གཉིས་པ་དངོས་གཞིའི་ལྟུང་བ་འཆད་པ།

གཉིས་པ་དངོས་གཞིའི་ལྟུང་བ་འཆད་པ་ལ།

རྩ་བར། གནང་བ་མ་ཐོབ་པ་གཞན་ཡོད་པའམ་རང་དགར་བཏང་བས་ལོ་དྲུག་མ་ལོན་པར་སྟན་བྱས་པ་ཉིད་ནའོ། །ཞེས་སོགས་བྱུང༌།འདིའི་དོན་ལ་བཞི་ལས། དང་པོ་གླེང་གཞི་ནི། མཉན་ཡོད་དུ་དགེ་སློང་རབ་ཏུ་མང་པོས་ལོ་དྲུག་མ་ལོན་པར་སྟན་གསར་བ་བྱེད་དུ་བཅུག་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་ཆོག་མི་ཤེས་པ་དང༌། དོན་དང་བྱ་བ་མང་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་སྟན་སྔ་མ་བྱས་ནས་ལོ་དྲུག་མ་ལོན་པར་སྟན་གསར་ཕྱི་མ་རང་ངམ་བསྐོས་པས་ཟིན་པར་བྱས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གཉིས་ཏེ། གང་ལ་བསྒྲུབ་པའི་དངོས་པོ་དང༌། གང་གིས་སྒྲུབ་པའི་རྟེན་ནོ། །དང་པོ་ལ་དྲུག་ལས་སྟན་གྱི་རྒྱུ་མཚན་ཉིད་དང་ལྡན་པར་ཡིན་པ་དང༌། གསར་པ་ཡིན་པ་དང༌། བདག་པོ་རང་ཉིད་ཀྱི་ཡིན་པ་དང༌། བྱེད་འཕྲོ་གཞིའི་སེལ་བར་གཏོགས་པ་མ་ཡིན་པ་དང༌། རུང་བ་དང་ཚད་དང་ལྡན་པའོ། །གཉིས་པ་གང་གིས་སྒྲུབ་པའི་རྟེན་ལ་གསུམ་སྟེ། ལོ་དྲུག་སྟན་གྱི་གནང་བ་མ་ཐོབ་པ་དང༌། སྟན་གཞན་ཡོད་དམ་མེད་ཀྱང་རང་གར་བྱས་པ་དང༌། སྟན་སྔ་མ་བྱས་ནས་ལོ་དྲུག་མ་ལོན་པའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་པའོ། །ཀུན་སློང་ནི་རང་དོན་དུ་སྟན་ཕྱི་མ་བྱེད་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་རང་གིས་སམ་གཞན་ལ་ངག་གིས་བསྐོས་པས་གླིངས་པའི་སྟན་ཕྱི་མ་བྱེད་པར་ཞུགས་པའོ། །བཞི་བ་མཐར་ཐུག་ནི་བཀྲམ་པ་རྫོགས་པའོ། །ཊཱི་ཀ་ལས། སྟན་གཉིས་པ་ཟིན་པའི་གནས་སྐབས་ལ་དངོས་གཞིའི་ལྟུང་བར་འགྱུར་རོ། །ཞེས་གསུངས་སོ། ། ལུང་རྣམ་འབྱེད་ལས། ལོ་དྲུག་པ་ལ་སྟན་བྱེད་ན་ལྟུང་བ་མེད་དོ། །ཞེས་གསུངས་སོ། །