རྒྱལ་སྲིད་སྣ་བདུན།
རྒྱལ་སྲིད་སྣ་བདུན་ནི། འཇིག་རྟེན་གྱི་ཁམས་འདིར་འཁོར་བསྒྱུར་བྱོན་པའི་ཚེ། ནང་གི་བསོད་ནམས་ཀྱི་མཐུ་སྟོབས་ལས་འབྱུང་ཞིང་། དེ་ལ་བརྟེན་ནས་རྒྱལ་ཕྲན་གཞན་རྣམས་མངའ་ཁོངས་སུ་སྡུད་ནུས་པས། རྒྱལ་སྲིད་སྣ་བདུན་ཞེས་བྱ་ལ། དང་བོ་འཁོར་ལོ་རིན་པོ་ཆེ་ནི། འཛམ་བུ་ཆུ་བོའི་གསེར་ལས་ལེགས་བྱས་ཤིང་། །རྩིབས་སྟོང་ལྡན་པའི་དཔག་ཚད་ལྔ་བརྒྱ་བ། །ཉི་མ་གཉིས་པ་ལྟ་བུར་མཁར་འཕགས་ཏེ། །དཔག་ཚད་འབུམ་ལམ་ཉི་མ་གཅིག་གིས་གཅོད། །དེའི་མཐུས་ནམ་མཁའི་ལམ་ནས་དཔུང་ཚོགས་བཞི། །གླིང་བཞི་ལྷ་གནས་དང་བོར་བགྲོད་བྱེད་པའི། །འཁོར་ལོ་རིན་ཆེན་ཕུལ་བས་འགྲོ་བ་ཀུན། །ཆོས་ཀྱི་སྲིད་ལ་དབང་བསྒྱུར་འཐོབ་པར་ཤོག །ཅེས་གསུངས་པ་ལྟར། །འཁོར་སྒྱུར་གྱི་རྒྱལ་བོའི་བསོད་ནམས་ཀྱི་སྟོབས་ལས་གྲུབ་པའི་གསེར་གྱི་རྩིབས་མ་སྟོང་ལྡན། རྒྱ་དཔག་ཚད་ལྔ་བརྒྱ་ཡོད་པ། ནམ་མཁར་འཕགས་ཚེ། སྡང་དགྲ་ཀུན་ལས་རྒྱལ་ཞིང་། ཐམས་ཅད་དབང་དུ་བསྡུ་བར་གྲགས་པས། བགྲོད་བྱེད་དང་མཚོན་ཆ་གཅིག་ཡིན་ནོ། །
གཉིས་པ་ནོར་བུ་རིན་པོ་ཆེ་ནི། རིན་ཆེན་བཻཌཱུརྱ་ཡི་ཟུར་བརྒྱད་ལས། །སྤྲོས་པའི་འོད་ཀྱིས་དཔག་ཚད་བརྒྱ་ཡི་བར། །མཚན་མོ་འང་ཉིན་མོ་བཞིན་དུ་སྣང་བྱེད་ཅིང་། །ཚ་བས་བདུངས་ཚེ་འོད་ཀྱིས་བསིལ་བ་སྟེར། །དེར་ནི་དུས་མིན་འཆི་དང་ནད་རྣམས་སེལ། །ཡིད་ལ་གང་བསམ་ཕལ་ཆེར་འབྱུང་འགྱུར་བའི། །ནོར་བུ་རིན་ཆེན་ཕུལ་བས་འགྲོ་ཀུན་གྱི། །ཆོས་ལྡན་རེ་བ་ཡིད་བཞིན་འགྲུབ་པར་ཤོག །ཅེས་གསུངས་པ་ལྟར། བཻཌཱུརྱ་ལས་གྲུབ་པའི་ནོར་བུ་རིན་པོ་ཆེ་མཐོན་མཐིང་དྲི་མེད་འོད་ཀྱིས་དཔག་ཚད་བརྒྱད་ཅུ་སྣང་བར་བྱེད་ནུས་ཤིང་། གླིང་བཞིའི་འགྲོ་བ་དབུལ་ཕོངས་སེལ་ཞིང་། ནད་དང་དུས་མིན་འཆི་བ་སོགས་མི་འབྱུང་ལ། གང་བསམ་ཡིད་བཞིན་དུ་འགྲུབ་པ་ཞིག་གོ །
