བཅོ་བརྒྱད་པ་ནི་གསེར་དངུལ་ལ་རེག་པའི་སྤང་བ་འཆད་པ།

བཅོ་བརྒྱད་པ་ནི་གསེར་དངུལ་ལ་རེག་པའི་སྤང་བ་འཆད་པ་ལ།

རྩ་བར། རིན་པོ་ཆེ་བདག་གིར་བྱས་ནའོ། །ལྕོགས་པ་ཉིད་ན་དེ་རྫོགས་སོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་དྲུག་སྡེས་དགེ་སྦྱོང་གི་ཚུལ་མ་ཡིན་པར་འདོད་པས་གསེར་དངུལ་ལ་རེག་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་ནོར་གྱི་སྲེད་པ་འཕེལ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་རང་གི་རིན་པོ་ཆེ་རུང་བ་མ་བྱས་པ་ལ་རང་ངམ་བསྐོས་པས་རེག་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་བདུན་ཏེ། དེ་ཡང་རིན་པོ་ཆེ་ཡིན་པ་སྟེ། རྩ་བར། རིན་པོ་ཆེ་བདག་གིར་བྱས་ནའོ། །ཞེས་སོ། །ཐོབ་པར་ལྕོགས་པ་ན་གནས་པ་སྟེ། ལྕོགས་པ་ཉིད་ན་དེ་རྫོགས། ཞེས་སོ། །རང་གི་ཡིན་པ་དང་རུང་བ་མ་བྱས་པ་སྟེ། རང་གི་རུང་བ་མ་བྱས་པ། ཞེས་སོ། །སྙད་གདགས་སུ་རུང་བ་ཡིན་པ་སྟེ། སྙད་གདགས་སུ་མི་རུང་བ་ལ་ནི་ན་སྨད་པ་ཉིད་དོ། །ཞེས་སོ། །རུང་བར་བྱེད་པའི་དུས་མ་ཡིན་པ་སྟེ། ཊཱི་ཀ་ལས། རུང་བ་བརྗོད་པའི་ཕྱིར་རེག་ན་ལྟུང་བར་ཡང་མི་འགྱུར་རོ། །ཞེས་སོ། །ཆུད་འཛའ་བའི་རྐྱེན་དང་མི་ལྡན་པ་སྟེ། འཇིགས་པར་གྱུར་ན་རང་གི་ལ་མི་གནོད་ན། ཞེས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་དོན་དུ་རེག་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་རང་གིས་རེག་གམ་གཞན་ལ་ངག་གིས་བསྐོས་པས་རེག་པར་ཞུགས་པའོ། །བཞི་བ་མཐར་ཐུག་ནི་རེག་པ་རྫོགས་པའོ། །རེག་ཏུ་འཇུག་པས་སྤང་ལྟུང་བསྐྱེད་པ་ལ་ནི་ངག་ཏུ་སྨྲས་པ་དགོས་ཀྱི། སྤྲིང་ཡིག་ལ་སོགས་པ་ལུས་ཀྱི་རིག་བྱེད་ནི་ཡན་ལག་མ་ཡིན་ཏེ། སྤྱིར་བསྟན་པ་ལས་ངག་གིའོ་ཞེས་ངག་གི་རིག་བྱེད་ཡན་ལག་ཏུ་གསུངས་ཤིང་ལུང་ཞུ་བ་ལས། སྤྲིང་ཡིག་དང་ལག་བརྡ་ལ་སོགས་པ་ལུས་ཀྱི་རྣམ་པར་རིག་བྱེད་ཀྱིས་གསེར་དངུལ་ལེན་དུ་སྩལ་ན་ཅིར་འགྱུར། ཉེས་བྱས་སོ། །ཞེས་གསུངས་སོ། ། རུང་བ་བྱ་བ་ནི། རྩ་བར། སྦྱིན་བདག་བདག་པོ་ཉིད་དུ་སྨོས་སུ་གཞུག་པ། ཞེས་སོགས་བྱུང༌། འདིའི་དོན་ལ་དྲུག་ལས། དང་པོ་དགོས་པའི་དོན་ནི། རིན་པོ་ཆེ་ལ་རེག་པའི་ལྟུང་བ་ཁེགས་པ་དང༌། རུང་བའི་བརྟག་པ་བྱས་པས་བཅས་པའི་མཚམས་ཟིན་པའོ། །གཉིས་པ་དངོས་པོ་གང་ལ་རུང་བ་བྱ་བ་ལ་བཞི་སྟེ། རིན་པོ་ཆེའམ་དེ་དང་འདྲ་བ་ཡིན་པ་དང༌། རང་གི་ཡིན་པ་དང༌། སྔར་རུང་བ་བྱས་པ་དང་མ་འབྲེལ་བ་དང༌། མངོན་སུམ་ན་ཡོད་པའོ། །དང་པོ་ནི་གསེར་ལ་སོགས་པ་རིན་པོ་ཆེ་དང༌། དེ་དང་འདྲ་བ་གཡུ་རྡོག་དང་ཁྲབ་རྙིང་མ་ལྟ་བུ་སྟེ། དགེ་སྦྱོང་གི་ཡོ་བྱད་བྱེད་པས་བརྟག་པའི་ཆོ་ག་གནང་ཞིང༌། དངོས་པོ་བཟང་བས་ནོར་གྱི་སྲེད་པ་འཕེལ་བའི་དགག་བྱ་དགག་དགོས་པའི་ཕྱིར་རོ། །རྟ་ལ་སོགས་པ་ནི་མ་བརྟགས་པའི་དངོས་པོ་ཡིན་པས་གང་ཟག་གིས་འཆང་བ་བཀག་ཅིང༌། ཞིང་ཁང་ལ་རེག་པ་ནི་དགག་བྱ་མེད་པའི་ཕྱིར་རོ། །ཞེས་མཚོ་ཊཱིཀ་ལས་གསུངས་པ་ལ། རིན་པོ་ཆེ་ལ་རེག་པའི་ཉེས་ལྟུང་སྐྱེ་བའི་གཞིའི་དངོས་པོ་ལ་རིན་པོ་ཆེ་དགོས་པ་ཡིན་མིན་དཔྱད་པར་ཞུ། གཉིས་པ་ནི་ཊཱི་ཀ་ལས། གཞན་གྱི་རྫས་ལ་ནི་རུང་བ་རྣམ་པ་གསུམ་མ་བསྟན་ཏེ། ཞེས་གསུངས་པས་གྲུབ་བོ། །གསུམ་པ་ནི་སྔར་རུང་བ་བྱས་པ་དང་འབྲེལ་ན་རུང་བ་གཞན་མི་དགོས་པའི་ཕྱིར་རོ། །བཞི་པ་ནི་མངོན་སུམ་ན་མེད་ན་ཆོ་གའི་འཇུག་ཡུལ་མ་ཡིན་པའི་ཕྱིར་རོ། །གསུམ་པ་རྟེན་གང་གིས་རུང་བ་བྱ་བ་ནི། རབ་ཏུ་བྱུང་བ་སྡེ་ལྔའི་སྡོམ་པ་གསོར་རུང་ཡན་ཆད་དང་ལྡན་པ་དང༌། ཤེས་པ་རང་བཞིན་དུ་གནས་པ་དང༌། ལུས་ཐ་མལ་པར་གནས་པ་དང༌། གནོད་པའི་རྐྱེན་ཅན་མ་ཡིན་པའོ། །བཞི་བ་ཆེད་དུ་བྱ་བ་ནི། ཆོས་ལྡན་གྱི་ཆེད་དུ་སྟེ། ཆོས་དང་ལྡན་པའི་དོན་ཞེས་གསུངས་པ་དང༌། གཞན་པ་ལ་མི་འཆགས་སོ། །ཞེས་སོ། །ལྔ་པ་རུང་བ་གང་བྱ་བ་ནི། སྦྱིན་བདག་བདག་པོ་ཉིད་དུ་མོས་སུ་གཞུག་པ་དང་ཞལ་ཏ་བ་བདག་པོ་ཉིད་དུ་ཞུགས་པ་དང༌། རུང་བ་ལ་བྱའོ། ། ཁྱད་པར་དུ་ཡང་བྱིན་གྱིས་བརླབས་པ་ལ་བཞི་ལས་ཡུལ་དགེ་སློང་ཆོས་བདུན་ལྡན་གྱི་མདུན་དུ་རྟེན་བཤད་མ་ཐག་པའི་ཆོས་བཞི་ལྡན་གྱིས། དངོས་པོ་ཆོས་བཞི་ལྡན་སྔར་བཤད་པ་དེ་ལ། ཆོ་ག་སྦྱོར་དངོས་མཇུག་གསུམ་གྱིས་བྱིན་གྱིས་བརླབ་པའོ། ། གནས་ནས་ཕྱུང་བ་ལ་ནི་བྱིན་གྱིས་རློབ་པའི་ཡུལ་མེད་པའི་ཕྱིར་རང་གཅིག་པུས་ཡང་བྱིན་གྱིས་བརླབ་ཏུ་རུང་བར་འོང་སྟེ། ཆོས་གོས་བྱིན་གྱིས་བརླབ་པ་བཞིན་ནོ། །དྲུག་པ་རུང་བ་འཇིག་པའི་རྒྱུ་ནི་དངོས་པོ་ཞིང་མ་ཡིན་པར་གྱུར་པ་དང༌། རྟེན་ཞིང་མ་ཡིན་པར་གྱུར་པ་དང༌། ནོར་གྱི་མངོན་ཞེན་རྒྱུན་དུ་བྱུང་ཞིང་གཉེན་པོས་མ་བཟློགས་ན་ཡང་འཇིག་སྟེ། ཊཱི་ཀ་ལས། གང་ལ་བདག་ཉིད་ཀྱི་ཕྱིར་བདག་གིར་བྱེད་པ་ཡོད་པ་དེ་ལ་ནི་རང་གིས་ཀྱང་རེག་པར་མི་བྱ་ལ། གཞན་ཡང་རེག་ཏུ་གཞུག་པར་མི་བྱ་སྟེ། དེ་ལ་རུང་བ་གསུམ་ཆར་མི་འཆགས་པའི་ཕྱིར་རོ། །ཞེས་སོ། །ལྕགས་དང་ས་ལས་བྱས་པའི་ལྷུང་བཟེད་ལ། བསྡུས་པ་ལས་རྡོ་ལས་བྱས་པ་ནི་ས་ལས་བྱས་པའི་ནང་དུ་བསྡུའོ། །གཞན་དུ་ན་ཅིའི་ཕྱིར་བཅོམ་ལྡན་འདས་མི་རུང་བ་འཆང་ཞེས་བཤད་ཀྱང༌། ལུང་ལྔ་ཚན་པ་ལས། ལྷུང་བཟེད་འདི་ལྔ་འཆང་བར་མ་བྱེད་ཅིག རྡོའི་ལྷུང་བཟེད། ཅེས་གསུངས་ལ། མ་མོ་ལས་ཀྱང༌།ལྷུང་བཟེད་རྣམ་པ་བརྒྱད་ནི་མི་གནང་བ་སྟེ། རྡོ་ལས་བྱས་པ་དང༌། ཞེས་གསུངས་སོ། །བཅོམ་ལྡན་འདས་ཀྱི་ཡོངས་སུ་སྤྱད་པ་ཙམ་གྱིས་ནི་ཉན་ཐོས་ལ་གནང་བའི་ཁུངས་སུ་མི་ཆེ་སྟེ། འོད་ལྡན་ལས་གུར་ཀུམ་གྱི་མདོག་དང་མཐུན་པ་མེ་ཏོག་ཤེ་པ་ལི་ཀས་ཁ་བསྒྱུར་བ་ལྟ་བུའི་ན་བཟའ་བཅོམ་ལྡན་འདས་ཀྱིས་གདུལ་བྱའི་དབང་གིས་གསོལ་ཡང༌། དེ་ཉན་ཐོས་རྣམས་ལ་མི་རུང་བར་གསུངས་པ་བཞིན་ནོ། །རྣམ་འབྱེད་འགྲེལ་བ་ལས། ནོར་བུ་ནི་འོད་ཀྱི་བདག་ཉིད་ཅན་དང་གསལ་བའོ། །བཻཌཱུར་ནི་བཻཌཱུར་ལས་བྱུང་བས་བཻཌཱུར་ཞེས་བྱ་སྟེ་རིན་པོ་ཆེ་སྔོན་པོར་སྣང་བའོ། །ཞེས་གསུངས་སོ། །ལུང་གཞི་ལས། བཻཌཱུར་ཟུར་བརྒྱད་པ་དྭངས་པ་གསལ་བ་དྲི་མ་མེད་པ། ཞེས་གསུངས་སོ། །རྣམ་འབྱེད་འགྲེལ་བ་ལས། མན་ཤེལ་དཀར་པོ་ནི་ཤང་ཁ་ཤི་ལ་ཞེས་བྱ་སྟེ། རིན་པོ་ཆེ་དུང་གི་རྣམ་པ་ལྟར་མཆོག་ཏུ་དཀར་བའོ། །ཞེས་གསུངས་ཤིང༌། ཕྲན་ཚེགས་འགྲེལ་བ་ལས། མན་ཤེལ་ནི་རིན་པོ་ཆེའི་ཁྱད་པར་ཡིན་ཏེ་ཁྱིམ་གང་ལ་དེ་ཡོད་པ་དེར་འབྱོར་པ་ཐམས་ཅད་རྒྱས་པར་འགྱུར་རོ། །ཞེས་སོ། །རྣམ་འབྱེད་འགྲེལ་བ་ལས། རྡོའི་སྙིང་པོ་ནི་མ་རྒད་དོ། །སྤུག་ནི་རིན་པོ་ཆེའི་རིགས་ཤིན་ཏུ་གཙོ་བོ་སྔོན་པོ་དང་སེར་པོ་དང་དཀར་པོར་སྣང་བ་སྟེ་ཁྲ་བོ་ཞེས་སོ། །ཕྲན་ཚེགས་འགྲེལ་བ་ལས། དམར་པོ་ནི་པད་མ་རཱ་ག་ཡིན་ནོ། །དུང་གཡས་སུ་འཁྱིལ་བ་ནི་རིན་པོ་ཆེའི་བྱེ་བྲག་ཡིན་ཏེ་གང་ན་དེ་ཡོད་པ་དེར་དཔལ་འབྱོར་བ་ལ་རྟག་ཏུ་གནས་པར་འགྱུར་རོ། །ཞེས་སོ། །བཅུ་དགུ་བ་མངོན་མཚན་ཅན་གྱིས་སྤྱོད་པའི་སྤང་བ་འཆད་པ་ལ། རྩ་བར། རྙེད་པ་འདོད་པ་ལ་ལྟུང་བ་འབྱུང་ངོ། ། ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་གཉན་ཡོད་དུ་དྲུག་སྡེས་མངོན་མཚན་ཅན་གྱི་བསྐྱེད་འགྱེད་པར་བྱེད་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་འདོད་པ་ཆེས་པ་དང༌། མ་བྱིན་ལེན་གྱི་རྒྱུར་འགྲོ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་བསྐྱེད་ཀྱི་གཞི་གསེར་དངུལ་ལ་སོགས་པའི་དངོས་པོ་ཁྱིམ་པ་ལ་བསྐྱེད་དུ་བཏང་སྟེ། ཡུལ་དུས་དེ་ན་བསྐྱེད་གང་ཡོད་པ་ཐོབ་ཅིང་ཐོབ་བློ་སྐྱེས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གཉིས་ཏེ། གང་ལ་བསྐྱེད་པའི་ཡུལ་དང༌། གང་བསྐྱེད་པའི་དངོས་པོའོ། །དང་པོ་ནི་ཁྱིམ་པ་ཆོས་ལྔ་ལྡན་ཏེ། གོས་སློང་པའི་སྐབས་སུ་བཤད་པའི་ཁྱིམ་པ་ཆོས་དྲུག་ལྡན་ལས་ཅི་བདེར་སྟོབས་པ་མ་ཡིན་པ་ནི་འདིར་མི་བགྲང་ངོ༌། །གཉིས་པ་ནི་བཞི་ལས། གསེར་དངུལ་གྱི་དངོས་པོ་ཡིན་པ་སྟེ། རྩ་བར།པ་ཎའམ་རིན་པོ་ཆེས་སྤྱོད་པ་ལས་སོ། །ཞེས་གསུངས་ཤིང༌། དེས་འབྲས་བུ་ལ་སོགས་པ་ཡང་མཚོན་པའོ། །དངོས་པོ་དེ་རིན་པོ་ཆེ་ཡིན་ན་ནི་སྙད་གདགས་སུ་རུང་བ་དང༌། བདག་པོ་རང་ཉིད་ཀྱི་ཡིན་པ་དང༌། ཚད་དང་ལྡན་པ་སྟེ་དེ་ཡང་རས་ཁྲུ་གང་གི་རིན་དུ་ཆོག་པའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་པའོ། །ཀུན་སློང་ནི་རང་དོན་དུ་བསྐྱེད་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་ངག་མཚན་ཉིད་ལྔ་ལྡན་གྱིས་བསྐྱེད་པར་ཞུགས་པའོ། །བཞི་བ་མཐར་ཐུག་ནི་བསྐྱེད་ཕྱིན་ཅིང་ཐོབ་བློ་སྐྱེས་པའོ། །ཊཱི་ཀ་ལས། བཤགས་པའི་དུས་ན་ཡང་བསྐྱེད་ཉིད་སྤང་བར་བྱ་ཡི་རྩ་བར་གྱུར་པའི་རྫས་ནི་མ་ཡིན་ནོ། །ཞེས་སོ། །བསྐྱེད་དང་རྩ་བ་ངོ་བོ་ཐ་དད་མེད་ན་ཐམས་ཅད་སྤང་ངོ༌། །དགེ་སློང་མའི་རྣམ་འབྱེད་ལས། མངོན་མཚན་ཞེས་བྱ་བ་ནི་དབྱིག་གམ་གསེར་རོ། །མངོན་མཚན་ཅན་སློང་ན་ཞེས་བྱ་བ་ནི་གསེར