བཅོ་ལྔ་པ་མཐོ་གང་གིས་མ་གླན་པའི་སྤང་བ་འཆད་པ།

བཅོ་ལྔ་པ་མཐོ་གང་གིས་མ་གླན་པའི་སྤང་བ་འཆད་པ་ལ།

རྩ་བར། གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གིས་མ་གླན་པའི་གདིང་བ་གསར་བ་སྤྱོད་ནའོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་དགེ་སློང་རབ་ཏུ་མང་པོས་གདིང་བ་གསར་པ་ལ་གདིང་བ་རྙིང་པ་སྟོན་པའི་མཐོ་གང་གིས་མ་གླན་པར་ལྟོས་མེད་དུ་དོར་བས་སྲིན་བུའི་རང་བཞིན་དུ་སོང་བ་གཟིགས་ནས་ཁྱིམ་པའི་དད་རྫས་ཆུད་མི་ཟ་བ་དང་གསར་བ་མི་སྡུག་པར་བྱ་བའི་ཕྱིར་རྙིང་བ་ལས་བདེ་གཤེགས་མཐོ་གང་འཁོར་བས་སྦྱོར་བར་བཅས་སོ། །གཉིས་པ་དགག་བྱ་ནི་ང་རྒྱལ་དང་དྲེགས་པ་སྐྱེ་བ་དང༌། རང་གི་ཡོ་བྱད་ཆུད་ཟོས་པར་འགྱུར་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་གདིང་བ་གསར་པ་ལ་གདིང་བ་རྙིང་པ་བཞིན་དུ་བདེ་བར་གཤེགས་པའི་མཐོ་གང་གིས་མ་གླན་པའི་གདིང་བ་གསར་པ་ལ་ལོངས་སྤྱད་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། གཞིའི་ཡན་ལག་ལ་གཉིས་ཏེ། གང་སྤྱད་པའི་དངོས་པོ་དང༌། གང་གིས་སྤྱད་པའི་རྟེན་ནོ། །དང་པོ་ལ་དྲུག་ལས། གདིང་བ་ཡིན་པ་དང༌། བྱས་པས་གསར་པ་ཡིན་པ་སྟེ། གདིང་བ་གསར་པ་སྤྱོད་ནའོ། །ཞེས་སོ། །གདིང་བ་རྙིང་པ་ཡིན་ན་ལྟུང་བ་མེད་དེ། དགག་བྱ་མེད་པའི་ཕྱིར་རོ། །གདིང་བ་རྙིང་པ་བདེ་བར་གཤེགས་པའི་མཐོ་གང་གིས་མ་གླན་པ་གང་ཡིན་པའོ། །གཞན་དུ་ན་ཉེས་པ་མེད་དོ། །བདག་པོ་རང་ཉིད་ཀྱི་ཡིན་པའོ། །གཞན་གྱི་ལ་ལོངས་སྤྱད་ན་ཉེས་བྱས་སོ། །རུང་བ་དང་ཚད་དང་ལྡན་པའོ། །གཉིས་པ་གང་གིས་སྤྱད་པའི་རྟེན་ནི། གདིང་བ་རྙིང་པ་དེ་ཙམ་ཡོད་ནའམ་མེད་ཀྱང་རང་གར་བཏིང་བ་སྟེ། གལ་ཏེ་ཡོད་ནའོ། །ཞེས་དང༌། རང་གར་བཏིང་བས་ཞེས་བཤད་པའི་གནད་ཀྱིས་སོ་ཞེས་མཚོ་ཊཱིཀ་ལས་གསུངས་མོད་ཀྱང་གདིང་བ་རྙིང་བ་མེད་ན་ལྟུང་བ་དངོས་གཞི་མི་རྫོགས་པ་འདྲ་སྟེ། བམ་ལྔ་ལས། ཡན་ལག་ལྔས་དངོས་གཞིའི་ལྟུང་བར་འགྱུར་ཏེ། གདིང་བ་གསར་པས་གསར་བ་དང༌། བྱས་པ་དང༌། གདིང་བ་རྙིང་བ་ཡོད་པ་དང༌། བདེ་བར་གཤེགས་པའི་མཐོ་གང་གིས་མ་གླན་པ་དང༌། སྤྱོད་པ་ཉིད་དོ། །ཞེས་གསུངས་པས་སོ། །དེ་ཙམ་ན་ཡང་ངོ་ཞེས་པའི་སེལ་བ་ནི། ལུང་རྣམ་འབྱེད་ལས། དེ་ཙམ་མེད་ན་ལྟུང་བ་མེད་དོ། །ཞེས་གསུངས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་གདིང་བ་རྙིང་པ་དེ་ཙམ་གྱིས་མ་གླན་པའི་གདིང་བ་གསར་པ་ལོངས་སྤྱོད་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་གདིང་བ་གསར་པ་དེ་ལ་སྤྱོད་པར་ཞུགས་པའོ། །བཞི་བ་མཐར་ཐུག་ནི་ལོངས་སྤྱོད་པ་རྫོགས་པའོ། །