མཆོད་རྟེན།
༡ མཆོད་རྟེན་གྱི་ཁུངས་དང་རྣམ་གྲངས། མཆོད་རྟེན་ཞེས་པ་ལེགས་སྦྱར་སྐད་དུ། དུ་སྟུས་ཞེས་ཟེར་ལ། གཞན་དུ་སྟུས་ཞེས་པ་རྟེན་མཆོག་དང་བང་སོ་ལ་ཡང་འཇུག རྟེན་མཆོག་ཅེས་པ་དྲན་རྟེན་གྱི་བཟོ་སྐྲུན་ལྟ་བུ་ལ་ཟེར། སྟོན་པ་མ་བྱོན་པའི་གོང་རོལ་ནས་ཀྱང་། རྒྱལ་བོ་སོ་སོའི་བང་སོ་ལ་སྟུས་ཞེས་འབོད་ལ། །རང་ཅག་བོད་ལ་མཚོན་ན་བོན་ཆོས་དར་བ་ནས། ཡུལ་ལྷ་གཞི་བདག་དང་། བཙན་དང་། རྒྱལ་བོའི་རྟེན་མཁར་གྱི་བཟོ་རྩལ་གྱིས་བོད་ཡུལ་གྱི་མཆོད་རྟེན་ལ་ཤན་ཞུགས་ཐེབས་ཡོད་པར་སྣང་། དགེ་ཆོས་ཀྱི་གཏམ་རྒྱུད་གསེར་ཐང་ལས། རང་རེའི་མཆོད་རྟེན་ལའང་བོན་གྱི་དམུ་མཁར་བང་རིམ་ཅན་གྱི་རྩེ་མོ་ལ། གཡག་རྭ་གཉིས་དེའི་བར་དུ་མཁར་གོང་བཞག་པ་དེའི་སྲོལ་མང་དུ་འབྲེལ་བར་སེམས། མཆོད་རྟེན་གྱི་ཐིག་ཚད་རང་རེ་ལ་གྲགས་པ་འདི་ཡང་། རྒྱ་གར་བའི་སྲོལ་ཡིན་མིན་ད་དུང་ཡང་། རྒྱ་གར་མཆོད་རྟེན་ཞིག་རལ་ཏུ་སོང་མ་སོང་འབུམ་ཕྲག་ལས་ལྷག་པ་མཆིས་པས་དེའི་ཁྲོད་ན། རང་རེའི་མཆོད་རྟེན་གྱི་དབྱིབས་ཅན་གཅིག་ཀྱང་མེད་པ་ལ་བལྟས་ན་ཤེས། རྒྱ་གར་བ་རྣམས་ལ་ཝུ་བ་ལྟ་བུའི་མཆོད་རྟེན་དང་། གཙུག་རྒྱན་དང་། དྲིལ་བུ་དང་། འབྲས་སྤུངས་ཏེ། མཆོད་རྟེན་རིགས་བཞི་གྲགས་ཤིང་། ཐམས་ཅད་ཀྱང་བཟོ་དབྱིབས་ཁོ་ན་ལས་མིང་བཏགས་ཞེས་གསུངས་སོ། །
གང་ལྟར་མཆོད་རྟེན་ནི། ཆོས་ལོངས་སྤྲུལ་གསུམ་ལས་ཆོས་སྐུའི་རྟེན་དང་། སྐུ་གསུང་ཐུགས་གསུམ་ལས་ཐུགས་རྟེན་ཡིན་ཏེ། ལུང་ཞུ་བའི་འགྲེལ་བ་ལས། མཆོད་རྟེན་གྱི་གནས་ནི་ཆོས་ཀྱི་སྐུ་སྟེ་དེ་བཞིན་གཤེགས་པའི་ཆོས་ཀྱི་སྐུའི་བདག་ཉིད་དྲན་པ་ཉེ་བར་བཞག་པ་དང་། རྫུ་འཕྲུལ་གྱི་རྐང་བ་དང་། དབང་བོ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་དང་། མཁྱེན་པ་དང་། སྟོབས་དང་། ཐུགས་རྗེ་ཆེན་པོ་ལ་སོགས་པའི་ཡོན་ཏན་རྣམས་ཀྱི་གཟུགས་བརྙན་ཉིད་དུ་བསླབ་པ་ཡིན་པའི་ཕྱིར་རོ། །གསུངས་པས་སོ། །
རང་རེའི་ནང་བསྟན་ནས་གསུངས་པའི་ཐུགས་ཀྱི་མཆོད་རྟེན་ལ། རང་བཞིན་ལྷུན་གྲུབ་དང་། བླ་ན་མེད་པ། བྱིན་གྱིས་བརླབས་པ། དངོས་གྲུབ་འབྱུང་བ། ཐེག་པ་སོ་སོའི་མཆོད་རྟེན་ཏེ་ལྔ་ལས། དང་བོ་ནི། རི་རྒྱལ་ལྷུན་པོ་དང་བཅས་པ། གཉིས་པ། བྱམས་པ་རྡོ་རྗེ་བརྩེགས་པ། སྙིང་རྗེ་རིན་ཆེན། དགའ་བ་པདྨ། བཏང་སྙོམས་རྒྱ་གྲམ་བརྩེགས་པ་ཚད་མེད་བཞིའི་ངོ་བོར་གྱུར་བའོ། །གསུམ་པ། སངས་རྒྱས་ཀྱི་སྐུ་གདུང་ཆ་བརྒྱད་དུ་ཕྱེས་པའི་མཆོད་རྟེན་དང་། བུམ་པའི་མཆོད་རྟེན། སོལ་བའི་མཆོད་རྟེན་བཅས་བཅུའོ། །བཞི་བ། ཡུལ་ཆེན་བརྒྱད་ཀྱི་དུར་ཁྲོད་དུ། ཀྱེ་རྡོར་ལྷ་མོ་བརྒྱད་ཀྱི་དངོས་གྲུབ་འབྱུང་བའི་མཆོད་རྟེན་བརྒྱད་དོ། །ལྔ་བ། ཉན་རང་བྱང་སེམས་དང་། སངས་རྒྱས་ཀྱི་གདུང་རྟེན་མཆོད་རྟེན་རྣམས་སོ། །དེ་ལྔའི་ཁུངས་ནི། རང་བཞིན་ལྷུན་གྲུབ་ནི། དྲི་མེད་འོད་ལས། ལྷུན་པོ་དང་འཇིག་རྟེན་གྱི་ཁམས་ནི་མཐའ་དག་རྒྱལ་བའི་སྐུ་སྟེ་མཆོད་རྟེན་དངོས་སོ། །ཞེས་དང་། བླ་ན་མེད་པའི་མཆོད་རྟེན་ནི། ཐིག་ལེ་དབང་གི་རྒྱུད་ལས། ཤར་དུ་བྱམས་པ་རྡོ་རྗེ་བརྩེགས། །ལྷོ་རུ་སྙིང་རྗེ་རིན་ཆེན་བརྩེགས། །ནུབ་ཏུ་དགའ་བ་པདྨ་བརྩེགས། །བྱང་དུ་བཏང་སྙོམས་རྒྱ་གྲམ་བརྩེགས། །ཞེས་དང་། བྱིན་གྱིས་བརླབས་པའི་མཆོད་རྟེན་ནི། འཁོར་ལོ་འབྱུང་བའི་རྒྱུད་ལས། བྱིན་བརླབས་སྐུ་གདུང་ཆ་བརྒྱད་གླིང་བཞིར་སྣང་། །ཞེས་དང་། དངོས་གྲུབ་འབྱུང་བའི་མཆོད་རྟེན་ནི། བདུད་རྩི་ཆེན་པོ་མཆོག་གི་རྒྱུད་ལས་གསུངས་པ་ལྟར། ཡུལ་བརྒྱད་ཀྱི་དུར་ཁྲོད་ཀྱེ་རྡོར་ལྷ་མོ་བརྒྱད་ཀྱི་དངོས་གྲུབ་འབྱུང་བའི་མཆོད་རྟེན་བརྒྱད་གསུངས་པ་དང་། ཐེག་པ་སོ་སོའི་མཆོད་རྟེན་ནི། མདོ་མྱང་འདས་ལས། བང་རིམ་བཅུ་གསུམ་འཕང་ལོ་དང་བཅས་པ། རང་སངས་རྒྱས་ལ་བང་རིམ་བཅུ་གཉིས་སོགས་གསུངས་པ་དེ་རྣམས་སོ། །མདོ་རྩ་ལས། མཆོད་རྟེན་ནི་རྣམ་པ་གཉིས་ཏེ། 
གཙང 
་ཁང་ཅན་ཉིད་དང་། ཀ་བ་ལྟ་བུ་ཉིད་དོ། །དེ་རབ་ཏུ་བྱུང་བ་རྣམས་ལ་འོས་པ་ཉིད་དོ། །གལ་ཏེ་དགེ་བ་ཡིན་ནའོ། །སངས་རྒྱས་རྣམས་ཀྱིས་ནི་རྣམ་པ་ཐམས་ཅད་དོ། །རྣམ་པ་ནི་བང་རིམ་བཞི་དང་། འདབ་མ་དང་། བུམ་པ་དང་། པུ་ཤུ་དང་། སྲོག་ཤིང་དང་། གདུགས་བཅུ་གསུམ་དང་། ཆར་ཁེབས་དག་གོ། རང་སངས་རྒྱས་རྣམས་ཀྱི་ནི་ཆར་ཁེབས་མེད་པའོ། །ཉན་ཐོས་རྣམས་ཀྱིས་ནི་འབྲས་བུའི་ཚད་ཀྱིས་དེའི་གདུགས་གཅིག་ལྷག་པའོ། །སོ་སོའི་སྐྱེས་བོ་རྣམས་ཀྱི་ནི་བྱི་བོའོ། །ཞེས་གསུངས་སོ། །
དེ་ཡང་། མཆོད་རྟེན་དང་གདུང་རྟེན་གྱི་དབྱེ་བ་ནི། དུང་དཀར་ཚིག་མཛོད་ལས། དེ་ཡང་། ད་སྐབས་མཆོད་རྟེན་དང་གདུང་རྟེན་གྱི་དབྱེ་བ་དེ་ཙམ་འབྱེད་མི་ཤེས་པ་འང་མང་བས། སྤྱིར་མཆོད་རྟེན་ལ་སྐུ་རུས་སམ་པུར་ཐལ་མེད་པ་དང་ཡོད་པ་གཉིས་ལས། སྐུ་རུས་པུར་ཐལ་ཡོད་པ་ལ་གདུང་རྟེན་ཞེས་འབོད་ན་གོ་བདེ་བ་དང། མཆོད་རྟེན་ཡིན་ན་གདུང་རྟེན་ཡིན་མ་དགོས་ཀྱང་། གདུང་རྟེན་ནི་མཆོད་རྟེན་གྱི་བྱེ་བྲག་གོ། དེ་དག་ལས་ཡོངས་གྲགས་བདེ་གཤེགས་མཆོད་རྟེན་བརྒྱད་ནི།
༢ བྱེ་བྲག་བདེ་གཤེགས་མཆོད་རྟེན་བརྒྱད། ༡ སྟོན་པ་སེར་སྐྱར་སྐུ་བལྟམས་མ་ཐག ཕྱོགས་བཞིར་གོམ་པ་བདུན་བོར་བ་ལས། མེ་ཏོག་པདྨ་བདུན་སྐྱེས་པར། དེའི་རྗེས་དྲན་གྱི་ཚུལ་དུ། ཡབ་རྒྱལ་བོ་སྲས་ གཙང ་གིས་བཞེངས་པའི་པད་སྤུངས་མཆོད་རྟེན།
༢ སྟོན་པ་རྡོར་གདན་དུ་སངས་རྒྱས་པའི་མཚོན་བྱེད་དམ་དེའི་རྗེས་དྲན་དུ། ཤུན་ཙ་ཏས་བཞེངས་པའི་བྱང་ཆུབ་མཆོད་རྟེན།
༣ བཅོམ་ལྡན་འདས་ཀྱིས་ཡུལ་ཝ་ར་ཎ་སིར་ཆོས་འཁོར་རིམ་གསུམ་བསྐོར་ཚེ། བདེན་བཞི་དང་རྣམ་ཐར་བརྒྱད་མཚོན་བྱེད་དུ་སྒོ་བཅུ་དྲུག་ནས་བརྒྱ་རྩ་བརྒྱད་སོགས་མཆིས་པའི་སྒོ་མང་མཆོད་རྟེན།
༤ སྟོན་པས་གཉན་ཡོད་དུ་རྫུ་འཕྲུལ་བསྟན་ནས། མུ་སྟེགས་པའི་སྟོན་པ་དྲུག་སོགས་རྫུ་འཕྲུལ་གྱིས་ཕམ་པར་མཛད་ཚེ། དེའི་རྗེས་དྲན་གྱི་ཆེད་དུ། རྒྱལ་བོ་གསལ་རྒྱལ་གྱིས་བཞེངས་པའི་གློ་འབུར་ཅན་ཆོ་འཕྲུལ་མཆོད་རྟེན།
༥ སྟོན་པ་བཅོམ་ལྡན་འདས་སུམ་ཅུ་རྩ་གསུམ་ལ་གཤེགས་ཏེ། ཡུམ་སྒྱུ་འཕྲུལ་མ་སོགས་ཀྱི་སར་ཆོས་གསུངས་ཞིང་། དབྱར་ཞལ་བཞེས་ཀྱིས་བཞུགས་པར། མི་ཡུལ་ནས་རྒྱལ་བོ་གསལ་རྒྱལ་དང་འཁོར་རྣམ་བཞིས་སྟོན་པ་དྲན་དྲགས་པས། མོའུ་འགལ་གྱི་བུ་བརྒྱུད་དེ། སྟོན་པ་གདན་དྲངས་ནས། བོད་ཟླ་དགུ་བའི་ཚེས་ཉེར་གཉིས་ཉིན། གསལ་ལྡན་དུ་ལྷ་ལས་བབས་པའི་ཚེ་ན། དེའི་རྗེས་དྲན་དུ། ཨིནྡྲ་ཝརྨིས་བཞེངས་པའི་ལྷ་བབས་མཆོད་རྟེན།
