མཐུན་པ་སྤུན་བཞི།
སྔོན་ཡུལ་ཀ་ཤིའི་ནགས་ཚལ་སྟུག་པོ་ན་སྲེག་པ་དང་རི་བོང་། སྤྲེའུ་དང་གླང་ཆེན་བཅས་པའི་ཡིད་གཅུགས་པས་ལྷན་དུ་འཚོའོ། །ནམ་ཞིག་ཁོ་བོ་ཅག་རྒན་རབས་བཀུར་བར་གྲོས་མཐུན་བྱུང་སྟེ། བྱ་གོང་མ་སྲེག་པས། ཤིང་ནྱ་གྲོ་དྷ་ཞིག་བསྟན་ནས། འདི་མཐོང་མཁན་སྔ་ཤོས་དེ་སུ་ཡིན་དྲིས་པས། གླང་ཆེན་གྱིས་ཁོ་རང་ལམ་འདི་བརྒྱུད་དུས་ཤིང་འདི་ཁོའི་ལུས་པོ་དང་མཉམ་པ་མཐོང་ཞེས་དང་། སྤྲེའུས་རང་གི་ལུས་ཚད་དང་མཉམ་པ་དང་བོར་མཐོང་བ་དང་། རི་བོང་གིས་ངས་ཤིང་འདིའི་ལོ་མ་གཉིས་སྐྱེས་པ་ན་ལོ་མའི་ཟིལ་བ་ལྕེས་བལྡགས་པ་ཡིན་ཞེས་བརྗོད་པ་དང་། གོང་མ་སྲེག་པས་ངས་ས་བོན་རྣམས་ཟོས་ནས་ཕྱོཊ་འདིར་སྟུག་པ་བོར་བ་ལས་ཤིང་འདི་སྐྱེས་པར་བརྗོད་པས། རྒན་རབས་ཕྱེས་ཏེ་གླང་ཆེན་ནས་གོང་མ་སྲེག་པའི་བར་རིམ་པར་བསྙེན་བཀུར་བྱས་པར་མ་ཟད། ཞེ་ས་དང་གུས་ཞབས་གཅིག་གིས་མི་ཆོག་པས་དགེ་བ་གཞན་ཡང་བླང་པར་བྱའོ། །ཞེས་སྲོག་གཅོད། མ་བྱིན་པར་ལེན་པ། འདོད་ལོག རྫུན་དང་ཆང་རྣམས་སྤངས་ཏེ་བསླབ་པའི་གཞི་ལྔ་ཞལ་གྱིས་འཆེས་སོ། །གཞན་ཡང་། དེ་རྣམས་བརྟུལ་ཞུགས་ཀྱི་གཞི་ལྔ་ལ་གནས་པའི་ཚེ། སྲེག་པས་སྨྲས་པ། ང་ཚོའི་གཞན་ཡང་བསླབ་པའི་གནས་ལྔ་ལ་འགོད་པར་བྱའོ། །ཞེས་པ་ལྟར། ཐམས་ཅད་གྲོས་མཐུན་བྱུང་སྟེ་སྤྲེའུས་ཁོ་བོས་སྤྲེའུ་ཐམས་ཅད་འགོད་པར་བྱའོ། །ཞེས་དང་། རི་བོང་གིས་རི་བོང་དང་སྤུ་ཅན་ཐམས་ཅད་དང་། གླང་ཆེན་གྱིས་གླང་བོ་ཆེ་དང་། སེང་གེ གུང་དང་། གོང་མ་སྲེག་པས་དེ་ལྟ་ན་ཁྱེད་རྣམས་ཀྱིས་མི་འདུལ་བའི་རྐང་མེད་དང། རྐང་གཉིས། རྐང་བཞི་བ། འདབ་ཆགས་ཐམས་ཅད་བསླབ་པའི་གནས་ལྔ་ལ་ཁོ་བོས་འགོད་པར་བྱའོ་ཞེས། ཡུལ་ཀ་ཤིའི་དུད་འགྲོ་ཀུན་བསླབ་པའི་གནས་ལྔ་ལ་བཀོད་པས། ཡུལ་ཁམས་ཐམས་ཅད་བཀྲ་ཤིས་ཕུན་སུམ་ཚོགས་པའི་རྟག་ཏུ་འཚོ་བས། རྒྱལ་བོའམ་བཙུན་མོ་བློན་པོ། ཁྲོམ་གྱི་མི་སེར། གྲོང་མི་རྣམས་རེ་རེ་ནས་བདག་གི་མཐུ་ཡིན་ནོ་ཞེས་ཞལ་མ་འཆམ་པས། རྒྱལ་བོས་དྲང་སྲོང་མངོན་ཤེས་ལྔ་དང་ལྡན་པ་ཞིག་མཆིས་པ་དེའི་དྲུང་དུ་ཕྱིན་ཏེ་དྲིས་པས། འདི་ཁྱེད་རྣམས་ཀྱི་མཐུ་མ་ཡིན་གྱི། ཀ་ཤིའི་ནགས་ཚལ་ན་འཚོ་བའི་སྲོག་ཆགས་དེ་བཞི་བོའི་མཐུ་ཡིན་པར་བརྗོད་ཚེ། རྒྱལ་བོས་བལྟར་འགྲོ་བར་སྐུལ་བས། དྲང་སྲོང་གིས་བལྟར་ཅི་ཡོད། དེ་དག་གིས་གང་ཁས་བླངས་པའི་གཞི་དེ་ཁྱེད་ཅག་གིས་ཀྱང་ཁས་ལོངས་ཤིག