དགུ་པ་སོ་སོ་ནས་སྤགས་པ་སློང་བའི་སྤང་བ་འཆད་པ།

དགུ་པ་སོ་སོ་ནས་སྤགས་པ་སློང་བའི་སྤང་བ་འཆད་པ་ལ།

རྩ་བར། སྦྱིན་པར་བྱེད་པ་སྤུངས་ཆེ་བ་ཡང་ངོ། །སྦྱོར་བ་གཅིག་པའི་ཕྱིར་ཐོབ་ན་གཅིག་ཉིད་དོ། །སོ་སོ་ནས་སྤགས་པ་སློང་བའི་སྤང་བའོ། །ཞེས་སོ། །འདིའི་དོན་ལ་བཞི་ལས། དང་པོ་གླེང་གཞི་དང༌། དགག་བྱ་དང༌། ངོ་བོ་གསུམ་ནི་སྔར་སྤགས་པ་སློང་བ་དང་འདྲ་བ་ལས། ཁྱད་པར་ནི་སྔར་ཁྱིམ་པ་ཕོ་མོ་གཉིས་ཀྱི་གོས་གཅིག་སྤགས་པ་ཡིན་ལ། འདི་ནི་ཁྱིམ་པ་ཕོ་མོ་གཉིས་ཀྱི་གོས་རེ་རེ་སོ་སོ་ནས་སྤགས་པས་ཁྱད་པར་དུ་བྱས་སོ། །བཞི་བ་ཡན་ལག་ལའང་གཞན་ཐམས་ཅད་སྔ་མ་དང་འདྲ་བ་ལས་འདིར་ཁྱད་པར་ནི་དགེ་སློང་ལ་གོས་དེ་དག་སོ་སོ་ནས་སྤགས་པར་བྱེད་པ་པོ་ཡིན་པ། སྦྱིན་བདག་སྤུངས་ཆེ་བ་དགོས་སོ། །སྤུངས་ཆེ་བའི་ཚད་ནི་འདིར་ཁྱིམ་པ་ཕོ་མོ་གཉིས་ཀྱིས་གོས་གཉིས་སོ་སོ་ནས་སྤགས་པར་ནུས་པའོ། །ཀུན་སློང་ནི་སོ་སོ་ནས་སྤགས་པ་དེ་ལས་ལྷག་པའི་གོས་སློང་བར་འདོད་པས་ཁྱད་པར་དུ་བྱས་སོ། །སྦྱོར་བའི་འཇུག་ཡུལ་གཅིག་ཅིང་སྦྱོར་བ་གཅིག་པའི་ཕྱིར་ན་ཆོས་གོས་སོ་སོ་བ་གཅིག་ཐོབ་ནའང་སྤང་བའི་ལྟུང་བ་གཅིག་ཉིད་ཡིན་ཏེ། ཊཱི་ཀ་ལས། གོས་སློང་བ་དང་སློང་བར་རིགས་པ་དང་སྤགས་པ་སློང་བ་ལ་སྦྱོར་བ་གཅིག་གིས་གོས་དུ་མ་ཐོབ་པ་དེ་དག་ལ་ལྟུང་བ་གཅིག་ཁོ་ནར་འགྱུར་རོ། །ལྷུང་བཟེད་དང་རས་ཆེན་ཐོབ་པ་ལ་ཡང་དེ་བཞིན་ནོ། །ཞེས་པས་སོ། །ལྟུང་བ་འདི་ལ་སོ་སོ་ནས་སྤགས་པ་ལས་ལྷག་པ་བསླང་བའི་སྤང་བའོ། །ཞེས་ལུང་རྣམ་འབྱེད་དང་དེའི་འགྲེལ་བ་དང་ཞུ་འགྲེལ་དང་གསུམ་ལས་གསུངས་སོ། ། བཅུ་བ་བསྐུར་བའི་སྤང་བ་འཆད་པ་ལ། རྩ་བར། བསྐུར་བ་རུང་བ་མ་ཡིན་པ། ཞེས་པ་ནས། བསྐུར་བ་དང་བསྡད་པ་ལྷག་གམ་ཁས་མ་བླངས་ནའོ། །བསླངས་ནའོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི། ཡུལ་མཉན་ཡོད་དུ་གང་ཟག་ཉེ་དགའ་ལ་ཉོན་མོངས་པ་འདོད་ཞེན་གྱིས་ཉེས་པ་བྲམ་ཟེ་དབྱར་ཚུལ་གྱིས་གོས་ཀྱི་རིན་ཀར་ཤ་པ་ན་བསྐུར་བ་དེ་སྤོས་འཚོང་གི་ཁྱེའུ་ལ་གཏད་ཅིང་ཧ་ཅང་བརྟུན་ངས་པས་བླངས་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་ཧ་ཅང་བརྟུན་ངས་པས་གཞན་ལ་གནོད་པ་དང༌། རང་འདོད་པ་ཆེས་པའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་གོས་སམ་གོས་ཀྱི་རིན་གྱི་རྙེད་པ་སྦྱིན་བདག་གིས་ཕོ་ཉ་བ་ལ་བསྐུར་ཞིང་ཕོ་ཉ་བས་ཞལ་ཏ་པ་ལ་གཏད་པའི་དངོས་པོ་དེ་བསྐུལ་བ་དང་བསྡད་པ་དྲུག་ལས་ལྷག་པར་བླངས་པའམ་མ་ལྷག་ཀྱང་སྦྱིན་བདག་གི་སེམས་བསྡུ་བར་ཁས་མི་ལེན་པ་ལས་བསླངས་པར་གྱུར་པའི་ལྟུང་བ་དངོས་གཞིའོ། །