༦ སྟོན་པ་འོད་མའི་ཚལ་དུ་ལྷས་བྱིན་གྱིས། རང་ལ་འཁོར་གྱི་གནང་བར་ཞུས་པ་ལ། སངས་རྒྱས་ཀྱིས་མ་གནང་བས། ཞེ་སྡང་གིས་འཁོར་མང་བསྡུས་ཤིང་། སྟོན་པ་ལྟར་བཞུགས་པ་ལ། དགེ་འདུན་བགྲང་ཡས་བརླག་པར་བརྩམས་པའི་ཚེ། སངས་རྒྱས་ཀྱི་ཐབས་མཁས་ཀྱིས་དབྱེན་ཟླུམ་ཚེ། དེའི་རྗེས་དྲན་དུ། གྱད་བུས་བཞེངས་པའི་དབྱེན་ཟླུམ་མཆོད་རྟེན།
༧ སངས་རྒྱས་ཡངས་པ་ཅན་དུ་བདུད་ལས་རྣམ་པར་རྒྱལ་ནས། སྐུ་ཚེ་བྱིན་གྱིས་བརླབས་ཚེ། དེའི་རྗེས་དྲན་དུ། ལི་ཙི་བྱི་རྣམས་ཀྱིས་བཞེངས་པ་རྣམ་རྒྱལ་མཆོད་རྟེན།
༨ རྩྭ་མཆོག་དྲུང་ནས་སྟོན་པ་མྱ་ངན་ལས་འདས་ཚེ། དེའི་རྗེས་དྲན་དུ། རྒྱལ་བོ་མ་སྐྱེས་དགྲས་བཞེངས་པའི་མྱང་འདས་མཆོད་རྟེན་ཏེ། བདེ་གཤེགས་མཆོད་རྟེན་བརྒྱད་དོ། །
༣ མཆོད་རྟེན་བཞེངས་ཡུལ། གྲོང་དང་གྲོང་ཁྱེར་གྱི་བཞི་མདོ། དགེ་འདུན་གྱི་གནས་མལ། སྐྱེ་བོ་འདུ་ལོང་ཆེ་ས་སོགས་སུ་བཞེངས་པ་སྟེ། འཕགས་པའི་དགེ་བའི་རྩ་བ་ཡོངས་སུ་འཛིན་པའི་མདོ་ལས། ལམ་པོ་ཆེའི་བཞི་མདོ་སྐྱེ་བོ་མང་བོ་འདུ་བའི་སར་མཆོད་རྟེན་དང་ཁང་བ་བརྩེགས་པའམ། རྡོ་བའི་ཀ་བ་འམ། དེ་བཞིན་གཤེགས་པའི་སྐུའམ། དེ་བཞིན་གཤེགས་པའི་ཡོན་ཏན་རྗེས་སུ་དྲན་པ་གང་ཡང་རུང་བ་བྱེད། ཅེས་དང་། ཡང་ན། དཔུང་བཟང་གིས་ཞུས་པའི་རྒྱུད་ལས། གཙང ་ཞིང་དབེན་པ་ས་ཡི་ཕྱོགས་སུ་ནི། །འཇིམ་པ་འམ་ནི་བྱེ་མ་ལས་བྱས་པའི། །བདེ་གཤེགས་མཆོད་རྟེན་རྟེན་འབྲེལ་སྙིང་བོ་ཅན། །སྡིག་པ་སྦྱང་བའི་ཕྱིར་ནི་གདབ་པར་བྱ། །ཞེས་དང་། ཡང་། གསང་བ་སྤྱི་རྒྱུད་ལས། མཐོ་དམན་སྙོམས་ཤིང་ གཙང ་ལ་སྣུམ། །ཟུག་རྔུ་ཉེས་པ་རྣམ་པར་སྤང་། །ཤར་དང་བྱང་དུ་གཞོལ་བ་ཡི། །ས་གཞི་ལས་རྣམས་ཀུན་ལ་ཤིས། །ཞེས་སོ། །
བཞེངས་མི་རུང་བའི་གནས་ནི། མཐོ་དམན་ཅན་དང་ཚེར་མ་ཅན། །གྱོ་མོ་དུམ་བུ་ཅན་དག་དང་། །ངམ་གྲོག་རུས་པ་སྡོང་དུམ་ཅན། །གྲོག་མཁར་ཐལ་བ་ཚྭ་སྒོ་ཅན། །གསེག་མ་རྡོ་དང་རྡུལ་དང་སྐྲ། །སྲིན་བུ་གྲོག་སྦུར་ལ་སོགས་མང་། །དེ་ལྟ་བུ་ཡི་ས་གཞི་ནི། །མཁས་པས་ལས་རྣམས་ཀུན་ལ་སྤངས། །ཞེས་སོ། །
༤ མཆོད་རྟེན་བཞེངས་པ་པོ་སློབ་དཔོན་བཤད་པ། སྐུ་གཟུགས་མཆོད་རྟེན་བཞེངས་པ་ལ། བཞེངས་པ་པོ་སློབ་དཔོན་མཚན་ཉིད་ལྡན་པ་ཞིག་དགོས་ཏེ། རབ་དགེ་སློང་རྡོ་རྗེ་འཛིན་པ། འབྲིང་དགེ་ཚུལ། ཐ་མའང་དགེ་བསྙེན་གྱི་སྡོམ་པ་ལ་གནས་པ་ཞིག་དགོས་ལ། ཁྱད་པར་དུ། དཀྱིལ་འཁོར་འདི་དག་གི་དབང་འཐོབ་ཞིང་། དམ་སྡོམ་ལ་གནས་པ། བསྙེན་པ་སྔོན་དུ་སོང་སྟེ་ཆོ་ག་དང་མཆོད་རྟེན་གྱི་ལག་ལེན་ལ་མཁས་པ་སོགས་དགོས་ཏེ། གསང་བ་སྤྱི་རྒྱུད་ལས། སློབ་དཔོན་བསྟན་བཅོས་ཀུན་ཤེས་པ། །ཚུལ་ཁྲིམས་ལྡན་ཞིང་སྙིང་རྗེ་བདག། དྲང་ཞིང་བཟོད་ལ་ གཙང ་སྦྲ་ཅན། །དད་དང་དྲང་བདེན་སྙིང་སྟོབས་ལྡན། །སྨྲ་མཁས་མི་འཇིགས་བསྲན་ཐུབ་པ། །སྒྱུ་རྩལ་དག་ལ་མཁས་ཤིང་གསལ། །མཛེས་དང་ལྡན་ཞིང་དེ་བཞིན་དུ། །གུས་ལྡན་དུལ་ལ་ཁོང་བཟོ་བ། །རྟག་ཏུ་དམ་པའི་ཆོས་ལ་དགའ། །ཐེག་པ་ཆེ་ལ་མོས་པ་ཅན། །གསང་སྔགས་སྤྱོད་པ་ལ་བསླབས་ཤིང་། །དཀྱིལ་འཁོར་དག་གི་བྱེ་བྲག་ཤེས། །སློབ་མ་དག་གིས་ཚུལ་ཤེས་ཤིང་། །དེ་བཞིན་གསང་སྔགས་རྒྱུད་ཀྱང་འཛིན། །རྗེས་སུ་གནང་ཞིང་དབང་བསྐུར་བ། །ཆོག་ཤེས་བཟླས་བརྗོད་ལྷུར་ལེན་པ། །སློབ་དཔོན་རིགས་ལ་བསྙེན་བཀུར་བྱས། །དཀྱིལ་འཁོར་ཐམས་ཅད་ཁོང་དུ་ཆུད། །གསང་སྔགས་ཀུན་དང་བླ་མ་དང་། །དེ་བཞིན་གློ་བུར་མགྲོན་མཆོད་བྱེད། །ཕྱག་རྒྱ་ལ་སོགས་བཅིང་བ་དང་། །དཀྱིལ་འཁོར་འབྲི་བའི་ལས་རྣམས་དང་། །གསང་སྔགས་སྤྱོད་པའི་མཆོད་པ་ལ། །སློབ་དཔོན་གྱིས་ནི་མཁས་པར་བྱ། །ཞེས་པ་ལྟར། ཡོན་ཏན་ཀུན་ལྡན་ཞིག་དགོས་ལ། དུས་དབང་གིས་དེ་འདྲ་ཞིག་རྙེད་དཀའ་བས། སྐྱོན་ཡོན་གཉིས་ལས་ཡོན་ཏན་ཤས་ཆེ་བ་ཞིག་ངེས་པར་དགོས་སོ། །
༥ ཐིག་རྩ་ལྟར་བཞེངས་པའི་ཚད་ལྡན་གྱི་མཆོད་རྟེན། མཆོད་རྟེན་ཚད་ལྡན་ཞིག་ལ་མཚོན་ན། བཞུགས་ཁྲི་དང་རྒྱུའི་མཆོད་རྟེན། འབྲས་བུའི་མཆོད་རྟེན་གསུམ་ངེས་པར་དུ་ཚང་དགོས་ཏེ། ས་འཛིན་ནས་བ་གམ་མན་ཆོད་བཞུགས་ཁྲི། བང་རིམ་དང་བོ་ནས་བྲེ་མན་ཆོད་རྒྱུའི་མཆོད་རྟེན། བྲེ་ནས་ཏོག་གི་རྩེ་མོའི་བར་འབྲས་བུའི་མཆོད་རྟེན་ནོ། །མཆོད་རྟེན་གྱི་ཆ་སོ་སོ་ནི། འོག་རིམ་ནས་ས་འཛིན། ཐེམ་སྐས་དང་བོ་ནས་གསུམ་པའི་བར། ཁྲི་གདོང་། གཟུངས་སྣེ། པདྨ་བ་གམ་བཅས་རིམ་པ་བརྒྱད་ནི་ཁྲི་ཡིན། དེའི་སྟེང་དུ་དགེ་བཅུ། བང་རིམ་དང་བོ་ནས་བཞི་བའི་བར། བུམ་རྟེན། བུམ་པ། བྲེ་རྟེན། བྲེ་བཅས་རྒྱུའི་མཆོད་རྟེན་དང་། གདུགས་འདེགས་པདྨ། འཁོར་ལོ་བཅུ་གསུམ། ཐུགས་རྗེ་མདོ་གཟུངས། གདུགས། གདུགས་ཁེབས། ཟླ་བ། ཉི་མ། ནོར་བུའི་ཏོག་བཅས་སོ། །
བདེ་གཤེགས་མཆོད་རྟེན་བརྒྱད་གང་ཡང་རུང་། ས་འཛིན་གྱི་ཟུར་བཞིར་རྡོ་རིང་བསླངས་ཏེ། རྡོ་རིང་ཁ་ཕྱིར་བལྟས་བྱས་ལ། མེ་ཏོག་སོགས་གདུགས་འོག་ནས་དྲངས་ཏེ། རྡོ་སེང་གི་མགུལ་དུ་བཏགས། གཞན་ཡང་། དྲིལ་བུ་དང་། དར་གྱི་ཅོད་པན་དང་གདུགས་རྒྱལ་མཚན་སོགས་ཀྱིས་སྤུད་པར་བྱའོ། །བདེ་གཤེགས་མཆོད་རྟེན་གྱི་ཐིག་རྩ་སྤྱི་ལྟར་བྱ་ལ། བང་རིམ་འགྱུར་བའི་ཁྱད་པར་ཡོད་དེ། སྤྲུལ་སྐུ་ང་ལ་གཟིགས་ཀྱི་མཆོད་རྟེན་ཐིག་རྩ་ལས། དེ་ལྟར་བྱང་ཆུབ་མཆོད་རྟེན་གྱི། །ཐིག་རྩ་དེ་ཉིད་གཞིར་བཞག་ནས། །བང་རིམ་འགྱུར་བའི་ཁྱད་པར་གྱིས། །པདྨ་སྤུངས་པའི་མཆོད་རྟེན་ནི། །བང་རིམ་བཞི་ལྡན་པད་རིས་ཅན། །ཆོས་ཀྱི་འཁོར་ལོའི་མཆོད་རྟེན་ནི། །བང་རིམ་གྲུ་བཞི་སྒོ་མང་ཅན། །ཆོ་འཕྲུལ་ཆེན་པོའི་མཆོད་རྟེན་ནི། །བང་རིམ་སུམ་ཆ་གློ་འབུར་ལྡན། །ལྷ་བབས་མཆོད་རྟེན་ཁྱད་པར་ནི། །གློ་འབུར་སྟེང་དུ་སུམ་སྐས་བཙུགས། །དགེ་འདུན་དབྱེན་འདུམ་བང་རིམ་ནི། །ཟུར་བཞི་བཅད་པའི་ངོས་བརྒྱད་མཉམ། །སྐུ་ཚེ་བྱིན་རླབས་མཆོད་རྟེན་ནི། །བང་རིམ་གསུམ་དང་དགེ་བཅུ་ཟླུམ། །མྱང་འདས་མཆོད་རྟེན་བང་རིམ་མེད། །རྨང་དགེའི་སྟེང་དུ་བུམ་སྟན་བཞག། བུམ་སྨད་རིང་ལ་བུམ་པའི་དབྱིབས། །དྲིལ་བུའི་ཁོག་པ་འདྲ་བ་ལ། །ལྕགས་འཁྱུག་གཉིས་ཀྱིས་བསྡམས་པ་ཡིན། །ཞེས་སོ། །
