གདན་རབས་གཉིས་པ། ཐུགས་སྲས་ཐུ་བོ་དཔོན་སློབ་ནམ་མཁའ་འོད་གསལ་ནི།
དེ་ལྟར་གྲུབ་པའི་དབང་ཕྱུག་པདྨ་རིག་འཛིན་མཆོག་ལས་རྩ་བའི་ཆོས་བརྒྱུད་འཛིན་པ་ཐུགས་སྲས་ནམ་མཁའ་འོད་གསལ་ཏེ། དམ་པ་འདི་ནི་རྗེ་བཙུན་བཞད་པ་རྡོ་རྗེའི་ཐུགས་སྲས་རས་ཆུང་ཞི་བ་འོད་དང་། བཱི་མའི་ཐུགས་བཅུད་སྙིང་ཐིག་བསྟན་པའི་བཀའ་བབ་གྲུབ་ཆེན་མེ་ལོང་རྡོ་རྗེ་སོགས་མཁས་དང་གྲུབ་པའི་སྐྱེ་སྤྲུལ་ཇི་སྙེད་བཞེས་པའི་མཐར། བོད་རབ་བྱུང་བཅུ་གཅིག་པའི་དཀྱིལ་སྟོད་ཙམ་དུ་མདོ་ཁམས་ཤོད་ཆེན་བཅོ་བརྒྱད་ཀྱི་ནང་ཚན་ནག་ཤོད་དུ་གྲགས་པའི་གནས་སུ། ཡབ་སེར་ཚ་གྲུབ་ཐོབ་ཅེས་འཇིགས་མེད་བརྟུལ་ཞུགས་ཀྱི་སྤྱོད་པས་སྣང་སྲིད་ཀྱི་དྲེགས་པ་བྲན་དུ་བཀོལ་ཞིང་། དྲག་པོ་གཏོར་བཟློག་གི་ལས་ཚོགས་ལ་དབང་འབྱོར་བས་དུས་ཀྱི་མཐའ་དམག་བཟློག་ཅིང་བསྟན་ལ་འཚེ་བའི་སྡེ་ཚོགས་རྗེས་མེད་དུ་གཏོང་བ་སོགས་མཐུ་སྟོབས་ལ་མངའ་བརྙེས་པའི་གྲུབ་ཆེན་དེའི་གདུང་རིགས་སུ་སྐུ་འཁྲུངས། བྱིས་པའི་དུས་ནས་སྔོན་གོམས་ཀྱི་ལས་འཕྲོ་སད་པས་རྟོགས་པའི་གདེང་ཚད་མཐོན་པོ་ལྡན་ཞིང་། འདྲེ་སྲིན་གདུག་ཅན་གནས་པའི་བྲག་རི་འུར་རྡོས་བསྙིལ་བ་དང་། སྐྱེར་པའི་མདའ་གཞུ་ནམ་མཁར་གཏད་པས་ཀྱང་སེར་བ་བཟློག་པ་སོགས་གྲུབ་པའི་མངོན་རྟགས་མཐའ་ཡས་པ་འབྱམས་སུ་ཀླས། མི་རིང་བར་བཀའ་བརྒྱུད་པའི་གྲུབ་ཆེན་ཞིག་ལས་རོ་སྙོམས་ཆོས་དྲུག་དང་། རས་ཆུང་སྙན་བརྒྱུད་སོགས་གདམས་སྐོར་དུ་མ་གསན་ནས་ཉམས་སུ་བླངས་པས་རྩ་རླུང་སེམས་གསུམ་ལ་དྲོད་ཚད་བརྙེས། དཔལ་གྱི་ཙ་རི་ཏྲ་སོགས་ངེས་མེད་གཉན་ཁྲོད་དུ་མར་ཕེབས་ཏེ་རིག་པ་བརྟུལ་ཞུགས་ཀྱི་སྤྱོད་པས་རྟོགས་པ་བོགས་འདོན་མཛད། རེ་ཞིག་ན་གྲུབ་དབང