རབ་བརྗིད་འཇིགས་བྱེད་ཆེན་པོའི་སྒྲུབ་ཐབས།
ཨོཾ་སྭཱ་སྟི། རབ་བརྗིད་འཇིགས་བྱེད་ཆེན་པོའི་སྐུ། །གང་ཞིག་སྒོམ་ལ་དངོས་གྲུབ་ཀུན། །ལྷུན་གྱིས་གྲུབ་ཅིང་བགེགས་འཇོམས་པ། །དེ་ལ་བཏུད་ནས་སྒྲུབ་ཐབས་བཤད། །བདག་བསྐྱེད་སྔོན་དུ་སོང་ནས། རང་གི་མདུན་དུ་པཾ་ལས་པདྨ། ཨ་ལས་ཉི་མ། ཧཱུཾ་ལས་རྡོ་རྗེ་ཧཱུཾ་གིས་མཚན་པ། དེའི་འོད་ཟེར་གྱིས་ནག་པོ་ཆེན་པོ་འཁོར་བཅས་སྤྱན་དྲངས། ཨོཾ་བཛྲ་ས་མཱ་ཛཿ ཡང་ཧཱུཾ་ལས་སྤྲོས་པའི་མཆོད་པའི་ལྷ་མོ་རྣམས་ཀྱིས་མཆོད་པར་གྱུར། ཨརྒྷཾ་ནས་ཤཔྟའི་བར་གྱིས་མཆོད། སྤྲོ་ན་རྐང་བརྒྱད་ལ་སོགས་པས་བསྟོད་ཅིང༌། བསྡུ་ན། འདུལ་དཀའ་མ་ལུས་འདུལ་བ་པོ། །རྫུ་འཕྲུལ་དངོས་གྲུབ་བདག་ཉིད་ཅན། །མ་མོའི་ཚོགས་ཀྱིས་ཕྱག་བྱས་པ། །དཔལ་ལྡན་ནག་པོ་ལ་འདུད་དོ། །ཞེས་བསྟོད། འདོད་ཆགས་ཞེ་སྡང་གཏི་མུག་དབང་གིས་ནི། །ཞེས་སོགས་རྒྱུན་བཤགས་བཟང་སྤྱོད་བཞིན་བྱ། ཨོཾ་ཨཿཧཱུཾ། བཛྲ་མཎྜལ་མུཿ
ཞེས་གཤེགས་སུ་གསོལ། འདི་ནི་གཞུང་གི་དགོངས་པ་ཇི་ལྟ་བ་ཡིན་ལ། མཎྜལ་མཆོད་ཆོག་རྒྱས་པ་ལ་སྤྲོ་ན། པཎྜི་ཏ་ནགས་རིན་གྱིས་སློབ་མ་རྣམས་ཀྱི་བཀོད་ཟིན་པ་ལྟར་རོ། །དེ་ནས་ཚད་མེད་བཞི་སྤྱི་དང་མཐུན། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་པདྨ་ལ་གནས་པའི་ཟླ་བ་ཧཱུཾ་ཡིག་དཀར་པོ་དང་བཅས་པ། དེ་ཡོངས་སུ་གྱུར་པ་ལས་རལ་གྲིའི་རྩེ་མོར་ཟླ་བ་ལ་ཧཱུཾ་ནག་པོ། དེ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། སླར་འདུས་ཏེ་ཐམས་ཅད་ཡོངས་སུ་གྱུར་པ་ལས། དཔལ་ནག་པོ་ཆེན་པོ་སྐུ་མདོག་ནག་པོ། ཞལ་གཅིག་ཕྱག་བཞི་སྤྱན་གསུམ་པ། ཕྱག་གཡས་གཉིས་ན། རལ་གྲི་དང༌། གྲི་གུགགཡོན་གཉིས་ན་རྩེ་གསུམ་དང་ཐོད་ཁྲག་འཛིན་པ། ཞབས་གཉིས་སེམས་དཔའི་སྐྱིལ་ཀྲུང་གིས་ཉི་མ་དང་དབུགས་བྲལ་གྱི་གདན་ལ་བཞུགས་པ། སྨ་ར་དང་སྨིན་མ་དམར་སེར་མེ་ལྟར་འབར་བ། རྡོ་རྗེ་སེམས་དཔའི་དབུ་རྒྱན་ཅན། སྟག་ལྤགས་གསར་པའི་ཤམ་ཐབས་དཀྲིས་པ། མི་མགོ་སྐམ་པོའི་ལྔ་དབུ་རྒྱན་དང༌། རློན་པ་ལྔ་བཅུའི་དོ་ཤལ་བྱས་པ། སྦོམ་ཐུང་གསུས་ཁྱིམ་རྒྱས་ཤིང༌། ཀླུ་ཆེན་པོ་བརྒྱད་ཀྱིས་བརྒྱན་པའོ། །སྙིང་གར་ཉི་མ་ལ་གནས་པའི་ཧཱུཾ་གི་འོད་ཟེར་གྱིས། ཡེ་ཤེས་སེམས་དཔའ་ནག་པོ་ཆེན་པོ་བཛྲ་ས་མཱ་ཛཿ ཨརྒྷཾ་ནས་
ཤཔྟའི་བར་གྱིས་མཆོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཡང་སྙིང་གའི་འོད་ཟེར་གྱིས་དབང་གི་ལྷ་རིགས་ལྔ་མདུན་གྱི་ནམ་མཁར་སྤྱན་དྲངས། པུཥྤེ་སོགས་ཀྱིས་མཆོད། ཨོཾ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། མཱ་མ་ཀཱི་ལ་སོགས་པ་ལྷ་མོ་རྣམས་ཀྱིས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་གསུངས་ཤིང་བདུད་རྩིའི་ཆུས་དབང་བསྐུར། དབང་གི་ལྷ་ཐམས་ཅད་ཀྱང་ཡེ་ཤེས་པའི་ཚུལ་གྱིས་ཐིམ། རང་གི་སྙིང་ག་ནས་འོད་ཟེར་འཕྲོས། སྤྱན་མ་ལ་སོགས་པ་ལྷ་མོ་རྣམས་ཀྱིས་མཆོད་པར་གྱུར། ཨརྒྷཾ་སོགས་ཀྱིས་ཕྱི་མཆོད་ཕུལ། ནང་མཆོད་ཡི་དམ་ལྟར་བྱིན་གྱིས་བརླབས་ནས། སྙིང་པོའི་མཐར་འབྲུ་གསུམ་བཏགས་པས་ཕུལ། གཏོར་མའང་ཡི་དམ་གྱི་མངོན་རྟོགས་ལྟར་བྱིན་གྱིས་བརླབས། བདུད་རྩི་འཁྱིལ་བའི་གཟུངས་ཀྱིས་མགོ་འདྲེན་པའམ། མ་ཡིན་ཀྱང་རུང་སྟེ། ན་མས་ས་མནྟ་ཀཱ་ཡ་ཝཱཀྐ་ཙིཏྟ་བཛྲི་ཎཾ། ཨོཾ་ཨཱཿཧཱུཾ། ཨོཾ་མཾ་མཾ་ཧཾ་ཧཾ་ཀཾ་ཀཾ་རཾ་རཾ་ར་ར་མ་ཧཱ་མ་ཧཱ་ཀཱ་ལ་ཡཾ། པིངྒོར་དྷ། ཀེ་ཤ་ཝརྡྷཱ་མ་ནེ། ཨི་མཾ་བཱ་ལིཾ་གྲྀཧྞ་གྲྀཧྞ། གྲྀཧྞ་པཱ་ཡ་གྲྀཧྞ་པཱ་ཡ། ཨོཾ་ཨཱཿཧཱུཾ། སརྦ་བིགྷྣཱན་བི་ནཱ་ཡ་ཀཱ་ན། ཨ་ཀཱ་རོ་བཏགས་པ་ལན་གསུམ་མམ་བདུན་གྱིས་ཕུལ། གོང་བཞིན་མཆོད་བསྟོད་བྱས་ནས། བཟླས་པའི་དམིགས་པ་གསལ་བཏབ་སྟེ། ཨོཾ་ཨཱཿམཾ་ཧཾ་རཾ་ཧཱུཾ་ཕཊ་སྭཱཧཱ། ཞེས་པ་ཅི་ནུས་བཟླ་ཞིང༌། མཐར་ཡང་གོང་བཞིན་མཆོད་
བསྟོད་བྱས་ནས། འདོད་དོན་གསོལ་བཏབ་དང༌། ཡི་གེ་བརྒྱ་པ་དང༌། བཟོད་པར་གསོལ་བ་སྤྱི་དང་མཐུན་པར་བྱས་ལ་གཤེགས་སུ་གསོལ་ལོ། །འདིའི་རྗེས་གནང་བྱ་བར་འདོད་ན། མཎྜལ་མཐིང་ག་གྲུ་གསུམ་ཚོམ་བུ་ནག་པོ་ཅན་ཞིག་བྱ། དེའི་སྟེང་དུ་གཏོར་མ་བཀོད། མཆོད་པ་བཤམ་ཚུལ་སོགས་འོག་མགོན་པོ་གུར་ཡུམ་ཅན་དང་འདྲ། བདག་བསྐྱེད་ནས་བཟླས་པའི་གོང་བཞིན་བྱས་ལ། རྗེས་གནང་དངོས་ཀྱི་བྱ་བ། མཎྜལ་རྒྱུན་བཤགས་གསོལ་བཏབ་རྣམས་ཀྱང་དེ་དང་མཐུན། སློབ་མ་ནག་པོ་ཆེན་པོར་བསྐྱེད་ནས། ཡེ་ཤེས་པ་བསྟིམ་པའི་བར་བྱ། སློབ་དཔོན་གྱི་གནས་གསུམ་དུ་ཧཱུཾ་དཀར་དམར་མཐིང་གསུམ་བཀོད་དེ། སློབ་མའི་གནས་གསུམ་དུ་རིམ་པས་བསྟིམ་པ་ལ། སྐུ་གསུང་ཐུགས་ཀྱི་རྗེས་གནང་དུ་མཛད་ཅིང༌། གཏོར་དབང་དང༌། བཟླས་ལུང་སྤྱི་དང་མཐུན་པར་བྱ། ལྷག་མ་རྣམས་གཞན་དང་མཚུངས་སོ། །བསྟན་བསྲུང་ཀུན་གྱི་གཙོ་བོ་ནི། །འདོད་དོན་ཀུན༵་གྱི་དག༵འ་བསྐྱེད་པ། །ཀླུ་སྒྲུབ་སྙིང༵་པོ༵འི་སྒྲུབ་ཐབས་བཞིན། །མདོ་ཙམ་ཡི་གེར་བཀོད་པའོ། །ཡེ་ཤེས་མགོན་པོ་ཕྱག་བཞི་པ་ཀླུ་སྒྲུབ་ལུགས་ཀྱི་སྒྲུབ་ཐབས་བཤད་པའི་ལེ་ཚན་ནོ།། །།མངྒ་ལཾ། །