ཉི་གྲགས་སྐུ་ཕྲེང་རིམ་བྱོན།
[༡] གཏེར་ཆེན་ཉི་མ་གྲགས་པ་གར་དབང་འགྲོ་འདུལ་གླིང་པ།
རིག་འཛིན་ཆེན་པོ་གར་དབང་འགྲོ་འདུལ་གླིང་པའམ་གཏེར་ཆེན་ཉི་མ་གྲགས་པ་ཞེས་ཡོངས་སུ་གྲགས་པའི་ཚད་མའི་སྐྱེས་བུ་གང་ཉིད་ནི། འཕགས་མཆོག་སེམས་ཉིད་ངལ་གསོ་དང་། ལོ་ཙཱ་བ་འཁོན་ཀླུ་དབང་སྲུང་བ་སོགས་དག་པའི་སྐྱེ་སྲིད་བགྲང་ལས་འདས་པ་བྱོན་པའི་མཐར། ཇི་སྐད་དུ། ཨོ་རྒྱན་གླིང་པའི་བཀའ་ཐང་ཤེལ་བྲག་མ་དང་། རྡོ་རྗེ་གླིང་པའི་གནམ་ལྕགས་མ། པདྨ་གླིང་པའི་བཀའ་རྒྱ་མ། སངས་རྒྱས་གླིང་པའི་པུ་རི་མ་རྣམས་ནས་ཚིག་གཅིག་དང་དབྱངས་གཅིག་གིས། མི་ལ་ལུས་ཆས་ཡ་མ་ཟུང་དུ་འོང༔ དམ་པའི་ཆོས་ཀྱང་ཡ་མ་ཟུང་དུ་འགྲོ༔ དགེ་རྒྱས་བྲིས་པའི་རི་མོ་ཤུལ་རྗེས་འབྱུང༔ ཁམས་ཀྱི་སྲིང་མོ་རྫོང་གསུམ་གཏེར་ཁ་འདི༔ མི་བཞག་འདོན་པའི་རྟགས་དེ་ནས་བྱུང༔ ཁམས་པ་ཉི་མ་གྲགས་པའི་མིང་ཅན་འབྱུང༔ ཞེས་དང་། རང་གཏེར་བླ་མ་བདེ་མཆོག་གི་ཆོས་ཚན་ལས། རྒྱ་གར་རྒྱ་ནག་མོན་བོད་བལ༔ ཧོར་དང་སོག་པོ་ལ་སོགས་པ༔ ཆོས་འཁོར་ལྷ་ས་འདུ་ཚོགས་བྱེད༔ རྒྱ་བོད་ཧོར་གསུམ་ཆས་གོས་འདྲིལ༔ ལུས་གོས་སྣ་ཚོགས་ཡ་མ་ཟུང༔ སྐད་དང་ལོངས་སྤྱོད་མཐའ་དབུས་འགྱུར༔ བསམ་ཡས་འདི་ལ་ཞིག་གསོ་ཡོང༔ འབྲོ་བཟའི་ལྷ་ཁང་རི་མོ་བརྗེ༔ དེ་ཚེ་སྲིང་མོ་རྫོང་དུ་ནི༔ ང་ཡིས་སྦས་པའི་གཏེར་ཁ་རྣམས༔ ཁམས་པ་ཉི་མ་གྲགས་པས་སྤྱོད༔ ཅེས་དང་། རིག་འཛིན་གཏེར་བདག་གླིང་པའི་གཤིན་རྗེའི་ཆོས་བདག་ཏུ། གསང་བའི་ཆོས་བདག་བྱ་བཏང་རིག་འཛིན་གཉིས༔ ཞེས་པའི་ཡ་གྱལ་དུ་གཏེར་ཆེན་ཉིད་ཀྱིས་ངོས་འཛིན་གནང་བ་དང་། རྒྱལ་དབང་ལྔ་པ་ཆེན་པོའི་དག་སྣང་རྒྱ་ཅན་ལས་ཀྱང་། འཕྲིན་ལས་མིང་འཛིན་ཤར་གྱི་ཕྱོགས་ནས་འབྱུང༔ ཞེས་བསླུ་མེད་རྡོ་རྗེའི་ལུང་བྱང་དུ་མ་ལས་ལན་གཅིག་མིན་པར་ཡང་ཡང་བསྔགས་པ་ལྟར། སྤྱི་ལོ་༡༦༤༧པ་སྟེ་རབ་བྱུང་བཅུ་གཅིག་པའི་ཐམས་ཅད་འདུལ་ཏེ་མེ་མོ་ཕག་གི་ལོར་སྒོམ་སྡེ་ནང་ཆེན་གྱི་སའི་ཆ་བན་རུ་གྲུ་ཡ་ཞེས་པར། ཡབ་བྱམས་མེ་དབོན་པོ་ཀརྨ་རྣམ་རྒྱལ་དང་། ཡུམ་བླ་བཟའ་བསོད་ནམས་མཚོ་གཉིས་ཀྱི་སྲས་སུ་གཟའ་ཚེས་སྐར་སྦྱོར་ལེགས་པ་ཞིག་ཏུ་ངོ་མཚར་བའི་ལྟས་དུ་མ་དང་བཅས་སྐུ་འཁྲུངས། བཙས་ནས་ཟླ་ངོ་གསུམ་ཙམ་ལོན་དུས་སུ་སྐུ་དྲང་པོར་བཞུགས་ནས་ཨོ་རྒྱན་མཁྱེན་ཞེས་ལན་གསུམ་གསུངས་པས་ཡབ་ཡུམ་གཉིས་ཀྱིས་སྔོན་གྱི་རྨི་ལྟས་སོགས་དང་བསྟུན་ཚེ་སྤྲུལ་བའི་སྐུ་ཞིག་ཡིན་ལས་ཆེ་བར་བསམ་ཏེ་ཡུལ་དེའི་སྔགས་འཆང་ཞིག་སར་ཁྱེར་ནས་ལོ་རྒྱུས་ཞུས། དེས་བུ་ཁྱོད་སུ་ཡིན་ཅི་ཞིག་གི་སྐད་སྨྲ་རྒྱུ་ཡོད་ཅེས་དྲིས་པར། བདག་ནི་འཕོ་ལུང་པ་ཀརྨ་བསམ་འགྲུབ་ཡིན་ནོ། །ཞེས་གསུངས་པས་ཀུན་ཧ་ལས་ཏེ་དད་པས་མཆི་མ་འཁྲུགས་པར་གྱུར། དེ་ནས་ལོ་ངོ་གཉིས་ཙམ་ནས་སྐུ་ཚེ་སྔ་མ་གྲུབ་ཐོབ་འཕོ་ལུང་པའི་དུས་ཀྱི་བག་ཆགས་ཅུང་ཟད་ཀྱང་མ་བརྗེད་པར་གསལ་ལེར་དྲན་ཅིང་ཐོགས་མེད་དུ་འཆད་པས་འཕོ་ལུང་པའི་སྐུ་སྐྱེར་རྩོད་མེད་དུ་གྲགས་ཤིང་མཚན་ཡང་ཀུན་ཀྱིས་སྐུ་སྐྱེར་འབོད། ལྗགས་ཀློག་ཕུལ་བས་ཡི་གེའི་ཕྱི་མོ་ལན་གཉིས་གསུམ་བཀླགས་པ་ཙམ་གྱིས་ལེགས་པར་མཁྱེན་པས་ཡ་མཚན་དུ་འཛིན་པ་བྱུང་། དེ་དུས་ཙམ་ནས་གཏེར་གྱི་ཁ་བྱང་ཞིག་ཕྱག་ཏུ་བྱུང་ཡང་བྱིས་པའི་ཉམས་ཀྱིས་སྟོར། བྲག་གསེབ་ཞིག་ནས་རྡོའི་ཁྲོ་ཕུར་འདྲ་བ་ཞིག་གཏེར་དུ་བཞེས་པ་ཡབ་ལ་གནང་། ཨོ་རྒྱན་ཆེན་པོས་ཡང་ཡང་ཞལ་གཟིགས་ཤིང་བྱིན་གྱིས་བརླབས་པས་མི་ཕྱེད་པའི་དད་པ་ཐོབ་སྟེ་རྙིང་ལུགས་ལ་ཐུགས་འདུན་ཆེ་བ་བྱུང་། ས་དེར་ཨོ་རྒྱན་རིན་པོ་ཆེའི་མཚན་ཙམ་ཡང་གླེང་བ་མི་འདུག་ཚུལ་ནམ་རྒྱུན་ཞལ་གསུངས་མཛད་པས། ཡབ་དང་གཅེན་གྱིས་ནང་པར་རྙིང་མའི་བླ་མ་ཞིག་བྱོན་ཡོད་པ་འདུག་པས་དེར་བྱོན་པར་སྤྲོའམ་ཞུས་པས་ཤིན་ཏུ་སྤྲོ་གསུངས་ནས་བྱོན་པར་ཐུགས་ཐག་བཅད། དེ་སྐབས་གྲུབ་དབང་རྫོགས་ཆེན་པ་པདྨ་རིག་འཛིན་ནང་ཆེན་རྒྱལ་པོས་གདན་དྲངས་པའི་སར་མཇལ་དུ་ཕེབས། ཞལ་མཇལ་བ་ཙམ་གྱིས་མི་ཕྱེད་པའི་དད་པ་ཐོབ་ཅིང་ཚེ་རབས་ཀྱི་བླ་མ་ཡིན་པའི་ངེས་པ་ཐོབ། དེ་ནས་བཟུང་སྟེ་གྲུབ་དབང་རིན་པོ་ཆེའི་སྐུ་རྩར་འབྲལ་མེད་དུ་མི་ལོ་བཅོ་བརྒྱད་ལ་ཞབས་ཕྱིར་ཕེབས། དུས་མཚུངས་ཆགས་མེད་རིན་པོ་ཆེ་དང་། གཏེར་ཆེན་བདུད་འདུལ་རྡོ་རྗེ་རྣམ་གཉིས་དང་མཇལ་ཞིང་དབང་ཆོས་དུ་མ་གསན་པས་ནམ་ཞིག་ཟབ་གཏེར་གྱི་སྒོ་འབྱེད་པའི་ལུང་བསྟན་གནང་། ཤིང་ཕོ་འབྲུག་གི་ལོ་ལ་གྲུབ་དབང་རིན་པོ་ཆེའི་ཞབས་ཕྱིར་བོད་ཡུལ་དབུས་ཀྱི་ཕྱོགས་སུ་ཕེབས་ནས་བླ་མ་དང་རྟེན་གསུམ་མང་པོ་མཇལ་སྐོར་དང་ཆོས་འབྲེལ་གང་མང་གསན། བར་ལམ་གྲུབ་དབང་རིན་པོ་ཆེས་བཀས་བསྐུལ་ནས་འཕྱོང་རྒྱས་དཔལ་རིའི་གྲྭ་ས་ལ་ཡུན་རིང་ཙམ་བཞུགས། ཚོགས་