ཉེར་བདུན་པ་དབྱར་གྱི་རས་ཆེན་གྱི་སྤང་བ་འཆད་པ།
ཉེར་བདུན་པ་དབྱར་གྱི་རས་ཆེན་གྱི་སྤང་བ་འཆད་པ་ལ་གཉིས་ལས།
དང་པོ་བཙལ་བ་དང་འཆང་དུ་གནང་བའི་དུས་ནི། རྩ་བར། བདག་ཉིད་གནས་པར་ཁས་བླངས་པའི་ཉིན་མོའི་ཟླ་བ་སྔ་མའི་དང་པོ་ཚུན་ཆད་ནས་དབྱར་གྱི་རས་ཆེན་བཙལ་བར་བྱའོ། །བདག་ཉིད་ཀྱི་དབྱར་གྱི་འོག་གི་ཟླ་བ་ཕྱེད་ཀྱི་མཐའི་བར་དུ་བཅང་བར་བྱའོ། །ཞེས་སོགས་བྱུང༌། གཉིས་པ་ལྟུང་བའི་རྣམ་བཞག་ནི། རྩ་བར། སྔོན་དང་ཕྱི་མ་གཉིས་ལས་དེ་མ་ཡིན་པའི་དུས་གཉིས་ནི་བྱེད་པ་བོ་ཉིད་དོ། །ཞེས་སོགས་བྱུང༌། འདིའི་དོན་ལ་གསུམ་ལས། དང་པོ་གླེང་གཞི་ནི་མཉན་ཡོད་དུ་དབྱར་གྱི་གོས་རས་ཆེན་ཧ་ཅང་མྱུར་བ་འཚོལ་བ་དང༌། ཧ་ཅང་ཡུན་རིང་དུ་བཅང་བ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་བཙལ་སྔས་ཀྱི་དགག་བྱ་འདོད་པ་ཆེ་བ་དང༌། སྦྱིན་བདག་གི་ལོངས་སྤྱོད་ལ་གནོད་པ་ཡིན་ལ། བཞག་འཕྱིས་ཀྱི་དགག་བྱ་ནི་འདོད་པ་ཆེ་བ་དང་རང་གི་ཡོ་བྱད་ཆུད་ཟོས་པ་སྟེ། རས་ཆེན་སྦེད་པ་པོ་ལ་གཏད་ན་ལྟུང་བ་མེད་པར་གསུངས་པས་ཤེས་སོ། །གསུམ་པ་སོ་སོར་བཤད་པ་ལ་གཉིས་ལས། དང་པོ་བཙལ་སྔས་པའི་ལྟུང་བ་བཤད་པ་ལ་ངོ་བོ་དང་ཡན་ལག་གཉིས་ལས། དང་པོ་ངོ་བོ་ནི་བཅས་ལྡན་དགེ་སློང་གིས་དབྱར་གྱི་རས་ཆེན་བཙལ་བའི་དུས་ཀྱི་སྔ་རོལ་ཏུ་བླངས་ཏེ་ཐོབ་པ་ལས་གྱུར་པའི་ལྟུང་བ་དངོས་གཞིའོ། །གཉིས་པ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གསུམ་སྟེ། གང་ལ་བསླང་བའི་ཡུལ་དང༌།གང་བསླང་བའི་དངོས་པོ་དང༌། གང་གི་ཚེ་སློང་བའི་དུས་སོ། །དང་པོ་ནི་ཐ་སྙད་ལྔ་དང་ལྡན་པ་དང༌། ལུས་ཐ་མལ་དུ་གནས་པ་དང༌། མ་བསླངས་པའི་སྔ་རོལ་ནས་ཅི་བདེར་སྟོབས་པ་མ་ཡིན་པ་དང་གསུམ་སྟེ། མ་བསླངས་པར་ཕུལ་ན་དེ་བླངས་པ་ལ་ནི་ལྟུང་བ་མེད་དོ། །གཉིས་པ་གང་བསླང་བའི་དངོས་པོ་ལ་དྲུག་ལས། དབྱར་གྱི་རས་ཆེན་ཡིན་པ་སྟེ། རས་ཆེན་གྱི་སྤང་བ། ཞེས་སོ། །རྙང་རྙིང་མ་ཡིན་པ་སྟེ། རྙང་རྙིང་ལ་ན་སྨད་པ་ཉིད་དོ། །ཞེས་སོ། །རྙང་རྙིང་ནི་ཟླ་བ་བཞི་ལོངས་སྤྱད་པ་ཡན་ཆད་དེ། དུས་ཚིགས་སུ་བཅད་པའི་ཕྱག་དར་ཁྲོད་ཀྱི་ཚད་ཟླ་བ་བཞིར་ལོངས་སྤྱད་པར་གསུངས་པའི་གནད་ཀྱིས་སོ། །ཆར་ཆུ་བསྐྱབ་པའི་བྱ་བ་བྱེད་ནུས་པ་ཡིན་པ་སྟེ། ཞུ་བ་ལས། སེང་རས་ཀྱི་རས་ཆེན་ཤིན་ཏུ་མྱུར་བ་བཙལ་ཏམ་ཤིན་ཏུ་རིང་བར་བཙལ་ན་ཅིར་འགྱུར། ཉེས་བྱས་སོ། །ཞེས་སོ། །ཆར་ཆུ་བསྐྱབ་པའི་བྱ་བ་བྱེད་མི་ནུས་པའི་རས་ཆེན་སློང་བ་འབྱུང་རིང་བས་དགག་བྱ་གནས་སྐབས་ཀྱི་སྒོ་ནས་མ་རྫོགས་པའི་ཕྱིར་རོ། །སྦྱིན་བདག་དེ་ཉིད་ཀྱི་ཡིན་པ་དང༌། རུང་བ་དང་ཚད་དང་ལྡན་པ་སྟེ་དྲུག་གོ །གསུམ་པ་གང་གི་ཚེ་སློང་བའི་དུས་ནི། དབྱར་གནས་ཁས་ལེན་རན་པའི་དུས་ལས་ཟླ་བ་གཅིག་པས་སྔ་བ་ཡིན་པའོ། །དགེ་སློང་དབྱར་ཚུལ་འཇུག་གཏན་ནས་མི་བྱེད་པ་དེས་རས་ཆེན་བཙལ་བའི་དུས་དང་བཅང་བའི་དུས་ཀྱི་ས་མཚམས་གང་གིས་བཟུང་ཞེ་ན། ལག་ལེན་དོག་མཐའ་བཟུང་སྟེ། བཙལ་བའི་དུས་ནི་དབྱར་སྔ་མ་ལ་ལྟོས་ཏེ་བཙལ་ཞིང་བཅང་བའི་དུས་ནི་དབྱར་སྔ་མ་ལ་ལྟོས་ཏེ་འཆང་ན་ལག་ལེན་འཁྲུལ་བ་མེད་པར་འོང་ཞེས་མཚོ་མཆན་ལས་གསུངས་སོ། །