བཅུ་ཚན་གཉིས་པ།
བཅུ་ཚན་གཉིས་པ་ལ།
བསྡུས་དོན་དང་སོ་སོར་བཤད་པ་དང་གཉིས་ལས། དང་པོ་ནི། སོར་སྡོམ་ལས། སྲིན་བལ་འབའ་ཞིག་ཆ་གཉིས་དང༌། །དྲུག་དང་མཐོ་གང་ལམ་དང་ནི། །འཁྲུ་བ་དང་ནི་གསེར་དངུལ་དང༌། །མངོན་མཚན་ཅན་དང་ཉོ་ཚོང་ངོ༌། །ཞེས་གཟུང་ངོ། །གཉིས་པ་སོ་སོར་བཤད་པ་ལ་བཅུ་ལས། དང་པོ་བཅུ་གཅིག་པ་སྲིན་བལ་གྱི་སྟན་བྱེད་པའི་སྤང་བ་འཆད་པ་ལ། བསླབ་པར་བྱ་བ་དང་ལྟུང་བའི་རྣམ་བཞག་གཉིས་ལས། དང་པོ་ནི། རྩ་བར།སྟན་བཅང་བར་བྱའོ། །ཞེས་བྱུང༌། སྟན་བཅང་བར་བྱ་སྟེ། གྲང་བ་བསྐྱབ་པའི་དོན་དུ་ཅི་བདེར་གནང་བའོ། །རྣམ་འབྱེད་ལས། སྟན་ནི་རྣམ་པ་གཉིས་ཏེ། ནང་ཚངས་ཅན་དང་གླིངས་པའོ། །ཞེས་གསུངས་ཏེ། འདིར་གཉིས་ཀ་གཟུང་བ་ཡིན་ནོ། །འོ་ན་སྟན་དང་གདིང་བ་གཉིས་མི་གཅིག་སྟེ།རྣམ་པ་དང༌། དགོས་པ་དང༌། གནང་བཀག་དང༌། ཚད་ཐ་དད་པའི་ཕྱིར་ཏེ། དང་པོ་ནི་གདིང་བ་ལ་ཉིས་རིམ་དང་གླེགས་བུའི་འཕྲོ་དགོས་པའི་ཕྱིར་དང༌། སྟན་ལ་ནི་དེ་དག་མི་དགོས་སོ། །གཉིས་པ་ནི་སྟན་གྱི་དགོས་པ་གྲང་བ་བསྐྱབ་པ་དང༌། གདིང་བའི་དགོས་པ་དགེ་འདུན་གྱི་གནས་མལ་བསྐྱབ་པ་དང་གང་ཟག་གི་གནས་མལ་ཁྲ་བོ་ཕལ་ཆེར་མ་ཉམས་པ་བསྐྱབ་པ་ཡིན་ནཽ། །གསུམ་པ་ནི། མདོ་སྡེ་ལས་གདིང་བ་ཕྲག་པས་བླངས་ནས། ཞེས་གསུངས་ལ། ཊཱི་ཀ་ལས། སྟན་ཕྲག་པས་བླངས་ནས་ཁྱེར་བ་ནི་ཚུལ་མ་ཡིན་པས། ཞེས་སོ། །བཞི་པ་ནི་གདིང་བའི་ཚད་འོག་ཏུ་འཆད་ཅིང༌། སྟན་གྱི་ཚད་ནི་ལུང་ཞུ་བ་ཆུང་ཤོས་དང་རྒྱ་ཆེ་འགྲེལ་ལས་སྟན་ཆེན་པོ་ནི་ཁྲུ་ཕྱེད་དང་ལྔའོ། །ཆུང་ངུ་ནི་ཁྲུ་ཕྱེད་དང་གསུམ་མོ། །འབྲིང་ནི་དེ་གཉིས་ཀྱི་བར་རོ། །ཞེང་ཚད་ནི་གདིང་བའི་ཚད་དང་མཉམ་མོ། །ཞེས་གསུངས་སོ། །དེས་ན་ཊཱི་ཀ་ལས། གདིང་བ་ནི་སྟན་མ་ཡིན་ཏེ། གདིང་བ་ནི་གོས་ཀྱི་ངོ་བོ་ཉིད་ཡིན། ཞེས་གསུངས་པས། སྲིན་བལ་གྱིས་གདིང་བ་བྱས་པ་ལ་ལྟུང་བར་མི་འགྱུར་བར་མཚོ་ཊཱིཀ་ལས་གསུངས་སོ། །གོས་ནི་སྲིན་བལ་ལས་བྱར་རུང་སྟེ། གོས་གཞི་ལས། སྲིན་བལ་གྱི་དང་ཤ་ནའི་དང་ཟར་མའི་རུང་ངོ། །ཞེས་པས་སོ། །