སྲིད་པའི་འཁོར་ལོ།
སྲིད་པའི་འཁོར་ལོ་ནི། མཐའ་འཁོབ་སྒྲ་སྒྲོགས་ཀྱི་རྒྱལ་བོ་ཨུ་ཊ་ཡ་ནའི་སྐྱེས་ལན་དུ་ཡུལ་དབུས་ཀྱི་རྒྱལ་བོ་གཟུགས་ཅན་སྙིང་བོས། སྟོན་པའི་བཀའ་བཞིན་སྟོན་པའི་སྐུ་གཟུགས་དང་སྲིད་པའི་འཁོར་ལོ་ཆ་ལྔ་བ་འདི་བསྐུར་བས། དེས་ཀྱང་། དེའི་དོན་བསམ་ནས་འཕགས་པའི་གོ་འཕང་མངོན་དུ་གྱུར་བར་གསུངས་པ་དང་། འདུལ་བ་ལུང་བཅུ་བདུན་ལས། གནས་མལ་གྱི་གཞི་ལས་ཀྱང་། མཆོག་ཟུང་གཉིས་འགྲོ་བ་ལྔ་རྒྱུ་ཞིང་སོ་སོའི་སྡུག་བསྔལ་འཁོར་བཞི་བོར་འདོམས་པ་སྟོན་པས་གཟིགས་ཏེ། རྣམ་ཀུན་དུ་མཆོག་ཟུང་ལྟ་བུ་དག་མི་འབྱུང་པས། སྒོ་ཁང་དུ་འཁོར་བའི་འཁོར་ལོ་ཆ་ལྔ་བའི་ཁོར་ཡུག་ཏུ་རྟེན་འབྲེལ་བཅུ་གཉིས་ལུགས་འབྱུང་དང་ལུགས་ལྡོག་ཀྱང་ཕྲིས་ཤིག་གསུངས་ནས། དེ་ལྟར་བྲིས་པ་གཞན་དག་ལ་ཡང་རྒྱ་ཆེར་སྟོན་དགོས་གསུངས་སོ། །
སྲིད་པའི་འཁོར་ལོ་ཆ་ལྔ་འབྲི་ཚུལ་ནི། འདུལ་བ་ལུང་ལས། སྒོ་ཁང་དུ་འཁོར་བའི་འཁོར་ལོ་ཆ་ལྔ་བར་བྱའོ། །སྟེང་དུ་ལྷ་དང་མི་རྣམས་སོ། །རྫུས་ཏེ་སྐྱེས་པའི་སེམས་ཅན་ཟོ་ཆུན་འཁྱུད་མོ་བཞིན་དུ་འཆི་འཕོ་བ་དང་སྐྱེ་བ་དག་ཀྱང་ངོ་། །ཞེས་གསུངས་པ་ལྟར། འཆི་བདག་གཤིན་རྗེ་འམ་སྲིན་པོ་ཁ་གདངས་པའི་དབུས་སུ། ཟླུམ་པོ་ཆ་ལྔ་བ་ཞིག་སྟེ། སྟེང་གི་དུམ་བུ་གཉིས་ནི་གཅིག་ལྷ་དང་། ཅིག་ཤོས་མི་འབྲི་བ་དང་། འོག་རིམ་ཆ་གསུམ་དུ་བྱས་པ་སྟེ་དམྱལ་བ། ཡི་དྭགས། དུད་འགྲོ་དང་། རི་མོའི་དབུས་སུ་བྱ་ཕག་སྦྲུལ་གསུམ་བྲིས་པ་ནི། བྱ་ཕུག་རོན་གྱིས་འདོད་ཆགས་ཆེ་བ་དང་། སྦྲུལ་གྱིས་ཞེ་སྡང་ཆེ་བ། ཕག་གིས་གཏི་མུག་ཆེ་བ་སྟེ། ཀུན་འཁོར་བར་འཆིང་བྱེད་ཀྱི་གཞི་རྩ་དུག་གསུམ་ཡིན་པས། བཅོམ་ལྡན་འདས་ཀྱིས། དབུས་སུ་འདོད་ཆགས་ཞེ་སྡང་གཏི་མུག་བྱ་ཕུག་རོན་དང་སྦྲུལ་ཕག་གི་རྣམ་པར་རོ། །ཞེས་གསུངས་པའོ། །དེ་ཡང་། གཏི་མུག་མཚོན་བྱེད་ཕག་རྩ་བ་བྱས་ཏེ་གཞན་གཉིས་ཡན་ལག་ལྟ་བུ་སྟེ། འདུལ་བ་ལས། སྔ་མ་དེ་གཉིས་གཏི་མུག་གིས་ཟ་བར་འགྱུར་རོ། །ཞེས་གསུངས་སོ། །དེའི་མཐའ་ལམ་དཀར་ནག་གཉིས་བྲིས་པ་ནི། བདེ་འགྲོ་དང་ངན་འགྲོའི་བར་སྲིད་ལ་དགེ་སྡིག་གི་ལས་དཀར་ནག་གཉིས་སུ་ངེས་པར་མཚོན། རི་མོ་འདིའི་ཕྱིའི་མཐའ་འཁོར་དུ། མ་རིག་པ་རྒན་མོ་ལོང་བ་ནས་རྒ་ཤི་རོ་ལྟག་སྤྲོད་དུ་ཁུར་བའི་རེ་ཁཱའི་བར་བཅུ་གཉིས་བྲིས་པ་ནི། བཅོམ་ལྡན་འདས་ཀྱིས་ཁོར་ར་ཁོར་ཡུག་ཏུ་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་དང། མི་རྟག་པ་ཉིད་ཀྱིས་བཟུང་བའི་བར་རོ། །ཞེས་གསུངས་པ་ལྟར། རྟེན་འབྲེལ་ཡན་ལག་བཅུ་གཉིས་དཔེ་དཔེ་ཅན་སྦྱོར་ཚུལ་ནི། བཀའ་གདམས་ཕ་ཆོས་ལས། མ་རིག་རྒས་པོ་ལོང་བ་སྟེ། །འདུ་བྱེད་དག་ནི་རྫ་མཁན་བཞིན། །རྣམ་ཤེས་སྤྲེའུ་ལྟ་བུ་སྟེ། །མིང་དང་གཟུགས་ནི་གྲུར་འཇུག་འདྲ། །སྐྱེ་མཆེད་ཡུལ་འཁོར་སྟོང་པ་སྟེ། །རེག་བྱ་འོ་བྱེད་འདྲ་ཞེས་གདའ། །ཚོར་བ་མིག་ལ་མདའ་བརྒྱབ་སྟེ། །སྲེད་པ་ཆང་འཐུང་འདྲ་ཞེས་གདའ། །ལེན་པ་ཤིང་ཏོག་སྙབ་འདྲ་སྟེ། །སྲིད་པ་སྦྲུམ་མ་འདྲ་ཞེས་འདྲ། །སྐྱེས་པ་མ་ལས་བུ་སྐྱེས་འདྲ། །རྒ་ཤི་རོ་འཁུར་འདྲ་ཞེས་གདའ། །ཞེས་པ་ལྟར་རོ། །
དང་པོ་རྒན་མོ་ལོང་བ་ནི། མ་རིག་པའི་མཚོན་བྱེད་དེ། དམུས་ལོང་འཁར་བ་ལ་བརྟེན་ཏེ་གར་འགྲོ་འདིར་འགྲོ་ཅི་བྱ་གཏོལ་མེད་པར་འཁྱམས་པ་ལྟར། མ་རིག་པས་ཕྱིན་ཅི་ལོག་ཏུ་བཟུང་སྟེ་དགེ་སྡིག་ལ་གྱ་ཚོམ་དུ་ཞུགས་པ་ཁམས་གསུམ་འཁོར་བ་འདིར་སྡུག་བསྔལ་སྣ་ཚོགས་མྱོང་བས་སོ། །
གཉིས་པ་རྫ་མཁན་ནི། འདུ་བྱེད་ཀྱི་མཚོན་བྱེད་དེ། རྫ་མཁན་གྱིས་སྣོད་ཆེ་ཆུང་བཟང་ངན་སྣ་ཚོགས་བཟོ་བ་བཞིན། དགེ་སྡུག་གིས་ལས་སྣ་ཚོགས་ལ་བརྟེན་ནས་རྣམ་སྨིན་གྱི་ཕུང་བོ་ཆེ་ཆུང་དང་བཟང་ངན་སྣ་ཚོགས་ཤིག་བསྐྱེད་པའོ། །