་མཆོག་མཁར་བར་བསམ་གཏན་བྲག་ཏུ་བཞུགས་པའི་སྙན་པ་གསན་ནས་ཞལ་མཇལ་ཞུས། སྐུའི་དཀྱིལ་འཁོར་མཐོང་བ་ཙམ་གྱིས་སངས་རྒྱས་དངོས་གཟིགས་ཀྱིས་སྐྱབས་གནས་གཅིག་ཆོག་ཏུ་བསྙེན། སྐུ་ཚེ་གང་པོར་འབྲལ་བ་མེད་པར་སྐུ་རྗེས་སུ་འབྲང་སྟེ་ཞབས་ཏོག་རྒྱ་ཆེར་བསྒྲུབས་པས་གྲུབ་དབང་མཆོག་གི་ཐུགས་བརྩེས་དགྱེས་བསྐྱངས་ཀྱིས་སྨིན་གྲོལ་གྱི་གདམས་ཁྲིད་སྤྱི་དང་། བྱེ་བྲག་སྙིང་ཐིག་གོང་འོག་གི་གདམས་ངག་ཟབ་ཁྲིད་ཐམས་ཅད་ཚང་སྤྲུགས་སུ་བསྩལ། ཆོས་ཕྱིར་དཀའ་སྤྱད་དྲག་པོས་དབེན་རིར་སྒྲུབ་པའི་རྒྱལ་མཚན་བཙུགས་ནས་ཡུན་རིང་བཞུགས་པས་རིག་པ་ཚད་ཕེབས་ཀྱི་ས་ལ་ཕྱིན་ཏེ་རྗེ་བླ་མ་དང་མཉམ་པའི་རྟོགས་པ་མངོན་དུ་གྱུར་པས་ནམ་མཁའ་འོད་གསལ་དུ་མཚན་གསོལ། ཏིང་ངེ་འཛིན་ལ་དབང་འབྱོར་པས་གཞན་རྒྱུད་ཀྱི་རྟོགས་པ་མཁྱེན་པ་དང་། ནང་འབྱུང་འོད་ལྔར་དྭངས་པས་སྐུ་ལུས་ལ་གྲིབ་གཟུགས་མེད་པ། ཆགས་ཐོག་བྲལ་པའི་མངོན་ཤེས་ཕྱོགས་མེད་དུ་ཤར་བ་སོགས་ལམ་རྟགས་ཀྱི་ཡོན་ཏན་ངོ་མཚར་བ་དུ་མ་མངའ། ཕྱིས་སུ་གྲུབ་དབང་རིན་པོ་ཆེ་མཆོག་ཞིང་གཞན་དུ་དགོངས་པ་ཕྱོགས་པའི་ཚེ་རྫོགས་ཆེན་མཁའ་འགྲོ་སྙིང་ཐིག་གི་བརྒྱུད་པ་འཛིན་སྐྱོང་སྤེལ་བའི་རྒྱལ་ཚབ་ཆོས་ཁྲི་ལ་མངའ་གསོལ་བར་མཛད། དེ་ནས་གདན་ས་ཆེན་པོའི་གཙུག་ལག་ཟུང་གི་མཛད་ཁྱབ་གོང་འཕེལ་དུ་བསྐྱངས་པ་དང་། ཁྱད་པར་ཆོས་ཀྱི་བཅའ་ཁྲིམས་ལེགས་པར་བསྡམས་ནས་ལོ་ལྟར་རྒྱུན་ཆགས་སུ་རྫོགས་ཆེན་མཁའ་འགྲོ་སྙིང་ཐིག་གི་ཉམས་ཁྲིད་ཐེངས་གཉིས་གསུམ་བསྩལ་ཏེ་དགོན་གྱི་གྲྭ་རིགས་རྣམས་དང་། ཕྱོགས་ཀྱི་ཆོས་ཞུ་བ་ཀུན་སེམས་ངོ་འཕྲོད་ནས་རྟོགས་པ་གོང་འཕེལ་གྱི་བརྟན་པ་མ་ཐོབ་བར་རྗེ་ཉིད་ཀྱི་ལག་ལེན་དམར་ཁྲིད་གནང་ནས་མཚམས་སྒོ་འདག་སྦྱར་གྱིས་སྒོམ་པ་ལ་སྦྱོར་བར་མཛད་ཅིང་། ལྟོ་གོས་ཀྱི་མཐུན་རྐྱེན་ཞན་པ་དག་ལ་མཚམས་རྒྱགས་ཉིད་ཀྱིས་བསྩལ་བ་སོགས་བཀའ་དྲིན་གསུམ་གྱིས་ལེགས་པར་བསྐྱངས་པས་ཐུགས་སྲས་རྟོགས་པ་མཆོག་ལྡན་གྱི་རྣལ་འབྱོར་མང་རབ་བྱོན། ལུགས་གཉིས་ཀྱི་མཁྱེན་སྒོ་ཡངས་པས་རྫ་ཁོག་ཏུ་ལེགས་དགོན་གསང་ཆེན་སྨིན་གྲོལ་ཆོས་གླིང་ཕྱག་འདེབས་དང་། གདན་ས་གོང་མར་རྟེན་བཞེངས་དུས་མཆོད་ཀྱི་རྒྱུན་གསར་དུ་བཙུགས་པ། གྲུབ་དབང་རིན་པོ་ཆེའི་ཡང་སྲིད་གསེར་ཁྲིར་བཀོད་དེ་སྐྱེད་སྲིང་གནང་བ་བཅས་བསྟན་འགྲོའི་འགྲོ་དོན་ཕྱོགས་བརྒྱར་སྤེལ། གསུང་ལས་སྐྱེས་པའི་ཞལ་སློབ་གཙོ་བོ་ནི་རྫོགས་སྤྲུལ་གཉིས་པ་འགྱུར་མེད་ཐེག་མཆོག་བསྟན་འཛིན་དང་། རྗེ་དབོན་པད་མ་ཀུན་གྲོལ་རྣམ་རྒྱལ་རྣམ་གཉིས་ཏེ་ཐུགས་སྲས་ཐུ་བོ་རྣམ་གཉིས་དང་། གཞན་ཡང་ཉི་གྲགས་རྒྱལ་སྲས་ཨོ་རྒྱན་བསྟན་འཛིན། ཉི་སྤྲུལ་གཉིས་པ་པདྨ་ཐེག་མཆོག་བསྟན་པའི་རྒྱལ་མཚན་སོགས་བཀའ་ཆོས་ཀྱིས་འབྲེལ་བའི་སློབ་ཚོགས་མཐའ་ཡས་པས་མདོ་སྨད་ཀྱི་ཁྱོན་ཀུན་ཁྱབ། མཐར་རབ་བྱུང་བཅུ་གཉིས་པའི་མེ་ཕོ་རྟའི་ལོར་སྐུ་ཚེ་དང་འགྲོ་དོན་མཐའ་རུ་ཕྱིན་ནས་དགོངས་པ་ཆོས་དབྱིངས་སུ་ཐིམ་པའི་ཚུལ་བསྟན། གདུང་དང་རིང་བསྲེལ་མང་དུ་འཕེལ་ཞིང་ཐུགས་ལྗགས་སྤྱན་གསུམ་མེས་མ་ཉམས་པར་མཆོད་པའི་རྟེན་སྐལ་དུ་བསྩལ་བ་བཅས་ཐེག་རྩེ་གསང་བའི་ཉེ་ལམ་ནས་ཀ་དག་ཆོས་སྐུའི་རྒྱལ་སར་དངོས་སུ་གཤེགས་པར་མཛད་དོོ། །དེ་ལྟར་དཔོན་སློབ་ནམ་མཁའ་འོད་གསལ་ནས་སྨིན་གྲོལ་བསྟན་པའི་སྲོག་འཛིན་གྲུབ་དབང་མཆོག་གི་སྤྲུལ་སྐུ་འགྱུར་མེད་ཐེག་མཆོག་བསྟན་འཛིན་དང་རྗེ་དབོན་པདྨ་ཀུན་གྲོལ་རྣམ་གཉིས་ཏེ།