༦ མཆོད་རྟེན་གྱི་མཚོན་དོན། སྤྲུལ་སྐུ་ང་ལ་གཟིགས་﹙འདི་བ་འཕྲང་ཁ་བ་ཡིན་ལ་སྐབས་ཤིག་དབྱངས་ཅན་མའི་སྐུ་ཞིག་བཞེངས་ཏེ་ཕར་བཞག་པས་དབྱངས་ཅན་མས་སྤྲུལ་སྐུ་ང་ལ་གཟིགས་དང་ཞེས་གསུང་འབྱོན་པས་མཚན་ལ་དེ་ལྟར་ཐོགས། ﹚ ཀྱི་མཆོད་རྟེན་ཐིག་རྩ་ལས། དེ་ལྟར་སངས་རྒྱས་ཐམས་ཅད་ཀྱི། །རྒྱུ་དང་འབྲས་བུའི་མཆོད་རྟེན་ནི། །གཞི་རྨང་དགེ་བ་བཅུ་ཡིན་ནོ། །དེ་ལྟར་བང་རིམ་བཞི་བོ་ཡི། །དང་བོ་དྲན་པ་ཉེར་བཞག་བཞི། །གཉིས་པ་ཡང་དག་སྤོང་བ་བཞི། །གསུམ་པ་རྫུ་འཕྲུལ་རྐང་བ་བཞི། །བཞི་བ་དད་སོགས་དབང་བོ་ལྔ། །བུམ་སྟན་སྟོབས་སུ་གྱུར་བ་ལྔ། །བུམ་པ་བྱང་ཆུབ་ཡན་ལག་བདུན། །བྲེ་ནི་འཕགས་ལམ་ཡན་ལག་བརྒྱད། །དེ་ལྟར་བྱང་ཆུབ་ཕྱོགས་ཀྱི་ཆོས། །སུམ་ཅུ་རྩ་བདུན་རྣམ་པ་ཡིས། །སངས་རྒྱས་ཉིད་དུ་བྱེད་པ་ཡིན། །རྒྱུ་འམ་ལམ་གྱི་མཆོད་རྟེན་ཡིན། །འཁོར་བའི་སྐྱོན་བྲལ་པདྨའི་སྟེང་། །ཆོས་འཁོར་བཅུ་ནི་སྟོབས་བཅུ་སྟེ། །ལྷག་མ་དགོངས་པ་ཉེར་བཞག་གསུམ། །ཐུགས་རྗེ་མདོ་གཟུངས་ཐུགས་རྗེ་དང་། །སྟོང་ཉིད་བཅུ་དྲུག་དབྱེར་མེད་དངོས། །གདུགས་དང་ཆར་ཁེབས་ཐབས་ཤེས་ཏེ། །ཟ་ར་ཚགས་ནི་འཕྲིན་ལས་བཞི། །ཟླ་བ་ཉི་མ་མཁྱེན་པ་གཉིས། །ཏོག་ནི་གཉིས་མེད་ཟུང་འཇུག་སྐུ། །མེ་ཏོག་ཕྲེང་བ་སངས་རྒྱསཀྱི། །མ་འདྲེས་ཆོས་ནི་བཅོ་བརྒྱད་དོ། །རྡོ་རིང་མི་འཇིགས་བཞི་ཡིན་ནོ། །གསེར་དྲིལ་དཀྲོལ་བ་ཚངས་པའི་གསུང་། །བ་དན་བསྟན་པའི་གྲགས་པ་དངོས། །ཤེས་རབ་སྒྲོན་མེ་འཕྲེང་བ་སྟེ། །ཏིང་འཛིན་སྒོ་བརྒྱའི་རྒྱན་ཕྲེང་མཛེས། །དེ་དག་འབྲས་བུས་སངས་རྒྱས་ཀྱི། །ཡོན་ཏན་རིན་ཆེན་མཆོད་རྟེན་ཡིན། །ཞེས་དང་།
སློབ་དཔོན་ཞི་བ་སྙིང་བོའི་མཆོད་རྟེན་གྱི་དོན་བཤད་པ་ལས། བང་རིམ་དང་བོ་དྲན་ཉེ། གཉིས་པ་ཡང་དག་སྤོང་བ། གསུམ་པ་རྫུ་འཕྲུལ་གྱི་རྐང་བ། བཞི་བ་དབང་བོ་ལྔ། བུམ་རྟེན་སྟོབས་ལྔ། བུམ་པ་བྱང་ཆུབ་ཡན་ལག་བདུན། པུ་ཤུ་འཕགས་ལམ་ཡན་ལག་བརྒྱད། སྲོག་ཤིང་ཤེས་པ་བཅུ། འཁོར་ལོ་བཅུ་གསུམ་སྟོབས་བཅུ་དང་མ་འདྲེས་པའི་དྲན་པ་ཉེར་བཞག་གསུམ། ཆར་ཁེབས་སྙིང་རྗེ་ཆེན་པོ་སྟེ་མཆོད་རྟེན་དངོས་ཀྱི་མཚོན་དོན་དང་། རྡོ་རིང་མི་འཇིགས་པ་བཞི། ཐེམ་སྐས་སྲུང་བ་མེད་པ་རྣམ་པ་བཞི། ཆུ་སྲིན་རྒྱལ་མཚན་རྣམས་བདུད་ཀྱི་རྒྱལ་མཚན་བསྙལ་བ། མེ་ཏོག་གི་ཕྲེང་བ་བླ་ན་མེད་པའི་ཚུལ་ཁྲིམས་ཀྱི་ཕུང་བོ། འཇིག་རྟེན་སྐྱོང་བ་རྣམས་འཕགས་པའི་བདེན་པ་བཞི། དྲིལ་བུ་རྣམས་གསུང་ཚངས་པའི་དབྱངས། གདུགས་འགྲོ་བ་རྣམས་ཀྱི་མཆོག་ཏུ་གྱུར་བ། ཟླ་བ་བླ་ན་མེད་པའི་ཡེ་ཤེས་ཀྱི་སྣང་བ། དར་གྱི་ཅོད་པན་བླ་མེད་བྱང་ཆུབ་ཀྱི་ཅོད་པན་ཐོགས་པ། བ་དན་ཆོས་ཀྱི་གྲགས་པ་སྟེ་དེ་བཞིན་གཤེགས་པའི་ཆོས་ཀྱི་སྐུའི་རྐྱེན་དུ་འབབ་པའི་ཡོ་བྱད་རྣམས་ཀྱི་མཚོན་དོན་ནོ། །ཞེས་གསུངས་པ་དང་། ཀུན་མཁྱེན་གུ་ཎའི་ཤེས་བྱ་མཛོད་ཀྱི་འགྲེལ་བར་ཡང་མཆོད་རྟེན་གྱི་དག་སྦྱོར་རྒྱས་པར་གསུངས་ཡོད་པས། ཤེས་འདོད་པ་དག་གིས་དེར་བལྟ་བར་བྱ་བ་ལས། འདིར་ཡི་གེ་མང་དུ་འཇིགས་ནས་མ་བྲིས་སོ། །
