སྒྲུབ་ཐབས་རིན་ཆེན་འབྱུང་གནས་ལས་སྔ་མ་ལས་འཕྲོས་པའི་སྒྲུབ་ཐབས་བཤད་པའི་སྐབས་ཏེ་ཉེར་གཅིག་པ།
དཔལ་མགོན་ཞལ་བཞི་པ་བསྙེན་དུས་དང་འབྲེལ་བའི་སྒྲུབ་ཐབས།
ཨོཾ་སྭཱ་སྟི། སངས་རྒྱས་ཀུན་གྱི་བྱིན་བརླབས་པའི། །ལེགས་ལྡན་ནག་པོ་ལ་བཏུད་ནས། །ཞལ་བཞི་མགོན་པོ་སྒྲུབ་པའི་ཐབས། །ཉེར་མཁོ་ཙམ་ཞིག་བརྗོད་པར་
བྱ། །འདིའི་སྒྲུབ་ཐབས་དང༌། རྗེས་གནང་གི་སྐབས་ཐམས་ཅད་དུ་གུར་ལྕམ་དྲལ་གྱི་སྐབས་དང་ཐུན་མོང་བ་ཐམས་ཅད་བླང་དོར་ཤེས་པར་བྱ་དགོས་པས། ཐོག་མར་དེ་ཉིད་བློ་ལ་ཟིན་པར་བྱས་ནས་འདི་ལ་འཇུག་པར་བྱའོ། །མཆོད་གཏོར་བཤམ། བདག་བསྐྱེད་སྔོན་དུ་འགྲོ་བས། གཏོར་མ་བྱིན་རླབས་བྱ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རང་གི་མདུན་གྱི་ནམ་མཁར་བསྲུང་འཁོར་དུར་ཁྲོད་དང་བཅས་པའི་དབུས་སུ། མཐིང་ནག་གྲུ་གསུམ་འབར་བའི་ཆོས་འབྱུང་ལྔ་ཚོམ་དུ་གནས་པའི་དབུས་མའི་སྟེང་དུ། པཾ་ལས་པདྨ་དང༌། རཾ་ལས་ཉི་མའི་སྟེང་དུ་ཧཱུཾ་ལས་གྲི་གུག་ཧཱུཾ་གིས་མཚན་པ་ལས་འོད་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས། རྡོ་རྗེ་ནག་པོ་ཆེན་པོ་གདོང་བཞི་པ། རྩ་ཞལ་བརྩེགས་མ་གཉིས་ནག་པོ། གཡས་གཡོན་གཉིས་ལྗང་ནགཕྱག་བཞིའི་གཡས་གཡོན་གྱི་དང་པོ་གཉིས་ཀྱིས་རྡོ་རྗེས་མཚན་པའི་གྲི་གུག་དང༌། དགྲ་བགེགས་ཀྱི་ཁྲག་གིས་གང་བའི་ཐོད་པ་སྙིང་བཅས་ཐུགས་ཀར་སྟེང་འོག་ཏུ་འཛིན་པ། གཡས་འོག་མས་རལ་གྲི་འབར་བ་འདེབས་པའི་ཚུལ་གྱིས་འཛིན་ཞིང༌། གཡོན་འོག་མས་མི་རུས་ཀྱི་འཕྲེང་བ་འཕྱར་སྟབས་སུ་བསྣབས་པ། སྐྲ་ཁམས་གྱེན་དུ་བརྫེས་ཤིང༌། སྤྱན་གསུམ་པ། ཞལ་གདངས་ཤིང་མཆེ་བ་རྣོན་པོ་
གཙིགས་ལ། མས་མཆུ་འཕྱང་བ། ཚངས་པའི་སྐུད་པ་དང་རུས་པ་དང༌། སྦྲུལ་དང༌། དྲིལ་བུའི་འཕྲེང་བས་བརྒྱན་པ། སྟག་གི་ལྤགས་པའི་ཤམ་ཐབས་ཅན། གཡས་བསྐུམ་གཡོན་བརྐྱང་བཞེང་པའི་སྟབས་ཀྱིས་ཡེ་ཤེས་ཀྱི་མེ་དྲག་ཏུ་འབར་བའི་ཀློང་དཀྱིལ་ན་བཞུགས་པ། ཕྱོགས་བཞིར་ཧཱུཾ་བཞི་ལས། གཡས་སུ་ཡུམ་ཆེན་གཡུང་མོ་ནག་མོ། གཡོན་དུ་ལས་མཛད་གཏུམ་པོ་ལྗང་ཁུ། མདུན་དུ་དམར་ནག་སྲིན་མོ་ཆེན་མོ། རྒྱབ་ཏུ་སེར་ནག་སེང་གེ་གླིང་མ་སྟེ་བཞི་ཀར་ཡང་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པ། རབ་ཁྲོས་དྲག་ཤུལ་ཕོ་ཉ་མོའི་ཆ་ལུགས་ཅན། སྤྱན་གསུམ་གཅེར་བུ་རྒྱན་མེད་པ། རབ་ཏུ་གྲིམ་ཞིང༌། གཙོ་བོ་ལ་སྔོན་དུ་ཕྱོགས་པ། ཕྱི་རོལ་ཁོར་ཡུག་ཏུ་བདུད་གཅོད་ཀྱི་བཤན་པ་ཉེར་གཅིགབདུད་འདུལ་གྱི་དམག་ཉི་ཁྲི་ཆིག་སྟོང༌། དྲེགས་པ་སྡེ་བརྒྱད། ལྷ་མ་སྲིན་ཞིང་གི་རྡུལ་སྙེད་ཀྱི་འཁོར་གྱིས་བསྐོར་བར་གྱུར། ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་འཕྲོས། ཏེ་སེ། བསིལ་བའི་ཚལ། པོ་ཏ་ལ། ཧ་ཧ་རྒོད་པའི་དུར་ཁྲོད་རྣམས་ནས། རྡོ་རྗེ་ནག་པོ་ཆེན་པོ་ཞིང་སྐྱོང་སྟོབས་འཕྲོག་དབང་པོ་ཞལ་བཞི་པ་འཁོར་དང་བཅས་པ་ཨོཾ་བཛྲ་ས་མཱ་ཛཿ
