བཅུ་དྲུག་པ་བལ་ཐོགས་པའི་སྤང་བ་འཆད་པ།

བཅུ་དྲུག་པ་བལ་ཐོགས་པའི་སྤང་བ་འཆད་པ་ལ།

རྩ་བར། ཁྱེར་བ་མེད་ན་དཔག་ཚད་གསུམ་ལས་འདས་པས་ལུག་གི་བལ་ཁྱེར་ནའོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་དྲུག་སྡེ་ལས་འཆར་ཀ་མ་གཏོགས་པ་རྣམས་ཀྱིས་བལ་ཁུར་ཏེ་འོངས་པ་ལ་འགའ་ཞིག་སྐྲག་ལ་ལ་མ་དད་པས་སྤང་བའི་ལྟུང་བྱེད་འདི་བཅས་སོ། །གཉིས་པ་དགག་བྱ་ནི་མ་དད་པ་སྐྱེ་བ་དང༌། དོན་དང་བྱ་བ་མང་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་ཁུར་ཚ་བ་མེད་ན་དཔག་ཚད་གསུམ་དང་རྒྱང་གྲགས་གཅིག་ལས་འདས་པར་བལ་ཁུར་ཁྱེར་བ་དང༌། ཁུར་ཚ་བ་ཡོད་བཞིན་དུ་དགེ་སློང་རང་གིས་ཁུར་ན་རྒྱང་གྲགས་གཅིག་འདས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གཉིས་ཏེ། གང་འཁུར་བའི་དངོས་པོ་དང༌། གང་དུ་འཁུར་བའི་ལམ་མོ། །དང་པོ་ལ་ལྔ་ལས།གོས་ཀྱི་རྒྱུ་བལ་མཚན་ཉིད་དང་ལྡན་པ་དགོས་ལ། དེའང་ལུག་གི་བལ་ནི་མཚོན་པ་སྟེ། བམ་པོ་ལྔ་བཅུ་པ་ལས། རས་བལ་ལ་ནི་སྨད་པ་མེད་དོ། །ཞེས་སོ། །ངོ་མ་སྤོས་པ་སྟེ་ལུང་ཞུ་བ་ལས། དགེ་སློང་ལམ་དུ་ཞུགས་པ་ཞིག་གིས་ལུག་གི་བལ་ཞིག་རྙེད་ནས། དེས་དེ་དཔག་ཚད་གསུམ་གྱི་བར་དུ་རང་གིས་ཁྱེར་བ་དང༌། དེས་ལུག་གི་བལ་གཞན་ཞིག་རྙེད་ནས་དེས་སྔ་མ་བོར་ཏེ་ཕྱི་མ་ཁྱེར་ཏེ་སོང་བ་དང༌། དེ་ལྟར་ན་ཉེས་པ་མེད་དོ། །ཞེས་གསུངས་སོ། །དེའང་དངོས་གཞིའི་ཉེས་པ་མེད་པ་ཡིན་ཏེ། ཞུ་བ་ཉུང་ཤོས་ལས། དེ་ལྟར་ན་ཉེས་བྱས་སོ། །ཞེས་གསུངས་སོ། །བདག་པོ་རང་ཉིད་ཀྱི་ཡིན་པ་སྟེ། སྔ་མ་བཞིན་ནོ། །རུང་བ་དང༌། ཁུར་དུ་ལོངས་པའི་ཚད་དང་ལྡན་པ་སྟེ། གཞན་དུ་ན་རྣམ་འབྱེད་འགྲེལ་བ་ལས། ཞྭ་ལ་སོགས་པའི་དོན་དུ་དེ་ཙམ་དག་ཁྱེར་བ་ལ་ལྟུང་བ་མེད་པ་ནི། དེ་ལ་ཁུར་བ་མེད་པའི་ཕྱིར་རོ། །ཞེས་སོ། །ཁུར་ཕྱེད་ལས་ལྷག་པ་བསྐུར་བ་མི་བྱ་ཞེས་བྱ་བ་ནི་ལུང་རྣམ་འབྱེད་ལས། ཁྱིམ་པ་གཅིག་གི་ཁུར་གང་ཡིན་པ་ནི་དགེ་སློང་གཉིས་ཀྱིས་བཏེག་པར་བྱའོ། །ཞེས་གསུངས་སོ། །རྣམ་འབྱེད་འགྲེལ་བ་ལས། ཁྱིམ་པ་གཅིག་གི་ཁུར་ཞེས་བྱ་བ་ནི་སྲང་ཉིས་སྟོང་ངོ། །ཞེས་སོ། །གཉིས་པ་གང་དུ་ཁུར་བའི་ལམ་ནི། ས་ལ་བརྟེན་པའི་ལམ་ཡིན་པ་དང༌། རྒྱང་གྲགས་ཀྱི་མཐའ་ཡིན་པ་སྟེ། ནམ་མཁའ་ལ་འགྲོ་ན་ཉེས་བྱས་སོ། །ཞེས་དང༌། ལམ་དུ་འགྲོ་བ་ནི་རྒྱང་གྲགས་ཀྱི་བདག་ཉིད་དོ། །ཞེས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་དོན་དུ་བལ་འཁུར་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