ཉེར་བརྒྱད་པ་བརྟད་པ་ལས་བྱུང་བའི་སྤང་བ་འཆད་པ།
ཉེར་བརྒྱད་པ་བརྟད་པ་ལས་བྱུང་བའི་སྤང་བ་འཆད་པ་ལ།
རྩ་བར། དབྱར་གྱི་རྙེད་པ་ནི་བྱེད་པ་པོ་ཉིད་དོ། །དབྱར་གྱི་ནང་ལོགས་སུ་བདག་གིར་བྱེད་ནའོ། །ཞེས་སོགས་བྱུང༌།འདིའི་དོན་ལ་དབྱར་གྱི་རྙེད་པ་བདག་གིར་བྱ་སྔས་པ་དང༌། བགོས་སྔས་པ་དང༌། བཞག་འཕྱིས་པ་དང་གསུམ། །དང་པོ་གཉིས་ཀྱི་དོན་ལ་བཞི་ལས། གླེང་གཞི་ནི་མཉན་ཡོད་དུ་དྲུག་སྡེས་དབྱར་གྱི་རྙེད་པ་དབྱར་གྱི་ནང་ལོགས་སུ་བདག་གིར་བྱས་པ་དང༌། སོ་སོར་བགོས་པ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་དབྱར་འདྲལ་བའི་རྒྱུར་འགྱུར་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་དབྱར་གྱི་རྒྱུ་ལས་བྱུང་བ་ཟས་ལས་གཞན་པའི་རྙེད་པ་དབྱར་གྱི་ནང་ལོགས་སུ་སྦྱིན་བདག་ལས་ལེན་ཞིང་དགེ་འདུན་གྱིས་སྤྱིའི་ཚོམས་སུ་བདག་གིར་བྱས་པ་ལས་གྱུར་པའི་ལྟུང་བ་དངོས་གཞི་དང༌། རྙེད་པ་དེ་སོ་སོར་བགོས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་གཉིས་ལས། བདག་གིར་བྱ་སྔས་པའི་ཡན་ལག་དང༌། བགོ་སྔས་པའི་ཡན་ལག་གཉིས། དང་པོ་ལ་བཞི་ལས། དང་པོ་གཞིའི་ཡན་ལག་ལ་གང་ལས་བདག་གིར་བྱ་བའི་སྦྱིན་བདག་དང༌། གང་བདག་གིར་བྱ་བའི་དངོས་པོ་དང༌། གང་གི་ཚེ་བདག་གིར་བྱ་བའི་དུས་དང་གསུམ། དང་པོ་ནི་ཁྱིམ་པ་ཡིན་པ་དང༌། ཐ་སྙད་ལྔ་དང་ལྡན་པ་དང༌། ལུས་ཐ་མལ་དུ་གནས་པའོ། །གཉིས་པ་ནི་ལྔ་ལས། དབྱར་གྱི་རྒྱུ་ལས་བྱུང་བའི་རྙེད་པ་ཡིན་པ་སྟེ། དབྱར་གྱི་རྙེད་པ་ནི་བྱེད་པ་པོ་ཉིད་དོ། །ཞེས་སོ། །ཟས་ཀྱི་རྙེད་པ་ལས་གཞན་ཡིན་པ་སྟེ། དབྱར་གྱི་ནང་ལོགས་སུ་ཡང་ཟས་ཀྱི་རྙེད་པ་ནི་འཕྲལ་དུ་ལོངས་སྤྱད་པར་བྱ་བ་ཡིན་པའི་ཕྱིར་རོ། །བརྟད་པའི་རྙེད་པ་མ་ཡིན་པ་སྟེ། རྩ་བར། བརྟད་པའི་དབང་གིས་མཐའི་ཞག་བཅུ་ལ་རྙེད་པ་མ་གཏོགས་སོ། །ཞེས་དང༌། ཟླ་ཟེར་༢༢༣ལས། མཐའི་ཞག་བཅུ་མཚོན་པ་སྟེ་མཐའི་ཞག་ཉི་ཤུ་ལ་སོགས་པ་ཡང་མཚུངས་པའི་ཕྱིར་རོ། །ཞེས་སོ། །རུང་བ་དང་ཚད་དང་ལྡན་པ་སྟེ་ལྔའོ། །གསུམ་པ་གང་གི་ཚེ་བདག་གིར་བྱ་བའི་དུས་ནི། དབྱར་གནས་པར་ཁས་བླངས་ནས་དགག་དབྱེ་སོགས་དབྱུང་བ་མ་བྱས་པའི་དུས་ཡིན་པ་སྟེ། རྩ་བར། དབྱར་གྱི་ནང་ལོགས་སུ་བདག་གིར་བྱེད་ནའོ། །ཞེས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་པའོ། །ཀུན་སློང་ནི་རང་དོན་དུ་བདག་གིར་བྱེད་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་བདག་གིར་བྱེད་པར་ཞུགས་པའོ། །བཞི་བ་མཐར་ཐུག་ནི་བདག་གིར་བྱས་པ་རྫོགས་པའོ། །