གསུམ་པ། སྟ་གོན་གནས་པ་བསྟན་པ་ཞེས་བྱ་བའི་ལེའུར་བཅད་པ།
དེ་ནས་གཞན་ཡང་སྟ་གོན་གྱི་ཆོ་ག་བཤད་དེ། དེ་ཡང་བཞི་རུ་དབྱེ་བར་གནས་པར་བྱའོ། །དང་པོ་ནི་བུམ་པའི་སྟ་གོན། གཉིས་པ་དཀྱིལ་འཁོར་གྱི་སྟ་གོན། བཞི་པ་ནི་སློབ་མའི་སྟ་གོན། དེ་བཞིན་དུ་ནང་ན་བུམ་པའི་སྟ་གོན་ལས་ཀྱི་སློབ་དཔོན་གྱིས་བྱའོ། །དེ་ལ་རིམ་པ་ནི་འདི་ཡིན་ཏེ། རྒྱུད་གང་གིས་རིམ་པས་དཀྱིལ་འཁོར་དེའི་གྲངས་ཀྱི་བུམ་པ་བྱའོ། །ཡང་ན་ལྷ་མོ་དང་ལྷན་ཅིག་དེ་བཞིན་གཤེགས་པ་ལ་ཕྱོགས་དང་མཚམས་བྱེ་བྲག་བརྒྱད་དུ་བརྒྱད། དབུས་སུ་རྡོ་རྗེ་འཛིན་པ་ལ་གཅིག་བདུད་རྩི་འཁྱིལ་པ་ལ་ལས་ཐམས་ཅད་པ་དེ་ལ་བུག་རྡོལ་མེད་པ། སྐྱོན་དང་བྲལ་བ། སྐེ་རིང་བ། དར་གཉིས་ཀྱིས་དཀྲིས་པ། ཞོ་དང༌། འོ་མ་དང༌། མར་དང༌། སྦྲང་རྩི་དང༌། པོ་ག་ལིང་དང༌། ཡུངས་ཀར་དང༌། སྨན་ཐམས་ཅད་དང༌། གྲོ་དང༌། སྲན་ནག་དང༌། ནས་དང༌། ཏིལ་དང༌། འབྲས་སོ་བ་དང༌། འབྲས་དང༌། གུར་གུམ་དང༌། ཙནྡན་དང༌། ག་པུར་དང༌། གླ་རྩི་དང༌། སྐྱུ་རུ་ར་དང༌། དཔལ་འབྲས་དང༌། ཛཱ་ཏི་པ་ལ་དང༌། གོ་ཡུ་དང༌། རིན་པོ་ཆེ་ལྔ་དང༌། དེ་ལ་སོགས་པ་དྲི་མ་མེད་པའི་ཆུ་དང་བསྲེས་པས་དགང་བར་བྱའོ། །ཇི་
ལྟར་རྙེད་པའི་ཁ་རྒྱན་མེ་ཏོག་དང་བཅས་པ། འབྲས་བུ་ལྡན་པ། རློན་པ། ཚེར་མ་ལ་སོགས་པ་དང་བྲལ་བའོ། །བུམ་པ་བརྒྱད་ལ་རིམ་པས་ཕྱག་རྒྱ་འདི་ལྟར་བྱའོ། །འཁོར་ལོ་དང༌། པདྨ་དང༌། རིན་པོ་ཆེ་དང༌། རལ་གྲི་དང༌། རི་རབ་དང༌། སྤྲུལ་དང༌། མེ་དང༌། འཕན་དང༌། དགུ་པ་ལ་རྡོ་རྗེ་བཅུ་པ་ལ་རྒྱ་གྲམ་དང་རྡོ་རྗེ། ཐམས་ཅད་ཀྱི་སྐེར་མེ་ཏོག་གི་ཆུན་འཕྱང་བཅིང་བར་བྱའོ། །བུམ་པ་སྟ་གོན་གྱི་དཀྱིལ་འཁོར་ནི་རབ་གནས་ཀྱི་དཀྱིལ་འཁོར་གྱི་གཡོན་ཕྱོགས་སུ་བྱའོ། །དེ་ཡང་གྲུ་བཞི་པ་སྒོ་ལ་སོགས་པ་དང་ལྡན་པའོ། །དེའི་ཕྱི་རོལ་དུ་ཟུར་དྲུག་པོ་རྡོ་རྗེ་ཕྲེང་བས་རྣམ་པར་བརྒྱན་པ། གྲུ་བཞིའི་དབུས་སུ་ཨོཾ་གྱི་རྣམ་པ། ཤར་སྒོར་ཤྲིཾ་ལྷོར་པྲིཾ། ནུབ་ཏུ་ཛྲཱིཾ། བྱང་དུ་ཁྲིཾ། ཤར་ལ་སོགས་པའི་མཚམས་སུ། ཡཾ་རཾ་ལཾ་བཾ། ཟུར་དྲུག་ལ་རྡོ་རྗེ་མ་མོའི་ས་བོན་དྲུག་བྲི་བར་བྱའོ། །ལྷ་མིན་གཙོ་མོ་མའི་ཏྲཾ། །གཞན་གྱི་སྟོབས་འཇོམས་པ་མོ་པྲོཾ། །འཕྲོག་མ་མོའི་ཧྲཾ། གྷསྨ་རི་གྷྲཾ་།གཏུམ་མོ་ཌོ། འཇིགས་མ་ལ་བྷྲཾ། རྡོ་རྗེ་དང་ལྡན་པ་ཨོཾ་གྱི་རྣམ་པའི་སྟེང་ཤར་ལྷོ་ནུབ་བྱང་རིམ་པས་འཁོར་ལོ་དང་ལྡན་པ། པདྨ་དང་ལྡན་པ། རིན་པོ་ཆེ་དང་ལྡན་པ། རལ་གྲི་དང་ལྡན་པ། མཚམས་རྣམས་སུ་རི་རབ་དང་སྦྲུལ་དང་མེ་དང་འཕན་དང་ལྡན་པ། ཟུར་དྲུག་གི་སྟེང་དུ་སྣོད་གང་བ། བུམ་པའི་གྲངས་ཀྱིས་ཏེ། དེ་ཡང་སྟ་རྒ་དང༌། དཔལ་འབྲས་དང༌། རིན་པོ་ཆེ་ལྔ་དང༌། འཕན་ལ་སོགས་པ་དང་ལྡན་པའོ། །རྒྱ་གྲམ་རྡོ་རྗེ་དང་ལྡན་པ་མདུན་དུ་གཞག་པར་བྱའོ། །དུང་ཕོར་རམ། ཉ་ཕྱིས་སམ། དམ་ཚིག་གི་དོན་བདུད་རྩི་ལྔ་དང་བསྲེས་པའི་ཆུས་བཀང་ནས། སྟན་གྱི་སྟེང་དུ་ལས་ཐམས་ཅད་པའི་བུམ་པའི་གཡོན་གྱི་ཆར་རོ། །སྣོད་གང་བའི་གྲངས་ཀྱི་མར་མེ་སྦྱིན་པར་བྱའོ། །མར་མེ་ཉིས་འགྱུར་གྱི་ལྷ་བཤོས་སོ། །ལས་ཐམས་ཅད་པའི་བུམ་པའི་མདུན་དུ། གཞི་མཉམ་དང༌། གཞན་ཡང་ཙནྡན་དང༌། གུར་ཀུམ་དང༌། དྲི་ཞིམ་པོའི་སྤོས་དང༌། གཞན་ཡང་སྤོས་ཀྱི་རེང་བུ་དང༌། སྣ་ཚོགས་པའི་མེ་ཏོག་དང༌། གུར་ཀུམ་གྱིས་བྱུག་པའི་འབྲས་དཀར་པོས་བཀང་བའི་སྣོད་དང༌། ཨརྒྷའི་སྣོད་དང༌། འཐོར་འཐུང་གི་སྣོད་རིམ་པས་གཞག་པར་བྱའོ། །གཞན་ཡང་ལེགས་པར་
བཀལ་བའི་ཚོན་སྣ་ལྔའི་སྐུད་པ་དང༌། བསྲུང་བའི་མདའ་དང༌། ཤིན་ཏུ་ཕྲ་བ་པུག་རྡོལ་མེད་པའི་རས་སྟ་གོན་གྱི་དཀྱིལ་འཁོར་དུ་གཞག་པར་བྱའོ། །དངོས་པོ་ཐམས་ཅད་ཚོགས་ནས་
དེའི་འོག་ཏུ 
་ལས་ཀྱི་སློབ་དཔོན་གྱིས་བཀྲ་ཤིས་ཀྱི་ཚིགས་བཅད་བརྗོད་པར་བྱའོ། །གང་ཞིག་བཀྲ་ཤིས་ནམ་མཁའི་ཁམས་ལ་ལེགས་པར་བཞུགས། །དཔལ་ལྡན་རྡོ་རྗེ་སེམས་དཔའ་དབང་ཆེན་སྐལ་ལྡན་མ། །ཤེས་རབ་ཆུ་སྐྱེས་དབུས་སུ་རྡོར་མཆོག་འཇུག་པ་ལ། །དེ་ཡི་བཀྲ་ཤིས་ཐེག་པ་མཆོག་ལ་སྐྱབས་གྱུར་ཅིག །གང་ཞིག་བཀྲ་ཤིས་སྲིད་པའི་མཚོ་ཆེན་མཉམ་པ་ལ། །ཆགས་པ་ལ་སོགས་དམ་པའི་ཞགས་པ་གཅོད་པ་ལ། །རྣམ་པར་སྣང་མཛད་མྱ་ངན་འདས་ལམ་དག་བྱེད་ལ། །དེ་ཡི་བཀྲ་ཤིས་ཐེག་པ་མཆོག་ལ་སྐྱབས་གྱུར་ཅིག །གང་ཞིག་བཀྲ་ཤིས་ཚད་མེད་འོད་ཟེར་ལྡན་པ་ལ། །ལོག་པའི་ཤེས་པ་གཏི་མུག་འཇིགས་པ་ལ། །ལྷ་ཡི་ལྷ་མཆོག་འཇིག་རྟེན་རྟག་ཏུ་རིག་པ་འཛིན། །དེ་ཡི་བཀྲ་ཤིས་ཐེག་པ་མཆོག་ལ་སྐྱབས་གྱུར་ཅིག །གང་ཞིག་བཀྲ་ཤིས་ཁ་སྦྱར་ལེགས་པར་བཞུགས། །ཡེ་ཤེས་བདུད་རྩིའི་ཆུས་སྦྱིན་རྟག་ཏུ་ཆར་འབབ་ལ། །པདྨ་དགའ་ཞིང་འཇིག་རྟེན་སེམས་ཅན་ཕན་པར་བརྩོན་པ་ལ། །དེ་ཡི་བཀྲ་ཤིས་ཐེག་པ་མཆོག་ལ་སྐྱབས་གྱུར་ཅིག །གང་ཞིག་བཀྲ་ཤིས་སྲིད་པའི་ས་སྐྱེས་བཅད་པ་ལ། །དཔལ་རྡོར་སེམས་དཔའི་གནས་གྲུབ་བྱེད་ཅིང་སྦྱིན་པ་ལ། །ཤེས་རབ་རལ་གྲི་རྟག་ཏུ་ཕྱར་འཛིན་པ། །དེ་ཡི་བཀྲ་ཤིས་ཐེག་པ་མཆོག་ལ་སྐྱབས་གྱུར་ཅིག །དེ་ནས་བཀྲ་ཤིས་མཆོད་པའི་དོན་དུ་ནམ་མཁའི་ཕྱོགས་སུ་དེ་བཞིན་གཤེགས་པ་ཐམས་ཅད་ལ་མེ་ཏོག་སྙིམ་པས་ཕུལ་ཏེ། སྤོས་ཀྱི་ངེད་བུ་དང་བཅས་པར་རྡོ་རྗེ་དྲིལ་བུ་ལན་གསུམ་སྔགས་འདིས་དཀྲོལ་བར་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་མེ་གྷ་སྥ་ར་ཎ། ཧྲིཾ་ཧྲིཾ་ཏྲཾ་ཏྲཾ་ཧཾ་ཧཾ་ཧིཾ་ཧིཾ་དྲ་ན་དྲ་ན་པ་ར་ཎ། སཾ་པ་ར་ཎ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ནས་དབུས་ཀྱི་བུམ་པ་ཡན་ལག་ཐམས་ཅད་དང་ལྡན་པ་གཞལ་ཡས་ཁང་དུ་བསྒོམ་པར་བྱའོ། །ཡང་ན་བུམ་པའི་ནང་དུ་ཀཾ་ཡོངས་སུ་གྱུར་པ་ལས་གཞལ་ཡས་ཁང༌། དེའི་དབུས་སུ་ཨཱ་ལི་ཀཱ་ལི། དེའི་སྟེང་དུ་ཧཱུཾ་གི་རྣམ་པ། ཨཱ་ལི་ཀཱ་ལི་དང་ཧཱུཾ་གི་རྣམ་པ་ཡོངས་སུ་གྱུར་པ་ལས། རང་འོད་དང་འཁྱུད་པའི་རྡོ་རྗེ་དང་དྲིལ་བུ་དང་ལྡན་པ། སྣ་ཚོགས་པདྨའི་
སྟེང་ན། ནམ་མཁའ་སྔོན་པོའི་མདོག་རྒྱན་ཐམས་ཅད་ཀྱིས་བརྒྱན་པ། ཕྱག་གཉིས་ཞལ་གཅིག་སྤྱན་གསུམ་རྡོ་རྗེ་སྐྱིལ་མོ་ཀྲུང་དུ་གནས་པའི་རྡོ་རྗེ་འཛིན་པ་ཆེན་པོ་བསྒོམ་པར་བྱའོ། །ཤར་དུ་པཾ་ཡོངས་སུ་གྱུར་པ་ལས་རྣམ་པར་སྣང་མཛད་མདོག་དཀར་པོ་རྡོ་རྗེ་འཛིན་ལྟ་བུའོ། །ལྷོར་ཨོཾ་ཡོངས་སུ་གྱུར་པ་ལས་སྣང་བ་མཐའ་ཡས་མདོག་དམར་པོ་རྣམ་པར་སྣང་མཛད་ལྟ་བུའོ། །ནུབ་ཏུ་ཛྲཱིཾ་ཡོངས་སུ་གྱུར་པ་ལས་རིན་ཆེན་འབྱུང་ལྡན་མདོག་སེར་པོ་སྣང་བ་མཐའ་ཡས་ལྟ་བུའོ། །བྱང་དུ་ཁཾ་ཡོངས་སུ་གྱུར་པ་ལས་དོན་ཡོད་གྲུབ་པ་ནེའུ་སིང་གི་མདོག་རིན་ཆེན་འབྱུང་ལྡན་ལྟ་བུའོ། །ཤར་མཚམས་སུ་ལཾ་ཡོངས་སུ་གྱུར་པ་ལས། སངས་རྒྱས་སྤྱན་རྣམ་པར་སྣང་མཛད་ལྟ་བུའོ། །ལྷོ་མཚམས་སུ་མཾ་ཡོངས་སུ་གྱུར་པ་ལས། མཱ་མ་ཀཱི་སྣང་བ་མཐའ་ཡས་ལྟ་བུའོ། །ནུབ་མཚམས་སུ་པཾ་ཡོངས་སུ་གྱུར་པ་ལས། གོས་དཀར་མོ་རིན་ཆེན་འབྱུང་ལྡན་ལྟ་བུའོ། །ཕྱེད་མཚམས་སུ་ཏཱཾ་ཡོངས་སུ་གྱུར་པ་ལས། སྒྲོལ་མ་དོན་ཡོད་གྲུབ་པ་ལྟ་བུའོ། །དེ་རྣམས་ལ་ཡང་གཉིས་སུ་མེད་པའི་སྦྱོར་བས་རང་འོད་ཐམས་ཅད་དང་ཡན་ལག་མ་དང་ལྡན་པར་བསྒོམ་པར་བྱའོ། །མདུན་དུ་ཧཱུཾ་ཡོངས་སུ་གྱུར་པ་ལས། བདུད་རྩི་འཁྱིལ་བ་ཕྱག་དྲུག་པ་སྤྱན་གསུམ་ཞལ་འཇིགས་པར་བྱེད་པ། ཕྱེད་སྐྱིལ་གྱིས་བཞུགས་པ། རྡོ་རྗེ་དང༌། དྲིལ་བུ་དང༌། རལ་གྲི་དང༌། གཏུན་ཤིང་དང༌། སྟ་རེ་དང་ཞགས་པ་བསྣམས་པ། མར་སྔོན་པོའི་མདོག་རང་འོད་ཡན་ལག་མ་དང་ལྡན་པར་བསྒོམ་པར་བྱའོ། །དམ་ཚིག་སྣོད་ཀྱི་ནང་དུ་ཧྲཱིཾཿ་ཡོངས་སུ་གྱུར་པ་ལས་དམ་ཚིག་ཆེན་པོའི་དབང་ཕྱུག་མ། ཕྱག་གཉིས་ཞལ་གཅིག་སྤྱན་གསུམ་ཞལ་འཇིགས་འཇིགས་ལྟ་བུ་རྡོ་རྗེ་སྐྱིལ་བུར་དུ་བཞུགས་པ། དབུ་སྐྱེས་འབར་བ། ཕྱོགས་ཀྱི་ན་བཟའ་ཅན། ཁྲག་ཆེན་པོས་ཡན་ལག་བྱུགས་པ། ལྷ་དང་ལྷ་མིན་གྱི་ཁྲག་ཐམས་ཅད་དྲངས་ཏེ་བཀང་བའི་ཀ་པཱ་ལ་གཡས་ན། གཡོན་ན་རྡོ་རྗེ་ཁ་ཊྭཱཾ་གའོ། །ཨརྒྷའི་སྣོད་ཀྱི་དབུས་སུ་ཨོཾ་ཡོངས་སུ་གྱུར་པ་ལས་དེ་བཞིན་གཤེགས་པ་ཐམས་ཅད་སྐྱོབ་ཉི་མ་བྱེ་བའི་འོད་དང་མཉམ་པ་གྲངས་མེད་པའི་དེ་བཞིན་གཤེགས་པ་དང་ལྡན་པར་བསྒོམ་པར་བྱའོ། །ད་ནི་བུམ་པ་ལ་སོགས་པའི་
བསམ་གཏན་གྱི་ཆོ་གའོ། །ད་ནི་དེ་རྣམས་ལ་རིམ་པས་བཟླས་པའི་ཆོག་བཤད་དེ། ཨོཾ་བཛྲ་སཏྭ་ཏ་ཐཱ་ག་ཏ་ཨ་དྷི་པ་ཏ་ཡེ་ཧུཾ་ཧཱུཾ་ཕཊ་སྭཱ་ཧཱ། ཨོཾ་ཙཀྲ་ཨ་དྷི་པ་ཏ་ཡེ་ཧུཾ་ཧཱུཾ་ཕཊ་སྭཱ་ཧཱ། ཨོཾ་པདྨ་ཨ་དྷི་པ་ཏ་ཡེ་ཧུཾ་ཧཱུཾ་ཕཊ་སྭཱ་ཧཱ། ཨོཾ་རཏྣ་ཨ་དྷི་པ་ཏ་ཡེ་ཧུཾ་ཧཱུཾ་ཕཊ་སྭཱ་ཧཱ། ཨོཾ་ཁ་ཊྭཱཾ་ག་ཨ་དྷི་པ་ཏ་ཡེ་ཧུཾ་ཧཱུཾ་ཕཊ་སྭཱ་ཧཱ། ཨོཾ་ཏ་ཐཱ་ག་ཏ་ནེ་ཧྲི་ཧུཾ་ཧཱུཾ་ཕཊ་སྭཱ་ཧཱ། ཨོཾ་པདྨ་ན་རྟེ་ཤྭ་རི་ཧུཾ་ཧཱུཾ་ཕཊ་སྭཱ་ཧཱ། ཨོཾ་རཏྣེ་ཨཱ་ལོ་ཀེ་ཧུཾ་ཧཱུཾ་ཕཊ་སྭཱ་ཧཱ། ཨོཾ་སརྦ་ཨཱ་བར་ཎ་བི་ཤོ་དྷ་ན་ཡེ་ཧུཾ་ཧཱུཾ་ཕཊ་སྭཱ་ཧཱ། རེ་རེ་ལ་སྔགས་ལན་བརྒྱ་རྩ་བརྒྱད་བཟླས་པར་བྱའོ། །ཨོཾ་ཨ་མྲྀ་ཏ་ཀུཎྜ་ལི་མ་ཧཱ་ཀྲོ་དྷཱི་ཤྭ་རི་སརྦ་མ་ར་ཨ་རེ་སརྦ་སིདྷི་ཀ་ར་སརྦ་ཀརྨ་སིདྡྷི་ཧུཾ་ཧཱུཾ་ཕཊ་སྭཱ་ཧཱ། ཡི་གེ་གསུམ་གྱི་སྔགས་ཀྱིས་སྔོན་དུ་བསྙེན་པ་བཟླས་ནས་གྲུབ་པའི་དོན་དུ་སྔགས་དེས་བརྒྱ་རྩ་བརྒྱད་བཟླས་པར་བྱའོ། །བཟླས་པའི་ཆོ་ག་རྫོགས་ནས། ནམ་མཁའི་གནས་ནས་དང་པོ་གྲུབ་པ་འཁོར་དང་བཅས་པའི་ཡེ་ཤེས་སེམས་དཔའ་ཕྱག་རྒྱ་དང་སྔགས་ཀྱིས་དགུག་པར་བྱའོ། །དེ་ལ་ཕྱག་རྒྱ་དང་སྔགས་ནི་འདི་ཡིན་ཏེ། གུང་མོ་ལུ་གུ་རྒྱུད་ཀྱི་རྣམ་པར་བྱས་ཏེ། མཐེ་བོང་གཉིས་མནན་ཅིང་སྲིན་ལག་དང་མཐེ་ཆུང་ལག་མཐིལ་དུ་བཞག་ནས་མཛུབ་མོ་དགུག་པར་བྱའོ། །ཨོཾ་ཛྙཱ་ན་སཏྭ་ཨཱཏྨ་ཀོ྅ཧཾ་བཛྲ་དྷ་ར་ས་པ་རི་བཱ་ར་བ་རཾ་ཧ་ཧི་ཧུཾ་ཧཱུཾ་ཕཊ་སྭཱ་ཧཱ། གཤེགས་པ་ཙམ་གྱིས་ཨརྒྷ་དང༌། ཉ་རེག་དང༌། འཐོར་འཐུང་དབུལ་བར་བྱའོ། །དེ་ལ་རིམ་པ་ནི་འདི་ཡིན་ཏེ། ཨོཾ་གྲྀཾ་གྲྀཾ་ཨརྒྷའི་སྔགས་སོ། །གཡོན་པའི་གུང་མོ་དང་མཐེ་བོ་སེ་གོལ་གྱི་ཕྱག་རྒྱས་སོ། །ཨོཾ་ཧུཾ་ཧཱུཾ་ཉེ་རེག་གི་སྔགས་སོ། །པ་ཏིའི་ཕྱག་རྒྱས་སོ། །ཨོཾ་ཨཾ་ཨཱཾ་འཐོར་འཐུང་གི་སྔགས་སོ། །འཁོར་ལོའི་ཕྱག་རྒྱས་སོ། །ཨོཾ་ཏིཥྛ་ཏི་ཥྛ་ཧཱུཾ་ཕཊ། གདན་དབུལ་བའི་སྔགས། རུས་སྦལ་གྱི་ཕྱག་རྒྱས་སོ། །དེ་ནས་ཡང་སྔར་བཤད་པའི་རྡོ་རྗེ་དྲིལ་བུའི་སྔགས་ཀྱིས་ལྔ་བཅུ་རྩ་བཞིའི་གྲངས་ཀྱིས་ལན་ཅིག་རྡོ་རྗེ་དྲིལ་བུ་དཀྲོལ་བར་བྱའོ། །དེའི་རྗེས་སུ་དམ་ཚིག་ཆེན་པོའི་སྣོད་ན་ཡོད་པའི་ཆུས་དཀྱིལ་འཁོར་ན་ཡོད་པའི་གཞི་ཐམས་ཅད་ཀུ་ཤ་སོར་བརྒྱད་པ་སྦོམས་པས་སྔགས་འདིས་ལན་བདུན་གཏོར་བར་བྱའོ། །ཨོཾ་སྭ་བྷཱ་བ་ཤུདྡྷ་ཨ་མ་ལ་བི་ཤུདྡྷ་ཡེ་སྭཱ་ཧཱ། དེ་ལྟར་གཏོར་བ་བྱས་ཏེ། དེའི་རྗེས་ལ་འཐོར་འཐུང་གི་སྣོད་ཀྱིས་ལས་ཐམས་ཅད་པ་ལ་མེ་ལོང་གི་སྟེང་དུ་སྨན་ཐམས་ཅད་
ཀྱིས་སྔགས་འདིས་ཁྲུས་བྱའོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་མ་ཧཱ་ག་ག་ན་ས་དུ་པ་བི་ཤུདྦྷ་ཡེ་ཨོཾ་ཨཱཿ་ཧཱུཾ་ཕཊ་སྭཱ་ཧཱ། དེའི་དབུས་སུ་གྲུ་གསུམ་གྱི་ཕྱག་རྒྱས་སྔགས་འདིས་རབ་གནས་བྱའོ། །ཨོཾ་སརྦ་ད་ར་ཨཀྵ་ཡ་ག་ནཱཏྨ་ལེ་ཧུཾ་ཧཱུཾ་ཕཊ་སྭཱ་ཧཱ། དེ་ལྟར་རང་གནས་བྱས་ནས་དམ་ཚིག་གི་སྣོད་ཀྱི་ཆུ་དང༌། པད་སྐོར་གྱི་ཕྱག་རྒྱ་དང་སྔགས་འདིས་དབང་བསྐུར་སྦྱིན་པར་བགྱིའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ། མཆོད་པ་བྱས་ནས་སྣ་ཚོགས་རྡོ་རྗེ་དྲ་བའི་གཟུགས་ཀྱི་ཕྱག་རྒྱ་དང༌། དྲི་མེད་བུག་རྡོལ་མེད་པའི་ཤིན་ཏུ་སར་པའི་གོས། ཨོཾ་ཨཱཿ་ཧཱུཾ་ཕཊ་སྔགས་ཀྱིས་བྱིན་གྱིས་བརླབས་ཏེ། བསྲུང་བའི་སྔགས་འདོན་ཅིང་ཐམས་ཅད་དགབ་པར་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་ཧྲཾ་ཧྲཾ་ཧྲིཾ་ཧྲཱི་ཧུཾ་ཧཱུཾ་ཕཊ་ཕཊ་རཀྵ་རཀྵ་སྭཱ་ཧཱ། དེའི་སྐབས་སུ་གཏོར་མ་ཆེན་པོ་བསྐོར་བ་བྱས་ནས་གཡོན་གྱི་བྱང་ལོགས་སུ་གཞག་པར་བྱའོ། །དེ་ལ་རེམ་པ་འདི་ཡིན་ཏེ། ཤིན་ཏུ་ཆེ་བའི་ཟས་ལ་སོགས་པའི་སྣོད་བྲུཾ་གྱི་རྣམ་པ་ཡོངས་སུ་གྱུར་པ་ལས། ཡན་ལག་ཐམས་ཅད་དང་ལྡན་པའི་གཞལ་ཡས་ཁང་ཡི་གེ་གསུམ་གྱི་སྔགས་ཀྱིས་བྱིན་གྱིས་བརླབས་ཏེ། ཁྲག་ཆེན་པོ་དང