གཉིས་པ་ལྟུང་བ་རྣམ་གཞག

གཉིས་པ་ལྟུང་བ་རྣམ་གཞག་ནི།

རྩ་བར། དེ་ཡོད་པ་ཉིད་ནའོ། །ཞེས་སོགས་བྱུང༌།འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་ཉེ་དགས་ལྷུང་བཟེད་བླངས་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་སྦྱིན་བདག་གི་ཡོ་བྱད་ལ་གནོད་པ་དང༌།རང་འདོད་པ་ཆེ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་རང་ལ་ལྷུང་བཟེད་ཡོད་བཞིན་དུ་ཁྱིམ་པ་ཉེ་དུ་མ་ཡིན་པ་ལ་ལྷུང་བཟེད་བླངས་ཏེ་ཐོབ་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། གཞིའི་ཡན་ལག་ལ། གང་ལ་བསླང་བའི་ཡུལ་དང༌།གང་བསླང་བའི་དངོས་པོ་དང༌། གང་གིས་སློང་བའི་རྟེན་དང་གསུམ། དང་པོ་ནི་ཁྱིམ་པ་ཆོས་དྲུག་ལྡན་ཏེ་གོས་སློང་བའི་ཡུལ་ལ་སྔར་བཤད་པ་དང་འདྲའོ། །གཉིས་པ་ལ་བཞི་སྟེ། ལྷུང་བཟེད་ཡིན་པ་དང༌། སྦྱིན་བདག་དེ་ཉིད་ཀྱི་ཡིན་པ་དང༌། རུང་བ་དང་ཚད་དང་ལྡན་པའོ། །གསུམ་པ་ནི་རང་ལ་ལྷུང་བཟེད་མཚན་ཉིད་དང་ལྡན་པ་ཡོད་པ་དགོས་ཏེ། རྩ་བར། དེ་དག་ཡོད་པ་ཉིད་ན་ཡང་ངོ། །ཞེས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་པའོ། །ཀུན་སློང་ནི་རང་དོན་དུ་ལྷུང་བཟེད་སློང་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་ངག་མཚན་ཉིད་ལྔ་ལྡན་གྱིས་སློང་བར་ཞུགས་པའོ། །བཞི་བ་མཐར་ཐུག་ནི་ལྷུང་བཟེད་ཐོབ་ཅིང་ཐོབ་བློ་སྐྱེས་པའོ། ། སྤྱིར་ན་སྤང་ལྟུང་ཕྱིར་བཅོས་པའི་སྤང་བ་ལ་གཉིས་ཏེ། གཏན་སྤངས་དང་རེ་ཞིག་པའི་སྤང་བའོ། །དང་པོ་ནི་གཉིས་ཏེ། སྐབས་འདིར་རྩ་བར། ༼ལྷུང་བཟེད་མཆོག་ཏུ་འདོད་པ་དེ་ལསལྷུང་བཟེད་ངན་ཤོས་བྱ་བ་ཉིད་ཡིན་ནོ། །༽གཞན་ནི་ཐམས་ཅད་ཀྱི་ཐམས་ཅད་དུ་སྤང་བར་བྱ་བ་ཉིད་ཡིན་ནོ། །ཞེས་པ་འདི་དང༌། བྱིན་འཕྲོག་བྱས་ན་དེ་ནི་ཕྱིར་སྦྱིན་པར་བྱ། ཞེས་གསུངས་པའོ། །དེ་གཉིས་ལས་གཞན་པའི་སྤང་བ་ཐམས་ཅད་རེ་ཞིག་པའི་སྤང་བ་སྟེ་ཞག་གཅིག་སྤང་བའོ། །བསྐོས་པས་སོ་ཞེས་པ་འདིའི་དོན་ལ་ལྔ་ལས། དང་པོ་དགོས་པའི་དོན་ནི་མ་བསྐོས་པའི་ཉེས་པ་ཁེགས་པ་དང༌། ལས་ཀྱིས་བསྐོས་པས་བཅས་པའི་ས་མཚམས་ཟིན་པའོ། །གཉིས་པ་ཡུལ་གང་བསྐོ་བ་ནི་དགེ་སློང་ཆོས་བཅུ་བཞི་དང་ལྡན་པ་སྟེ། གསོ་སྦྱོང་གི་གཞིའི་སྤོང་བ་པའི་ཞལ་ཏ་བ་བསྐོ་བའི་སྐབས་སུ་འཆད་པར་འགྱུར་རོ། །གསུམ་པ་རྟེན་གང་གིས་བསྐོ་བ་ནི་དགེ་འདུན་མཚན་ཉིད་བཞི་ལྡན་གྱིས་སོ། །བཞི་བ་ཆོ་ག་གང་གིས་བསྐོ་བ་ནི། གསོལ་གཉིས་ཀྱི་ལས་ཀྱིས་བསྐོ་བའོ། །ལྔ་བ་བསྐོས་པ་དེའི་བྱ་བ་ནི། ཚོགས་པ་ལ་བརྗོད་པ་ལ་སོགས་པ་སྟེ་གཞུང་ལས་ཤེས་པར་འགྱུར་རོ། །ལྷུང་བཟེད་འབྲེལ་བ་མེད་པ་ཞེས་པ་ནི། བྱིན་གྱིས་བརླབས་པའི་འབྲེལ་བ་མེད་པ་དང༌། གཞན་ལ་སྤང་བའི་འབྲེལ་བ་མེད་པའོ། །ཊཱི་ཀ་ལས། དེ་ནི་བྲན་གནམ་ཁོལ་དུ་བྱུང་བ་དང་འདྲ་སྟེ། གནམ་ཁོལ་དུ་བྱུང་བས་བྲན་གྱི་ལས་སུ་མི་བསྐོ་བ་དང༌། ཡོངས་སུ་བཏང་བར་མི་བྱ་བ་དང༌། བཟའ་བཏུང་ལ་སོགས་པ་སྦྱིན་དགོས་པ་དེ་བཞིན་དུ་ལྷུང་བཟེད་འབྲེལ་བ་མེད་པ་འདི་ཡང་བྱིན་གྱིས་བརླབ་པར་མི་བྱ། གཞན་ལ་སྤང་བར་མི་བྱའོ། །བདག་གི་ལྷུང་བཟེད་དང་བརྗེ་བར་འདོད་ན་ལྷུང་བཟེད་འབྲིམ་པ་དེ་བླང་བར་བྱ་སྟེ། རང་གི་ལྷུང་བཟེད་ནི་དགེ་སློང་ལྷུང་བཟེད་འབྲིམ་པ་པོ་དེ་ལ་གཏད་པར་བྱའོ། །དེས་གཏད་པའི་ལྷུང་བཟེད་དེ་གྲལ་འོག་མ་དེ་ལ་བྲིམ་པར་བྱའོ། །གྲལ་འོག་མ་དེས་ཀྱང་བརྗེ་བར་འདོད་ན་བརྗེ་བར་བྱ་སྟེ་གྲལ་རྫོགས་ཀྱི་བར་དུ་དེ་བཞིན་བྱའོ། །ལྷུང་བཟེད་ལྷག་པ་དགེ་འདུན་ལ་སྤངས་པ་བྲིམ་པས་ལྷུང་བཟེད་ཀྱི་སྙིགས་དེ་ཆད་ལས་སུ་མ་ཤི་བར་དུ་བཅང་པ་ལ་འབྲེལ་མེད་ལྷུང་བཟེད་ཡིན་པར་ཀུན་མཁྱེན་འཇམ་བཞད་ཀྱིས་གསུངས་སོ། །