དྲུག་པའི་ཚེས་བཞི།
དྲུག་པའི་ཚེས་བཞི་ནི་སྟོན་པ་ཤཱཀྱ་ཐུབ་པས་བདེན་བཞིའི་ཆོས་འཁོར་བསྐོར་བའི་དུས་ཆེན་ཡིན། དེ་ཡང་། སྟོན་པ་དགུང་ལོ་སོ་ལྔ་ལ་ཕེབས་པའི་ཧོར་ཟླ་བཞི་བའི་ཚེས་བཅོ་ལྔའི་ཐོ་རེངས་མངོན་པར་རྫོགས་པའི་སངས་རྒྱས་པའི་ཚུལ་བསྟན་ནས། ཞག་ཞེ་དགུའི་རིང་སྐལ་ལྡན་གྱི་གདུལ་བྱ་མ་རྙེད་པར་ཆོས་མི་གསུངས་པར་བཞུགས་ཏེ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་དབུས་སུ་གནས་པར་བྱ། །ཞེས་གསུངས་ནས་ཐུགས་ལས་ཆུང་བར་བཞུགས་པ་ན། བྱང་ཆུབ་སེམས་དཔའ་དང་། དཀར་ཕྱོགས་ཀྱི་ལྷ་བགྲང་ལས་འདས་པས་ཆོས་སྟོན་པར་གསོལ་བ་བཏབ་ཅིང་། ལྷག་པར་དུ་ཚངས་པ་བརྒྱ་བྱིན་གཉིས་ཀྱིས་གསེར་གྱི་འཁོར་ལོ་དང་། དུང་དཀར་གཡས་འཁྱིལ་ཕུལ་ཏེ་ཆོས་འཁོར་བསྐོར་བར་གསོལ་བ་བཏབ་པ་ལྟར། ཞལ་གྱིས་བཞེས་ཏེ། ཐོག་མར་རིང་འཕུར་དང་ལྷག་སྤྱོད་གཉིས་དབང་བོ་རྣོ་ལ་འདུལ་སླ་བས། ཆོས་སྟོན་པར་དགོངས་ཀྱང་དེ་གཉིས་འདས་ཟིན། དེ་ནས་ཐོག་མར་འདུལ་སླ་བ་དང་། དུག་གསུམ་ཤས་ཆུང་བ་རྣམ་པར་ཤེས་པ་ལྐོག་ཏུ་མ་གྱུར་བའི་འཁོར་ལྔ་སྡེ་འདུལ་བར་དགོངས་ནས། ཝ་ར་ན་སི་ནས་ལེ་བར་བཅུ་ཙམ་ཆོད་པའི་དྲང་སྲོང་ལྷུང་བ་རི་དྭགས་ཀྱི་ནགས་སུ་བྱོན་པ་ན། ལྔ་སྡེ་དག་གིས་རྒྱང་རིང་བོ་ནས་གཤེགས་པ་མཐོངསྟེ། དགེ་སྦྱོང་གཽ་ཏ་མ་མང་དུ་ཟ་བ། སྤོང་བ་ཉམས་པ། འདི་འོང་ཚེ་བདག་ཅག་རྣམས་ཀྱིས་སྨྲ་བར་མི་བྱ། ལྡང་བར་མི་བྱ། ཕྱག་མི་བྱ། སྟན་སྟོབ་པར་མི་བྱ་ཞེས་ཁྲིམས་བཅས་པ་ལ། བཅོམ་ལྡན་འདས་འབབ་ཆུ་གནོན་པ་ཅན་གྱི་འགྲམ་ལྔ་སྡེའི་གནས་སུ་བྱོན་མ་ཐག དེ་དག་སངས་རྒྱས་ཀྱི་གཟི་བརྗིད་མ་བཟོད་དེ། ཐམས་ཅད་སྟན་ལས་ལངས་ནས། ཀཽའུ་དི་ནས་རིམ་གྲོ་བྱས། རྟ་ཐུལ་གྱིས་བསུས་ཏེ་ཆོས་གོས་དང་ལྷུང་བཟེད་བླངས། རླངས་པས་གདན་བཤམས། མིང་ཆེན་གྱིས་ཞབས་སྟན་སྟོབ། བཟང་ལྡན་གྱིས་ཞབས་གསིལ་ཕུལ་ཏེ། ཚེ་དང་ལྡན་པ་གཽ་ཏ་མ་བྱོན་པ་ལེགས་སོ། །བཞུགས་ཤིག ཅེས་གསོལ་བ་ན། བཅོམ་ལྡན་འདས་ཀྱིས་ལྔ་སྡེ་དག་ལ་དགའ་དགུས་གསུང་ལྒིང་མཛད་མཐར། དགེ་སློང་དག ངས་ཁྱེད་ཅག་ལ་ཆོས་བཤད་གྱིས། ཚུར་ཤོག ཉོན་ཅིག ནན་ཏན་གྱིས་ཤིག་ཅེས་ཧོར་ཟླ་དྲུག་པའི་ཚེས་བཞི་ལ་བདེན་བཞིའི་ཆོས་འཁོར་བསྐོར་བས། ལྔ་སྡེ་བཟང་བོ་རིམ་པར་དགྲ་བཅོམ་ཐོབ་པའི་དུས་ཆེན་ཡིན་ནོ། །དེ་ཡང་བཟླས་པ་གསུམ་དང་། རྣམ་གྲངས་བཅུ་གཉིས་ཡོད་དེ། སྡུག་བསྔལ་བདེན་པ། ཀུན་འབྱུང་བདེན་པ། འགོག་བདེན། ལམ་བདེན་བཅས་བདེན་པ་བཞི་བོ་དེར་ངོ་བོ་ལ་བཟླས་པ་བཞི། བྱ་བ་ལ་བཟླས་པ་བཞི། བྱ་བའི་འབྲས་བུ་ལ་བཟླས་པ་བཞི་སྟེ། རྣམ་གྲངས་བཅུ་གཉིས་ཡོད། ཞིབ་ཏུ་ཕར་ཕྱིན་དང་བུ་སྟོན་གྱི་ཆོས་འབྱུང་ན་གསལ་བས་དེར་གཟིགས་པར་བྱའོ། །