བཅུ་གཉིས་པ་བལ་ནག་པོ་འབའ་ཞིག་གི་སྤང་བ་འཆད་པ།

བཅུ་གཉིས་པ་བལ་ནག་པོ་འབའ་ཞིག་གི་སྤང་བ་འཆད་པ་ལ།

རྩ་བར། ལུག་གི་བལ་ནག་པོ་འབའ་ཞིག་དག་གོ། །རང་བཞིན་གྱིས་སོ། །སྔོན་པོ་དང་འདམ་ཁ་དང་ཁམ་པ་དག་ཀྱང་དེ་ཉིད་དོ། །ཞེས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་ཉན་ཡོད་དུ་དགེ་སློང་མང་པོས་ལུག་བལ་ནག་པོ་འབའ་ཞིག་གིས་སྟན་གསར་པ་བྱས་པ་ལ་བརྟེན་ནས་བཅས་སོ། ། དགག་བྱ་སྔར་དང་འདྲ། ངོ་བོ་ནི་ཡན་ལག་གཞན་རྣམས་སྔར་དང་འདྲ་བ་ལས།སྲིན་བལ་ཞེས་པའི་གནས་སུ་ལུག་གི་བལ་ནག་པོ་འབའ་ཞིག་ཅེས་གཞུག་གོ་བཞི་བ་ཡན་ལག་ཕལ་ཆེར་སྔ་མ་དང་འདྲ་བ་ལས་གཞིའི་ཡན་ལག་ལ་ལུང་རྣམ་འབྱེད་ལས། ནག་པོ་འབའ་ཞིག་གི་ཞེས་བྱ་བ་ནི་ནག་པོ་བཞི་སྟེ། རང་བཞིན་གྱིས་གནག་པ་དང༌། སྔོ་བས་གནག་པ་དང༌། འདམ་ཁ་དང༌། ཁམ་པའོ། །ཞེས་གསུངས་ཏེ། དེ་དག་ནི་རང་བཞིན་གྱིས་སྔོན་པོ་དང་ཞེས་པ་ལ་སོགས་པས་བསྟན་ཏོ། །སྔོན་པོ་ནི་རྣམ་འབྱེད་འགྲེལ་བ་ལས། སྔོ་བས་གནག་པ་ཞེས་བྱ་བ་ནི་ཕྱིས་སྔོན་པོས་ཁ་བསྒྱུར་བ་གང་ཡིན་པའོ། །ཞེས་བཤད་ཀྱང༌། བམ་པོ་ལྔ་བཅུ་པ་ལས། རང་བཞིན་གྱིས་སྔོ་བ་དང་ཞེས་པ་དེ་ངེས་པར་གཟུང་ངོ༌། །ནག་སིང་ངེ་བ་ངེས་གཟུང་མི་དགོས་པས་རྩ་བར།སྔོན་པོ་དང་འདམ་ཁ་དང་ཁམ་པ་དག་ཀྱང་དེ་ཉིད་དོ། །ཞེས་སོ། །དེ་ཉིད་དོ་ཞེས་པ་ནི་ནག་པོར་གཏོགས་པ་དེ་ཉིད་དོ་ཞེས་ལུང་ལས་ནག་པོ་བཞི་སྟེ་ཞེས་གསུངས་པ་དང་མཐུན་པའོ། །སྐབས་འདིར་གཞི་ལྡོག་པ་ལས་གྱུར་པའི་ལྟུང་བ་ནི། ཡུལ་གང་ན་བལ་དཀར་པོ་དཀོན་ཞིང་རིན་ཆེ་བ་ལ། བལ་ནག་པོ་མོད་ཅིང་རིན་ཆུང་བ་དེར་ནི། རང་གི་རྣམ་བཤད་ལས། བལ་ནག་པོ་འབའ་ཞིག་ལས་ལྟུང་བ་མེད་དེ། དཀར་པོ་ལ་ནི་ལྟུང་བ་ཡོད་དོ་ཞེས་བྱ་བ་གོ་ལྡོག་ནས་བརྗོད་དེ་ཞེས་གསུངས་ལ། སྤྱིར་བསྟན་གྱི་རང་གི་རྣམ་བཤད་ལས། བལ་དཀར་པོའི་སྟན་བྱེད་པ་ལ་ཡང་སྤང་པ་ཁོ་ནར་འགྱུར་རོ། །ཞེས་གསུངས་སོ། །