བདེ་བ་ཆེན་པོའི་བདུད་རྩིའི་འོད།
ཡེ་ཤེས་རིན་པོ་ཆེས་མཛད།
རྒྱ་གར་སྐད་དུ། མ་ཧཱ་སུ་ཁ་ཨ་མྲྀ་ཏ་པྲ་བྷ་ནཱ་མ། བོད་སྐད་དུ། བདེ་བ་ཆེན་པོའི་བདུད་རྩིའི་འོད་ཅེས་བྱ་བ། དཔལ་དགྱེས་པའི་རྡོ་རྗེ་ལ་ཕྱག་འཚལ་ལོ། །འཁོར་ལོ་པདྨ་རྒྱས་གང་བ། །རང་གི་གནས་ནི་ཉིད་དུ་འཁྱིལ། །སངས་རྒྱས་ཀུན་གྱི་གསང་བ་སྟེ། །འགྲོ་བ་ཀུན་ལ་རང་བཞིན་གནས། །ཡང་དག་པ་དེ་རབ་ཏུ་བཤད། །ཡང་དག་པ་ཡང་རྣམ་པ་བཞི། །དེ་ནི་ལུས་ལ་རབ་ཏུ་གནས། །འདི་ལྟར་ཤེས་པའི་ལུས་ཉིད་ནི། །བདེ་བ་ཆེན་པོའི་སྐུ་ཞེས་བྱ། །ལྟེ་བ་གསང་བའི་དྲུག་ཅུ་བཞིའོ།། སྤྲུལ་པའི་ཡིག་འབྲུ་དཀར་པོ་བཀོད། །ཨཱ་ལི་ཀཱ་ལི་གཡས་དང་གཡོན། །ཡེ་ཤེས་བཞི་ཡི་ཡི་གེ་ཨོཾ། །དབུས་ཀྱི་རི་བོང་འཛིན་པར་རོ། །སྤྲུལ་པའི་དཀྱིལ་འཁོར་ཞེས་སུ་བཤད། །སེམས་ཀྱི་གནས་སུ་སྐུ་སོགས་བརྒྱད། །ཁ་དོག་དཀར་པོ་ཡི་གེ་དགུ་།ཧཱུཾ་པྲཱུཾ་ཏྲཱཾ་ཧྲིཾ་ཁཾ་ཡིག་རྣམས། །དབུས་ནས་བྱང་དུ་རིམ་བཞིན་དགོད། །མཚམས་སུ་ལཾ་ལ་སོགས་
པ་བཞི། །མཚན་མ་མེད་པའི་
སྐུ་ཞེས་བཤད། །ལོངས་སྤྱོད་རྫོགས 
་པའི་སྐུ་བཅུ་དྲུག །མགྲིན་པའི་གནས་སུ་ཡང་དག་སྐྱེས། །དེ་ཡི་རི་བོང་འཛིན་པར་ཨོཾ། །ཡ་ཝ་ར་ལ་ཡི་གེ་རྣམས། །ཤར་ནས་བྱང་དུ་རིམ་བཞིན་ནོ། །རྟོགས་ཡུལ་བཅུ་རླུང་གཉིས་ཀྱི་གནས། །འབྱུང་བཞིའི་རྟགས་ནི་འཛིན་པར་བཤད། །ས་བོན་ཟླ་བ་རྒྱས་འདྲ་བ། །བདེ་བ་ཆེན་པོའི་གནས་སུ་འཁྱིལ། །སུམ་ཅུ་རྩ་གཉིས་རང་བཞིན་གནས། །དེ་ཡི་གནས་ན་ཨཱ་ལི་གཉིས། །གཡས་དང་གཡོན་གཉིས་མགོ་དང་མཇུག །གཅིག་ཏུ་ཕྲད་པས་བརྒྱན་པ་ཡིན། །དེ་དབུས་ཧཾ་ལས་སྲ་མ་ན། །ལོངས་སྤྱོད་མཁྱེན་ལ་བདེ་ཆེན་ཐུར། །ཐབས་དང་ཤེས་རབ་ཚུལ་དུ་གནས། །ཆོས་དང་སྤྲུལ་པའང་དེ་བཞིན་ནོ། །ཀུན་གྱི་དབུས་ནས་རི་བོང་འཛིན། །འཁོར་ལོ་ཡི་གེ་ཁ་དོག་དཀར། །ཡཾ་ལས་འབྱུང་བ་རླུང་དཀྱིལ་འཁོར། །ཧ་གཉིས་གནས་སུ་བསམ་པར་བྱ། །དེ་སྟེང་རཾ་བྱུང་གྲུ་གསུམ་མེ། །རང་གི་གནས་སུ་བསམ་པར་བྱ། །དེ་ལྟར་རང་བཞིན་ཀུན་ཤེས་ནས། །ཡེ་ཤེས་ཆེན་པོའི་བྱིན་རླབས་ལས། །རླུང་གིས་མེ་བུས་བཅུ་དྲུག་འབར། །དེ་ཉིད་ཡེ་ཤེས་མེ་ཞེས་བྱ། །ལྟེ་བར་གཏུམ་མོ་སྦར་བ་ཡིས། །དེ་བཞིན་གཤེགས་པ་ལྔ་བསྲེགས་ཏེ། །སྤྱན་ལ་སོགས་པ་ཡང་བསྲེགས་ནས། །ཀུན་གྱི་ལུས་བསྲེགས་མགོ་གཅིག་བསམས། །ལོངས་སྤྱོད་གསུམ་སྐར་འབྱུང་བཞིའོ། །བསྲེགས་ནས་གཡས་འབྱུང་སངས་རྒྱས་དང༌། །སེམས་ཅན་ཀུན་བསྲེགས་དབུ་མ་གཡོན། །ཐིམ་སྟེ་བདེ་ཆེན་གཡོན་ནས་བསྐོར། །བསྲེགས་ནས་རྣ་བ་གཡས་སུ་འདུ། །མཁའ་འགྲོ་མ་ཀུན་བསྲེགས་གཅིག་བྱེད། །ཨ་བ་དྷཱུ་ཏཱིའི་གནས་ནས་བྱུང༌། །སངས་རྒྱས་སེམས་ཅན་གཉིས་མེད་བསྲེགས། །སྟེང་གི་ཞབས་སུ་སྲ་མ་ན། །བདེ་བ་ཆེན་པོའི་ལུས་ཀྱང་སྐྱེས། །ཧཾ་དཀར་ལས་བྱུང་སེར་པོ་དཀར། །ལུས་སྐྱེས་མི་ལ་ཡེ་ཤེས་བསྐྱེད། །དེ་རུ་མ་ནུས་ཆུ་ཡི་རྩ། །གཡོན་གྱི་རྩ་ནས་སྤྲུལ་པ་རུ། །དེར་ནི་ཡང་དག་རབ་ཏུ་གཟུང༌། །དེ་རུ་མི་གནས་སམ་པོ་ཀ །རྩ་བའི་རྡོ་རྗེ་ལམ་ནས་འགྲོ། །སམ་པོ་ཀ་ནས་ཆོས་སྐུའོ། །ལུས་རྣམས་ཡང་དག་སྐྱེ་བར་འགྱུར། །སྐྱེས་ནས་བསྐལ་པའི་བར་དུ་གནས། །ཆོས་ཀྱི་གནས་སུ་མ་སྐྱེས་ན། །ནིར་མ་ཀ་ཡི་གནས་སུ་བསམ། །ཡང་དང་ཡང་དུ་འདི་བཞིན་བྱ། །
རྣམ་རྟོག་མེད་པའི་རྣལ་འབྱོར་སྐྱེ། །ཡར་གྱིས་བསྲེགས་ཤིང་མར་གྱིས་གསོ། །རྣལ་འབྱོར་མིག་གི་འོད་ཟེར་གྱིས། །རྟག་ཏུ་འདི་ལ་བལྟ་བར་བྱ། །ནམ་ཞིག་འདི་ལ་བརྟེན་གྱུར་ན། །མཚན་མ་ལྔ་འམ་ཡང་ན་གཡོ། །འབར་ཞིང་གཡོན་ཡིག་གོ་བཅད། །བཅད་པས་བཞི་པོ་ཡང་ཡང་ཞུ། །རྩ་བའི་རྡོ་རྗེ་ལམ་ནས་ནི། །ཏིལ་གྱི་འབྲུ་བཞིན་རྒྱས་པར་འབྱུང༌། །རྣལ་འབྱོར་མཐར་ཕྱིན་འབྲས་བུ་སྟེ། །བདེ་བ་ཆེན་པོའི་སྐུ་ཞེས་བྱ། །གཞན་གྱི་དོན་སོགས་ཡོན་ཏན་རྣམས། །འབད་པ་མེད་པར་ལྷུན་གྱིས་གྲུབ། །བླ་ན་མེད་པའི་དགོངས་རྒྱུད་འདི། །དཔལ་གྱི་ཞབས་ཀྱིས་བདག་ལ་བསྟན། །རྐྱེན་དང་རྣལ་འབྱོར་གཉིས་སུ་འགྱུར། །བདེ་བ་ཆེན་པོ་ཞེས་སུ་བསྟན། །སྦྱོར་བའི་རྒྱུད་ནི་ཐམས་ཅད་ལས། །རྒྱལ་བ་རྣམས་ཀྱིས་སྦས་བ་བཤད། །ཤིན་ཏུ་སྦྱངས་ལ་རབ་གནས་པའི། །སྣོད་ལྡན་བདག་ཉིད་ཆེན་པོས་གཟུང༌། །ལུས་སེམས་བདེ་བར་སྤྱད་ནས་ནི། །ཉིད་མཚམས་སྦྱོར་བ་བསྟེན་པར་བྱ། །བདག་གིས་བརྩམས་ཀྱི་བདུད་རྩི་འོད། །འདི་ལྟར་ཁམས་གསུམ་ཀུན་ཀྱང་དེ། །ཤིང་དང་འདྲ་བར་མཚུངས་པའོ། །ཡང་དག་བདེ་བས་འཚོ་བར་ཤོག །རྣལ་འབྱོར་གྱི་དབང་ཕྱུག་ཆེན་པོ་དཔལ་ཡེ་ཤེས་རིན་པོ་ཆེའི་ཞལ་སྔ་ནས་མཛད་པ་རྫོགས་སོ།།