་རམ་དངུལ་ལོ། །ཞེས་གསུངས་སོ། །འདིར་མངོན་མཚན་ཅན་གྱི་སྤྱོད་པ་ཞེས་གསུངས་པ་ནི་ཕྱོགས་གཅིག་ལ་མཚོན་པ་སྟེ། ནས་ལ་སོགས་པ་འབུན་བསྐྱེད་བྱས་པ་ལས་ཀྱང་ལྟུང་བ་འདིར་འགྱུར་ཏེ། སྐབས་འདི་ཉིད་ཀྱི་ལུང་དགེ་སློང་གི་རྣམ་འབྱེད་ལས། ནས་དང་འབྲུའི་འབུན་འགྱེད་པར་བྱེད་ཅིང༌། རྙེད་པ་བདག་གིར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཞེས་གསུངས་སོ། ། ཉི་ཤུ་བ་ཉོ་ཚོང་བྱེད་པའི་སྤང་བ་འཆད་པ་ལ། རྩ་བར། གཞན་གྱིས་སོ། །ཞེས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་གཉན་ཡོད་དུ་དྲུག་སྡེས་ཉོ་ཚོང་རྣམ་པ་སྣ་ཚོགས་བྱས་པས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་སྔ་མ་དང་འདྲ་སྟེ་འདོད་པ་ཆེས་པ་དང་མ་བྱིན་ལེན་གྱི་རྒྱུར་འགྲོ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་ནས་དང་འབྲས་ལ་སོགས་པའི་དངོས་པོ་ཁྱིམ་པ་དང་ཉོ་ཚོང་བྱས་ཏེ་ཁེ་ཐོབ་ཅིང་ཐོབ་བློ་སྐྱེས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས་གཞིའི་ཡན་ལག་ལ་གཉིས་ཏེ། གང་དང་ཉོ་ཚོང་བྱ་བའི་ཡུལ་དང༌། གང་ཉོ་ཚོང་བྱ་བའི་དངོས་པོའོ། །དང་པོ་ནི་ཁྱིམ་པ་ཆོས་ལྔ་ལྡན་ཏེ་སྔ་མ་དང་འདྲའོ། །གཉིས་པ་ནི་༡འབྲས་ལ་སོགས་པའི་དངོས་པོ་ཡིན་པའོ། །༢བདག་པོ་རང་གི་ཉིད་ཡིན་པ་དང༌། ༣ཕལ་ཆེར་རུང་བ་དང༌། ༤ཚད་དང་ལྡན་པ་དང་བཞིའོ། །རྩ་བར། གཞན་གྱིས་སོ་ཞེས་སྨོས་པ་དེ་ཡང་མཚོན་པ་སྟེ། རིན་པོ་ཆེ་ཉོ་ཚོང་བྱེད་ན་ཡང་ཉོ་ཚོང་གི་སྤང་བར་འགྱུར་ཏེ། ཊཱི་ཀ་ལས། གང་ཡང་རུང་བས་རྙེད་པ་འདོད་ཅིང་ཉོ་ཚོང་ལ་སོགས་པ་སྤྱོད་པ་ལས་བསྐྱེད་ཕྱིན་ནའོ། །ཞེས་དང༌། ཞུ་འགྲེལ་ལས། རིན་པོ་ཆེ་དང་ས་ལུ་དང་གོས་ལ་སོགས་པའི་ཉོ་ཚོང་བྱེད་ཅིང་བསྐྱེད་ཕྱིན་ན་ཉོ་ཚོང་གི་སྤང་བར་འགྱུར་རོ། །ཞེས་གསུངས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་དོན་དུ་ཚོང་ཁེ་སྒྲུབ་པའི་ཕྱིར་ཉོ་ཚོང་བྱེད་པ་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་ངག་མཚན་ཉིད་ལྔ་ལྡན་གྱིས་ཉོ་ཚོང་བྱེད་པར་ཞུགས་པའོ། །བཞི་བ་མཐར་ཐུག་པ་ནི་ཚོང་ཁེ་ཐོབ་ཅིང་ཐོབ་བློ་སྐྱེས་པའོ། །