སྔོན་ཚེ་རྡོ་རྗེ་འཆང་གི་སྤྱན་སྔ་རུ། །གཏུམ་པོ་ཁྱོད་ཀྱིས་ཇི་ལྟར་ཁས་བླངས་བཞིན། །འཕྲིན་ལས་རྣམ་བཞིའི་ལས་ལ་སྤྱན་འདྲེན་ན། །སངས་རྒྱས་བསྟན་པ་བསྲུང་ཕྱིར་གཤེགས་སུ་གསོལ། །ཨོཾ་མཧཱ་ཀ་ལ་ཀ་ལ་བི་ཀ་ལ་ར་ཏྲི་ཏ་ཧཱུཾ་ཕཊ། ས་པ་རི་ཝཱ་ར་ཨེ་ཧྱེ་ཧི། ཛཿཧཱུཾ་བཾ་ཧོཿ པདྨ་ཀ་ལ་མ་ཡ་སྟྭཾ། ཞེས་པ་ནས། རྒྱས་པར་མཛད་དུ་གསོལ་གྱི་བར། གུར་ལྕམ་དྲལ་གྱི་གཏོར་ཆོག་བཞིན་ལས། ཨོཾ་ཤྲཱི་མཧཱ་ཀཱ་ལ་མཧཱ་ཀ་ལི་དེ་ཝི་ཞེས་པའི་ཚབ་ཏུ། ཨོཾ་མཧཱ་ཀ་ལ་ཀ་ལ་བི་ཀ་ལ་ར་ཏྲི་ཏ། ཞེས་འདོན་པ་སྤོ། དམ་ཚིག་ཕྱག་རྒྱ་རྡོ་རྗེ་རྩེ་ལྔ་པའི་ཕྱག་རྒྱ་འཆིང་བ་ཡིན་ནོ། །དེ་བཞིན་དུ། གཏོར་མ་འབུལ་བའི་སྔགས་ནི། ཨོཾ་མཧཱ་ཀ་ལ་ཀ་ལ་བི་ཀ་ལ་ར་ཏྲི་ཏ་ཌོཾ་བྷི་ནི། ཙཎྜ་ལི། རཀྵ་སི། སིང་ག་ལི། དེ་ཝི་ས་པ་རི་ཝཱ་ར་བྷྱཿ ན་མཿསརྦ་ཏ་ཐཱ་ག་ཏ་བྷྱོཿ སོགས་ལན་གསུམ་གྱིས་ཕུལ། ཨརྒྷཾ་སོགས་ཀྱི་ཕྱི་མཆོད་དང༌། ནང་མཆོད་ཀྱི་སྐབས། སྙིང་པོའི་མཐར། འབྲུ་གསུམ་བཏགས་པས་འབུལ། དེ་ནས་བསྟོད་པ་གཉན་ལོཙྪ་བས་མཛད་པ་སོགས་རྒྱས་པར་སྤྲོ་ན་བྱ། མདོར་བསྡུ་ན། ཧཱུཾ། ཡོན་ཏན་མྱུར་རྫོགས་དངོས་གྲུབ་མངའ་བའི་ལྷ། །མ་ལུས་རྨད་བྱུང་ཕན་པའི་དགོངས་པ་ཅན། །འཕྲིན་ལས་རྣམ་བཞིའི་བདུད་དཔུང་ཚར་གཅོད་པའི། །ལེགས་ལྡན་ནག་པོ་འཁོར་དང་བཅས་ལ་འདུད། །མི་རྟོགས་དབྱིངས་ལས་ཐུགས་
རྗེའི་སྐུར་བཞེངས་ཤིག །འབྱུང་བ་གུར་ཆེན་བརྩེགས་པའི་གཞལ་ཡས་ནས། །བདེ་གཤེགས་བཀའ་ཡི་སྲུང་མ་དམ་ཚིག་ཅན། །རྡོ་རྗེ་ནག་པོ་ཆེན་པོ་དབྱིངས་ནས་བཞེངས། །དཔལ་ལྡན་དབང་ལྡན་སྲིད་གསུམ་དབང་བསྒྱུར་ཞིང༌། །མཆེ་བ་གཙིགས་ཞིང་མཆུ་འཕྱང་ཤུགས་ཆེ་བ། །སྒྲ་སྒྲོག་དྲིལ་བུའི་འཕྲེང་བས་བརྒྱན་པ་ཡི། །གདོང་བཞི་ལྡན་ཁྱོད་ཏེ་སེའི་ཞིང་སྐྱོང་མཛད། །རྫོགས་པའི་སངས་རྒྱས་སྤྱན་སྔ་རུ། །བསྟན་པ་བསྲུང་བར་ཞལ་བཞེས་པའི། །ནག་པོ་ཆེན་པོ་ཞལ་བཞི་པ། །ཡུམ་ཆེན་སྲིང་མོ་བཞི་དང་བཅས། །ཤ་ཆེན་ཟན་དང་མེ་ཏོག་སྤོས། །ཆང་ཕུད་ཤ་ཁྲག་དག་གིས་མཆོད། །རྒྱལ་བའི་བསྟན་པ་སྐྱོང་བ་དང༌། །བཅོལ་བའི་འཕྲིན་ལས་གྲུབ་པར་མཛོད། །གཞན་ཡང་ཇི་ལྟར་འདོད་པའི་འདོད་དོན་གསོལ་བཏབ་རྣམས་བྱས་ནས། རྗེས་ཀྱི་བྱ་བ་རྣམས་གྲུབ་བོ། །འདིའི་རྗེས་གནང་གི་བྱ་བ་ནི། རྟེན་རྡོ་རྒྱ་ཆེ་ན། དེ་ལ་ཆོས་འབྱུང་གྲུ་གསུམ་མཐིང་ནག་ལྔ་ཚོམ་བྲི། ཆུང་ན། རྟེན་རྡོའི་སྟེང་དུ་ཆོས་འབྱུང་དབུས་མ་བྲི། དེར་འབྲུ་ནག་གི་ཚོམ་བུ་བཅུ་དགུའམ། ལྔ་འགོད། དེའི་སྟེང་ངམ། རྒྱབ་ཏུ་གཏོར་མ་གྲུ་གསུམ་ལྔ་ཚོམ་པ་མཉྫིའི་སྟེང་དུ་འགོད་པ་ཁྱད་པར་ཡིན། མདུན་བསྐྱེད་བཟླས་པའི་སྐབས། ཨོཾ་མཧཱ་ཀ་ལ་ཀ་ལ་བི་ཀ་ལ་ར་ཏྲི་ཏ་ཧཱུཾ་ཕཊ། ཅེས་པ་གཙོ་བོའི་སྙིང་པོ་དང༌། ཨོཾ་མཧཱ་ཀ་ལ་ཀ་ལ་བི་ཀ་ལ་ར་ཏྲི་ཏ། ཌོཾ་བྷི་ཎི། ཙཎྡྲ་ལི།