༌། གཞན་ཡང་སྣ་ཚོགས་པའི་ཉ་ཤ་ལ་སོགས་པའི་འབྲས་བུ་ཁ་ཟས་ཀྱིས་ལེགས་པར་གང་བར་བྱས་ནས། དེའི་སྟེང་དུ་ཨ་ཤྭདྠའི་ཤིང་ལས་བྱས་པའི་གྲུ་གསུམ་གྱི་ཕྱག་རྒྱ་གཞག་པར་བྱའོ། །གྲྭ་ལ་སྣ་ཚོགས་ཀྱི་འཕན་བཅིང་བར་བྱའོ། །གྲྭའི་སྟེང་དུ་མེ་དང་ཁ་ཟས་ཀྱི་ཁམས་གསུམ་གཞག་པར་བྱའོ། །སྣོད་ཀྱི་འབྲས་བུ་ཡང་དག་པར་སར་པའི་དུམ་བུ་གསུམ་པའི་ཀ་པཱ་ལ་ཁྲག་ཆེན་པོས་བཀང་བའོ། །དེའི་དབུས་སུ་ཧཱུཾ་གི་རྣམ་པ་དང་ལྡན་པའི་ཉི་མའི་དཀྱིལ་འཁོར་དེ་དག་ཡོངས་སུ་གྱུར་པ་ལས་རྡོ་རྗེ་རོ་ལངས་མ་ཆེན་མོ་ཕྱག་སྟོང་ཞབས་སྟོང་ཞལ་སྟོང་སྤྱན་འབར་བ། དབུ་སྐྱེས་འབར་བ། ཁྲག་ཆེན་པོས་སྐུ་བྱུགས་པ། བདུད་ཐམས་ཅད་ཀྱི་ཁྲག་གི་སྣོད་ཕྱག་ན་བསྣམས་པ། སྣ་ཚོགས་པའི་རུས་པས་སྐུ་བརྒྱན་པ། འཇིགས་བྱེད་ཆེན་པོའི་སྟེང་ན་གཡོན་བརྐྱང་བས་བཞུགས་པ། ལྷ་མིན་གྱི་དབང་པོ་དུ་མ་དང༌། འདྲེ་དང༌། སྲིན་པོ་དང༌། ཡི་དགགས་དང༌།
ཤ་ཟ་དང༌། ཨུཥྨནྡ་དང༌། ཨ་པསྨ་ར་དང༌། མཁའ་འགྲོ་མའི་ཚོགས་ཀྱིས་ཡོངས་སུ་བསྐོར་བའོ། །སྣོད་ཀྱི་ཕྱི་རོལ་དུ་གདུགས་དང༌། རྒྱལ་མཚན་དང༌། འཕན་དང༌། རྨ་བྱའི་རྡུལ་ཡབ་དང༌། གྲི་གུག་དང༌། ལྕགས་མདའ་དང༌། ཆུན་འཕྱང་ལ་སོགས་པ་བྱའོ། །བཅོམ་ལྡན་མོ་རོ་ལངས་མོ་ཆེན་མོ་གྲུ་གསུམ་གྱི་ཕྱག་རྒྱས་ཧ་རྣམ་པ་ལྔས་བྱིན་གྱིས་བརླབས་ཏེ། ལས་གང་དང་གང་ལ་ཁྲོ་བོའི་གཟུགས་སུ་བྱས་ཏེ། བསྲུང་བའི་དོན་དུ་སྔགས་འདིས་བསྐོར་བར་བྱའོ། །ཨོཾ་ཧི་མ་ཧཱ་བཛྲ་བི་ཏཱ་ལཱི་མ་ཧཱ་བི་ཤྭེ་ཤྭ་རེ་སརྦ་དོཥྚཱ་ཀཥ་ཨཾ་ག་རེ་སརྦ་ས་སཏྭོ་ཧེ་ཏཾ་ཀརེ་སཏྭ་པ་དྲ་བ་ཀ་ར་དོཥྚ་ཙིཏྟ་ནཾ། ཧ་ན་ཧ་ན་ད་ཧ་ད་ཧ་པ་ཙ་པ་ཙ་མ་ཐ་མ་ཐ། བིདྷྭ་ནྶ་ཡ་བིདྷྭ་ནྶ་ཡ། མཱ་ར་ཡ་མཱ་ར་ཡ་དཎྜེ་ན་ཙུརྞ་བ་ཁ་དྷ་གེ་ན་ཏོ་ཊ་ཡ་ཙྐྲེ་ན་ཙྪེ་ད་ཡ་བཛྲེ་ཎ་བྷེ་ད་ཡ། སརྦ་སཏྭཱནཱཾ་ཤཱཾ་ཏིཾ་ཀུ་རུ་པུ་ཙིཏྟ་ཤྲེ་ཡཿ་ཀུ་རུ་སརྦ་བྱ་ཏི་མ་པ་ཧ་ར། དྷུ་རཀ་ཏི་མ་པ་ཧར། དྷ་རི་ད་ཡ་མ་པ་ཧ་ར། ཨ་ཀ་ལ་མྲྀ་ཏྱུ་མ་བ་ཧ་ར། དྷོ་བྷིཀྵ་མ་པ་ཧ་ར། ན་མ་སརྦ་ཀརྨ་སཱ་དྷ་ནི་མ་ཧཱ་ཡཾ་ཀུ་རུ། ཧཾ་ཧཾ་ཧིཾ་ཧིཾ། ཀི་ལི་ཀི་ལི་ཧི་ལི་ཧི་ལི་ཧུཾ་ཧཱུཾ་ཕཊ་ཕཊ་སྭཱ་ཧཱ། དེ་ནི་བུམ་པའི་སྟ་གོན་གྱི་ཆོ་གའོ། །ད་ནི་དཀྱིལ་འཁོར་གྱི་སྟ་གོན་གྱི་ཆོ་ག་བཤད་དེ། དང་པོ་རྡོ་རྗེ་དང་དྲིལ་བུར་བཅས་པའི་བཀྲ་ཤིས་ཀྱི་ཚིགས་བཅད་བརྗོད་ནས་འབྱུང་བ་ཆེན་པོ་བཞི་ཡོངས་སུ་གྱུར་པ་ལས། ཇི་ལྟར་ཕྱི་རོལ་གཞལ་ཡས་ཁང་རྣམ་པར་བཟོར་བྱས་པ་དེ་བཞིན་དུ་དེའི་སྟེང་དུ་བསྒོམ་པར་བྱའོ། །དེའི་དབུས་སུ་ཨཱ་ལི་ཀཱ་ལི་ཡོངས་སུ་གྱུར་པ་ལས་ཟླ་བ་དང་ཉི་མའོ། །དེའི་སྟེང་དུ་ཡེ་ཤེས་ཀྱི་མེའི་རང་བཞིན་ཧཱུཾ་གི་རྣམ་པ་དེས་ཟླ་བ་དང་ཉི་མ་ཡོངས་སུ་གྱུར་ཏེ། རང་གི་རྒྱུད་ཀྱི་གོ་རིམས་ཀྱིས་རྡོ་རྗེ་འཛིན་པ་ཆེན་པོ་རང་འོད་ཀྱི་ཡན་ལག་མས་འཁྱུད་པ། འཁོར་ལོ་དང་བཅས་པ་ཉི་མ་ལ་བཞུགས་པ། སྐད་ཅིག་གིས་རྫོགས་པར་བསྒོམ་པར་བྱའོ། །ཡང་ན་ཐམས་ཅད་རང་གི་སྙིང་གར་བསྒོམས་ཏེ། ཕྱི་རོལ་དུ་སྤྲོ་བར་བྱའོ། །དེའི་རྗེས་སུ་སྔར་བསྟན་པའི་རྡོ་དྲིལ་གྱི་སྔགས་ཀྱིས་ཉི་ཤུ་རྩ་བདུན་གྲངས་ཀྱིས་སྤོས་ཀྱི་རེང་བུ་དང་བཅས་པའི་རྡོ་རྗེ་དྲིལ་བུ་དཀྲོལ་བར་བྱའོ། །དེ་ནས་ནམ་མཁའི་གནས་ནས་དཀྱིལ་འཁོར་འཁོར་ལོ་དང་བཅས་པའི་ཁམས་གསུམ་རྣམ་པར་རྒྱལ་བའི་ཕྱག་རྒྱ་དང༌། ཛཿ་ཧཱུཾ་བཾ་ཧོཿ་ཞེས་དེའི་སྔགས་
ཀྱིས་ཡེ་ཤེས་སེམས་དཔའ་བཀུག་ནས། སྔར་བསྟན་པའི་ཆོ་གར་ཨརྒྷ་དང་ཉེ་རེག་དང་འཐོར་འཐུང་དབུལ་བར་བྱའོ། །དེའི་རྗེས་སུ་དཀྱིལ་འཁོར་འཁོར་ལོ་དང་བཅས་པ་དམ་ཚིག་སེམས་དཔའ་ལ་འཇུག་པར་བྱས་ནས་ལན་གསུམ་རྡོ་རྗེ་དྲིལ་བུ་དཀྲོལ་ཏེ། མཆོད་སྦྱིན་ལྔའི་མཆོད་པ་དབུལ་བར་བྱའོ། །དེ་ནས་རྡོ་རྗེ་འཛིན་པ་ཆེན་པོའི་སྙིང་པོའི་སྔགས་ཀྱིས་བཟླས་པ་སྟོང་བྱའོ། །དཀྱིལ་འཁོར་བ་ལ་རང་རང་གི་སྔགས་ཀྱིས་རེ་རེ་ལ་བརྒྱ་རྩ་བརྒྱད་དོ། ། དེའི་འོག་ཏུ ་ཡི་གེ་གསུམ་གྱི་སྔགས་ཀྱིས་གོས་བྱིན་གྱིས་བརླབས་ཏེ། ཨོཾ་མ་ཧཱ་བཛྲ་དྷ་ར་མ་ཧཱ་ས་མ་ཡ་མཎྜལི་བེ་ཤྲ་མ་ཐ་ཧཱུཾ་ཧཱུཾ་ཕཊ་སྭཱ་ཧཱ། ངེས་པར་ས་ཚོན་གྱི་དཀྱིལ་འཁོར་ཡིན་ན་ཁྲུ་གང་ཙམ་གྱི་སྟེང་དུ་གོས་བྲེས་ནས་འབད་པར་བྱའོ། །སྔར་བསྟན་པའི་སྔགས་ཀྱི་ཆོ་གས་རོལ་མོ་ལ་སོགས་པ་དང་ལྡན་པའི་གཏོར་མ་ཆེན་པོ་བསྐོར་བར་བྱའོ། །དེ་ནི་དཀྱིལ་འཁོར་གྱི་སྟ་གོན་ནོ། །ད་ནི་སྐུའི་སྟ་གོན་བཤད་དེ། དང་པོ་བཀྲ་ཤིས་ཀྱི་ཚིགས་བཅད་བརྗོད་ནས། སྐུའི་སྙིང་གར་པཾ་ཡོངས་སུ་གྱུར་པ་ལས་སྣ་ཚོགས་པདྨ། དེའི་སྟེང་དུ་ཨཱ་ལི་ཀཱ་ལི། དེའི་སྟེང་དུ་ཨོཾ་གྱི་རྣམ་པ། ཨོཾ་གྱི་རྣམ་པའི་སྙིང་གར་ཨཱཿའི་རྣམ་པ། ཨཱཿའི་རྣམ་པའི་སྙིང་གར་ཧཱུཾ་གི་རྣམ་པ། ཧཱུཾ་གི་རྣམ་པའི་སྟེང་དུ་ཡེ་ཤེས་ཀྱི་འོད་ཀྱི་རང་བཞིན་གྱི་ཐིག་ལེ་དང་ལྷན་ཅིག་ཐམས་ཅད་ཡོངས་སུ་གྱུར་པ་ལས། སྣ་ཚོགས་པདྨ་ལ་བཞུགས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ། དཔེ་བྱད་བརྒྱད་ཅུས་བརྒྱན་པའི་སྐུ་བསྒོམས་ཏེ། དེ་ནས་དེ་ལ་སྔགས་ཀྱིས་བྱིན་གྱིས་བརླབ་པར་བྱའོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་མ་ཧཱ་བཛྲ་དྷ་ར་ཏིཥྛ་ཧུཾ་ཧཱུཾ་ཕཊ་སྭཱ་ཧཱ། དེ་ནས་ནམ་མཁའི་ཁམས་ནས་སྐུ་ཇི་ལྟ་བུའི་ཡེ་ཤེས་སེམས་དཔའི་གཡོན་པའི་ལག་པས་རྡོར་དྲིལ་དཀྲོལ་ཞིང་གཡས་པས་རྡོ་རྗེ་ལྕགས་ཀྱུའི་ཕྱག་རྒྱས་ཡི་གེ་གསུམ་དང༌། ཨཱ་གཙྪ་ཨཱ་གཙྪའི་སྔགས་ཀྱིས་བཀུག་ནས། ཨརྒྷ་དང་ཉེ་རེག་དང་འཐོར་འཐུང་ལ་སོགས་པ་ཕུལ་ཏེ་ཧཱུཾ་ཕཊ་པྲ་བེ་ཤ་ཡའི་སྔགས་ཀྱིས་སྐུའི་སྙིང་གར་གཞུག་པར་བྱའོ། ། དེའི་འོག་ཏུ ་མཆོད་པ་ལྔ་མཆོད་སྦྱིན་དང༌། གཏོར་མ་ཆེན་པོ་དབུལ་ལོ། །དེ་ནི་སྐུའི་སྟ་གོན་ནོ། །ད་ནི་སློབ་མའི་སྟ་
གོན་བཤད་དེ། རེ་ཞིག་དང་པོའི་དཀྱིལ་འཁོར་གྱི་ཁང་པའི་ཕྱི་རོལ་གྱི་གནས་སུ་སྐལ་པ་དང་ལྡན་པ། ལེགས་པར་ཁྲུས་བྱས་པ། དབང་པོ་ཚང་བ། མེ་ཏོག་སྙིམ་པ་གང་བ་དང་ལྡན་པ། ཧཱུཾ་ཕཊ་སྔགས་ཀྱིས་ལན་གསུམ་དམ་ཚིག་གི་ཆུས་གཏོར་བར་བྱས་ཏེ། དེའི་རྗེས་སུ་ཡི་གེ་གསུམ་གྱི་སྔགས་ཀྱིས་སོ་ཤིང་བྱིན་གྱིས་བརླབས་ཏེ་སྦྱིན་པར་བྱའོ། ། དེའི་འོག་ཏུ ་དམ་ཚིག་གི་ཆུས་ཁ་བཀྲུ་བར་བགྱི་བ་སྦྱིན་ནོ། །དེ་ནས་ཡུངས་ཀར་གྱིས་མཛུབ་མོ་མཐེ་བོང་གིས་ཧཱུཾ་ཕཊ་སྔགས་ཀྱིས་ལན་གསུམ་བརྡེགས་ནས་རྣམ་པར་སྣང་མཛད་ཀྱི་གཟུགས་སུ་བྱིན་གྱིས་བརླབས་ཏེ། སྙིང་གར་ཉི་མའི་དཀྱིལ་འཁོར་དེའི་སྟེང་དུ་ཡེ་ཤེས་པའི་བདག་ཉིད་དེ་བཞིན་གཤེགས་པ་རྣམ་པར་སྣང་མཛད་བསྒོམ་པར་བྱའོ། །དེ་ནས་ལེགས་པར་བཀལ་བའི་ཚོན་སྣ་ལྔའི་སྐུད་པ་ཡི་གེ་བརྒྱ་བའི་སྔགས་ཀྱིས་བརླབས་ཏེ། ལག་པ་གཡས་པར་བཅིང་བར་བྱའོ། །མགོ་བོའི་སྟེང་དུ་ཡི་གེ་གསུམ་གྱིས་བརླབས་པའི་མེ་ཏོག་བཞག་ནས་གཏོར་མ་ཆེན་པོ་བསྐོར་བར་བྱའོ། །དེས་ཀྱང་དབང་བསྐུར་མ་ཐོབ་པ་དེའི་ཚེ་མཚན་མོ་དང་ཉིན་མོ་ངལ་མི་བསོ་བར་བུད་མེད་ལ་སོགས་པ་མེད་པའི་གནས་སུ་དྲི་མ་མེད་པའི་སྟན་གྱི་སྟེང་དུ་ཡི་གེ་བརྒྱ་པའི་སྔགས་གདོན་པར་བྱའོ། །སློབ་དཔོན་ཤེས་རབ་དཔལ་གྱིས་མཛད་པ་ཡན་ལག་བརྒྱད་པའི་རིམ་པ་ལས། སྟ་གོན་གནས་པ་ཞེས་བྱ་བའི་ལེའུ་བཤད་པ་གསུམ་པའོ།། །།