གསུམ་པ་སྤྲེའུ་ནི། རྣམ་ཤེས་མཚོན་བྱེད་དེ། སྤྲེའུ་མི་སྲུན་པར་ཤིང་སྡོང་རྩེ་ནས་སྡོང་སྐེད། དེ་ནས་ཤིང་རྩར་མཆོང་བསྐྱོད་སྣ་ཚོགས་བྱེད་པའམ། ཡང་ན། ཁང་བའི་སྒེའུ་ཁུང་དྲུག་པོ་ལས་སོ་སོར་རྒྱུགས་ནས་བལྟ་བར་བྱེད་པ་བཞིན་རྣམ་ཤེས་ཀྱིས་སྐྱེ་བ་སྔ་ཕྱི་བར་གསུམ་བརྒྱུད་དེ། སྐྱེ་འཆི་འདོར་ལེན་བྱེད་པའམ། ཡང་ན། མིག་ལ་སོགས་པའི་སྒོ་དྲུག་གང་ཡིན་ནས་ཡུལ་སྣ་ཚོགས་ལ་སྤྱོད་པའོ། །
བཞི་བ་གྲུ་རྫིངས་ནི། མིང་གཟུགས་མཚོན་བྱེད་དེ། གྲུས་ཡོ་བྱད་དང་འགྲུལ་བ་སྐྱེལ་འདྲེན་གྱི་རྟེན་བྱེད་པ་ལྟར། མིང་གཟུགས་སྐྱེ་བ་སྔ་ཕྱིའི་འགྲོ་འོང་གི་རྟེན་དང་བདེ་སྡུག་འབྱུང་བའི་ཕུང་བོའི་ངོ་བོར་འཛིན་པའོ། །
ལྔ་བ་ཁང་སྟོང་ནི། སྐྱེ་མཆེད་ཀྱི་མཚོན་བྱེད་དེ་ཁང་སྟོང་ལ། ཕྱི་བལྟས་ཀྱི་མི་ཡོད་པ་ལྟར་སྣང་ཡང་། དོན་དུ་བརྟེན་པ་ལ་བདག་པོ་མེད་པ་ལྟར། སྐྱེ་མཆེད་ཀྱི་རྟེན་འབྲེལ་གྲུབ་མ་ཐག་ཕྱི་བལྟས་ཀྱིས་རྣམ་ཤེས་ཡོད་པ་ལྟར་སྣང་ཡང་། དོན་དུ་ན་རང་འབྲས་རྣམ་ཤེས་ད་དུང་གྲུབ་མེད་པས་སོ། །
དྲུག་པ་ཕོ་མོ་འཁྱུད་དེ་འོ་བྱེད་པ་ནི། རེག་པ་མཚོན་བྱེད་དེ། འོ་བྱེད་ཚེ་ཕན་ཚུན་འཐམ་ནས་རེག་པ་ལྟར་ཡིད་དབང་རྣམ་ཤེས་འདུས་ནས་ཡུལ་འགྱུར་གཅོད་པ་འམ། ཡང་ན། འོ་བྱེད་ཚེ་རེག་པ་དེ་མ་གཏོགས་འཁྲིག་བདེ་ཡོངས་སུ་མི་རྫོགས་པ་ལྟར་ཚ་གྲང་དང་འཇམ་རྩུབ་གྱི་རེག་པའི་སྣང་བ་ཙམ་མ་གཏོགས་བདེ་སྡུག་རྫོགས་པར་མྱོང་མི་ཐུབ་པས་སོ། །
བདུན་པ་མིག་ལ་མདའ་ཟུག་པ་ནི། ཚོར་བའི་མཚོན་བྱེད་དེ་མིག་ལ་མདའ་ཟུག་མ་ཐག་ཚོར་བ་སྡུག་བསྔལ་མྱོང་པ་ལྟར། ཚོར་བས་ཀྱང་ཡིད་འོང་མི་འོང་བར་མ་གང་རུང་འཕྲད་མ་ཐག་བདེ་སྡུག་སོགས་མྱོང་བས་སོ། །