རཀྵ་སི། སིངྒ་ལི། དྭི་སི་ཧཱུཾ་ཧཱུཾ་ཕཊ་སྭཱཧཱ། འཁོར་དང་བཅས་པའི་སྙིང་པོའོ། །འདི་ལ་རྩ་སྔགས་བཟླ་བའང་གལ་ཆེ་བས། ཅི་རིགས་པར་བཟླའོ། །རྗེས་གནང་གི་ཐོག་མར། ཆོས་ཀྱི་བྱུང་ཁུངས་བཤད་པའི་སྐབས་དེ་ཡང་གསང་བ་འདུས་པའི་རྒྱུད་འགའ་ཞིག་ལས་གསུངས་པར་གྲགས་ཤིང༌། འཕགས་པ་ཀླུ་སྒྲུབ་ཀྱིས་ཀྱང་སྒྲུབ་པའི་ཐབས་མཛད། ཁྱད་པར་སློབ་དཔོན་སངས་རྒྱས་ཡེ་ཤེས་ཞབས་ནས་ཉེ་བར་བརྒྱུད་དེ། ཏ་ཐཱ་ག་ཏ་རཀྵི་ཏའི་སྒྲུབ་ཐབས་ཀྱི་རྗེས་སུ་འབྲང་བ་འདི། རི་སུལ་གྱི་རྣལ་འབྱོར་མ་ལས་བརྒྱུད། མགོན་པོ་འདི་བྲན་བཞིན་དུ་འཁོལ་པའི་ལོཙྪ་བ་གཉན་དར་མ་གྲགས་ཀྱིས་བོད་དུ་དར་བར་མཛད་པ་ལགས། དེ་ལྟར་ན་ཞིང་སྐྱོང་སྟོབས་འཕྲོག་དབང་པོ་ཞལ་བཞི་པ་འདིའི་རྗེས་སུ་གནང་བ་སྒྲུབ་པ་འདི་ལ་གསུམ་སྟེ། ཞེས་སོགས་ཇི་ལྟར་འོས་འོས་སུ་འདོན་པ་སྤོ། གཞན་མཎྜལ། གསོལ་བཏབ། རྒྱུན་བཤགས། སྡོམ་བཟུང་རྣམས་འདྲ་ཞིང༌། དེ་ནས་སློབ་དཔོན་ཉིད་བདག་བསྐྱེད་གང་བྱས་ཀྱི་ལྷའི་མངོན་རྟོགས་དང་མཐུན་པར་སྒོམ་དུ་བཅུགམདུན་གྱི་བསྐྱེད་གཞི་འདི་ཡང་ནག་པོ་ཆེན་པོ་གདོང་བཞི་པ་ཞེས་སོགས་གཏོར་ཆོག་ལྟར་དམིགས་པ་སྤོ། སློབ་དཔོན་དང༌། མདུན་བསྐྱེད་ལ་མོས་གུས་དུང་པ་བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་དཀྱིལ་འཁོར་ལ་ཕོགདེ་ལས་འོད་ཟེར་བྱུང༌། ཁྱེད་རང་རྣམས་ཀྱི་ལུས་ལ་ཕོགལུས་ཀྱི་ཕྱི་ནང་བར་གསུམ་ཐམས་ཅད་གང༌། སྡིག་སྒྲིབ་ཐམས་ཅད་དག ལུས་འོད་ཀྱི་ཕུང་པོ་ཆེན་པོ་ཧཱུཾ་གིས་མཚན་པར་
གྱུར། དེ་ནས་སྐུའི་རྗེས་གནང་དངོས་ཀྱི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེས། བདག་ལ་ནག་པོ་ཆེན་པོ་ཞལ་བཞི་པའི་སྐུའི་རྗེས་སུ་གནང་བ་སྩལ་དུ་གསོལ། ཞེས་ལན་གསུམ། དེ་ནས་ཁྱེད་རང་རྣམས་ཐིག་ལེ་ཧཱུཾ་གིས་མཚན་པ་དེ་ཡོངས་སུ་གྱུར་པ་ལས། པད་ཉི་མི་རོའི་གདན་དང་བཅས་པའི་སྟེང་དུ་ནག་པོ་ཆེན་པོ། ཞེས་པ་ནས། ཐུགས་ཀར་ཧཱུཾ་གི་བར་གཏོར་ཆོག་བཞིན། སློབ་དཔོན་གྱི་ཐུགས་ཀའི་ཧཱུཾ་ལས་འོད་ཟེར་དཔག་ཏུ་མེད་པ་འཕྲོས། མདུན་གྱི་ཆོས་སྐྱོང་ལ་ཕོག་སྟེ། ཐུགས་རྒྱུད་བསྐུལ་བས། ཐུགས་ཀའི་ཧཱུཾ་ལས། མགོན་པོའི་སྐུ་དཔག་ཏུ་མེད་པ་བྱུང༌། ཡང་འོད་ཟེར་འཕྲོས་པས། ཏེ་སེ་བསིལ་བའི་ཚལ། པོ་ཏ་ལ། ཧ་ཧ་རྒོད་པའི་དུར་ཁྲོད་ནས། ཆོས་སྐྱོང་གི་སྐུ་བསམ་གྱིས་མི་ཁྱབ་པ་སྤྱན་དྲངས། ཞེས་སོགས་འདོན་པ་སྤོ། གསུང་གི་རྗེས་གནང་གི་གསོལ་འདེབས་ཀྱང༌། གོང་མ་དེ་ཉིད་ལས། གསུང་གི་རྗེས་གནང་སྩལ་དུ་གསོལ། ཞེས་བསྒྱུར་ཞིང༌། སྔགས་རྣམས་གོ་བརྗེ། རྣམ་སྣང་གི་ཐུགས་ཀ་ནས། སྔགས་འབྲུ་སྤྱན་འདྲེན་པ་མི་དགོས། གཞན་གསུང་གི་རྗེས་གནང་གུར་དང་འདྲ། དེ་བཞིན་དུ། ཐུགས་ཀྱི་རྗེས་གནང་ལ་ཡང༌། ཐུགས་ཀྱི་རྗེས་གནང་སྩལ་དུ་གསོལ། ཞེས་བསྒྱུར་ལ་གསོལ་བ་འདེབས། ལྷག་མ་བཀའ་བསྒོ་རྫོགས་
