མཆོད་རྟེན་གྱི་ཆོ་ག
ནག་པོ་པས་མཛད།
རྒྱ་གར་སྐད་དུ། སྟཱུ་པ་བི་དྷི་ནཱ་མ། བོད་སྐད་དུ། མཆོད་རྟེན་གྱི་ཆོ་ག་ཞེས་བྱ་བ། ཀྱཻ་རྡོ་རྗེ་ལ་ཕྱག་འཚལ་ལོ། །ཀྱཻ་རྡོ་རྗེའི་རྣལ་འབྱོར་པས། བདག་དང་གཞན་གྱི་དོན་དུ་མཆོད་རྟེན་བྱ་བར་འདོད་ན། དང་པོར་ས་ལ་རིན་པོ་ཆེ་དང་སྤོས་ཆུ་ལ་སོགས་པས་འཇིམ་པ་བྱས་ལ། རང་གི་མདུན་དུ་བཞག །རང་གི་ལྷག་པའི་ལྷར་གསལ་བར་བྱས་ལ། ཚད་མེད་པ་བཞི་བསྒོམ་པར་བྱའོ། །དེ་ནས་ཆོས་ཉིད་རྣམ་པར་དག་པའི་སྔགས། ཨོཾ་སྭ་བྷཱ་བི་ཤུདྡྷ་སརྦ་དྷརྨཱ་སྭ་བྷཱ་བ་ཤུ་དྡྷོ྅ཧཾ་ཞེས་པས་འཇིམ་པ་མི་དམིགས་པར་བསྒོམས་ལ་ཆོ་ག་གསུམ་ལས་ཀྱཻ་རྡོ་རྗེ་ཡབ་ཡུམ་གྱི་སྐུར་བྱེད་དོ། །དེ་ནས་སྙིང་གའི་ཧྲཱིཿའམ་ཧཱུཾ་གི་འོད་ཟེར་གྱིས་སངས་རྒྱས་དང་བྱང་ཆུབ་སེམས་དཔའ་མཐའ་དག་བཀུག་ལ། ཀྱཻ་རྡོ་རྗེ་ཡབ་ཡུམ་སྙོམས་པར་ཞུགས་པ་འོད་དུ་ཞུ་སྟེ། བྱང་ཆུབ་ཀྱི་སེམས་སུ་གྱུར་པ་ལས། ཀྱཻ་རྡོ་རྗེའི་སྙིང་པོ་ཉི་ཤུ་རྩ་གཅིག་
གིས་བྱིན་གྱིས་བརླབས་ཏེ། ཨོཾ་དེ་པ་བི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བྱ་བའམ། ཨོཾ་ཨཱཿ་ཧྲཱི་ཧཱུཾ། ཞེས་པའི་སྔགས་དེ་དག་གིས་གདབ་པར་བྱའོ། །མཆོད་རྟེན་རེ་རེ་ཡང་ཀྱཻ་རྡོ་རྗེ་རེ་རེར་བསམས་ལ། དེ་རེ་རེ་ལ་ཡང་ཀྱཻ་རྡོ་རྗེ་དུ་མ་འཕྲོ་བ་དང༌། འདུ་བྱས་པ་ལས་བདག་དང་གཞན་གྱི་དོན་རྫོགས་པར་བསམ་མོ། །དེ་ནས་རྟེན་འབྲེལ་གྱི་སྙིང་པོས་རབ་ཏུ་གནས་པ་དང་མཇུག་བསྡུ་བར་བྱའོ། །མཆོད་རྟེན་གྱི་ཆོ་ག་ཞེས་བྱ་བ་སློབ་དཔོན་ཆེན་པོ་ནག་པོ་ཞབས་ཀྱིས་མཛད་པ་རྫོགས་སོ།། །།སྒྲ་པ་ཆེན་པོ་རྒྱལ་བའི་སྙན་བཟང་པོ་ལས་མཉན་ཏེ། །ལོ་ཙ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་དཔལ་ཐར་པ་གླིང་གི་གཙུག་ལག་ཁང་ཆེན་པོར་ལེགས་པར་བསྒྱུར་བའོ། །