ཅེས་གདམས་པས། རྒྱལ་བོ་དང་བཙུན་མོ་ཡུལ་མི་དང་བཅས་པའི་ཁས་བླངས་པས་ཁམས་ཀྱིས་རྒྱལ་ཕྲན་སོགས་ཀྱིས་ཐོས་ཏེ། འཛམ་བུ་གླིང་གི་སྐྱེ་བོ་ཕལ་ཆེ་བས་བསླབ་པའི་གཞི་ལྔ་ཁས་བླངས་པ་རྣམས། ཚེ་འཕོས་ཏེ་སུམ་ཅུ་རྩ་གསུམ་དུ་སྐྱེས་པས། བརྒྱ་བྱིན་གྱིས་འཁོར་རྒྱས་པ་མཐོང་སྟེ། གུས་བཅས་ཞེ་སར་བཅོས་པ་དང་། །དཀའ་ཐུབ་ཚལ་ན་གནས་པ་ཡི། །གོང་མ་སྲེག་གི་ཚངས་སྤྱོད་པ། །འཇིག་རྟེན་སོ་སོར་རབ་ཏུ་བརྟན། །ཞེས་ཀྱང་སྨྲས་སོ། །འདིའི་ཚུལ་བཅོམ་ལྡན་འདས་ཀྱིས་ཇི་ལྟར་བཀའ་བསྩལ་བ་རྒྱལ་བ་དགེ་འདུན་གྲུབ་ཀྱིས་མཛད་པའི་འདུལ་བའི་ལྒིགས་བམ་ན་རྒྱས་པར་གསལ་ལ། བཅོམ་ལྡན་འདས་ཀྱིས་འཁོར་རྣམས་ལ། དེ་དུས་ཀྱི་བྱ་སྲེག་པ་ནི་ང་ཡིན་ནོ། །རི་བོང་ནི་ཤཱ་རིའི་བུ་དང་སྤྲེའུ་མོ་འགལ་གྱི་བུ། གླང་བོ་ཆེ་ཀུན་དགའ་བོའོ། །དེས་ན་གནས་བརྟན་དང་བར་མ་གསར་བུ་རྣམས་ལ་བཀུར་སྟི་དང་། འཇིགས་པ་དང་བཅས་པར་གནས་པར་བྱའོ། །དེ་ཅིའི་ཕྱིར་ཞེ་ན། བཀུར་སྟི་མེད་པར་ཀུན་ཏུ་སྤྱོད་པའི་ཆོས་མི་རྒྱས། དེ་མ་རྒྱས་པར་སློབ་པའི་ཆོས་མི་རྒྱས། དེ་མ་རྒྱས་པར་རྣམ་གྲོལ་གྱི་ཕུང་བོ་མི་རྒྱས། དེ་མ་རྒྱས་པར་མྱ་ངན་ལས་མི་འདའོ། །ཞེས་བཅོམ་ལྡན་འདས་ཀྱིས་བཀའ་བསྩལ་ཏོ། །ཚུལ་འདི་ལ་དགོངས་ནས་རྡོ་སྦིས་དགེ་བཤེས་ཤེས་རབ་རྒྱ་མཚོ་མཆོག་གིས། ལྔ་འོག་གྲངས་ཀྱི་གནས་འཛིན་རྒྱལ་བའི་སྲས། །ལྔ་ལེན་ཀ་ཤི་ལ་སོགས་འཛམ་གླིང་རྒྱན། །ལྔ་ཕྲག་བསླབ་གཞིར་སྤྱོད་པའི་དགེ་བ་ནི། །ལྔ་བདོ་འདུལ་བྱེད་འདུལ་བ་ལུང་ན་བཞུགས། །ལྔ་ལ་བསེ་རུས་ཁྲི་བའི་མཐུན་པ་བཞིར། །ལྔ་རིག་སྨྲ་བས་བསྔགས་པ་སྙན་ལ་འཇེབས། །ལྔ་བ་འཆི་མེད་ལྷ་ཡི་དབང་བོ་ཀྱང་། །ལྔ་མིན་སེམས་དཔའི་ཆེ་བརྗོད་བགྱིས་པ་མཐོང་། །ཞེས་ཀྱང་གསུངས་སོ། །