ཉེར་གསུམ་པ་འཐག་ཏུ་འཇུག་པའི་སྤང་བ་འཆད་པ།

ཉེར་གསུམ་པ་འཐག་ཏུ་འཇུག་པའི་སྤང་བ་འཆད་པ་ལ།

རྩ་བར། རིན་མེད་པར་བསྒོ་བས་སམ་གཞན་གྱིས་འཐག་ཏུ་བཅུག་ནའོ། །ཞེས་སོགས་བྱུང༌། འདི་དོན་ལ་བཞི་ལས།དང་པོ་གླེང་གཞི་ནི་མཉན་ཡོད་དུ་ཉེ་དགས་ཐ་ག་པ་ལ་རྔན་པ་མེད་པར་ཐགས་འཐག་ཏུ་བཅུག་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་ཐ་ག་པའི་ལོངས་སྤྱོད་ལ་གནོད་པ་དང༌། རང་འདོད་པ་ཆེས་པའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་ཐ་ག་པ་ཉེ་དུ་མ་ཡིན་པ་ལ་རྔན་པ་མེད་པར་གོས་འཐག་ཏུ་བཅུག་སྟེ། ཁྲུ་གང་ཡན་ཆད་བཏགས་ཟིན་ཞིང་རྔན་པ་ལ་ཐོབ་བློ་སྐྱེས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ། གང་ལ་འཐག་ཏུ་འཇུག་པའི་ཡུལ་དང༌། གང་འཐག་ཏུ་འཇུག་པའི་དངོས་པོ་དང༌། གང་གིས་འཐག་ཏུ་འཇུག་པའི་རྟེན་དང་གསུམ། དང་པོ་ནི་ཐ་ག་པ་ཁྱིམ་པ་ཆོས་དྲུག་ལྡན་ནོ། །གཉིས་པ་ནི་གོས་ཀྱི་རྒྱུ་ཡིན་པ་དང༌། རང་ཉིད་དབང་བ་དང༌། བྱེད་འཕྲོ་གཞིའི་སེལ་བར་གཏོགས་པ་མ་ཡིན་པ་དང༌། རུང་བ་དང༌། ཚད་དང་ལྡན་པ་སྟེ་ལྔའོ། །གསུམ་པ་གང་གིས་འཐག་ཏུ་འཇུག་པའི་རྟེན་ནི། རྔན་པ་མེད་པ་སྟེ། རྩ་བར། རིན་མེད་པར། ཞེས་སོགས་སོ། །ལུང་རྣམ་འབྱེད་ལས། གླ་རྔན་གྱིས་འཐག་ཏུ་འཇུག་པ་ལ་ལྟུང་བ་མེད་དོ། །ཞེས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་ཡིད་གཅུགས་ཁྱད་པར་ཅན་མ་ཡིན་པས་རང་དོན་དུ་ཐགས་གླ་མེད་པར་འཐག་ཏུ་འཇུག་པར་འདོད་པ་རྒྱུན་མ་ཆད་པའོ། །གལ་ཏེ་འཐག་གླར་རྐུ་སེམས་བྱུང་ན་ནི་དངན་འཐེན་ཡང་མ་བརྐུས་པ་མིན་ན་ནི་ཞེས་འགྲེལ་ཆུང་ལས། ལས་བྱེད་པ་ལ་གླ་མ་བྱིན་ན་ཕམ་མོ། །ཞེས་སོ། །གསུམ་པ་སྦྱོར་བ་ནི་རང་ངམ་བསྐོས་པས་འཐག་ཏུ་འཇུག་པའོ། །བཞི་བ་མཐར་ཐུག་པ་ནི་ཁྲུ་གང་ཡན་ཆད་བཏགས་ཟིན་ཞིང་ཐགས་གླ་ལ་ཐོབ་བློ་སྐྱེས་པའོ། །ཉེར་བཞི་བ་འཐག་པ་བསྐྱེད་པའི་སྤང་བ་འཆད་པ་ལ། རྩ་བར། དེའི་ཕྱིར་བཏག་པར་བྱ་བ་བསམ་པ་ལས་བྱུང་བ་ཉིད་དོ། །ཞེས་སོགས་བྱུང༌།འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་ཉེ་དགས་འཐག་པ་བསྐྱེད་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་སྦྱིན་བདག་དང་ཐ་ག་པའི་ལོངས་སྤྱོད་ལ་གནོད་པ་དང༌། རང་འདོད་པ་ཆེ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་རང་ལ་བསྔོས་པའི་གོས་སྦྱིན་