དུང་འབུད་པའི་ཡུན་ཙམ་ལ་བཟང་སྤྱོད་སྨོན་ལམ་གྱི་ཚད་ཙམ་གྱི་དཔེ་ཆ་ཐུགས་འཛིན་ཐུབ་པས་ཀུན་ཀྱིས་ཐུགས་རབ་ཆེ་བའི་ཚད་དུ་གླེང་། དེ་ནས་གྲུབ་དབང་རིན་པོ་ཆེའི་ཞབས་ཕྱིར་དགོངས་པས་གྲྭ་ས་ནས་གསེང་ཁྲོལ་ཞུས་ཏེ་དཔོན་གཡོག་གསུམ་ཧོར་སོག་གི་ཡུལ་དུ་འབུལ་སྡུད་ལ་ཕེབས་ནས་གདུལ་བྱ་བསྐྱངས། རིམ་པར་ལྷ་སར་ཕེབས་ཏེ་ཇོ་ཤཱཀ་རིན་པོ་ཆེར་མཆོད་འབུལ་དང་བསྟན་འགྲོའི་དོན་ལ་དགོངས་པའི་གསོལ་སྨོན་རྒྱ་ཆེར་མཛད། ས་ཕོ་སྤྲེལ་ལོར་གྲུབ་དབང་རིན་པོ་ཆེ་ཙཱ་རིར་ཞབས་སྐོར་ལ་ཕེབས་པའི་ཕྱག་ཕྱིར་བྱོན་པའི་ལམ་བར་རྣམས་སུ་དག་པའི་གཟིགས་སྣང་འབའ་ཞིག་འབྱམས་སུ་ཀླས། ཙཱ་རིའི་སྦས་ལུང་ཟབ་ལུང་ཡང་དབེན་རྡོ་རྗེའི་ར་བ་ཞེས་པ་རུ་གྲུབ་དབང་རིན་པོ་ཆེ་ཐུགས་དམ་ཉམས་བཞེས་སུ་ལོ་གསུམ་བཅད་རྒྱ་གནང་བས་རྗེ་ཉིད་ཀྱིས་ཀྱང་གནས་དེར་སྒྲུབ་པའི་རྒྱལ་མཚན་བཙུགས། གྲུབ་དབང་བླ་མ་དམ་པ་ལས་རྫོགས་ཆེན་གསང་བ་སྙིང་ཐིག་ཟབ་ཁྲིད་གསན་ནས་དཀའ་སྤྱད་ཐུགས་རུས་དྲག་པོས་སྣང་མུན་མི་འབྱེད་པ་ལྟ་བུའི་ཉམས་བཞེས་གནང་བས་རྫོགས་ཆེན་གཞི་ལམ་གྱི་རྟོགས་པ་མངོན་དུ་གྱུར། བྱ་རྩོལ་ཐམས་ཅད་ཆོས་ཉིད་ཀྱི་དབྱིངས་སུ་ནུབ་སྟེ་རང་བྱུང་གི་རིག་པ་ཡེ་ཤེས་ཆེན་པོར་རྩལ་རྫོགས་པས་སྣང་གྲགས་ཐམས་ཅད་ཆོས་ཉིད་ཀྱི་རོལ་པར་གཟིགས་པར་གྱུར་ཏེ། རྗེ་ཉིད་ཀྱི་གསུང་ལས། མཚུངས་མེད་དམ་པ་རིན་པོ་ཆེའི་ཐུགས་རྗེས་བཟུང་བས། རང་རིག་ཀ་དག་གི་ཡེ་ཤེས་དང་ཞལ་མཇལ་ཏེ། འཁོར་བ་དོང་སྤྲུག སྲིད་པ་ཕྱིར་བསྙིལ། བག་ཆགས་དྲུང་ཕྱུང་སྟེ། ཀུན་བཟང་འཁོར་ལོ་ཚོགས་ཆེན་གྱི་ས་ལ་འགྱིང་བར་གྱུར་ཏོ། །ཞེས་གསུངས། སྐབས་ཤིག་གྲུབ་དབང་རིན་པོ་ཆེའི་ཞལ་ནས་ཁྱེད་ཀྱིས་ཁམས་ཀྱི་སྲིང་མོ་རྫོང་དུ་བསྒོམ་ན་དངོས་གྲུབ་ངེས་པར་ཐོབ་པར་འདུག་ཅེས་ཡེ་ཤེས་ཀྱི་གཟིགས་པ་བླ་ན་མེད་པས་ལྐོག་གྱུར་ཇི་བཞིན་དུ་མཁྱེན་པའི་གསུང་ཡང་ཡང་བྱུང་བ་དང་། ཡེ་ཤེས་ཀྱི་མཁའ་འགྲོས་ལུང་བསྟན་ཀྱང་གསལ་པོར་བྱུང་བས་ཐུགས་ལ་ངེས་པ་རྙེད་ནས་སྲིན་མོ་རྫོང་དུ་ཕེབས། དཔལ་གྱི་ཁམས་ཤག་རྡོ་རྗེ་སྙིང་རྫོང་དུ་ལོ་གསུམ་གྱི་བཅད་རྒྱ་ལ་བཞུགས་པས་ཐོག་མར་མི་མ་ཡིན་གྱི་འཚུབས་ལྷོང་ཤིན་ཏུ་ཆེ་བ་བྱུང་ཡང་ཐུགས་དམ་གྱི་རྩལ་རྫོགས་པས་དམིགས་མེད་ཀྱི་ལྟ་བས་ཟིལ་གྱིས་མནན། ཆུ་མོ་གླང་གི་ལོར་གུ་རུ་རིན་པོ་ཆེས་དངོས་སུ་ཞལ་བསྟན་ནས་ཟབ་མོ་གཏེར་གྱི་ཁ་བྱང་ལུང་བསྟན་དུས་རྟགས་སོགས་རྡོ་རྗེའི་ལུང་གིས་བཀྲལ་ནས་བསྩལ། ཤིང་ཕོ་སྟག་གི་ལོར་སྲིན་རྫོང་རྡོ་རྗེ་སྙིང་རྫོང་ནས་ཁ་བྱང་དང་མཐུན་པར་རྫོགས་ཆེན་རྩ་གསུམ་གསང་བ་སྙིང་ཐིག་དང་སྐུ་ཚབ་དྲི་མེད་བཤེས་གཉེན་སོགས་གདན་དྲངས། དེ་ནས་བཟུང་སྟེ་དཀའ་ཚེགས་དང་འོ་བརྒྱལ་ལ་མ་གཟིགས་པར་གཏེར་གནས་རྣམས་སུ་རིམ་གྱིས་ཕེབས་པར་བཞེད་པ་ན། གྲུབ་དབང་རིན་པོ་ཆེས་གཙང་ཕྱོགས་སུ་ཤོག་གསུངས་པའི་བཀའ་ཤོག་ཆེད་གཏད་གནང་བ་ལྟར་གཙང་ལ་ཕེབས། ལམ་ཞོར་ལ་རྟ་ནོར་སོགས་དངོས་རྫས་མང་དུ་བྱུང་བས་རྟ་ནོར་བརྒྱད་ཅུ་ཙམ་བསམ་ཡས་ཞིག་གསོའི་ཐེབས་སུ་ཕུལ། བྲེས་དགོན་གསར་དུ་གྲུབ་དབང་རིན་པོ་ཆེ་མཇལ་ཞིང་རྟ་ནོར་བརྒྱ་དང་ལྔ་བཅུ་སོགས་དངོས་པོ་གཏོས་ཆེ་བའི་འབུལ་བ་མཛད་པས་ཐུགས་མཉེས་པའི་རྩེར་སོན། དེ་ནས་ཤང་ཟམ་ལུང་དུ་གྲུབ་དབང་རིན་པོ་ཆེ་སོགས་དང་ལྷན་དུ་ཕེབས། ཟམ་ལུང་གཏེར་འདོན་དགོས་པའི་མཁའ་འགྲོའི་གསང་ལུང་དང་དུས་རྟགས་སོགས་མངོན་དུ་གྱུར་པས་ཡོས་ལོ་སྤྲེལ་ཟླའི་ཚེས་བཅུའི་ནུབ་མོ་ཚེ་སྒྲུབ་བདུད་བཞིའི་གཡུལ་རྒྱལ་དང་ཟབ་ཆོས་པདྨ་དྲག་ཁྲོས་སོགས་མངོན་ཆུང་གིས་གསང་གཏེར་དུ་བཞེས་པ་གནང་བ་ན། ཡུལ་དེའི་དམ་ཅན་སྐྱེས་བུ་ཆེན་པོ་ཁོག་ཞུགས་ཤིག་གིས་རིག་པ་འཛིན་པའི་སྐྱེས་བུ་དམ་པས་ཟབ་གཏེར་བཞེས་སོང་ཞེས་ཁྲོམ་བསྒྲགས་སུ་གསུངས་པས་ཀུན་ཀྱིས་འོད་མཆོག་སྤྲུལ་སྐུ་དང་གྲུབ་ཐོབ་རིན་པོ་ཆེ་གཉིས་གང་རུང་གིས་བཞེས་པ་ཡིན་འགྲོ་ཞེས་གླེང་། གྲུབ་དབང་རིན་པོ་ཆེས་སྒྲུབ་པ་མཛོད་གསུངས་ཀྱང་གངས་རི་ཏི་སེའི་གཏེར་འདོན་པའི་དུས་རྟགས་རྣམས་མངོན་དུ་གྱུར་པས་དགོངས་པ་ཞུས་ནས་རིམ་གྱིས་གངས་རིར་ཕེབས། ལམ་བར་དུ་འོ་བརྒྱལ་མང་པོ་བྱུང་ཡང་ཐུགས་ཞུམ་པ་སྤངས་ནས་བསྟན་འགྲོའི་དོན་ལ་དགོངས་ཏེ་དཀའ་བ་ཁྱད་བསད་མཛད། གངས་ཅན་རིའི་རྒྱལ་པོ་ཏི་སེར་ཕེབས་ཉིན་གངས་རིའི་ཐད་ཀྱི་ནམ་མཁར་མཁའ་འགྲོ་མ་སྐུ་མདོག་ལྗང་གུ་ཞབས་གར་སྟབས་ཅན་ཞིག་གཟིགས་པས་རྩོལ་མེད་ཀྱི་ཐུགས་ཉམས་བཟང་པོ་སྐྱེས་གསུངས། ཤིང་ཡོས་ཧོར་ཟླ་བཅུ་པའི་ཡར་ཚེས་བཅོ་ལྔ་ལ་བདེ་མཆོག་འཁོར་ལོའི་ཕོ་བྲང་བདེ་ཆེན་གསང་བ་ཕུག་ནས་རིགས་ལྡན་གྱི་གྲོགས་དང་བཅས་ཏེ་བླ་མ་བདེ་མཆོག་དབང་གི་འཁོར་ལོའི་ཆོས་སྐོར་ཆ་ལག་དང་བཅས་པ་རྣམས་གཏེར་ནས་གདན་དྲངས། དེ་མཚམས་རྗེ་བཙུན་བཞད་པ་རྡོ་རྗེའི་སྒྲུབ་གནས་རྣམས་དང་། བལ་ཡུལ་མཆོད་རྟེན་འཕགས་པ་ཤིང་ཀུན། བྱ་རུང་ཁ་ཤོར་སོགས་ལ་གནས་གཟིགས་སུ་ཕེབས་བསྐྱོད་གནང་། ཁྱད་པར་ཨོ་རྒྱན་ཆེན་པོའི་སྒྲུབ་གནས་ཡང་ལེ་ཤོད་དང་ཨ་སུ་ར་སོགས་སུ་གནས་འབྲེལ་ཟླ་མཚམས་རེ་གནང་། བལ་ཡུལ་སོགས་སུ་གནས་གཟིགས་ཞིབ་ཆ་མཛད་དེ་དིང་རི་བརྒྱུད་གྲུབ་དབང་བླ་མ་མཁར་བ་བསམ་གཏན་བྲག་ན་བཞུགས་པའི་སར་ཕེབས་ཏེ་བལ་བོད་ཀྱི་དངོས་རྫས་རིན་ཐང་དང་བྲལ་བ་དུ་མ་ཕྱག་རྟགས་སུ་ཕུལ། གྲུབ་དབང་མཆོག་གིས་ཟབ་ཆོས་རྣམས་གཏེར་སྒྲུབ་དང་གསང་རྒྱ་མཐར་ཕྱིན་མ་བྱུང་ན་བར་ཆད་ཀྱི་དབང་དུ་འགྲོ་ཚུལ་སོགས་ཀྱི་གསུང་མང་པོ་ལྷུག་སྩོལ་མཛད་པར་ལོ་གསུམ་སྒྲུབ་པ་མཛད་རྒྱུའི་དམ་བཅའ་ཕུལ། ས་ཕོ་རྟ་ཡི་ལོའི་ཧོར་ཟླ་དྲུག་པར་སླར་ཡང་སྲིན་རྫོང་དུ་ཕེབས་ཏེ་ཆགས་རུ་ཕུག་ནག་ཏུ་སྐུ་མཚམས་བཅད་རྒྱ་འབའ་ཞིག་མཛད། འདི་དུས་ཙམ་ལ་གནས་ལྔ་རིག་པའི་པཎ་ཆེན་འཇམ་དབྱངས་ཧོར་གྱི་ལོ་ཆེན་དང་མཇལ་ཞིང་ཉིད་ཀྱི་གཏེར་གསར་ཆོས་སྐོར་རྣམས་ཕུལ་ཏེ་ཆོས་བདག་ཏུ་མངའ་གསོལ། ཆུ་ཕོ་ཁྱི་ལོར་ནག་ཤོད་མེ་འབར་ཕུག་ནས་རྟ་མགྲིན་དྲེགས་པ་ཟིལ་གནོན་གྱི་ཆོས་སྐོར་རྣམས་གདན་དྲངས་པ་བར་ཆད་མེད་པར་ཕྱག་ཏུ་སོན། དུས་དེར་ལུང་ཟིན་ཐུགས་སྲས་རྣམས་ཀྱིས་གཙོས་སྐལ་ལྡན་འདུས་པ་བརྒྱ་ཕྲག་བརྒལ་བ་ལ་གཏེར་གསར་བཀའ་རྒྱ་གྲོལ་བསྟུན་དབང་ལུང་ལན་གཉིས་སུ་བསྩལ་ནས་སྨིན་གྲོལ་གྱི་ས་ལ་བཀོད། དེ་ནས་རྒྱ་གར་རྩ་མཆོག་གྲོང་གི་གཏེར་འདོན་པའི་དུས་ལ་བབ་པའི་ལུང་བསྟན་གསལ་བས་གནས་སྐོར་པ་ཕོ་མོ་སུམ་ཅུ་རྩ་ལྔ་ཙམ་ཟས་གོས་ཀྱིས་བསྐྱངས་ནས་རྒྱ་གར་དུ་ཞབས་བཏེགས། གུ་རུ་རིན་པོ་ཆེའི་གསང་ལུང་བཞིན་ཤིང་ཕོ་བྱི་བའི་ལོར་རྒྱ་གར་རྩ་མཆོག་གྲོང་གི་བྱང་སྒོ་ཧ་ཙོ་ཞེས་པའི་གནས་ནས་དཔལ་མགོན་འཕགས་པ་ཀླུ་སྒྲུབ་ཀྱི་ཕྱག་བཟོ་ཇོ་བོ་མི་བསྐྱོད་རྡོ་རྗེ་དང་ཆོས་སྐུ་མི་བསྐྱོད་རྡོ་རྗེ་སྟེ་འཕགས་པ་སྐུ་མཆེད་གཉིས་དང་རྟེན་དེའི་སྲུང་མ་ལྷ་མོ་སྔགས་སྲུང་མའི་ཆོས་ཚན་སོགས་སྤྱན་དྲངས་ཏེ་རིམ་གྱིས་ཚུར་ཕེབས། དེ་ནས་གདན་སར་ཕེབས་འཕྲལ་གྲུབ་དབང་རིན་པོ་ཆེ་མཇལ་དུ་ཕེབས་བཞེད་གནང་ཡང་གྲུབ་དབང་རིན་པོ་ཆེ་མདོ་སྨད་དུ་ཆིབས་བསྐྱོད་གྲུབ་པ་དང་འགྲིག་པས་མཇལ་མ་ཐུབ། འདི་སྐབས་སོག་པོའི་རྒྱལ་པོ་པཱ་ཐུར་ཐའི་ཇི་ཡིས་གདན་འདྲེན་བྱུང་བ་བཞིན་ཕེབས་པས་གུས་འདུད་ཀྱི་བསྙེན་བཀུར་དང་སྲི་ཞུ་ཚད་མེད་པ་ཕུལ། མེ་ཡོས་ལོར་མདོ་སྨད་ནས་གྲུབ་དབང་རིན་པོ་ཆེས་གསུང་ཤོག་གནང་དོན་བཞིན་མདོ་སྨད་དུ་ཆིབས་ཞལ་བསྐྱོད། གྲུབ་དབང་རིན་པོ་ཆེས་རོག་ཏྲམ་དགོན་གསར་འདེབས་ཀྱིས་དེར་བཞུགས་པ་དང་མཇལ་ཞིང་གུར་དཀར་མོ་སྟོང་ཤོང་གཙོས་རྟ་ནོར་དངོས་རྫས་ཕོན་ཆེ་བ་དང་། གཏེར་རྫས་ཀྱི་གཙོ་བོ་གངས་རི་ནས་སྤྱན་དྲངས་པའི་སྐུ་ཚབ་མཐོང་བ་དོན་ལྡན་དང་། གཏེར་ཤོག་གྲས་ཁ་མ་ཉམས་པའི་ཤོག་དྲིལ་འགའ། ཨ་ཐམ་ཧྲི་ཐམ་མང་པོ་བཅས་རིགས་མི་གཅིག་པའི་གཏེར་རྫས་སྣ་ཚོགས་ཀ་ཏོ་ར་གང་ཙམ་ཕུལ་བས་ཐུགས་དགྱེས་པའི་རྩེར་སོན། གྲུབ་དབང་རིན་པོ་ཆེས་རུ་དམ་གདན་ས་སྐྱོང་དགོས་པའི་བཀའ་ཕེབས་གནང་ཞིང་ཁྱེད་རང་ཆེད་གཏད་ཀྱིས་གདན་དྲངས་དགོས་པའང་འདི་ལས་གཞན་ཅི་ཡང་མེད་ཅེས་གསུངས་པར། གཏེར་ལུང་གི་དོན་བཞིན་འགྲོ་དོན་ཕྱོགས་མེད་དུ་སྐྱོང་དགོས་པའི་སྟབས་ཀྱིས་གདན་ས་མཛད་ཐབས་བྲལ་ཚུལ་ནན་ཞུས་ཕུལ་བས་དགོངས་ཁྲོལ་ལེགས་པར་ཐོབ། ལྕགས་ཕོ་རྟའི་ལོར་ལྡན་གླང་ཐང་དུ་ཞབས་པད་བསྐྱོད་ཅིང་སྒྲོལ་མ་རང་བྱོན་བྲག་ནས་སྨན་ལྷ་དམ་ཆོས་བདུད་རྩི་ཐིག་པའི་སྐོར་དང་། སྔོན་ཆོས་རྒྱལ་སྲོང་བཙན་སྒམ་པོའི་དུས་ཀྱི་སྒྲོལ་མའི་སྐུ་སོགས་གཏེར་ནས་གདན་དྲངས། གླིང་དཔོན་རྡོ་རྗེ་མགོན་པོ་སོགས་མི་ཆེན་ཆེ་དགུ་དུ་མས་ཞབས་ལ་བཏུད་དེ་རྫ་སྟོད་རི་འགུལ་དགོན་གྱི་ས་རིས་ཐམས་ཅད་ཕུལ་ནས་དགོན་པ་ཞིག་ཕྱག་འདེབས་མཛད་པའི་ཞུ་བ་ཕུལ་བས་རེ་ཞིག་ཞེ་ཆེན་རི་ཁྲོད་བཏབ་ནས་དེར་བཞུགས། དུས་མཚུངས་རང་གཏེར་ལས། ཅོག་རོའི་སྤྲུལ་པས་བསྟན་པའི་སྒྲོན་མེ་སྦར༔ ཞེས་དང་། གངས་ལྗོངས་ས་ཡི་དབང་ཕྱུག་དབུས་དང་ཤར༔ རྟེན་འབྲེལ་གར་བབ་ལེགས་བརྟགས་ས་ཕྱོགས་སུ༔ འཕགས་པ་བཞུགས་གསོལ་ཆོས་ཀྱི་གྲྭ་སྡེ་ཚུགས༔ མཐོང་ཐོས་འགྲོ་རྣམས་འཕགས་པའི་ཞིང་དུ་གྲོལ༔ ཅེས་གསུངས་པ་ལྟར་སྡེ་དགེའི་ཆོས་རྒྱལ་ཆེན་པོ་ཁྲི་ཆེན་སངས་རྒྱས་བསྟན་པས་ཆེད་དུ་གདན་དྲངས་ནས་བསྙེན་བཀུར་ཕུན་སུམ་ཚོགས་པ་མཛད་པ་སོགས་རྟེན་འབྲེལ་ལེགས་ཚོགས་ཀྱི་སྒོ་མོ་འབྱེད་པ་དང་བསྟུན། སྤྱི་ལོ་༡༦༩༣པ་རབ་བྱུང་བཅུ་གཉིས་པའི་དཔལ་གདོང་ཞེས་པ་ཆུ་མོ་བྱའི་ལོར་སྟག་མོ་སྒང་སྐལ་བཟང་ཕུན་ཚོགས་གླིང་གི་ཆོས་སྡེ་བཏབ། ལྷ་ཆེན་ཐུབ་དབང་བདུད་འདུལ་མའི་སྐུ་བཞེངས་པའི་འོག་ཏུ་མཐའ་དམག་གི་བླ་རྡོ་མནན་ཏེ་འཚེ་བ་མི་འབྱུང་བའི་བཀའ་དྲིན་མཛད་པ་དང་། སྡེ་དགེའི་མངའ་རིས་ཀྱི་དངོས་ཡོད་དངོས་མེད་ཀྱི་ལྷ་སྲིན་སྡེ་དང་བཅས་པ་ཐམས་ཅད་རྡོ་རྗེ་འབར་བའི་ཏིང་ངེ་འཛིན་གྱིས་དམ་བཞག་བཀའ་སྒོ་མཛད་པར་ཆོས་རྒྱལ་ཆེན་པོས་གཏང་རག་གི་འབུལ་མཆོད་རྒྱ་ཆེན་ཕུལ། དེ་ནས་གྲུབ་དབང་པདྨ་རིག་འཛིན་ཉིད་མྱ་ངན་ལས་འདའ་བར་བཞེད་པ་གསན་པས་མགྱོགས་པར་ཆིབས་བསྐྱོད་གནང་བས་ཞལ་མཇལ་ཏེ་གསུང་འཕྲོས་ཞིབ་པར་གནང་། མི་རིང་པར་གྲུབ་དབང་རིན་པོ་ཆེ་གཟུགས་སྐུའི་བཀོད་པ་གཞོན་ནུ་བུམ་སྐུའི་དབྱིངས་སུ་བསྡུ་བར་མཛད་ཚེ་སྐུ་གདུང་རིན་པོ་ཆེར་མཆོད་པའི་བྱེ་བྲག་བསམ་གྱིས་མི་ཁྱབ་པ་དང་། ཉིན་རེ་བཞིན་དབུ་དཔྲལ་ནས་སྐུ་མཚལ་འབྱུང་འབྱུང་གིས་ཕྱག་བརྒྱ་ཕྲག་མང་པོ་ཕུལ་བ་སོགས་བློས་མི་དཔོག་པར་མཛད་ཅིང་ཕྱིས་སུ་གྲུབ་དབང་བླ་མའི་ཡེ་ཤེས་ཀྱི་སྐུ་ལན་དུ་མར་མཇལ་ཅེས་གསུངས། དེ་སྐབས་ཐུགས་སྲས་རབ་འབྱམས་པ་མཁར་མདོ་ལྷོ་ཁོག་རྣམས་སུ་ཕེབས་ནས་མ་བཞུགས་པས་དཔོན་སློབ་རིན་པོ་ཆེར་དགོངས་རྫོགས་ཕྱག་རོགས་མཛད་དེ་སྐུ་གདུང་མཆོད་རྟེན་ཐོག་སོ་གསུམ་དུ་སླེབས་པ་ཞིག་བཞེངས་ནས་རབ་གནས་ཀྱང་རྒྱས་པ་གྲུབ། དཔོན་སློབ་རིན་པོ་ཆེས་གདན་སའི་ཁུར་བཞེས་གནང་དགོས་ཚུལ་ནན་གྱིས་གསོལ་ཡང་གྲུབ་དབང་རིན་པོ་ཆེར་དགོངས་འཁྲོལ་ཞུས་པ་བཞིན་ཞལ་བཞེས་མ་མཛད་པར་སླར་སྟག་མོ་སྒང་དུ་ཕེབས། དེ་ནས་མི་རིང་བར་རྒྱ་ནག་གླང་ཆེན་འགྱིང་རིར་ཕེབས་བཞེད་ཀྱིས་རིམ་པར་དར་རྩེ་མདོར་ཞབས་བསྐྱོད་པས་ལྕགས་ལ་རྒྱལ་པོ་སོགས་མི་ཆེན་ཆེ་དགུ་ཐམས་ཅད་ཀྱིས་བཀའ་ཆོས་ཞུས་ཤིང་ཟང་ཟིང་དངོས་འབྱོར་བསམ་གྱིས་མི་ཁྱབ་པ་ཕུལ། དུས་ཟིང་གིས་བཀག་ནས་རྒྱ་ནག་ཏུ་ཕེབས་མ་གྲུབ་པས་དགུན་དེར་མི་ཉག་རི་ཁུད་དགོན་དུ་བཞུགས་ནས་རི་ཁུད་ཆོས་རྗེ་སོགས་འདུས་པ་ཡོངས་ལ་རང་གཏེར་གཙོ་བོར་གྱུར་པའི་དབང་ལུང་ཁྲིད་སོགས་ཟབ་གསང་ཆོས་ཀྱི་བདུད་རྩི་ཅི་དགར་བསྩལ་བར་མཛད། གཞན་ཡང་རྒྱལ་འཕགས་བླ་མ་ཨོ་རྒྱན་ལྷུན་གྲུབ་སོགས་རྟའུ་མི་ཉག་རྣམས་སུ་བཀའ་ཆོས་འཆད་སྤེལ་དང་འགྲོ་ཕན་གྱི་ཕྲིན་ལས་རྒྱ་ཆེར་བསྐྱངས་ཏེ་སླར་སྟག་སྒང་དུ་ཕེབས། དེ་ནས་རིམ་པར་སྟོད་ཕྱོགས་སུ་ཕེབས་རྒྱུའི་དགོངས་གཏད་གནང་བ་ན། སྡེ་དགེའི་ཁྲི་ཆེན་གྱིས་དབུའི་མཆོད་གནས་སུ་གཏན་བཞུགས་དགོས་པའི་གསོལ་བ་བཏབ་ཀྱང་གསང་ལུང་གི་སྟབས་ཀྱིས་ཞལ་བཞེས་མ་མཛད་པར་སྲིན་རྫོང་དུ་ཕེབས་ཤིང་། ཇི་སྐད་དུ་གཏེར་ལུང་ལས། གནམ་ས་ཟླ་ཕྱེད་འདྲ་བའི་ལུངཿ རི་བོ་རྒྱལ་བློན་ཚོགས་འདྲའི་མདུནཿ སྐུ་གསུང་ཐུགས་ཀྱི་ལྷ་ཁང་དངཿ སྒྲུབ་པའི་གང་ཟག་བདུན་སྡེ་ཚུགས། ཞེས་གསུངས་པ་ལྟར། སྤྱི་ལོ་༡༧༠༤པ་སྟེ་རབ་བྱུང་བཅུ་གཉིས་པའི་ཆུ་མོ་ལུག་གི་ལོར་ཆགས་རུ་འོད་གསལ་སྒྲུབ་སྡེ་བཏབ་ནས་གཙུག་ལག་ཁང་རྟེན་དང་བརྟེན་པ་དང་བཅས་པ་ལེགས་པར་བཞེངས། བར་ལམ་ས་སྐྱོང་སྡེ་དགེའི་ཆོས་རྒྱལ་བསྟན་པ་ཚེ་རིང་གིས་སྐུ་ཚབ་ཧོར་འདྲ་ཆིབས་དྲེལ་དང་བཅས་གདན་ཞུས་ནན་ཆེན་བྱུང་བ་ལྟར་མདོ་སྨད་ཕྱོགས་སུ་ཡང་དུ་ཆིབས་བསྐྱོད་གནང་ནས། རྗེ་ཉིད་ཀྱི་རང་གཏེར་སོགས་དབང་ལུང་གི་ཆོས་བཀའ་དུ་མ་དང་ཆབ་སྲིད་ཀྱི་མངའ་ཐང་དགུང་དུ་འདེགས་པའི་ཐུགས་སྨོན་རིམ་གྲོ་བཞེད་དོན་བཞིན་ཕུལ། ས་སྐྱོང་ཉིད་ཀྱིས་ཀྱང་བསྙེན་བཀུར་འབུལ་ཞབས་བསམ་གྱིས་མི་ཁྱབ་པ་མཛད་ཅིང་སླར་ཡང་གདན་ས་གོང་མར་ཆིབས་བསྒྱུར་གནང་། གདན་སར་ཞབས་པད་བཀོད་གྲུབ་ནས་ཀྱང་གདུལ་བྱ་སོ་སོའི་སྣོད་དང་འཚམས་པར་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་སྤྱི་དང་། ཁྱད་པར་ཆོས་བདག་ལུང་ཟིན་རྣམས་ལ་རང་གཏེར་ཆོས་ཀྱི་ཕ་ཕོགས་ལན་གཅིག་མ་ཡིན་པར་ཡང་ཡང་བསྩལ་ཅིང་སྨིན་གྲོལ་གདམས་པ་དུ་མས་རྗེས་སུ་འཛིན་པར་མཛད། སྔ་ཕྱིར་དབང་ཆོས་ཀྱི་བཀའ་དྲིན་ནོད་པའི་སློབ་བུ་བགྲངས་ཀྱིས་མི་ལང་པ་བྱོན་པ་ལས་གཙོ་བོའི་མཚན་ཙམ་སྨོས་ན། སྤྲུལ་པའི་གཏེར་ཆེན་རིག་འཛིན་གར་དབང་རྡོ་རྗེ། སྡེ་སྲིད་སངས་རྒྱས་རྒྱ་མཚོ། རྒྱལ་ཐང་པ་རིག་འཛིན་ཟིལ་གནོན་རྡོ་རྗེ། མངའ་རིས་འོད་མཆོག་སྤྲུལ་སྐུ། ཞབས་དྲུང་པདྨ་གར་དབང་། ཆོས་རྗེ་རིག་འཛིན་བྲེས་པ། ཧོར་ལོ་ཆེན་འཇམ་དབྱངས་བློ་ལྡན། དཔོན་སློབ་ནམ་མཁའ་འོད་གསལ། རིག་འཛིན་ཨོ་རྒྱན་ཆོས་རྗེ། སྟག་ལུང་ཞབས་དྲུང་། མི་ཉག་མཁན་པོ་ཤཱཀྱ་འོད་ཟེར་སོགས་ཕྱོགས་ཀྱི་བླ་ཆེན་མང་པོ་དང་། ཇིང་གིར་རྒྱལ་པོ་དཱ་ལ་བ་ཐུར་ཐེར་ཛེ། ལྕགས་ལ་རྒྱལ་པོ། གླིང་སྲས་རྡོ་རྗེ་མགོན་པོ། ཁམས་སྡེ་དགེའི་ཆོས་རྒྱལ། ནང་ཆེན་རྒྱལ་པོ་སོགས་མི་ཆེན་ཆེ་དགུ་མང་པོས་གཙུག་ཏུ་མཆོད་ཅིང་ཏི་ཤྲིར་བཀུར། དེ་ལྟའི་གྲུབ་པའི་རྣམ་ཐར་ངོ་མཚར་བ་དཔག་ཏུ་མེད་པ་བསྟན་པའི་མཐར་དགུང་གྲངས་རེ་བཞི་བཞེས་པ་སྤྱི་ལོ་༡༧༡༠ལོ་སྟེ། རབ་བྱུང་བཅུ་གཉིས་པའི་ལྕགས་སྟག་དབོ་ཟླའི་ཉ་ལ་གཟུགས་སྐུའི་བཀོད་པ་ཆོས་དབྱིངས་བདེ་བ་ཆེན་པོའི་དབྱིངས་སུ་བསྡུས་ནས་པདྨ་འོད་ཀྱི་ཞིང་དུ་གཤེགས་སོ། །
[༢] ཉི་སྤྲུལ་གཉིས་པ་པདྨ་ཐེག་མཆོག་བསྟན་པའི་རྒྱལ་མཚན།
ཉི་སྤྲུལ་གཉིས་པ་པདྨ་ཐེག་མཆོག་བསྟན་པའི་རྒྱལ་མཚན་ནམ་རིག་འཛིན་བསྟན་སྐྱོང་རྒྱ་མཚོ་ནི། སྤྱི་ལོ་༡༧༡༢པ་སྟེ་རབ་བྱུང་བཅུ་གཉིས་པའི་ཆུ་འབྲུག་ལོར་ཡབ་ལྷ་མོ་དར་དང་ཡུམ་ངག་དབང་མཚོ་མོ་གཉིས་ཀྱི་སྲས་སུ་ནགས་ཤོད་དུ་སྐུ་འཁྲུངས། གསུང་ངག་བྱེ་བའི་ཐོག་མ་ནས་བཟུང་གཏེར་སྟོན་རིག་འཛིན་ཆེན་པོའི་སྐྱེ་བ་ཡིན་ཚུལ་གསུངས་ཤིང་། སྐུ་སྔ་མར་གཏེར་བཏོན་ཚུལ་དང་སྒོམ་སྒྲུབ་མཛད་ཚུལ་སོགས་ནས་ན་བཟའ་ཉེར་སྤྱོད། གྲྭ་པ། རྟ་དྲེལ་སོགས་ཐུགས་ཀྱི་བག་ཆགས་མ་བརྗེད་པའི་ངང་ཚུལ་ཤིན་ཏུ་གསལ། དགུང་ལོ་བཞི་པ་ནས་ཡིག་ཀློག་ཕུལ་བས་དཀའ་ཚེགས་མེད་པར་མཁྱེན། དགུང་ལོ་ལྔ་བཞེས་པ་མེ་སྤྲེལ་ལོར་སྲིང་རྫོང་འོད་གསལ་སྒྲུབ་སྡེ་རུ་འདུས་ཚོགས་ཀྱི་སེར་སྦྲེངས་དང་བཅས་སྤྱན་དྲངས། གདུང་སྲས་རིན་པོ་ཆེ་དང་མཇལ་འཕྲད་མཛད་ཅིང་སྐུ་ཚབ་དང་གཏེར་རྫས་ཤོག་སེར་ངོས་བཟུང་བ་དང་། ཁྱད་པར་ཤོག་སེར་གྱི་ཐོག་ནས་གཏེར་གྱི་བརྡ་ཡིག་ཐོགས་མེད་དུ་ཀློག་པར་མཛད་པས་ཐམས་ཅད་ཡ་མཚན་གྱི་གནས་ལ་བཀོད་པར་བྱས། དགུང་ལོ་བདུན་བཞེས་པ་ས་ཕོ་ཁྱི་ལོར་གདན་ས་འོག་མ་སྟག་མོ་སྒང་དུ་བླ་མ་བློ་གྲོས་རྒྱ་མཚོ་སོགས་ཀྱིས་གདན་ཞུས་ལྟར་ཞབས་པད་བཀོད། རིམ་པར་རུ་དམ་གདན་སར་ཕེབས་ཏེ་དཔོན་སློབ་ནམ་མཁའ་འོད་གསལ་དང་མཇལ་ཞིང་འཇའ་ཚོན་དཀོན་སྤྱི་སོགས་དབང་ཆོས་གང་མང་གསན། དགུང་ལོ་དགུ་པར་སླར་སྲིན་རྫོང་དུ་ཕྱིར་ཕེབས་ནས་སྐུ་ཡོན་གསན་བཞེས་མཛད་པས་སྐྱེས་ཐོབ་ཀྱི་ཤེས་རབ་ཕུལ་དུ་བྱུང་བས་དཀའ་སྤྱད་ལ་མ་ལྟོས་པར་ཐུགས་རིག་ཀློང་བརྡོལ་བས་མདོ་སྔགས་རིག་གནས་དང་བཅས་པར་ལན་རེ་གཟིགས་པ་ཙམ་གྱིས་ཐུགས་སུ་ཆུད་པ་སྟེ། རིག་གནས་ཀྱི་སྐོར་སྐར་རྩིས་སྙན་ངག་སོགས་དང་། བཟོ་རིག་ལ་གཏོགས་པ་ལྷ་རིས། ལན་ཝར་སོགས་རྒྱ་བོད་ཀྱི་ཡིག་རིགས་མང་པོ་དང། གར་ཐིག འཆམ། དབྱངས་རོལ། གཏོར་བཟོ་སོགས་གང་ཅིར་མཁས་པའི་རྩེར་སོན། ཁྱད་པར་མདོ་སྔགས་སོ་སོའི་ལམ་འགྲོས་དང་གྲུབ་མཐའ་སོ་སོའི་བཞེད་མཚམས་སོགས་ལ་བློ་གྲོས་ཀྱི་འཇུག་པ་ཡངས་ཤིང་གྲུབ་མཐའི་ཁས་ལེན་ཡང་ཀུན་མཁྱེན་ཆེན་པོའི་ལུགས་ཁོ་ན་ལྟར་མཛད་པར་གྲགས། སྐུ་གཞོན་སྐབས་སུ་ཉི་གྲགས་རྒྱལ་སྲས་རིན་པོ་ཆེའི་ཞལ་སྔ་ནས་གོང་མའི་གཏེར་ཆོས་ཀྱིས་མཚོན་བཀའ་གཏེར་གྱི་དབང་ཁྲིད་ཐམས་ཅད་བུམ་པ་གང་བྱོའི་ཚུལ་དུ་གསན། རྟ་མགྲིན་དང་ཚེ་སྒྲུབ་བདུད་བཞི་གཡུལ་རྒྱལ་གྱི་བསྙེན་མཚམས་སྐབས་ལྷག་ལྷ་དུ་མས་ཞལ་གཟིགས་སོགས་དག་པའི་སྣང་བ་བསམ་གྱིས་མི་ཁྱབ་པ་བྱུང་། སྨིན་གླིང་མཁན་ཆེན་འགྱུར་མེད་དོན་ཡོད་ཀྱི་ཞལ་སྔ་ནས་དགེ་ཚུལ་གྱི་སྡོམ་པ་བཞེས་པས་མཚན་པདྨ་ཐེག་མཆོག་བསྟན་པའི་རྒྱལ་མཚན་དུ་གསོལ། དབུས་གཙང་གི་གནས་ཆེན་རྣམས་སུ་སྔ་ཕྱིར་ལན་གཉིས་ཕེབས་ཏེ་བསྟན་འགྲོའི་སྤྱི་དོན་དུ་མཆོད་འབུལ་ཐུགས་སྨོན་ཟབ་མོ་གནང་། བར་སྐབས་ཁམས་ཕྱོགས་སུ་ཆིབས་བསྐྱོད་ཀྱིས་རུ་དམ་གདན་ས་ཆེན་མོ་དང་། རྒྱལ་རོང་རི་ཁྲོད། སྟག་མོ་སྒང་བཅས་སུ་ཕེབས་ཏེ་རྫོགས་ཆེན་མཆོག་སྤྲུལ་རིན་པོ་ཆེ་དང་། རྗེ་དབོན་པདྨ་ཀུན་གྲོལ་རྣམ་རྒྱལ་སོགས་སྐྱེས་ཆེན་རྣམས་དང་མཇལ་འཕྲད་མཛད་དེ་ཕན་ཚུན་དབང་ཆོས་འབུལ་རེས་མཛད། ལོ་དེར་དབུས་སུ་ཆིབས་བསྐྱོད་གནང་ནས་རྒྱལ་དབང་སྐལ་བཟང་རྒྱ་མཚོའི་དྲུང་ནས་བསྙེན་པར་རྫོགས་པའི་མཚན་ལ་ཀུན་བཟང་ཐེག་མཆོག་རྒྱ་མཚོར་གསོལ། དེ་ནས་བཟུང་འདུལ་བའི་ཕྱག་ལེན་ཕྲ་རགས་གནང་བཀག་གི་མཚམས་ཅུང་ཟད་ལ་ཡང་ནན་ཏན་ཆེན་པོ་མཛད་པས་སྐུ་བཙུན་པའི་ཚད་དུ་བྱུང་། ཆགས་རི་སྒྲུབ་སྡེའི་བཅའ་ཡིག་གསར་མཛད་གནང་ནས་དམ་ཆོས་འདུལ་བ་དང་མཐུན་པར་ནག་ཆང་གིས་མཚོན་པའི་བཅའ་ཁྲིམས་ཤིན་ཏུ་དམ་པར་བསྡམས། མེ་ཕོ་སྟག་ལོ་ནས་བཟུང་ལྕགས་མོ་སྦྲུལ་ཡན་ལོ་ངོ་རིལ་པོ་བཅོ་ལྔ་ལ་སྐུ་མཚམས་བཅད་རྒྱར་བཞུགས་ཤིང་། དེ་དག་གི་ཚེ་ཞུ་དགོས་པའི་རིགས་དང་ཐ་ན་ཕྱག་དཔེ་འཚོལ་བ་ཚུན་ཉིན་གུང་གི་གསོལ་ཚིགས་དང་བསྟུན་པ་ལས་གཞན་པའི་དུས་ཚོད་ལ་ལྷོད་གཡེང་མི་མཛད། འབྲུག་ལོར་སྡེ་དགེ་ས་སྐྱོང་ལྕམ་དྲལ་གྱི་སྐུ་ཚབ་དང་སྟག་སྒང་ལས་སྣེ་སོགས་གདན་འདྲེན་དུ་ཕེབས་པ་ལྟར་སྐུ་མཚམས་ལས་བཞེངས་ཏེ་མདོ་ཁམས་སྨད་དུ་ཆིབས་བསྐྱོད་གནང་། སྦྲུལ་ལོའི་ཟླ་བ་བཅུ་པའི་ཚེས་བཅོ་ལྔ་ལ་དངུལ་མདའ་ལྷུན་གྲུབ་སྟེང་དུ་ཕྱག་ཕེབས། དེར་སྡེ་དགེའི་ཁྲི་ཆེན་ལྕམ་དྲལ་དང་མཇལ་ཞིང་ཆོས་རྒྱལ་ཆེན་པོས་སྔ་ཕྱིར་ཕོ་བྲང་དང་བཞུགས་སྒར་སོགས་སུ་སྤྱན་དྲངས་ནས་དབང་ལུང་གསན་ཅིང་འབུལ་ཆེན་ལན་མང་དུ་མཛད། ཟླ་བ་བཅུ་གཅིག་པའི་ཚེས་གསུམ་ལ་དཔལ་ལྡན་སྟག་མོ་སྒང་སྐལ་བཟང་ཕུན་ཚོགས་གླིང་གི་གདན་ས་ཆེན་པོར་ཕྱག་ཕེབས། ཆུ་ཕོ་རྟ་ལོར་རྫོགས་ཆེན་དགོན་དུ་གྲུབ་དབང་སྐུ་རབས་གསུམ་པའི་མཆོག་སྤྲུལ་རིན་པོ་ཆེ་ཁྲི་འདོན་མཛད་ཅིང་གཙུག་ཕུད་བཞེས་པའི་མཚན་ལ་ཀུན་བཟང་བསྟན་པའི་མགོན་པོ་ཞེས་གསོལ། ཕྱིས་རྗེ་འདི་ཉིད་ཀྱི་ཞལ་སྔ་ནས་རབ་ཏུ་བྱུང་བས་སྔ་མའི་མཚན་གྱི་འཕྲོས་ངེས་དོན་བསྟན་འཛིན་བཟང་པོར་གསོལ། སྤྱིར་རྗེ་འདི་སྐུ་ན་གཞོན་ནུ་ནས་བསྙེན་སྒྲུབ་ཀྱི་རིགས་ལ་ཆིག་སྒྲིལ་གནང་བ་དང་། སྔར་ཆུ་བྱི་ལོར་ལོ་སྒྲུབ་རིལ་པོ་གཅིག་དང་། དེ་རྗེས་མེ་འབྲུག་ནས་ས་ལུག་བར་ལོ་གསུམ་དང་། སླར་མེ་སྟག་ནས་ལྕགས་སྦྲུལ་བར་ལོ་རིལ་བཅོ་ལྔ་དང་། སྟག་སྒང་དུའང་ལོ་མཚམས་རིལ་པོ་གཉིས་དང་བཅས་ལོ་མཚམས་རིལ་པོ་ཉེར་གཅིག་དང་། གཞན་བྱོན་བཞུགས་སོགས་ཀྱི་བར་གསེང་ཅུང་ཟད་བྱུང་ནའང་སོས་དལ་བག་ཡངས་སུ་ནམ་ཡང་མི་བཞུགས་པར་སྐུ་མཚམས་ཁོ་ན་མཛད་པས་ཁྱོན་དྲིལ་རགས་རྩིས་སུ་ལོ་ངོ་སུམ་ཅུ་རྩ་གྲངས་ལ་ཡི་དམ་སོ་སོའི་བསྙེན་སྒྲུབ་དང་། རྫོགས་ཆེན་སྣང་རིག་གཉིས་ཀྱི་རྣལ་འབྱོར་དང་རླུང་སྦྱོར་སོགས་དུས་གནད་དང་བསྟུན་ཏེ་ཉམས་བཞེས་གནང་བས་སྣང་སྲིད་ཐམས་ཅད་རབ་འབྱམས་རྒྱལ་བའི་དཀྱིལ་འཁོར་དུ་རྒྱས་ཐེབས་པས་ཕྲིན་ལས་རྣམ་བཞི་གང་ཡང་ཐོགས་མེད་དུ་གྲུབ། རྫོགས་རིམ་རྩ་ཐིག་རླུང་གསུམ་དབུ་མར་ཞུགས་པས་བདེ་བ་ཆེན་པོའི་ཡེ་ཤེས་རྒྱས་པའི་ཐུགས་ཉམས་ཤིན་ཏུ་གསལ། ཀ་དག་གཞི་རྫོགས་འཕོ་འགྱུར་མེད་པའི་དབྱིངས་སུ་བྱང་ཆུབ་པས་འཁོར་འདས་ཐམས་ཅད་གཞི་མེད་རྩ་བྲལ་དུ་གྲོལ། སྣང་སྤྱོད་ཐམས་ཅད་རང་སྣང་རིས་མེད་དུ་ཤར་བས་གཟུང་འཛིན་གྱི་མཚན་མ་དབྱིངས་སུ་དག་ཅིང་མཉམ་རྗེས་རེས་འཇོག་གི་ཤུན་པ་བུད་ནས་རིས་མེད་འོད་གསལ་ཁོར་ཡུག་གི་ཏིང་ངེ་འཛིན་ལ་དབང་འབྱོར་བ་སོགས་གྲུབ་པའི་དབང་ཕྱུག་ཆེན་པོའི་ལྟ་དགོངས་ཀྱི་རྩེ་མོར་སོན། གཞན་ཡང་དམ་པའི་རྣམ་ཐར་མཁས་བཙུན་བཟང་གསུམ། མཁས་པའི་མཛད་པ་འཆད་རྩོད་རྩོམ་གསུམ་བཅས་ཡོན་ཏན་ཐམས་ཅད་ཀྱིས་མངོན་པར་ཕྱུག་པས་གསུང་རྩོམ་བསྟན་བཅོས་ཀྱང་པུསྟི་གཉིས་ཙམ་མཛད་པ་དང་། མཆོག་དམན་གྱི་གདུལ་བྱ་རྣམས་ལ་སོ་སོའི་བློ་དང་མཚམས་པའི་དབང་ཁྲིད་བཤད་ལུང་སོགས་ཆོས་ཀྱི་འཁོར་ལོ་བསྐོར་བ་བསམ་གྱིས་མི་ཁྱབ། རྗེ་འདི་ཉིད་ཀྱི་གསུང་གི་བདུད་རྩི་བཞེས་པའི་ཞལ་སློབ་བཤེས་གཉེན་ཆེན་པོ་འོལ་ཆོས་སྡིང་གི་རྒྱལ་སྲས་སྤྲུལ་པའི་སྐུ་རིན་པོ་ཆེ་དང་། ལྕགས་ར་ངག་དབང་སྤྲུལ་སྐུ། སྟག་ཕུ་སྤྲུལ་བའི་སྐུ། ལྷ་མགོན་སྤྲུལ་སྐུ། ངོར་མཁན་ཆེན་དཔལ་ལྡན་ཆོས་སྐྱོང་། རྫོགས་ཆེན་གསུམ་པ་ངེས་དོན་བསྟན་འཛིན་བཟང་པོ། ཤར་རྡོ་རྗེ་འཆང་རིན་ཆེན་མི་འགྱུར་རྒྱལ་མཚན། ཞུས་ཆེན་མ་ཧཱ་པཎྜི་ཏ། ལྷན་ལོ་ཚུལ་ཁྲིམས་རིན་ཆེན། རྫ་སྔགས་རམ་པ་འགྱུར་མེད་བསྟན་འཕེལ། ཟེ་ཆེན་རབ་འབྱམས་སྤྲུལ་སྐུ། ཀཿཐོག་པ་དྲི་མེད་ཞིང་སྐྱོང་། དཔལ་ཡུལ་བླ་མ་ཀརྨ་བཀྲ་ཤིས། རྡོ་བྲག་མཆོག་སྤྲུལ་སྐལ་བཟང་པདྨ་དབང་ཕྱུག རྗེ་དབོན་པདྨ་འཇིགས་མེད། བླ་མ་བསྟན་འཛིན་སྙིང་པོ། མཁས་མཆོག་གུ་རུ་བཀྲ་ཤིས། ཆེ་ཡོལ་རིག་འཛིན་ཆེན་མོ་སོགས་རིས་མེད་སྐྱེས་ཆེན་མང་པོ་རྗེ་འདིའི་བསླབ་པ་གསུམ་དང་མང་དུ་ཐོས་པའི་ཡོན་ཏན་གྱིས་ཐུགས་འཕྲོག་སྟེེ་ཞབས་ལ་བཏུད་ཅིང་བསྔགས་པར་བརྗོད་པ་བསམ་གྱིས་མི་ཁྱབ། དེ་ནས་རེ་ཞིག་ཞིང་ཁམས་གཞན་གྱི་གདུལ་བྱ་འདུལ་བའི་དུས་ལ་བབ་པར་གཟིགས་ནས་རིང་པོར་མི་བཞུགས་པའི་གསུང་འཕྲོས་འགའ་བྱུང་བ་དང་། ཆེ་ཡོལ་རིག་འཛིན་ཆེན་མོ་དང་མཁས་མཆོག་གུ་རུ་བཀྲ་ཤིས་སོགས་ཐུགས་ཟིན་ཞལ་སློབ་ཉུང་བསྡུས་ལ་མཁའ་འགྲོ་སྙིང་ཐིག་གི་དབང་ཁྲིད་བསྩལ་ཅིང་། དབང་དུས་སུ་རྗེ་ཉིད་རིགས་ལྔ་པྲོག་ཞུ་གར་གོས་སོགས་ལོངས་སྤྱོད་རྫོགས་སྐུའི་ཆས་གསོལ་ཏེ་སྤྲུལ་པའི་སྐུ་ལས་ལོངས་སྐུར་བཞེངས་པའི་རྟེན་འབྲེལ་མཛད། དེ་ནས་རྡོ་རྗེ་བྲག་མཆོག་སྤྲུལ་མདོ་སྨད་ནས་དབུས་སུ་ཕེབས་པར་མཇལ་ཕྱིར་རུ་དམ་དུ་ཆིབས་བསྐྱོད་དང་ཕར་ཚུར་དབང་ལུང་གསན་བཞེས་ཀྱང་ཞིབ་རྒྱས་གྲུབ། དེ་རྗེས་སྐུ་ཅུང་ཟད་ལྟེམ་ཚུལ་བྱུང་བར་སྐུ་རིམ་ཞབས་བརྟན་གང་རྒྱས་ཕུལ་ཡང་བཞུགས་པར་མ་གནང་བར་རུ་དམ་བླ་བྲང་དུ་གཞན་སྣང་གཟུགས་སྐུའི་བཀོད་པ་ཆོས་དབྱིངས་བདེ་བ་ཆེན་པོར་མནལ་བའི་ཚུལ་བསྟན་པར་མཛད་དོ། །
[༣] ཉི་སྤྲུལ་གསུམ་པ་མི་འགྱུར་ཕན་བདེ་རྒྱ་མཚོ།
