ས་ག་ཟླ་བ།
རྒྱུ་སྐར་ས་ག་འཆར་པའི་ཟླ་བ་འདི་ལ་བདག་ཅག་གི་སྟོན་པ་ཤཱཀྱ་ཐུབ་པ་ལྕགས་སྤྲུལ་ས་ག་ཟླ་བའི་ཚེ་བདུན་ཉིན་ལུམ་བུའི་ཚལ་དུ་སྐུ་བལྟམས་པ་དང་གཅིག ཤིང་རྟའི་ལྔ་བའི་བཅོ་ལྔའི་སྲོད་ལ་བདུད་བཏུལ་ཏེ། ཐོ་རེངས་མངོན་པར་རྫོགས་པའི་སངས་རྒྱས་པ་དང་གཉིས། ལྕགས་འབྲུག་ས་ཟླའི་ཚེས་བཅོ་ལྔར་རྩྭ་མཆོག་དྲུང་དུ་མྱ་ངན་ལས་འདས་པའི་ཚུལ་བསྟན་པ་གསུམ་བཅས་ཀྱི་དུས་ཆེན་གསུམ་འཛོམས་སམ། ཡང་ན་བདུད་བཏུལ་བ། བྱང་ཆུབ་བརྙེས་པ། མྱ་ངན་ལས་འདས་པའི་དུས་ཆེན་གསུམ་མམ། ལྷུམས་སུ་ཞུགས་པ། སངས་རྒྱས་པ། མྱ་ངན་ལས་འདས་པའི་དུས་ཆེན་ཁྱད་འཕགས་ཅན་འདི་ལ་མཆོད་འབུལ་སོགས་བྱས་ན་དགེ་རྩ་འགྱུར་ཆེ་ལ། དགོན་གྲོང་ཁག་ན་ཡང་བཞི་བ་ཆོས་ཟླ་ཞེས་མཐོང་ཆེན་བྱེད་ཅིང་། ཆོས་ལུགས་ཀྱི་ཆོ་ག་སྣ་ཚོགས་སྤེལ་ལ། མང་ཚོགས་སེར་སྐྱ་མང་བོས་རང་རང་གི་འབྱོར་འཁོས་དང་བསྟུན་ཏེ་མཆོད་འབུལ་དང་སྦྱིན་གཏོང་གི་ལས་དང་། སྨྱུང་གནས་སྲུང་བ་ལ་འབད་ཅིང་། ཁྱད་པར་དུ་ཟླ་འདིར་བོད་མི་ཕལ་ཆེ་བའི་ཤ་ཟ་བ་སྤངས་པ་སོགས་གོམས་གཤིས་བཟང་བོ་ཆགས་ཡོད།