ཀྱི་བར་གུར་ལྕམ་དྲལ་གྱི་རྗེས་གནང་དང་འདྲ་བ་ལས། སྔ་ཕྱི་ཐམས་ཅད་དུ་ནག་པོ་ཆེན་པོ་ལྕམ་དྲལ་ཞེས་པ་རྣམས། ཞལ་བཞི་པ་ཞེས་མཚན་སྤོ། ལྷ་མོ་སྤྱན་འདྲེན་དང༌། ལྷ་མོའི་སྔགས་བཀོད་ཚུལ་སོགས་མི་དགོས། སྒྲུབ་པའི་ལུང་སྦྱིན་པ་འདི་ལ་མེད། མི་འབྲལ་ཞིང་གསང་བར་སྦ་བ་མན་ཆད། སློབ་མའི་རྗེས་ཀྱི་ཆོ་ག་དང༌། མདུན་བསྐྱེད་ཀྱི་རྗེས་ཆོག་ཀྱང༌། གུར་ལྕམ་དྲལ་གྱི་སྐབས་ཉིད་འདོན་པ་སྤོས་པས་འགྲུབ་བོ། །དྲེགས་པ་ཀུན༵་གྱི་གཙོ་བོ་འདིའི། །སྒྲུབ་ཡིག་རྣམ་མང་རབ་དག༵འ་བ། །དེ་ལས་སློབ་མ་རྗེས་བཟུང་གི །ལག་ལེན་སྙིང་པོ་ཙམ་ཞིག་བྲིས། །དཔལ་མགོན་ཞལ་བཞི་པ་བསྙེན་དུས་དང་འབྲེལ་བའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
ལས་སྦྱོར་མགོན་པོའི་སྒྲུབ་ཐབས།
ཨོཾ་སྭཱ་སྟི། ཞིང་སྐྱོང་དྲེགས་པ་མཐུ་སྩལ་ཅན། །སྟོབས་འཕྲོག་དབང་པོ་ལ་བཏུད་ནས། །སྒྲུབ་དུས་དང་ནི་ལས་སྦྱོར་གྱི། །སྒྲུབ་ཐབས་རྗེས་གནང་ཅུང་ཟད་བཤད། །དེ་ཡང་བསྙེན་དུས་ཀྱི་སྒྲུབ་ཐབས་རྗེས་གནང་ངེས་པར་བྱས་ལ། མི་འདྲ་བའི་ཁྱད་པར་ཅུང་ཟད་ནི། རྩ་ཞལ་ནག་པོ་མི་རོ་ཟ་བ། ཆེར་ཁྲོས་ཤིང་རྔམ་པ། གཡས་ཞལ་དཀར་པོ་རྒྱ་ཆེར་བཞད་པ། གཡོན་ཞལ་དམར་པོ་འཛུམ་ཞིང་འཇིགས་པ། སྟེང་ཞལ་དུད་ཁ་མཆེ་བ་གཙིགས་པ། ཕྱག་གཡས་ཀྱི་དང་པོ་རྡོ་རྗེ་གྲི་གུག་དང༌། གཡོན་གྱི་དང་པོ་ཐོད་པ་དགྲ་བགེགས་ཀྱི་སྙིང་གིས་བཀང་བ་ཐུགས་ཀར་སྟེང་འོག་ཏུ་འཛིན་པ། གཡས་འོག་མས་འབར་བའི་རལ་གྲི་དང༌། གཡོན་འོག་མ་རུས་འཕྲེང་འགག་ཐབས་སུ་
འཕྱར་ཞིང༌། རྩེ་གསུམ་འཛིན་པ། མཆན་ཁུང་དུ་གསེར་གྱི་བུམ་པ་བདུད་རྩིས་གང་བ་བཅུག་པ། ཞེས་དང༌། བཟླས་པའི་སྐབས། རྩ་སྔགས་ཤམ་བུ་ཅན་དེ་བཟླ། རྗེས་གནང་ཡང་ཐུན་མོང་བ་ནི། བསྙེན་དུས་ཉིད་འདོན་པ་སྤོས་པས་ཆོག་ལ། ཐུན་མོང་མ་ཡིན་པར་གྲགས་པ་ནི། རྗེས་གནང་དཀྱུས་མ་སོང་མཚམས་སུ། ཕྱག་མཚན་དང་རྟེན་གཏོད་པ་ཡིན་ཏེ། ཧཱུཾ། གདུག་ཅན་གཡུལ་ངོར་བསྒྲལ་བའི་ལྕགས། །གྲི་གུག་དུག་གིས་ངར་བླུད་པའི། །མཚོན་ཆེན་མི་བཟད་འབར་བ་འདི། །རྣམ་རྟོག་དགྲ་བོའི་གཤེད་དུ་སྦྱིན། །ཨོཾ་མཧཱ་ཀ་ལ་ཀ་ལ་བི་ཀ་ལ་ར་ཏྲི་ཏ་ཀརྟ་རི་ཨ་བྷི་ཥིཉྩ་ཧཱུཾ། ཞེས་གྲི་གུག་གཏད། ཀེང་རུས་ཡུ་བ་སྤྲོས་བྲལ་ཏེ། །སྐུ་གསུམ་རབ་གནོད་རྩེ་མོ་ཅན། །དར་ནག་འཕྱང་ཕྲུལ་འཕྲིན་ལས་ཏེ། །དུག་གསུམ་གཉེན་པོར་ཁྱོད་ལ་སྦྱིན། ཀརྟ་རི་ཞེས་པའི་དོད་དུ་ཏྲི་ཤུ་ལ་ཞེས་བརྗོད་ལ་རྩེ་གསུམ་གཏད། སྟོང་ཉིད་རྡོ་རྗེའི་ཡུ་བས་མཚན། །སེམས་ཉིད་ངར་ལྡན་རལ་གྲི་ཆེ། །ཡེ་ཤེས་མེ་འབར་གཡུལ་བཟློག་པའི། །མ་རིག་གཅོད་བྱེད་མཚོན་འདི་སྦྱིན། ཁ་ཁངྒ། ཞེས་རལ་གྲི་གཏད་དོ། །རང་བཞིན་གནས་ལུགས་མདུང་རིང་ནི། །ཆོས་སྐུ་རྣོ་དབལ་རྩེ་མོ་ཅན། །སྙིང་རྩེ་བ་དན་ལྷབ་ལྷུབ་སྟེ། །མ་རུངས་འབིགས་པའི་མཚོན་འདི་སྦྱིན། །ཤུ་ལ། ཞེས་མདུང་རིང་གཏད། རབ་དཀར་སྟོང་ཉིད་ཀ་པཱ་ལ། །བདེ་ཆེན་རཀྟས་གཏམས་པ་འདི། །
