སྤོས་བཟོ།
སྤོས་ནི་སྦྱོར་བྱུང་གི་དྲི་རྫས་ཤིག་སྟེ། མཆོད་རྫས་དང་། གྲིབ་སྦྱངས། འཕྲོད་བསྟེན་སོགས་ལ་མཁོ་བ་ཞིག་ཡིན། སྦྱོར་སྤོས་ཀྱི་མན་ངག་འདི། གསང་སྔགས་བླ་མེད་ཀྱི་རྒྱུད་དུས་འཁོར་དང་། གསང་འདུས་སོགས་ལས་བསྟན་པའི་བཟོ་རིག་གི་གྲུབ་ཆ་ཞིག་ཡིན། སྤོས་སྦྱོར་བྱེད་སྟངས་ལ། དུས་འཁོར་གྱི་རྒྱུད་ལས་བཤད་པའི་ལྔ་སྦྱོར་བཅུ་གཉིས་དང་། དཔལ་གསང་བ་འདུས་པའི་རྒྱུད་ནས་གསུངས་པའི་ཕྱག་ལེན། མགོན་པོ་ཀླུ་སྒྲུབ་ནས་བརྒྱུད་པ་རིན་སྤུངས་པའི་ལྔ་སྦྱོར་བརྒྱད་པ། པཎ་ཆེན་ལུགས་ལ་ལྔ་སྦྱོར་ཚ་སྦྱོར་གཉིས། ཁ་ཆེའི་པཎ་ཆེན་ཤཱཀྱ་ཤྲྀས་ལུགས་ཀྱི་ཉུང་སྦྱོར། ཨ་ཏི་ཤའི་ལུགས་ཀྱི་སྤོས་སྦྱོར་བྱ་ཚུལ། ཟུར་མཁར་སྤོས་སྦྱོར་དང་། རྒྱ་ནག་ལུགས་ཀྱི་སྤོས་སྦྱོར་བྱ་ཚུལ། གཞན་ཡང་། གཏོར་མའི་སྤོས་སྦྱོར་སྣ་ཚོགས། གདོན་བགེགས་འདུལ་བའི་སྤོས་སྦྱོར། ཆོས་སྐྱོང་སོ་སོའི་མཐུན་རྫས་ཀྱི་སྤོས་སྦྱོར་སོགས་མང་ངོ་། །
འདིར་སྤོས་སྦྱོར་སྤྱིའི་ལག་ལེན་ཞིག་བཤད་ན། སྦྱོར་རྫས་ལ། ན་གི་ཙན་དན་ཨ་ཀ་རུ། །ཀ་ར་གླ་རྩི་ལྔ་སྦྱོར་བྱ། །ན་གི་གླ་རྩི་ཛཱ་ཏི་དང་། །ཨ་ག་རུ་ཡིས་བཞི་སྦྱོར་བྱ། །ན་གི་ཀ་ར་གླ་རྩི་དང་། །བ་ལུ་སྤང་སྤོས་གླ་རྩི་སྦྱར། །ཕུར་མོང་བ་ལི་སྨན་སེ་སྦྱར། །སྤུ་ནག་ཏང་ཀུན་བུ་རམ་སྦྱར། །ཤིང་ཚ་ཅི་གང་གླ་རྩི་སྦྱར། །སུག་སྨེལ་གླ་རྩི་བ་རུ་ར། །འདི་སྐད་གང་ཡང་དྲི་མངར་ལྡན། །ཞེས་པ་སོགས་སྦྱོར་རྫས་ཚགས་སུ་ཆུད་པར་བྱས་ནས། དེ་དག་བསྲེས་ཏེ་རྡོ་གཞོང་དུ་འདམ་འཐག་གིས་འདྲེས་ངེས་བྱ། དེ་ནས་ཆང་བཟང་གིས་གར་སླ། ཟན་སླ་ཤོས་ཙམ་དུ་བྱས་ནས་ནམ་ཟླ་དང་བསྟུན་པའི་ཆང་དྲོད་ཀྱིས་ཆང་ཡན་མ་ལོངས་ཙམ་བསྙལ། ཡང་ན། ཤིང་མཁྲེགས་ཀྱི་གཞོང་བ་ལྟ་བུའི་ཁོད་སྙོམས་པོར་ཕྲ་སྦོམ་གང་དགོས་ཀྱི་རེང་བུའི་ལམ་ལྕགས་བསྲེག་གིས་མང་དུ་ཕུག སྤོས་ཟན་ཁོད་སྙོམས་པོར་བཞག སྤོས་ཟན་སྟེང་ནས་གཞོང་བའི་སྟེང་རྒྱ་དང་མཉམ་པའི་པང་ལེབ་ཀྱིས་བཀབ། དེའི་སྟེང་ཀ་བ་བཙུགས་པ་ལ་ཁང་བའི་འཇའ་ཁེབས་ཀྱིས་མནན་པས། སྤོས་མིག་ནས་རེང་བུ་ཐམས་ཅད་དུས་གཅིག་བར་མ་ཆད་པར་པང་ལེབ་ཀྱིས་བསུས་ལ་བླངས། དུས་གཅིག་སྔོན་མ་གཅིག ཐིག་རྒྱུད་དུ་བཞག་པ་ལ་བཅར་ནས་ཐམས་ཅད་བཤིགས་ལ་བསིལ་སྐེམ་བྱེད། དེ་མི་འབྱོར་ན་མར་ཐག་ལྟར་དྲངས་ཏེ། བྲེ་བར་སོར་གང་ལས་མི་སྲབ་པ་ར་རྩེ་ལས་བྱས་པ་ཁ་ནས་ཕྱིར་བཏང་ལ་སྤྲད་པས་འཐེན་ཆོག སྟེང་དུ་ལྡིང་བའི་ཡོ་འཁྱོག་མི་འོང་བའི་ཕྱིར་དར་སྲབ་མོས་ཅུང་བསྡམས་ལ་སྐེམ་མོ། །དེ་ཡང་། ཁ་དོག་དམར་བོ་ཙན་དན་ནམ་ཚ་ལ་སྤངས་པའི་རྒྱ་ཚོས། སེར་བོ་གུར་ཀུམ་སོགས་ཀྱིས་གང་འདོད་སྤྲས་ཆོག་གོ །
ཡང་ཤུག་པའི་སྡོང་རྒན་དང་། ནཱ་གི གུར་ཀུམ། གུ་གུལ། སིཧ་ལ། གླ་རྩི། གུར་གུམ་འདུལ་སྦྱོངས་བྱ་སྟངས། གླ་རྩིས་ཀླུ་ལ་གནོད་པས་དུག་འདོན་སྟངས། བསྲེ་འདུལ་དང་འདམ་འཐག་བྱ་ཚུལ། སྤོས་སྨན་གྱི་ཚད་འཇལ། ཆང་གིས་སྙལ་སྟངས་སོགས་འཇུ་མི་ཕམ་གྱི་བཟོ་རིག་ཉེར་མཁོའི་ཟ་མ་ཏོག་དང་། དེའུ་དམར་གྱི་བཟོ་རིག་ལས་ཚོགས་པྲ་ཕབ་འོད་ཀྱི་སྣང་བརྙན་ལས་ཞིབ་ཏུ་འཁོད་ཡོད་དོ། །
ཡང་། གདོན་སེལ་གྱི་སྤོས་སྦྱོར་ཞིག་ལ། རིག་པ་མཆོག་གི་རྒྱུད་ལས། ལོ་སོ་གཉིས་ལོན་པའི་མར་ཕུལ་བཞི། སྦྲང་ཕུལ་བཞི། བ་ལང་ཀོ་བ་བསྲེག་པ་ཡི། །ཕྱེ་མ་དག་ཀྱང་ཕུལ་བཞི་སྟེ། །སྒོག་སྐྱ་བརྒྱ་དང་ཨ་རུ་སྲང་སུམ་ཅུ། །ཚ་བ་གསུམ་ནི་ཉིས་འགྱུར་སྲང་དྲུག་ཅུ། །ཞིབ་བཏགས་སྨན་མར་བྱས་པའི་མར་དེས་ནི། །མི་ཡི་འཇིག་རྟེན་འདིར་གནས་གདོན་ཀུན་འཇོམས། །ཉེས་གསུམ་ཀུན་དང་ཁྱད་པར་འདུས་གདོན་སེལ། །རྡོ་རྗེ་ལྷ་ཡི་མར་ཞེས་བྱ་བ་སྟེ། །དེའི་མིང་དྲན་ཀྱང་གདོན་གྱིས་གླགས་མི་རྙེད། །ཁོང་དུ་འཐུང་དང་སྣ་རུ་བླུག་གྱུར་ན། །གདོན་ཀུན་ཞི་བྱེད་འཇིགས་བྱེད་གཏོང་བར་བྱེད། །ཅེས་གསུངས་སོ། །
སྤོས་ཕུལ་བའི་ཕན་ཡོན་ནི། ལས་རྣམ་པར་འབྱེད་པའི་མདོ་ལས། སྤོས་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་སྤོས་ལྟ་བུར་འགྱུར་བ་དང་། སྣའི་དབང་བོ་རྣམ་པར་དག་པར་འགྱུར་བ་དང་། ལུས་ཀྱི་དྲི་མི་ཞིམ་པ་རྣམ་པར་དག་པར་འགྱུར་བ་དང་། རྟག་ཏུ་དྲི་ཞིམ་པར་འགྱུར་བ་དང་། གཟུགས་བཟང་བར་འགྱུར་བ་དང་། འཇིག་རྟེན་གྱི་མདུན་དུ་འགྲོ་བར་བྱ་བར་འགྱུར་བ་དང་། སྡུག་པའི་ཆོས་རྣམས་ཐོབ་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་སྤོས་ཕུལ་བའི་ཕན་ཡོན་ནོ། །