བཅུ་གསུམ་པ་ཆ་གཉིས་བསྲེ་བའི་སྤང་བ་འཆད་པ།

བཅུ་གསུམ་པ་ཆ་གཉིས་བསྲེ་བའི་སྤང་བ་འཆད་པ་ལ།

རྩ་བར། དེ་དག་ཕྱེད་པས་ལྷག་པ་ཉིད་ནའོ། །ཞེས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི། ཡུལ་དང་གང་ཟག་སྔར་ལྟར་ལུག་བལ་ནག་པོ་ཕྱེད་ལས་ལྷག་སྟན་བྱས་པ་ལ་བརྟེན་ནས་འདི་བཅས་སོ། །མཚོ་ཊཱིཀ་ལས་ལྟུང་བ་སྔ་མ་དང་འདི་གཉིས་ཀྱི་གླེང་གཞི་སྲིན་བལ་གྱི་སྐབས་དང་འདྲ་བར་གསུངས་སོ། །དགག་བྱ་སྔར་སྲིན་བལ་གྱི་སྐབས་དང་འདྲ་བ་ལ་འདིར་ཁྱད་པར་དུ་སྲིན་བལ་གྱི་ཤུལ་དུ་ཆ་གཉིས་བསྲེ་བ་ཡིན་པ་དང༌། ཞེས་སོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་སྟན་གྱི་རྒྱུའི་བཞི་ཆ་གཉིས་བལ་ནག་དང་དཀར་པོ་དང་འཁོབ་བལ་བསྲེས་ཏེ་སྟན་བྱེད་པ་གནང་བ་ལས་བལ་ནག་པོ་སྲང་ཕྱེད་ཡན་ཆད་ལྷག་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས་དང་པོ་གཞིའི་ཡན་ལག་ལ་བརྒྱད་དེ། སྔར་སྲིན་བལ་གྱི་སྐབས་ཀྱི་བརྒྱད་པོ་ལས། སྲིན་བལ་གྱི་ཤུལ་དུ་ཆ་གཉིས་བསྲེ་བ་ཡིན་པ་དང༌། ཚད་དང་ལྡན་པ་ཞེས་པ་ལ་ཆ་གཉིས་བསྲེས་པ་དེ་སྟན་གྱི་ཚད་དང་ལྡན་ཞིང་བྱེ་བྲག་ཏུ་བལ་ནག་པོ་དེ་སྲང་ཕྱེད་ཡན་ཆད་ཀྱིས་ལྷག་པའི་ཚད་དང་ལྡན་ཞེས་ཁྱད་པར་དུ་བྱའོ། །ལུག་གི་བལ་ནག་པོ་དེ་དག་ཕྱེད་པས་ལྷག་པ་ཉིད་ནའོ། །འདིར་ལྷག་པའི་ཚད་ནི་སྲང་ཕྱེད་ལྷག་པ་ཡན་ཆད་དེ། ལུང་རྣམ་འབྱེད་ལས། དཀར་པོ་དང་འཁོབ་བལ་སྲང་གཅིག་གམ་སྲང་ཕྱེད་ཕྲི་སྟེ་ལུག་གི་བལ་ནག་པོ་ལས་སྟན་གསར་པ་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཞེས་གསུངས་སོ། །བལ་ནག་པོ་བཀག་པ་དེའི་རྒྱུ་མཚན་ནི། ལུང་རྣམ་འབྱེད་ལས། ལུག་བལ་ནག་པོ་དཀོན་ཞིང་རིན་ཆེ་བས། ཞེས་གསུངས་ལ། བལ་ནག་པོ་འབའ་ཞིག་མོད་པ་དང་རིན་མཉམ་པ་དང༌། དཀར་པོ་དང་འཁོབ་བལ་དཀོན་པ་དང་རིན་ཆེ་བར་གྱུར་ན་ལྟུང་བ་མེད་དོ་ཞེས་ལུང་རྣམ་འབྱེད་ལས་གསུངས་སོ། །གནང་བའི་བསླབ་བྱ་ནི། ཕྱེད་དཀར་པོ་དང་འཁོབ་བལ་དག་ལས་ཆ་མཉམ་པ་ཉིད་དུ་བྱའོ། །བམ་པོ་ལྔ་བཅུ་པ་ལས། སྤྱིར་བསྲེས་ཏེ་གླིངས་བར་བྱའོ། །སྟན་ཕྱེད་ནག་པོ། བཞི་ཆ་དཀར་པོ། བཞི་ཆ་འཁོབ་བལ་ཡིན་གྱི་ཁ་དོག་ལས་ཁྲ་བོར་བྱ་བ་ནི་མ་ཡིན་ནོ། །ཞེས་སོ། གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་དོན་དུ་ཆ་གཉིས་བསྲེ་བ་ལས་བལ་ནག་ཕྱེད་ལས་ལྷག་པ་གླིངས་པའི་སྟན་བྱེད་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་རང་གིས་སམ་གཞན་ལ་ངག་གིས་བསྐོས་པས་གླིངས་པའི་སྟན་བྱེད་པར་ཞུགས་པའོ། ། བཞི་བ་མཐར་ཐུག་ནི་བཀྲམ་པ་རྫོགས་པའོ། །