གསུམ་པ་བཞག་པ་འཕྱིས་པ།

གསུམ་པ་བཞག་པ་འཕྱིས་པ་ནི།

རྩ་བར། མ་བགོས་པ་ན་ཡང་ངོ། །ཞེས་སོ། །འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་དབྱར་ཟླ་བ་གསུམ་གྱི་ནང་ལོགས་སུ་དགེ་འདུན་རྣམས་ལ་རལ་གྲི་མཐུ་ཅན་པ་རྣམས་ཀྱིས་གོས་ཀྱི་རྙེད་པ་ཆོས་གོས་མང་པོ་ཕུལ་བ་ན་དགེ་འདུན་རྣམས་ཀྱིས་གཉེར་ཁ་མ་བྱས་པར་བཞག་སྟེ་ཆོས་གོས་དེ་རྣམས་སྲིན་གྱིས་རྨུགས་ཏེ་རྡུལ་དུ་བརླགས་ནས་འདུག་པ་ལས་སོ། །གཉིས་པ་དགག་བྱ་ནི་རང་རིགས་ཀྱི་ཡོ་བྱད་ཆུད་ཟོས་པར་གྱུར་པའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་དབྱར་གྱི་རྒྱུ་ལས་བྱུང་བའི་རྙེད་པ་རང་དབང་བ་དེ་གོས་སྦེད་པ་པོ་མ་བསྐོས་པར་དགག་དབྱེའི་ཉིན་ཕྱི་མ་ལ་མ་བགོས་པར་བཞག་པ་ལས་གྱུར་པའི་ལྟུང་བ་དངོས་གཞིའོ། །ཡན་ལག་ལ་བཞི་ལས། དང་པོ་གཞིའི་ཡན་ལག་ལ་བཞི་ལས། གང་གི་བཞག་པའི་སྦྱིན་བདག་ནི་སྔ་མ་གཉིས་དང་འདྲའོ། །གང་བཞག་པའི་དངོས་པོ་ནི། སྔར་བགོ་སྔས་པའི་སྐབས་སུ་ཇི་སྐད་བཤད་པ་དབྱར་གྱི་རྒྱུ་ལས་བྱུང་བའི་རྙེད་པ་ཡིན་པ། ཟས་ཀྱི་རྙེད་པ་ལས་གཞན་ཡིན་པ། རུང་བ་དང༌། ཚད་དང་ལྡན་པ་སྟེ་བཞི་པོ་དེའི་སྟེང་དུ་རང་གི་ཡིན་པ་བསྣན་པ་སྟེ་ལྔའོ། །གང་གིས་བཞག་པའི་རྟེན་ནི། གོས་སྦེད་པ་པོ་མ་བསྐོས་པ་དང༌། སྦྱིན་བདག་གིས་དབང་མེད་པ་མ་ཡིན་པ་སྟེ། དེ་སྦེད་པ་མ་བསྐོས་པ་རྣམས་ལའོ། །ཞེས་དང༌། སྦྱིན་བདག་གི་ཚིག་གིས་དབང་མེད་ནའོ། །ཞེས་སོ། །གང་གི་ཚེ་བཞག་པའི་དུས་ནི། སྲ་བརྐྱང་མ་བཏིང་ན་དགག་དབྱེའི་ཕྱི་དེ་ཉིན་པར་རམ། སྲ་བརྐྱང་བཏིང་ན་དཔྱིད་ཟླ་ར་བའི་འབྲིང་པོའི་ཉ་ལ་མ་བགོས་ན་ལྟུང་བ་འདི་བསྐྱེད་པ་སྟེ། ལུང་རྣམ་འབྱེད་ལས་དེ་ལྟར་གསུངས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་དབྱར་གྱི་རྙེད་པ་དེ་མ་བགོས་པར་འཇོག་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་རྙེད་པ་བགོད་པའི་བྱ་བ་མི་བྱེད་པའོ། །བཞི་བ་མཐར་ཐུག་ནི་སྲ་བརྐྱང་མ་བཏིང་ན་ཚེས་བཅུ་དྲུག་གི་མཚན་མོ་མཐའི་སྐད་ཅིག་ལའོ། །སྲ་བརྐྱང་བཏིང་ན་ནི་དཔྱིད་ཟླ་འབྲིང་པོའི་ཉའམ་དཔྱིད་ཟླ་ར་བའི་ཉའི་མཚན་མོ་མཐའི་སྐད་ཅིག་ལའོ། །མདོར་ན་དབྱར་ནང་དུ་བདག་གིར་བྱས་ན་སྤང་ལྟུང་སྐྱེད། དབྱར་ནང་དུ་བགོས་ན་སྤང་ལྟུང་ཡོད། སྲ་བརྐྱང་མ་བཏིང་ན་དགག་དབྱེའི་ཉིན་ཕྱི་མ་ལ་མ་བགོས་ན་སྤང་ལྟུང་ཡོད། བཏིང་ན་དཔྱིད་ཟླ་ར་བའི་འབྲིང་པོའི་ཉ་ལ་མ་བགོས་ན་སྤང་ལྟུང་བསྐྱེད་པའོ། །ཡང་ཚུལ་འདི་ལྟར་དཔྱད་ན་དབྱར་གནས་པ་པོ་དགེ་འདུན་ལ་ཐུན་མོང་དུ་ཕུལ་བའི་ཟས་ལས་གཞན་པའི་རྙེད་པ་དེ་དབྱར་ནང་དུ་བདག་གིར་བྱས་པ་ལས་བཙལ་སྔས་པ་དང་བགོ་སྔས་པ་དང་བཞག་ཕྱིས་པ་ལས་སྤང་ལྟུང་དངོས་གཞི་མི་བསྐྱེད་པ་ཐལ།སྤང་ལྟུང་དེ་དག་ལ་རང་ཁོ་ནས་ཡན་ལག་ཚང་དགོས་ཀྱང་དེ་མ་ཚང་བའི་ཕྱིར། རྟགས་ཟུར་སྔ་མ་གྲུབ་སྟེ། མཚོ་ཊཱིཀ་༤༣༨ལས། ལུང་ཞུ་བ་ལས་རང་གཞན་ཐུན་མོང་དུ་དབང་ན་འཁྲུལ་འཇུག་ལ་སོགས་པ་ལྔ་ལ་ན་སྨད་དུ་དངོས་སུ་གསུངས་པས་དེ་དག་དང་རྒྱུ་མཚན་མཚུངས་པ་གཞན་རྣམས་ལ་ཡང་ན་སྨད་དུ་ཤེས་པར་བྱའོ། །ཞེས་གསུངས་པའི་ཕྱིར་རོ། །ཉེར་དགུ་བ་བསྔོས་བསྒྱུར་གྱི་སྤང་བ་འཆད་པ་ལ། རྩ་བར། གཞན་གྱིས་གང་ཟག་གཞན་ནམ་དགེ་འདུན་ལ་བསྔོས་པའི་གོས་ཤེས་བཞིན་དུ་བདག་ཉིད་ལ་བསྒྱུར་ཏེ་ཐོབ་ནའོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་སྦྱིན་བདག་གིས་དགེ་འདུན་ལ་བསྔོས་པ་ཉེ་དགས་རང་ལ་བསྒྱུར་བ་ལས་སྤང་བའི་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་རང་རིགས་ཀྱི་ལོངས་སྤྱོད་ལ་གནོད་པ་དང༌། རང་འདོད་པ་ཆེས་པའོ། །གསུམ་པ་ངོ་བོ་ནི་སྦྱིན་བདག་གིས་དགེ་སློང་གཞན་ལ་བསྔོས་པའི་གོས་སམ་ལྷུང་བཟེད་དེ་བཅས་ལྡན་དགེ་སློང་གིས་བདག་ཉིད་ལ་བསྒྱུར་ཏེ་ཐོབ་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་བཞི་ལས། དང་པོ་གང་གིས་བསྔོས་པའི་སྦྱིན་བདག་ནི་ཆོས་གསུམ་ལྡན་ལས། བསམ་པ་ཐག་པ་ནས་བསྔོ་བ་པོ་ཡིན་པའོ། །ཐ་སྙད་ལྔ་དང་ལྡན་པ་དང༌། ལུས་ཐ་མལ་པར་གནས་པ་སྟེ། དེ་གཉིས་ནི་རྫུན་ཕམ་གྱི་སྐབས་སུ་སྔར་བཤད་པ་བཞིན་ནོ། །གཉིས་པ་གང་ལ་བསྔོས་པའི་ཡུལ་ནི་དགེ་སློང་ཆོས་དྲུག་ལྡན་ནོ། །གསུམ་པ་གང་བསྔོས་པའི་དངོས་པོ་ནི། ཆོས་བཞི་ལྡན་ལས་གོས་སམ་ལྷུང་བཟེད་ཡིན་པ་སྟེ། བསྔོས་པའི་གོས་ཞེས་གསུངས་པས་ལྷུང་བཟེད་ཀྱང་མཚོན་ཏེ། གོས་དང་རྒྱུ་མཚན་མཚུངས་པའི་ཕྱིར་རོ། །བསམ་པ་ཐག་པ་ནས་བསྔོས་ཟིན་པའོ། །རུང་བ་ཚད་དང་ལྡན་པ་སྟེ་བཞིའོ། །བཞི་པ་གང་ལ་བསྒྱུར་བའི་ཡུལ་ནི་བདག་ཉིད་ལ་བསྒྱུར་བའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་གི་དོན་དུ་རང་ལ་བསྒྱུར་བའི་ཚིག་སྨྲ་ཞིང་གོ་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་ངག་མཚན་ཉིད་ལྔ་ལྡན་གྱིས་རང་ལ་བསྒྱུར་བར་ཞུགས་པའོ། །བཞི་བ་མཐར་ཐུག་ནི་དངོས་པོ་དེ་ཐོབ་ཅིང་ཐོབ་བློ་སྐྱེས་པའོ། །སོ་སོ་ཐར་པའི་མདོ་ལས་དགེ་འདུན་ལ་བསྔོས་པ་ཞེས་གསུངས་ཀྱི། གང་ཟག་གཞན་ནམ་ཞེས་མ་གསུངས་ཀྱང༌། ལུང་རྣམ་འབྱེད་ལས། གང་ཟག་གཅིག་ལ་བསྔོས་པ་དང་གཉིས་སམ་གསུམ་ལ་བསྔོས་པ་བདག་ཉིད་ལ་བསྒྱུར་ན་སྤང་བའི་ལྟུང་བྱེད་དུ་གསུངས་པའི་ཕྱིར། རྩ་བར། གང་ཟག་གཞན་ནམ། ཞེས་སྨོས་སོ། །བྱིན་གྱིས་མ་བརླབས་པར་ཡང་ངོ༌། །ཞེས་ཤི་བའི་ཡོ་བྱད་བྱིན་གྱིས་མ་བརླབས་པར་བགོད་ན་ཉེས་པར་འགྱུར་བའི་རྒྱུ་མཚན་དུ་དེ་ལ་གཞན་དག་གི་ཤས་ཉིད་མ་བྲལ་ལོ་ཞེས་པ་ནི། ལུང་གོས་ཀྱི་གཞི་ལས། གསོལ་བའམ་ཐོག་མ་དང་ཐ་མ་མ་བྱས་པའི་ཤི་བའི་ཡོ་བྱད་ནི་སངས་རྒྱས་ཀྱི་སློབ་མ་ཐམས་ཅད་དབང་བ་ཡིན་ནོ། །ཞེས་གསུངས་སཽ། །མཛོད་འགྲེལ་ལས་ཀྱང་ཤི་བའི་རྫས་འཕྲོགས་ན་ཤི་བའི་ཡོ་བྱད་བྱིན་གྱིས་རློབ་པའི་ལས་བྱས་པ་ཞིག་ཡིན་ན་ནི་མཚམས་ཀྱི་ནང་དུ་གཏོགས་པ་རྣམས་ལས་སོ། །ལས་མ་བྱས་པ་ཞིག་ཡིན་ན་ནི་སངས་རྒྱས་ཀྱི་སློབ་མ་ཐམས་ཅད་ལས་འཕྲོགས་སོ། །ཞེས་གསུངས་སོ། །དེ་ལྟར་བསྔོས་པ་མི་སྦྱིན་པ་ལ་སོགས་པ་ལྔ་བསྔོས་བསྒྱུར་དངོས་དང་དྲུག་པོ་དེ་རྣམས་ལ་མ་བྱིན་པར་ལེན་པའི་ལྟུང་བ་མེད་པ་ནི། རྐུ་སེམས་མེད་པའི་ཕྱིར་རོ། །གལ་ཏེ་རྐུ་སེམས་བྱུང་ན་ནི་དྲུག་པོ་དེ་དག་ཐམས་ཅད་དུ་ཡང༌། རྐུ་སེམས་ཀྱིས་ནི་བརྐུས་པ་ཉིད་ཡིན་ནོ། །ཞེས་གསུངས་ལ། དེའི་རང་གི་རྣམ་བཤད་ལས། ཕམ་པ་མི་བསྐྱེད་པ་ནི་མ་ཡིན་ནོ་ཞེས་བཤད་དེ། ཡན་ལག་གཞན་ཚང་ནའོ། །