ཆོ་འཕྲུལ་སྨོན་ལམ་ཆེན་མོ།
ཆོ་འཕྲུལ་སྨོན་ལམ་ཆེན་མོ་ནི། སྤྱི་ལོ་སྔོན་གྱི ༥༡༡ ལོར་མེ་འབྲུག་ཟླ ༡ ཚེས ༡ ནས ༡༥ བར་སྟོན་པ་སངས་རྒྱས་ཀྱིས་མུ་སྟེགས་པའི་སྟོན་པ་དྲུག་འཁོར་དང་བཅས་ལ་རྫུ་འཕྲུལ་འགྲན་པ་དང་། ཁྱད་པར་དུ་ཚེས་བརྒྱད་ཉིན་རྫུ་འཕྲུལ་གྱི་དངོས་གཞི་ཚུགས་ནས། གདུལ་བྱ་རྒྱ་མཚོའི་མིག་སྔར་མུ་སྟེགས་སྟོན་པ་དྲུག་པོ་ཚར་བཅད་དེ། སྟོན་པ་ཐུབ་པའི་དབང་བོ་རྣམ་པར་རྒྱལ་བ་དེར། ཆོས་རྒྱལ་མྱ་ངན་མེད་ཀྱིས་དྲན་གསོ་ཞུ་ཆེད། ཆོ་འཕྲུལ་མཆོད་པའི་དུས་ཆེན་འཛུགས་གནང་མཛད་པ་ནས་བཟུང་། ཡུལ་ལུང་ཀུན་དུ་བཀྲ་ཤིས་ལོ་ལེགས་དང་། དུས་བདེ་ཞོད་འཇགས་སུ་བྱུང་བར་གྲགས་པ་དང་།
དེར་མཚུངས་སུ། རབ་བྱུང་བདུན་པའི་ས་གླང་ལོར ༡༤༠༩ ལོར་རྗེ་བླ་མ་ཙོང་ཁ་པ་ཆེན་པོས། སྣེ་གདོང་མི་དབང་གྲགས་པ་རྒྱལ་མཚན་དང་། སྣེའུ་རྫོང་དཔོན་ནམ་མཁའ་བཟང་བོར་སློབ་སྟོན་མཛད་ནས། དད་ལྡན་སྦྱིན་བདག་ཁག་ནས། གཙུག་ལག་ཁང་ཞིག་གསོ་དང་། ཇོ་བོ་མ་འོངས་པར་ཀླུ་ཡུལ་དུ་གཤེགས་པར་ལུང་བསྟན་ཡོད་པ། ཕྱིར་བསྲིངས་ཕྱིར་ལོངས་སྐུའི་ཆ་བྱད་དུ་བསྒྱུར་ཞིང་། ཚེས་བརྒྱད་ནས་བཅོ་ལྔ་བར་མཆོད་བཀུར་བློས་མི་ཤོང་བ་མཛད་ཅིང་། ཕྱོགས་སྐྱོང་གི་དར་ཆེན་བཅོ་ལྔ་རང་རང་ཕྱོགས་སུ་བཙུགས་ལ། དགེ་འདུན་ལ་བསྙེན་བཀུར་དང་། རྒྱལ་བསྟན་ཡུན་རིང་རྒྱས་ཆེད་སྨོན་ལམ་གཙོ་བོར་གྱུར་བའི་ཆོས་སྒྲ་བར་མེད་སྒྲོགས་པའི་སྲོལ་བཏོད་པས། ལྷ་ལྡན་སྨོན་ལམ་ཆེན་མོ་ཞེསཡོངས་སུ་གྲགས། ཕྱིས་སུ་གདན་ས་སེ་འབྲས་དགའ་གསུམ་དང་། དགེ་འདུན་བགྲང་ལས་འདས་པ། ལྷ་ལྡན་གཙུག་ལག་ཁང་དུ་འཚོགས་ནས་དགེ་བཤེས་འདེམ་སྒྲིག་གིས་དགེ་འདུན་མང་བོའི་དབུས་སུ་མཚན་ཉིད་དམ་བཅའ་བཞག་སྟེ། སྔ་དྲོ་ཚད་མ་རྣམ་འགྲེལ། ཉིན་གུང་དབུ་མ་དང་ཕར་ཕྱིན། དགོང་དྲོར་འདུལ་བ་དང་མཛོད་བཅས་གཞུང་ལུགས་བཀའ་པོད་ལྔ་བགྲོ་ལྒིང་བྱས་ཏེ། དགེ་བཤེས་ལྷ་རམས་པའི་དམ་བཅའ་བཞག་ནས་ཨང་ཀི་མཐོ་དམན་དང་། བྱ་དགའ་སོགས་སྟེར་སྲོལ་མཆིས་ལ། དགེ་འདུན་མང་ལ། བཞེས་ཐུག ཚ་ར། སྐུ་འགྱེད་སོགས་གཏོང་ལ། སྐྱ་སེར་ཕོ་མོ་མང་བོས་མཇལ་བསྐོར་དང་། ཚོགས་གསོག་བློས་མི་ཤོང་བ་སྒྲུབ་གྱིན་ཡོད། སྨོན་ལམ་འདི་དང་ཐོག་ཆོ་འཕྲུལ་ཟླ་བའི་ཚེས་གཅིག་ནས་བཅོ་ལྔའི་བར་ཡིན་ལ། ཕྱིས་སུ་རྒྱལ་དབང་བློ་བཟང་རྒྱ་མཚོའི་འདས་མཆོད་མགོ་ཚུགས་པ་ནས་བཟུང་། རྒྱལ་བ་རིམ་བྱོན་གྱི་དགོངས་རྫོགས་མཆོད་སྤྲིན་ལ། ལྷ་སའི་སྨོན་ལམ་རིམ་འཕར་གནང་སྟེ། ཧོར་ཟླ་དང་བོའི་ཚེས་བཞི་ནས་མགོ་ཚུགས་ཏེ། ཚེས་ཉེར་བཞི་བར་སྨོན་ལམ་གཏོར་རྒྱག་དང་། ཚེས་ཉེར་ལྔ་ལ་བྱམས་པ་གདན་འདྲེན་གྲུབ་རྗེས་སྨོན་ལམ་གྲོལ་བ་ཡིན། དཔེ་དེ་བཞིན་དུ། ཕྱིས་སུ་བོད་ཀྱི་དགོན་པ་མང་ཆེ་ཤོས་ལ་ཆོ་འཕྲུལ་སྨོན་ལམ་ཆེན་མོ་འདི་དར་རོ། །