་སྦྱོར་བ་ཕྱེད་ཕྱེད་ཉི་མ་ཐ་དད་ཀྱི་བར་དུ་བཅད་པ་མ་ཡིན་པར་སྦྱོར་བ་གཅིག་གིས་རྒྱང་གྲགས་ལས་འདས་པར་བལ་ཁུར་ཏེ་འགྲོ་བར་ཞུགས་པའོ། །བཞི་བ་མཐར་ཐུག་ནི་རྒྱང་གྲགས་ལས་འདས་པའོ། །ལུང་རྣམ་བྱེད་ལས་ལུག་བལ་ནག་པོ་དག་རྙེད་ལ་ཁྱེར་བ་མེད་ན་དཔག་ཚད་གསུམ་དག་གི་མཐའི་བར་དུ་རང་གིས་བསྐུར་བར་བྱའོ། །དེ་ལས་འདས་པར་ཁྱེར་ན་སྤང་བའི་ལྟུང་བྱེད་དོ། །ཞེས་གསུངས་སོ། །ལུང་རྣམ་འབྱེད་དང་ཊཱི་ཀ་ལས་ཁྱེར་བ་ཡོད་བཞིན་དུ་བདག་ཉིད་ཀྱིས་ཁྱེར་ན་ནི་རྩོམ་པའི་དུས་ཁོ་ན་ཉེས་བྱས་གཞན་གཅིག་གོ །རྒྱང་གྲགས་ཕྱེད་དུ་ཕྱིན་ན་ཉེས་བྱས་གཞན་གཅིག་གོ། །རྒྱང་གྲགས་ཀྱི་མཐར་ཕྱིན་ན་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་ཀྱི་དཔག་ཚད་གསུམ་ཞེས་མ་གསུངས་སོ། །ཊཱི་ཀ་ལས་ལམ་དུ་འགྲོ་བ་རྣམ་པ་གཉིས་སུ་གསུངས་ཏེ། ལྟུང་བ་དང་བཅས་པ་དང་ལྟུང་བ་མེད་པའོ། །ལྟུང་བ་དང་བཅས་པ་ནི་བལ་ཐོགས་པ་དང༌། དགེ་སློང་མ་དང་ལྷན་ཅིག་ལམ་དུ་དང་གྲུར་འགྲོ་བ་དང༌། བུད་མེད་དང་ལམ་དུ་འགྲོ་བ་དང་རྐུན་མ་དང་ལམ་དུ་འགྲོ་བའོ། །ལྟུང་བ་མེད་པ་ནི་ཡང་ཡང་ཟ་བ་དང་འདུས་ཤིང་ཟ་བ་དང་ཁྲུས་བྱེད་པའོ། །དགེ་སློང་བདག་ཉིད་དུད་འགྲོ་ལ་སོགས་པར་སྤྲུལ་པས་བལ་ཁུར་བས་ཀྱང་ཉེས་བྱས་ཡིན་ནོ། །རྡུལ་ཕྲ་རབ་ནི། རྣམ་འབྱེད་འགྲེལ་བ་ལས། ཉི་ཟེར་གྱི་རྡུལ་གྱི་བཞི་བཅུ་རྩ་དགུའི་ཆ་གཅིག་ལ་རྡུལ་ཕྲ་རབ་གཅིག་གོ། །ཞེས་གསུངས་ཀྱང༌། དྲུག་འགྱུར་དུ་བརྩིས་ན་ཉི་ཟེར་གྱི་རྡུལ་གཅིག་ལ་རྡུལ་ཕྲ་རབ་ཁྲི་ཕྲག་ཉི་ཤུ་རྩ་བརྒྱད་ལ་དྲུག་ཅུ་རྩ་བཞི་ཆད་པ་ཡོད་དོ། །བདུན་འགྱུར་དུ་བརྩིས་པ་ནི་མཛོད་ལས། སྐད་ཅིག་ཕྲ་རབ་རྡུལ་དང་ནི། །རྡུལ་ཕྲན་དང་ནི་དེ་བཞིན་དུ། །ལྕགས་ཆུ་རི་བོང་ལུག་དང་གླང༌། །ཉི་ཟེར་རྡུལ་དང་སྲོ་མ་དང༌། །དེ་ལས་བྱུང་དང་དེ་བཞིན་དུ། །སོར་ཚིགས་ཞེས་བྱ་གོང་བདུན་འགྱུར། །སོར་མོ་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་ངོ༌། །དེ་དག་ལྔ་བརྒྱ་རྣམས་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །ཞེས་དང༌། རྣམ་འབྱེད་འགྲེལ་བ་ལས། འདུལ་བ་ལས་དྲུག་འགྱུར་དུ་བསྒྲེ་བ་ནི་མར་འབྲི་བའི་དུས་ཀྱི་ཚེ་མི་ཉམ་ཆུང་བའི་སོར་རྣམ་པར་བཞག་པའི་ཕྱིར་རོ། །ཆོས་མངོན་པ་ལས་བདུན་འགྱུར་དུ་བསྒྲེ་བ་ནི་བསྐལ་བ་དང་པོའི་མི་ཉམ་ཆེ་བའི་སོར་རྣམ་པར་བཞག་པའི་ཕྱིར་རོ། །ཞེས་གསུངས་སོ། ། རྣམ་གྲངས་གཞན་མཚོ་མཆན་ལ་བལྟ་བར་བྱའོ། །