དང་པོ། གཏན་ཚིགས་བསྟན་པ་ཞེས་བྱ་བའི་ལེའུར་བཅད་པ།
རྒྱ་གར་སྐད་དུ། ཨཥྚ་ཨང་ག་ཀྲ་མ། བོད་སྐད་དུ། ཡན་ལག་བརྒྱད་པའི་རིམ་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཀྱིལ་འཁོར་དང་ནི་སྟ་གོན་དང༌། །ཁྲུས་དང་སྐུ་ཡི་རབ་གནས་དང༌། །དབང་བསྐུར་དེ་བཞིན་མཆོད་སྦྱིན་དང༌། །སྦྱིན་སྲེག་ཚོགས་ཀྱི་འཁོར་ལོ་ནི། །དཔལ་རྡོར་སེམས་དཔའ་ཕྱག་འཚལ་ཏེ། །ཡན་ལག་བརྒྱད་པའི་རིམ་པ་བྲི། །སངས་རྒྱས་སྲས་དང་བཅས་པ་བཟོད་པར་མཛོད། །མཁའ་འགྲོ་མ་ཚོགས་གཞན་ཡང་གྲུབ་ཐོབ་བཟོད་པ་མཛོད། །དབང་བསྐུར་ཐོབ་པ་རབ་མཆོག་སློབ་དཔོན་བཟོད་པ་མཛོད། །ཕྱོགས་སྐྱོང་ལ་སོགས་ལྷ་དང་ལྷ་མིན་བཟོད་པ་མཛོད། །དང་པོ་སློབ་དཔོན་རྣམས་ཀྱིས་འདི། །དམ་ཚིག་དང་བཅས་མ་གནང་ཡང༌། །དེ་ལྟ་མོད་ཀྱི་སྙིང་རྗེས་བྱས། །སྐལ་ལྡན་སེམས་ཅན་དོན་གྲུབ་ཕྱིར། །ཁྱོད་ཀྱིས་རྩོམ་པ་དེ་ལྟ་ན། །གཞན་ལ་སྙིང་རྗེ་མེད་དམ་ཅི། །སྙིང་རྗེ་ཡོད་དེ་འོན་ཀྱང་གཞན། །མེད་པ་གང་གིས་རྒྱལ་བར་འགྱུར། །དེ་བས་ཅུང་ཟད་འདི་ལ་སྨྲ། །དེ་ལ་བདག་སྐྱོན་ཡོད་དམ་ཅི། །ཡང་ན་སྙིང་རྗེའི་སྐབས་ཞོག་ཅིག །གང་གིས་སློབ་དཔོན་རྣམས་སེམས་མི་དགའ་བར་གྱུར་པ་དེ་ནི་མཁས་པས་བྱེད་དམ་ཅི། །འོན་ཀྱང་སྐལ་ལྡན་སེམས་ཅན་གྱིས་ཞུས་པའི་ཕྱིར་མི་ཡིས་ཀྱང་མི་བྱེད་ན་དེ་ལ་དེ་ཡང་སྐྱོན་ཡོད་དོ། །དེས་བཅོམ་ལྡན་འདས་ཀྱི་གསུང་རབ་དང༌། དེ་བཞིན་དུ་གྲུབ་པ་ཐོབ་པའི་བླ་མའི་རིམ་པའི་མན་ངག་ལ་མི་སྣང་བར་འགྱུར་རོ། །མི་སྣང་བར་འགྱུར་བས་འཇིགས་པའི་ཕྱིར་མ་འོངས་ཀྱང་འབད་པར་བྱའོ། །འོན་ཀྱང་གང་གི་ཚེ་གྲུབ་པ་ཐོབ་པའི་བླ་མའི་བཀའ་ལུང་མེད་པ་དེའི་ཚེ་མི་བྱའོ། །དེ་བཞིན་དུ་ཡང་དཔལ་ཡེ་ཤེས་སྙིང་པོའི་རྒྱུད་ལས་གྲུབ་པ་ཐོབ་པའི་སློབ་དཔོན་གྱིས་དབང་བསྐུར་བ་དང༌། གྲུབ་པ་ཐོབ་པའི་བཀའ་ལུང་
ཐོབ་པ་དང༌། ཡང་ན་ཉིད་གྲུབ་པ་ཐོབ་པ་དེས་དབང་གི་རིམ་པ་དང་སྒྲུབ་ཐབས་ལ་སོགས་པ་བྱའོ། །དེ་བཞིན་དུ་རྟོགས་པ་ལ་སོགས་པས་མ་ཡིན་ཞེས་གསུངས་སོ། །བདག་ཀྱང་གྲུབ་པ་ཐོབ་པའི་སློབ་དཔོན་ལ་སོགས་པས་དབང་བསྐུར་རྒྱུད་ཐམས་ཅད་ཀྱི་ཕ་རོལ་ཏུ་ཕྱིན་པ། དཔལ་ཨུ་རྒྱན་གྱི་ཡུལ་ན་གནས་པའི་དུས་སུ་རྣལ་འབྱོར་མ་ཆེན་མོ་དང་ལྷ་གཅིག་དམ་ཚིག་སྤྱོད་པ་དང༌། དེ་བཞིན་དུ་བཀའ་ལུང་ཡང་ཐོབ་སྟེ། དེའི་དོན་གྱིས་དགོངས་པ་དང་གཞན་ཡང་རང་གི་རབ་ཀྱི་སློབ་མ་ཚུལ་ཁྲིམས་སྐྱབས་དང༌། ཤེས་རབ་རྡོ་རྗེ་ལ་སོགས་པས་ཞུས་པའི་ངོར་བྱས་ཏེ། ཕྱག་རྒྱ་ཆེན་པོའི་གྲུབ་པ་ཐོབ་པ་ཨུ་རྒྱན་ཡུལ། རྡོ་རྗེ་རིན་པོ་ཆེའི་གནས་སུ་གཤེགས་པ། སྤྲུལ་པའི་སྐུ་ས་བཅུའི་དབང་ཕྱུག་ཆེན་པོའི་རྒྱལ་པོ། དཔལ་ཨིནྡྲ་བྷཱུ་ཏི་མགོན་པོ་དེ་ལས་བར་མ་ཆད་རིམ་མན་ངག་དབང་བསྐུར་ཐོབ་པ་རིག་བྱེད་ཐམས་ཅད་ཀྱི་མཐར་ཐུག་པ་གྲུབ་པ་བརྙེས་པའི་བླ་མ་ཁ་ཆེའི་དཔལ་རིན་ཆེན་རྡོ་རྗེའི་ཞབས་ཀྱི་པདྨའི་བཀའ་དྲིན་གྱིས་ཇི་ལྟ་བ་བཞིན། ཐོས་པ་དང༌། མཐོང་བ་དང་ཐོབ་པ་དེ་བཞིན་དུ་ལྷག་ཆད་བྲལ་བར་བདག་གིས་བྲིའོ། །སློབ་དཔོན་ཤེས་རབ་དཔལ་གྱིས་མཛད་པའི་ཡན་ལག་བརྒྱད་པའི་རིམ་པ་ལས་གཏན་ཚིགས་བསྟན་པ་ཞེས་བྱ་བའི་ལེའུར་བཅད་པ་སྟེ་དང་པོའོ།། །།