དབྱེར་མེད་ཟུང་འཇུག་བཅུད་ཆེན་པོ། །མཁའ་འགྲོ་རོལ་པའི་སྦྲང་རྩི་སྦྱིན། །ཀ་པཱ་ལ། ཞེས་ཐོད་པ་གཏད། གཏུམ་ཆེན་བསད་པའི་ནི་རང་སུ། །མཚོན་གྱིས་བསྲུབས་པའི་དུང་ཅན་འཕྲེང༌། །རྡོ་རྗེ་སྔགས་ཀྱི་གྲངས་འཛིན་པ། །ཤུན་ཆེན་སྲད་བུས་བརྒྱུས་འདི་སྦྱིན། །ནི་རང་སུ་མཱ་ལས། ཞེས་ཐོད་འཕྲེང་གཏད། ཛམ་བུ་ན་དའི་བུམ་བཟང་ནི། །ལྷ་རྫས་མགུལ་ཆིངས་ཉེར་མཛེས་ཤིང༌། །དངོས་གྲུབ་བདུད་རྩིའི་རྒྱུན་གྱིས་གཏམས། །མི་བཟད་ལོངས་སྤྱོད་གཏེར་འདི་སྦྱིན། །གྷ་ཊ། ཞེས་བུམ་པ་གཏད། མི་དབང་རྐང་གླིང་ང་རོ་ཅན། །གནས་གསུམ་མཁའ་འགྲོ་འབོད་པའི་སྒྲ། །སྡེ་བརྒྱད་དམག་དཔུང་འགྱེད་པའི་བརྡའ། །དམ་ཚིག་བསྐུལ་ཕྱིར་ཁྱོད་ལ་སྦྱིན། །མཧཱ་ཝཾ་སེ། ཞེས་རྐང་གླིང་གཏད། མཚན་ལྡན་སྐྱེས་བུས་བཙལ་བ་ཡིས། །རང་བྱུང་རྡོ་ནག་མགོ་གསུམ་པ། །ཞིང་སྐྱོང་བླ་རྡོ་རྟེན་པའི་རྫས། །རང་བཞིན་ཕོ་བྲང་དམ་པ་སྦྱིན། །ཤ་ལ་མཎྜལ། ཞེས་རྟེན་རྡོ་གཏད། གསུང་གི་ངོ་བོ་ཡིག་འབྲུའི་གཟུགས། །གསང་བའི་ངོ་བོ་སྲོག་གི་རྟེན། །བདུད་དཔུང་འཁོར་ཚོགས་ཟིལ་གནོན་པ། །འབྲལ་མེད་བསྲུང་བའི་འཁོར་ལོ་བཟུང༌། །ཙིཏྟ་ཙཀྲ་གུ་ཧྱ། ཞེས་སྲོག་འཁོར་གཏད། དཔའ་བོ་གཡུལ་དུ་བསྒྲལ་བའི་སྙིང༌། །རྩེ་གསུམ་
དམ་ཚིག་རྫས་ཀྱི་བཀང༌། །བསྐྱེད་ཅིང་བྱིན་རླབས་གསང་བའི་རྟེན། །སྣོད་ལྡན་བུ་ཡིས་སྙིང་གར་བཟུང༌། །བི་ར་གུ་ཧྱ་ཙིཏྟ། ཞེས་གྲི་སྙིང་གཏད་དོ། །ཕྱག་མཚན་གཏོད་པ་རྣམས་ལ་བླ་མ་གཉན་གྱིས་མཛད་པའི་ཕྱག་མཚན་འབུལ་བའི་ཚིག་གིས་གཏོད་པའི་ལུགས་ཀྱང་ཡོད་དེ། ལེགས་པར་ཡང་སེམས་སོ། །ལྷག་མ་ནི་བསྙེན་དུས་དང་འདྲའོ། །ལས་སྦྱོར་མགོན་པོ་ནི། གཡས་ཞལ་བརྩེགས་མ་གཉིས་སྔོན་པོ། གཡོན་ཞལ་བརྩེགས་མ་གཉིས་ལྗང་ཁུ། ཕྱག་གཡོན་འོག་མས་གསེར་གྱི་བུམ་པ་མྱོས་བྱེད་ཀྱིས་གང་བ་འཛིན་པ་ཞེས་འདོན་པ་སྤོ། ཁ་ཅིག་རྣམ་འགྱུར་བཞི་པ་ཞེས་ལས་སྦྱོར་མགོན་པོ་ཞལ་བཞི་འཁོར་ཞལ་དང་འདི་ལ་སྤོགས་ཆོག་མགོན་པོ་ཟེར་ནའང་སྤོགས་ཆོག་ལས་སྦྱོར་གྱི་ནང་ཚན་ཡིན་པས་ལས་སྦྱོར་མགོན་པོ་ཟེར་ལས་སྦྱོར་ཕལ་པ་ལ་རྣམ་འགྱུར་ལོགས་པ་མི་བྱེད་པ་ཉིད་མང་ངོ༌། །རྗེས་གནང་གི་སྔོན་འགྲོ་རྣམས་བསྙེན་དུས་དང་འདྲ། དང་པོ་གཏོར་དབང་སྙིང་ཞུགས་དང་བཅས་པ་བསྐུར་ནས། དེ་ནས་སྐུ་གསུང་ཐུགས་ཀྱི་རྗེས་གནང་བྱེད་པ་ཡིན་ནོ། །སྤྱིར་བསྙེན་སྒྲུབ་གང་རུང་ཞིག་གི་རྗེས་གནང་ཐོབ་པས་ཐམས་ཅད་ཉམས་སུ་བླང་དུ་ངེས་པར་རུང་བ་ཡིན་ནའང༌། བླ་མ་སྔ་རབས་པ་རྣམས་ཕྱག་ལེན་གྱི་དུས་ནས་སོ་སོར་བཀའ་རེ་མཛད་པའི་ཕྱིར། ཐམས་ཅད་ཐོབ་ན་ཤིན་ཏུ་ལེགས་པ་ཡིན་ནོ། །ཀུན༵་དུ་གཉན་ལོ་མཐུ་ཆེ་ཞེས། །དག༵འ་བར་གྲགས་པའང་ཆོས་སྐྱོང་བ། །འདི་ལས་ཡིན་ཞེས་སྙིང༵་ནས་སྒྲོགས། །ཏེ་པོ༵ར་བསྒྲུབས་ན་ཀུན་ཀྱང་འདྲ། །ཞལ་བཞི་པ་སྒྲུབ་དུས་དང༌། ལས་སྦྱོར་མགོན་པོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཞལ་བཞི་མགོན་པོའི་སྒྲུབ་ཐབས།