གསུམ་པ་བཙུན་མོ་རིན་ཆེན་ནི། ཡིད་འོང་ལྟ་ན་སྡུག་པའི་བུད་མེད་ནི། །ལུས་དང་ཁ་ནས་དྲི་ཞིམ་རབ་ཏུ་འབྱུང་། །གང་གིས་རེག་ན་བདེ་བའི་མཆོག་སྟེར་ཞིང་། །གླིང་དེར་བཀྲེས་སྐོམ་མྱ་ངན་སེལ་བར་བྱེད། །བུད་མེད་སྐྱོན་ལྔ་སྤངས་ཤིང་ཡོན་ཏན་ནི། །རྣམ་པ་བརྒྱད་དང་རབ་ཏུ་ལྡན་གྱུར་བའི། །བཙུན་མོ་རིན་ཆེན་ཕུལ་བའི་འགྲོ་བ་ཀུན། །ཟག་མེད་བདེ་བ་ཆེ་ལ་སྤྱོད་པར་ཤོག །ཅེས་གསུངས་པ་ལྟར། རྒྱལ་རིགས་སུ་སྐྱེས་པའི་བུད་མེད་གཟུགས་ལང་ཚོ་ལྟ་ན་སྡུག་ཅིང་། རིག་པ་དྭངས་ལ་ངག་འཇམ་པ། ཁ་ནས་ཨུཏྤལ་གྱི་དྲི་འཐུལ་བ། བུད་མེད་ཀྱི་སྐྱོན་སྤངས་ཤིང་ཡོན་ཏན་བརྒྱད་དང་ལྡན་པ། སྒྱུ་རྩལ་ལ་མཁས་ཞིང་། མཐོང་བ་ཙམ་གྱིས་ཡིད་འཕྲོག་པར་བྱེད་པའོ། །
བཞི་བ་བློན་པོ་རིན་ཆེན་ནི། གཞན་ལ་མི་འཚེ་ཆོས་མ་ཡིན་པ་སྤངས། །ཡང་དག་ཐ་སྙད་ལས་ལ་སྐྱོ་བ་མེད། །ས་ཡི་བདག་པོའི་ཡིད་ལ་བསམ་པ་རྣམས། །མ་སྨྲས་པར་ཡང་ཤེས་ནས་སྒྲུབ་པར་བྱེད། །དཔུང་རྣམས་འགྲོ་དང་གནས་དང་ལྡོག་པ་ཡིས། །བྱ་བ་ཀུན་ལ་རབ་ཏུ་མཁས་གྱུར་བའི། །བློན་པོ་རིན་ཆེན་ཕུལ་བས་འགྲོ་བ་ཀུན། །རྒྱལ་བའི་དགོངས་པ་ཇི་བཞིན་སྐོང་བར་ཤོག །ཅེས་གསུངས་པ་ལྟར། བློན་པོ་རིན་ཆེན་ནི། ལོངས་སྤྱོད་ཀྱི་འབྱོར་བ་ཕུན་སུམ་ཚོགས་པ། གཞན་ལ་མི་འཚེ་ཞིང་། ཆོས་བཞིན་སྤྱོད་ལ། འཁོར་བསྒྱུར་གྱིས་ཇི་ལྟར་བགོ་བ་བཞིན། སྐད་ཅིག་ལ་སྒྲུབ་ནུས་ཤིང་། གཏོང་ཕོད་ཆེ་ལ། དམག་དཔུང་གི་ཁ་ལོར་བསྒྱུར་བ་ལ་མཁས་པ་ཞིག་གོ།
ལྔ་བ་གླང་བོ་རིན་ཆེན་ནི། ཡན་ལག་བརྒྱད་ལྡན་གངས་ཀྱི་རི་བོ་འདྲ། །རང་བཞིན་གླང་བོ་སྟོང་གི་སྟོབས་དང་ལྡན། །ཉི་མ་གཅིག་ལ་འཛམ་གླིང་ལན་གསུམ་བསྐོར། །ཅང་ཤེས་སྐུད་པ་ཡིས་ཀྱང་དཀྲི་བར་ནུས། །གཞན་ལ་མི་གནོད་མི་འཁྲུག་དལ་གྱིས་འགྲོ། །ཕ་རོལ་སྡེ་ལས་རྒྱལ་བར་བྱེད་པ་ཡི། །གླང་བོ་རིན་ཆེན་ཕུལ་བས་འགྲོ་བ་ཀུན། །ཐེག་པ་མཆོག་གི་བཞོན་པས་བགྲོད་པར་ཤོག །ཅེས་གསུངས་པ་ལྟར། གླང་ཆེན་ཐད་ཀར་མཆེ་བ་དྲུག་དང་ལྡན་པ། སྤྱི་གཙུག་དམར་ཞིང་དཔང་མཐོ་བ། གླང་བོ་སྟོང་གི་སྟོབས་མངའ་བ། གཡུལ་ལས་རྒྱལ་ཞིང་ཤིན་ཏུ་མགྱོགས་པ་ཞིག་གོ །
དྲུག་པ་རྟ་མཆོག་རིན་ཆེན་ནི། མེ་ཏོག་ཀུ་མུད་ད་བཞིན་རབ་ཏུ་དཀར། །ལྷ་ཡི་གཙུག་རྒྱན་ནོར་བུ་སོགས་ཀྱིས་བརྒྱན། །མདོག་དང་དབྱིབས་དང་བོངས་ཚོད་ཕུན་སུམ་ཚོགས། །བསྒོ་ན་ཉིན་གཅིག་འཛམ་གླིང་ལན་གསུམ་བསྐོར། །ལུས་ལ་ནད་མེད་གཟི་བརྗིད་ཆེན་པོ་ཅན། །ཡོངས་སུ་ངལ་བ་མེད་པའི་བཞོན་པ་ནི། །རྟ་མཆོག་རིན་ཆེན་ཕུལ་བས་འགྲོ་བ་ཀུན། །རྫུ་འཕྲུལ་མཆོག་གི་ཤུགས་དང་ལྡན་པར་ཤོག །ཅེས་གསུངས་པ་ལྟར། རྟ་མཆོག་རིན་ཆེན་ནི། མདོག་སྔོ་ལ་སྤུ་སྡུག་རྨ་བྱའི་མགྲིན་འདྲ་བ། ནད་མེད་འཚེར་སྐད་ཀྱིས་འཛམ་གླིང་ཁྱབ་པ། བདག་པོའི་ཐུགས་ལ་གང་ཤར་རྟོགས་པ། ཉིན་གཅིག་ལ་འཛམ་གླིང་བསྐོར་ནུས་པ་ཞིག་གོ །
བདུན་པ་ཁྱིམ་བདག་རིན་ཆེན་ནི། རྡོ་རྗེ་རིན་ཆེན་མཐོན་ཀ་མརྒད་དང་། །གསེར་དང་དངུལ་དང་སྦུག་ལ་སོགས་པ་ནི། །ཟད་པ་མེད་པས་ས་ཕྱོགས་རབ་འགེངས་པ། །དེ་ཡི་འབྱོར་བ་ཤིན་ཏུ་བརྟན་པ་སྟེ། །གཡོ་དང་སྒྱུ་མེད་གཞན་ལ་གནོད་པ་མེད། །སྐྱེ་བོ་ཐམས་ཅད་རབ་ཏུ་དགའ་འགྱུར་བའི། །ཁྱིམ་བདག་རིན་ཆེན་ཕུལ་བས་འགྲོ་བ་ཀུན། །གསུང་རབ་རིན་ཆེན་མཛོད་ཀུན་འཛིན་པར་ཤོག །གསུངས་པ་ལྟར། གསེར་དངུལ་སོགས་རིན་ཆེན་ཟད་མཐའ་མེད་ཅིང། གཡོ་སྒྱུ་བྲལ་ཞིང་། གཞན་ལ་འཚེ་བ་མེད་པ། སྐྱེ་བོ་ཀུན་དེ་ལ་དགའ་བར་འགྱུར་བ་ཞིག་གོ །
གོང་གསལ་རྒྱལ་སྲིད་སྣ་བདུན་འདི་མཆོད་རྫས་ཕུན་སུམ་ཚོགས་པ་ཞིག་ཡིན་པར་མ་ཟད། རྒྱུན་སྤྱོད་ཀྱི་ཅ་ལག་སྣ་ཚོགས་དང་། ཐང་ག མཆོད་སྒྲོམ་སོགས་སུ་འང་འབྲིའོ། །
མཚོན་དོན་ནི། འཁོར་ལོས་བརྩོན་འགྲུས་ཅན་རྣམས་མཁས་པའི་གོ་འཕང་བསྟོད་པ། ནོར་བུས་ཤེས་བྱའི་ཕོངས་པའི་སྐྱེ་བོ་ཡོན་ཏན་གྱི་ལོངས་སྤྱོད་སྩོལ་བ། བློན་པོས་རྒྱལ་སྲིད་འཛིན་པ། གླང་བོས་ཤེས་བྱའི་བང་མཛོད་སྲུང་བའི་གཉེན་པོ། ཁྱིམ་བདག་གིས་ཉམ་ཐག་ལ་ཡོན་ཏན་གྱི་གཏེར་སྦྱིན་པ། རྟ་མཆོག་གིས་ཤེས་བྱར་བརྩོན་འགྲུས་དབང་སྒྱུར་ལྷོད་མེད་དུ་སྐུལ་བ། བཙུན་མོས་དུག་གསུམ་གྱི་རྟིང་མནོན་ལ་ཐབས་ཤེས་ཟུང་དུ་སྦྲེལ་དགོས་པ་མཚོན་ནོ། །དེ་དག་མཆོད་པའི་དགོས་པ་ཡང་དངོས་གྲུབ་ཅི་འདོད་དུ་སྩོལ་བ་ཡིན་ཏེ། ཞིང་འདི་རིན་ཆེན་སྣ་བདུན་གྱི། །མཁས་པ་དག་གིས་ཡོངས་བཀང་སྟེ། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེར་ཤེས་རབ་ཅན་གྱིས་དབུལ། །ཞེས་གསུངས་སོ། །