས་དེ། སྣང་གཡེར་ཆེ་སར་བཞག་གོ ། དེས་ལྷོག་པ་སོགས་ནོར་ནད་ཐམས་ཅད་ཆད་དོ། །འབྲུ་འཕེལ་ལོ། །ཀླུའི་མདོས་དེ། ཆུ་མིག་ཏུ་བསྐྱལ་ལོ། །དེས་མཐའ་དམག་དང་དུས་འཁྲུག་ཐོག་སེར་ཀླུ་ནད་ཞིའོ། །ཞེས་གསུངས་སོ། །

ཡང་། སྤར་སྨེའི་སོགས་གེགས་རྩུབ་ལ་བལྟས་ཏེ་མདོས་གང་གཏོང་ནི། སྡེ་བརྒྱད་ཁེངས་མདོས་ལས། ལི་ལ་བཙན་མདོས་ཁོན་ལ་མ་མོའི་མདོས། །དྭ་ནི་སྐྱེས་ཕྲན་ཐེའུ་རང་སྐྱེས་བུའི་མདོས། །ཁེན་ནི་གནམ་ལྷ་ཡིན་ཕྱིར་གཟའ་མདོས་བྱ། །ཁམ་ནི་མི་ནག་རལ་ཆེན་བདུད་ཀྱི་མདོས། །གིན་ལ་དཀོར་བདག་རྒྱལ་བོའི་མདོས་བྱའོ། །ཟིན་ནི་ལྗང་གུ་གནོད་སྦྱིན་མདོས་བྱའོ། །རི་རབ་ཡོད་ཕྱིར་རི་རབ་བརྩེགས་མདོས་ཚང་། །ཟོན་ནི་གཤེད་སྒོ་ཡིན་ཕྱིར་གཤིན་རྗེའི་མདོས། །སྨེ་བ་གཅིག་དཀར་དྲུག་དཀར་ལྷ་ཡི་མདོས། །གཉིས་ནག་བདུད་དང་གསུམ་མཐིང་དམུ་བདུད་དེ། །གཉིས་ཀ་ལ་ཡང་བདུད་ཀྱི་མདོས་བྱའོ། །ཀླུ་ནི་གཙོ་བོ་ཡིན་ཕྱིར་ས་བདག་དེ་ཡི་འཁོར། །བཞི་ལྗང་ཀླུ་ཡིན་ལྔ་སེར་ས་བདག་སྟེ། །གཉིས་ཀ་ལ་ཡང་ཀླུ་ཡི་མདོས་བྱའོ། །བདུན་དམར་དགུ་དམར་ལ་ཡང་བཙན་གྱི་མདོས། །བརྒྱད་དཀར་དགྲ་ལྷའི་རྒྱལ་བོ་བེ་དཀར་མདོས། །སྤར་ཁ་གང་དང་སྨེ་བ་གང་ལ་རྩུབ། །ལེགས་པར་རྩིས་ལ་དེ་ཡི་མདོས་བྱའོ། །དེ་བཞིན་གཟའ་ནད་ཅན་ལ་གཟའ་ཡི་མདོས། །ཕོ་ལྷོག་གླང་ཐབས་དུག་ཏུ་མཁྲིས་པའི་ནད། །དེ་ལ་ཐེའུ་རང་མདོས་ཀྱིས་ཕན་པའོ། །གཞི་བདག་ཕོག་ཐུག་ཤོར་ན་ལྷ་མདོས་བཅའ། །ཤི་ཆད་མང་ན་གཤིན་རྗེ་མདོས་ཀྱིས་ཕན། །རིམས་ནད་ནོར་ནད་གཅོད་ལ་མ་མོའི་མདོས། །ན་ཚ་རྒོད་དང་གང་བསམ་ལོག་པར་འགྲོ། །དེ་ལ་བདུད་མདོས་བྱས་ན་ཕན་པའོ། །ཁྲག་སྐྱུག་རྟ་གོད་རྨ་ངོ་བཙན་མདོས་བྱ། །རྒྱལ་འགོང་གནོད་པ་ཆེ་ན་རྒྱལ་མདོས་བྱ། །གོད་ཁ་ཆེ་ཞིང་ལྟོགས་འགོང་ཞུགས་པ་ན། །གཏེར་བདག་གནོད་སྦྱིན་མདོས་ཀྱིས་ཕན་པའོ། །སྤྱི་མདོས་བཅས་པ་དེ་དག་ཀུན་ལ་ཕན། །གསུངས་སོ། །