གཉིས་པ་བསམ་པའི་ཡན་ལག་ལ་གཉིས།
གཉིས་པ་བསམ་པའི་ཡན་ལག་ལ་གཉིས་ལས།
འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་དོན་དུ་ལྷུང་བཟེད་འཆང་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་ལྷུང་བཟེད་བྱིན་རླབས་མི་བྱེད་པར་འཇོག་པ་ཉིད་ཡིན་གྱི། ལུས་ངག་ཏུ་ཐོན་པ་མི་དགོས་ཏེ་བྱ་བ་མི་བྱེད་པའི་སྦྱོར་བ་ཡིན་པའི་ཕྱིར་རོ། །བཞི་བ་མཐར་ཐུག་ནི་རང་ངམ་ཤན་སྟོབས་ཀྱི་ཞག་བཅུའི་མཚན་མོ་མཐའི་སྐད་ཅིག་མའོ། །ལྷུང་བཟེད་མདོག་སྐྱ་བ་དང་དཀར་བ་ལ་སོགས་པ་ནི་རུང་བ་ཉིད་མ་ཡིན་པའི་ཕྱིར། བྱིན་རླབས་མི་འཆགས་པ་དང༌། བྱིན་གྱིས་མ་བརླབ་པར་ཞག་བཅུ་འདས་པར་བཅངས་ཀྱང་སྤང་ལྟུང་མི་བསྐྱེད་པ་དང༌། ཞག་བཅུ་འདས་པ་ན་ལྟུང་བ་ན་སྨད་པ་དང༌། ཉི་མ་དང་པོ་ཉིད་ནས་ལྷུང་བཟེད་མི་རུང་བ་འཆང་བའི་ཉེས་བྱས་བསྐྱེད་པ་སྟེ། དོན་རྣམ་པ་བཞི་གོ་བར་བྱའོ། །