གཉིས་པ་ལྟུང་བ་རྣམ་གཞག་འཆད་པ།
གཉིས་པ་ལྟུང་བ་རྣམ་གཞག་འཆད་པ་ལ།
རྩ་བར། སྲིན་བལ་གྱི་བྱས་སམ་བྱེད་དུ་བཅུག་ནའོ། །ཞེས་སོགས་བྱུང༌།འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་དགེ་སློང་རབ་ཏུ་མང་པོས་སྲིན་བལ་གྱི་སྟན་བྱས་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་འདོད་པ་ཆེས་པ་དང༌། དོན་དང་བྱ་བ་མང་བའོ། །དེ་ཡང་ལུང་ལས། བྱ་བ་མང་བ་དང་བྱེད་པ་མང་བར་གྱུར་ཅིང༌། ཞེས་དང༌། ཕྱེད་བྱས་པའི་འཕྲོ་བྱེད་པ་ལ། ལྟུང་བ་མི་རྫོགས་པར་གསུངས་པས་སོ། ། གསུམ་པ་ངོ་བོ་ནི་བཅས་ལྡན་དགེ་སློང་གིས་རང་དབང་བའི་སྲིན་བལ་གྱི་སྟན་བྱས་སམ་བྱེད་དུ་བཅུག་སྟེ། བྱེད་པ་མཐར་ཐུག་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས་དང་པོ་གཞིའི་ཡན་ལག་ལ་བརྒྱད་དེ། དེ་ཡང་སྲིན་བལ་ཡིན་པ་སྟེ། སྲིན་བལ་གྱི་སྟན། ཞེས་སོ། །དཀོན་ཞིང་རིན་ཆེ་བ་ཡིན་པ་སྟེ། ལུང་རྣམ་འབྱེད་ལས། སྲིན་བལ་དཀོན་ཞིང་རིན་ཆེ་བས། ཞེས་སོ། །སྲིན་བལ་ནི་རྣམ་འབྱེད་འགྲེལ་བ་ལས། སྲིན་བལ་འབྱུང་བའི་སྲིན་བུ་ལས་བྱུང་བའོ། །དེ་དང་འདྲ་བ་ལས་གྱུར་པའི་ལྟུང་བ་ནི། འདྲ་བ་ལ་ཡང་ངོ། །ཞེས་དང༌། དེའི་ཊཱི་ཀ་ལས། སྲིན་བལ་འབའ་ཞིག་ལས་སྟན་བྱེད་པ་ལ། སྤང་བའི་ལྟུང་བྱེད་དུ་འགྱུར་བ་དེ་བཞིན་དུ། མོན་དར་དང་རྩྭ་དུ་ཀུ་ལའི་རས་ལ་སྟན་བྱེད་པ་ལ་ཡང་སྤང་བ་ཁོ་ནར་འགྱུར་བ་ལྟ་བུའོ། །ཞེས་སོ། །ཉུང་ངུ་གཞན་དང་མ་འདྲེས་པ་སྟེ། རྩ་བར། ཉུང་ངུ་དང་བསྲེས་པ་ཉིད་ན་ན་སྨད་པ་ཉིད་དོ། །ཞེས་སོ། །གསར་པ་ཡིན་པ་སྟེ། སྟན་གྱི་ལྟུང་བ་བཞི་ཀ་ལ་ལུང་རྣམ་འབྱེད་ལས། གསར་བ་གཉིས་ཏེ། གསར་པས་གསར་པ་དང༌། རྙེད་པས་གསར་པ་སྟེ་དོན་འདིར་ནི་གསར་པས་གསར་པ་ཡིན་པར་དགོངས་སོ། །ཞེས་གསུངས་སོ། །སེལ་བ་ནི་རྩ་བར།རྫས་ཉམས་པ་ཉིད་ལ་ཡང་ངོ། །ཞེས་སོ། །བདག་པོ་རང་གི་ཉིད་ཡིན་པ་དགོས་ཏེ། འདུ་ཤེས་ལས་གཙོ་ཆེར་རང་གི་ཉིད་དོ། །ཞེས་སོ། །ཕྱེད་འཕྲོ་གཞིའི་སེལ་བར་གཏོགས་པ་མ་ཡིན་དགོས་ཏེ། སྤྱིར་བསྟན་རྩ་བར། ཕྱེད་བྱས་པ་ལ་བྱེད་པ་ནི་ཕྱེད་ཉིད་དོ། །ཞེས་གསུངས་པས་སོ། །གཞི་གཞན་གྱི་སྒོ་ནས་རུང་བ་ཡིན་པ་སྟེ་སྲིན་བལ་དེ་སྟན་གྱི་རྒྱུ་མི་རུང་བ་ཉིད་ཡིན་ཡང་དབྱིབས་དང་ཁ་དོག་རུང་བ་ཡན་ལག་ཏུ་དགོས་ཏེ། དབྱིབས་གྲུ་གསུམ་དང་ཁ་དོག་ཁྲ་བོ་ལ་སོགས་པ་སེལ་བ་འགྱུར་ལ། ཚད་དང་ལྡན་པའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞིའི་ཡན་ལག་དེ་དག་ལ་མ་འཁྲུལ་བ་སྟེ་གོས་འཆང་བའི་སྐབས་སུ་སྔར་བཤད་པ་བཞིན་ནོ། །ཀུན་སློང་ནི་རང་དོན་དུ་སྲིན་བལ་གྱི་སྟན་བྱེད་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་རང་གིས་སམ་གཞན་ལ་ངག་གིས་བསྐོས་པས་སྟན་བྱེད་པར་ཞུགས་པའོ། །བཞི་བ་མཐར་ཐུག་ནི། བཀྲམ་པ་རྫོགས་པ་སྟེ། རྩ་བར། སྟན་ལ་ནི་བཀྲམ་པ་ཉིད་བྱེད་པ་མཐར་ཐུག་པ། ཞེས་པས་སོ། །