བདག་གིས་འཐག་ཏུ་འཇུག་པ་དེ་ཞེང་དཀྱུས་ཆེར་བསྐྱེད་པའམ་ཐགས་བཟང་དུ་བསྐྱེད་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གསུམ་སྟེ། གང་གིས་འཐག་ཏུ་འཇུག་པའི་སྦྱིན་བདག་དང༌། གང་གིས་འཐག་པའི་ཐ་ག་པ་དང༌། གང་འཐག་པ་བསྐྱེད་པའི་དངོས་པོའོ། །དང་པོ་ནི་སྦྱིན་བདག་ཁྱིམ་པ་ཆོས་དྲུག་ལྡན་ནོ། །གཉིས་པ་ནི་རྔན་པ་མ་བྱིན་ན་ལྟུང་བ་བསྐྱེད་པའི་ཆ་ནས་ཐ་ག་པ་ཁྱིམ་པ་ཆོས་དྲུག་ལྡན་ནོ། །གང་འཐག་པ་བསྐྱེད་པའི་དངོས་པོ་ནི། གོས་ཀྱི་རྒྱུ་ཡིན་པ་དང༌། སྦྱིན་བདག་དེ་ཉིད་ཀྱི་ཡིན་པ་དང༌། བྱེད་འཕྲོ་གཞིའི་སེལ་བར་གཏོགས་པ་མ་ཡིན་པ་དང༌། རང་ལ་སྦྱིན་བདག་གིས་བསྔོས་པ་ལས་ལྷག་པ་ཡིན་པ་དང༌། རུང་བ་དང་ཚད་དང་ལྡན་པ་སྟེ་དྲུག་གོ །གཉིས་པ་བསམ་པའི་ཡན་ལག་ནི་གཉིས་ལས། འདུ་ཤེས་ནི་གཞི་ལ་མ་འཁྲུལ་པའོ། །ཀུན་སློང་ནི་རང་དོན་དུ་འཐག་པ་བསྐྱེད་པར་འདོད་པ་རྒྱུན་མ་ཆད་པའོ། །ཁ་ཅིག་འཐག་འཇུག་དང་འཐག་བསྐྱེད་ཀྱི་སྤང་ལྟུང་གཉིས་ལ་རྐུ་སེམས་ཚང་བར་ཐལ། ཐ་ག་བ་གླ་རྔན་མི་སྦྱིན་པར་འཐག་འཇུག་འདོད་ཀྱི་བློ་དང༌། སྦྱིན་བདག་གིས་བསྔོས་ཚད་ལས་ལྷག་པའི་འཐག་པ་ཆེ་བ་དང་བཟང་བ་གང་ལེན་འདོད་པའི་བློ་དེ་རྐུ་སེམས་ཡིན་པའི་ཕྱིར་ཏེ། མཚོ་ཊཱིཀ་༥༡༤ལས།འགྲེལ་ཆུང་ལས་ལས་བྱེད་པ་ལ་གླ་མ་བྱིན་ན་ཕམ་མོ། །ཞེས་གསུངས་པ་དང༌། གོང་དུ་རྐུ་སེམས་ལ་ཆོས་དྲུག་ལྡན་བཤད་པ་རྣམས་ཚང་བའི་སྒོ་ནས་དེ་དག་རྐུ་སེམས་ཡིན་པར་གྲུབ་པའི་ཕྱིར་ཟེར་ན་དཔྱད་རྒྱུ་སྣང་ངོ། །གསུམ་པ་སྦྱོར་བ་ནི་རང་ངམ་བསྐོས་པས་འཐག་པ་བསྐྱེད་པར་ཞུགས་པའོ། །བཞི་བ་མཐར་ཐུག་ནི་འཐག་པ་བསྐྱེད་པའི་གོས་དེ་ཐོབ་ཅིང་ཐོབ་བློ་སྐྱེས་པའོ། །སྦྱིན་པར་བྱེད་པའི་དོག་པ་ལ་སོགས་པ་ཟད་པ་དང༌། ཐ་ག་པ་ལ་རྔན་པ་མ་བྱིན་པ་གཉིས་ཀ་ཡང་སོ་སོར་ལྟུང་བའི་བྱེད་པ་པོའི་གཙོ་བོ་ཡིན་པར་ཤེས་པར་བྱ་བའི་ཕྱིར་རོ། །དེས་ན་དེ་གཉིས་གང་ཡང་རུང་བ་གཅིག་ཡོད་ན་ཡང༌། འདིར་དངོས་གཞིར་འགྱུར་ཞེས་ཊཱི་ཀ་ལས་བཤད་དོ། །འདིར་རྔན་པ་སྟེར་བར་ཁས་བླངས་པ་མ་བྱིན་ན་ནི། ཊཱི་ཀ་ལས། ཁས་བླངས་པ་མ་བྱིན་ན་ནི་མ་བྱིན་པར་ལེན་པའི་ཁ་ན་མ་ཐོ་བར་ཡང་འགྱུར་བ་ཉིད་དོ། །ཞེས་སོ། །ཉེར་ལྔ་པ་འཕྲོག་པའི་སྤང་བ་འཆད་དེ། རྩ་བར། དབྲལ་བར་བྱ་བ་དགེ་སློང་ཉིད་དོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་དགའ་བོས་ཆོས་གོས་བྱིན་འཕྲོག་བྱས་