ཟངས་བཟོ།
ཟངས་བཟོའི་སྒྱུ་རྩལ་ནི། མདོར་བསྡུས་ན། ཟངས་བཙོ་སྦྱངས་བྱས་ཏེ་བརྡུང་བ་དང། ལུགས་སུ་བླུགས་པ། ཟངས་ཤོག་དང་། ཟངས་ཕྱེ་བཟོ་བ། རྒྱན་ཆས་དང་ཡོ་བྱད། རྟེན་གསུམ་མགར་བ་སོགས་ལ་བརྗོད། བོད་ཀྱི་ཟངས་བཟོའི་སྒྱུ་རྩལ་འདི་ཇི་ལྟར་དར་བ། ལོ་རྒྱུས་ཡིག་ཚང་ལ་གཞིགས་ན། སྤྱི་ལོ་དུས་རབས་དང་བོའི་ཡས་མས་སུ་གྲི་གུམ་བཙན་པོ་དང་། བློན་པོ་ལོང་ངམ་གཉིས་འཐབ་ནས། རྒྱལ་བོ་བཀྲོངས་བའི་པུར་ཟངས་ཀྱི་སྒམ་དུ་བཅུག་སྟེ། ལྕགས་གཟེར་བཏབ་ནས་ཉང་ཆུར་བསྐུར་ཚུལ་འདི། ཟངས་བཟོའི་ལག་རྩལ་སྔ་ཤོས་སུ་གྲུབ། དེའི་ཕྱིས་ཆོས་རྒྱལ་སྲོང་བཙན་གྱི་དུས་སུ་ལྷ་སའི་དམར་བོ་རིར། རྒྱལ་བོའི་ཤར་སྒོའི་ཕྱིར་འདོམ་དགུ་བརྒྱ་ཅན་གྱི་ཟབ་དོང་སྟེང་ཐམས་ཅད་ཟངས་མས་གཡོགས་པ་དང་། ད་དུང་ཁོང་གིས་བློན་པོ་རིམ་པ་བཞི་བ་ལ་ཟངས་ཀྱི་བྱང་བུའི་ཡི་གེ་བྱ་དགར་བསྩལ་བར་མ་ཟད། སྐུ་གཤེགས་ཁར་ཞལ་ཆེམས་བསྩལ་བ་ཟངས་ཀྱི་བྱང་བུའི་སྟེང་ཡི་གེ་བཀོད་དེ་བང་མཛོད་དུ་མནན་པ། ཕྱིས་རྒྱལ་བོ་ཁྲི་ལྡེ་གཙུག་བརྟན་གྱིས་གཟིགས་ནས། ནང་བསྟན་དར་སྤེལ་བཏང་བ་དང་། ཁྲི་སྲོང་ལྡེ་བཙུན་གྱི་དུས་སུ་བསམ་ཡས་གཙུག་ལག་ཁང་གི་གཉྫིར་གསེར་ལ་ཤེལ་གྱི་ཏོག་ཅན་བཙུགས་པ་དང་། ཁྲི་བཙུག་ལྡེ་བཙུན་རལ་བ་ཅན་གྱིས། ལྷ་ཁང་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙང་ཁང་དགུ གསེར་གྱི་གཉྫིརའི་གསེར་ལ་ཤེལ་གྱི་ཏོག་རྒྱབ་རི་དང་བཅས་པ་བཞེངས་པ་སོགས། ལོ་རྒྱུས་ཡིག་རྙིང་དག་ལས་འབྱུང་བར་དཔྱད་ན། ལོ་ངོ་ཆིག་སྟོང་སྔོན་ནས་བོད་ཀྱི་ཟངས་བཟོའི་ལག་རྩལ་ཁྱད་དུ་འཕགས་པ་ར་སྤྲོད་བྱེད་ཐུབ། རྗེ་ཙོང་ཁ་པའི་དུས་སུ་དགའ་ལྡན་སྒྲུབ་མཆོད་ཁང་དུ་ཟངས་གསེར་ལས་གྲུབ་པའི་གསང་འདུས་བློས་བསླངས། སྡེ་མཆོག་ལི་ཨུ་བའི་བློས་བསླངས། རྡོ་རྗེ་དབྱིངས་ཀྱི་བློས་བསླངས་སོགས་བཟོ་བཀོད་ཁྱད་དུ་འཕགས་པའི་དཀྱིལ་འཁོར་དང་། གཞན་ལྷ་སའི་ཇོ་ཁང་དང་། གཙང་བཀྲ་ཤིས་ལྷུན་པོ་སོགས་གཙོ་བོར་གྱུར་བའི་མདོ་དབུས་ཁམས་གསུམ་གྱི་གཙུག་ལག་ཁང་ཇི་སྙེད་ཅིག་གི་གསེར་གྱི་རྒྱ་ཕིབས་དང་། གཉྫིར་ཇི་སྙེད་ཅིག་གིས་སྐྱེ་བོ་ཀུན་གྱི་མིག་དབང་འཕྲོག་པ་ཐམས་ཅད་ཟངས་གསེར་ལས་གྲུབ་པའི་བཟོ་རྩལ་དང་། དུས་རབས་བཅུ་གཉིས་པ་དང་བཅུ་གསུམ་པའི་ནང་བོད་ཀྱི་ཟངས་བཟོའི་སྒྱུ་རྩལ་མཐོ་འདེགས་སུ་སོང་བ། མཚུར་ཕུ་དང་། གདན་ས་མཐིལ། འབྲི་གུང་། འབྲུག་ར་ལུང་། ཚལ་གུང་ཐང་བཅས་ཀྱི་དཀར་ཆག་ནང་བོད་རིགས་ཀྱི་ཟངས་བཟོ་མཁས་པ་འགའི་མཚན་བཀོད་ཡོད་པ་དང་། གསེར་གདུང་འཛམ་གླིང་རྒྱན་གཅིག་བཞེངས་སྐབས། བལ་བོད་གཉིས་ཆར་བསྡུས་པའི་ནང་། བོད་ཀྱི་ཟངས་བཟོ་བ་རིམ་པ་གཉིས་སུ་ཕྱེ་བའི་རིམ་པ་དང་བོ་སྟེ། ཟངས་མགར་དབུ་མཛད། ལྷོ་བ་ལྷས་ནང་བ་སོགས་མི་བཞི། རིམ་པ་གཉིས་པ་བྱིངས་གྲས་བྱང་བ་ཁྲི་ཚང་ངག་དབང་སོགས་མི་ཞེ་གཉིས་འཁོད་ཅིང་། ཟངས་བཟོའི་ལག་རྩལ་སྐོར་དེར་གསལ། ད་ལྟ་གསེར་ཟངས་ཀྱི་རྟེན་གསུམ་བཞེངས་པའི་ལག་རྩལ་རྩེར་སོན་ཏེ། ཁང་བརྩེགས་མང་བོའི་མཐོ་ཚད་དང་མཉམཔའི་སྐུ་འདྲ་དང་། མཆོད་རྟེན་ག་ས་གང་ན་མཐོང་རྒྱུ་ཡོད་པ་དག་གོ །དགོན་སྡེ་ཙམ་དུ་མ་ཟད་གྲོང་ཁྱིམ་དཀྱུས་མའི་ནང་དུའང་། ཟངས་གསེར་གྱི་སྐུ་དང་། མཆོད་རྫས། རྒྱན་ཆ། ཡོ་བྱད་སོགས་ཁྱབ་གདལ་དུ་སོང་ཡོད་དོ། །