ཨོཾ་སྭཱ་སྟི། ཁྲོ་བོའི་རྒྱལ་ལ་ཕྱག་བཙལ་ནས། །འཕྲིན་ལས་རྣམ་བཞི་མྱུར་སྒྲུབ་པ། །དཔལ་ལྡན་ནག་པོའི་སྒྲུབ་ཐབས་ཀྱི། ཁྱད་པར་འགའ་ཞིག་བཤད་པར་བྱ། །འདིར་དཔལ་མགོན་ཞལ་བཞི་པ་ལས་བཞི་མགོན་པོ་རྣམས་ཀྱི་སྒྲུབ་ཐབས་ནི། བསྙེན་དུས་ཀྱི་སྒྲུབ་ཐབས་དེ་ཉིད་འདོན་པ་སྤོས་པས་ཆོག་སྟེ། དཀར་པོ་ཚེ་འཕེལ་ལ། བདག་བསྐྱེད་རང་ཡི་དམ་དུ་གསལ་བའི་ལྟོ་བ་དང༌། མདུན་བསྐྱེད་གཉིས་ཆར་གྱི་གནས་སུ་པདྨ་དང་ཉི་མའི་སྟེང་དུ་ཧཱུཾ་དཀར་པོ་ལས། ཞིང་སྐྱོང་སྟོབས་འཕྲོག་དབང་པོ་ཚེ་འཕེལ་སྐུ་མདོག་དཀར་པོ་རྩ་ཞལ་དཀར་བ། གཡས་སྔོ་གཡོན་དམར་སྟེང་ཞལ་དུད་ཁ། ཕྱག་དང་པོ་གཉིས་ཀྱིས་འཆི་མེད་ཡེ་ཤེས་ཀྱི་བདུད་རྩིས་གང་བའི་བུམ་པ་དང༌། ཐོད་པ་ཐུགས་ཀར་སྟེང་འོག་ཏུ་འཛིན་པ། འོག་མ་གཉིས་ཀྱིས་གྲི་གུག་དང་རྩེ་གསུམ་འཛིན་པས་ཚེའི་བར་ཆད་བསྲུང་བ་ཞེས་དང༌། གཡས་སུ་གཡུང་མོ། གཡོན་དུ་གཏུམ་མོ། མདུན་དུ་སྲིན་མོ། རྒྱབ་ཏུ་སིངྒ་ལི་མ་ཏེ་ཡུམ་བཞི་ཀར་ཡང་སྐུ་མདོག་དཀར་མོ་བདུད་རྩིས་གང་བའི་བུམ་པ་དང༌། ནོར་བུ་འཛིན་པ། ཞེས་དང༌། སྔགས་ཀྱིས་སྐབས་སུ། ཨོཾ་མཧཱ་ཀ་ལ་ཀ་ལ་བི་ཀ་ལ་རི་ཏྲི་ཏ་མ་མ་ཨཱ་ཡུར་པུཥྟིཾ་ཀུ་རུ་སྭཱཧཱ། ཞེས་བཟླའོ། །སེར་པོ་ནོར་སྤེལ་ནི། ཆོ་ག་སྔ་མ་དང་འདྲ་བ་ལས། སྐུ་མདོག་སེར་པོ་རྩལ་ཞལ་སེར་བ། གཡས་དཀར་གཡོན་
དམར། སྟེང་ཞལ་དུད་ཁ། ཕྱག་དང་པོ་གཉིས་ཀྱིས་མི་རུས་ཀྱི་འཕྲེང་བ་དང༌། ཐོད་པ་རིན་པོ་ཆེས་གང་བ་ཐུགས་ཀར་སྟེང་འོག་ཏུ་འཛིན་པ། འོག་མ་གཉིས་ཀྱིས་གྲི་གུག་དང༌། བུམ་པ་ནོར་བུས་གང་བ་བསྣམས་པ། ཞེས་དང༌། ཡུམ་ཆེན་བཞི་ཀར་སྐུ་མདོག་སེར་མོ་རུས་འཕྲེང་དང་ཐོད་པ་རིན་པོ་ཆེས་གང་བ་འཛིན་པ། ཞེས་དང༌། སྔགས་ཀྱི་ཤམ་བུར། མ་མ་པུ་ཎྱ་སརྦ་བ་སུ་པུཥྟིཾ་ཀུ་རུ་སྭཱཧཱ། ཞེས་པའོ། །དམར་པོ་དབང་སྡུད་ལ་ཡང༌། མགོན་པོ་སྐུ་མདོག་དམར་པོ། རྩ་ཞལ་དམར་བ། གཡས་དཀར་གཡོན་སྔོ། སྟེང་ཞལ་དུད་ཁ། ཕྱག་དང་པོ་གཉིས་ལྕགས་ཀྱུས་སྙིང་ལ་འབིགས་ཤིང་ཞགས་པས་སྐེ་ནས་འཆིང་བ། འོག་མ་གཉིས་ཀྱིས་རུས་འཕྲེང་དང་ཆང་བུམ་འཛིན་པ། ཞེས་དང༌། ཡུམ་ཆེན་བཞི་ཆར་ཡང་སྐུ་མདོག་དམར་མོ་ལྕགས་ཀྱུ་དང་ཞགས་པ་འཛིན་པ། ཞེས་དང༌། སྔགས་ཀྱི་ཤམ་བུ། ཆེ་གེ་མོའམ་སརྦ་ལོ་ཀ་ཝ་ཤཾ་ཀུ་རུ་ཧོཿ ཞེས་པའོ། །སྔོན་པོ་ཉམས་པ་སྒྲོལ་བ་ལ། སྐུ་མདོག་སྔོན་པོ། རྩལ་ཞལ་སྔོ་བ། གཡས་དཀར་གཡོན་དམར། སྟེང་ཞལ་དུད་ཁ། ཕྱག་དང་པོ་གཉིས་གྲི་གུག་དང་ཐོད་པ། འོག་མ་གཉིས་རལ་གྲི་དང་རྩེ་གསུམ། ཞེས་དང༌། ཡུམ་ཆེན་བཞི་ཆར་ཡང་སྐུ་མདོག་བསྔོ་བ། རལ་གྲི་དང་ཐོད་ཁྲག་འཛིན་པ། ཞེས་དང༌། སྔགས་ཀྱི་ཤམ་བུར། དགྲ་བོ་མ་ར་ཡ་
རྦད། ཞེས་པའོ། །འདི་རྣམས་ལ་བསྟོད་པ་ནི། མི་རྟོག་མ་ཁོ་ན་བྱ་ཞིང༌། བསྟོད་རྙིང་རྒྱས་པ་རྣམས་སྐུའི་རྣམ་པའི་སྒོ་ནས་མི་སྒྲིག་ཅིང༌། བསྟོད་པ་གསར་པ་འཕྲན་བུ་ཡོད་ཀྱང་ངེས་པར་དགོས་པ་ནི་མ་ཡིན་ནོ། །རྗེས་གནང་གི་ཆོ་ག་ཡང་བསྙེན་དུས་ཀྱི་ཆོ་ག་ཉིད་འདོན་པ་སྤོས་པས་ཆོགརྣམ་འགྱུར་སྣ་ཚོགས་ཀུན༵་ཏུ་སྟོན། །ངོ་བོ་གཅིག་ཏུ་གནས་དག༵འ་བས། །ལས་བཞི་མགོན་པོའི་སྒྲུབ་ཐབས་ལ། ཁྱད་པར་སྙིང༵་པོ༵་ཙམ་འདིས་ཆོག །ལས་བཞི་དང་འབྲེལ་བའི་ཞལ་བཞི་མགོན་པོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །དྲེགས་པ་བཞི་ལྡན་ལ་བཏུད་ནས། །རབ་འཇིགས་གདོང་བརྙན་ཅན་གྱི་ནི། །
ཞལ་བཞི་གདོང་བརྙན་ཅན་གྱི་སྒྲུབ་ཐབས།
ཨོཾ་སྭཱ་སྟི། རབ་འབར་སྟོབས་འཕྲོག་དབང་པོ་ནི། །དྲེགས་པ་བཞི་ལྡན་ལ་བཏུད་ནས། །རབ་འཇིགས་གདོང་བརྙན་ཅན་གྱི་ནི། །སྒྲུབ་ཐབས་ཁྱད་པར་ཅུང་ཟད་བཤད། །འདི་ཡང་བསྙེན་དུས་ཉིད་ལ་འདོན་པ་སྤོས་པས་ཆོག་སྟེ། དཔལ་ནག་པོ་ཆེན་པོ་སྐུ་མདོག་ནག་པོ་འཇིགས་སུ་རུང་བ། ཁམས་གསུམ་ཟ་བར་བྱེད་ཅིང་ལྷ་དང་ལྷ་མ་ཡིན་སྡིགས་པར་བྱེད་པའི་ཞལ་བཞི་སྟེ། རྩ་ཞལ་མགོན་པོའི་ཞལ་གཤིན་རྗེ་ལྟར་ཁྲོས་པ། གཡས་ཞལ་ལྷ་ཁྲོས་པ་གླང་པོ་ཆེའི་གདོང་དཀར་པོ། གཡོན་ཞལ་སྲིན་པོ་ཁྲོས་པ་མ་ཧེའི་གདོང་དམར་པོ། རྒྱབ་ཞལ་རྒྱལ་པོ་ཁྲོས་པ་སེང་གེའི་གདོང་སྔོན་པོ། ཕྱག་དང་པོ་གཉིས་གྲི་གུག་དང༌། ཐོད་ཁྲག་ཐུགས་ཀར་སྟེང་འོག་ཏུ་འཛིན་པ། གཡས་གཉིས་པ་ན་དབྱུག་ཐོ། གསུམ་པ་ན་དགྲ་སྟ། གཡོན་གཉིས་པས་རང་གི་
སྟོད་གཡོགས་གླང་པོའི་པགས་པའི་རྐང་པ་གཡོན་པ་འཛིན་པ། གསུམ་པས་ཞགས་པ་བསྣམས་པ། རྔམ་པའི་སྒོ་ནས་ཞབས་ས་ལ་རྡེབ་པ། ཞེས་དང༌། དེའི་གཡས་སུ་གཏུམ་མོ་སྔོན་མོ། གཡས་ཐོད་པ་དང༌། གཡོན་དར་ནག་ཐོགས་པ། གཡོན་དུ་གཡུང་མོ་དམར་མོ་ལུག་གུ་རྒྱུད་དང་ཞགས་པ་འཛིན་པ། མདུན་དུ་སྲིན་མོ་དང༌། རྒྱབ་ཏུ་སིངྒ་གླིང་མ་ནག་མོ་གྲི་ཐོད་འཛིན་པ་ཞེས་བྱ། སྙིང་པོའི་སྔགས་ནི། ཨོཾ་མཧཱ་ཀ་ལ་ཀ་ལ་གུ་ཎ་ཧྲི་ད་ཨེ་ཀ་ཛ་ཊི་ཧཱུཾ་ཕཊ། ཅེས་པའོ། །ལྷག་མ་གཏོར་ཆོག་ཉམས་སུ་བླང་ཚུལ་དང༌། སློབ་མ་ལ་རྗེས་གནང་བྱེད་ཚུལ་ཐམས་ཅད་བསྙེན་དུས་ཀྱི་སྐབས་ཉིད་ལ་འདོན་པ་སྤོ་བ་ཡིན་ལ། འོན་ཀྱང་འདི་ཉིད་ལ་ཐུན་མོང་མ་ཡིན་པའི་ལས་ཚོགས་རྣམས་ནི་མང་དུ་ཡོད་དོ། །འབུམ་ཕྲག་གསུམ་པའི་མན་ངག་ནི། །ཀུན༵་དུ་གབ་ཅིང་རབ་དག༵འ་བ། །ཀླུ་སྒྲུབ་ཀྱིས་མཛད་གཞུང་གི་དོན། །ཡང་སྙིང༵་ཁྱད་པར་གསལ་པོ༵ར་བརྗོད། །ཞལ་བཞི་གདོང་བརྙན་ཅན་གྱི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
ཤ་ཟ་ཅེ་སྤྱང་གདོང་གི་སྒྲུབ་ཐབས།