༧ མཆོད་རྟེན་བཞེངས་པའི་ཕན་ཡོན། དམ་ཆོས་པད་དཀར་ལས། ས་དང་སོ་ཕག་དག་ལ་རྩིག་པ་ཡིས། །རྒྱལ་བའི་མཆོད་རྟེན་འགའ་ཞིག་བྱས་པ་དང་། །དེས་ནི་ས་རྡུལ་ཕུང་བོ་དག་ལས་ཀྱང་། །མྱ་ངམ་དགོན་པ་གང་དུ་བྱས་པ་དང་། །བྱིས་པའི་རྩེད་མོ་དེ་དང་དེ་དག་ཏུ། །གང་གིས་རྒྱལ་བ་དེ་ཕྱིར་མཆོད་རྟེན་འགའ། །བྱེ་མ་ལས་ནི་ཕུང་བོ་བྱས་པ་ཡང་། །དེ་དག་རྣམས་ཀྱང་བྱང་ཆུབ་ཐོབ་པར་འགྱུར། །ཞེས་དང་། ཁྱད་པར་ཏུ་རང་གི་ལག་བསྟར་ནས་མཆོད་རྟེན་བཞེངས་ན་ཕན་ཡོན་ཆེ་སྟེ། འཇམ་དཔལ་རྩ་རྒྱུད་ལས། ལུས་སྦྱང་བར་བྱས་ལ་རང་གི་ལག་གིས་མཆོད་རྟེན་བྱས་ན། མཚམས་མེད་པ་ལྔ་བྱས་པས་ཀྱང་འགྲུབ་བོ། །མཆོད་རྟེན་འབུམ་བྱས་ན་རིག་པ་འཛིན་པའི་འཁོར་ལོས་སྒྱུར་བའི་རྒྱལ་བོར་འགྱུར་ཏེ། བསྟན་པ་དང་ཐམས་ཅད་མངོན་པར་ཤེས་པ་དང་ལྡན་ཞིང་བསྐལ་བར་གནས་ལ་ཤི་ནས་ཀྱང་སྐྱེ་བ་རྣམས་སུ་རྒྱལ་བོ་བྱེད་ཅིང་ངན་སོང་དུ་མི་འགྲོའོ། །ཞེས་དང་། ཡང་། མདོ་ལས། དེ་བཞིན་གཤེགས་པའི་མཆོད་རྟེན་བཞེངས་པའི་ཕན་ཡོན་བཅོ་བརྒྱད་ནི། རྒྱལ་བོ་ཆེན་པོའི་རིགས་སུ་སྐྱེས་པ་དང་། གཟུགས་བཟང་བ། མཛེས་ཤིང་མིག་ཏུ་སྡུག་པ། དབང་ཆེ་བར་གྲགས་པ། གཡོག་འཁོར་རྒྱ་ཆེ་བ། གཡོག་འཁོར་མི་ཕྱེད་པ། ལོངས་སྤྱོད་ཆེ་བ། སྐྱེ་བོ་རྣམས་འཁོར་ཞིང་འདུ་བ། ཀུན་གྱི་རྟེན་དུ་གྱུར་བ། ཕྱོགས་བཅུར་སྙན་པར་གྲགས་པ། ལྷ་དང་མིས་མཆོད་པ། ཕྱུག་ཅིང་ནོར་མང་བོ་དང་ལྡན་པ། འཁོར་ལོས་བསྒྱུར་བའི་རྒྱལ་སྲིད་འཐོབ་པ། ཚེ་རིང་བ། ལུས་རྡོ་རྗེ་ལྟར་མཁྲེགས་པ། ལུས་མཚན་དང་དཔེ་བྱད་ལྡན་པ། མཐོ་རིས་སུ་སྐྱེ་བ། མྱ་ངན་ལས་འདས་པའོ། །ཞེས་མདོ་རྒྱུད་དུ་མ་ནས་རྒྱ་ཆེར་གསུངས་ཀྱང་མ་སྤྲོས་སོ། །
ཡང་། ཉེ་བར་འབྲེལ་བའི་སྔོན་བྱུང་གི་ལོ་རྒྱུས་འགའ་བརྗོད་ན། སྔོན་ཤཱཀྱའི་ཡུལ་ནས་ཁྱེའུ་དྲི་ཞིམ་ཞེས་པ། ལྟ་སྡུག་པ། ཁ་ནས་ཨུཏྤ་ལའི་དྲི་དང་། ལུས་ལ་ཙན་དན་གྱི་དྲི་བསུང་འཐུལ་ཏེ་གྲོང་ཁྱེར་ཐམས་ཅད་ཁྱབ་པ་ཞིག་སྐྱེས་པས། སངས་རྒྱས་ལ་དེའི་རྒྱུ་ཞུས་པས། སྔོན་ཚེ་སངས་རྒྱས་རྣམ་གཟིགས་ཀྱི་མཆོད་རྟེན་ལ། དད་པས་སྤོས་བྱུག་དང་། མེ་ཏོག་སྣ་ཚོགས་མཆོད་པའི་རྒྱུར་ལུང་བསྟན་པ་དང་། ཡང་། ཁྱེའུ་བྱད་བཟང་ཞེས་པས། སྔོན་གྱི་ཚེ་སངས་རྒྱས་རྣམ་གཟིགས་ཀྱི་མཆོད་རྟེན་ལ་མེ་ཏོག་རྙིང་བ་རྣམས་བླངས་ཏེ་གད་བདར་ གཙང ་མ་བྱས་ནས། དད་པས་སྨོན་ལམ་བཏབ་པས། བྱད་གཟུགས་ལྟ་ན་སྡུག་པ་ཞིག་ཏུ་འཁྲུངས་པ་དང་། ཡང་། སྔོན་ཕག་ཞིག་གི་ལུས་ཀྱི་འདམ་བག་གིས་མཆོད་རྟེན་ལ་དྲུད་པས། སྟབས་ལེགས་ཏེ་གས་ག་ཟུམ་པས་ལྷ་ཡུལ་དུ་སྐྱེས་པ་སོགས་མང་ངོ་། །
༨ ཞར་ཞུང་མཆོད་རྟེན་ནག་པོ་བརྩིགས་ཚུལ་བརྗོད་པ། མཆོད་རྟེན་ནག་པོ་བཞེངས་པའི་ལོ་རྒྱུས་ནི། སངས་རྒྱས་སྐུ་མྱ་ངན་ལས་འདས་ནས་སྐུ་གདུང་ཆ་ལྔར་བགོས་ཏེ་ལྷ་ཀླུ་མི་སོགས་ཀྱིས་སྤྱན་དྲངས་དུས། འདྲེ་སྲིན་རྣམས་ལ་སྐལ་བ་བཅད་པས། མཆོད་རྟེན་ནག་པོ་འདི་བཞེངས་དགོས་པ་བྱུང་བར་བཤད་པ་སྟེ། ཀརྨ་ཆགས་མེད་ཀྱི་མཆོད་རྟེན་ནག་པོ་གདུག་པ་ཀུན་འདུལ་ཅ་ཏི་ལས། འདྲེ་སྲིན་རྣམས་ལ་སྐལ་བ་བཅད། །སྐུ་གདུང་རིང་བསྲེལ་མ་ཐོབ་པས། །འདྲེ་སྲིན་གདོན་བགེགས་ཐུགས་ཁྲོས་ནས། །མི་ལ་གདུག་པ་སྣ་ཚོགས་བཏང་། །ཁྲོ་ཆུ་ཁོལ་མའི་མདའ་ཡང་འཕངས། །མི་ནད་ཕྱུགས་ནད་སྣ་ཚོགས་འབྱུང་། །སྲིན་ཡུལ་ལིང་ཀ་པུ་རི་ནས། །སྲིན་པོ་མང་བརྒྱ་ཉུང་བཅུ་ཡང་། །རོ་ཡི་གཞོབ་དང་གསུར་ལ་ལངས། །སྲིན་པོ་ཤ་ཟ་མང་བོ་ཡིས། །འཛམ་གླིང་མི་ལ་གདུག་པ་བཏང་། །དེ་ནས་ཉན་ཐོས་མཆོག་བརྒྱད་ཀྱིས། །དགེ་སློང་གཞོན་ནུ་བྱ་བ་དེ། །འདྲེ་སྲིན་ཡུལ་ཁམས་བརྟག་ཏུ་བཏང་། །སྲིན་ཡུལ་ལང་ཀ་པུ་རི་དེ། །དབྱིབས་དང་ཁ་དོག་ཇི་ལྟར་འདྲ། །དེ་ན་གནས་པའི་སྲིན་པོ་ཀུན། །གོས་སུ་ཅི་གྱོན་ཟས་སུ་ཅི་ཟ་རྣམས། །དགེ་སློང་གཞོན་ནུས་བརྟག་པ་ལ། །སྲིན་ཡུལ་ལང་ཀ་པུ་རི་དེ། །མདོག་ནི་ནག་ལ་ཟླ་གམ་འདྲ། །སོལ་ཕྱེ་བཏབ་པའི་རི་བོ་འདྲ། །ཟས་སུ་ཤ་དང་ཁྲག་ལ་དགའ། །གོས་སུ་རེ་བ་ནག་པོ་གྱོན། །དེ་སྐད་ཅིས་ནི་གསུངས་པ་དང་། །དེ་ཚེ་ཉན་ཐོས་མཆོག་བརྒྱད་ཀྱིས། །བྲམ་ཟེ་བི་ན་ཡ་ག་བསྙག །བྲམ་ཟེའི་ཆོས་གོས་ནག་པོ་གྱོན། །ཡུངས་དཀར་ཕོ་ཉ་ཕྱོགས་བཅུར་བཏང་། །སྐུ་གདུང་བསྲེག་པའི་ཐལ་བ་དང་། །སོལ་བ་དང་ནི་ངན་སྙིགས་དང་། །ས་ཚིག་རྡོ་ཚིག་ཕྱེ་ཕྱེ་དང་། །འཁོར་ར་ཡུག་ཡུག་བསྡུས་ནས་ནི། །ལང་ཀ་པུ་རི་མདོག་འདྲ་བའི། །མཆོད་རྟེན་ནག་པོ་བཞེངས་སུ་གསོལ། །མདོག་ནི་ནག་ལ་ཁྲོས་པ་འདྲ། །ལྷ་འདྲེ་འཇིགས་པའི་རི་བོ་བརྩེགས། །སྲིན་པོ་སྔགས་པའི་ཁྲི་འཕང་ཅན། །གདོན་བགེགས་བརྒྱལ་བའི་འོད་ཟེར་ཅན། །དེ་ལ་མིང་དང་མཚན་བཏགས་པ། །གདུག་པ་འདུལ་བའི་མཆོད་རྟེན་ལགས། །ཞེས་གསུངས་སོ། །
མཆོད་རྟེན་ནག་པོ་བཞེངས་པའི་དགོས་པ་ནི། ཡུལ་དུ་ཐན་ལྟས་དང་འཁྲུག་ལོང་བྱུང་བ། མུ་གེ་དང་ནད་ཡམས་མཆེད་པ། བྱད་ཁ་ཕུར་ཁ་བཟློག་པ། གོད་ཁ་དང་ས་དགྲ་བཟློག་པ། མ་རུངས་གདོན་འདྲེ་གནོན་པ་སོགས་ཀྱི་ཆེད་དུ་བརྩིགས་པ་ཡིན།
ཐོག་མར་སྒྲུབ་པའི་ཞག་གྲངས་བསྟན་པ་ནི། བསྙེན་སྒྲུབ་ཚུལ་བཞིན་བྱས་ལ་ཡི་དམ་དང་ཆོས་སྐྱོང་ལ་བསྐང་བ་དང་བསྐུལ་བ་བྱ། རང་མདུན་དུ་ཐུན་ཁུང་ནང་དུ་གཟུགས་བྱ་རྣམས་བཞག་ལ། གང་གནོད་པའི་དགྲ་བགེགས་གདུག་པ་ཅན་རྣམས་བཀུགས་ཏེ། གཟུགས་བྱང་རྣམས་ལ་བསྟིམ། དེ་ནས་ཟོར་དང་ཐུན་གྱིས་བྲབ་ལ། རབ་ནི་ཞག་བདུན་དང་། འབྲིང་གསུམ། མ་མཐའ་ཡང་ཞག་གཅིག་ལ་བསྒྲུབ་དགོས། དེ་ནས་འབྱོར་ན་གཟུགས་བྱང་རྣམས་སཙྪ་ནག་པོའི་ནང་དུ་གཞུག་དགོས་ལ། མ་འབྱོར་ན་རས་ནག་གིས་བཏུམ་ལ། ཤི་སྐྲ་ཚོན་སྐུད་སྣ་ལྔས་རྒྱ་གྲམ་ལྟར་བཅིངས། ཚེར་མའི་ཤིང་གི་བར་དུ་ལྟེམ་ལ་བྲ་མའི་ཤིང་གིས་ཁ་བསྡམས་ཏེ་མནན་པ་བྱའོ། །
མཆོད་རྟེན་ནག་པོའི་ཞབས་སུ་གནོན་རྒྱུའི་རྫས་ནི། ཀརྨ་ཆགས་མེད་ཀྱི་མཆོད་རྟེན་ནག་པོ་གདུག་པ་ཀུན་འདུལ་ཅ་ཏི་བྱ་བ་ལས། སམ་ནག་ཚེར་མ་གདུག་པ་ཅན། །དྲག་པོའི་ཤིང་ལ་སྲོག་ཤིང་བྱས། །འདྲེ་སྲིན་མང་བོའི་བླ་ཡང་བྲིས། །ལང་ཀ་པུ་རིའི་གཉའ་མནོན་བྱས། །འཛམ་བུ་གླིང་གི་མི་རྣམས་ཀྱིས། །གྲོ་ག་ཤ་ཤུན་སྟག་སྡེབ་ལ། །སོལ་ཕྱེ་ནག་པོའི་སྣག་ཚ་དང་། །ཕག་རའི་ཁྲག་གིས་འདྲེ་ལིང་བྲིས། །ལིང་ག་གཟུགས་ཅན་བྲིས་ནས་ནི། །དཀར་ནག་སྐུད་པས་དམ་དུ་བཅིངས། །ཤེལ་ཚིག་རམ་པ་རུག་པ་དང་། །ཟན་དྲུག་དང་ནི་ཡོས་སྙིགས་དང་། །ཙ་སྦྲུལ་ཐོད་དགུ་རུས་བཅུ་དང་། །འདྲེ་སྲིན་གདོན་བགེགས་གནོད་བྱེད་རྣམས། །དཀར་དང་བྲབ་པའི་ཡས་སྟགས་རྣམས། །མཆོད་རྟེན་ནག་པོའི་ཞབས་སུ་བཅུག། ཅེས་གསུངས་པ་ལྟར་རོ། །
མཆོད་རྟེན་ནག་པོ་གདབ་པའི་ས་ནི། ལུང་གསུམ་མདོ་དང་། སྒང་གསུམ་སྣ། ལུང་བ་ངན་པའི་ཁ། ས་ངན་ཐ་མའི་རྟེན་ཕུར། ས་དགྲ་རྩུབ་པའི་གཉའ་ནོན། ཆུ་ཆེན་གྱི་འགྲམ་དང་སྣ་ཁ། བྲག་དམར་སྲེ་མོ་འདྲ་བ། བྲག་ནག་སོག་པོ་ཁྲོས་འདྲ། གཅན་གཟན་གྱི་ཁ་གདངས་པ་ལྟ་བུའི་བྲག་རྩ། ཆུང་སྲི་རྨང་འདྲེ་གོད་འདྲེ་ནོན་པ། བྱད་ཁ་ཕུར་ཁ་གནོན་པ། ཤི་སྒབ་གཅོད་པ། མཆོད་རྟེན་ཐུར་རྒྱུ་ལྟ་བའི་སྣ། ཆུ་སྲིན་ཁ་གདངས་པ་ལྟ་བུ་དང་། སྦྲུལ་ནག་ཐུར་རྒྱུགས་འདྲ་བའི་ཁ། གྲུ་གསུམ་ཕུར་སོ་འདྲ་བ་སོགས་ལ་གདབ་པར་བྱའོ། །
མཆོད་རྟེན་བྱ་བའི་ལས་ཐབས་བསྟན་པ་ནི། སྒྲུབ་པ་པོ་ཡོན་བདག་གི་ལོ་ལྷའི་ཕྱོགས་སུ་རྒྱབ་བརྟེན་ལ་གནོད་ཕྱོགས་སུ་ཁ་བསྟན་ནས། ས་བདག་ལ་སྐྱེམས་དང་གཏོར་བསྔོས་བྱས་ཏེ། བཀའ་བསྒོ་དང་སྡོངས་གྲོགས་བཅོལ་ནས་ས་བསླང་བར་བྱ། དེ་ནས། རང་ཉིད་ཡི་དམ་དུ་བསྐྱེད་དེ་འཆམ་གྱི་སྟངས་སྟབས་དང་བཅས། ས་བདག་དམ་ལ་བཏགས་པའི་ས་འདུལ་དང་གཉེན་པོ་རྫས་ཀྱིས་འདུལ་བའི་ས་འདུལ་བརྒྱབ་ཏེ། སྒྲུབ་པ་པོའི་ཐུ་བ་གཡོན་པ་ས་ལ་ལན་གསུམ་བརྡབས་ནས་སྐག་ལེ་བརྒྱབ་པས། ས་ཁ་དྲུག་ཏུ་གས་ཏེ་འོག་གི་རྒྱ་མཚོ་སྔོ་མེར་མཐོང་ནས་ཆུ་སྲིན་ཁ་གདངས་པའི་གྲེ་བར་གཤིན་རྗེ་གྲོང་ཁྱེར་དུ་དམིགས་ནས་དམར་གཏོར་གཤིན་རྗེ་ཁ་རུ་བརྒྱབ་ཏེ་སྡང་དགྲ་གནོད་བྱེད་གཏད་པའི་ཡོན་དུ་ཕུལ། གཤིན་རྗེ་ལྟོ་བ་ཞབས་མེད་མུན་པའི་འཁོར་ལོ་ཞིག་ཏུ་སྒོམ་ལ། སྦྱིན་བདག་ལ་གནོད་པའི་དམ་སྲི་སོགས་གང་ཡིན་པ་ཆུ་བོ་གྱེན་དུ་ལོག་པ་དང་བསྐལ་བ་ཆགས་འཇིག་མ་བྱུང་བར་དུ་མནན་ཏེ། དྲག་སྔགས་བཟླ་ཞིང་ཐུན་དང་ཟོར་གྱིས་བྲབ་བོ། །དེ་ནས། ཡས་གླུད་རྫོང་འདེབས་རེ་སྒྱེ་ནང་དུ་བླུགས་ཏེ་རྔ་མོང་ག་བར་བཀལ། དེ་སྟེང་ཐོད་དགུ་རུས་གསུམ་བཀྲམས། ཐལ་སོལ་མང་བོས་སྟེང་ནས་དགབ་པར་བྱ། དེའི་སྟེང་རོ་ཡམ་ལ་རོ་སོལ་གྱིས་རྒྱ་གྲམ་བྲིས་ལ་མནན། དེའི་གྲོད་པ་རླུང་གིས་བཀང་ལ་བཞག དེའི་མེ་བླུགས། ས་ཡིས་དགབ། དེའི་སྟེང་ས་ཁོད་རིམ་དགུའི་བར་མཚམས་ལ་རྒྱ་གྲམ་རིམ་བཞིན་དགུ་བྲིས་ཏེ་རྒྱས་གདབ་བོ། །དེ་ནས། བྲོ་ར་བཅའ་ལ་གང་ཤེས་བརྡུང། དེའི་སྟེང་མཆོད་རྟེན་བང་རིམ་གསུམ་པ་བྱ། དེ་ནས། སྲོག་ཤིང་བཙུགས་ལ་སཙྪ་ནག་པོ་བྱས་ལ་རྣམ་སྣང་ནག་པོར་སྒོམ་ཏེ་རྩ་བར་བཞག་ཏེ་བརྩིགས་དགོས་སོ། །
རྗེས་ཀྱི་བྱ་བ་ནི། མཆོད་རྟེན་ནག་པོ་བཞེངས་གྲུབ་བྱུང་ན། ཡོན་བདག་སྔོན་དུ་བཏང་ནས། རང་ཉིད་རྗེས་སུ་ཁྱུང་སྔགས་འདོན་བཞིན་འོང་དགོས་པར་བཤད་ལ། རབ་ཡིན་ན། གནས་དེར་སྦྱིན་སྲེག་དང་ཚོགས་འཁོར། བཀྲ་ཤིས་དགུ་བརྩེགས་དང་བསྐང་གསོ། སཙྪ་དང་ས་བདག་འཁྲུགས་བཅོས་བྱས་ན་ལེགས་པར་བཤད་དོ། །ཞིབ་ཏུ་ཤེས་འདོད་པ་རྣམས་ཀྱིས་ཀརྨ་ཆགས་མེད་ཀྱི་མཆོད་རྟེན་ནག་པོ་གདུག་པ་ཀུན་འདུལ་ཅ་ཏི་དང་། མཆོད་རྟེན་ནག་པོའི་ལྷན་ཐབས་ལ་བལྟ་བར་བྱའོ། །