ཉི་སྤྲུལ་སྐུ་ཕྲེང་གསུམ་པ་མི་འགྱུར་ཕན་བདེ་རྒྱ་མཚོ་ནི། སྤྱི་ལོ་༡༧༧༢པ་སྟེ་བོད་རབ་བྱུང་བཅུ་གསུམ་པའི་ཆུ་འབྲུག་ལོར། མདོ་སྨད་སྡེ་དགེའི་མངའ་རིས་ལས་ཟིལ་ཁྲོམ་རྡོ་རྗེ་གཡུང་དྲུང་རྩལ་གྱིས་སྐྱོང་པའི་སྨན་ལྗོངས་ཡིད་ལྷུང་དུ་གྲགས་པའི་ས་ཆ་རུ། ཡབ་ཁྲ་མོ་གླིང་གི་རིགས་ལས་ཆད་པའི་ཚེ་དབང་འཕེལ་ཞེས་པའི་ལྷ་ཁྱིམ་དུ་སྐུ་འཁྲུངས་པ་སྟེ། ཐོག་མར་ལྷུམས་སུ་ཞུགས་སྐབས་ཡབ་ཡུམ་གཉིས་ལ་ལྟས་ངོ་མཚར་ཅན་དུ་མ་བྱུང་ཞིང་། ཁྱད་པར་ཡུམ་གྱི་རྨི་ལམ་དུ་མི་དཀར་པོ་ཞིག་གིས་དུང་གི་མེ་ཏོག་དཀར་མཛེས་ཤིག་བྱིན་པ་ཁོང་དུ་མིད་པས་བདེ་བ་ཆེན་པོའི་ཉམས་བཟང་པོ་རྩོལ་མེད་སྐྱེ་བ་བྱུང་། བཙས་ནས་ཟླ་འགའི་རྗེས་རྫོགས་ཆེན་དབོན་རིན་པོ་ཆེ་པདྨ་ཀུན་གྲོལ་རྣམ་རྒྱལ་ནས་དབང་ཁྲུས་མཛད་ཅིང་གཙུག་ཕུད་བཞེས་པའི་མཚན་ལ་མི་འགྱུར་ཕན་བདེ་རྒྱ་མཚོ་ཞེས་གསོལ། ཡབ་ཡུམ་ལ་བུ་ཆུང་འདི་རིགས་མ་ངེས་པ་ཞིག་འདུག་པས་གཙང་སྦྲ་བཟང་པོ་བྱེད་རྒྱུ་གལ་ཆེ་ཞིང་ནམ་ཞིག་བདག་པོ་བྱེད་པ་ཞིག་ཡོང་བ་ཡོད་ཅིང་ཁྱེད་གཉིས་ལ་ཕན་ཐོགས་པ་ཞིག་ཡིན་ཞེས་ཞལ་བཀོད་བསྩལ་ཏེ་ཕེབས། བྱོན་ལམ་ནས་གྲྭ་རིགས་རྣམས་ལ་གསུང་འཕྲོས་སུ་སྔ་ལོར་སྤྲུལ་བའི་ཆོས་སྐྱོང་ཆེན་པོའི་སྐུ་ཕེབས་དུས་ཉི་སྤྲུལ་རིན་པོ་ཆེ་ངེད་དང་ཞལ་མཇལ་ཡོང་གསུངས་པས་ད་ལྟ་ཚེ་དབང་འཕེལ་ཚང་གི་བྱིས་པ་དེ་ཨེ་ཡིན། གཞན་དུ་ཁོ་བོ་རྒས་པའི་མཐར་ཐུག་པ་ཞིག་དང་ཞལ་མཇལ་འོང་བའི་རེ་བ་ཅི་ལ་ཡོད་ཅེས་གསུང་འཕྲོས་གནང་སྟེ་དོན་གྱི་ངོས་འཛིན་མཛད། གཞན་ཡང་ས་སྐྱ་གོང་མ་རིན་པོ་ཆེ་དང་། རྡོ་བྲག་རིག་འཛིན་ཆེན་མོ་སྐལ་བཟང་དབང་ཕྱུག །རྫོགས་ཆེན་རིན་པོ་ཆེ་ངེས་དོན་བསྟན་འཛིན་བཟང་པོ་སོགས་སྒྲིབ་བྲལ་མཁྱེན་པའི་ཡེ་ཤེས་མངའ་བ་ཀུན་ཀྱི་ལུང་བྱང་གཅིག་མཐུན་གྱིས་ཐུགས་ཐག་བཅད། དེ་ནས་སྤྲུལ་བའི་སྐུ་དགུང་གྲངས་ལྔ་བཞེས་པ་མེ་ཕོ་སྤྲེལ་ལོ་སྤྲེལ་ཟླའི་ཚེས་བཅུ་ལ་སྲིན་རྫོང་ནས་བླ་མ་བསྟན་འཛིན་སྙིང་པོ་ཕྱིར་ཕེབས་པ་དང་། རྫོགས་ཆེན་རིན་པོ་ཆེ་ངེས་དོན་བསྟན་འཛིན་བཟང་པོ། རྒྱལ་རོང་མཆོག་སྤྲུལ་སོགས་གཞི་བྱེས་ཀྱི་བླ་གྲྭ་ལྷན་རྒྱས། ས་སྐྱོང་སྡེ་དགེའི་སྐུ་ཚབ་བཅས་ཀྱིས་བསུ་བའི་བཀོད་པ་རྒྱ་ཆེན་པོས་མདུན་བསུས་ནས་སྟག་མོ་སྒང་སྐལ་བཟང་ཕུན་ཚོགས་གླིང་གི་གཙུག་ལག་ཁང་དུ་གཏེར་ཆེན་ཆོས་ཀྱི་རྒྱལ་པོའི་རྡོ་རྗེའི་ཁྲི་ལ་ཞབས་ཀྱི་པད་མོ་མངོན་པར་བཀོད། རྫོགས་ཆེན་མཆོག་སྤྲུལ་རིན་པོ་ཆེས་ཨོ་རྒྱན་བསྟན་པའི་ཉི་མ་མི་འགྱུར་ཕན་བདེ་རྒྱ་མཚོ་ཞེས་མཚན་འབུལ་དང་འབྲེལ་བཀྲ་ཤིས་པའི་མེ་ཏོག་གཏོར་ནས་ཞབས་བརྟན་ཚིགས་བཅད་ཀྱང་མཛད། ཞབས་རིང་པ་དགེ་རྒན་པདྨ་དབང་ཕྱུག་གིས་ལྗགས་ཀློག་ཕུལ་ཞིང་སྦྱོང་བརྡར་མཛད། རིམ་པར་གོང་མའི་ཐུགས་སྲས་ཐུ་བོ་རིག་འཛིན་དཔའ་བོ་ལས་རབ་རྩལ་ལས་བཀའ་བརྒྱད་བདེ་གཤེགས་འདུས་པའི་དབང་ལུང་ཡོངས་རྫོགས་དང་། ངེས་དོན་བསྟན་འཛིན་བཟང་པོ་ལས་ཉི་གྲགས་གཏེར་བྱོན་ཆོས་སྐོར་ཡོངས་རྫོགས་ཀྱི་དབང་ལུང་། རྫོགས་ཆེན་མཁའ་འགྲོ་ཡང་ཏིག །འཇའ་ཚོན་སྤྱི་འདུས་སོགས་ཟབ་རྒྱས་ཆོས་ཀྱི་བདུད་རྩི་ཇི་སྙེད་བཞེས་པ་དང་། དགུང་ལོ་བཅུ་པ་ལྕགས་མོ་གླང་གི་ལོར་གདན་ས་གོང་མ་སྲིན་རྫོང་དུ་ཆིབས་ཀྱི་ཁ་ལོ་བསྒྱུར་བ་ན་བསུ་བའི་བཀོད་པ་དུ་མས་མདུན་བདར་ཏེ་གཏེར་ཆེན་བླ་མའི་ཆོས་ཁྲི་ལ་ཞབས་ཀྱི་པད་མོ་བཀོད། ས་མོ་བྱ་ལོར་དབུས་ཕྱོགས་སུ་ཕེབས་ལམ་ནས་འབྲི་གུང་པ་པདྨ་བསྟན་འཛིན་ཆོས་ཀྱི་རྒྱལ་མཚན་གྱི་དྲུང་ནས་རས་ཆུང་ལུགས་ཀྱི་རྟ་མགྲིན་སོགས་དབང་ལུང་གསན་པ་དང་། སྨིན་གླིང་མཁན་ཆེན་ལས་ཚིགས་སྔ་མ་རབ་ཏུ་བྱུང་བ་དགེ་ཚུལ་གྱི་སྡོམ་པ་བཞེས་ཤིང་། གཏེར་ཆེན་འགྱུར་མེད་རྡོ་རྗེའི་གཏེར་ཆོས་ཆ་ཚང་དང་། ཕུར་པ་བཀའ་མ། ཡང་དག་སོ་ལུགས། གསང་བདག་དགོངས་རྒྱན་སོགས་ཆོས་བཀའ་མང་དུ་གསན། ཁྱད་པར་དོན་མཁར་ཚེ་རིང་ལྗོངས་སུ་ཕེབས་ཏེ་ངེས་པ་དོན་གྱི་ཐམས་ཅད་མཁྱེན་པ་ཀློང་ཆེན་ནམ་མཁའི་རྣལ་འབྱོར་རིག་འཛིན་འཇིགས་མེད་གླིང་པའི་ཞབས་པད་ལ་བཏུད། རྗེ་འདི་ཉིད་ལས་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་དབང་ལུང་གྲོལ་ཁྲིད་དང་བཅས་པའི་ཟབ་ཆོས་སྤྱི་དང་། ཕུར་པ་རྒྱུད་ལུགས་སོགས་རྗེ་ཉིད་ཀྱི་དགོངས་གཏེར་ཆོས་སྐོར་ཐམས་ཅད་དང་། གཏེར་སྟོན་ཤེས་རབ་འོད་ཟེར་གྱི་གྲོལ་ཐིག རྒྱལ་དབང་ལྔ་པའི་དག་སྣང་རྒྱ་ཅན་སོགས་བསྩལ་ཅིང་ཆོས་ཀྱི་བདག་པོར་གཟེངས་བསྟོད་དེ་རིག་འཛིན་འཇིགས་མེད་བརྟན་པའི་སྡེ་ཞེས་མཚན་གསོལ། དེ་བཞིན་རྒྱལ་དབང་བརྒྱད་པ་འཇམ་དཔལ་རྒྱ་མཚོའི་ཞལ་སྔ་ནས་ཚིགས་ཕྱི་མ་དགེ་སློང་གི་དངོས་པོར་བསྒྲུབས་ནས་ངུར་སྨྲིག་གི་རྒྱལ་མཚན་འཛིན་པའི་བརྟུལ་ཞུགས་ཀྱིས་སྤ་བར་མཛད། དེ་དག་གི་སྐབས་སུ་ཇོ་ཤཱཀ་རྣམ་གཉིས་སོགས་བླ་མ་ཆོས་སྡེ་ལ་དངོས་འབུལ་གྱི་མཆོད་སྤྲིན་རྒྱ་ཆེན་པོ་སྤྲོ་བར་མཛད། གདན་སར་ཕྱིར་ཕེབས་ནས་ལོ་གསུམ་ཕྱོགས་གསུམ་གྱི་བཅད་རྒྱར་ཐུགས་དམ་ཟབ་མོའི་ཉམས་བཞེས་ལ་ཐུགས་བརྩོལ་གནང་། དེ་ནས་ཆུ་ཕོ་བྱི་ལོར་རིམ་གྱིས་སྐུ་མཚམས་གྲོལ་བ་དང་སྡེ་དགེར་ཆིབས་ཞལ་བསྒྱུར་ཏེ་རུ་དམ་གདན་ས་དང་། རྒྱ་རོང་། སྟག་མོ་སྒང་། ཐུབ་བསྟན་ནོར་བུའི་གླིང་། སྡེ་དགེའི་རྒྱལ་ས་སོགས་ཆོས་དམ་གྱིས་འབྲེལ་བའི་དགོན་གནས་ཡུལ་གྲུ་ཁག་ལ་ཕེབས་ཏེ་བཤེས་གཉེན་རྣམས་ལས་དབང་ཁྲིད་ཀྱི་རྒྱུན་གསན་བཞེས་དང་། དད་ལྡན་སེར་སྐྱ་མཆོག་ཕལ་ཡོངས་སོ་སོའི་མོས་ཁམས་དང་མཚུངས་པའི་ཆོས་ཀྱི་འཁོར་ལོས་སྨིན་ཅིང་གྲོལ་བར་མཛད། སླར་ས་ཕོ་རྟ་ལོར་དབུས་ཕྱོགས་སུ་ཆིབས་བསྒྱུར་གནང་ནས་བླ་མ་ལྷ་རྟེན་རྣམས་ལ་མཆོད་སྤྲིན་སྤྲོ་བ་དང་། ཁྱད་པར་ཀུན་མཁྱེན་འཇིགས་མེད་གླིང་པའི་ཞབས་ལ་བཅར་བར་བཞེད་ཀྱང་ཀུན་མཁྱེན་ཉིད་ཞིང་དུ་གཤེགས་ཚར་བ་དང་འགྲིག་པས་གདན་ས་དེར་འབུལ་སྐྱེས་གང་རྒྱས་དང་། སྐུ་གདུང་རིན་པོ་ཆེའི་སྤྱན་སྔ་ནས་འཆི་མེད་བདུད་རྩི་སྨན་གྱི་སྒྲུབ་པ་ཞག་བདུན་ཕྲག་གཅིག་ལ་གནང་། དེ་སྐབས་ངོ་མཚར་བའི་ལྟས་དུ་མ་དང་ཁྱད་པར་སྐུ་གདུང་རིན་པོ་ཆེ་ཤིང་སྒྲོམ་དུ་བཞུགས་སུ་གསོལ་ཏེ་གདུང་ཚྭས་བར་མཚམས་མེད་པར་གཏམས་ཀྱང་ཞབས་སེན་གཡས་པ་ཚེག་སྒྲ་དང་བཅས་མཆོག་སྤྲུལ་རིན་པོ་ཆེ་འདིའི་སྐུ་པང་དུ་ལྷུང་། སྒྲུབ་ཆེན་གྲོལ་ནས་ལྷ་ལྡན་ཕྱོགས་སུ་ཞབས་པད་བཏེགས་ཏེ་གདན་ས་ཆེ་ཁག་གི་ལྷ་བླར་མཆོད་འབུལ་མང་ཇ་སོགས་བློའི་ར་བ་ལས་འགོང་པའི་ཚོགས་བསགས་མཛད་། རྗེ་འདིས་སྔ་ཕྱི་ཀུན་ཏུ་གདན་ས་གོང་འོག་རྣམས་སུ་གཙུག་ལག་ཁང་དང་སྐུ་གསུང་ཐུགས་ཀྱི་རྟེན་བཞེངས་མཛད་པ་བསམ་གྱིས་མི་ཁྱབ། བར་ལམ་སྐུ་ཚེའི་གེགས་འཕྲང་ཆེ་བ་དང་སྙུང་གཞི་གཅིག་སངས་གཉིས་སླེབས་ལྟ་བུ་བྱུང་བས་ལུང་དོན་བཞིན་རྡོ་རྗེ་འཛིན་པའི་སྔགས་ཆས་བཞེས་ཏེ་གཏེར་སྒོ་འབྱེད་དགོས་ཚུལ་བསམ་ཡས་ཆོས་སྐྱོང་ཆེན་པོ་དང་། དྭགས་པོ་གཏེར་ཆེན། ཀུན་བཟང་འོད་ཟེར་རིན་པོ་ཆེ་སོགས་ཀྱིས་ཞབས་བསྐུལ་ཡང་ཡང་ཕུལ་ཡང་། རྗེ་ཉིད་ཚུལ་ཁྲིམས་ཀྱི་བསླབ་པ་རིན་པོ་ཆེར་གཅེས་སྤྲས་ཆེ་ཞིང་སྙིགས་དུས་བསྟན་པའི་མིག་རྒྱན་དུ་དགོངས་ནས་ཇི་མི་སྙམ་པར་འཇོག་པར་མཛད། སླར་ཡང་ནག་སོག་གཉིས་ཀྱི་མི་དཔོན་སེར་སྐྱ་ཡུལ་དགོན་ཀུན་ཀྱིས་བར་ཆད་ཀྱི་དབང་དུ་འགྲོ་བར་མ་བཟོད་པར་ཞུ་བསྐུལ་ཡང་ཡང་ཕུལ་བ་ལ་བརྟེན་ནས། འདུལ་བ་རང་གཞུང་གི་ཕྱག་སྲོལ་ལྟར་རབ་བྱུང་གི་ཆས་གོས་ཐམས་ཅད་དགེ་འདུན་གྱི་སྤྱན་སྔར་ཕུལ་ཏེ་རྡོ་རྗེ་འཛིན་པའི་ཆས་ཀྱིས་སྤ་བར་མཛད་ཀྱང་ལུང་དོན་ཕལ་ཆེར་ཕྱི་ཐལ་དུ་ལུས་པའི་སྐྱོན་གྱིས་རྟེན་འབྱུང་ཟབ་མོ་དུས་ལས་ཡོལ་ཞིང་། དགུང་གྲངས་ཞེ་དྲུག་བཞེས་པ་རབ་བྱུང་བཅུ་བཞི་པའི་མེ་གླང་ལོར་དཔལ་རི་པདྨ་འོད་ཀྱི་ཞིང་ཁམས་སུ་མངོན་པར་གཤེགས་པར་མཛད་དོ། །
[༤] ཉི་སྤྲུལ་བཞི་པ་འཇིགས་མེད་ཆོས་དབྱིངས་རྡོ་རྗེ།
དེ་ནས་སྐུ་རབས་བཞི་པ་འཇིགས་མེད་ཆོས་དབྱིངས་རྡོ་རྗེ་ནི། དྭགས་པོ་གཏེར་ཆེན་རྡོ་རྗེ་རྒྱལ་པོའི་སྲས་སུ་སྐུ་འཁྲུངས་ཤིང་། རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེས་ངོས་འཛིན་མཛད། གདན་ས་གོང་འོག་གི་གསེར་ཁྲིར་འཁོད་དེ་བསྟན་འགྲོའི་ཕན་བདེ་རྒྱ་ཆེར་སྤེལ་ནས་སྐུ་གཤེགས་སོ། །
[༥] ཉི་སྤྲུལ་ལྔ་པ་བསྟན་འཛིན་ཕྲིན་ལས་དབང་ཕྱུག
སྐུ་རབས་ལྔ་པ་བསྟན་འཛིན་ཕྲིན་ལས་དབང་ཕྱུག་ནི། ཨེ་ལྷ་རྒྱལ་རི་ཆོས་རྒྱལ་གདུང་རྒྱུད་ལ་སྐུ་འཁྲུངས། སྐུ་གོང་མའི་ལུང་གིས་གསལ་བ་ལྟར་ངོས་འཛིན་སྐུ་བདག་མཛད་དེ་གདན་སར་སྤྱན་དྲངས། བཤད་སྒྲུབ་ལས་གསུམ་གྱི་ཕྲིན་ལས་ཕྱོགས་བརྒྱར་འཕེལ་བཞིན་སྐུ་གཤེགས་སོ། །
[༦] ཉི་སྤྲུལ་དྲུག་པ་ཐུབ་བསྟན་འོད་གསལ་བསྟན་པའི་ཉི་མ།
སྐུ་རབས་དྲུག་པ་ཐུབ་བསྟན་འོད་གསལ་བསྟན་པའི་ཉི་མ་ནི། མདོ་ཁམས་ཆབ་མདོ་ཐོ་གྲུ་གུའི་ས་ཆ་རུ་རྟོགས་ལྡན་ཤཱཀྱ་ཤྲཱིའི་གདུང་རྒྱུད་ལ་སྐུ་བལྟམས། གྲུབ་དབང་ལྔ་པ་ཆེན་པོ་ཐུབ་བསྟན་ཆོས་ཀྱི་རྡོ་རྗེས་ངོས་འཛིན་མཛད། གསེར་ཁྲིར་བཀོད་དེ་གདན་ས་གོང་འོག་རྣམས་སུ་དབང་ཁྲིད་ཀྱི་བཀའ་ཆོས་ཐེངས་འགའ་བསྩལ། ལུགས་གཉིས་ཀྱི་མཛད་པ་མཐར་རྒྱས་ངང་སྐུ་གཤེགས་སོ། །གཏེར་ཆེན་རིག་འཛིན་ཆེན་པོ་སྐུ་རབས་རྗེས་མ་གསུམ་གྱི་རྣམ་ཐར་འདི་ཙམ་ལས་ལག་སོན་མ་བྱུང་བས་ཐེངས་འདིར་རྒྱས་པ་བཀོད་ཐབས་བྲལ་བས་ཡིད་ཤིན་ཏུ་ཕངས་ཤིང་། རྗེས་སོར་མཁྱེན་དཔྱོད་ལྡན་པ་དག་གིས་ངག་རྒྱུན་ཙམ་ལས་མ་བཞུགས་ཀྱང་བསྡུ་སྒྲིག་ལ་ཐུགས་ལྷོད་མི་མཛད་པར་ཞུ། །