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་རང་རིགས་ཀྱི་ལོངས་སྤྱོད་ལ་གནོད་པ་དང༌། མ་བྱིན་ལེན་པའི་རྒྱུར་འགྲོ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་གོས་སམ་ལྷུང་བཟེད་དེ་གཞན་དབང་བ་ལ་རང་ཉིད་དབང་བར་འདུ་ཤེས་འཁྲུལ་བས་རྐུ་སེམས་མེད་པར་འཕྲོགས་ཏེ་ཐོབ་བློ་སྐྱེས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གཉིས་ཏེ། གང་ལས་འཕྲོག་པའི་ཡུལ་དང༌། གང་འཕྲོག་པའི་དངོས་པོའོ། །དང་པོ་ནི་དགེ་སློང་ཆོས་དྲུག་ལྡན་ནོ། །དེ་ཡང་བསྙེན་རྫོགས་ཀྱི་སྡོམ་པ་རྣམ་པར་དག་པ་དང༌། མཚན་མཐུན་པ་དང༌། ལྟ་བ་མཐུན་པ་དང༌། ཐ་སྙད་གསུམ་དང་ལྡན་པ་དང༌། །ལུས་ཐ་མལ་དུ་གནས་པ་དང༌། བདག་ལས་ཐ་དད་པའོ། །དང་པོ་ནི་དགེ་སློང་གི་སྡོམ་པ་ཕམ་པས་མ་གོས་པ་སྟེ། སྤྱིར་བསྟན་པ་ལས། བསྙེན་པར་རྫོགས་པ་ཅན་མ་ཉམས་པ་ཉིད་ནི་བསླབ་པ་དག་ལ་ཡན་ལག་ཡིན་ནོ། །ཞེས་སོ། །སེལ་བ་ནི་དགེ་སློང་གི་སྡོམ་པ་བླངས་ཀྱང་མ་སྐྱེས་པ་དང་ཕམ་པས་ཉམས་པའི་ཆོས་གོས་འཕྲོགས་ན་ཉེས་བྱས་ཏེ། འོག་མ་དག་ལ་གཞན་ལ་ན་སྨད་པ་ཉིད་དོ། །ཞེས་སོ། །གཉིས་པ་དང་གསུམ་པ་ནི་ཡུལ་རྟེན་མཚན་མཐུན་པ་དང་ལྟ་བ་མཐུན་པ་སྟེ། སྤྱིར་བསྟན་པ་ལས། མཚན་མཐུན་པ་དང༌། ཁས་བླངས་པ་དག་གིས་ནི་རང་གི་ཕྱོགས་ཉིད་ཀྱི་ཁོངས་སུ་གཏོགས་སོ། །ཞེས་སོ། ། བཞི་པ་ནི་སྨྲ་ཤེས།དོན་གོ། །ཤེས་པ་རང་བཞིན་དུ་གནས་པ་སྟེ། སྤྱིར་བསྟན་པ་ལས། སྨྲ་བ་པོ་ཉིད་ལ་ཡོད་པ་སྟེ་རྣམ་པར་རིག་བྱེད་ལ་ནི་དོན་གོ་བའོ། །རང་བཞིན་ཉམས་པ་ནི་མ་ཡིན་ནོ། །ཞེས་སོ། །ལྔ་པ་ནི་ཊཱི་ཀ་ལས། རེག་པ་ལ་སོགས་པ་ནི་ཐ་སྙད་ཀྱི་ཕྱིར་རྣམ་པར་བཞག ཅེས་གསུངས་སོ། །དྲུག་པ་ནི་དགེ་སློང་ཕ་རོལ་པོ་ཞེས་བརྡེག་པའི་ལྟུང་བྱེད་ལ་གསུངས་པའི་གནད་ཀྱིས་སྦྱར་རོ། །དགེ་སློང་ཆོས་དྲུག་ལྡན་ཞེས་འོག་ཏུ་འཆད་པ་རྣམས་སུའང་དེ་བཞིན་དུ་སྦྱར་རོ། །གཉིས་པ་གང་འཕྲོག་པའི་དངོས་པོ་ནི་བཞི་ལས། གོས་སམ་ལྷུང་བཟེད་ཡིན་པ་སྟེ། གོས་ཉིད་ཡིན་ནའོ། །ཞེས་དང༌། ཊཱི་ཀ་ལས། འདིར་གོས་ཞེས་སྨོས་པ་ནི་མཚོན་པ་སྟེ། དགེ་སློང་གི་ཡོ་བྱད་གཞན་ཡང་འཕྲོགས་ན་དངོས་གཞིའི་ཁ་ན་མ་ཐོ་བར་འགྱུར་རོ་ཞེས་གསུངས་པས་ལྷུང་བཟེད་ལ་ཡང་སྦྱར་རོ། །དགེ་སློང་གཞན་དེ་ཉིད་དབང་བ་ཡིན་པ་སྟེ། རྩ་བར། དབྲོག་པར་བྱ་བ་རང་གི་ཉིད་མ་ཡིན་ནའོ། །ཞེས་སོ། །རུང་བ་དང་ཚད་དང་ལྡན་པ་སྟེ་བཞིའོ། །