བཅུ་ཚན་གསུམ་པ་ལ་བསྡུས་དོན་དང་སོ་སོར་བཤད་པ།
བཅུ་ཚན་གསུམ་པ་ལ་བསྡུས་དོན་དང་སོ་སོར་བཤད་པ་དང་གཉིས།
དང་པོ་ནི།སོར་སྡོམ་ལས། ལྷུང་བཟེད་གཉིས་དང་ཐ་ག་གཉིས། །བྱིན་ཕྲོགས་སྟོན་ཟླ་ཐ་ཆུངས་དང༌། །དགོན་པ་བ་དང་རས་ཆེན་དང༌། །བསྔོས་པ་དང་ནི་བསོག་འཇོག་གོ། །ཞེས་གཟུང་ངོ། གཉིས་པ་སོ་སོར་བཤད་པ་ལ་བཅུ་ལས། དང་པོ་ཉེར་གཅིག་པ་ལྷུང་བཟེད་འཆང་བའི་སྤང་བ་འཆད་པ་ལ། རྩ་བར། ལྷུང་བཟེད་ཀྱིའོ། །ཞེས་སོགས་བྱུང༌། འདི་དོན་ལ་བཞི་ལས། དང་པོ་གླེང་གཞི་ནི་གཉིས་ལས་བྱུང་ལ་མ་བཅས་པ་ནི་ཉེ་དགའ་ལས་སོ། །བྱུང་ལ་བཅས་པའི་གླེང་གཞི་ནི་མཉན་ཡོད་དུ་དྲུག་སྡེས་ལྷུང་བཟེད་བྱིན་གྱིས་མ་བརླབས་པར་འཆང་བ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་འདོད་པ་ཆེ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་རང་དབང་བའི་ལྷུང་བཟེད་བྱིན་གྱིས་མ་བརླབས་པར་རང་ངམ་ཤན་སྟོབས་ཀྱིས་ཞག་བཅུ་འདས་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་བདུན་ལས། ལྷུང་བཟེད་ཡིན་པ་སྟེ། ལྷུང་བཟེད་ཀྱིའོ་ཞེས་སོ། །འབྲེལ་མེད་མ་ཡིན་པའི་ལྷུང་བཟེད་དེ། རྩ་བར། ལྟུང་བ་འབྱུང་བ་ལ་སྤང་བར་མི་བྱ་བ་ཉིད་དང༌།བྱིན་གྱིས་བརླབ་པར་མི་བྱ་བ་ཉིད་དག་གོ་བར་བྱའོ། །ཞེས་དང༌། རང་གི་རྣམ་བཤད་ཀྱི་ལྷུང་བཟེད་འབྲེལ་མེད་ཀྱི་སྐབས་ལས། འདིར་འཆང་བའི་ཉེས་པ་བསྐྱེད་པ་མེད་དོ། །ཞེས་སོ། །རུང་བ་དང་ལྷུང་བཟེད་ཀྱི་ཚད་དང་ལྡན་པ་སྟེ། རུང་བ་ཉིད་དང་ཚད་དང་ལྡན་པ། ཞེས་སོ། །གནས་སྐབས་དབང་བྱར་ཡོད་པ་དང༌། རང་ཉིད་དབང་བ་ཡིན་པ་དང༌། བྱིན་གྱིས་བརླབས་པ་དང་མ་འབྲེལ་ལམ་འབྲེལ་ཀྱང་ཤན་རྗེས་སུ་ཞུགས་པ་ཡིན་པ་དང་གསུམ་ནི་གོས་འཆང་བའི་སྐབས་སུ་སྔར་བཤད་པ་བཞིན་ནོ། །