བཀྲ་ཤིས་རྫས་བརྒྱད།
འདུལ་བ་དང་མདོ་དྲན་ཉེ་སོགས་ལས། བཀྲ་ཤིས་རྫས་བརྒྱད་ཀྱི་དོན་འདི་ལྟར་གསུངས་སྟེ། སྔོན་ལྷ་དང་ལྷ་མིན་འཐབ་པའི་ཚེ་ན། བཀྲ་ཤིས་ཀྱི་ལྷ་མོ་རྣམས་ཀྱིས་ལྷའི་དབང་བོར་ཕུལ་བས། བཀྲ་ཤིས་པ་བྱུང་ཞིང་། དེ་བཞིན་སྟོན་པ་ལ་ཕུལ་བས་ཀྱང་། རང་གཞན་ཀུན་ལ་བཀྲ་ཤིས་ཀྱི་མཚན་མ་བྱུང་བས། སྟོན་པས་གདུལ་བྱ་རྣམས་ལ་ཡང་། བཀྲ་ཤིས་ཀྱི་རྫས་སུ་བྱིན་གྱིས་བརླབས། མདོར་ན། བཀྲ་ཤིས་ཆེན་པོའི་མདོ་ལས། སྔར་བྱས་པ་ཡི་བསོད་ནམས་ཀྱིས། །མཐུན་པའི་ཡུལ་དུ་གནས་པ་དང་། །བདག་ཉིད་མཆོག་གིས་སྨོན་ལམ་བྱ། །འདི་ནི་མཆོག་གི་བཀྲ་ཤིས་སོ། །ཞེས་དང་། མཚན་བརྗོད་ལས། ཆོས་ཤིས་བཀྲ་ཤིས་བཀྲ་ཤིས་འབྱུང་། །བཀྲ་ཤིས་ཀུན་གྱིས་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ ། ཞེས་པ་ལྟར།
དང་བོ་མེ་ལོང་ནི། གཟུགས་ཀྱི་ལྷ་མོ་འོད་འཆང་མའི་སྟོན་པ་ལ་མེ་ལོང་ཕུལ་བས། བཅོམ་ལྡན་འདས་ཀྱིས་དེ་སྒྲིབ་གཉིས་བྲལ་ཞིང་། རྣམ་དག་ཆོས་ལ་ལོངས་སྤྱོད་པའི་བཀྲ་ཤིས་ཀྱི་རྫས་སུ་བྱིན་གྱིས་བརླབས་པ་དང་། གཉིས་པ་གི་ཝང་ནི། གླང་བོ་ཆེ་ནོར་སྐྱོང་གིས་སྟོན་པ་གི་ཝང་ཕུལ་བས། ཉོན་མོངས་པའི་ནད་སེལ་བར་དང་། གསུམ་པ་ཞོ་ནི། ཁྱིམ་བདག་བཟང་སྐྱོང་དང་། ཡང་ན། ཞིང་བའི་བུ་མོ་ལེགས་སྐྱེས་མས་ཞོ་ཕུལ་བས། དུག་གསུམ་ཞི་ཞིང་སྙིང་བོ་རྣམ་དག་མཆོག་རྟོགས་པར་འགྱུར་བ་དང་། བཞི་བ་རྩྭ་དུར་བ་ནི། བྲམ་ཟེ་ཀུན་རྡ་ལི་དང་། རྩྭ་འཚོང་གི་ཁྱེའུ་བཀྲ་ཤིས་ཀྱིས་རྩྭ་དུརྦ་ཕུལ་བས། སྐྱེ་འཆི་རྒས་རྒུད་མེད་པའི་སྐུ་འཐོབ་པ་དང་། ལྔ་བ་ཤིང་བིལ་བ་ནི། ཤིང་གི་ལྷ་མོ་འམ་ཚངས་པས་ཤིང་བུལ་བ་ཕུལ་བས། རྟེན་འབྲེལ་བཅུ་གཉིས་ལུགས་ལྡོག་ཏུ་དག་ནས། མྱང་འདས་སངས་རྒྱས་ཀྱི་གོ་འཕང་མངོན་དུ་གྱུར་བ་དང་། དྲུག་པ་དུང་དཀར་ནི། ལྷའི་དབང་བོ་བརྒྱ་བྱིན་གྱིས་དུང་དཀར་གཡས་འཁྱིལ་ཕུལ་བས། ཐེག་གསུམ་ཆོས་འཁོར་མ་ནོར་བར་སྒྲོགས་ནུས་པ་དང་། བདུན་པ་ལི་ཁྲི་ནི། སའི་ལྷ་མོ་བརྟན་མ་འམ་བྲམ་ཟེ་སྐར་རྒྱལ་གྱིས་ལི་ཁྲི་ཕུལ་བས། ཁམས་གསུམ་དབང་དུ་བསྡུས་ཏེ། ཆོས་ཀྱི་རྒྱལ་སྲིད་ཆེན་པོ་ལ་དབང་བསྒྱུར་བ་དང་། བརྒྱད་པ་ཡུངས་དཀར་ནི། ཕྱག་ན་རྡོ་རྗེས་ཡུངས་དཀར་ཕུལ་བས། བདུད་བགེགས་འཇོམས་ཤིང་གཡུལ་ལས་རྒྱལ་བའི་མཐུ་སྟོབས་ཕུན་སུམ་ཚོགས་པ་མཚོན་པ་ཡིན།
མདོར་ན། མི་མཐུན་མཐའ་དག་ཞི་ཞིང་། ལས་བཞི་འགྲུབ་པའི་བཀྲ་ཤིས་རྟེན་འབྲེལ་གྱི་རྫས་མཆོག་བརྒྱད་ཅེས་རི་མོ་བཀོད་དེ་བཤམས་སྲོལ་ཡོད་དོ། །