བརྒྱད་པ་སྐྱེས་བུས་ཆང་འཐུང་བ་ནི། སྲེད་པའི་མཚོན་བྱེད་དེ། ཆང་ཅི་ཙམ་འཐུང་ཡང་སྲེད་པ་དེ་ཙམ་འཕེལ་བ་ལྟར། སྲེད་པའི་འཁྲུལ་སྣང་གིས་བསླུས་ཏེ། ལུས་ལོངས་སྤྱོད་སོགས་ལ་ནམ་ཡང་མི་ངོམས་པར་ཆགས་ཞེན་གྱིས་བདུང་བས་སོ། །
དགུ་བ་སྤྲེའུས་ཤིང་ཏོག་ལེན་པ་ནི། ལེན་པའི་མཚོན་བྱེད་དེ། སྤྲེའུས་ཤིང་ཏོག་སྔ་མའི་རོ་ཚོར་ཞིང་མིག་གིས་མཐོང་ཚད་ལེན་པ་ལྟར། སྲེད་པ་དེ་ཉིད་ཤས་ཆེར་སོང་ནས་འདོད་པའི་དངོས་བོ་དང་དུ་ལེན་པས་སོ། །
བཅུ་བ་བུད་མེད་སྦྲུམ་མ་ནི། སྲེད་པའི་མཚོན་བྱེད་དེ་ཟླ་ཁ་ལོངས་པ་ནས་སྦྲུམ་མ་དེ་བུ་སྐྱེ་བའི་རྐྱེན་ཐམས་ཅད་ཚོགས་པ་ན། སྐྱེ་བ་ལ་མངོན་དུ་ཕྱོགས་པ་བཞིན། སྲིད་པ་ཕྱི་མ་འགྲུབ་པའི་ལས་ཀྱི་ནུས་པ་མཐུ་ཅན་དུ་གྱུར་ཏེ་རྣམ་སྨིན་གྱི་ཕུང་བོ་གསར་དུ་གྲུབ་པ་ལ་མངོན་དུ་ཕྱོགས་པའོ། །
བཅུ་གཅིག་པ་ཕྲུ་གུ་བཙའ་བ་ནི། སྐྱེ་བ་མཚོན་བྱེད་དེ། ཕྲུ་གུ་མའི་མངལ་ནས་ཕྱིར་དངོས་སུ་ཐོན་པ་བཞིན་རྣམ་ཤེས་ཡང་སྲིད་པ་ཕྱི་མར་ཉིང་མཚམས་སྦྱར་བའོ། །
བཅུ་གཉིས་པ་རོ་རྒྱབ་བསྣོལ་དུ་ཁུར་བ་ནི། རྒ་ཤིའི་མཚོན་བྱེད་དེ། ན་ཚོད་རྒས་འཁོགས་སུ་གྱུར་ནས་སྡུག་བསྔལ་གྱིས་སྣ་སྒོ་མོ་ནས་མནར་ཏེ། འཆི་ཚེ་བེམ་པོ་དུར་ཁྲོད་དུ་སྐྱེལ་བ་ལྟར། མི་རོ་མཐོང་བ་ན་འཆི་བ་ངང་གིས་དྲན་ཞིང་ཕུང་བོ་དང་རྣམ་ཤེས་ཀྱི་འབྲེལ་ཐག་ཆད་པའོ། །
དེ་ཐམས་ཅད་འཁོར་ལོའི་རྣམ་པར་འཆི་བདག་གི་ཁ་དང་རྐང་ལག་གིས་དམ་དུ་བཟུང་བར་བྲིས་པ་ནི། ལས་ཉོན་གྱི་དབང་གིས་འཁོར་བ་འདིར་སྐྱེ་བ་ལེན་པ་མཐའ་དག་འཆི་བདག་གཤིན་རྗེའི་དབང་དུ་མ་གྱུར་བ་མེད་པ་དང་། དེ་ལྟ་བུའི་སེམས་ཅན་ཀུན་སྡུག་བསྔལ་གང་རུང་མྱངས་ཏེ། སྲིད་རྩེ་ནས་མནར་མེད་བར་རྟག་ཏུ་འཁོར་བར་མཚོན་པའོ། །སྟེང་དུ་བཅོམ་ལྡན་འདས་ཀྱིས་ཕྱག་གཡས་པའི་མཛུབ་མོས་ཟླ་བའི་ཐིག་ལེ་ཞིག་སྟོན་པ་བྲིས་པ་ནི། མདོག་དཀར་བ་འགོག་བདེན་དེ་ཉིད་དམ་པའི་ཆོས་འགོག་བདེན་གྱིས་སྤང་བྱའི་དྲི་མ་དག་ཅིང་། དེ་ཕྱག་གིས་སྟོན་པ་ནི། དེ་སྟོན་པ་སངས་རྒྱས་ཁོ་ན་ལ་རག་ལས་པས་དེར་འགྲོ་བར་རིགས་སོ། །ཞེས་འདོམས་པར་མཚོན་པའོ། །ལམ་བདེན་མཚོན་པའི་ཕྱིར་དུ་སྲིད་པའི་འཁོར་ལོའི་འོག་ཏུ། བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཚལ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པས། །ཆོས་འདུལ་འདི་ལ་སྤྱོད་གྱུར་བ། །སྐྱེ་བའི་འཁོར་བ་རབ་སྤངས་ཏེ། །སྡུག་བསྔལ་ཐ་མ་བྱེད་པར་འགྱུར། །ཞེས་པའི་ཤོ་ལོ་ཀ་འདི་གཉིས་འབྲི་བར་གསུངས་སོ། །འཁོར་ལོ་འདི་ཁྱུད་མོར་བྲིས་པ་ནི། མ་རིག་པ་ནས་རྒ་ཤིའི་བར་རྟེན་འབྲེལ་ཡན་ལག་བཅུ་གཉིས་དང་། ལས་ཉོན་གྱིས་སྐྱེ་བ་བླངས་པའི་འགྲོ་བ་ལྔ་བོ་ཟོ་ཆུན་ནམ་མགལ་མེ་ལྟར་སྲིད་རྩེ་ནས་མནར་མེད་བར་འཁོར་བ་མཚོན་ལ། ཡན་ལག་བཅུ་གཉིས་འཁོར་ལོའི་མཐར་འབྲི་བ་ནི། དེ་ལས་བརྒལ་ན་འཁོར་བ་ལས་ཐར་བར་མཚོན་ནོ། །
གཞན་ཡང་། དག་ཡིག་མཁས་འབྱུང་ལས་འདུལ་བའི་སྐོར་གྱི་རི་མོ་འབྲི་གཞིའི་ཁྱད་པར་འདི་ལྟར་འཁོད་ཡོད་དེ། གཙུག་ལག་ཁང་གི་ཁྱམས་སུ་སྟོན་པའི་སྐྱེས་རབས་དང་། དཔོང་སའི་ཁང་བར་ཤཱ་རིའི་བུ་སོགས་བྲི་བ། དྲི་གཙང་ཁང་གི་སྒོར་གནོད་སྦྱིན་འཕྲེང་ཐོགས། མཛོད་ཀྱི་སྒོར་གནོད་སྦྱིན་ལག་ན་མྱུ་གུ་ཐོགས་པ། ཟས་ཀྱི་ཁང་བར་ལག་ན་བཅའ་བ་ཐོགས་པ། བསྲོ་ཁང་དུ་མྱུ་གུ་དང་བུམ་པ་ཐོགས་པ། མེའི་ཁང་བར་གྲུལ་བམ་མེ་འབར་བར་བྱེད་པ་སོགས་དང་། ཆུའི་ཁང་བར་ཀླུའི་བུ་མོ་ལག་ན་བུམ་པ་ཐོགས་པ་སོགས། ནད་པའི་རུང་བའི་ཁང་བར་དེ་བཞིན་གཤེགས་པ་ནད་པའི་རིམ་གྲོ་མཛད་པ། གསང་སྤྱོད་ཁང་དུ་དུར་ཁྲོད་དང་མགོ་ཐོད་སོགས་དང་། སྒོ་ཁང་གི་ཁོར་ཡུག་ཏུ་ཆོ་འཕྲུལ་ཆེན་པོ་དང་། བདུད་བཅོམ་པ་སོགས་འབྲིའོ། །