ཨོཾ་སྭཱ་སྟི། བླ་མ་ཡི་དམ་མགོན་པོ་ལ། །བཏུད་ནས་གསང་བའི་ལས་མགོན་ནི། །སྟོབས་འཕྲོག་དབང་དང་དབྱེར་མེད་པ། །ཤ་ཟ་དྲག་པོའི་སྒྲུབ་ཐབས་བཤད། །ཡི་དམ་དང་མགོན་ཆེན་གང་རུང་ཞིག་གི་བསྙེན་པ་སོང་བས་མདུན་དུ་གྲི་ཁྲག་གིས་མཎྜལ་ཚོམ་བུ་ཅན་རྟེན་གཏོར་མཆོད་གཏོར་དང་བཅས་པ་བཤམ། ཡི་དམ་མམ་མགོན་པོ་གང་རུང་གི་བདག་བསྐྱེད་སྔོན་དུ་འགྲོ་བས། མདུན་བསྐྱེད་བསངས་སྦྱངས། སྐད་ཅིག་གིས་ཤ་ཟ་
ཅེ་སྤྱང་གདོང་སྐུ་མདོག་དམར་ནག་མི་བཟད་པའི་མཆེ་བ་གཙིགས་ཤིང༌། སྤྱན་གསུམ་ལས་མེ་སྟག་འཕྲོ་བ། རལ་པ་ཁམ་ནག་གྱེན་དུ་འབར་ཞིང༌། ལྟོ་བ་འཕྱང་ལ་ལྷུ་ཚིགས་ཐུང་བ། ཕྱག་གཡས་གྲི་གུག་འཕྱར་ཞིང༌། གཡོན་སྲིན་པོའི་ཐོད་པ་མིའི་ཁྲག་གིས་གང་བ་ཐུགས་ཀར་བསྣམས་ནས་ཞལ་དུ་རྔུབ་པ། ཞབས་གཡས་གྱེན་དུ་བསྐྱོད་ཅིང༌། གཡོན་ཐུར་དུ་བརྡབས་པས་ཉམས་པའི་བཾ་ཆེན་མགོ་བོ་ལྟབ་སྟེ་བརྫིས་པ། སྟག་ལྤགས་ཀྱི་ཤམ་ཐབས་དང༌། སྦྲུལ་གྱི་ཆུན་པོ་དང་རྒྱུ་མའི་ག་ཞ་ཅན། བ་སྤུའི་བུ་ག་ནས་ཤ་ཟ་དང་ཅེ་སྤྱང་གི་ཚོགས་སྤྲོ་བ། མེ་རླུང་འཚུབ་མའི་དབུས་ན་བཞུགས་པའོ། །དུར་ཁྲོད་ཆེན་པོའི་གནས་བརྒྱད་ནས་སྤྱན་དྲངས་ལ་བསྟིམ། རྡོ་རྗེ་རྩེ་ལྔ་པས་དབུ་བརྒྱན། གནས་གསུམ་བྱིན་གྱིས་བརླབས། བཟླས་པའི་དམིགས་པ་གསལ་བཏབ་ལ། ཨོཾ་མཧཱ་ཀ་ལ་བི་ཀ་ལ་ཧ་རི་ཧཱུཾ་ཕཊ། ཅེས་ཅུང་ཟད་ཅིག་བཟླས་ལ། ཨརྒྷཾ་ནས་ཤཔྟའི་བར་གྱིས་མཆོད། ཧཱུཾ། མགོ་མེད་གར་དང་ཤ་འཚོལ་ཅེ་སྤྱང་སྒྲ་སྒྲོག་པ། །འཇིགས་པའི་རོ་ལངས་ཐོད་པ་འཁྲུགས་བྱེད་པ། །འཁོར་བཅས་དུར་ཁྲོད་གནས་ན་གར་མཛད་གང་ཡིན་པ། །ཤ་ཟ་ཅེ་སྤྱང་གདོང་ཅན་ཁྱོད་ལ་བསྟོད། །དམ་ལ་བཞག་པ་མནའ་ཆུ་བླུད་པ། དམ་ཚིག་གི་རྡོ་རྗེ་བཞག་པ། མཆོད་པ་བསྟབ་པ་
རྣམས་གྲི་གུག་ལྷ་དགུ་བཞིན་བྱ། དེ་ནས་གོང་གི་སྙིང་པོ་ཅི་འགྲུབ་ཏུ་བཟླས་ཤིང༌། ལས་སྦྱོར་གྱི་སྔགས་ཀྱང་སྤྲོ་ན་ཅི་རིགས་པར་བཟླའོ། །གཏོར་མ་སྤྱི་དང་མཐུན་པར་བྱིན་གྱིས་བརླབས། དགྲ་བགེགས་ཀྱི་ཤ་ཁྲག་ཏུ་དམིགས་ལ། སྙིང་པོའི་མཐར། ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། བཏགས་པས་འབུལ། མཆོད་བསྟོད་འདོད་དོན་གསོལ་བཏབ་བྱ། འདིའི་བཀའ་གཏད་ནི། སློབ་མ་མགོན་པོའི་བསྙེན་པ་སོང་བ་ཡིན་ན། མགོན་པོའི་སྐུའི་རྗེས་གནང་ཡན་ཆད་བྱས་ལ། གཏོར་མ་ལག་ཏུ་གཏད་དེ་བཀའ་སྡོད་ཀྱི་སྒོ་ནས་བཀའ་བསྒོ་བྱ། དེ་རྗེས་བཟླས་ལུང་སྦྱིན་ནོ། །མགོན་བསྙེན་མ་སོང་ན། རྗེས་གནང་གི་སྔོན་འགྲོ་རྣམས་སོང་བའི་རྗེས་སུ་གཏོར་དབང་སྤྱི་དང་མཐུན་པར་བསྐུར་ནས་བཟླས་ལུང་སྟེར་བ་ཡིན་ནོ། །མགོན་པོ་ཡང་གྲི་གུགགུར་ཕྱག་བཞི་དྲུག་རྣམས་གང་ལ་བརྟེན་ཀྱང་འདྲའོ། །རྭ་གཉན་གཉིས་ཀའི་གདམས་པར་ཡང་། །ཀུན༵་དུ་གྲགས་ཤིང་རབ་དག༵འ་བ། །དྲགས་སྔགས་རྣོ་མྱུར་ཚིག་ཤུར་གྱི། །བཀའ་གཏད་སྙིང༵་པོ༵འི་ཡི་གེའོ། །ཤ་ཟ་ཅེ་སྤྱང་གདོང་གི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། སྒྲུབ་ཐབས་རིན་ཆེན་འབྱུང་གནས་ལས། སྔ་མ་ལས་འཕྲོས་པའི་སྒྲུབ་ཐབས་བཤད་པའི་སྐབས་ཏེ་ཉེར་གཅིག་པའོ།། །།མངྒ་ལཾ། །